«Мае адӟи, сое ик гожтӥ» — таӵе амалъя гожъяськон литература ӧвӧл

«Удмуртия» книга поттониысь проза ёзэн кивалтӥсь Сергей Матвеев одӥг интервьюаз вераз: удмурт литератураын вань трос егит усто авторъёс, но соослэн гожъямъёсазы трос жагез. Со пӧлысь шуг адӟыны дуно арбериез.

Кылем арын егитъёслэн Dart газетсы кутскиз радъяны литературалы сӥзем ӝытъёс. Отчы 10-лэсь ятыр адями огпол но ӧз вуылы. Гожъяськисьёсмы мында ик милям лыдӟисьёсмы но ӧжыт? Озьы шуыны уз луы. Тодосчиослэн пусъемзыя, дыр воштӥськемен, воштӥське лыдӟисьлэн тусыз но. Лыдӟись вань, сое шедьтоно гинэ. Одӥгез амал — вотэсэз уже кутон. Озьы ик кариз Влад Андреев, 2013-тӥ арын вотэсын «Удмурт кылбурчи» огинзэ кылдытыса. Одӥг интыысь табере шедьтыны луэ егит авторъёслэсь гожъямъёссэс! Ми табере тодӥськом, удмурт кылосбуръя факультетын гинэ кылбурчиос уг кыдало шуыса. Али огинэз нуэ егит кылбурчи Богдан Анфиногенов.

— Мон рос-прос басьтӥськи та группа борды, малы ке шуоно туж потэ вал, Интернетын удмурт поэзия мед улӟоз но улоз шуыса, — вера кылбурчи.

Бен, огин кылдӥз, син азе пуксиз егит кылбурчиослэн но лыдӟисьёслэн зэмос лыдзы. Но татын кылдэ мукет юан: кыӵе ӟечлыкен кылбуръёс отын печатласько? Угось вотэсысь тросэзлэн кылбурчиослэн ӧвӧл кылэмзы критикъёслэсь дунъетсэс, ӧвӧл тодэмзы удмурт литературалэн классикъёсыз сярысь но. Соослэн дышетӥсьёссы — ӟуч Эдуард Асадов, Вера Полозкова но мукет туала гожъяськисьёс.

«Удмурт кылбурчи» огинысь кылбуръёсты учкиськод ке, валаськод: лыдӟыны номырзэ. Кабъёс тӥямын: рифма ӧвӧл, ритм тэтча но чутэ. Оло, дыр ортчыса, кылбуръёслэн, кызьы али лыдзы, озьы ик ӟечлыксы будоз. Но кызьы? Егит автор, школа кружокысь потыса, уг шедьты ни кылбуран тубатэз. Кемалась ворсаськиз Удмурт кун университетын литературая «Вуюись» кружок, уг кылдыты сое Удмуртиысь писательёслэн огазеяськонзы но.

Озьы ке но книга бичетъёс пото, соя ик ми дунъяны быгатӥськом туала удмурт литературалэсь ымнырзэ. Тодамы ваём берло дыре егитъёсын поттэм книгаосты. Соос пӧлын — Микаль Михайловлэн «Мон одӥг пол уг сайка улыны», Марина Пахомовалэн «Йыртэмпол», Богдан Анфиногеновлэн «Айшет будущего» кылбур бичетъёссы. Азьло аръёсты кутӥд ке, вераны кулэ Оля Трониналэсь «Йыромем йыртэмась», Лариса Ореховалэсь «Ярдуртэм нюлэс», Дарали Лелилэсь «Гур сьӧрысь суредъёс» книгаоссэс… Та но мукет авторъёслэсь творчествозэс учкыса, луоз-а меда вераны, кыӵе ӧръя кошке удмурт литература?

— 10 ар талэсь азьло удмурт литератураын этнофутуризм кузёяське ке вал, али сыӵе яркыт ӧрез висъяны уз луы, — вера Виктор Шибанов. — Котькуд авторлэн аслаз гожъяськон амалэз, темаосыз. Дарали Лели кутскыкуз этнофутуризм амалъя гожъяськиз ке, университетэз быдтыкуз, со гламур пала кыстӥськиз ни. Рэплэн кабъёсызъя гожъяське Пичи Пурга ёросысь Алексей Пикулев.

Котькуд автор кылдытэ туала удмурт литературалэсь аспӧртэмлыко ымнырзэ. Кылосбур тодосъя кандидат Виктор Шибанов пусъе солэсь куд-ог тодметъёссэ. Нырысетӥез тодмет — со азьвыл штампъёсъя гожъяськон. Мон ватсасал на, мукет кылбурчиослэсь адӟем карон. Али удмурт литератураын тужгес адӟымон автор Богдан Анфиногенов луэ. Солэн аслаз аспӧртэмлыко гожъяськон амалэз — кылбуръёсаз ӟуч но англи кылъёсты кутон. Табере вотэсысь егит кылбурчиослэсь гожъямъёссэс учкиськом ке, валаськом, солэсь адӟем каро тросэз егит авторъёс. «Удмурт кылбурчи» огинэз усьтӥд ке, со выллем кылбуръёс тон вылэ ведра дурысь кадь кисьтӥськозы. Кылсярысь, гожтэ Полина Куликова: «Тон черекъяд — разверглись небеса. Тон черекъяд, аслыд ачид паймыса». Богдан ӟуч но англи кылъёсты валаса кутэ ке, Полиналэсь малы ӟуч кылъёсты кутэмзэ мон уг валаськы.

Кыкетӥ тодмет, кудзэ висъя Виктор Шибанов, со литературной куронъёсъя гожъяськонлы пумитъяськон. Басьтом Пичи Пурга ёросысь Алексей Пикулевез. Сое тупатъяны кутскиськод ке, вера тодосчи, кылъёссэ воштыны егит кылбурчи пумит луэ. Со кырӟанэлэн кылъёсыз, со вотэсын вӧлмемын ни, соин ик мон кылъёсме уг тупатъя ни, шуэ. Нялтас вераса, тросэз кылбурчиос гожъямъёссэс тупатъянлы пумит луо. Угось, кызьы соос малпало, редакторъёс соослэсь кылбур стильзэс музон каро.

Туэ Свердловск улосвылысь Каменск-Уральский каре бичаськизы егит гожъяськисьёс. Аслым но отчы сюрыны шуд усиз. Тросэз дунъясьёс пусйизы, адямиослэн егит дыръязы гожъяськемзы потэ, нош тыбыр сьӧразы улонзы ӧвӧл на. «Мае адӟи, сое ик гожтӥ» амалъя гожъяськон — литература ӧвӧл на. Мукетыз ужпум — егитъёслэн кылзы тӥяськемын. Тросэз удмурт егитъёс ӟуч кылын малпасько, предложениоссылэн радлыкез но ӟуч. Та шуг-секытэн пумисько вань калык литератураос, угось ӟуч кыллэн кужмыз золгес. Но кызьы тупатоно югдурез, куке нылпиос уен-нуналэн вотэсын пуко, ӧжыт лыдӟисько но стилистика бордын уг ужало?

— Егит гожъяськисьёслэн ужъёссы суро-пожо, ӟучо-удмурто луо. Егитъёс утчасько, улон шоры мукет сямен учко. Дыр азьлань кошке, но литературалэн, чеберлыко кыллэн законъёсыз уг воштӥсько, — вера «Кенеш» журналысь проза отделэн кивалтӥсь Олег Четкарёв. — Тодэ лыктэ 50-тӥ аръёсысь «Советской Удмуртия». Со вакытэ кыл сӧриськемын вал, вуоно писательёс гожъяськизы ӟуч конструкциосын. Но 1980-тӥ аръёсы литературае лыкто Г. Красильников, Р. Валишин. Соослы луыса литература йӧнаны кутске, кыл тупатске, кылдэ мукет ӟечлыкен литература. Оскисько, асьме литератураын кылдозы на выль Красильниковъёс.