"Дарт" редколлегилэн пумиськемез сярысь

Весь верасько, "Дарт" газет - со туж умой инты, егит удмуртлы аслэсьтыз быгатонлыкъёссэ, ужъёссэ возмьатыны. Кин суредаське, комикс лэсьтэ, гожъяське...

Туннэ газет бордын нырысьсэ редколлегия люкамы. Та адямиос - Мария Емельянова, Анна Бурдина, Алексей Степанов, Евгений Александров, Максим Агафонов, Ульяна Вахрушева, Гриша Головкин... - оскиськом,  ми кадь ик, Мария Векшина, Вера Штыкова но Анастасия Шумилова, газет бордын сюлэмзэс поныса ужалозы шуыса. 

Малпанъёссы туж муресь, туалаесь но тунсыкоесь. Нырысь ик, ми газетэз пыр-поч эскерим. Конечно, нырысь ик, газет бамъёсты визуально пӧртэм кароно, со синмез мед бордаз кыскоз, шудоз шуыса. Туала вакытэ уго сыӵе "полифоничной" егитъёс. Собере - уг тырмо ёросъёсысь контент. Утчаськоно, оло кытын ке Ярын вуоно кизили будэ, яке Каракулиноысь лыдӟись ёросысьтыз материал возьма (ну таиз сярысь соку ик комикс малпазы, со луоз вуоно номерын). Туж, пе, лыдӟымон, кстати, тодмо адямиос сярысь, яке соос сярысь отын маке вань ке, материалъёс - ну таиз валамон. Со сяна, дэмламын вал номерысь номере азинскиз произведение, шуом. Кылсярысь, фанфикъёс но нылмурт-повесть - возьмаськом гожтӥськемзэ. 

Матысь дыре ужпумъёсмы таӵе:

- азинсконо вотэсын
- лыдӟосвылэз паськытатоно (тросгес ёросъёсысь материалъёсты утчано)
- газетлэн бамъёсаз трос пӧртэм графической амалъёс ватсано
- конкурсъёс, шудонъёс, комиксъёс, мемъёс лэсьтылоно
- кыӵе ке темаез эскерись материалъёс гожъяно
- лыдӟисьёсын кусып тупатоно

Вакчияк вераса, кин ке выль мылкыдын ӝуатскиз, кин ке адӟиз: "Дарт" газетлэн азьлань сюресэз туж тунсыко но узыр луоз. Возьмаськом вуоно номерез. Со бордын ми ужаны кутскомы ни вуоно арняысен. Нош редколлегиялэн ӧсъёсыз усьтэмын, витиськом коткьуд мылкыд карисез - газетэз ӵошен лэсьтомы. Пумиськонъёсмы сярысь ивортыломы "ВКонтакте" бамамы.

Туспуктэм понна тау, Максим Агафоновлы. 

Александр Бречаловен пумиськеммы бере

Синъёсме кыни. Усьтӥ. Нош ик:
Чёрт! Сюлэм пазяське.

Малы ми, удмурт егитъёс, огласянь, сыӵе адӟем карымонэсь, азьветлӥсьёс, котьмалы быгатӥсесь, ужасесь... таӵе пумиськонэз келям. Котыр ласянь келям. Ӧм быгатэ чебер возьматыны асьмелэсь ужъёсмес - котьмар шу, но нырысь вылтусыд шоры учко, собере гинэ тынэсьтыд пуш дӥньдэ адӟо. "Шунды" огазеяськон презентацизэ возьматыкуз, Александр Бречалов часъёсыз шоры учкылыны кутскиз. Солы мӧзмыт.

- Нырысь ик, презентация лэсьтыны дышетсконо. Ми ваньзэ кулэ лэсьтыны ӟеч. 2-тӥ инты басьтӥды ке, озьыен, келяды, - берло шуиз Александр Владимирович.

Собере пичияк дышетӥз но. Ачиз но юанъёс сётъяз.
- Кӧня уксё кошке "Шундыкарез" ортчытыны?
- 900 сюрс.
- Кытысь со уксё висъяське?
- Тросэз министерствоосысь.
- Ми мукет сямен уксё поттыны дышетскыны кулэ, - шуиз Александр Бречалов.

Валамон, Удмуртилэн али туж бадӟым долгез, кредитъёс понна туж трос процентъёс тыроно. Соин ик, кышкытлык но кылдэ: "Шунды" азьланяз ӧз дышы ке ужаны грантъёсын, крауфандинген, тросэз проектъёсыз пиштэмысь дугдозы, ачиз но пиштэмысь ӧз дугды ке. Сокем дышемын ни бюджет чотын улыны.

- Кызьы удмуртлыкен уксё поттод? - пумиськем бере кылӥськизы егитъёс куспын вераськонъёс.

Мон, зэмзэ ке, малпасько вал, удмурт егитъёслэн ӧвӧл ни нокыӵе рамкаоссы, вӧлдэтъёссы. Соос оско асьсэ кужымзылы, улонэн оградын вамышъяло. Та пумиськонын со ӧз шӧдӥськы. Возьдаськизы. Нош пумиськонлэн берпуметӥ минутъёсаз сюлме бышкиз "Зелёный паровоз" огазеяськонлэн ньӧлыз. Оломар но эн малпалэ, мон туж гажасько та огазеяськонэз. Соос просто кужмогес адӟиськизы. "Шунды" огазеяськонэн пумиськоныне азьветлӥсь вераз, кызьы соос батарейкаосты утилизировать карыны 200 сюрс бичазы... крауфандинг амалэн, ӧтизы вуоно пумиськоназы, отын, пе, вераськозы, кызьы Ижкарез азьпала поттыны жуг-жагез выльысен уже кутонын.


Мар шуом: табере эшшо но чырмытгес ужано. Лябмес возьматӥмы, табере кулэ кужыммес адӟытыны. Эшшо но золгес ужано.

Озьыен, ӧтисько ӵуказе 17.30 часын Ижысь "Лифт" юртэ, отын ортчоз "Дарт" газетлэн редколлегиеныз пумиськон. Ужпум: лэсьтыны проектъёс но азинтыны газетмес. Та дырлы валтӥсь малпан: кылдытыны быгатӥсь егитъёслы вотэсбам, отчы видео лэсьтӥсьёс но, суредаськисьёс но, гожъяськисьёс но, литераторъёс но, ваньзы, кин творчествоен выре, асьсэ ужъёссэс печатланы мед быгатозы шуыса.

- Мар каромы "Дарт" пумиськонын, - юаз туспуктылӥсь Максим Агафонов.

- Малпанъёсмес зэматом, - шуи мон.

Ну табере вуриськисе

Дышетсконэ быре ни. Диссертация эскериське. Шуисько:

- Табере дышетскыны мыно вуриськисе. Чебер вуриськыны дышетско. Так то али но урод уг, но соку умойгес быгато, тодо коть, кызьы мар. 

Дэрем кулэ луиз ке, ваиське, ӝыны ар ортчыса... 

Кӧня ке Александр Волков сярысь

Александр Волков элькунэн кивалтӥз мон пичи дыръям. Соку ик пушкам гыбда вылэм ни, лэся, гражданской позициелэн гизьыез. Соин ик мон ялан вӧталляй. Валтӥсь геройёс - мон но Александр Волков. 

Одӥг ласянь, мынам сое потэ вал небыт кресло вылысьтыз куштэм. Сылӥсько Резиденция азьын. Пикет. Но малы ке но мон огнам. Куддыр вӧзам луэ 5-6 адями.

Мукет ласянь. Мон сиськисько соин ӵош одӥг ӝӧк сьӧрын. Ӝӧк кузь, тӧдьы - вань котыр но юг-тӧдьыен пиштэ, Инмарлэн куаяз кадь. Мон улӥсько солэн юртаз, отын мон понна вань нимысьтыз висъет. Ми соин эшъяськиськом.

Озьы. Котьмар малпалэ. 

"Таӵеез удмурт литератураын ӧй вал на!"

Пукси гожтыны верос. Йырам шуак шуккиз герой: СО пуке гуртаз ӵогаськыса, вань укнооссэ возъяса, нервной но нокинэн кусып уг возьы. Суреданы ассэ суредай, но ведь табере та состоянилэн кыӵе ке мугез луыны кулэ. Малы со озьы улыны кутскиз.

Номыр йыре уг лыкты. Кулэ юрттэт.

Малпай, герой военной журнаист шуыса. Мынӥз ожгар интые. Татын кулэ кылдыны кыӵе ке коллизия. Юасько воргоронлэсь: мар шуисько луыны быгатэ ожгарын, мар бере со коркасьтыз уг пота ни.

Шуиз:
- Кӧльыяз пуля мед сюроз, яке осколок...

Мон кутски горыны (оло кинлы ке серем но ӧвӧл!) куӵыктымонозь.

Азьланьтӥз:
- Пыдзэ осколокен вандӥз ке, со кышкыт ӧвӧл на, милям заводын трос пыдтэм адямиос ужало. Улонлы шумпото. Нош кӧльы ке...

Солы аслыз гожъяськоно вал, кылыз яркыт, син азе пуктымон, метафоричной, критикъёс шоккеттэк шуысалзы: "Таӵеез удмурт литератураын ӧй вал на!"

Ачим ик веросме йылаз-пумаз вуттӥ. Герое мынам конспиролог луиз. Лыдӟе "Удмурт дунне" газетлэн "Ингож" номерысьтыз. Матысь дыре.

Удмурт кылэд ик тонэ сюдоз ай

Дэбесын:

Трос аръёс талэсь азьло одӥг пияш, пе, удмурт кылъя урокын пазяське, уг дышеты мон та удмурт кылэз, малы со мыным кулэ.

Дышетӥсез шуэ:

- Удмурт кылэд ик тонэ сюдоз ай.

Ог 20 ар ортчиз, озьы ик луиз.

Трос иворен йырин, дыр

Вакытлэн аспӧртэмлыез-а, мар со? Калык уг вуылы ужрадъёсы. Ивор носётӥськод но кадь, реклама лэсьтӥськод. 

Надежда Уткинаен вераськыкумы, со вераз, Швейцариын, пе, 50 адями концертэ бичан понна, трос уксё но кужым кисьтоно. Ялон так гинэ уд ошы. Вазиськоно пӧртэм агентствоосы, журналистъслы. Интернетын зол ужано яке аслыд тууж тодмо адями луоно.

Таӵе югдур асьме вылэ но вуэ ни. Туннэ жингыртӥзы З. Богомоловалэн премиеныз вырись адямиос. ӧжыт, пе, ужъёс вуэмын. Иворъёс сётъяно вылэм, а ведь вань гаезт-журналъёссёто кадь ивор, всё равно ӧвӧл пыриськись. 

Асьме дуннеямы улӥськом ми, коркаямы укноосмы но ӧсъёсмы н ворсмын кадь. Яке со туж трос информация вӧлмемен йырин, реклама тросэн йырин (калык просто уг синйылты ни соосты, уг лыдӟы)? Яке адямиослы со зэмзэ но кулэ ӧвӧл, соослэн али мукет цельёссы. Но кыӵе меда?

Жаль, уг яратӥськыны пӧраськыны

Умой писательлы гожъяськон понна, коркасьтыз но потано ӧвӧл. С. Довлатов, пе, озьы малпа вал, вера А. Генис.

Так вот, мон соглаш А. Генислэн мукет малпанэныз - вань пӧртэм писательёс. Мыным, кылсярысь, кулэ потыны ульчае, гуртэ, вераськыны котьку адямиосын. Али пукисько квартираын, балконысен шокасько город омырен, учкисько укное но валасько, шыкысэ куанермыны кутске, йыр виымме вырӟытӥсь малпанъёсы шеромо. Кулэ потыны кыре, поръялскыны. 

Кытысь меда кылдэ весь выльзэ но выльзэ тодыны жажда?. Адями вылэ туала вакытэ котькытысь ивор киське - кулэез, кулэтэмез. Кызьы чида йыр? Да, мон йылпумъянозь вуи: адями али висе. Шӧдылӥды-а, ӧжытгес лыдӟиськыны, иворъёсты лыдӟыны, я ВКонтактеысь лентадэс шергес учкылыны, адямиослэн улонысьтызы фактъёсты тодыны кутскиськоды ке, кыӵе ке дискомфорт кылдэ. Ӧвӧл меда со висён? Мон кема дыр ӵоже статьяос, чемысь соос луо литературоведческоесь, уг лыдӟиськы ни ке, сютэм луисько. Собере одӥг ӝытэ пуксисько но, давай, кутске ни мынам. Текст бере текст. Нош та шузимымон "постмодернизм" вакытэ со тектсъёсты кулэ на расшифровать карылыны. Тон астэ шузи кожаськод, туж трос буш интыостэ йырысьтыд шедьтӥськод но соосты информациен тырмытыны турттӥськод. Соку ик шӧдыны кутскиськод, а улон то вакчи. Мыным N арес ни, нош мон сомындазэ уг тодӥськы на. 

Нош улон азьлань кошке. Кызьы гожтэ Эпштейн, калык со сьӧры уйиськыса уг вутты. Азьланяз ведь эшшо выль терминъёс, эшшо но золгес пӧлэстӥськем текстъёс потозы на. Поди и расшифровывай соосты, дыр сьӧры уд вуттӥськы ке бызьыса. И татын вуэ малпан.

Гур сьӧрын ик бергаса, корка котырдэ утялтыса, умойгес ӧз луысал меда? Жаль, уг яратӥськыны пӧраськыны.

Удмурт дерем сярысь.

Удмурт песянай сюанэ ӟуч дэрем дӥсям. Тамада ушъяз, сыӵе туала песянай, пе.

Кӧня ке ортчыса со удмурт дэремен вал ни.

- Малы бон воштӥськиды?
- Акыльтӥ, ӝокасько!

Со дыре верасько егитъёс:
- Мынам воксё но удмурт дэреме ӧвӧл. Малы со кулэ? Огшорызэ дӥсяд но тӥни.

Алигес М. Атамановлэн Грак тетрадьысьтыз калык дӥсь пумысен малпанъёссэ лыдӟи. Шуэ: макем чебер адӟисько удмурт нылкышноос удмурт дэремъёсын. Нырысь асьсэ калык дӥсьсылэсь куштӥськизы ӟучъёс, табере калленэн-калленэн удмуртъёс. Со тодаз вае на, кызьы 30-тӥ-40-тӥ аръёсы ай бызем кышноос нуллӥзы такъяос но айшонъёс. Пӧсь куазь шоры учкытэк но айшонлэсь секталазэ чидаса. Нырысь такъязэ куштӥз огез кышномурт - аракуз, собере, солэсь адӟем карыса, мукетъёсыз.

Адямилэн ассэ яратонэз арысь ары кужмоя, шуо мон. Сыӵе секыт айшонэз куятэ нуллы ай.

Удмурт дерем сярысь.

Удмурт песянай сюанэ ӟуч дэрем дӥсям. Тамада ушъяз, сыӵе туала песянай, пе.

Кӧня ке ортчыса со удмурт дэремен вал ни.

- Малы бон воштӥськиды?
- Акыльтӥ, ӝокасько!

Со дыре верасько егитъёс:
- Мынам воксё но удмурт дэреме ӧвӧл. Малы со кулэ? Огшорызэ дӥсяд но тӥни.

Алигес М. Атамановлэн Грак тетрадьысьтыз калык дӥсь пумысен малпанъёссэ лыдӟи. Шуэ: макем чебер адӟисько удмурт нылкышноос удмурт дэремъёсын. Нырысь асьсэ калык дӥсьсылэсь куштӥськизы ӟучъёс, табере калленэн-калленэн удмуртъёс. Со тодаз вае на, кызьы 30-тӥ-40-тӥ аръёсы ай бызем кышноос нуллӥзы такъяос но айшонъёс. Пӧсь куазь шоры учкытэк но айшонлэсь секталазэ чидаса. Нырысь такъязэ куштӥз огез кышномурт - аракуз, собере, солэсь адӟем карыса, мукетъёсыз.

Адямилэн ассэ яратонэз арысь ары кужмоя, шуо мон. Сыӵе секыт айшонэз куятэ нуллы ай.

Удмуртъёс ваньзэ асьсэос быгато

- Малы удмуртъёс уг басьяло дизайнеръёслэсь дӥсьсэс (яке мар ке кулэ ке, заказ уг сёто профессиональъёслы)?

- Удмуртъёслэн сямзы сыӵе, соос ваньзэ асьсэос быгатыны кулэ...

Та вераськонэз кылем бере, йырам шальк! вазиз. Тодам вайи: пичи дыръям мон кулэ вал ваньзэ ачим лэсьтыны! Йырам но ӧй вал, кинэ ке но мае ке лэсьтыны куроно шуыса. Малпасько вал: мон ваньзэ ачим быгатӥсько лэсьтыны. Дыр ортчемъя, дунее паськытаны кутскиз. "Элькунам" пырын кутскизы пӧртэм быгатонлыкъёсын адямиос, выль ужъёс, валатонъёс... Мон пумен-пумен пичигес кыльыны кутски. Всемогущий адямилэсь пӧрми аслэсьтым одӥг ужме яратӥсь адями. Валай - суредаськыны уг быгатӥськы, кур юрттэс чебер суредаськисьлэсь, уд валаськы тон Фотошопез - мын эшед доры. Ужед чебергес но ӟечгес пӧрмоз.

Нош пересьми ке, мар?

Туннэ уж дурысь бертыкум, шуак малпаськонэ уси. Нош пересьми ке, мар? Ӧвӧл, мон уг кышкаськы пересьмыны. Просто реакцие луоз кӧня ке калленгес (тормоз), йыры ужалоз гань-гань (лыктӥзы на ке кыӵе ке тунсыко малпанъёс). Нош кызьы ужатэк улом? Пенсие потод но тонэ уллялозы, егитъёс-то будо, соос-то кулэ, соослэн-то реакцизы чилектэм кадь.

Собере малпай: пуко мар ке гожъяса, удмурт кылэ берыктылыса, редактироватьтылыса. Ведь поколениысь поколение адямиос удмурт кылэз уродгес но уродгес тодыны кутско. Нош мон - али, арлыдоосын ӵошатыса, мынам кылтӥрлыке туж ляб - со дырлы удмурт кылэз умой тодо.

Алнаш ёросын Любовь Ганькова гожъяськись вань. Солы ӧжыт арес ӧвӧл ни - гожъяське. Кылыз тууууж узыр. Мон "Сьӧлыктэм Анна" вероссэ лыдӟонъям, троссэ кылъёсты кыллюкамам гожъяй.

Ылё-кырсёесь ми

Корка котырез турнаны малпай. Потӥ. Ульча кузя бускеле кошке. 

- Тон, Маши, турнаськыны но быгаткод-а мар-а? 

Сыӵе ини милям поколенимы - ылё-кырсё, городо-гурто, кызьы шуыны но уд вала ни. Ярам, нылпиосмы кусоен вырыны быгатозы на, дыр. Мынамъёсыз точно - туган шуонэ гуртэ кыстӥське, пудоен, пе, выро. Нош нылпиосылэн нылпиосыз кусоез алфавитысь гинэ адӟозы на, дыр.  

Гербер сярысь кӧня ке.

Тодӥськоды на-а пичи дырысьтыды Гербердэс? Кема возьмам дыр, кема возьмам но шудо.

Милям сое шуо маёвка. Пичи дыръям мон ӧй адӟылы кадь юэмъёсты. Нош маёвка дыръя юо вал - егитэз но, пересез но. Нырысь, ку колхоз кужмо вал ай, милям маёвкамы ортчылэ вал вӧл-вӧл бусыын, гурт пумын. Мон чебер дэремме дӥсяса одӥг гурт пумысь вамыштӥсько мукет гурт пуме, куасьмыны кутскем Сьӧд шур вамен шальтрам выжез (со вамен кышкаса потылӥ) ортчыса. Собере тубисько вырйылэ, ортчиськод кузь кенер вӧзтӥ но мырдэ вуиськод...

Одно ик ворсам синмын кузьым вандынымынӥськод вал. Тани синъёсыд ворсамын. Со азьын чаляк гинэ учкиськод, кытын мар ошкиське. Аха - чупа-чупс, яке жвачка вандоно вал шуыса мынӥськод (кызьы тыныд потэ шонерак) со доры. Хрыч! Ручка...

Уйвӧтам огпол гинэ ӧй адӟылы маёвкаысь суредэз: мынӥько грузовик доры, уробояз  мороженноен вуз карись сылэ. Чалякгес мороженной басьтӥськод - тани кырӟаны потоз Пудова. Но со тӧдьы жигули сьӧрын дӥсьсэ воштэ вылэм ай. 

Маёвкаысь ӝук - вань ӝукъёс пӧлысь ческытэз. 

Нош али. Али адӟисько на юэмъёсты гинэ. Кемалась ик ӧвӧл вуылӥ одӥг гуртэ эше доры. Как раз Гербер вал. Вит Сергейёс мар ке гольтыръясько сцена вылын, ми шудӥм волейбол, собере монэ китӥм кутӥзы но нуизы ышыг интые, писпуос пӧлы. Поттӥзы, асьтэос валады, дыр, мар.

Инбамын шунды пиштэ. Йыр берга. Мон ӝуай. 

Италмаслэн дунлыкез быроз...

Н: - Мерттӥ укно улам тӧдьы сирень. Всё! Гуртоос визьтэммизы: уг яра гуртэ тӧдьы корка котыре мерттыны, уродлы со.

Т: - Ма азьло доре италмасэз но мерттылыны уг лэзё вал. Ваньзы мерттылӥзы.

П: - Мон тодэмъя, лулпуез гуртэ точно мерттыны уг яра.

Ачим: - Ма, конечно, со ву трос кыске, гуртад вутэк пукод а-ато ке.

П: - Лулэз со кыске.

Ачим: - Ма нош... Вань "осконъёслэн" вань практической основаез. Италмасэз мерттӥд ке, солэн дунлыкез быроз. Котькуд укно улын со будӥз ке. Нош тӧдьы сиренез малы уг лэзё, йырам уг шуккы.

Пичи дыръям Мама мерттӥз вал укно улэ тӧдьы сирень. Мон сое, тулыс утялскыкум, ӵогыны шедьтӥ.

Мынам но укно улам сяськаяське...

Шумпотод-а, бӧрдод-а? Саша Гладышлэсь удмурт нылзэ лушкаллям)

Мынӥськом эшеным Ижкар кузя. Учкисько: Ижкарлэн нуналыз сярысь афишаос удмурт но ӟуч кылъёсын поттылэмын. "Ммм, - малпасько. - Антиутопия гожтыса ӧй вуы на, нош монэ сюлмаськытӥсь тематика актуальностсэ ыштэ ни. Дыртоно".

Суред басьтэмын Саша Гладышлэсь бамысьтыз.

- Тае Саша Гладыш суредаз-а?  - юасько эшелэсь.

- Ы-ы, шуэ.

Кин тодэ "Лудкеч но эбек" но Саша Гладышлэсь мукет мультфильмъёссэ, со вералоз: конечно, кин эшшо сое суредалоз на? Тӥни удмурт нылаш но солэн кадь. Но, жаляса верано, со озьы вылымтэ. Мон малпасько, берло дыре ваньзы ог-огзэсты гажало ни, особенно творческой адямиос (но творчествоын трос коньдон берга ке, дан но гажан кылъёс йырысь тэляло вылэм - озьы вал азьло, озьы али но).

Та баннеръёсты суреданэн выриз Ижысь одӥг медиагруппа. Солэн кивалтӥсез шуэ: кыӵе плагиат? Огшоры удмурт ныл, удмурт дэремен. Гладышлэн воксё мукет, пе. Суредъёс шоры учкелэ ай: огвыллем.

Но татын мон верало, удмурт дэремъёс Удмуртилэн пӧртэм сэрегъёсаз пӧртэмесь, даже шуо, котькуд гуртын аслаз удмурт дэремез. Но, удмурт дэремен нылэз суредасьёс та сярысь, валамон, уг тодо вал!

Коть кышетсэ, монистазэ но дэремысьтыз суй пужызэ мукет суредалэ вал. Дырзы ӧз тырмы, лэся.

Саша Гладыш туж интеллегентной нылаш! Со талы шуэ:
- Мынам уг поты нокинэн керетэм. Просто потэ, адямиос мед зэмзэ тодозы шуыса.

Алнаш со, Алнаш ини. Марина борды.

Алнаш почтаысь жингыртӥзы. Вазизы удмурт кылын, дото зол тараторитьтэ, нырысь ӧй ик вала.
- Посылкады, пе, вуиз! Иже ыстоноо-а? Адресты Ижысь. Индекссэ Алнашысь гожтӥллямды.
Берло гинэ йырам шуккиз, ыы, шуисько, Иже лэзе.

Алнаш со, Алнаш ини, оо ведь.

Бызё, уг бызьы, яратӥсько, уг

Мынам одӥг тодмое шуэ, уг бызьы, пинал вордо но луо шудо. Типа карьера лэсьто. 

Мынам одӥг тодмое шуэ, карт ӧй шедьты ке, мон лучше огнам уло. Нылпи вордыны астэ огнад медад кожа шуыса? Нылпи виноват ӧвӧл ук, озьы кылдэм ке.

Мынам одӥг тодмое вера, быдэс улонме мон вошъяло туганъёсме, одӥгеныз кемагес улӥсько ке, акыльтӥсько мон! Соин ик мон улонэз гучыкен-гучыкен юон понна. Нош коктейлъёс ӵемысь вошъяськыны кулэ.

Мынам одӥг тодмое шуэ, мон шедьто одӥг карт, но асме быдэсак солы сӥзё, кулэ ӧвӧл мыным дано уж, мыным кулэ семья. Шуныт!

Марлы мон али ваньзэ тае тодам вайисько? 16-тӥ тулыспалэ Яратӥсьёслэн нуналзы ук. Нош котькуд адямилэн улон шоры учконэз, яратонзы но пӧртэмесь. Егитъёслэн Dart газетсы конкурс лэсьтэ - ыстэ асьтэ историостэс, малпанъёстэс.  

Таджикен Омар Хаям сярысь

Удмуртка

- Нош тон кин национальностедъя? - юаз мынэсьтым таджик-таксист.

- Удмуртка, - шуи но валай, макем чебер но мусо кылӥське та кыл. Йырам выльысь но выльысь бергатӥ: удмуртка.

Соку таксистэ вераны кутскиз, кыӵе чебересь удмуртъёслн синъёссы, сыӵе векчиесь, пе (таджикъёслэн кадь ик, малпай ас поннам!). Ваньзылы, пе, сыӵе синъёс уг мыно, особенно пиостылы, нош нылъёстэс соос чебергес каро. Мынам, пе, вал удмуртка туганэ, Эльвира. Синъёсызлы синмаськи, ар но ӝыны ӵош ветлӥм.

Берло дыре таксистъёсын уг удалты вал. То нервноез сюре (уг яраткы таӵезэ), то кескичез, то эшшо кыӵеез ке... Нош таиз вал интеллектуал. Мынытозямы оломар сярысь но вераськыса вуттӥм кадь.

Ага, малпасько: вӧзам пуке таджик. Тодам вайыны турттӥсько, кыӵе писательёсын солэн шаерез тодмо (Виктор Леонидович Шибанов, этнофутуризмен параез нуэ, шуылэ, тӥ кытчы ке мыныкуды, фин-угор съездэ яке эшшо кытчы ке, одно ик пумиталоды мукет культураысь адямиосты. Соин ик тунсыкъяське вань культураосын, вераськыны но луоз мар сярысь. Юнме уг дышетскиськы вылэм). Омар Хайям...

И татын ми огкыл шедьтӥм. Со кутскиз вераны Омар Хайям сярысь. Кызьы со Иранысь пади-шах бордын улӥз но адямиосты алгебраез но физикаез валаны дышетӥз. Ноку но ӧз гожъяськы. Нош 80-эз ортчемез бере валаз: улон кошке, кыӵе ке пытьы кельтоно.Озьы гожтӥз одӥг единтвенный кылбуръёсын "Рубаи" книгазэ но али сое котькытын но котькин лыдӟе. Омар Хайям улӥз Персиын (Иранын). Гожъяськиз персидской кылын - со Азербайджанлэн, Таджикистанлэн, Иранлэн огъя кылзы.

- Отын солэн вань философиез, - шуиз таджик-таксист. - Олокинэн улытозь, ул огнад, оломар сиытозь, лу сютэм. Омар Хайям.

 Со эшшо кӧня ке чуръёсты лыдӟиз на. Собере мон кутски отын Флор Васильевез - "уг яратӥськы ӵышкем писпуосты"...

- Умой: тӥляд, удмуртъёслэн, вань асьтэ музъемды, со улосвыл ӧвӧл, со элькун.
- Тӥляд но вань ук!
- Вань. Самой узыр музъеммы.

Нош кыӵе пумыз та вераськонлэн? Таджикъёслэн тодмо сямзы:
- Тани кинэ мыным туган кутоно, тон визьмо. Ку тонэ татысь берен басьтоно?

Эшшо огпол война сярысь

Одӥг воргорончик, егит! марке монэн споръяськыны кутскиз:

- Война, пе, Россиын кутскоз.

- Уз, - шуисько.

Кутскоз, пе. Особенно природной катаклизмаос, пе, луозы.

- Бен, - шуисько, - вань инкуазьлэмь урод мылкыдзэ бугыртӥсь арбериос, быгато, шуисько кунъёс котьма. Но война, кыӵе со вал 40-тӥ аръёсы уз луы. Мукет кыӵе ке луоз.

Мукет, шуэ. Малы, пе, Россиын "Магнит" вузкаронъёсты пуктыло. Отын, пе, луозы "пункты" выдачи сухпайков".

Мынектӥ ас поннам. Кӧня ке улыса, мукетыз адями, властной структураосысь, пропаганда нуыны кутскиз егитъёс пӧлын, патриотической мылкыдмес кыдатыны выриз.

Война, шуэ, али мынэ, 4-тӥ дунневыл война. Ми огазе ӧм луэ ке... и т.д.

Егит гожъяськисьлэн еж малпанъёсыз

"Кенеш" журнал. 2014-тӥ ар.

Мон егит автор бере, верасько туалаез сярысь.  Туала удмурт литература, шуо, ӧвӧл: выль авторъёс уг адӟисько, выль произведениос лыдӟыны уг сюро. Малы озьы? Малы выль авторъёс уг азинско? Конечно, али дыре пыд вылазы султӥсь егитъёсты литература гинэ сюдыны уз быгаты - соин, вылды, литература ингожын яркыт тылын ӝуатскем будӥсь кужым кысэ но ассэ мукет удысын утчаны кутске, нош литература - ваньмон дыръя вырон интые гинэ кыле на.  Татын ик вераны луоз ӝуась тылэз «сюдон» сярысь. Гожъяськыны мылкыд котыр дунне сётэ ке но, кулэ на пыкъет, кудӥз юрттоз авторлы азинскыны. Мон малпамъя, одӥгез со пыкъетъёс пӧлысь луэ Писательёслэн Союззы но. Азьло гожъяськисьёс ветло вал съездъёсы, люкаськыло вал литература ӝытъёсы, конференциосы. Будӥсь кужымъёслы ас вакытаз со пумиськылонъёс но пӧртэм авторъёсын кусып возён трос пайда сёто вал. Нош али  выль авторъёс удмурт литературае нуись сюрес вылын ышо, уг валало, мар карыны азьланяз? Кылсярысь,  егитъёслы литературая вожвылъяськонъёсы пыриськон, валамон ни, вормон уг сёты (малыке шуоно вань Егор Загребин но мукет авторъёс), луысал ке соослэн творчествозылы серттон-пертчон но улонэз адӟем авторъёслэсь выль тодон-валанъёс басьтон но литератураын азьлань сюрес усьтон. Писательёслэн Союззы ас вакытаз трос будӥсь кужымъёсты яна поттӥз. Нош али выль авторъёс уг но тодо, вань-а ӧвӧл-а та огазеяськон, малы со воксё кулэ. Зэм ке, со кулэ.  Кытын тон, Писательёслэн Союззы? Оскисько, тон нош ик сайкалод шуыса, но уд сёты бырыны будӥсь кужымъёслы, басьтод соосты аслад бурд улад. Нош али выль авторъёс копак ас понназы.

2015-тӥ ар:

Да Союз Писательёслэн иземенызы гинэ йырин-а мар-а озьы. Ӧвӧл, конечно. Кин меда вормоз "Быдӟым лыдӟет даур" конкурсын?

P.S. "Дорвыжы" эпосын гожтэмын: выжыысь выжые адямиос кылёзы шузигес но шудтэмесьгес. Берпуметӥ вамышъёссэ лэсьтыкуз, берпуметӥ адями луоз кузьыли быдӟа. Ношо 10 адями  ӧжыт луоз тузон пырыез гинэ но ӝутыны.

Коммунизм вакытэ

Татын, валтӥсез, Ленин!

Ӵукна султӥсько, мынӥсько уж доры, уж бере мынӥсько университетэ, дышетскыса берен гуртэ бертӥсько. Озьы котькуд нунал. Ваньмыз радызъя. Нош мар та улонлэн палэназ луэ, адӟыса уг вуиськы.  Туннэ нуналэлэсь та радзэ тӥяй но валай, вот кытын тунсыко малпанъёс, вот кытын мукет улон. Толон, значит мон верай ни, дуннеын хаос шуыса. Нош туннэ мон верало, мар малпало со хаос сярысь шор ёзо поколениысь адямиос, коммунизм вакытэ будэм муртъёс.

Озьыен. Кинлы ке пофиг. Егитъёслы пофиг, соос телевизор уг учко, уг лыдӟо иворъёсты, пуко контактазы чебер дэремъёс учкыса но всякой розыгрышъёсты репоститьтыса. Мыным но пофиг, мкш валасько, асьмеос со бадӟым политикаын векчи кутъёс шуыса но, бызгетэм сяна, номырзэ воштыны ум быгатэ.

Озьыен, кылзӥськыса пуки Городмамалэсь малпанъёссэ всякой Сириысь пуштылонъёс сярысь, Россилэн Турциен кусыпъёссы сярысь... Мыняса кылзӥськи. Одӥгзэ гинэ юаны гинэ кылиз на точка пуктон понна. Юай.

- Ваньзэ тае учкыса, малпаськод, дыр, асьмеос умой улӥськом шуыса?

- Уг, - шуиз Городмама. - Войнаез возьмаса улӥськом.

- Войнаез?

- Война луоз, пе. Соку вань адямиос ог-радэ султозы. Кредитъёс ӝуалозы, ваньзы огкадь луозы.

Коммунизм вакытэ будэм адямиослэн йырвиымазы коммунизмлэн идеяосыз муре пыӵамын. Туж муре. Осконзы туж юн. Туж юн.

Сельхоз базар

Ӧтчазы монэ одӥг ужрадэ. Гурт удысъя академие, калыкъёслы сӥзем фестивале. Принципез таӵе: котькуд факультет быръе аслыз калыкез но возьматэ солэсь культуарзэ, улон-вылонзэ, сям-йылолъёссэ. Ярам. Мон жюри.

Лыктӥсько, фойеын ӵаш потто. Сиён-юонъёсты, пе, тани татын возьмато. Удмуртъёсты нокин уг возьматы. Кызьы берло шуиз, радъясьсы, ми, пе, удмурт культураез возьматон понна палэнысь адямиосты ӧтиськом. Сельхозкаын внеучебной ужен вырисьёслэн Тӧрозы улэ Селычкаын, ну чортэм ини со отысь ансамблез. Соос картошка кисален перепеч кутӥллям,   стаканъёсы кефир, ряженка понӥллям - тани, пе, удмуртъёслэн сиён-юонзы. Пичи нылпиос, Селычка школаысь ик, дыг-мог кырӟазы "Кинъёс, кинъёс лыктӥллям"... Кытысь-марысь, малпасько, со таосыз шедьтӥз, эшшо егитъёс пӧлы пыртӥз на. Соосыз, бен, шумпото, Селычкаысьтызы поттӥзы шуыса, Тау каро со кышномуртлы (со эшшо Селычкаын кыӵе псевдоудмурт культураез возьматӥсь тур радъяз на. Учке Интернетысь юромо "От Инмара до Иднакара" нимаське), я коть, пе, ми дорыны улыны интыяськиз. Кулэлыксэс табере валало ук.

Селычкаысь кышномуртъёслэн ансамбльлзы не ансамбль, шуод-а мар-а. Дӥсяськемын, кин мар шедьтэм. Огезлэн пыдаз кут, мукетызлэслэн колоша, куинетӥезлэн каблукен тол сапег, Дэремъёссы но айшетъёссы ваньзылэн пӧртэмесь, уксё тӥрлыкъёссы оломар. Эклектика. Пӧлазы пиналъёс. Тае адӟыса ик, валамон, удмуртъёс сярысь олокыӵе но стереотипъёс но малпанъёс кылдо шуыса. Будто удмурт культура улэ пересьёслэн но пиналъёслэн сюлэмъёсазы - пересьёслэн, мкш соослы немар карыны ни, пиналъёслэн, мкш соосты косо.

 Ярам, арган кыскало, экто, тапырто, адске, вот студентъёс пӧлын  удмуртъёс вань. Кин ӧз возьдаськы, кышномуртъёсын ӵош эктӥз ни, но тросэз палэнын сылӥзы, ымныръёсазы чидан мылкыд адске.

- Тӥ, пе, сокем эн дунъялэ, - шуэ ини мыным радъясьсы, - адӟиськоды милям татын базар кадь ортче.

Кышномуртлэн главное кылыз мынэ, киыз но мынысал на ке.

Та ужрадэ ведь эшшо чортэмын вал культурая министр, спортъя но егитъёсын ужан политикая министр. Лыктӥллямтэ. ӵок ни. Студентъёс возьматӥзы калык культураосты. Егитъёс умой дасяськиллям, радъясьёслы дыр тырмымтэ тыро-пыдо дасяськыны. УдГУ-ын уровень мукетгес, профессионализм вылӥынгес. Озьы пуки ини мон, оломарзэ но малпаса, сцена вылэ потӥзы "Ватка" студиысь нылъёс. Возьматӥзы "Ярдуртэм нюлэс" постановкаез. Тросэз оло валазы, оло ӧз, но фестиваль пумын быдэс залысь кылиз ог ӝыныез гинэ. Якшур-Бӧдьяысь "Тӧдьы юсь" этно-ансамбль потӥз кырӟаз.

Ах, верам потэ на вал, Селычкаысь ансамбль возьматӥз армие келян сям-йылолэз. Сцена вылэ потӥзы кышномуртъёс, пияш, солэн туганэз, туала дэремен, ӝужыт беро каблуке, пельпумъёсаз кышет. Кышномуртъёс, валаське, сцена вылын ассэс возьыны дышемын ӧвӧл. Янгышало, ог-огзэс донгало, али тон потӥськод шуыса, тон тазьы вераны кулэ шуыса. Кулко вал ни. "Чипчирганэз" чортэ-а мар-а вал.

Школа празднике вуи кадь. Фестивальлэн пумаз, со валтӥсьмы кинлы кыӵе инты сётыны ачиз малпаз (малы ми кулэ вал, уг тодӥськы!). Сцена вылэ потӥз, чебер кылъёс вераз но шуиз, призъёс арлы йылпумъянъёс лэсьтыку луозы. Сыӵе отношение.

 Берло ини радъясьёсыныз вераським но, огез шуэ: "Ну тон ӵошатӥд, УдГУ-эз но Сельхозэз, отын кӧня активистъёс, нош татын весь одӥг ымныръёс. Дасяським то, бен, одӥг арня гинэ."

Оло воштӥське ачиз кыл?

"Удмурт дуннелэн" конференциез ортчиз. Трос докладъёс вал. Тужгес резонанснойёсыз вал гожъяськон кылъя но правилоосъя.

Туннэ мыным сётӥзы лыдӟыны одӥг текст. Ӟуч кылын. Лыдӟыны кутски, 3-тӥ предложениозь вуи но пуштӥ: КӧНЯ ГРАММАТИЧЕСКОЙ НО ЛОГИЧЕСКОЙ ЯНГЫШЪЁСЫЗ (мон татын уг вераськы ни орфографическойёсыз ласянь). Зэмзэ ке, мынам сое пумозяз лыдӟем ӧз луы. Тон гожъяськиськод ке, гожты качественной текст, гажа кӧня ке лыдӟисьтэ. Таӵе дыръёсы мон валаны кутскисько Ольга Владимировна Вахитоваез, "УД" газетысь, кыл кутӥсь серкетарез, тӥя текстъёсты редакторез, шуом, ку со "Дарт" газетэ вуэм материалъёсты эскере. Егитъёс, угось, гожъясько !!! Ачим но куке но сыӵе ик гожъяськисько вал, тодӥсько, малпаськытэк, но малпаса, мон шонер гожтӥсько шуыса.

Конференциын Вера Григорьевна Пантелеева докладаз  газет бамъёсын стилистической янгышъёсын тырмем предложениосты пыртӥз. Тӥледлы сое кылыны кулэ вал... Сыӵе югдур, логикаез суран, грамматической янгышъёсын гожъяськон - удмурт газет-журналъёсты туж ӵем пумиськыло, ӟучъёс пӧлын но. Эпидемия! Оло со туала кыл сыӵе, туала малпаськон ӧр? Шонертэмез матысь дыре луоз шонер?

Удмурт кылын гожъяськонъя берпуметӥ правилоос потӥзы 2002-тӥ арын. Соку газет-журналъёс пӧлын сураськонъёс кылдӥзы. Кыӵе правилоосъя текстъёсты эскероно, вуж яке выль. Али но ваньзы пӧртэм сямен ужало. "Кенеш" журнал вужезъя, "Удмурт дунне" вылезъя. Ольга Владимировна верамъя, правилоос пумозяз вуттэмын ӧвӧл, ӝыны вамыш гинэ лэсьтэмын, соин ик ужаку трос сураськонъёс кылдо. Но кӧня аръёс мыно ини со правилоос ласянь вераськонъёс-ченгешонъёс? Кин пумозяз-йылозяз вуттоз соосты? Валамон, кулэ госсаказ, кивалтӥсьёс доры йыгаськоно. Сотэк та вераськонъёслэн пумзы но пайдазы но уз луы.

Вакчияк, гажано лыдӟисьёс но егит писательёс, гожъяськыкуды малпаське, кызьы кылъёстэс радъяськоды.

Чудьяосын "Читай, Ижевскын!"

Чудьяосын "Читай, Ижевск!" фестивале пыриськимы вал, шор площадьысь шатёре, ми доры, так-то трос калык люкаськиз. Туннэ со понна тау каронъёс сётъязы.

Кельше, кызьы ужа Некрасов нимо библиотека. Ваньмыз сярысь иворто, ваньзылы внимание сёто, уг вунэто. Нимысьтыз ӧтён лэзё, со сяна жингырто на, туннэ луоз шуыса. Тани туннэ пыри гинэ но, кивалтӥсьсы монэ тодэ на, Векшина ук, пе.

Возьматӥзы вакчияк видеоролик, кызьы ортчиз фестиваль. Богдан Анфиногеновлэн кылбур лыдӟемез отчы пыремын, Таня Тихонова но Лиля Леонтьевалэн кырӟамзы. Берлогес со видеоез Dart группае поном.

Тау карон сётыкузы, тунсыкъяськизы, кыӵе со Dart газет но кытысь сое басьтыны луэ. Чудьяос сярысь вакчияк верай на.

Берен интыям пуксьыкум, кышномурт шуэ:

- Тӥляд классной площадкады вал!

Шумпотӥ, мар.

М. Пахомовалэн туспуктэмез.

Бредберия улон

Пуксисько автобусэ. Адямиос уж дорысьтызы берто. Мон - гуртэ. Тодӥськоды-а, соос ӧвӧл та дуннеын, соос быдэсак выемын телефонъёсазы. Паймисько. Соку ик тодэ лыктэ Рэй Бредберилэн "451 градус по Фарингейту" антиутопизэ, кытын валтӥсь геройлэн кышноез уен-нуналэн наушникъёсын ветлэ, " телевизионный родственникъёсын" вераське. Таосыз но. Сыӵе пуке 15 адями, ваньзы телефонъёсазы.

Азьло коть автобусъёсын вераськемъёсты кылзӥськыны луэ вал. Кинлэн ке пенсиез уг тырмы, кин ке висе, кин ке Сирия но Путин сярысь вераське. Тунсыко вал тодыны, маин улэ калык.  Нош али чус. Соин ик мон учкисько укно сьӧрысь вошъяськись суредъёс шоры, кылзӥсько машиналэсь ыргетэмзэ но малпасько - арысь аре та коркаос вужмо, арысь аре та гуртъёс пичигес кылё. Куазь чебер на, сӥзьыл ук.

!

- "Газетты мрачный. Егитъёслы тунсыко ӧвӧл, пересьёслы кадь." - Dart сярысь. https://issuu.com/udmdunne/docs/ud_71__25396__f8b12be5cb0628/1?e=0

Кылсярысь, тани мукетыз малпан.

Со ик Э. Хемингуэйлэн "Прощай, оружие!" романэз сярысь:
- 80-тӥ бамаз вуи но, ӧй ни лыдӟы. Мӧзмыт. Весь огкадь действие мынэ, номыриз уг воштӥськы.Интересныесь, сӥзьыл-гужем ожмасько но, толалтэ вуэ, лымы усе но - ожзы дугдэ.

Кинлы мар

***

Телевизорын иворъёсты возьмато. Вераське кыӵе ке министр, кышномурт, тазалыкен герӟаськем юанъёсъя. Мама шуэ:

- Причёсказэ коть воштэм ни ай. Ато весь одӥг кадь йырсизэ нуллэ вал.

Кинлы мар, кечлы - куар.

***

Арганчилы синмаськыны
кулэ чебер ветлыны.
Если чебер ӧд ке ветлы,
со тонэ уз яраты!

Вуылӥ Кияса гуртысь одӥг гуртэ. Соос доры вуэм выль арганчи. Талы соос туж шумпото. Ансамльёссы угось гуртазы одиг гинэ ӧвӧл. 

Арганчиослэн вань кыӵе ке харизмазы. Огшоры улонын номырин син шоры уг йӧто кадь но арганзэс кутыса сцена вылэ пото ке, синъёссы ӝуаны кутско, ымнырзы пиштэ. Нош тон, соку ик синмаськиськод. Собере ас поннад малпаськод ини, малы меда эктыны уд быгатӥськы. Яке: малы аслад туганэд арганэн уг шуды.

Кинлы мар.

«Мае адӟи, сое ик гожтӥ» — таӵе амалъя гожъяськон литература ӧвӧл

«Удмуртия» книга поттониысь проза ёзэн кивалтӥсь Сергей Матвеев одӥг интервьюаз вераз: удмурт литератураын вань трос егит усто авторъёс, но соослэн гожъямъёсазы трос жагез. Со пӧлысь шуг адӟыны дуно арбериез.

Кылем арын егитъёслэн Dart газетсы кутскиз радъяны литературалы сӥзем ӝытъёс. Отчы 10-лэсь ятыр адями огпол но ӧз вуылы. Гожъяськисьёсмы мында ик милям лыдӟисьёсмы но ӧжыт? Озьы шуыны уз луы. Тодосчиослэн пусъемзыя, дыр воштӥськемен, воштӥське лыдӟисьлэн тусыз но. Лыдӟись вань, сое шедьтоно гинэ. Одӥгез амал — вотэсэз уже кутон. Озьы ик кариз Влад Андреев, 2013-тӥ арын вотэсын «Удмурт кылбурчи» огинзэ кылдытыса. Одӥг интыысь табере шедьтыны луэ егит авторъёслэсь гожъямъёссэс! Ми табере тодӥськом, удмурт кылосбуръя факультетын гинэ кылбурчиос уг кыдало шуыса. Али огинэз нуэ егит кылбурчи Богдан Анфиногенов.

— Мон рос-прос басьтӥськи та группа борды, малы ке шуоно туж потэ вал, Интернетын удмурт поэзия мед улӟоз но улоз шуыса, — вера кылбурчи.

Бен, огин кылдӥз, син азе пуксиз егит кылбурчиослэн но лыдӟисьёслэн зэмос лыдзы. Но татын кылдэ мукет юан: кыӵе ӟечлыкен кылбуръёс отын печатласько? Угось вотэсысь тросэзлэн кылбурчиослэн ӧвӧл кылэмзы критикъёслэсь дунъетсэс, ӧвӧл тодэмзы удмурт литературалэн классикъёсыз сярысь но. Соослэн дышетӥсьёссы — ӟуч Эдуард Асадов, Вера Полозкова но мукет туала гожъяськисьёс.

«Удмурт кылбурчи» огинысь кылбуръёсты учкиськод ке, валаськод: лыдӟыны номырзэ. Кабъёс тӥямын: рифма ӧвӧл, ритм тэтча но чутэ. Оло, дыр ортчыса, кылбуръёслэн, кызьы али лыдзы, озьы ик ӟечлыксы будоз. Но кызьы? Егит автор, школа кружокысь потыса, уг шедьты ни кылбуран тубатэз. Кемалась ворсаськиз Удмурт кун университетын литературая «Вуюись» кружок, уг кылдыты сое Удмуртиысь писательёслэн огазеяськонзы но.

Озьы ке но книга бичетъёс пото, соя ик ми дунъяны быгатӥськом туала удмурт литературалэсь ымнырзэ. Тодамы ваём берло дыре егитъёсын поттэм книгаосты. Соос пӧлын — Микаль Михайловлэн «Мон одӥг пол уг сайка улыны», Марина Пахомовалэн «Йыртэмпол», Богдан Анфиногеновлэн «Айшет будущего» кылбур бичетъёссы. Азьло аръёсты кутӥд ке, вераны кулэ Оля Трониналэсь «Йыромем йыртэмась», Лариса Ореховалэсь «Ярдуртэм нюлэс», Дарали Лелилэсь «Гур сьӧрысь суредъёс» книгаоссэс… Та но мукет авторъёслэсь творчествозэс учкыса, луоз-а меда вераны, кыӵе ӧръя кошке удмурт литература?

— 10 ар талэсь азьло удмурт литератураын этнофутуризм кузёяське ке вал, али сыӵе яркыт ӧрез висъяны уз луы, — вера Виктор Шибанов. — Котькуд авторлэн аслаз гожъяськон амалэз, темаосыз. Дарали Лели кутскыкуз этнофутуризм амалъя гожъяськиз ке, университетэз быдтыкуз, со гламур пала кыстӥськиз ни. Рэплэн кабъёсызъя гожъяське Пичи Пурга ёросысь Алексей Пикулев.

Котькуд автор кылдытэ туала удмурт литературалэсь аспӧртэмлыко ымнырзэ. Кылосбур тодосъя кандидат Виктор Шибанов пусъе солэсь куд-ог тодметъёссэ. Нырысетӥез тодмет — со азьвыл штампъёсъя гожъяськон. Мон ватсасал на, мукет кылбурчиослэсь адӟем карон. Али удмурт литератураын тужгес адӟымон автор Богдан Анфиногенов луэ. Солэн аслаз аспӧртэмлыко гожъяськон амалэз — кылбуръёсаз ӟуч но англи кылъёсты кутон. Табере вотэсысь егит кылбурчиослэсь гожъямъёссэс учкиськом ке, валаськом, солэсь адӟем каро тросэз егит авторъёс. «Удмурт кылбурчи» огинэз усьтӥд ке, со выллем кылбуръёс тон вылэ ведра дурысь кадь кисьтӥськозы. Кылсярысь, гожтэ Полина Куликова: «Тон черекъяд — разверглись небеса. Тон черекъяд, аслыд ачид паймыса». Богдан ӟуч но англи кылъёсты валаса кутэ ке, Полиналэсь малы ӟуч кылъёсты кутэмзэ мон уг валаськы.

Кыкетӥ тодмет, кудзэ висъя Виктор Шибанов, со литературной куронъёсъя гожъяськонлы пумитъяськон. Басьтом Пичи Пурга ёросысь Алексей Пикулевез. Сое тупатъяны кутскиськод ке, вера тодосчи, кылъёссэ воштыны егит кылбурчи пумит луэ. Со кырӟанэлэн кылъёсыз, со вотэсын вӧлмемын ни, соин ик мон кылъёсме уг тупатъя ни, шуэ. Нялтас вераса, тросэз кылбурчиос гожъямъёссэс тупатъянлы пумит луо. Угось, кызьы соос малпало, редакторъёс соослэсь кылбур стильзэс музон каро.

Туэ Свердловск улосвылысь Каменск-Уральский каре бичаськизы егит гожъяськисьёс. Аслым но отчы сюрыны шуд усиз. Тросэз дунъясьёс пусйизы, адямиослэн егит дыръязы гожъяськемзы потэ, нош тыбыр сьӧразы улонзы ӧвӧл на. «Мае адӟи, сое ик гожтӥ» амалъя гожъяськон — литература ӧвӧл на. Мукетыз ужпум — егитъёслэн кылзы тӥяськемын. Тросэз удмурт егитъёс ӟуч кылын малпасько, предложениоссылэн радлыкез но ӟуч. Та шуг-секытэн пумисько вань калык литератураос, угось ӟуч кыллэн кужмыз золгес. Но кызьы тупатоно югдурез, куке нылпиос уен-нуналэн вотэсын пуко, ӧжыт лыдӟисько но стилистика бордын уг ужало?

— Егит гожъяськисьёслэн ужъёссы суро-пожо, ӟучо-удмурто луо. Егитъёс утчасько, улон шоры мукет сямен учко. Дыр азьлань кошке, но литературалэн, чеберлыко кыллэн законъёсыз уг воштӥсько, — вера «Кенеш» журналысь проза отделэн кивалтӥсь Олег Четкарёв. — Тодэ лыктэ 50-тӥ аръёсысь «Советской Удмуртия». Со вакытэ кыл сӧриськемын вал, вуоно писательёс гожъяськизы ӟуч конструкциосын. Но 1980-тӥ аръёсы литературае лыкто Г. Красильников, Р. Валишин. Соослы луыса литература йӧнаны кутске, кыл тупатске, кылдэ мукет ӟечлыкен литература. Оскисько, асьме литератураын кылдозы на выль Красильниковъёс.

Питик дуно

Гуртэ бертӥсько. Автобус бускель гуртозь гинэ мынэ. Соин ик гуртозям сюрес кузя 12 километр пыдын мыноно луэ. Тани бертӥсько мон сыӵе, малы ке туннэ машинаос ик чик ӧвӧл, ӝыны сюресме пыдын ортчи ни.

Дугдӥз "Семёрка". Пуксим, э ярам коть эшеным вал. Машинаын сыӵе сюлмо юэмъёс. Пӧлазы одӥг кышномурт, водительлэн кышноез лэся. Юэмын зол, шофёрмы сюреслэсь синзэ палэнтэ ке, машинаез соку ик трак урдэс пала кошке. Эшмы доры, пе, куное мынӥськом, Пурое. Асьсэос эшсылэсь нимзэ но уг тодо.

Вӧсяськыса но кызьы ортчим ни сюресмылэн ӝыныезлэсь ӝынызэ. Эше васькиз мукет гуртэ, мон соос пӧлын огнам кыли, асламез гуртэ кыдёкынгес вал на. Пересь бабуш вамышъя. Тодмай - Амань Сандрапай, туж шаплы песянай. Бодызэ ӝутӥз ини, дугдэ, монэ пуктэ шуыса. Шофёрмы, туж сюлмо юэм мурт, валамон дугдӥз ни. Вӧзаз пукисьёсыз ӧз но лэзе ке но.
- Мар мар тӥ, - шуэ, - песянай ук, пуктоно.

Озьы со трак урдсы дугдӥз. Амань Сандрапай шаплы гинэ машинае пуксиз но пумомиз. Ымпумтӥз шыпыт гинэ мыным шуэ:
- Таос кудӟемын, лэся.
-Ы-Ы, - шуисько.
Тараторитьтыса вераськись кышномурт кылем сюресэз шып улыса, вырӟылытэк пукиз. Синъёсыз гинэ одӥз пиосмурт вылысь мукетыз вылэ тэтчаллязы.

Потӥм. И татын Амань Сандрапайлэн ымысьтыз вань кылъёс кисьтӥськизы. Кызьы, кылсярысь, бражка сылэ, собере люкаськем газъёс банкалэсь крышказэ пезьдыто но ву шукыяськыса уртче, озьы ик татын но. Эшшо син азяды пуктэ на, кызьы артистъёс пересьёсты театрын шудо, ӵапак сыӵе ик интонациен вераське Амань Сандрапай, чабкиськыса ик.

Кисьтӥськиз:

- Остэ, быри, быри. Кудӟемын ук, кудӟемын соос, эшшо руле пуксё на. Вӧзаз кышноез пуке вал, лэся. Кызьы со но лэзем картсэ машинае пуксьыны. От нылы вера. Тон, мама, нокинлэсь уд кышкаськы. Кышка вал тон кӧня ке. Нош мон сёравно уг кышкаськы. Котькыӵе машинае пуксисько. Инмаре монэн сьӧрам ветлэ - тани сумкая, кисыям. Линия дурысен огпол пукси. Сьӧдъёс вылӥллям. 2 пиос, кышномуртсы одӥг. Нош мар ке карсалзы ке. Уксёе жаль ӧвӧл, коть ваньзэ мед басьтозы....

Татын мон интыям ик кулӥсько вал ни!

... питик дуно ук ай (киыныз ик возьматыса вераз).

Вот, малпасько, пересьёс. Вералозы ке, вералозы ни. Адӟемын ини уго соос троссэ.

Дышетскытэк но визьмо

Магистрант мон. Дышетсконмек гинэ азьланьтӥ шуыса вераме потэ вал, малы ке шуоно пумозяз уг валаськы магистрант кыллэсь пуштроссэ. Бакалаврлэсь пӧртэмзэ но шӧдӥсько. Нырысетӥ параысен ик милесьтым юазы ни, кыӵе темалы диссертцидэ сӥзёд? Лыдӟиськоно трос, найчной ужъёсыт. Мыным кельше.

Эшшо ми пӧлын туж трос арлыдо дышетскисьёс. Тросэз соос пӧлын УдГУ-ын ик ужало. Юасько, 50 аресъем кышномуртлэсь:
- Малы тӥ выльысен дышетскыны лыктӥды на?
- Ӧтизы но - лыктӥ, - вера со. Собере кӧян ке улыса ватса на:
- 40 арестэс тырмытэмды бере, ужлы ёрмыса асьтэос но вылыьсен дышетскыны лыктоды ай.

Ыы, пе, малпай ас поннам. Но татын пӧртэм поколениосысь но пӧртэм гос. строй вакытъёсы будэм адямиослэн улон шоры учконзы ваче пумисько. Мон, кылсярысь, пукысал гуртын, но яратоно книгаосты, яратоно темая научной ужъёсты лыдӟысал. Нокин азьын кыл ӧй кутысал, косэмъя гуртысь ужъёс ӧй быдэсъясал. Яке улонэз шулдыртон понна кошкысал дуннеез котыръяны. Яке кыӵе ке ужрад радъясал. Яке тымет дуре корка пуктыны кутскысал, яке шутэтскон база.

Городэ одӥг классын дышетскем матысь эшеным мынӥськом.
- Кыӵе мар дышетсконэд мынэ, - юасько. Со но магистратурае пыриз.
- Уг вутты, дыр, дышесткыса. Берозь ужасько, - шуэ. - Но пересьмама дышетсыкын косэ. Уждэ кушты но, дышетскы, пе.

Озьы со, дышетскыны луонлыксэс ыштэм анай-атайёсмы, песянай-песятайёсмы милемыз дышесткыны косо. Валало меда соос, магистръёслэн но вылӥ образование басьтэм адямиослэн лыдзы будэмен ӵош, ыше вылӥ образованилэн дуныз но. Кызьы, кылсярысь, ыштэ смыслзэ сю пол одӥг ужез быдэстэм но.

Тӥни озьы, пукисько параын но малпасько, мынам анае дышетскытэк но визьмо шуыса.

Книгаын - писательлэн улонэз.

Лыдӟисько Сергей Матвеевлэсь "Чорыглэсь лушкам кылбуранъёссэ" но валасько, кыӵе зол солэн лирической героез кельше мынамезлы. Лыдӟисько туганъёс куспын кылдэм  отысь вераськонэз, но малпасько, мынам но сыӵе ик диалогъёсы пӧрмо шуыса. Сое валасько но секрекъяны кутскисько. Горисько быдэс комната тыр. Кызьы?

Мынам но лирической герое "Эго".  Сыӵе сьӧд сюлмо, возьыттэм нылмурт. Номыр карыны уг быгатӥськы, но со сыӵе пӧрме. Мукет ласянь, со мынам "дурочка", ваньзылы оске, синмаське таланто пиослы, синмаське сётэм кылзы понна кыл кутӥсь адямиослы.

Кутски вал гожъяны антиутопия. Пӧрмиз утопия. Кутски вал кылдытыны "идеальной удмурт кар", социальной. Кылдӥз "сэрего", пӧртэм яратонъёсын пӧзись роман, любовной. Ку меда кылдоз мукет тема?

Чехиысь туала гожъяськись Милан Кундеран "Книга смеха и забвения" книгаяз вера. Писательёс гожъяськыны кутско аслыд. Тон вераськод ортчем нуналэд сярысь кышноеды, нош со пельёссэ ворса, уг кылзы тонэ. Нош тынад пушкад ваньмыз пӧзе, сое кытчы ке поттоно. СОИН ИК ТОН КУТӤСЬКОД КИЯД РУЧКА НО КИСЬТӤСЬКОД ВАНЬ МАЛПАНЪЁСТЭ. КЫШНО УГ КЫЛЗЫ КЕ, МЕД ЛЫДӞОЗЫ МУКЕТ АДЯМИОС.

Зэм но, котькуд писатель аслаз произведенияз аслэсьтыз улонзэ возьматэ, яке лулзэ. Сотэк нокызьы, котьмар вералэ. 

"Шобрет" новелла

"Сакыр" арт-интыын Дарали ортчытӥз лыдӟиськон ӝыт. Бырйиз В. Ар-Сергилэсь "Пашка Педо - транзин" вероссэ но мынэсьтым новелламе. Кельшо, пе, соос  ог-огзылы.

Зэм но. Геройёс но огкадесь, произведениослэн пумъёссы но огвыллемесь. Ужпумъёс но отын-татын огкадесь ӝутэмын. Ачим паймисько: композициезъя но.

Лыдӟе Ар-Сергилэн вероссэ, ӵошатон понна. Нош аслэсьтымзэ тани поттӥсько, вакчиятыса со "Удмурт дуннелэн" "Ингож" ватсэтаз сётэмын.  

Шобрет

Тулыс вуэ. Куазь оло зоре, оло лымыя – валантэм. Натӥлэн сюлмыз оло калык пӧлы куриське, оло лул серегъёсаз ватӥськемез потэ. Мар ке кароно! Натӥ шкаф пыдсысьтыз поттэ кроссовкиоссэ но бызьылыны ярась штаньзэ. Катаоссэ кияз кутыса бергатэ но ӧс вадьсы сэрпалтэ, штаньзэ берен шкафаз донге но… тур-пар юбказэ дӥсяса, поръяны потэ.

- Берлогес бызьылыны пото, - нырултӥз Натӥ.

Бер ӝытэн но тулысэн шокась Ижкар Натӥ вылэ секыт шобретсэ куштӥз. Нылаш ӝока, секыт зӥбетлэсь мозмытскыны выре но уг быгаты. Шобрет улысь потон утчаса, ӟигар быре, нош шобрет пумтэм.

«Луысалзы ке киям бадӟым качыос, шобретэз бадӟым челепъёслы вандыса куштысал, - малпа ас понназ Натӥ. - Соку мон со басма юдэсъёсты буясал но сётысал курадӟись адямиослы. Котькуд юдэс адямилэсь сюлэм –висёнзэ пачкатыса быдтысал, нош яркыт буёлэз шуд кузьмасал».

Натӥ Ижкарлэн шор сюлмаз вуиз. Татын сылэ зарни липето черк. Котыр пурысь юртъёс сыло, нош черклэн зарни липетэз котьку зарниен пиштэ. Али отчы быдэс Ижкарысь калык люкаське. Син азяды гинэ пуктэ. Ӵуказе – Великтэм. Адямиос уйин коркаосысьтызы пото но, кызьы кузьылиос зор азьын каразы дырто, озьы ик соос но: черке вуо но вуо, вуо но вуо. Инмарлы оско бере, ӵок ни. Инмарлы оскисьёс чылкытэсь, шуо, соин ик оскы. Но со адямиос пӧлысь Натӥ одӥг шудо но югыт пиштӥсь адямиез уг адӟы – ваньзы сьӧд лулоесь. Сьӧлыкаса ик вуо соос татчы. Сьӧлыксэс шараяло, куштӥсько солэсь, но, черкысь потыса, выльысь сьӧлыканы кошко. Ӧз, таос пӧлысь огезлы но Натӥ шобретысьтыз юдэссэ ӧз сётысалыз.

Черк вӧзтӥ ортчыса, Натӥ ульча кузя гань-гань васькиз. Азяз - «Уй бубыли» кафе. Куке но тодмо эшез Натӥлы вералляз, кызьы уйин та кафе вӧзысь дугдылонниын автобус возьмаса сылӥз. Соку калык Ижкарын туж трос ӧй вал на, машинаос но али кадь пумтэм ӧй вал, нош уй бубылиос поръяло вал ни.

«Та дугдылонни вӧзы, та вакытэ ик, луоз, дугдӥз сьӧд чилясь машина. Руль сьӧрын пукись пиосмурт киыныз ик шонтыса «Айда кошким!» шуиз. Зол ик кышказ, дыр, эше. Татын уй бубылиос сыло ук. Шузи», - эшезлэсь верамзэ тодаз вае Натӥ. Али со та кафе вӧзтӥ кошке но нокыӵе уй бубылиосты уг адӟы. Али соос мукет возь вылъёстӥ лобало ни. Таосыз Натӥлэн яркыт шобрет юдэсъёсызтэк но ӟеч уло.

Натӥ азьлань вамыштӥз. Мынэ, тодыса кытчызэ. Бызьылыны потон интые, тур-пар юбказэ дӥсяса со кошкиз «Мусур» баре. Кошкиз огназ, кошкиз валаны: сюлмыз калык пӧлы ик куриське, яке лул серегъёсаз ватӥськемез потэ. Тани ӝоген син азяз адскиз бадӟым букваосын тылын пиштӥсь «М сур» гожтэм. «у» букваез малыке уг ӝуа ни. Пырон азьын пиосмуртъёс тамак кыскыса сыло, ог-огзылы мадё, кызьы соос кышномуртъёсты котыръязы но кылем уйзэс тодазы вайыны тыршо. Натӥ соос шоры учкытэк, усьтӥз ӟукыртӥсь корт ӧсэс. Нырпельёсаз соку ик сураськем зын шуккиськиз: макмыр, аракы, чебурек, кизь, пӧсям пи мугор…

«Мусур» бӧлетэ калык тыр люкаськемын. Борддоръёс синучконъёсын лякылэмын. Тодмотэм ымныръёс пӧлын тодмоосыз пиштыло. Уг пот соосты адӟем, малпаз ас понназ Натӥ, но сэргын сылӥсь пичи ӝӧк сьӧры огназ пуксиз.

Со шоры мырӟиськиз югыт кузь йырсиё нылаш. Син улаз ошиськылэм бадӟым пуйыосссэ ватэм: ымдуръёсызлэн куасьмемез лемлет помадаен ватэмын, питырес бамъёсыз льӧль пызен наштамын.

- Озьы тӥни Натӥ, - шуиз аслыз нылаш. – Пуком ми тонэн кыкнамы татын. Ньылонмес коттом, кӧтмес тыром, сюлэммес буйгатом но кошком.

Татчы люкаськем калык – ваньзы огназы кылемын, котыразы адямиос вань ке но, сюлэмзылы матынэз ӧвӧл. Татчы вуыса соос тырмытыны туртто тыртэм лул посудзэс. Вераськонъёсын, сурен. Натӥлэн йыраз, соосты адӟыса, малпанъёс бугыръясько:

«Малы меда мон весь оген кылем адямиос доры кыстӥськисько. Тани учкиськод соос шоры, огшоры адямиос кадь, соос ӧвӧл кадь огназы. Асьсэ малпанъёсазы гинэ соос огназы. Мӧзмо, жаляло асьсэзыс, возьмало, ку соосты шумпоттозы, кытчы ке чортозы яке эркияса возёзы. Висён со, висён ни».

Со дыре одӥг ӝӧк сьӧрысь воргорон султӥз. Ачиз золгес ик юэмын ни, но дӥсяськемын чылкыт. Катаосыз, пурысь штаниосыз, лемлет дэремез. Очкиен. Оодӥг син улаз сӥнякез ӧз луыса ке, юан кылдысал: тон мар татын кариськод, интеллигентной адями? Со синйылтӥз мукет ӝӧк сьӧрын пукись кык нылъёсты. Соос доры воргорон матэгес лыктӥз но шуэ:

-Толэзь ортыса, мон кошкисько. Ожгаре но сое шуыны луэ. Ӟучъёсты утьыны, Донецке.

Кышноослы гожтэтсэ мытӥз:

- Потэ ке, лыдӟе, потэ ке, кесялэ. Толэзь я кык ортчыса. Оло мон уг берты ни, оло сӧсырмо, мон гу тодӥськы. Ттын но мон нокинлы кулэ ӧвӧл, сои ник кошко.

Соосыз мар вазьыны ик паймизы. Одӥгез воргоронлэн киысьтыз гожтэтсэ басьтӥз но кисыяз донгиз.

- Лыдӟе. Жаль, монэ татын нокин но уг возьма шуыса. Жаль.

Воргорон берен аслаз ӝӧкез сьӧры пуксиз. Кышномуртъёс доры кытысь-отысь туганъёссы вуизы. Воргорон мур лулӟиз.

Солы сётоно меда шобретлэсь ог юдэссэ? Носо огшоры ассэ гинэ курадӟытэ, со мукет сямен но улыны быгатэ ук. Тани таиз, кудӥз али костылен «Ой, тӥ чебер нылъёс» кырӟанъя эктэ быгатэ уже интыяськыны, уен-нуналэн ато та барын юыса кылле. Кӧня али сӧсыр адямиослы уж. Нош таиз шоры учкыса ик оломар луоно: малы тон астэ быдтӥськод? Учкы ай, ымнырыд тӧрнамын, дӥськутэз кесяськемын, мугорыз кырсь, котыртӥд кутъёс лобало ни. Тон быгатӥськод ук одӥг ӵукна султыны но шуыны аслыд: «Уг! Уг ни юы. Мыно документъёсме лэсьтыны но уж утчаны». Малпалод, таӵе дыре кужмо кышномурт гинэ таосты киултыны быгатоз на яке кужмо яратон. Но тани барлэн одӥг сэрегаз пуко огогзэсты кужмо яратӥсьёс, кыкназы но огкадесь: юо, кыско. Натӥ аливаньзэсты, жуг-жагез кадь, пуйые ӵужыса понысал но сямзэс кыдатыны нуысалыз. Кытчы? Кытчы ке, кытын трос уж, Малпаськыны но дырзы медаз кыльысал ни.

Нокинлы кулэ ӧвӧл сётыны шбретлэсь юдэсъёссэ, зэмзэ ке, ӧвӧл пачкатӥсь шобрет но. Вань мылкыд, кудзэ луэ воштыны. Натӥ сое вала но «Мусурлэн» одӥг сэргаз пыштурынэн чай юыса пуке. Крезьгуро автоматысь «Ой, тӥ чебер нылёс» кырӟан чузъяське, нош адямиос озьы ик юо, кыско, экто. Мед.

Огъяулонниысь кышномуртъёс

 Огъяулонниысь староста бича подписъёс:
- Воштоно управляющий компаниез. Юнме, пе, уксё кесьыса возе!
- Огъяулоннилэн мурӝолысьтыз улляно М. но А. вузкаронниосты, мар юнме татын ми вылы уло!
- Юрт вылын  реклама ошиськыса улэ, нош ми уксёзэ ум адӟиське!
Али вуо быръёнъёс.
- Сётэ курадэс М. Б. понна, со милемлы та ужпумъёсмес серттыны-пертчыны юрттоз, эшшо азбармес котырто, шуиз на.

Старосталы пумит вань  мукет группировка. "КУРИЛЬЩИКЪЁС", кызьы соосты нима страосталэн командаез. Ог-огзэсты материтьтыса возё, урод вераськонъёс вӧлмыто... ну валады. Прямо страсти. Таосызлэн йырзы уксё бича выж миськисьлы уждун тырон понна, унитаз но газ плита воштон понна. Ӝынызэ кисыяз донге, кызьы вера староста. Озьы ик со малпа, рекламалэсь но подвалын интыськись магазинъёслэсь но соос уксё басьто шуыса. "Курильщикъёс" бырйёнъёсы пыриськыны уг туртто.

Огъяулонни романтика. Тарканъёс.

Огъяулонни. Татын. Уло семьяос. Уло ини кемалась. Асьсэ тараканъёсынызы - ӝӧк вылъёсазы но йыръёсазы.

89-тӥ комната. Удмуртарня. Ӝыт. Ӧсъёс мышкын кесяськем куараос кылӥсько - воргорон юыса бертэм, сьӧраз эшшо эшсэ кутэм на. Со инвалид, ужаны уг ужа. Кышноез Нефтемашын тырше. Чиньыосазы зундэсъёссы ӧвӧл,  комнатаысьтызы ог-огзэсты улляса калзы быре.
Тани ӧс усьтӥське но, воргоронлэн эшез, йырзэ уллань лэсьыса, комнатаысь ганяк потэ, корт ӧсэз пытса. Укно доры кошке. Сьӧраз гордэктэм ымнырын Вася потэ (озьы медло нимыз) но корт ӧсъёсты жон! пытса. Эшез доры укно дуре мынэ. Тамак кенӝыто. Укноос усьтэмын, тол тамак ӵынэз берен корридоре пельтэ.
Тани кӧняети сӥзьыл ни та комнатаын суред уг воштӥськы: Вася юыса бертэ. Кышноез керетэ. Нош нылзы шып гинэ будэ.

88-тӥ комната. Таиз комната мынамез вӧзын интыяськемын. Татын азьвыл пересь кышномурт улэ, котьку шыпыт луылэ вал. Пенсие потэмез бере но ужаз заводын. Ӵемысь куное ветлылӥзы нылпиосыз. Ужаны дугдэмед бере, шуылӥзы - пересь ӧвӧл на ук, ужаны но быгатӥськод на вал. Кӧня ке дыр ортчыса пересь улыны кошкиз гуртэ. Табере отын улэ пинал ныл. Борддор сьӧрысь телевизор куара кылӥське - валамон, Мтв-ысь клипъёсты учке.


87-тӥ комната. Котькуд ӝыт ӧсъёс мышкы ыше тӧдьы йырсиё 20 аресъем пияш. Дышетске со университетын. Анаез - туж чылкыт но умой дӥсяськись кышномурт. Атаез - йӧн-йӧн, паськыт пельпумо, ӝужыт воргорон. Семьялэн вань машинаез. Комната азьын пыд ӵушон.
Матысь дыре семья квартирае улыны выжоз ни, дыр.

86-тӥ комната. Татын улэ кышномурт. Огназ. Быдэс улонзэ ни ужа Ижмаш больницаын, медсестраен. Юбкаен Плюшкин. Мар шедьтэ - ваньзэ вае комнатаяз, гуртын марлы ке яралоз ай шуыса. Брюки - вынызлы, пу юдэс - корка борды шуккыны, паралон? Оло диван вуро ай. Дырысь дыре кышномурт дораз сузэрезлэсь нылъёссэ ӧтьылэ - уксё сётэ, пыжем куреген сюдэ. Сюлмаське ваньзы сярысь.

85-тӥ комната. Гуртысь кышномурт вуиз городэ нылыз сьӧры. Со улэ та комнатаын, нылызлэн семьяез одӥг этажлы улӥынгес. Арнялы огпол соос ваньзы ӵош бертыло гуртэ. Кышномурт вань люкам арбериоссэ гуртысь корказ нуыны турттэ. Нылыз кесяське: " Нош ик машинаын интыез ӧвӧл ни!" Тулыс со бакча сиёнлы рассада кизе. Отпуск потыкуз, кошке гуртэ. Нылыз нош ик зуле: "Малы тон соосты мерттӥськод? Отпуск дыръяд, кин соос вылэ ву кисьталоз?" Сӥзьыл вуэ но быдэс семьяез шумпотыса сие кышномуртлэсь вуэм помидоръёссэ.

Полина Кончиталы адӟем кариз кадь

Значит учкиськом Евровидение, ну так, паралелльно. Полина Гагариналэсь но Финляндиысь рок-группалэсь кырӟамзэс гинэ ачим учки. Комнатаысь эше сыӵе шуэ: "Вот милямъёс арысь аре вормисьёслэсь адӟем каро. Одӥг аре сыӵе энергичной пияш вормиз, вуоно аре милям но энергичной номер каризы, кылем арын вормиз романтичной кырӟанэн Кончита, туэ Полина Гагариналэн но номерез сыӵе ик".

Ӵошатон понна юри учки ук Кончиталэсь номерзэ. Кылем арын Австриысь Кончита одӥг интыяз сылыса кырӟанзэ нёжъяз, тӧдьы дэремен сцена вылэ потӥз, интыысьтыз воксё ӧз вырӟылы. Нош табере ӵошатэ Полина Гагариналэсь туэ номерзэ. Прак сыӵе ик: тӧдьы дэремен, интыысьтыз ӧз вырӟылы, нёжъяз Кончиталэнлы тупась кырӟан. Эшшо: 2010-тӥ арын задор кырӟанэныз вормиз Германиысь Лена Майер, 2011-тӥ арын Евровидениын тэтчаз Алексей Воробьёв. Брангуртысь песянайёс гинэ вал мукетэсь, ито соосты отчы лэзьыны уг одъяло вал, Россиысь  кизилиос пӧлын вормизы ке но.

Фантазизы уг тырмы ни, лэся. Вуоно арын мар возьмалом?

Эшшо сыӵе тенденция мынэ: нырысь вормиз Кончита, туннэ, кин тодэ, оло Финляндиысь мусо даун пиос вормозы. 

Антиутопия кыӵе ке

Али ми, зэмзэ ке, поистине исторической дыре улӥськомы. Мар луоз азьланяз? Кыӵе государственной строй воштоз та "мнимой" демократиез? Сётозы на-а шокчыны блоггеръёслы (мон али шуисько зэмос блогеръёс сярысь, кудъёссызлэн малпанъёссы обществолэсь малпанъёссэ воштыны быгато, кудъёсызлэсь кышка Правительство)? Нокин но та юанлы валэктон уг тоды.

Ну ярам, тодамы ваём Вангаез, тайзэ ваньзы тодо, дыр. Со шуиз вал, Путин вакытэ луоз война, но Россия отын вормоз. Эшшо, пе, Россиын калык нырысь Президентсэ, сӥлы карыса, карлудъёсы потоз. Нош собере кутскоз граждан ож, малыке шуоно калык акыльтоз та системалэсь, кытын государство нокинлы шоканы омыр, лобаны эрик уз сёты ни...

Мистикаысь табере литературае выжом. Эше вераз вал "Время сэконд хенд" книга сярысь. Сое гожтӥз Светлана Алексиевич. Дэмласько та писателен интеврвьюез лыдӟыны.  "Время сэконд хенд" - со "Красный человек. Голоса утопии" сериысьтыз берпуметӥ (5-тӥ) книгаез. Эше верамъя, автор анализириоватьтэ дуннеын али кылдэм югдурез. В итоге: Россия ӝутскоз, вань кунъёслэсь кужмо луоз, нош, дыр ортчыса, трос люкетъёслы пазьгиськоз. Мон малпамъя, улосвылъёсын адямиослэн самосознанизы шуныт шыкысысьтызы потоз но, али улонлэсь зэмос ымнырзэ адӟыса, Азьмуртлы пумит султоз. Озьы, нырысь, кылсярысь, Чечня   бунт ӝутоз, собере Татарстан, берло оло Удмуртия но. Татын юан кылдэ: кыӵе основания улосвылъёс асьсэлэсь государствозэс кылдытозы. Уз луы-а меда со основание йӧскалык бордын? Нош ик берытскиськом отчы, мар бордысен  азинскыны кутске котькуд государство. 

Али  Ижкаре вуылӥзы туж тодмо оппозиционеръёс, журналист расследовательёс. Григорий Пасько, Алексей Симонов, Галина Сидорова, Елена Масюк, Игорь Корольков. Тӥляд со нимъёсты кылэмды ӧвӧл ке, (куд огзэ коть вань, дыр, всё-таки), но оске мыным, со кадь бадӟым журналистъёс, особенно али пророссийской дыре, ӧвӧл. Со, дыр, берпуметӥосыз пӧлысь, кудъёсыз дӥсьто на П-лы, мерлыклэн куэм малпанъёсызлы но кунлэн сиситемаезлы пумит кылзэс вераны. 

Соос ваньзы сямен шуо: госудасртво котькытысь утча иностранной агентъёсты, Журналистъёслэн фондъёссылы уг сёто уксё, пӧртэм огазеяськонъёс кунгож сьӧры ужало шуыса, судэ иск сёто, оппозиционеръёсты пытсэт сьӧры пукто, яке воксё виё (Борис Немцовез ватон ужрадын, кстати, Ксения Собчак доры кышномурт лыктэм но шуэм: "Ты - следующая!") Блогъёсты пыр учкыса уло (по ключевым словам мониторитьто). И тӥ малпаськоды, Интернетын эрик вань шуыса? Усьтэ грани.ру оппозиционной интернет-порталэз, уд ик быгатэ - заблокироватьтэмын. Блогеръёсты экстремизм но национализм (таиз улэ удмурт блогеръёс точно сюрозы) понна пытсало. Матысь дыре, малпасько, интернет но быдэсак государстволэн кияз кутэмын луоз, мкш иностранной порталъёсты ворсалозы. Кызьы Китайын - отын ведь уг тодо гуглэз, отын асьсэлэн, западлэсь котыртэм интернетсы. И ми, удмуртъёс, асьме кылынымы гожъяськыны ум быгатэ ни - малыке шуоно государственной кыл - ӟуч. П. удмуртэз уг тоды ук. Да и со но куке но кулоз ни. 

Антиутопия кыӵе ке. О. Хаксли "О дивный новый мир", Е. Замятин "Мы", Д. Оруэлл "1984", Р. Брэдбери "451 градус по Фарингейту"... улон со.

:-)

Огъяулонниын оломар но луэ. Куддыръя удмуртъёсты  адӟемпотостэм каро. Ачим мон сыӵе учыре ӧй сюры на, ну и умой. Жугиськыны кутскысал, дыр. А так, уг валаськы, кыӵе шузи кулэ луыны таӵе кылъёс верась адями:

"Мне не нравиться удмуртский. И когда я в комнате - не разговаривай на нём! Или хотя бы не по полчаса!"

Ммм? При том со адями журналист, кудӥз ужалоз кыӵе ке газетын, куддыръя гожъялоз пересь нэнэйёс сярысь но пӧртэм йӧскалык адямиос сярысь. Со журналист тодэ этикаез (туж оскисько). Со журналист тунсыкъяськись (туж оскисько), но,  пӧртэм культураосты пыӵатыса, будӥсь, визьмогес луись, дыр.

Со вуоно журналист доры, комнатаяз, мон эшшо 3 удмуртъёсты интыясал на. Визьмогес мед луоз шуыса.

Зэмос лул. Кытын тон?

Кыӵе со туала удмурт нылаш? 

"Эль ныл" фестивальын Татьяна Москвинаен вераським. 

- Блогеръёсын календарьдэс учки шуэ. Кытын тон,  Татьяна Москвина шуиськод отын - шуэ Татьяна Никитична мыным. - Сюлэм ик шумпотӥз та темаез ӝутэмед понна. Нокин но азьло озьы открыто ӧз вералля на со сярысь. Уд кышкаськы.

Мон дыг-мог луи. Мар вераны ӧй вала ни. 

"Та выллем фестивальёс но куд-ог адямиослы акыльтӥзы вал ни. "Гербер" отын арысь аре, весь одӥг кадь ортче, нокытчы но уг буды. Нош татын маиз ке но мукет вал: "Герберлэсь" трос лёгетлы вылынгес. Но сизьым ошмес йылтӥ нуллӥсь нылашлэн "чилясь" дэремез... Кытын тон, Татьяна Никитична Москвина? Шарканын тонэ уг тодо меда?"

Та гожтэме ласянь вераз Татьяна Никитична. Мон, шуэ, Шарканэ ачим но вазиськылӥ,  тӥледлы шаркан сямо удмурт дэрем вуро шуыса. ӦЗ КЫЛЗӤСЬКЕ, ПЕ. Кыӵе чебер шаркан дэрем, нош соос ялан со чилясь дэремъёссэс вуро. Котькӧня вера, но адямиос уг валало.

Бен, кӧня эн вера, но адямиос уг валало, кыӵе синмез сутэ чилясь стилизованной удмурт дэрем. Огшорыгес, удмуртлэн лул инкуазезлы матынгес луыны секыт лэся.

Тани "Эльнылэ" вуиз Пермьын "KAMWA" фестивалез радъясь Наталия Шостина. Со, пе, фестивале вуи вазьгес, соку нылъёс буясько на вылэм. Вот, шуэ, юасько, пе, модалиослэсь: "Удмуртъёслэн кыӵе естественной буяськемзы?" Яке шуом, кызьы азьло удмурт нылъёс буялляськизы. Нылъёс, пе, шугомизы но веразы ик, удмурт кышномуртъёс уг буясько вал шуыса. "И малы иське тӥ али синлысъёстэс буяськоды но ымдуръёстэс наштаськоды?" - юай, пе, нылъёслэсь Наталия. Риторической юан, ыы ведь.

Ваньмыз фальш, эрико ымныр ватэмын маска сьӧрын. Сю полэс туала дӥськутъёс улысь уд шедьты ни чылкыт, номырин ватымтэ но саптамтэ зэмос лулэз. 

"Инвожо" сярысь

Вот кутӥсько киям "Инвожо" журналэз. Шумпотыса кутӥсько - татысь тунсыко материалъёс лыдӟыны луоз шуыса: литература, крезьгур, улон сярысь. Бамъёссэ берыкъяны кутскисько но, уг валаськы, куд пала вамыштэ журнал.

Солэн собыдӟа потенциалэз. Потэ, шуом, толэзьлы огпол, кӧня дыр вань ӟечлыко материал лэсьтыны, пӧртэм удысъёсысь маке тунсыкозэ шедьтыны, мае уг тоды визьмо лыдӟись. Туала лыдӟисьлы мыд-мыд журнал кулэ, сое лыдӟыса лыдӟисьлэн лулыз мед буръяськоз, буш медаз кыльы. 

Егитъёслы журнал шуыса нима со ассэ, азьло художественно-публицистический вал на. Али малыке ӧвӧл ни, озьы али пусйысал на ке, мон пӧсекъясал, дыр, журнал бамъёсысь публицистикаез шедьтытэк. 

"Udmurt image" ӵектоссы сярысь кӧня ке кыл верам потэ. Проект туж тунсыко, ыы ведь. Соглаш. Но кызьы со быдэстэмын!. Кылемаз Журналлэн вылбамысьтыз Алексей Пикулевлэсь ымнырзэ адӟыса, мынам сереме гинэ потӥз. Кызьы, Инмаре, со Амань Олёш, кудзэ мон сомында аръёс ӵоже тодӥсько? Кытын солэн аслаз стилез? Кытын солэн тур-пар штанъёсыз но реп стилез. Солэн со стилез вань ук, мар кариськод тон пиосын Никита Ильин!

Вот, ӧд тоды ке, Ваня Белослудцевез но Алексей Пикулевез улонын, но соосын та журналын гинэ тодматскысал ке, малпасал ас поннам: "Ну, и маин соос ог-огзылэсь пӧртэм луо?" Ладно, Ваняез кызьы но озьы тодмай ик, нош Олёшез - ой!Эшшо та проектлэн мукет палыз вань на ук. Со - интервью. 

Пыр-почгес, ӟечгес со интеврьюез лэсьтыны луэ, дыр, малпасько. Тунсыкогес отын, кыӵе ке изюминкаен. Татын мукет интеврьюоссы сярысь но вераны кулэ. Вот лыдӟи мон Александр Шломанэн, Дмитрий Корепановен интервьосты, но сыӵе осадок кылиз, будто та материалъёсты чаляк гинэ лэсьтӥзы, вот кылиз одӥг час, кулэ номерез поттыны. Авторъёс нош кыштыр-кыштыр гинэ юалляськизы но асьсэ пыр поттытэк гожтӥзы. Кӧты ӝож луэ. 

Ма малпасько, азьло "Инвожо" пыр-поч лэсьтӥське вал кадь. 2000-тӥ аръёсы туж кужмо литреатурной критика но вал, пӧртэм удысъёсысь материалъёс но вал. Школаын дышеткыкум лыдӟылӥсько вал. Али но, юри,ӵошатон понна, поттӥ кровать улысьтым 2006-тӥ аръёсысь журналъёсты. Огласянь зӧкгес но вылэм, материалъёсыз но трос пумо темаё вылӥллям. Лыдӟисько, но шумпотко. 

Нош табере уг тодӥськы. Да эшшо дизайнэз ласянь. Точечно сыӵе кинлэн ке вкусэзвань, одӥг бамаз умой дизайн, нош мукетаз оскем потэ. Д и мукет аръёсы потэм номеръёсын но со проблема шӧдӥське. Усьтом берпуметӥ номерысь 56-тӥ бамез. Текстэз туж тунсыко дизайнэн пуктэмын, нош туспуктэмъёсыз ваньзэ портитьто. Ӟечгес соосты пуктыны луэ ук. Миша Николаевлэн суредъёсыз туж сюлмыя, туалаесь соос. 2-3-тӥ бамъёсысь материалэз вообще лыдӟем уг пот. Что за пичи пиналлы кадь дизайн!

Дыр то мынэ, улон то азьлань кошке. Толэзьлы одӥг пол потӥсь журналлы, малпасько, котыр ласянь ӟеч луыны кулэ. нош али, кызьы мыным потэ, журнал лэсьтӥське школаын дышетскись егитъёслы. Так, соослы ярам шуыса. Мыным тунсыкогес лыдӟыны азьло аръёсысь номеръёсты. 

Всё. Табере аслам гожтэме сярысь кыл вералэ. 

Ярдуртэм нюлэс

"Ватка" театре мон 1-тӥ курсын ачим но ветлыны кутски вал. Школа дыръям ми постановкаос пуктылӥськом вал бере, туж потэ вал та хоббиме азьланьтэм. Но малы ке ӧз пӧрмы отчы кыльыны, иське, улонам мукетыз гажаноезгес уже вал.

Тани 3 ар учксько ни мон "Ватка" театрлэсь шудэмзэ. Котькуд ар ветлӥсько постановкаязы, котькуд ар учкисьёссылэн лыдзы уг буды. Маин со герӟаськемын? Культураентунсыкъяськись удмурт егитъёс пумен быро, лэся. Ледниковый период сыӵе.

Котькуд ар та театр кыӵе ке выль амал шедьтэ. Озьы ке но одӥгез уг воштӥськы: котькуд постановка поэтической ӧртӥ кошке. Василий Серафимович Ушаковлэн, режиссёрзылэн, сыӵе лулыз ни, лэся. Солэн котькуд адӟытонэз ненег, кырӟась, югыт. Тодады гинэ вае "Матӥ но Марданынсь" Матӥлэсь чылкыт лулзэ. Со шоры учкыса, син азе пуктӥськод ненег тылобурдоез, кудзэ бордаз йӧтскыса гинэ вӧсь карод кадь. "Солдатъёс ке кошко" поэтической адӟытонын войнын матысь адямиоссэс ыштэм кышноослэн кайгыронзы возьматэмын вал. Татын но героиняос чылкыт лулоесь.

Со бордын ик Ушаковлэн постановкаосызлэн кужмыз: егит артистъёс шедьто кадь кадь огкыл егит сюлмо режиссёрен. Но "Ватка" театр уг пӧрмы классической театрлы, со луэ экспериментальной актёръёслэн шудэмзы но, адӟытон пуктэм ласянь но. Соосты учкыса лул ик шутэтске, мкш со - мукет.

"Ярдуртэм нюлэс". 4 чебер нылъёс, нюлэс нылъёс. Постановка пыр потэ одӥг малпан: туннэ тон нырысьсэ сайкад.  Котькуд нунал - сётэ марке выльзэ. Котькуд нунал нюлэс нылъёс маин ке но пумисько, шуг-секытъёсын но шумпотонъёсын пумисько.

Та адӟытон Лариса Ореховалэн кылбуръёсызъя пуктэмын. 20 минут куспын нылъёс трос мылкыдъёсты возьматӥзы. Я соос ненег нюлэс нылъёс, я соос гозыосын керттылэм лулъёс, я соос сьӧд кужымъёс... Та потсановкаын та дунне вылын улӥсь вань мылкыдъёс сураськизы кадь, но зир-зир бергаса огазеяськизы.

Адӟытон вал минималистической. Реквзитъёссы ӧжыт, но котькудӥз соослэн асьсэ пуштроссы вал, асьсэ кужымзы. Басмаослэсь лэсьтэм тряпкаез адӟыса, но сое син азям лулоен пуктыса, мугор ик юзыр-кезьыр луиз.

Ярдуртэм нюлэс - пумтэм дунне, кытысь ваньзэ шедьтыны луэ, кытын котькуд адями котькин луыны луэ. Нош тон котькуд нунал выльысен сайкаськод, но котькуд нунал усьтӥськод ярдуртэм нюлэслэсь выль писпузэ.

Тау, "Ватка" театрлы, тау Лариса Ореховалы, таӵе аспӧртэмлыко адӟытон понна.