Берпумети рейс

Уй туннэ паймымон шуныт. Ивановоысь потыку, инбамез пилемъёс ватизы но кезьытлы улие васькыны оз сетэ ни. Берло пумен пилемъёс пыр кизилиос учкылыны кутскизы, собере чылкак пыдэстэм уй инбам усьтиськиз. Соин кезьытгес ик луиз ке но, чиданы луэ. 

 Берпумети рейс. Шумпотыны кулэ кадь но, нош мынам сюлмам ворпо нумыр  бугыръяське.  Кылем арын озьы ой вал. Быриз но быриз целина. Али отрядной улон вирам золгес ик пычаз видимо.  Комиссар ужен вырыса, бригадае сузэръёс но вынъёс интые луиз. Сюлмы сюреслы синмаськиз. Нош али сюлэм самой яратоно туганэныз люкиське кадь. Вала, ноку но чугун сюрес доры уз берытскы ни шуыса (проводник луыса). Целина кутскыку, дыр чалякгес мед ортчоз шуыса, пуккод. Тани ортчиз. Но мар табере? Кытын ке йырвиым пыдсын яркыт суредъёс сяна номыр но кылемын овол ни. 

Уг яраткы туспуктэмъяськыны. Но яратко туспуктэмъёсты учкыны, ортчемзэ тодэ вайыны. Ортчеменыз улыны уг яра шуыса, верало ке но.  Мон малпасько, берытскылыны кулэ ик шуыса. Ортчемезлэсь вуоно нунал порме. Ортчемез дышетэ, визьмоя. Ортчемез выль вамышъёс лэсьтыны юрттэ. Особенно ку тон чошаткод ортчемзэ но ализэ. Ортчем улэ малпанъёсын. Выёно гинэ овол отчы. Шодтэк шорысь али нуналэз но адзытэк улыны кутскод.

Ивановоысь но кошкыку сыче ик мылкыд луоз, дыр. Удмуртиын мон котьку луо, нош Ивановысь кошки ке, татчы врядли берытско на. Озьыен, весяклы ышозы тапалась эшъёс, челнок, ульчаос, чожъёс но дыдыкъёс.