Дунне котыръян

Малыке но одиг интыям пукыса, мон чаляк акыльтисько. "Хохот шамана" книгаын таче веран вань. Ку адями весь одиг уж лэсьтэ, со деградироватьтыны кутске. Улонти азьлань кошкон интые, берлань чигнаны кутске, номыр но выльзэ уг басьты ни. Йырвиым ( адями) дыше огкадь кусыпъёслы, выросъёслы. Котыр улон азьланьске, нош солэн интыяз сылэ. 

Тазьы учкид ке, берпумети дыръёсы трос тодмоосы дуннеез котыръяло. Комнатаысьтым журналистка Катя Египетысь бертыса, Турцияе со арын ик шонтиз. Собере Удмуртиын жыны ар пукиз но воксе аниматор луыса ужаны Египет пала шонтиз. Ууу, ерпечка но ерпечка. Шутэтскон сезон быриз ке, нош ик берто, шуиз. 

Маши Золотарева, Тихонова Кристиен гужемлы Финляндие шонтиллям. Зечокъёс. Али кытчы ке но кошкыны туж трос луонлыкъёс. Огез тини, виктория бичан. Европаез но адзид, уксе но поттид, кунгож сьорысь йоскалыкъёсын но тодматскид, иностранной кылдэ но волятил, улондэ но огдырлы воштид. Оглом, быдэсак шутэтскид но трос мар выльзэ тодид. Туж кулэ практика. 

Удмурт филология факультетысь дышетскисьёс но котьку Эстонияе, Венгрияе, Финляндие потало. Соос тросгес дышетскон ласянь. Куддыр асьсэос но уг валало, дыр, кыче усто факультетын дышетско. Азьло ачим уг но оскиськы вал,  Удмуртиялэсь кыдекегес сюро шуыса. Ма кытчы огшоры удмурт гурт нылашлы! Но со малпан янгыш. Мылыд потиз ке, ваньмыз луоз. 

Луэ огшоры интыысьтыд султыны но аслыд кутыса кытчы ке но шонтыны. Кызьы Аськей Марини, Чудья Жени но Кибашлы Тани ветлизы Чайковске, Кузонэ.  Мынам Марья эше вань, ми соин велик вылэ пуксьыса, боляк гуртэ мыниськом вал. Юнме, яке пыласькыны, яке огшоры гуртсэс учкыны (Кияса ёросысь Черной гуртэ озьы вуылим вал). Сьорамы эшшо Чубайс нимо эшмэс кутиськом на вал, соин коть уйин но ветлыны кышкыт овол. Сундук гуртэ уйин ворттылским вал. Боляк гурт ке но, нош улон отын чылкак мукет. Отчы вуэммы бере паймим:  огезлэсь портэм мукетыз "Сяська -Насьта" кадь буям коркаос чурак гинэ сыло. Кылсярысь, заборзы зангари буямын, капказы лызо-вожо но вылаз пулэсь вандэм сяськаосын чебермамын на, липет улзы югыт вож буело, укно янакъёссы эшшо мукет на. Со одиг гинэ корка озьы. Яркыт! 

Трос кытчы луэ вуылыны, трос кызьы луэ астэ азинтыны но выль тодон-валанъёс басьтыны. Егит дыръя ке од, ку эшшо ветлод на тодмотэм интыости, кунгожсьор кунъёсти но огшоры вордскем шаертид. Берло бер луоз ни, валаса но уд вутты. 

Эн кышка! Вылез адямиез вылэгес жутэ, пожаськем мылкыдэс пуксьытэ но трос тодмотэм осъёсты усьтэ!!!