Егитъёс будо.

Толалтэ егитъёс чидатэк возьмазы тулыслэсь вуэмзэ. Но, шонер вераса, сое кема возьманы оз кылды.

Тани пальпотись шунды сиосыныз улэп куазез маялля ни, быдэс дунне вож куар полы вые, пинал сюлэм но яратон кужым азьын шунатэк уг чида. Ваньмыз кадь умой, но егит мугорьёс будо, дас тямыс арес тырмыса гинэ вуэ, пиослы армие кошконо луэ. Тани милям Пуро гуртысь пияшъёслы но повесткаос вуизы: соосты армие басьто. Куинь ешъёс, одиг классын дышетскем пиналъёс быдэс арлы люкиськозы вордиськем интыосынызы, яратоно адямиосынызы.

«Кызьы егитъёсты келялозы, озьы ик соос армиын вордиськем палъёссэс утёзы», – оско пересьёс. Соин ик котькуд, армие кошкись юлтош милям гуртысьтымы солдатпи келян йылол пыр потэ. Таче йылол нырысети интыын сылэ на трос удмурт гуртъёсын.

Пиосты келяны жыны гурт люкаськиз, луоз, коркан шокчыны номырин: жокыт омырын портэм сиён, пыжиськем зынъёс сураськемын. Пересьёс мар ке  асьсэ понназы верасько, пиналъёсызгес корказьын но азбарын арган шудэмъя тапырто, кырзало, учкисьёсыз зырдыт чабо. Дырын - дырын адске, кызьы солдатпиослэн матысь эшъёссы пиослэн картузысьтызы чибориё лентаос вылэ зырдыт малпанъёссэс, зечкыланъёссэс гожтыса кельто. Сиськыса, юыса, тапыртыса, уг шодиськы, кызьы дыр ортче.

Тани чук шуккон дыр матэктиз. Ваньзы чалмытскизы, муш палэп кадь калык солдатпиосты котыртиз. Пересьёслэн солдатпи келян гур чирдэмъя, воргоронъёс пияшъёсты вакчи зус вылэ султытизы. Вуоно ожгарчиос лэчыт синъёсынызы чаклало корка пырем адямиосты, асьсэос зус вылын йыг - йыг сыло. Чилясь пуртэн, манетэн мумы кор борды чук шуккиськиз. Вань калык учке пиос шоры: пуртъёсты табере выж вылэ лэзьяно. Вань сыче оскон: пурт бышкалтскиз ке, солдатпи бертоз, нош оз ке, солы армиын ческыт уз поты, куддыръя армиысь берытскытэк но кылёз. Куинь пол пиос лэзизы пуртъёссэс, мумы кор борды йоттыса, куинь пол ик мертчиськизы соос выж борды. Озьыен, ваньмыз умой ортчиз, но азьланяз эшшо кык коркан чук шуккыны кулэ на.

Со воргоронъёс ик васькытизы солдатпиосты зус вылысь. Пияшъёс, чибориё картузъёссэс дисяса, арган гуръя тапыртыса, мукет солдатпилэн корка палаз вамыштизы, соос сьоры гажано келясьёс но.

Сокем шулдыр ортчо удмурт гуртъёсын таче жытъёс! Пичиез но, пересез но, егитэз но, ог огзылэсь возьдаськытэк, матысь адямиос кадь шулдыръясько. Вань мар тодэ вайыны! Зуч адями но, таче удмурт жытэ вуыса, аслэсьтыз зуч визьноданзэ вунэтыса, удмурт калык полын шулдыръяськоз.

Арган гуръёс, адями куараос, калык кырзанъёс быдэс гурт тыр чузъясько, мукет палъёсы паськыт возьёсти, вож нюлэсъёсти шуккисько. Вазь чукнаозь, жадёнэз тодытэк, пуро солдатпиосты келяз калык. Мукет нуналаз угось пиосты воинкоматысь келялозы тодмотэм каръёсы, кытын мукет куазь, выль адямиос, адзылымтэ гурезьёс.