Ӟольгыри но эшшо кин ке...

Серем-а, ӧвӧл-а но, автобусэ ой вутты. Табере мукетсэ возьмано, кудӥз, куинь час ортчыса гинэ, луоз ай. Пыри вокзал пушкы. Асьсэлы пассажиръёс утчаса, таксисъёс кесясько: «Нылга, Вавож. Пурга, Агрыз!».  «Да мыным вообще мукет пала» малпанэн соос дортӥ чаляк ортчи но билет басьтыны черодэ султӥ.

- Станция Кечёво, – билет сётӥзы.

Шуба пушкын мугорлы шуг, сюлэм зол пазяське, соин, лэся, корт пуконъёс но ситянлы сю поллы чурытгес йӧтско. Но мар карод, чида ни, вокзалтӥ юнме отчы – татчы уд ветлы ук, итак адямиез трос, зал пичи. Анайёс, нылпиос, егитъёс, кудӟемъёс, касса дорын быронтэм черод.  Котькудӥз ас уженыз выре: вераське, ботьыртэ, кесяське, уродъяське, мынэ, сылэ… Мынам синъёсы огез вылысь мукетыз вылэ тэтчало: тодмо ымнырез уз шедьты меда. Но ӧвӧл. Калык акыльтӥз, борддор бордысь ошем экран шоры учкыса, пукко ини. Отын МЧС – лэн пӧртэм ивортэмъёсыз, чакласькыны куронъёсыз. Бызись ивор син вӧсь луытомозь чаляк ортче. Ваньмыз шузимытэ. Та интыын омыр ик йырэз пачкатэ, висьытэ. Тырмоз. Каллен гинэ телефонысьтым музыказэ лэзи но, синме ворсаса, пукко ни.

Ши-ши, чик – чирик! Оло вӧтасько, оло мар. Но йыры висе озьы ик, иське уйвӧт ӧвӧл со. Мыл поттэк синме усьтыса, вушйи. Со вискын нош ик кылко: ши – ши, чик – чирик! Ныр ултӥм, шумпотса ик, тылобурдо ширтӥз. Мар со татын каре? Шуак пыремлы  уг кельшы. Ваньзэ тодса кадь, потолок ултӥ уя, монитор вылэ пуксе но, йырзэ бергатыса ик, адямиос вискытӥ йыр вадьсытӥзы, шудса сямен, быдэс залтӥ лоба, чирекъя, автовокзаллэн гылыт но мача выж вылтӥз тэтча. Ассэ копак кузё кадь возе. Умойлы, шунытлы чаляк дышем иське.

Нош нырысь дырзэ кызьы меда вал солы, оло мон кадь ик сюлэмшугъяськиз? Мон  - шубаын, со – коробкаын, вокзал борддоръёс, выж, вӧлдэт.  Потон ӧс оло утчаз? Яке солы ӝоген яразы та шуныт омыр, мальдытӥсь югыт, автобус возьмась калык? Но малы со воштӥз эрико кырез, та заллы? Тунсыко. Валасал, ӟольгыри ке луысал.

Малпаськонме динамикъёсысь чузъяськись куара ӝегатӥз, мынам автобусэ кыкетӥ платформа дорын, мырдэм – мырдэм!

Ӝоген, ӝоген потоно ни татысь, та пачкатӥсь вокзалысь. Тани ӧсъёс, кезьыт омыр, кыӵе умой, сюлэм ик буйгатске. Шуба но уг пачкаты ни кадь. Инбамысь усись кот лымы пырыос пельтӥсь кезьыт тӧлэн ымнырам шуккисько. Но  мон шумпотса мынко азьлань – платформае. Таре автобусэ пыроно, нош ик пичи инты, бензин сутскем  зын. Висись йырез пӧромытэ. Чидало ини одӥг час. Час гинэ. Гуртэ вуо ук, отын сюлэмы шутэтскоз, но лобӟоз кӧняке дырлы эрико дуннее.