Утчасько

вторник, 25 декабря 2012 г.

Оло вань, оло ӧвӧл

Выль Ар бере мукет форматэ выжо. Али мынам копак зачётной арня мынэ: дышетсконъя но, вань ужъёсме быдэстонъя но, вань малпанъёсме радъянъя но. Йылпумъянъёс одно ик лэсьто ай, нош али огзэ гинэ верало:

                                                                  Мон оло вань, оло ӧвӧл!

Соин ик вуоно арын мон кулэ карисьлы котьку мед луом. Тыршо. Таиз ар переходной мед луоз. Али тодко ни, кыӵе удысын мон асме узырто но возьмато. Малпам ӵектосъёсме улонэ пыӵато!
Матысь дыре ышо кык арнялы, кошкисько кунмылэн шунды ӝуӝан палаз. Нош собере кутском! Кыйлэсь кышкасько ке но, азьлань мынон понна, кышканэз пачкатоно) Озьы ведь, эшъёс!

вторник, 18 декабря 2012 г.

Гольык ветлыны мылкыд карисьлэн удмурт кылэз дышетэмез потӥз

Мыным контактын одӥг адями гожтӥз, удмурт кылэз дышетэм потэ шуыса. Туж, пе, кылъёсты яратко. Эшшо ужасько, дышетскисько на шуэ, и мон, пе, натурист. Предлог  удмурт кыл дышетон вал, нош на самом деле со аслаз тунсыкъяськонэз сярысь вераны, популяризоватьтыны кутскиз. Вот шнырик малпасько. Адямилы 24 арес ни, нош со натурист на.

Кин со сыӵе натурист? Натурист - адями, кин уг возьдаськы адямиос пӧлтӥ гольык ветлыны, адямиос пумит уг луо ке. Со озьы шуиз, но мон малпасько, мер пумит ке но, соос пырик дӥськутсэс куштыны дась. Остэ! Тон, шуэ, монэ шонертэм гинэ эн вала. Ма мон соку ик мукет ассоциациос кылдӥзы. А именно. Удмуртъёс, асьсэ возьдаськон сямынызы, ноку но дыр гольык адямиосын эрико вераськыны уз быгатэ. Эшшо натуристъёс пӧлы ноку но уз выйе, асьсэос но сыӵеесь уз луэ. Может луоз сыӵе учыр, куке удмурт луоз юэмын, яке ыштоз йырсазьзэ.

Ну тӥ син азяды гинэ пуктэ: мынӥды тӥ кыӵе ке но литературной ӝытэ, нош отын гольык адями пуке. Бон вечеринкаын - а, клубын-а соиз кӧня ке валамонгес ни дыр но, нош огшоры улон учыръёсын? Со натуристэ шуэ ни, котьку, пе, потэ вал мынам тунсыкъяськонэ сярысь телевизор пыр мед  вералозы шуыса, мед адямиос тодозы шуыса.

Сыӵе ӧр, конечно, улонын вань! Соин ик мон сое копак уг палэнтӥськы, но монъя, со - не этично! И мон дорозь уг вуы юанэлы валэктон: мар соослэн озьы возьматэмзы потэ?
Ну вот, дышетӥз но ӧз но ни со удмурт кылэз, натурист луэмез сярысь гинэ оломар  мадиз но ышиз!
P.S. Саунаын гинэ соослы улыны кулэ вал дыр)ХД

вторник, 11 декабря 2012 г.

Энергетик бордысен кутском.

 Тани соос - карысь будӥсь пиналъёс. Асьме кунмылэсь азьланьзэ лэсьтӥсьёс шуод-а мара... Ижкарысь огшоры азбар.
................................................
Адӟиськоды- а, соос пыр адскись одноразовой стаканчикъёсысь марке но юо. Со напиток ӧвӧл, эн малпалэ!

Тӥни мар юо соос------------------------------------------------------------------------------------>>>>>>>>>


Ну. конечно, соос монэ адӟизы.

- Нас снимаюююююююююют! - чир кесяськыса, кин кытчы пегӟиз. Пазьгиськизы, кыӵе ке урод йыруж лэсьтэмзы бере кадь.
Энергетик бордысен кутскыса, мар борды меда соос басьтӥськозы? (риторический юан)

воскресенье, 9 декабря 2012 г.

Ваньмыз азьланяз, но умоезлы оскись пиналъёс бордын!

Кӧснуналэ ветлӥ "Удмурт кырӟан - 2012" концертэ, кудӥз ДК "Аксион"-ын ортчиз. Залын одӥг буш пукон инты но ой вал ни дыр, сомында калыкез вал. Оглом вераса, мыным кельшиз. Богдан потыку, арлыдо кышномуртъёс сыӵе кариськизы нош. Фу, что за кырӟан кадь шуыса. Нош берлогес, куке со кырӟаны но тэтчаны кутскиз, соослэн синъёссы ик ӝуаны кутскизы. Вот со!

Концерт бере Богданъёс Кечелэ "Кечол пати" ӝытэз нуыны ширтӥзы. Мынам но потэ вал отчы сюрем, но ӧз пӧрмы. Зато Гуня бертэм бераз аслэсьтыз мылкыдзэ кисьтӥз мыным. Сузэре вераз, кыӵе мар вал отын. Богданэз, пе, нылъёс лякизы) хех, могдос.

 Но кулэ гуртъёсын сыӵе мероприятиос ортчытъяны. Мар Ижкарын гинэ а мар- а мед соос луозы кадь. Гуртъёсын милям азьветлӥсьёсмы но азьлане осконъёсмы будо ук. Соин ик, соосты  дасяны кулэ удмурт лулчеберетлэн трос оръёсыз но палъёсыз вань шуыса.  Эшшо со гуртысь юись гопникъёслэсь йырвизьзэс мукет пала берыктыны кулэ на, та выллем, визьмо лэсьтэм патиос пичи ке но шелеп та уже тэлято ик. Кызьы егитъёс дорозь капчигес вазиськыны луэ? Конечно, шулдыръяськон пыр, визьмо, пӧсь позыръяськон пыр. Тау, Золотарева Машилы. "Пинал мылкыд-юмал йӧлпыд" концертъёс выллем ӝытъёс ми котькуд ар лэсьтылом ай асьме гуртын. Малпасько, кӧня ке сезон ортчыса, учкисьёслы  милям Пуро гуртмылэн залаз пуконъёс уз тырме ни шуыса. Ваньмыз азьланяз, но умоезлы оскись пиналъёс бордын!




понедельник, 26 ноября 2012 г.

Озьы кулэ! Малы тынад юанэдлы, малы тон мыным кулэ, мон сыӵе ик юан тыныд сётыса, тон номыр но уд вазькы?  Ку вуоз люкиськон асьме дуннеямы. Лэсьты со вамыштэ, вера ук! Но ваньмыз озьы ик мынэ, ми, ог-огмез вӧсь картыса, улком. Озьы кулэ а мара иське, кызьы Сергей Бодров шуэ.
Валасько, кулэ дышетскыны, кулэ ужаны, кулэ отын семья кылдытыны, дыр. Но малы асьмелы яраттэк ӵош луыны кулэ?

вторник, 20 ноября 2012 г.

"Полный штиль"

Улонам али "полный штиль".Автошколае ветлӥсько, университетын пукисько, интернеттӥ поръясько, куддыръя консультантэн ужасько, но озьы но нокытчы поръяны но потаса уг вуттӥськы, гуртысь уж лэсьтэмъяськисько... но котьку малпаськисько! Ульчатӥ гань-гань мынко но, крезьгур кылзӥськыса, малпаськисько. Параын пукемъя, кылбур чуръёс гожъясько. Сыӵе романтик али мынам, гань-гань. Сюлэмылы номаин но кокаськыны уг люкеткы, ужа ас понназ, нош ымныр вылын ӧвӧл серекъям, огшоры мынясько. Марке сярысь тодам вайко ке, синъёсы ог-вить минутлы ӝуатско но, нош ик кысо. Бездэмын али соос одӥг арлы. Номыр но монэ сокем уг шумпотты, ваньмыз шоры кезьыт учкисько, кезьыт дунъясько. Ачим но нокинэ но уг серекъяткы, мылкыдзэ уг быгаткы ӝутыны. Туж секыт угось али йӧтске мыным та уж. Азьло кадь ӧвӧл ни. Ортчы вал чалягкес та ар  и ваньмыз мед луысал тодмо но валамон.

среда, 14 ноября 2012 г.

Азьтэм.

Остэ, кӧня котырам азьтэм адямиос. Честно ке соос мынэсьтым вожме потто. Удмуртъёс особенно пуко ас дуннеязы но номыр но уг каро. Мынам ӟигары уг тырмы тӥледын нюръяськыса. Кызьы меда одъяськоды азьлань сюрестэс лякылыны. Сое, кагаз вылэ суредаса но йырын чебермаса гинэ, уд пӧрмыты ук. Жаляса верано анай-атайды но котьку вӧзады тӥледыз киултыса азьлане уз нуэ. Яке марлэсь ке кышкаськоды-а? Но тӥ понна нокин но бырйыны сюрес кожондэс уз быгаты! Куке но асьтэлы ик кулэ луоз кожыны, вазьгес-а, бергес-а, но кулэ луоз. Улон  тӥледлы бырйыны шанс сётэ. Малпаськыса сое лэсьтоно. Нош мон аслым бырйи ни. Табере та сюресысь кошкыны уг быгаты ни, матысь бадӟым из шоры дото зол ой пазьгиськы ке. Но куддыръя сыӵе паника монэ кутэ. Сюлэм тул-тул кокаське, йыры шузиме, мар карыны уг валаськы ни: мар борды нырысьсэ кутсконо, мае нырысьсэ быдэстоно, вутто меда со пумиськонэ мыныса, ку гожто контрольной ужме... Соин йырин ик кышкасько из борды ӝимыны. Та дыре куддыр азьтэмъяськыны но кулэ вал дыр но, выль интые медам шеде шуыса, но со азьтэмъяськон эшшо но трос ужъёс ватса на.

пятница, 19 октября 2012 г.

Кык кизилиос сярысь кӧня ке малпанъёсы.

"Кык кизилиос" концерт. Кинлы ке туж зол кельшем, нош мон нош ик шедьтӥсько шэкъёссэ.

Зэмзэ ке вераса, удмурт классика, "Шулдыр ӝыт"выллем, сьӧд сюлмозь вуиз ини. Кык кырӟан кылзыса, пельъёсы шуяны кутскизы. Пинал аудиторилы соослэн программазы учкемын ӧвӧл, бадӟымъёсызгес  шумпотыса кывлзӥсько ке но, милемлы марке выльзэ кулэ ини. Тӥ шуоды, эн ветлы уг кельшы ке! Ма уг пересьми ке ветло, конечно, просто мыным валантэм огез: лулчеберетъя кивалтӥсез пинал нылаш- Наталия Ушакова - тусызъя кызь вить аресъем. Солэн сюлмыз феерия, экзотика, выльдӥськон уг куры меда?

Малы адямиос выль муртъёслы сюлэмъёссэс усьтыны кышкало! Вот быръёнъёс азьын соослэн гурт лулчеберетъя юртъёсазы концертэн Геннадий Ганьков но Анна Плотникова кадьёс ветло, но соос со кырӟасьёсты сяна уг тодо. Нош ог-кудъёсыз выль нимъёс кельшо ке но, соос одно ик куаразэс сётозы пичи дырысен тодмо артистъёслы. Кызьы вал "Зарни перепеч"-ын, татын но озьы ик! Плотникова балалайкаен сцена вылэ потысал ке, вормысалыз меда со?
  
Выль туфляосы эшшо пыдъёсме пачкато на вал!

Но мыным туж кельшиз Алексей Ложкинлэн саркастической малпанъёсыз но дэмланъёсыз, Асме но со пушкысь таиз ласянь адӟи кадь. Ванялэн фан - группаез Молодцы! "Ваня ЗБС" - нырысетӥ рядын пукись "бадӟымъёс" паймыса, пегӟыны ӧз малпалэ меда? Но котькуд номер, кызьы гожтэ Мария Золотарёва аслаз Блогаз, аспӧртэмлыко вал. Мынам солэн кадь кӧты ӧз тыры ке но, ӧз но сюма шуом.


среда, 10 октября 2012 г.

Богданлэн Трокайлы сӥзем кылбурез


Балдею Богданчиклэн творчесвоезлэсь!!!*** 

Удмурт! Гражданин! В имя это вникай, 
Внимай, разношерстная публика,
Простое удмуртское имя – Трокай,
Которым гордится республика!
Спасибо ему, что Удмуртия наша,
Наша собственность, а не аренда.
Пусть будет везде – на буммаше, в Алнашах.
Не бывает народ без истории.
Должен быть у народа герой.
И для нашей родной территории
Был Трокай человеком-горой!
И давайте мы будем ходить сюда чаще,
Даже чем в супермаркет «Айкай».

За то, что Удмуртия есть в настоящем,
Спасибо, Трокай! Бадзым тау, Трокай!



вторник, 9 октября 2012 г.

Школаос дышетскон понна пумен уксё кыскыны кутско.

Маро, пумен-пумен дышетскон понна уксё тырыны кутско ини. Школаос ласянь катэз ӧз ке но гожтэ. Ма мар отын веранэз, вань школа директор-депутатъёс "ЕР" партие пыро. Тани Кузебай нимо гимназиын ЕГЭ умой сётэмед потэ ке, эн жаля уксёдэ! Вань профильной курсъёс понна коньдон куро, яке репетиторен пукыны косо (рейтинг сярысь сюлмаськыны кулэ ук) Нош со гимназия Элькун лыдъяське на, одӥгез куинь Элькун школаос пӧлысь. Но малыке но Италмас лицейын озьы ӧвӧл ук, отын азьло кадь ик дышетӥсьёс мылысь - кыдысь ЕГЭлы дасяло, но профильлы нокыӵе но уксё тырын кулэ ӧвӧл, ватсам курсъёс понна гинэ толэзяз 400 манет пала тыркод, со дунэ пыро дышетскисен вань дышетон курсъёс. Италмас лицей Кузебай нимо гимназия кадь ик, Элькун шуыса, лыдъяське. Толэзяз математикаен урокъёс понна - 320 манет, ӟуч кылъя предметлы - 200 манет. Нош со школаын дышетско огшоры гуртысь лыктэм пиналъёс, кинлэн анай-атайёссы озьы ик гурт совхозъёсын ужало. Тырмоз меда соослэн чиданзы но кужымзы нылпиоссэс  дышетыны? Кин тодэ, азьланяз табере дышетскон понна вань школаос уксё курыны кутскозы ни вылды. Но "визьпогъёс" будозы узыр семъяосын гинэ! 

четверг, 4 октября 2012 г.

Удмурт кылэ берыктэм мультик

Тани 30-тӥ куарусёнэ Берыктӥсьлэн Нуналыз вал. Та нуналлы сӥзем УдГУ-ын НЕконференция ортчиз. Отын берыктэм киноос сярысь трос докладъёс вал. Соку ик йырам лыктӥз одӥг пияш, кудӥз озьы ик удмурт кылэ берыктонэн тунсыкъяське - Пикулев Алексей, Пушнер шуыса тодмо.
Пуроын "Пинал мылкыд-юмал йӧлпыд" нимо ортчытэм концертамы пиналъёслы вал возьматэмын ӟуч кылысь соин берыктэм "Улэм - вылэм пуны" мультик. Озвучка лэсьтэмын одӥг адямиен, пӧртэм куараосын, пӧртэм интонациосын. Уд шуы, та ужез нырысетӥосыз пӧлы пыре шуыса. Азьланяз Эминем сярысь американ "8 миля" кино берыктыны малпа. Озьыен, "Берыктон луд" городын ужа, нош со дыръя Пуроын - Амань Алешик. Солэн йыраз сомында малпанъёсыз, мон паймисько солы!



понедельник, 1 октября 2012 г.

Масон лыктэ.

Туннэ сомында малпанъёс йырам вал: ветлыны отчы но татчы, собере пукыны отын но татын. И мар тӥ малпаськоды? Сӥзьыл! Та зор, кудӥз кутскиз именно туннэ(не толон, не ӵуказе, а именно туннэ!), вань малпанъёсме пукись вуосы выйтӥз. Мар карод на табере, лыдӟиськыса пукыны кулэ луиз. Озьыен, массонъёс сярысь тросгес тодӥ. Но валай, асьме пӧлын соос ӧвӧл ни шуыса. Вань дыр ик но, мон ой на пумиталля. Та нырысетӥ ӵектонзэс ик соослэсь туала калык уз вала: котыръёсыдлы юрттыны, соослэсь улонзэс умойгес карыны, но максимально секретно! Нокин но медаз тоды, кин одӥг бомжез ужаны интыяз, яке песяйлы ӧс улаз яблокен корзинка кельтӥз.
Ну я бон ни ыы, зоре ке но, мон пырик сӥзьылэз яратко, сӥзьылэз но тулысэз. Сюлэм та дыръёсы узырмыны турттэ, котыръёслы яратон пазьге. Но шыпыт возьма ненег беренвазёнэз. Со масон ӧвӧл ук на. 

среда, 26 сентября 2012 г.

Счастье в чистом виде, грубое, природное, вулканическое!

Проводникен ужаса мон мӧзми Ижкар улонэлэсь. Мон уг тодкы кызьы сое валэктыны. Ку тынад ӧвӧл одӥг минут но дыред. Ку тон дыртыса сиськиськод, мукет интые чалякгес вуон понна. умой ини, уд гуньдӥськы ке. Ку тон пыриськиськод пӧртэм ужрадъёсы, котырдэ мукетгес карыны турттӥськод. Ку пайдаез шулдыреныз огазеяськод. Яраткод сое, мар котырад берга, но со дыре ик соосты кияд бергаткод. Ку тынад чебередлы синмаськыса, котькуд верам кылдэ зэматыны, котькуд малпандэ но курондэ быдэстыны дась. Таӵе улон - со самой умой эмъюм яратоно н яратонтэм адямидэ вунэтыны, вӧсь карись моментъёсты мукет умой ымнырын адӟыны...
Со умойгес наркотикъёслэсь, героинлэсь, шоколадлэсь, азьпалад пельтӥсь толлэсь, бадӟым скоростьлэсь, яратонлэсь, кофеинлэсь, С. Матвеевлэн "Шузи" романэзлэсь, 2012 арлэн кутсконэзлэсь, Марио Касаслэсь, вань шудонъёслэсь, вӧсь каронъёслэсь; со умойгес эриклэсь, со умойгес улонлэсь!
"Счастье в чистом виде, грубое, природное, вулканическое!"*
Соин ик, эшъёс, тэк эн пуке. Улондэс тӥ асьтэос лэсьтӥськоды.

понедельник, 24 сентября 2012 г.

Пинал мылкыд - юмал йӧлпыд.


Тайзэ но поттоно кариськи))) Кылзӥське! "Моя Удмуртия" иворъёсысь (репортажез кылзон понна, иворъёс ссылкае зӥбоно):
«Пинал мылкыд — юмал йӧлпыд» Сыӵе нимо концерт огазеяз туала егитъёс пӧлын Пушнер но Исьнер нимын тодмо луэм рэп лыдӥись пияшъёсты, «Уйвӧт» рок-группаез, «Чебеляй» ансамбльысь эктӥсьёсты, егит кырӟасез Юлия Волковаез. Крезьгурлэн пӧртэм удысъёсыныз тунсыкъяськись егитъёслэн одӥг кадез но туж бадӟым. Ваньзы соос вордӥськемын но будэмын Пичи Пурга ёросысь Пуро гуртын. Концертэ вуылӥз Светлана Пикулева.

пятница, 21 сентября 2012 г.

Наверно. Неопределенно

Наверно номыр но ӧз кыль милесьтым -
Музъемлэн сьӧд сюез сӥзьылэн куанерме.
Куарусён толэзьлэн кыдырась вуосыз
Мӧзмонлэсь мӧзмыто яратӥсь сюлэмме.

Наверно ой вал тон мынам гажанэ -
Ведь тонэн луыса, мон огнам пукылӥ,
Оскыса, мед бинёд шуыса тон монэ
Пыраклы ас бордад, малпаськи, оскылӥ.

Наверно озьы вал кулэ луыны:
Я ужпум тон бордын, сьӧд сюлэм шуонын,
Я аслам сӥялскем шузигес сюлэмы
Чик оз быгат юзмыт кезьыттэ вормыны?.

Наверно мон нош ик выё вӧтъёсам,
Кытын тулыслэн омырез узырме
Пальышась шундыен, улӥсез мылкыдам,
Но тынад учкемед сутылэ синъёсме.

понедельник, 17 сентября 2012 г.

Та пост кемалась татын кулэ вал ини луыны, но малы ке но али гинэ дыр шедьтӥ гожтыны (жаляса верано, вунэтон сямы но вань! Эх ма, тросэзлы та урод сямы сюлэмзэс позыръя.) Озьы ке но, тани, лыдӟы, лыдӟы, гажано ..., Обломов кадь диван вылын эн кылльы, ужа, тэтча, сюлмаськы, утча, шумпот, уродъяськы, зуль, эшъяськы со адями кадь, кудӥз сярысь та веранэ.

Кӧня паймымон гуртъёс котырто мынэсьтым пичи но мусо Пуро гуртме, нош солэсь сю поллы трос паймымон адямиос котырто монэ. Одӥгез тани улэ Кечел гуртын, Заготзерно шуонын. Тани, учке со шоры:
Со кадет, дышетске Ньылетӥ лыдпусо лицейын. Мон паймисько солэн кылызлы но чырткемезлы. Таӵеосыз ик та улон вылын отрывачко, вылӥе ӝутско. Арлэн лымытэм толэзьёсаз со Байкер шуод - а мар -а. Чильк- вальк чилясь пичи но мусо "мотоез" вылын лобӟыса ик ширтэ. Кытчы меда? Яратоно адямиез доры дыр.
Нош толалтэ- Пыдаз гын сапег, йыраз шапка - ушанка, кияз арган гинэ кутоно на, Лопшо Педунь но Лопшо Педунь. Кечеллэн Лопшо Педунез, яке Пуро починкалэн ни - а? Яке вань куинь гуртъёслэн - а Лопшо Педуньзы. Мед озьы луоз ини, ато мон асьме гуртъёсысь марке уг ни тодкы со кадь маскара адямиосты (яке вань - а?). Огпол куке но кыкнамы автовокзалэ учырам вал, автобуслэсь кылим. Коскатъяз соку туж зол. Солы радиое аслэсьтыз авторской программазэ усьтыны кулэ дыр, серемес учыръёсты веран сярысь. Пӧрмоз, одно ик пӧрмоз!

Нош валтӥсьсэ вунэткем вераны. Нимыз солэн Кендерев Кирилл! Мыло - кыдо. Спецзаказ. И мон ӧвӧл "быстропроходящий явление". Дыр.

понедельник, 10 сентября 2012 г.

Куарусёнысен кутске выль уж!

Мынам выль аре кутске куарусён толэзьысен. Кемалась татын ӧз ни поталэ выль постъёс. Но тани кутскиз выль сезон. Мынам нош ик трос малпанъёсы йырам кылдӥзы, кудъёссэ мон одно ик быдэстыны тыршо. Кылемез шоры учкыса, вераны кулэ. Азьло - со нырысетӥ лэсьтэм вамыш. Таиз ар - со луэ ини кыкетӥез вамыш. Вамыш серьёзной деловой гожъяськон удысэ. Соин ик али мон тыршо татчы гожъяны:

  •  монэ но матысьёсме тужгес но висьытӥсь ужпумъёс сярысь
  • тунсыко но мукетъёсызлэсь висъяськись адямиос сярысь
  • монэ паймытӥсь арбериос сярысь, яке тодмотэм экзотической лулчеберет сярысь
  • эшшо озьы ик маке кылбурет удысысь.
Мыным туж кулэ вал берен вазёнъёс, критика, куронъёс но тӥляд малпанъёсты. Мынам туж потэ тодэм, кинлы мынам малпанъёсы тунсыко)
Тау! 

воскресенье, 24 июня 2012 г.

Шунды сиос

Ӵуказе Можга ёросын усьтӥськоз лагерь "Шунды сиос", кытын удмурт кылэз умой тодӥсь егитъёс но бадӟым класъёсын дышетскисьёс удмурт кылэз, литератураез лулчеберетэз мургес дышетозы.
Табере валэктэ мыным, малы удмурт кылэз умой тодӥсь пиналъёслы сое мургес дышетыны кулэ? ӟуч пиналъёслы таӵе лагерь ортчытслазы ке, мон валасько. (Кемалась кулэ вал ини таиз сярысь малпаськыны). Нош али весь удмурт лулчеберетэз но кылэз удмуртъёс пӧлын гинэ ӝутыны выро. Нокытчы но со уз вутты, яке Министерсво озьы  удмурт йӧскалык юанъяёсъя удмурт ужасьёсты, удмурт кылъя но литературая дышетӥсьёсты ӧдъя дасяны?

пятница, 22 июня 2012 г.

Уг поты лэзем...

Тани ук армие но мон быдӟа эшъёсы кошко ни, кыӵе чаляк дыр ортче . Али гинэ кадь школае мынӥ вал, нош туэ нырысетӥ курсэз быдтӥ ни. Матысь эше, огшоры брое, уг яра на тыныд ми дорысь кошкыны, вазь ук на. Вуоно арын гинэ мон тон лэзьсал отчы, кезьыт но шимес казармае, бетон заборен котыртэм интые. Кык ар талэсь азьло, ку пиосмы армие кошко вал, мыным соос сыӵе етӥзэсь но бадӟымесь пото вал. Нош али валасько, озьы ӧвӧл со, огшоры ачим пичигес вал.  Кемалась ук тонэ ӧй адӟы ни, нош тон кошкиськод ни, быдэс арлы! Нокызьы но ӧз пӧрмы лыктыны, закон подлости. Матысь адямие кошке, нош мон ужъёсы пӧлысь потыны уг быгаткы.  Ноку но уг малпаськы вал, сюлмы сокем шымырскоз шуыса. Кызьы озьы, валаны ик уг быгаткы. Ну я, кошкоз, нош кинлэсь мон кыло на со мусо ушъясь но буйгатӥсь кылъёсты, кудъёсыз мӧзмонэз вунэтыны юртто. Одно ик гожъяло тыныд, тон берен но ӧд вазьы ке. Уг тодкы, кыӵе мар отын луоз, Санечка. Трос эшъёс ортчизы ни со армия шуон пыр, кин кызьы вера со инты сярысь. Эн кышка, мон тон понна кышкало но сюлмасько. Эн гинэ ышы, Санечка! Яратӥсько тонэ, мусо брое. 

вторник, 19 июня 2012 г.

Солы сётсал сюресылэсь ӝынызэ!

Шӧдтэк шорысь  уси ке мон зол кошкись сьӧд шуре, ачим ӧй быгаты ке вормыны кужмо тулкымез, ваньмыз быроз. Тӥни тыныд вань адӟон. Тон гинэ но, кезьыт мыняса, сылод ярдурын но номыр но уд кары. Мынам мугорылэсь инвис сьӧры ышемзэ но возьматэк, каллен берытскыса кошкод аслад улонад. Ма зэм дыр, мон но озьы ик карысал. ... ӧй, ӧй, мон тынэсьтыд пӧртэмгес кӧня ке, мон юрттысал вуэ усем адямилы. Поттысал сое, юасал, котмид - а шуыса, сюлмысьтым пальпотысал но берло озьы ик кошкысал, табере огназ мед азьлань вамыштоз шуыса. Нош тон юрттыны но уд малпа дыр. Тон кадьёс шоры учкыса, мон дыши ни  ваньзэ огнам лэсьтыны, эрико нылашка шуод - а мара. Нокыӵе кусыпъёсын но керттылэмын ӧвӧл кадь: соин ке но, пырик огнам. Соин сэрен, лэся, ужъёсам выйисько но, уг мӧзмиськы ни. Дышетске, хо - хо - хо! Но тани нош ик мае ке но воштоно улонам. Уг быгаткы кема дыр куспын огвыллем нуналъёсме ортчытыны. Весь кулэ выль буёлъёс, паймытъянъёс, эйфорияос, эктонъёс, шузи малпанъёсты быдэсъянъёс. Но Ачим ӧй лэсьты ке со нуналъёсме, кин мон интые лэсьтоз на, Ачим ой паймытъя ке, кин паймытоз на монэ, ачим шузи малпанъёс ой малпалля ке, кин малпалоз на? Кин монэ шумпоттоз? Сыӵе адями вуиз ке мынам улонам, мон солы жалятэк кузьмало дуно сюресылэсь ӝынызэ! 

пятница, 8 июня 2012 г.

Чидан)

Шулдыръяськон. Шунды яркыт пиштэ, тылобурдоос чирдо, вож писпуос тӧлъя каллен шонасько... Вераса уг ул ни сокем, вакчияк, куазь шулдыр! Эшшо N черкогуртлэн быдэс шор площадез тыр кулэ музыка чузъяське. Ярам. Сюрес кузя нырысь мопед шонтӥз, со бӧрсьы квадратцикл, кудӥз вылын кышномурт пуке вал. Ымныраз пальпотон, газзэ золгес каре, пумит ыркыт тӧл  пельтэ, куанык! Но шуак кариськоно луиз, тӧл, йырысьтыз тӧдьы пляж шляпазэ кырмыса, асфальт вылэ сэрпалтӥз, кышномурт мазэ - созэ валаса, квадрациклзэ берыктыны кутскиз, но ӧз быгаты. Ӧз, ӧз кошкы азьлань, усиз! Ымнырыныз асфальтэз гырыса, йырыныз обочина борды шуккиськиз. Нош корт валэз, марлы ке но йыркуръяськыса кадь, кыллись кышномурт вылэ тэтчиз на. Мон, ӟус вылысьтым тэтчыса, юрттыны кариськисько вал, но мопед азьпалтӥз монэ, эшшо  тышкаськиз на куанер кышномуртэз. Мар карод на, кышномуртъёслы ноку но ӧвӧл жалян. Со пиос одӥг лӥятӥсь кыл но вераны уг валало кадь, вожанзы гинэ пӧзьтэ, асьсэзыз ӧд жаля ке. Кышномурт, пыд йылаз султыса, азьлань кошкиз. Бызьса. Нош йырысьтыз вир вия. Нош со бызе на. Пиосмурт сьӧры. Бызе. Чидан! Дыртон но чидан! Нош шулдыръяськон азьланьске. Ваньмыз- а умой? 

"Открытый город"

Итак эшъёс, дасяськиськом туж тунсыко но пайдаё арнялы! 
Тапыртон бордысен кутскыса (10 часын Невский собор дорын люкаськоно), "Открытый город" фестивале выжиськом. Со фестиваль 12 числоысен 24 инвожоозь (День Молодёжи) Шор площадьын фонтан дорын ортчоз. "Карлэн сюлмыз татын кокаське" - таӵе  фестивальлэн девиз выллемез. "Шор площадьын трос пӧртэм ужан площадкаос радъямын луозы. Кылсярысь, крезьгур, литература, туспуктэмъёсын вырон, инкуазен герӟаськем но дышетскон удыс, шудонъёс. Одно ик луозы сцена вылын пӧртэм адӟытонъёс, ужрадъёс, вожвылъяськонъёс, мероприятиос, концертъёс, кудъёссэ лэсьтозы асьсэос карын улисьёс но фестивале пыриськисьёс. Та фестивале котькуд мылкыд карись быгатэ пыриськыны, со понна кулэ мылкыд карем ивор сётыны:
- яке  заявкадэ ВКонтактын "Открытый город" бамлэн обсуждениосаз кельтыны, http://vk.com/open_city.
- яке жингыртоно 
89128755030 (Рамзия) — артистъёслы 89127573018 (Александр) — медиа- ужасьёслы 89043123528 (Азалина) — организаторъёслы.
Лыкты! Усьты аслыд аслыд Ижкарез! " Озьы татын:  http://vk.com/open_city2012, но татын:  http://vk.com/izhkar

  

воскресенье, 20 мая 2012 г.

Вормизы!

Туннэ тани Ижкар сайказ. Удмурт ульчатӥ машинаос пипкетыса ворттыло. Укноосысьтызы кункышет тӧлъя - буръя ветлэ, пиос кесясько, нылъёс черекъяло! Укно дурын вить минут гинэ пукыса, кыӵе но суредъёс адӟыса ой вуы. Тани одӥг машина ортчиз, ньыль пиос, багажниксэс усьтыса, отчы пуксилям, киязы Россия кункышетъёс, укноосысьтызы но ымныр тусъёс адско, но черекъяло ке черекъяло... Зол Удмуртия шумпотэ. Россия но Словакия хоккей командаос туннэ кубок понна нюръяськизы. 6: 2 вормизы ук! зол ни зол. Тани эшшо одӥг факт на, 2008 арын, ку Россия быдэс дуннеын хоккея чемпион луиз, Дима Билан Евровидениын нырысетӥ инты басьтӥз. Мар - о, Брангуртысь песянайёс но вормисе потозы меда?  Оскиськом!

четверг, 17 мая 2012 г.

18!

Та мынам огшоры ортчымтэ улонэ!
Матэктӥз мугоры  дас тямыс аресам,
Буясько яркытэсь суосын ымнырме, -
Мон ӧвӧл тӥледын зымемын зарезям.

Та мынам огшоры зынмымтэ инбаме!
Кытын ӵош керттылэм толэзъёс пиштыло,
Суредам калыклы кузьмасько йырсиме, - 
Табере соосты монэным сурало.

Та мынам огшоры пушйымтэ музъеме!
Домино кырӟамъя гудылком каръёсты,
Кытысь тон берпумзэ адӟылод сюлэмме,
Но сётод жаляса пыраклы согыны.

Та мынам огшоры ортчымтэ улонэ!
Вала тон! чик ӧвӧл ведь ваньмыз огшоры - 
Зынмымтэ инбаме, пушйымтэ музъеме
Сётӥсько быдэсак дас тямыс ареслы.

вторник, 10 апреля 2012 г.

Курыт ву) или люкымтэ синмаськон))

Сюлэмам - ворпо нумыр,
Малпанъёс нош тон сярысь.
Котырам - ческыт омыр,
Юисько курыт вуысь.

Валантэм али мыным
Коктейльлэн сутӥсь шӧмыз, -
Уясько соин тани,
Шумпотса, курыт вутӥ...

Нуналъёс бызьса возтӥ
Кошкыло, но кытчы тӥ?
Шузимем йырам тон, не,
Эн кельты курыт вуэ!

Бергаса котыр дунне,
Выйтыны лэся турттэ.
Яратон ӝоген нуэ
Тулкымен курыт вуэ.

Шулдырен ӵошен монэ
Со ньылӥз, быдтӥз визьме.
Нылпиез таре солэн
Жалясьтэм курыт вулэн.

пятница, 6 апреля 2012 г.

Кырӟаса лэзём али)

Арня Ӝытэ гуртысь каре вуи. Эшъёсыным ж/д вокзал дугдылонниын 22 лыдпусо автобусэз возьмакумы, азямы кытысь - марысь арлыдо етӥзэсь кышномуртъёс султӥзы. Ог - огенызы мар ке удмурто - ӟучо бӧтьырто, куаразы быдэс дугдылонни тыр чузъяське.
- Соос артисьёс ук, учкы ай сумкаоссы шоры, - шуиз Юля эше, - соин ик, куараоссы но сокем жингресэсь, лэся. Зэмзэ но, пыр адскись сумкаосазы  огшоры удмурт но дэра дэремъёс кыллё вал.
Автобус вуэм бере, со кышномуртъёс черекъяса ик пиналъёслэсь азьлогес автобусэ тэтчизы но буш пуконъёс вылэ пуксизы. Ми сузэреным укно доры султӥм, нош вӧзамы сыӵе ик арлыдо пилеш (кепкаен ватэмын йырыз) пиосмурт интыяськиз. Кытысь - марысь табере кышномуртъёс быдэс автобус тыр кырӟаны кутскизы. 
- Ойдолэ, тӥ но итӥське соос борды, - вазиз милемлы арлыдо пиосмурт.
- Ма удмурт сямен кырӟасалзы ке, ми но юрттысалмы, - шуисько.
Со дыре ик соос удмурт кырӟанъёсты мытыны кутскизы. Кинъёс меда соос? Кыӵе муген каре вуиллям? Пилеш пиосмуртлэсь ваньзэ тодӥ)) Соос Дэри ёросысь Ягул гуртысь, пе. Туннэ железнодорожникъёслэн лулчеберет юртазы концерт пуктыны ветлӥллям. 
Кырӟанзэс куспе куспетӥ карыса, котыр калыклы сюлмаськонэн вазиськизы. 
- Ми ум люкетӥське - а тӥледлы?
- Пойте, пойте! - мыняса вазиз вӧзамы сылӥсь пинал пияш.
Ӝоген милям потон дугдылоннимы вуиз. Ми сузэреным потӥм, нош арлыдо кышномуртъёс озьы ик автобусыг мынӥсь калыкез шулдыртыса кылизы. Кырӟанэн шулдыргес улыны, зэмзэ ик!

среда, 4 апреля 2012 г.

Тӧло Тыло!


Туннэ милемлы Пичи Пурга ёросысь Тыло гуртэ сюрес усьтӥськиз. Мон, Алексей Шкляев, кык аспӧртэмлыко амалэн суредаськисьёс Кирилл, Наташа но Финляндиысь Голландец Виллем калык пӧлы потӥм. Карысь адямиослы но Виллемлы со туж тунсыко но экзотично вал. Автобусысь милемыз художник – профессионал Зоя Михайловна пумитаз. Ачиз со луэ Брангуртысь, кытын  искусствоя центр лэсьтэм вылэм. Но жаляса верано, усадьбаез ӝуам. Кӧня кужымез, кӧня арбериосты, кӧня мыдкыдэз нуиз сьӧраз тылпу. Но озьы ке но Зоя Михайловна уг сётскы, азьланяз (вуоно арын ни) со нош ик ӧдъя сыӵе центр кылдытыны. Та ужын солы юрттӥськоз пиез, огдырлы юри Петербургысь Удмуртие бертоз. Быдэс нунал куспын мон туж пайми та кышномуртлы, визьмо, етӥз, творческой  азьветлӥсьлы. Соин вераськыса, мынам дунневаланэ ик паськытаз кадь, трос макеос шоры мукет синмын учкыны кутски кадь.
Милемыз Самсонов семьялэн корка – музеяз куноязы. Нырысь ик ваньзылы тапочки сётӥзы. Виллемлы яркыт гордэз сюриз, нош пыдулаз «Финляндилэн кункышетэз» вуремын вал. Сюрны но кулэ ук, Виллем шумпотӥз. 
Собере курег лымо шыдэн, табанен ческытатӥзы. Берлогес ми Наташаен но табань пыжыны кариським. Пумен – пумен корка пересьёс кыстӥськыны кутскизы, сьӧразы одно ик кыӵе ке пыжиськем ваё, но кумышка. Кызьы сотэк, одӥг кышномурт но курыт юонтэк ӧз вуы! Таиз ласянь котькуд гуртысь мон одӥг суред адӟисько: пересьёс (яке мукетъёсыз) чик но уг быгато кумышкатэк  ӝӧк сьӧры люкаськыны.
 Та югдурез Кузебай Герд но ас даураз синйылтэм вал ини («Вина юон – удмурт калыклы бырон» ужез). Наташа но 20 ар возем самогонзэс оскалтӥз, солы тунсыко вал. Нош мон? Та ласянь мон Кузебай Гердлэн сюрестӥз вамышъясько! Одӥгез кышномурт Виллемез картлы кельтыны турттэ вал ини, нош Алексей Шкляевез но Кириллэз кумышка вылэ вузаны. Туж чырткем! Зоя Михайловна пусйемъя, солэн сокем агрессивной вылтусыз улын зэмзэ ке небыт но яратӥсь лул ватӥськемын.  Голландец котьку мыняса пукиз, пересьёс куремъя, ас кунэзлэсь гимнзэ кырӟаз. Нош соосыз, асьсэ ласянь, удмурт калык кырӟанъёссэс мытӥзы. Малпасько, Виллемлы одӥг пичи но мӧзмыт ӧй вал шуыса.
Нэнэйёс кошкем бере, музеен кивалтӥсь, Михаил Возняков  экскурсия ортчытӥз, Кирилл Виллемлы экскурсоводлэсь вань верамзэ англи кылэ берыктӥз. Паймымон, Голландиысь эшмы тодэ голланди, француз, финн, англи, немец кылъёсты, со котькинэн вераськыны кыл шедьтӥз. 
Озьы ми огъя Самсоновъёслэн улон – вылонзы сярысь мургес тодӥм, адӟим, кызьы улӥзы со вакытэ. Туж тунсыко: трос вашкала арбериос, киужъёс, коркапуш тӥрлыкъёс. Музей- коркалэн интерьерез кылемын сыӵе ик, кыӵе вал война бере. Одӥгез гинэ мукет, корт валесъёс интые пу ӟусъёс, пе, вал. Шумпотымон, та корка сисьмыса юнме ӧз быры шуыса. Музей усьтӥськон понна мылысь – кыдысь выризы Андрей Самсоновлэн кышноез, журналист но кылбурчи Любовь Тихонова но Пичи Пургалэн администрациез. Официально музей усьтӥськемын ӧвӧл на, нош уж вылын нырысетӥ куарусёнысен тунсыкъяськисьёслы солэн ӧсъёсыз усьтэмын ини.
Собере ми ваньмы Возняковъёслэн, Самсоновъёслэн вынъёслэн сузэрзылэн корказы мынӥм, кытын пиос мунчое пыризы. Картаен шудӥм. Возняков Владимир монэ, Виллемез но Зоя Михайловнаез карозь келязы. Нош мукет эшъёсмы автобус азе кылизы. Ижккаре вуэммы бере, ми куинь кузя кинотеатре вамыштӥм на. Отын фин кылын «Служитель зла» кино учким.  Нунал туж узыр но пайдаё ортчиз. Чик но уг жаляськы, доре бертон интые Тыло гуртэ вуылӥ шуыса. Самсоновъёсын гожтэм книгаоссэс табере лыдӟоно! 

***Туспуктэмъёс Алексей Шкляевен лэсьтэмын))

воскресенье, 1 апреля 2012 г.


Туннэ, 30 южтолэзе, Удмурт драмтеатрлэн пырон азяз трос адями люкаськемын, отысь – татысь кылӥсько удмурт вераськемъёс, адскыло удмурт дэремен нылкышноос. Эшъёсмес возьман куспын, милесьтым кык адями юаз, кулэтэм билетты ӧвӧл – а шуыса. Озьыен, ваньмызлы, кинлэн та концертэ мыныны мылкыдыз вал,  залэ инты ӧз тырмы.
«Зарни перепеч» премия сётон концертэ  ветлӥ мон озьы.  Оглом вераса, мыным ваньмыз кельшиз.  Ӝытэз нуизы Лилия Кондратьева, Семён Семёнов, Ксения Воронцова но Роман Дмитриев, соослэн жингрес куараоссы али но пель сьӧрам шуккисько на. Вань программаос ог – огзылэсь маин ке но висъясько вал. Мария Корепанова, пичи Настя нылашен бессермян крезь шудӥзы, Сайлент ву гур рок группа «Эмезе»  кырӟанэнызы калыкез сайкатӥз, Марина Галичанина аслэсьтыд задор мылкыдзэ быдэс зал вылэ кисьтӥз, учкисьёс доры васьказ (балконэ но, лобӟыса выллем, мед тубысал), Любовь Быкова попурри кырӟаз, «яратоно кырӟанъёс   пичи люкетэн» - со шуэмъя.  Дмитрий Загребинэз «Титан» шоу – балетысь пияш огдырлы воштӥз – соос «Бур пала, паллян пала» кырӟанъя пуктон возьматӥзы. Надежда Уткина «Ой, малы, малы» кырӟанысьтыз припевзэ реп амалэн но кырӟаз. Алексей Ложкин сцена вылэ грузинлы пӧрмытскыса потӥз, картошка сярысь хитсэ кырӟаз, туж могдос но тунсыко вал.
Но кин вормиз?
4 инты- БОГДАН АНФИНОГЕНОВ!!!(27 куара) Мон понна со нырысетӥ интыын. Туж тунсыко программаез вал: туала егит улонысь пилэн образэз, котыраз трос эктӥсь нылъёсыз, кудъёсыз пӧлын куддыръя Богдан ышылӥз. Но озьы ке но, со балконын пукись адямиосты ик интыосысьтызы султыттӥз: кин меда со кырӟа, кыче мар со пинал Ullala Boy?  Ваньзы сак кариськизы. Валады ни дыр, кин понна мон куараме сёти)ХДХД да да… малпасько, тросэз егитъёс солэсь фанатетьто шуыса. Эх! Ньылетӥ луэмзэ тодэм берам, сюлмы ик ӝыныё кылиз кадь, мон ачим понна кадь ик со понна виси вал. Но кызьы Женька шуэ, милям ульчаямы но праздник луоз ай, куке но преникен уробо бекмыльскоз.
Тани сцена вылын  Анжелика Семеновна Михеева, Кузебай Герд нимо гимназилэн директорез, со шараяз 3 интыез - Геннадий Ганьков. 29 куара но 5 сюрс манет.  Костылен но сцена вылэ потӥз ук, респект солы. Висеменыз вылды, куараез азьло кадь задор, жингрес, шудӥсь ой вал ке но, кышномуртъёлэсь со сюлэмъёссэс вормыны быгатӥз.
2 инты басьтӥсез Андрей Иванович Ураськин Удмурт драмтеатрлэн кивалтӥсез ӟечкылаз - Анна Плотникова (35 куара но 10 сюрс манет). Концертэ лыктэмъёс пӧлын тросэз быдэ вуэмъёс вал. Тае лыдэ басьтыса, валамон луэ, малы Анна Плотниковаен Геннадий Ганьковен та интыосты басьтӥзы шуыса: соос котьку но концертъёсын гурт калык пӧлы потало.  И мар, фонограмма интыын электроники диджейсъёслэн гурзы шудэм вылэ солы баянзэ кысканын кулэлык ӧй вал ни шуыса. Со Анналэн аслаз фишкаез, йылолэз  луэ шуод – а мар- а.
Кыкетӥ но куинетӥ  интыез шараяку, залын пукисьёс пӧлын интрига вал ке, нырысетӥ инты кин басьтӥ котькин валтскиз вал ни. Со - Николай Анисимов. Солы Пётр Павлович Данилов «Айкай» ансамбльлэн кивалтӥсез "Зарни перепеч" премия (15 сюрс манет) сётыны потӥз. «Тӧдьы кызьпуос». Ненег куараё, Кияса ёросысь Колошур гуртысь, таяз арын удмурт филология факультетэз йылпумъясь, удмурт дэремен пияш калыклы матынгес луиз.  Сцена вылэ матысь адямиосыз нянен, сылалэн, сяськаосын ӟечкыланы потӥзы. Зэмзэ ик, со аслаз огшоры луэменыз, огшоры  кырӟанъёсыныз калыклы матын луэ.
Та интыос сяна вал на мукет кузьымъёс. Удмурт модельеръёс  Дарали Лели но Дина Dэrem Loreal косметика компанилэсь синпелетсэ асьсэлы кельшись кырӟасьёслы сётӥзы. Дарали висъяз сайлентъёсыз, нош Дина Мария Корепановаез. Сергей Касаткин но Светлана Кибардина асьсэ коллегазылы Алексей Ложкинлы «Моя Удмуртия» телекомпаниен поттэм кырӟанъёсын диск сётӥзы.
Вормисьёс тодмо, калыклэн кӧт тыремын… концерт но пумаз вуэмын. Ӝытэз нуисьёс учкисьёсты оскытизы, вуоно арын «Зарни перепеч» премия сётон йылоллы пӧрмоз шуыса. Туж умой ук со! Ойдолэ, кырӟаны! Мылкыды вылӥын, лобаса ветко кадь, трос тодмо адямиос, лякытэсь удмуртъёс, залысь шуныт омыр, шулдыр кырӟанъёс, аспӧртэмлыко номеръёс, удмурт кыл, удмурт лулчеберет, удмурт театр, удмурт дунне... Ваньмыз со яркыт пытьы кельтӥз та ортчем нуналам.)) Ваньзылы бадӟым тау!

воскресенье, 25 марта 2012 г.

«Жингырты, удмурт кырӟан!»

Италмас Элькун школаын котькуд ар нылпиос пӧртэм ӵектосъёс лэсьто: творческой, мерлыко яке исследовательской. Дышетскон арлэн куинетӥ люкетаз вожвылъяськон вылын нылпиос со проектъёссэс ужзэс дунъясь жюриос азьын ваньзылы шараяло. Таяз арын творческой ӵектонъёс пӧлын вормиз «Ӝингырты, удмурт кырӟан!» нимен уж, кудзэ Андреева Лариса но Агеева Ирина быдэстӥзы.
Соос пусъемъя, асьсэ школаын дышетскись егитъёс пӧлын удмурт кыллэн яркыт шундыез каллен кысыны кутске ни. Та муген соос малпазы, кырӟан гожтыса, удмурт лулчеберетэз ӟуч кылын вераськись нылпиос пӧлын вӧлмытыны.


Ирина Агеева Дэри ёросысь Якшур гуртысь луэ. Ачиз кырӟаны яратэ бере, со кемалась ӧдъя вал ини удмурт кырӟан кылдытыны.  Тани берпуметӥ дышетскон арлэн кутсконаз кулэ луиз малпаськыны творческий проект сярысь. «Милям школаямы туж трос шаплыос но кыллы усточиос дышетско, - шуэ нылаш. -  Соин ик кылбур гожтӥсь но кема утчаны ӧз кылды. Та куронэн одӥг классын дышетскись ныл доры вазиськи, озьыен, таӵе творческой проект гожтыса, удмурт лулчеберетлы но асьмелы но пайда ваём».


Андреева Лариса, кырӟан текстлэн авторез, вордскемын Пичи Пурга ёросысь Бобья – Уча гуртын, таяз арын 11 классэ йылпумъяса, азьлань сюрессэ малпа ӟуч журналистикаен герӟаны. Лариса верамъя, со ӧз ӧскы вал аслыз, зэмос кылбур гожтыны быгатоз шуыса, малыке шуоно солы кылъёс уг тырмо удмурт кылын малпанъёссэ шараяны.  Но кызьы  озьы солы удалтӥз сокем чебер текст кылдытыны?
Нырысетӥзэ пусйыны луоз кылем гужеме «Шундыкар» лагере вуылэмзэ. Та, огласянь, шутэтскон инты быгатӥз ныллэн улоназ удмурт кылэз юн пыӵатыны. Гуртаз берытскемез бере, ӟуч сямен вераськись эшъёсыз пӧлын но, пе, удмурт сямен гинэ вераськиськыны кутскиз, сокем сюлэмлы кельшем удмурт омыр. Соос зол паймиллям эшсылы, озьыен удмурт кылбуръёс но капчиен вордскыны, пе, кутскизы.
Кыкетӥ тау шуыны луоз Ириналэн но Ларисалэн удмурт кылъя но литературая дышетӥсьсылы Морозов Виталий Герасимовичлы, кудӥз Ларисалэсь кылбуръёссэ волятӥз но шедьтӥз крезьгур гожтӥсез.
Куинетӥзэ, конечно, кырӟанэз пумозяз вуттӥсез висъяно. Якшур черкогуртын улӥсь «композитор - самоучка» Николай Николаевич Мерзляков нылъёслы мылысь – кыдысь юрттыны кариськиз. Солы сётэмын вал куинь кылбур, кудъёсыз пӧлысь агроном профессияя Николай бырйиз аслыз кельшымоно текст. Гитара инструментэн крезьгур одӥг толэзь куспын гожтэмын вал. Тазьы выль произведение кылдӥз.

Вань ӵектонъёсты утьыкузы, люкаськем калык нылъёслы зол чабем. Николай Николаевич Мерзляков гуртысьтыз школае юри лыктыса, пӧрмем кырӟанзэс та ужрадэ люкаськемъёслы кырӟам. Элькун школаын дышетскисьёслы но ужасьёслы сяна, та яратон сярысь крезьгуро текст трос удмурт шаерчиослы тодмо луэ ни, малыке шуоно сое кылӥзы ни Завьял но Шаркан ёросъёсын. Озьыен, калыклы кельше ке, шуыны луоз, «Жингырты, удмурт кырӟан» ӵектос удалтэм шуыса. 

Кырӟанлэн текстэз)
Туннэ кылдӥз выль яратон.
Выль кизили туннэ кылдӥз.
Дорам вуид тылси кадь тон -
Сюлмам тулыс сяськаяськиз.

Туннэ кылдӥз яркыт дунне,
Отчы ӵошен ми вамыштом.
Со дуннеын шӧдон ворме,
Шудэз валче гинэ шедьтом.

Тон усьты, усьты синъёстэ.
Шунды ачиз лыктэ кияд.
Я бен  эн ват малпанъёстэ:
Монэ тон туж кема утчад.

Туннэ кылдӥз выль выжыкыл.
Гожтом чебер сое тонэн.
Ноку медаз кысы та тыл -
Сюлэм ӝуа яратонэн.

)))

Туннэ мама мыным шуиз, мон одӥг пичи но стуненткалы уг кельшиськы шуыса. Дӥсяськиськод, пе, шпана кадь, серьёзной адямилы чик уд кельшиськы.
"А мар бон табере каром на, уг поты ай мынам  бадӟым луэм. Дыр ортче, но пушкын весь улэ на пичи шаплы нылаш. Кызьы одногруппнике шуэ, бандитизм!"
Мон мамалэн шуэмезлы берен вази:
- Нырысетӥ курсын гинэ дышетскисько ай, серьезной но бадӟым луыны но вутто ай.
Мама та верамелы мыняз гинэ. 

среда, 21 марта 2012 г.

Дыр

Нап бус пӧлы выем азьлань
Каллен потэ синъёс азям.
Тани киы, тани пыды, -
Нош улонлэн кытын сюлмыз?
Отын ваньмыз ай ышемын
Трос сюресъёс нап бус пӧлын.
Мон ку меда огтӥз мыно?
Кытысь зэмос шудме шедьто?
Ортчем аръёс нош ик кылё
Мышкам вӧлмем бусъёс пӧлы.
Вылез лыктэ, вужез вунэ,
Нош алиез огдыр луэ.

среда, 14 марта 2012 г.

Тулыс, тулыс!


Тулыс, тулыс! Сыӵе потэ ни вылысь куштэм зӧк но секыт пуховикез, тол сапегез. Сюлэм куре капчи мылкыд, яркыт дӥськут, векчи  куртка. Пыдъёсы мӧзмизы ни ненег кроссовкиослэсь, балеткиослэсь, гурт колошалэсь. Соосын  азьлань сюрестӥ чалякгес вамышъяны луэ ук, озьыен тросгес интыосы вуылкод, тросгес ужъёс быдэстӥськод. Шуныт омырен мугор мертантэм эрико кужым утча, толалтэ куспын пушке каръяськем азьтэмез улляны выре. Бызьылыны поткод ке, мылкыд ик пачылме. Кызьы нылпи пичи кузьымлы шумпотэ, озьы ик сюлмы тулыс куазен спортэн выремлэсь куанэ. Даже эшшо но золгес, кӧт ик уг тыры бызьылыса, жадемез но уд валаськы кадь. Нош кыӵе умой собере изькод, ӵукна султон но капчиен йӧтэ. Толалтэез чик тодэ ваем уг поты ни.
Тросэз шуо: «Фу, мар со тулыс, куарпотон толэзь сразу вуысал ке, соку туж умой луысал, ато адӟем уг поты та лымы шунан дырез, дэриез, зор – котэз…»  Но со ик тулыслэн аспӧртэмлыкез но чеберез луэ ук. 
  • Ку сюрес кузя тудву кошке, кытӥ тон быгаткод кагаз пыжъёс яке пластмасс бутылкаослэсь крышкаоссэс  лэзъяны но собере соос сьӧры уиськыны. Ку тон кошкись вулэсь жильыртэмзэ кылкод, вуослэсь шудэмзы шоры учыраськод.
  •  Ку резинка сапеген пукись вуостӥ ветлӥськод, тэтчаськод, пазяськиськод. Тон бадӟым ини, озьы карыны йырвизьмыд уг лэзьы? Кылзӥськы сюлэмедлэсь, пичи дырдэ тодад вай. Кыӵе со шумпотон, кӧня ке дырлы мерлыко катъёслэсь эрико луыны.
  • Ку пуксем тузонэз пӧртэм сяська зынъёсын узырмем тӧл ӵуже. Ваньмыз яркыт буёлъёсын пиштыны кутске: ожо, куаръёс, пучыос, сяськаос… Соос борды эшшо ватсаське на тылобурдоослэн чирдон миксъёссы. Улӟе, вордске, будэ.
  • Ку дасяськиськод календарьысь горд тодметъёсты пусйыны. 8 южтолэзь, Пучы арня, Пасха,  Вормон нунал, Последний звонок... 
  • Ку гадяд сюлмыд золгес кокаськыны кутске, солэн угось сюлэмшугъяськонъёсыз тросгес луэ. Тулыс!

***Ку тынад вордскем нуналыд тулысэн чош вуэ, особенно 18 аресыд. Соин ик таяз арын тулыс мыным вае кык поллы тросгес шумпотон, «кыче паймымон». Тулыс гинэ сюлмам!

вторник, 6 марта 2012 г.

Синучкон шоры учкыны ик кышкыт, -
Ымнырыз тӧрнамын, бездэмын синъёсыз.
Чиль ыргон выллем юг ӝуась синъёсыз,
Йырсиез но тур - пар, сынамтэ сю ар дыр.

Ноутбук сьӧры пуксьыны пайдалы
Люкетэ бус пӧлы  ватӥськем йырвизьыз.
Зарниен тырмем паймымон йырвизьыз,
Ымдурыз но шимес, куасьмемын вутэк, дыр.

Дугдытскон инты шедьтыны туж секыт
Кокаськись сюлмызлы, пазяськись лулызлы.
Вылтуссэ куштыса, узырмись лулпуйы
Соин ик, вылды, оскиське сюреслы.

среда, 29 февраля 2012 г.

Удмурт Бард


Ижын ортчем «Дарт» дискотекае лыктэм адямиосты аслаз гожтэм кырӟанъёсыныз паймытӥз егит бард Ваня Белослудцев. Тросэз синмаськизы солэн жингырес куараезлы, чебер кырӟан текстъёсызлы но шулдыр крезьгурезлы. Оглом вераса, та Кез ёросысь Александрово гуртысь 17 аресъем удмурт пияш яркыт кизилиен ӝуатскиз удмурт эстрадаын. Вакчияк ачиз сярысь. Али Ваня удмурт филология факультетын дышетске. Сюлмыз пичи дырысен ик гуманитарный предметъёс борды кыстӥське вал, математикаен но техникаен герӟаськем предметъёсты уг яраты. Но маин али егит бард улэ? Мар малпа удмурт егит крезьгур удыс сярысь? Кыӵе ӵектосъёссэ улонэ пыӵатыны турттэ? Со сярысь мургес тодон понна, со доры юанъёсын вазиським.

Маин сэрен тон нырысьсэ гитараез кияд кутид? Кыӵе вал тынад нырысетӥ вамышъёсыд со инструментэз тодон-валан ужын?
- Мон 2008 арын ДОЦ «Орлёнок»-е  вет . Отын трос егитъёс гитараен шудо но кырӟало вал, соослы мон вожъяськи. Соин ик гуртам бертэм бере, атайме косӥ монэ гитараен шудны дышетыны (гитараез пичияк тодэ вал). Со мыным валтӥсь аккордъёсты но нырысетӥ тодон – валанъёсты сётӥз. Нырысьсэ сцена вылэ потӥ ас гурт клубам ик, пӧртэм ужрадъёсы пыриськылӥ. Умойгес шудны кутскеме бере, ӵужапае, Аня Ворончихина, мыным одӥг малпанзэ шараяз, ойдо, пе, мынам кылбуръёсылы крезьгур гожтыса, кырӟан кылдытъялом. Со вал нырысетӥ вамыш. Собере малпаськи, неужели мон но уг быгаты текстъёс гожъяны шуыса. Озьы ачим кылбур малпалляны кутски, кудъёсыз вал ӟуч кылын, вылӥ дышетсконние пырем бере гинэ удмурт кырӟанъёс кылдытъяны кутски.

Мар сярысь кырӟанъёсыд? Тросэз крезьгурчиос пӧрамъёссэс туганъёссылы сизё, нош тынад кыӵе музаед?
Мон романтик, соин ик яратон сярысь, конечно. Кырӟанъёсме кылзӥськыса, валалоды, отын куректонэз но шумпотонэз, тодэ ваёнъёсысь но али улонысь мылкыдъёсыз вань шуыса. Инбам сьӧры мон уг лобӟиськы, ваньмыз басьтэмын зэмос улонысь. Али репертуарам куать мында кырӟанъёсы. Но со кутсконэз гинэ ай. Кырӟанъесме гожтыкум, син азям визьлобонэным лэсьтэм образме пуктӥсько. Но мон тӥледлы вераны уг быгаты, кыӵе со. Текст гожтон крезьгурлэсь секытгес йӧтске. Мукет кырӟасьёс пӧлысь мыным тужгес но кельшо кунгож сьӧрысь пӧртэм рок - группаос. Кылсярысь, Linkin park, Switchfoot, Everlast, Mew, Stone Sour..

Кыӵеен тон аслэсьтыд азьлань улондэ адӟиськод, озьы ик сольный программаосыд луозы яке марке мукет?
Мон малпасько группа кылдытыны, кудӥз рок ӧрын улоз. Отын луозы гитаристъёс, ударник но кырӟась. Тросгес егитъёс мед кылзӥськозы шуыса, ми котькуд кырӟанмес  аспӧртэмлыко карыны турттом. Озьыен, мукет калыкъёслы возьматом, удмуртъёс пӧлын но туж тунсыко, быгатӥсь адямиос вань шуыса. Али удмурт эстрадаын ӧжыт егитъёс понна кырӟасьёс. Тросэзлэн бадӟымъёслы тупась кырӟанъёссы, соин вылды соос огвыллемесь, а котькытын пӧртэмлык кулэ. Озьыен, ми удмурт лулчеберетэз узырмытом, но вылӥегес ӝутом. Эшшо, мынам кырӟанъёсме студиын гожтэм потэ на.

Мар тон сӥзьысалыд та удысын ужаны кутскись егитъёслы?
Одно ик азьлань мыноно, кутскем ужзэс медаз аналтэ. Возьдаськон сямзэс мед вунэтозы, со понна калык азе ӵемгес потано. Удмурт егитъёс пӧлын вань устоосыз, соослы тэк пуконо ӧвӧл, возьматоно асьсэлэсь быгатонлыкъёссэс.

P. S. Поклонникъёсызлы: http://vk.com/id30551269. Та бамысь тӥ быгатоды Ваня Белослудцев сярысь тросгэз тодыны, но солэн крезьбамысьтыз кырӟанъёсэ кылзӥськыны.


                                 Иван Белослудцев сярысь вакчияк малпанъёс

Аня Загумённова, али дыре Ваняен ӵош одӥг группаын дышетске.

Со туж умой, талантливой, лякыт но котьку юрттыны дась адями. Мыным солэн кырӟамез туж кельше. Малпасько, азьлань сюресэз туж узыр но яркыт луоз шуыса, одӥг интыяз гинэ медаз сылы. Сцена вылысь бард выллем оген шудэмзэ адӟисько. Выль кырӟанъёс, капчи сюресъёс, тросгес кылбуръёс тыныд, Ваня.

Дина Ворончихина, гурт школаын одӥг классын дышетскем эшез.

Ваняез мон нырысетӥ классысен тодӥсько ни. Школаын со котькуд ужрадэ пыриськыны тырше вал, ӵемысь кырӟась яке ведущий луыса. Трос пол ми соин ӵошен гитараосын сцена вылэ поталлям. Солэсь нырысетӥ шудэмзэ мон походын кылӥ но копак пайми солэн чебер куараезлы но шудны быгатэмезлы. Туж шумпотӥсько, кырӟанъёссэ кылэмъёслэн лыдзы пумен - пумен будэ шуыса. Мон сӥзисько солы: азьланяз та ужзэ медаз аналты, оскисько: солэн ваньмыз пӧрмоз.

Марина Поторочина, "Дарт" дискотекаын шулдыръяськись.

Мон со пияшлэсь кырӟамзэ та позыръяськонын нырысьсэ кылӥ. Зэмзэ ик, мыным солэн выступать каремез туж кельшиз. Сцена вылын ассэ возьыны быгатӥз, оз кепыра. Дан солы! Синмаськымон пияш, чебересь кырӟанъёсыз. Паймымон, кызьы со куараеныз  шудны быгатэ. Соин ик мыным туж тунсыко вал кылзыны. Малпасько, та егит но задор пияшез бадӟым сюрес вите шуыса. Ваньмыз солэн кияз!

четверг, 16 февраля 2012 г.

Ваньмыз куке но быре.


Пушъе тулыс азвесь сяська,
Яратыса чиля гужем,
Сӥзьыл каллен бездэ ялан,
Нош толалтэ кынтэ музъем.
 
Озьы луэ арысь аре:
Тулыс, гужем, сӥзьыл но тол -
Азвесь сяська чида, ӝутске.
Арысь аре жалян овол.

Вуоз солэн кулон дырыз,
Пушказ ватоз азвесь чильзэ;
Кужмыз быроз одӥг тулыс,
Сьӧраз нуоз яратонзэ.


суббота, 11 февраля 2012 г.

Ӟольгыри но эшшо кин ке...


Серем-а, ӧвӧл-а но, автобусэ ой вутты. Табере мукетсэ возьмано, кудӥз, куинь час ортчыса гинэ, луоз ай. Пыри вокзал пушкы. Асьсэлы пассажиръёс утчаса, таксисъёс кесясько: «Нылга, Вавож. Пурга, Агрыз!».  «Да мыным вообще мукет пала» малпанэн соос дортӥ чаляк ортчи но билет басьтыны черодэ султӥ.
- Станция Кечёво, – билет сётӥзы.
Шуба пушкын мугорлы шуг, сюлэм зол пазяське, соин, лэся, корт пуконъёс но ситянлы сю поллы чурытгес йӧтско. Но мар карод, чида ни, вокзалтӥ юнме отчы – татчы уд ветлы ук, итак адямиез трос, зал пичи. Анайёс, нылпиос, егитъёс, кудӟемъёс, касса дорын быронтэм черод.  Котькудӥз ас уженыз выре: вераське, ботьыртэ, кесяське, уродъяське, мынэ, сылэ… Мынам синъёсы огез вылысь мукетыз вылэ тэтчало: тодмо ымнырез уз шедьты меда. Но ӧвӧл. Калык акыльтӥз, борддор бордысь ошем экран шоры учкыса, пукко ини. Отын МЧС – лэн пӧртэм ивортэмъёсыз, чакласькыны куронъёсыз. Бызись ивор син вӧсь луытомозь чаляк ортче. Ваньмыз шузимытэ. Та интыын омыр ик йырэз пачкатэ, висьытэ. Тырмоз. Каллен гинэ телефонысьтым музыказэ лэзи но, синме ворсаса, пукко ни.
Ши-ши, чик – чирик! Оло вӧтасько, оло мар. Но йыры висе озьы ик, иське уйвӧт ӧвӧл со. Мыл поттэк синме усьтыса, вушйи. Со вискын нош ик кылко: ши – ши, чик – чирик! Ныр ултӥм, шумпотса ик, тылобурдо ширтӥз. Мар со татын каре? Шуак пыремлы  уг кельшы. Ваньзэ тодса кадь, потолок ултӥ уя, монитор вылэ пуксе но, йырзэ бергатыса ик, адямиос вискытӥ йыр вадьсытӥзы, шудса сямен, быдэс залтӥ лоба, чирекъя, автовокзаллэн гылыт но мача выж вылтӥз тэтча. Ассэ копак кузё кадь возе. Умойлы, шунытлы чаляк дышем иське.
Нош нырысь дырзэ кызьы меда вал солы, оло мон кадь ик сюлэмшугъяськиз? Мон  - шубаын, со – коробкаын, вокзал борддоръёс, выж, вӧлдэт.  Потон ӧс оло утчаз? Яке солы ӝоген яразы та шуныт омыр, мальдытӥсь югыт, автобус возьмась калык? Но малы со воштӥз эрико кырез, та заллы? Тунсыко. Валасал, ӟольгыри ке луысал.
Малпаськонме динамикъёсысь чузъяськись куара ӝегатӥз, мынам автобусэ кыкетӥ платформа дорын, мырдэм – мырдэм!
Ӝоген, ӝоген потоно ни татысь, та пачкатӥсь вокзалысь. Тани ӧсъёс, кезьыт омыр, кыӵе умой, сюлэм ик буйгатске. Шуба но уг пачкаты ни кадь. Инбамысь усись кот лымы пырыос пельтӥсь кезьыт тӧлэн ымнырам шуккисько. Но  мон шумпотса мынко азьлань – платформае. Таре автобусэ пыроно, нош ик пичи инты, бензин сутскем  зын. Висись йырез пӧромытэ. Чидало ини одӥг час. Час гинэ. Гуртэ вуо ук, отын сюлэмы шутэтскоз, но лобӟоз кӧняке дырлы эрико дуннее.

пятница, 10 февраля 2012 г.

Я, мар каром кылмес данъян понна,
Куке удмурт ачиз ассэ быдтэ.
Шокчыны секыт, сюлэм сутске - пачка.
Эшед палькке вылад сьӧд кылъёсты.
Соин - а бен, удмурт сяин вераськыкуз,
Со учкылэ котыр - медаз кылы нокин -
Возьдаськыса ас кылызлэсь, бамыз ӝуа тылын,
Мынам уг поты ни таӵеослы оскем.
Сотэк но азьлане кошкоз улон,
Ум кыле ми кылтэк но кырӟантэк!
Мон вунэто верам со кылъёсты,
Тынад синмад вужез, нош ми - выль улонысь.

                                                              Исьнер.
Герман Волков
Выль улонын ми ваньзэ лэсьтыны тыршом, та дуннеын удмурт луыны модно но дано мед луоз шуыса.

четверг, 9 февраля 2012 г.

Бурдо

Лобе лыз ин ултӥ бурдо.

Улын зарезь, со быронтэм;

Вылысь усё шунды сиос;

Азьлань маке чик тодмотэм.



Шона чаляк бурдъёсыныз.

Кужмыз быре, пӧсь лябӟытэ.

Азьлань дыртэ,  синъёсыныз

Улэ учке, ву кышкатэ.



Дыртэ,  элен нюръяськыса,

Сюлмыз оске юг умойлы,

Инвис сьӧрысь потоз шуса

Возьмам музъем чиданэзлы.             

пятница, 20 января 2012 г.

Егитъес - кинъес соос?


Егитъёс – кинъёс соос? Егит дыръя улонлэн вань сюресъёсыз усьтэмын, бырйы гинэ. Пинал мылкыд чебер сяськаяськемын, мар каремед потиз, ваньзэ быдэсты, мылкыдыд гинэ мед луоз.
Озьыен, котькуд пинал адями бырйе аслыз сюрес, кыти со азьлань улоназ вамышъялоз. Но кыче со луоз? Нокин но та юанлы валэктон уз сёты, егит адями ачиз лэсьтэ вуоно улонзэ.
Туала аръёсы шодиське, пиналъёс туж чырткемесь будо шуыса, туж тросэз тыршо портэм вожвылъяськонъёсы пыриськыны, тунсыко ужрадъёсын ассэ возьматыны. Озьы егитъёс портэм адямиосын тодматско. Соос полысь данакезлэн гинэ кылъёссы тупало, ожытэс гинэ зэмос эшъёс луо. Но котькуд адямилы нырысети вамыш ас улоназ лэсьтыны юрттэ семьяез. Анай – атай бордысь потэ, кыче сюрес быръёз аслыз вуоно кунмурт. Соин ик туж секыт анай - атайтэк будэм нылпиослы луэ нырысети вамышъёс лэсьтыны. Нылпиюртысь потэм беразы ик, соос улонлэн шуг – секытъёсынызы донгисько, куддыръя зэмбурлы осконзэс но ышто, но али аръёсы сыче нылпиослы туж бадзым саклык висъяське. Озьы ке но сыче нылпиослэн визьноданзы портэм луэ огшоры семьяын будэм нылпиослэсь.  Семья но эшъяськон адямилы нырысь тодон – валанъёс, портэм улонысь юанъёслы валэктонъёс сёто. Отысь потэ нылпилэн пыкето дунне валанэз.
Егит адями, кудиз будэмын ас калыкезлэсь сямъёссэс, йылолъёссэс гажась семъяын, огкыл вылэ вуэ мукет йоскалыкъёсын но, малыке шуоно солэн сюлмыз кыстиське эрике, паськыт интыосы, кытын уло мукет, нылпилы тодмотэм йылолъёсын калыкъёс. Егитлэн вирсэраз пичи дырысен пычам калык яратон, шодтэк гажаны косэ кадь мукет йоскалыкъёслэсь катъёссэс. Мукет музъем вылысь адямиосын кусып возьыса гинэ но, адями вылэгес жутэ ас шаерезлэсь лулчеберетсэ. Кырзанъёс, эктонъёс, литература… Котькуд калыклэн лулчеберлыкез аспортэмлыко но тунсыко ас сяменыз.
Удмурт шаер туж пичи ке но, отын будо трос гуртъёс, кытын калык гажа ас удмурт сэбедъёссэ, кытын будо удмурт нылпиос, кудъёсыз азьланяз удмурт калыклэсь, удмурт гуртъёслэсь лулчеберетсэс вылие жуто. Азьланяз каръёслэн зучомон сюресъёссы но сыче егитъёслэн зырдыт вамышъёссы улын уз чидалэ. Али будись пиналъёслэн киязы удмурт лулчеберет.


Егитъёс будо.



Толалтэ егитъёс чидатэк возьмазы тулыслэсь вуэмзэ. Но, шонер вераса, сое кема возьманы оз кылды.
Тани пальпотись шунды сиосыныз улэп куазез маялля ни, быдэс дунне вож куар полы вые, пинал сюлэм но яратон кужым азьын шунатэк уг чида. Ваньмыз кадь умой, но егит мугорьёс будо, дас тямыс арес тырмыса гинэ вуэ, пиослы армие кошконо луэ. Тани милям Пуро гуртысь пияшъёслы но повесткаос вуизы: соосты армие басьто. Куинь ешъёс, одиг классын дышетскем пиналъёс быдэс арлы люкиськозы вордиськем интыосынызы, яратоно адямиосынызы.
«Кызьы егитъёсты келялозы, озьы ик соос армиын вордиськем палъёссэс утёзы», – оско пересьёс. Соин ик котькуд, армие кошкись юлтош милям гуртысьтымы солдатпи келян йылол пыр потэ. Таче йылол нырысети интыын сылэ на трос удмурт гуртъёсын.
Пиосты келяны жыны гурт люкаськиз, луоз, коркан шокчыны номырин: жокыт омырын портэм сиён, пыжиськем зынъёс сураськемын. Пересьёс мар ке  асьсэ понназы верасько, пиналъёсызгес корказьын но азбарын арган шудэмъя тапырто, кырзало, учкисьёсыз зырдыт чабо. Дырын - дырын адске, кызьы солдатпиослэн матысь эшъёссы пиослэн картузысьтызы чибориё лентаос вылэ зырдыт малпанъёссэс, зечкыланъёссэс гожтыса кельто. Сиськыса, юыса, тапыртыса, уг шодиськы, кызьы дыр ортче.
Тани чук шуккон дыр матэктиз. Ваньзы чалмытскизы, муш палэп кадь калык солдатпиосты котыртиз. Пересьёслэн солдатпи келян гур чирдэмъя, воргоронъёс пияшъёсты вакчи зус вылэ султытизы. Вуоно ожгарчиос лэчыт синъёсынызы чаклало корка пырем адямиосты, асьсэос зус вылын йыг - йыг сыло. Чилясь пуртэн, манетэн мумы кор борды чук шуккиськиз. Вань калык учке пиос шоры: пуртъёсты табере выж вылэ лэзьяно. Вань сыче оскон: пурт бышкалтскиз ке, солдатпи бертоз, нош оз ке, солы армиын ческыт уз поты, куддыръя армиысь берытскытэк но кылёз. Куинь пол пиос лэзизы пуртъёссэс, мумы кор борды йоттыса, куинь пол ик мертчиськизы соос выж борды. Озьыен, ваньмыз умой ортчиз, но азьланяз эшшо кык коркан чук шуккыны кулэ на.
Со воргоронъёс ик васькытизы солдатпиосты зус вылысь. Пияшъёс, чибориё картузъёссэс дисяса, арган гуръя тапыртыса, мукет солдатпилэн корка палаз вамыштизы, соос сьоры гажано келясьёс но.
Сокем шулдыр ортчо удмурт гуртъёсын таче жытъёс! Пичиез но, пересез но, егитэз но, ог огзылэсь возьдаськытэк, матысь адямиос кадь шулдыръясько. Вань мар тодэ вайыны! Зуч адями но, таче удмурт жытэ вуыса, аслэсьтыз зуч визьноданзэ вунэтыса, удмурт калык полын шулдыръяськоз.
Арган гуръёс, адями куараос, калык кырзанъёс быдэс гурт тыр чузъясько, мукет палъёсы паськыт возьёсти, вож нюлэсъёсти шуккисько. Вазь чукнаозь, жадёнэз тодытэк, пуро солдатпиосты келяз калык. Мукет нуналаз угось пиосты воинкоматысь келялозы тодмотэм каръёсы, кытын мукет куазь, выль адямиос, адзылымтэ гурезьёс.