Мусульманин

Одӥг веросме поттыны уг быгатӥськы вал. Табере со печате потӥз ни. Соин ик оригиналзэ татчы но гожтыны быгатӥсько. Нимыз: Мусульманин. Печатьын со мукетгес, валамон ини. Нош вал со таӵе:

Мускоысь уйшор бере гинэ вырӟоно луэ. Кинешма пала мынӥсьёс вань мугъёсъя керӟегъяськыны дасесь. Валамон: бер ини, ваньзы жадемын, иземзы потэ. Проводниклы вань адямиосты вагонэ пуктоно, чаляк валес котыр сёткано, чаен сектано но югыт тылъёсты кысоно. 

Али пӧсьтолэзь. Озьы ке но уйёсы туж кезьыт кариське. Вагонэ вӧлдэттӥ сяна, пытсам укнотӥ но, шуласа ик, кезьыт омыр пыре. Кӧня адями висьыны усиз ни. Озьы ке но штудентъёс* ужало. Кытчы пырод на, Ивикаре барыш поттыны вуизы ук.  Кык шобрет улэ ватӥськыса, пуко ини табере соос ас ужан интыязы но чидатэк возьмало шунды ӝужамез. Вуоз ӵукна – вуоз изён но шуныт дыр. Та уж улонзэс йыринь-чукинь кариз ни. Уйин пассажиръёс изё. Но туннэ марке огез титан вӧзы султӥз но сылэ, изьыны уг дырты. Салонын югыт тылъёс кысэмын ни, крыж корридорын гинэ югыт. Ӵапак та крыж корридорын сылэ пӧсь вуэн чан, проводниклэн ужан но шутэтскон интыез но сёрос. Пияш укно пала берытскемын, со ортчись суредъёсты синмыныз келя. Малпаське, дыр, марке сярысь.

Марайко,  ужан интыысьтыз потыкуз, пияшез синйылтӥз. Сылэ ке, мед сылоз шуыса, малпаз ас понназ но  номыр ӧз вазьы. Со куспын пияш Марайко пала берытскиз но, нылашлэсь курень синъёссэ шедьтыса, юаз:

- Тӥляд йыр висемлэсь эмъюмды вань-а?

-Мар луиз? Температурады вань?

-Вань кадь кӧня ке.

-Возьма ай, шедьто, дыр. Аслам ӧвӧл. Вань ужъёсме быдэсто но утчало.

Тау карыса сямен, пияш Марайко шоры учкиз. Нылашлэн трос ик ужез ӧй вал ни, кинлы ке чай нуоно но бервыл тусьты-пуньы миськоно. Пияш нимзэ вераз ке но, Марайколэн йыраз со ӧз кыльы. Ним вунэмын, нылаш понна, со огшоры Дагестанец. Армиын Россия кунмылэсь данзэ уте, ракетаосын вырыны  дышетске. Ӵапак али Мускоысь служитьтон интыяз мынэ. Палэнэ военной училищее дышетскыны пырыны ветлэм. Сомында осконэз сюлэмаз ӝуа вылэм, но … пырымтэ. Ачиз шоры учкид ке: чиед, пичи. Быдэс улонзэ армиын служба нуыны вордскемын ӧвӧл кадь. Пеймыт  куо, бадӟым ныро, пӧсь сямо- зэмос гурезь интыосын улӥсь.

Марайколэн чыры-пыры ужъёсты быдэсъян висказ, Дагетанец доры  50-тон аресъем пиосмурт лыктӥз. Пинал пияшлэн меӵак синъёсаз учкыса, ымныр дораз матэктыса, шыпыт куараен со вазиз:

-Виськод?

-Оо.

- Иисус Христосэз ӧть.

- Маин со мыным юрттоз. Со пророк гинэ.

- Инмар – со яратон. Висён – со дьявол.

- Кызьы висён дьявол луоз? Сатана – со кулонлэн кылчинэз, кудӥз адысь уллямын. И тодӥськод-а, мар понна? Йӧнъяськемез понна. - Кесяськыса вераськыны кутскиз Дагетанец, - Исса – Аллахлэн чиньыез.

- Котькуд адямилэн аслаз Инмар-кылчинэз. Со котьку юрттэ аслаз нылпиезлы,- шыпыт вераз воргорон.

- Инмар одӥг, солэн ымныръёсыз но нимъёсыз трос!

 «Марлы осконо? Малы ӧвӧл! Марлы! Мугез тодмо. Тани кин ке но Инмарез Аллах шуэ, кин ке Иисус, кин ке Будда. Но Инмар одӥг ук! Я мукетыз Инмарлы уг оскы, аслыз гинэ, кичӧлтӥсезлы гинэ, писпулы но коркаезлы гинэ. Со но оскон. Озьыен, ӧвӧл та дунне вылын чылкыт атеистъёс?», - сыӵе малпан чилектӥз Марайколэн йыраз. Дагестанецлэсь но воргоронлэсь вакчияк вераськемзэс кылыса, Марайко кышказ. Вераськисьёслэн синъёссы ӝуало, соос ченгешо, асьсэ религиязэс умое поттыны выро.

«Гаврилов Посад» нимо станция матэктӥз. Татын поезд 15 минут сылэ. Ваньзы изё ини. Дагестанец гинэ уг. Кизилиё инбам улэ со Марайкоен ӵош  потӥз. Нылаш вагон питранъёслэсь ӟырдамзэс эскериз но вагонлэн пырон азяз султӥз. Озьыен, ваньмыз умой, Дагестанец гинэ ӟырдамын.

- Адӟид-а, кытын тон вал? – юаз Марайколэсь пияш.

- Кытын?

- ӧд вала –а мар-а? Тон отын вал, - но Дагестанец кытынзэ чиньыеныз гинэ но ӧз возьматы. Марайко учкемезъя валаз, кудпала учкыны, - оломар но вераськиськод ук. Кытын, бон, мон вал?

Дагестанец номыр но берен уг вазьы. Марайколэсь синъёссэ гинэ порыса, сылэ. Озьы ог-куинь минут улыса, нылаш ӧз чида, выльысь юаз:

-Ну, и кытын меда мон вал тонъя?

- Тон одӥг дыре музъем вылын но липет вылын но вал.

-Кызьы мон липет йылэ вуом? Тон мар?

Дагестанец та юанлы валэктон ӧз сёты, кескич синъёсын гинэ учкиз Марайко шоры. Малпаськы ачид шуыса, вераз кадь. Юбо вылысь тылъёс гинэ пилэсь кылъёссэ валазы. Соос ук Марайколэсь ӝыны мугорзэ тӧдьы коркалэн борддор вылаз лякизы но котлэсь вожектэм липет вылэ ӝутӥзы.

- Тон валэкты мыным, кызьы адями Инмар луыны быгатэ? – кӧня ке дыр ортчыса, юаз христианкалэсь мусульманин.

- Озьы ик. Нырысь со адями вал, собере…

- Мон лыдӟи тӥлесьтыд Библиядэс. Святой дух лыктэ но Марияез пияно каре. Кытысь Святой духлэн кидысэз? Со адями но пудо-живот ӧвӧл ук. Милям но вань Иисусмы. Только милям со пророк Исса, адями. Инмарез нокин но адӟыны уг быгаты. Вот ку тӥляд адямиос вӧсяськыны кутско?

Пияш христианствоез валэктыны косэ. Но, Марайколэсь верамзэ куспетӥ карыса, пырик аслэсьтыз малпанъёссэ вера. Соин вылды нылашлэн  валэктон мылкыдыз чылкак быриз.

- Котьку быгато. Но тросэз пересьмыса гинэ Инмарлы оскыны кутско но черкъёсы мыно.

Пияш Марайколэн верамезлы туж паймиз. Солэн йыраз уг тэры, со уг вала христианствоез. Со понна та дунне вылын мусульманство гинэ вань.

-Тӥляд нош ку?- юаз Дагестанецлэсь Марайко. Ӧз юасал ке но, пи та юанлы валэктон сётысал.

 -Вот. Нош милям вӧсясько соку, ку адямилэн просветлениез луэ. Котькӧня арескын. Мынам простветление армия азьын вуиз. Мон  азьло кыскисько но юисько вал. Али нош ваньзэ валай. Вӧсяськисько. Шонер улыны тыршисько.

Та станциын сылон дыр ортчиз. Марайко Дагестанецез вагонэ пырыны косӥз, ачиз но сьӧраз тубиз. Поезд азьлане вырӟиз.

Эмъюм юэмез бере, пияш аслаз интыяз кошкиз. Кырын кезьыт вал, мугор кынмиз. Чай юон басьтыса, Марайко мукет проводник доры бӧляк вагонэ вамыштӥз. Чай шунтэ, вераськонъёс кыстӥськись дырез виё. Тамак кыскон тамбуртӥ потыку, нылаш нош ик Дагестанецез адӟиз. Со тамак пурккетыса, сылэ вал. Марайко, шораз учкыса, мыняз но корт ӧс сьӧры ышиз.

Котькуд адями оске аслаз Инмарезлы. 

Тау.