Удмурт Бард

Ижын ортчем «Дарт» дискотекае лыктэм адямиосты аслаз гожтэм кырӟанъёсыныз паймытӥз егит бард Ваня Белослудцев. Тросэз синмаськизы солэн жингырес куараезлы, чебер кырӟан текстъёсызлы но шулдыр крезьгурезлы. Оглом вераса, та Кез ёросысь Александрово гуртысь 17 аресъем удмурт пияш яркыт кизилиен ӝуатскиз удмурт эстрадаын. Вакчияк ачиз сярысь. Али Ваня удмурт филология факультетын дышетске. Сюлмыз пичи дырысен ик гуманитарный предметъёс борды кыстӥське вал, математикаен но техникаен герӟаськем предметъёсты уг яраты. Но маин али егит бард улэ? Мар малпа удмурт егит крезьгур удыс сярысь? Кыӵе ӵектосъёссэ улонэ пыӵатыны турттэ? Со сярысь мургес тодон понна, со доры юанъёсын вазиським.

Маин сэрен тон нырысьсэ гитараез кияд кутид? Кыӵе вал тынад нырысетӥ вамышъёсыд со инструментэз тодон-валан ужын?

- Мон 2008 арын ДОЦ «Орлёнок»-е  вет . Отын трос егитъёс гитараен шудо но кырӟало вал, соослы мон вожъяськи. Соин ик гуртам бертэм бере, атайме косӥ монэ гитараен шудны дышетыны (гитараез пичияк тодэ вал). Со мыным валтӥсь аккордъёсты но нырысетӥ тодон – валанъёсты сётӥз. Нырысьсэ сцена вылэ потӥ ас гурт клубам ик, пӧртэм ужрадъёсы пыриськылӥ. Умойгес шудны кутскеме бере, ӵужапае, Аня Ворончихина, мыным одӥг малпанзэ шараяз, ойдо, пе, мынам кылбуръёсылы крезьгур гожтыса, кырӟан кылдытъялом. Со вал нырысетӥ вамыш. Собере малпаськи, неужели мон но уг быгаты текстъёс гожъяны шуыса. Озьы ачим кылбур малпалляны кутски, кудъёсыз вал ӟуч кылын, вылӥ дышетсконние пырем бере гинэ удмурт кырӟанъёс кылдытъяны кутски.

Мар сярысь кырӟанъёсыд? Тросэз крезьгурчиос пӧрамъёссэс туганъёссылы сизё, нош тынад кыӵе музаед?

Мон романтик, соин ик яратон сярысь, конечно. Кырӟанъёсме кылзӥськыса, валалоды, отын куректонэз но шумпотонэз, тодэ ваёнъёсысь но али улонысь мылкыдъёсыз вань шуыса. Инбам сьӧры мон уг лобӟиськы, ваньмыз басьтэмын зэмос улонысь. Али репертуарам куать мында кырӟанъёсы. Но со кутсконэз гинэ ай. Кырӟанъесме гожтыкум, син азям визьлобонэным лэсьтэм образме пуктӥсько. Но мон тӥледлы вераны уг быгаты, кыӵе со. Текст гожтон крезьгурлэсь секытгес йӧтске. Мукет кырӟасьёс пӧлысь мыным тужгес но кельшо кунгож сьӧрысь пӧртэм рок - группаос. Кылсярысь, Linkin park, Switchfoot, Everlast, Mew, Stone Sour..

Кыӵеен тон аслэсьтыд азьлань улондэ адӟиськод, озьы ик сольный программаосыд луозы яке марке мукет?

Мон малпасько группа кылдытыны, кудӥз рок ӧрын улоз. Отын луозы гитаристъёс, ударник но кырӟась. Тросгес егитъёс мед кылзӥськозы шуыса, ми котькуд кырӟанмес  аспӧртэмлыко карыны турттом. Озьыен, мукет калыкъёслы возьматом, удмуртъёс пӧлын но туж тунсыко, быгатӥсь адямиос вань шуыса. Али удмурт эстрадаын ӧжыт егитъёс понна кырӟасьёс. Тросэзлэн бадӟымъёслы тупась кырӟанъёссы, соин вылды соос огвыллемесь, а котькытын пӧртэмлык кулэ. Озьыен, ми удмурт лулчеберетэз узырмытом, но вылӥегес ӝутом. Эшшо, мынам кырӟанъёсме студиын гожтэм потэ на.

Мар тон сӥзьысалыд та удысын ужаны кутскись егитъёслы?

Одно ик азьлань мыноно, кутскем ужзэс медаз аналтэ. Возьдаськон сямзэс мед вунэтозы, со понна калык азе ӵемгес потано. Удмурт егитъёс пӧлын вань устоосыз, соослы тэк пуконо ӧвӧл, возьматоно асьсэлэсь быгатонлыкъёссэс.

P. S. Поклонникъёсызлы: http://vk.com/id30551269. Та бамысь тӥ быгатоды Ваня Белослудцев сярысь тросгэз тодыны, но солэн крезьбамысьтыз кырӟанъёсэ кылзӥськыны.

                                 Иван Белослудцев сярысь вакчияк малпанъёс

Аня Загумённова, али дыре Ваняен ӵош одӥг группаын дышетске.

Со туж умой, талантливой, лякыт но котьку юрттыны дась адями. Мыным солэн кырӟамез туж кельше. Малпасько, азьлань сюресэз туж узыр но яркыт луоз шуыса, одӥг интыяз гинэ медаз сылы. Сцена вылысь бард выллем оген шудэмзэ адӟисько. Выль кырӟанъёс, капчи сюресъёс, тросгес кылбуръёс тыныд, Ваня.

Дина Ворончихина, гурт школаын одӥг классын дышетскем эшез.

Ваняез мон нырысетӥ классысен тодӥсько ни. Школаын со котькуд ужрадэ пыриськыны тырше вал, ӵемысь кырӟась яке ведущий луыса. Трос пол ми соин ӵошен гитараосын сцена вылэ поталлям. Солэсь нырысетӥ шудэмзэ мон походын кылӥ но копак пайми солэн чебер куараезлы но шудны быгатэмезлы. Туж шумпотӥсько, кырӟанъёссэ кылэмъёслэн лыдзы пумен - пумен будэ шуыса. Мон сӥзисько солы: азьланяз та ужзэ медаз аналты, оскисько: солэн ваньмыз пӧрмоз.

Марина Поторочина, "Дарт" дискотекаын шулдыръяськись.

Мон со пияшлэсь кырӟамзэ та позыръяськонын нырысьсэ кылӥ. Зэмзэ ик, мыным солэн выступать каремез туж кельшиз. Сцена вылын ассэ возьыны быгатӥз, оз кепыра. Дан солы! Синмаськымон пияш, чебересь кырӟанъёсыз. Паймымон, кызьы со куараеныз  шудны быгатэ. Соин ик мыным туж тунсыко вал кылзыны. Малпасько, та егит но задор пияшез бадӟым сюрес вите шуыса. Ваньмыз солэн кияз!