Ымныртэм каръёс

Монэ туж Кузонэ кыске вал. Одӥг пол отчы ветлӥ, кык пол, куинь пол, нош берен бертэм уг поты, сюлмы ӝыныё кыле. Со шӧдэ кадь, мыным татын марке но лэсьтоно шуыса. Нош мар, уг валаськы.

Бигеръёслы туж паймисько, кызьы соос ас улосвылзэс азинтыны, Мускоез вень вылэ пуктыны быгато. Соослэн отын ваньмыз чиля, азинске, пушъе. Но каллен-каллен со вань туала чиль чилясьын бигер сям культуразы медаз ышы вал. Но со процесс кутскиз ни кадь. Азьвыл Кузонэ вуыкум, ульчаосысь трос бигер вераськемъёсты кылӥсько вал.Нош берпуметсэ ветлыкум, шӧдскымон ӧжытгес. Мон может янгышасько, но мыным озьы потӥз. Табере Кузон бигер карлы уг кельшы ни. Табере со огшоры, вань мукет каръёслы укша, со номаин но уг висъяськы ни.

Йошкар-Олаез тодам вайисько ке, соку ик син азям ярдурысьтызы горд коркаос син азе пуксё. Соос алигес пуктэмын ай, Венециез адӟем карыса. Табере мукет коркаос но Венеция стилья пуктылӥсько. Кинлы кулэ со кыкетӥ Венеция? Мон лучше поръёслэсь аутентичной городищезэс учкысал. Малпасько, кунгож сьӧрысь туристъёс но монэн соглаш луозы шуыса. Таиз но кар каллен со пӧзись пуртые усе ни.

Жаль.

Берпуметӥзэ Кузонэ ветлыкум, мон нош ик ӝыны сюлмын отысь кошки. Но валай, ярам мон отчы дышетскыны ой кошкы шуыса. Мон берен берытскысал, но выль улон кутскысал, дыр. Отын эрик. Эрик кузьма шумпотон. Озьыен эрик вие искусствоез.

Тау!

Пепелацысь синйылтэмъёс.

Паймымон 1. Ullapalla улӟиз, но, мон понна, вылӥ кырӟан гожтӥз. Мон малпасько вал, нош ик луоз кыӵе ке но "шунды ныл", "яратон", "опа-опа" да марда. Но ку мынам пельёсы дорозь вуизы таӵе кылъёс: "Ойдо братан юом, туннэ ведь удмурт пати", мынам йырам ваньмыз йыринь-чукинь берытскиз кадь. Валасалзы ке удмурт егит пиос та кырӟанлэсь вань сарказмзэ, мон соослы чабысал но шуысал Браво! Таязэ но кӧттырмостэм егитъёс погратозязы юизы. Пепелац - со гурт клуб ӧвӧл ук. Кӧня ке коть культурадэс возьматэ вал.

Богдан шоры мон палан сылӥсь адямиос вырӟылытэк учкизы. Кытын ке Таня Тихоноваен но Леонтьева Лиляен гинэ эктӥзы.

- Со юэмъёсын но, нерад луоно, - шуиз мыным эше.
-Малы бон?
-Акыллясько.
Туннэ, уго, Со ӧз юы. Туннэ Со - "шонер пияш" луиз. Нош вуонояз оломар ини.

Паймымон 2. Танцполэ кык нылъёс вуизы. Дӥсяськемын чебер вал. Одӥгез кисыысьтыз Айфонзэ поттӥз но кутскизы ук ай кыкназы ик асьсэзыс #selfiтьтыны. Одӥг интыязы бергало, одӥг палысен туспукто, мукет палысен, витетӥ палысен. Эшшо сыӵе ымдуръёссэс позыръяло на, чикуляос. Удмурт патиын но табере сыӵе суредъёсты адӟод ини. Соин ик, удмурт нылъёс, дӥсяське чебер, утялтэ асьтэдыс но... Соку туспуктӥсьёс асьсэос тӥледыз шедьтозы но туспуктозы. Ато ветло туспуктӥсьёсты утчаса. Яке асьсэ аппаратъёсазы туспуктыло, ооо, ми клубе вуим шуыса.

Эльныл-2014 Дарина Якимова но вал. Татын мон со шоры мукет синъёсын учки. Модали кадь, зэмзэ ик.

Трос мар та нуналэ паймымонэз вал. Пепелацын но, уй урамын но, аслам малпанъёсам но, выль иворъёсын но.

Мыным кызь. Йылпумъян.

Туннэ шуак валай, мыным паспортме воштоно шуыса. Зэмзэ ке, паспорт воштон сярысь вераськыны ӧй кутскысал ке, со озьы ик вунсал. Тырысал мон выт, шӧдтэк шорысь.

Дас тямыс ар тырмем бере, мынам арлыдэ уг буды ни кадь. Дыр, мон понна, тыпак дугдӥз. Мон гурезь йылэ тубӥ кадь. Тубӥ но сылӥсько, быдэс дунне шоры учкыса. Нош котыр трос пӧртэм каръёс пиштыло; возьёс вылтӥ, эрикен шокаса, вал уллё ворттылэ; нюлэсъёс шыпыт сыло; зарезь тулкымъяське. Нош гурезь йылын монэ тӧл солань-талань сэзъяны выре. Нош мон йыг-йыг сылӥсько но интыям бергасько.

Туннэ мыным Петыре буш книга кузьмаз. Вылӥяз мынам нимы, туспуктэме но книгалэн нимыз - "Уйвӧтысь чуръёс". Пушказ - чылкыт бамъёс. Петыре шуиз: "Гожъяськы!"

Тау!

Кӧшкемыт тымет

Милям нуртын, кемалась ик ӧвӧл - кык ар талэсь азьло-,  Улысь Вуко интые тымет ӵыпизы. Мырдэм-мырдэм. Кемалась возьмам вал ини. Ӵыпизы, но кызьы али тодӥ, отын уг яра пӧласькыны но, чорыганы но, дортӥз ветлыны но.

Со тымет вӧзын ик вань мукет тымет - Чальдӥ. Вуж, мусо, вутурынэн басьтэм, нюлэсэн котыртэм инты. Покчи классын дышетскисьёс отчы чорыганы мынӥллям. Шуак кытысь-марысь нюлэскысь, дото зол утыса, дас пала бадӟым пуныос потӥллям но пиналъёс пала бызьыны кутскиллям. Я коть соосыз, марзэ-созэ валаса,  я кышкаса ни-а, писпу йылэ тубиллям. Кызьы сыӵе пичи шпанаос кыз йылэ тубыны быгатӥллям, мон понна валантэм. Пуныос пиналъёсты "утьыса" жадиллям но кошкиллям. Таосыз великъёсазы пуксьыса, гуртэ чачыратӥллям.

Ми малпам вал, со пуныос кытысь ке но вуэмын шуыса. Яке со кыр пуныос, кудъёсыз уло нюлэсын но пӧйшуръёсты кесяло. Но уж мукет бордын вылэм.

Пуныосты тыметэз ӵыпись, ужбератӥсь отчы лэзем. Нокин но тыметэз доры медаз матэктылы шуыса. Валасько, пуныос Улысь Вукоын гинэ пукысалзы ке, соос мукет гурт дорозь но вуо. Асьсэос кӧшкемытэсь, котькинэ пурыны дасесь, ӝужытэсь но сьӧсесь. Матысь дыре соос, сиён утчаса, гурт кузя но поръяны кутскозы ни. Пастухе потэм пудо-животъёс вылэ тэтчалозы. Адямиос ульчае потаны кышкалозы.

Тӥни кыӵе чурыт но сьӧд сюлмо луыны быгатэ адями. Тымет - со инкуазьлэн люкетэз ук, малы сое аслыд гинэ кароно. Эшшо сыӵе амалъёсын на. Валасько, со ужбергатӥсь асьме гуртысь луысалыз ке, но трос мукет гуртъёсын фермаос ӧз возьысалыз ке.

Адямиос уксё поттон понна, гын вылысь чутыны кутско ни.

Туннэ Перепечкинын

Азьло дыре "Перепечкин" - э туж яратылӥськом вал пыраны. Отын  астэ гуртад кадь кожаськод. Берпуметӥ дыре отчы ӧм вуылэ вал ни. Эшшо Вотэсын ивор вӧлмиз на: Перпечкин Чебуречкин луоз.

Туннэ отчы пырам. Сыӵе ик мусо, туала инты. Но кыӵе ке но буш, мурт. Поваръёссы-а кинъёссы-а залын ик пуко, компотсы ӧй вал, винозы быдэсэн, пе, вузаське, так стаканъёсы ум тыриське. Ярам, мар вань, со ик басьтӥм ни.

Тунсыко потӥз, зэмзэ ик кафе вузамын ини меда шуыса. Жаль потэ, соослы PR-менеджер кулэ. Кассирзы, валатэк, мар сярысь мон юалляськисько, шуиз, директорзы соиз ик ай, пе. Мед Перепечкин ик кыльысал, кутскем ужез пумозяз вуттоно ук. Огшоры политиказэс воштоно, куронъёссэс чурытгес кароно, ужрадъёс ортчытъяно, калыкез маин ке но ас бордаз кысконо. Вераны капчи, конечно.

Ми дась литӝытъёс отын лэсьтылыны. Шумпотыса.
Тау!

Мыным кызь. Part II

Ӧсэ йыгаськись луиз. Усьтӥ, нош отын бадӟым сяська керттэтэн тодмотэм воргорон сылэ.
- Марья?
- Мон
- Тӥледлы сяськаос.
Мон чарка быдӟа синъёсын гинэ учки на со шоры. Мар вазьыны ӧй вала.
Открыткаысь валай: трос иськем ортчыса, Со Ижкаре вуиз ковёр-самолётэн. Со дыре мыным потӥз, Со кытын ке матын но нокытчы ӧз кошкылы шуыса. Но Со малпанъёсыныз гинэ пыраз мон доры, собере берен лобӟиз.
______________________________________________________
Сяська керттэтын вал 33 роза. 33 арескын Иисус кулӥз. Соос кӧня нунал ортчыса шуялозы, озьы ик даур но ортче. Туж сэрыт но валантэм. Со понна ваньмыз йырпӧромымон.
Тау!

Поро кече!

Шутэтскон нуналъёс азьын Йошкар-Ола каре ветлӥ. Отын пор блогёсъя семинар вал. Люказы студентъёсты но малпазы соослэсь блогеръёс пӧрмытыны. Зэмзэ ке, дышетӥсьёс но библиотекаын ужасьёс но лыктӥзы.

Огпаласен, "Порен удмуртэн одиг тусьтыысь сисько", шуо. Нош мукет палысен, та кык калык весь ог-огзы вискын вожвылъясько но ог-огенызы ожмасько вал. Малы ке но потэм ук фразеологизм, "порпиос ыбылисько" шуыса. Озьы бадӟымъёс нылпиоссэс но кышкатъяллязы. Яке шузи шуэм интые, тон Поршурысь-а мар-а шуозы.  Милям гуртмылэсь шур сопалэз но Поршур шуо. Шур тапалъёс сопалъёсты туж яратӥллямтэ, лэся.

Тани ачим но поръёс доры вуи. Автобусэ вазьгес вуиз, пумитасьёсы ӧй вал на, нош телефонэ пуксе, вылаз Теле 2 Марий Элын уг куты на вылэм. Вокзалын диспетчерскойлэн ӧсэз вӧл-вӧл усьтэмын вал. Пыри отчы, лэзизы телефонме "сюдыны", эшшо асме но кофеен сектаны одъяло вал на. Ас понназы серекъяло, шузиясько, мылкыдзы капчи. Котыр коркаос но яркыт яркытэсь, Ижкарын кадь пурысь ӧвӧл. 

Вуим семинаразы. Нырысь, конечно, бадӟым адямиос вераськизы. Университетсылэн ректорзы могдос потӥз.  Со пинал на, ушъяськись. Кутскиз, конечно, университетсэ ушъяны. Сыӵе быдэ вуымтэ малпанъёссэ вера, вера но вера, модератор султӥз ни, "кхы-кхы" шуэ ни. Нош соиз, тайзэ верало на, шуэ но, уг дугды. Сыӵе ик быдэс калыксы но потӥз: номыр сярысь но сюлмаськисьтэм, серекъясь, котьку капчи мылкыдо но быдэ вуымтэ. 

Мон удмурт блогъёс сярысь соослы верай, куд-ог дэмланъёс сётъялляй, кулэ ӧре выжтыны турттӥ... Деловой, пе! Соос понна та семинар туж кулэ но пайдаё ортчиз. Витетӥ курсын дышетскисьёс но пинал дышетӥсьёс но библиотекаын ужасьёс уг быгато интернет-инструменъёсты ужазы кутыны, зэмзэ вераса уг но тодо кызьы. Огез бадӟым курсъёсын дышетскись студентка воксё шуиз: "Блогез нуыны кулэ зэмос журналистъёс, нош огшоры адямилы сое нуыны шуг. Соин ик мон уг кутскы та уж борды". ОПА! Со кутскись журналистлы, шуисько, туж кулэ блог нуыны, гожъяськыны коть устогес кутскоз. Но малпанзэ воштыны пырик ӧй быгаты.

Ваньзы соос блог нуонэз туж шуг уж кожало, кудӥз туж трос дырзэс басьтоз. Та ӝыт бере, соос пӧлысь 10 % гинэ блогъёссэс усьтоз шуыса, мыным потӥз. Но тани одӥгез усьтэм ини: lyavi-tachana.livejournal.com

Соосты дышетӥзы блог усьтыны. Туала дыре со секыт ик ӧвӧл кадь но, но...
Соосты дышетӥзы блог нуыны, конфликтъёс сярысь вераллязы, Липецкысь "жжлэн зарни посолэныз" скайп пыр вераськизы. Сомында ивор соос вылэ усиз бере, семинар пумын соос шузимем кутъёс кадесь ик вал ини.

Радъясьёс сыӵе мусоесь. Уж висказы коскаса пуко. Нылпиослэсь ченгешон сямзэс эскерыку, соос асьсэос но тест лэсьтӥзы. Треннингъёсты туж сак кылзӥськыса но куд-ог интыоссэ гожъяса пукизы. Туж трос чай юим. Нуналаз ноку но сомында чай юэм ӧй вал на.

Милям кызьы ке мукет сямен. Троссэз удмурт блогеръёс, нырысь, асьсэос кутскизы нуыны блог. Нош собере ини мукет пӧртэм факторъёс вал. Нырысь удмурт кылэз Вотэсын азинтон, выль удыс усьтон, нош берло ини вожвылъяськыса но вожъяськыса бам усьтон.

Соослэн та удыссы буш, тӧл гинэ шуласа ветлэ. Милям школаын дышетскисьёс пӧлын Институт стратегии развития регионов сыӵе школа радъяз. Нош али со выллем поръёс но лэсьтӥзы. Пыкъетсэ конкурсной каре, дэмлай мон Эльвира Куклиналы, озьы пайдаез тросгес коть луоз.

Мыным кызь. Part I

- Мон тон доры туннэ лыкто.

- Я. Удмурт урам, 225-тӥ юрт, 405-тӥ комната.

- Я, вертолётэн вуо. Огъяулоннияд ик.

- Ковёр- самолётэн лыкты.

- Розаосын. Кӧня роза ваём. Кызь арес тырме бере, кызь ваёно вал. Но чётной мында кулэмъёслы гинэ кузьмало ук. Кызь одӥг-а ваём?

- Кызь вай!

- Малы?!

- Ма туннэ мынам улонэлэн кыкетӥ десятокез кулэ ук, нош вордӥське куинетӥез. Со розаос кыкетӥ десятоклэн кулэмезлы сӥземын луозы. 

- Я, Маши.

Уз вордӥськы выль улон, азьланьтӥскоз таиз. Вордӥськем нуналме ортчыто университетын, басма вузанъя базарын, Чипчирганлэн #ӵуказеотчётный концертаз но Йошкар-Олае сюрес вылын. Соос, мон понна, улонлэсь тужгес но дуно кузьымъёс. 

Медиавирус.

Туала егитъёс Вотэсэ йырынызы быдэсак выемын. Дуглас Рашкофлэн "Медиавирус" нимо книгаяз пыр-поч эскеремын, кызьы адямилэсь йырвизьсэ со медиа шуон сисьтыны кутске.

Мар телевизорын возьматӥське, мар Вотэсын популярной луэ - со ваньмыз медиавирус. Со вирус адямилэсь, мерлэсь ляб интыоссэ шедьтэ но мугораз пыре. Собере мугорлэсь клеткаоссэ ас палаз воштыны кутске. Озьы асьмелэн малпанъёсмы, азьланяз улонмы но воштӥське. 

Гуртын улӥсь егитъёс, тодады вае ай, Вотэсэз тодытэк, кыӵе улонэн улӥськоды вал. Шумпотӥсько, пичи дыръям денди выллем шудонъёс мон дорозь ӧз вуэ шуыса. Шонерзэ вераса, я коть мон со шудонъёсын висьыны ӧй кутскы. Кырын мукет пиналъёсын ӵош тупез ӵыжалляй, бызьылӥ, лапта шудылӥ. Табере учке  астэ шоры али. Ӝыны нуналзэ мерлыко вотэсбамын пукиськоды, дыр. Тӥ пушкын медиавирусъёс кемалась пуко ини. 

Та шутэтскон нуналъёсы гуртэ бертылыкум, пайми. Мон огпол но Вотэс сярысь тодам ӧй вайылы. Сомында дыр, эшъёс, ужъёс, сыӵе чебер инкуазь, котыр улэп улон... (Сыӵе символично, тае гожтыкум, Белослудцевлэн кырӟанэз шудыны кутскиз: "улӥськод одӥг пол...")

Кышкыт луыны кулэ, дыр. Ваньмыз луэ озьы, кызьы асьсэ антиутопиосазы гожъязы Рэй Брэдбери, Джордж Оруэлл. 

Гуртын улыкум, Ванягай уж дорысьтыз бертӥз но мынэсьтым юа:

-Телевизор учкид-а? Донецкын референдум ортчиз-а?

- Ӧй, мон уг оскиськы ни со иворъёслы. Тон оскиськод- а мар-а?

- Уг. Озьы ке но тодоно ук, мар луэ.

Уд оскиськы ке но, учкиськод. Тӥни кыӵе со медиавирус. 

Гурт. Егитъёс. Шутэтскон.

Шутэтскон нуналъёсы ваньзы инкуазе потазы, дыр. Бакчаын быдэс нунал ужаса, жадиськод кадь но, акшан вакыт вуэ ке, олокытысь ӟигар потэ.

Умой, ку быдэс гуртысь егитъёс, бадӟымъёсызгес но, покчиосызгес но, одӥг интыын люкасько. Пӧртэм компаниосысь одӥг интые люкасько. Соку ик тодам вайисько армие келян ӝытъёсты. Кызьы вань пиос армие кошкисез дышетыны кутско, кызьы армиын астэ возёно, кинэ кылзӥськоно, кызьы портянка пыдэ биняно. Таӵе шулдыръяськонъёсын пиос нылъёслэсь мыло-кыдогес кырӟало, экто но шудо. Яратоно кадесь.

Тани татын но. Машинаысь крезьгурзэс нырысь лэзизы вал. Но кытысь-марысь "зарни арганчимы" баянзэ поттӥз. Пайми. Пиос чурак султӥзы но, сыӵе мылысь-кыдысь кырӟаса лэзизы... Котькыӵе нылаш соку ик соослы синмаськысал. Эктон гур лэзь, куризы вал нылъёс. Но "зарни арганчи" баянзэ ваем бере, сосектаез кыскаса, солэн киосыз туж жадё.

Вань зэмос арганчиос  погратозязы юо. Эктӥсьёс соосты весь сектало, сектало, таиз понна, соиз понна, арганэн кымалтыса, пол вылэ поныса... Таиз но арганчи соос пӧлы ик пыре. Шузимытозяз сектазы ке но, со шудэмысь но кырӟамысь уз дугды. Пыд вылаз уз сылы ни, но арганзэ уз кельты. Собере мукет нуналаз ветлэ ини, малы меда сыӵе зол киосы висё шуыса.

Со арганчиос матысь дыре раритет луозы ни.

Зэмос гуртысь зэмос суредъёс. Сыӵе ини милям туала улонмы.

Туала

Южной автостанциын учыр. Пуктэ син азяды трос портэм гурт адямиосты но куноысь бертӥсь пересьёсты. Арлыдоослэн эшшо басмалэсь вурем сумкаоссы вань на.

Тӥни одӥг сыӵе пересь кышномурт автобуссэ возьма. Огшоры гуртысь кышноос кадь дӥсяськемын, кияз басма сумка кутэмын. Сылэ. Солы жингырто, кышномурт кисыысьтыз телефонзэ поттэ но...

Тӥ уд оске.

Шунды улын телефон бордысьтыз куртчем яблок чилектэ. Айфон. Кутӥз, вераськиз, кысӥз, блокировкае пуктӥз.

Туала дыр.
___________________________________

Такъянаелэн верамысьтыз.

Кытчы пыриз ӟуч культура?

Россияын кызь ар капитализм ни, нош 1-тӥ маез али но Быдӟым праздникез кадь гажало. Кыӵе парадокс. Коммунизм ноку но Россиысь уз кошкы, дыр.

Арсенал дорын пӧртэм калыклъёслэн ассоциациоссылэн концертсы вал. Удмуртъёс, азербайджанъёс, татаръёс но ... велосипедистъёс.

Кык арлыдо кышномуртъёс сыло. Одӥгез мукетызлы вера:
- Кытчы пыриз ӟуч культура? Тани кӧня татын калыкъёс кырӟазы, эктӥзы. Нош ӟуч лулчеберет ӧвӧл. Одӥг пол школаысь литератураен дышетӥсьлэсь но юай вал ни, ку милям ӟуч культурамы ышиз-быриз?

Зэмзэ но, ӟуч ассоциациос Удмурт  шаерын ӧвӧл. Тӥни озьыгес. ӟуч культура сотэк на ас понназ улэ. Нош кыӵе нюкъёсын со али дыре пуке? Таиз мукет юан ни. Мукет йӧскалыкъёс шаерамы ӧжыт, соос тыршо азьлане кошкыны, асьсэ сярысь вераны. Нош ӟучьёслы со кулэ ӧвӧл, соос сотэк но трос, соослы сотэк но умой. Соос шаляй-валяй костаськыса ветло кадь.

Тани Вовик Вахрушев али малпанзэ вераз вал. Огпол, пе, кар инбаме учки но, куинь кизилиез гинэ адӟи. Нош гуртын вань кизилиос юг-юг пишто. Нош карын куинез гинэ. Кӧня кужым но мылкыд кизилиослы кулэ  ӵындэм кар инбам пыр пиштыны.

Обособленной йӧскалыкъёслэн бадӟым мылкыдзы.