Ымныртэм каръёс

Монэ туж Кузонэ кыске вал. Одӥг пол отчы ветлӥ, кык пол, куинь пол, нош берен бертэм уг поты, сюлмы ӝыныё кыле. Со шӧдэ кадь, мыным татын марке но лэсьтоно шуыса. Нош мар, уг валаськы.

Бигеръёслы туж паймисько, кызьы соос ас улосвылзэс азинтыны, Мускоез вень вылэ пуктыны быгато. Соослэн отын ваньмыз чиля, азинске, пушъе. Но каллен-каллен со вань туала чиль чилясьын бигер сям культуразы медаз ышы вал. Но со процесс кутскиз ни кадь. Азьвыл Кузонэ вуыкум, ульчаосысь трос бигер вераськемъёсты кылӥсько вал.Нош берпуметсэ ветлыкум, шӧдскымон ӧжытгес. Мон может янгышасько, но мыным озьы потӥз. Табере Кузон бигер карлы уг кельшы ни. Табере со огшоры, вань мукет каръёслы укша, со номаин но уг висъяськы ни.

Йошкар-Олаез тодам вайисько ке, соку ик син азям ярдурысьтызы горд коркаос син азе пуксё. Соос алигес пуктэмын ай, Венециез адӟем карыса. Табере мукет коркаос но Венеция стилья пуктылӥсько. Кинлы кулэ со кыкетӥ Венеция? Мон лучше поръёслэсь аутентичной городищезэс учкысал. Малпасько, кунгож сьӧрысь туристъёс но монэн соглаш луозы шуыса. Таиз но кар каллен со пӧзись пуртые усе ни.

Жаль.

Берпуметӥзэ Кузонэ ветлыкум, мон нош ик ӝыны сюлмын отысь кошки. Но валай, ярам мон отчы дышетскыны ой кошкы шуыса. Мон берен берытскысал, но выль улон кутскысал, дыр. Отын эрик. Эрик кузьма шумпотон. Озьыен эрик вие искусствоез.

Тау!

Кӧшкемыт тымет

Милям нуртын, кемалась ик ӧвӧл - кык ар талэсь азьло-,  Улысь Вуко интые тымет ӵыпизы. Мырдэм-мырдэм. Кемалась возьмам вал ини. Ӵыпизы, но кызьы али тодӥ, отын уг яра пӧласькыны но, чорыганы но, дортӥз ветлыны но.

Со тымет вӧзын ик вань мукет тымет - Чальдӥ. Вуж, мусо, вутурынэн басьтэм, нюлэсэн котыртэм инты. Покчи классын дышетскисьёс отчы чорыганы мынӥллям. Шуак кытысь-марысь нюлэскысь, дото зол утыса, дас пала бадӟым пуныос потӥллям но пиналъёс пала бызьыны кутскиллям. Я коть соосыз, марзэ-созэ валаса,  я кышкаса ни-а, писпу йылэ тубиллям. Кызьы сыӵе пичи шпанаос кыз йылэ тубыны быгатӥллям, мон понна валантэм. Пуныос пиналъёсты "утьыса" жадиллям но кошкиллям. Таосыз великъёсазы пуксьыса, гуртэ чачыратӥллям.

Ми малпам вал, со пуныос кытысь ке но вуэмын шуыса. Яке со кыр пуныос, кудъёсыз уло нюлэсын но пӧйшуръёсты кесяло. Но уж мукет бордын вылэм.

Пуныосты тыметэз ӵыпись, ужбератӥсь отчы лэзем. Нокин но тыметэз доры медаз матэктылы шуыса. Валасько, пуныос Улысь Вукоын гинэ пукысалзы ке, соос мукет гурт дорозь но вуо. Асьсэос кӧшкемытэсь, котькинэ пурыны дасесь, ӝужытэсь но сьӧсесь. Матысь дыре соос, сиён утчаса, гурт кузя но поръяны кутскозы ни. Пастухе потэм пудо-животъёс вылэ тэтчалозы. Адямиос ульчае потаны кышкалозы.

Тӥни кыӵе чурыт но сьӧд сюлмо луыны быгатэ адями. Тымет - со инкуазьлэн люкетэз ук, малы сое аслыд гинэ кароно. Эшшо сыӵе амалъёсын на. Валасько, со ужбергатӥсь асьме гуртысь луысалыз ке, но трос мукет гуртъёсын фермаос ӧз возьысалыз ке.

Адямиос уксё поттон понна, гын вылысь чутыны кутско ни.

Людмила Улицкаяен пумиськон

Малы меда адямиослы  мурт малпанъёс туж тунсыко пото?

Тани туннэ УдГУэ тодмо гожъяськись Людмила Улицкая вуылӥз . Туж яратоно кадь, огшоры, визьмо, арлыдо кышномурт. Зэмзэ ке вераса, азьло мон чик но ой вал тодмо солэн творчествоеныз. Пумиськонын но аслаз гожъяськемез сярысь трос ӧз вера, юанъёс но та сярысь трос ӧй вал. Тани кык-куинь гинэ.

Кызьы со шедьтэ сюжетъёс, книгаосызлы ним малпа да марда? Уг тодскы шуэ, пуксиськод но озьы ик гожтӥське. Нош сюжетъёс, пе, сое пумтэм-йылтэм сого (бича гинэ, улонын соос туж трос). Куд-огъёссэ бордысьтым пезьдытъясько но, шуэ.

Юаллязы Украина сярысь! Ачиз ик куанер акыльтӥз та тема ласянь вераськыны. Уг яра, шуэ Россиялы Украиналэн ужъёсаз пыриськыны. Мед али тупам учырысь ачиз потоз но ӝутӥськоз. Нош солы весь люкето, выль тылпу кынӝытъяло. 

Оглом кышномуртлэн образ сярысь туж трос юанъёс  вал. Яратӥсько, пе, ӟуч кышноосты. Ортчемзэ тодэ ваид ке, соослы котьку но пиосмурт киос ӧз тырмылэ. Вань секыт уж кышномурт пельпум вылэ усьылӥз, со семьязэ утьыны выриз. Нош туала кышномурт мукет ни. Табере солэн нырысетӥ интыын семья уг сылы ни, туала арын солы дышетскон кулэгес.

Озьы Людмила выжиз семья сярысь вераськон вылэ. Али, пе,  "феминизация мужчин но маскулинизация женщин" луэ. Тӥни озьы.

Ачиз гожъяськись творчествоез сярысь шуэ, "мон ваньзэ улонысь басьтӥсько". Соин ик вераськон но улон сярысь тросгес вал, дыр. Гожъяськыны со эркын дыръяз гинэ гожъяське. Мон, шуэ Улицкая, нырысь ик улӥсь адями. Соин ик улон интыям гожъяськеме уг луы, малы ке шуоно отын - улон. Тани али матысь дыре кунгож сьӧры кошко, отын шыпыт интыын кутско ни ужаны.

Солы, пе, вдохновение кулэ ӧвӧл, яке муза весяк Улицкая бордын улэ. Гожъяськисез огшоры, пе, огназ келтоно, нокин но медаз иса но акыльяськы ни шуыса. Соку ини кутско вордӥськыны выль книгаос. Мынам но озьы луысал ке.

Людмила Улицкая автографъёс сётъя.



Улицкаялэсь автограф басьтыны султэм адямиос.

   

Юисьёс.

Юэм адями кынме ке, мар дауртэмзэ валатэк, кылиськыны, пе, кутске. Таязэ бертылыкум, милям гуртын кулэм адями сярысь кылӥськиз. Со юыса, кинлэн ке бакча бераз усем. Лымы вылын кылльыса, кынмыны кутскем, но копак вылӥ дӥськутсэ куштэм. Сазьзэ ыштэм, кынмись адями пӧсяны кутске, пе. Озьы ик со воргорон кынмем но кулэм.

Автобусысь потыкум, дугдылонниысь кышномуртэз синйылтӥ. Со ӟус вылын изе вал. Я коть юбкаез кузь вал. Валамон ини - юэмын. Со нуналэ ик, со кышномурт вузкаронниын ужась эше доры, пе, пыре. Уксё но аракы юа. Тӥни кытчыозь аракы но ляб сюлэм вуттэ. Гуртын но озьы костаськыса ветлӥд ке... Пукты вал настойка.

Я коть али шунытгес луиз ини. Южной автостанцие васьконъям, сомында кудӟем адямиосты адӟи. Одӥгъёсыз дугдылонни вӧзын асфальт вылын ик изё, мукетъёсыз ульча кузя водка ӟенеликен ветло. Толалтэ юисьёс сомында ӧй вал кадь. Лымы улысь потӥсь жуг-жаген ӵош алкашъёс но син азе пото. Но жуг-жагез утялтозы, нош юэмъёсты - ... ?

Пуны но алкашъёс.

Бер ӝыт. Но  вузкаронниосын аракы вузало на. Бертӥсько огъяулонние. Одӥг пичи лавкаысь пото кык кышномуртъёс но одӥг пиосмурт. Воргоронлэн кияз сур, одӥг кышномуртлэн -  пакет, нош мукетызлэн кияз гозы.

Гозы пумын лапег мугоро пуны керттэмын.

Ымныръёсазы учкыны малы меда шедьтӥ? Ваньзы тӧрнамын- дугдылытэк юо вылды. Дӥськутсы но кырсь. Син азяды пуктӥськоды, дыр, фуфайка выллем курткаос вылазы дӥсямын но тӥни, шапказы но шарфсы но ӧвӧл. Нош кырын тӧло. Соос сыӵе кырсесь, нош пунызы тӧдьы гоно (юг-тӧдьы гонэз копак юг-тӧдьы ӧвӧл ни ке но, ярам). 

Соос серекъяло, пунызы но шумпотэ. Таосыз лавкае вуылӥзы, нош пунызы коть "чылкыт" омырен шоказ. 

Пунылэн кузёез огназ ӧвӧл. Эшъёсыз со дорысь кошко ке, солэсь сюлэмзэ пуныез буйгатэ. Тӥни кызьы улыны кулэ.

Пузкар

Кӧня ке час талэсь азьло тросэз витизы "Пузкар" киноез, табере кино ласянь малпанъёсты возьмало. Мон уг вера солэсь урод палъёссэ, актёръёслэн шудэмзы но куд-ог тупасьтэм интыос ласянь. Сойзэ мед мукетъёсыз вералозы.

Кинотеатре вуэме бере ик, мылкыды куашказ. Йырам соку ик юан кылдӥз, кыӵе амалъя ӧтён билетъёс сёткамын вал? Удмурт культурае кыӵе ке но челеп ватсамзы понна? Озьы ке, сэре мон ӧтем адямиос пӧлысь адӟи сооссэ, кудъёсыз удмурт лулчеберет понна номыр но ӧз лэсьтэ на, ватсало на, уг но малпало лэсьтыны. Пинал дыръязы нош копак удмурт кыллэсь куштӥськон мылкыдын ветлылӥзы. Адӟи сыӵеоссэ. Нош Таня Тихонова, кылсярысь, премьера дыре огъяулонниын, дэрем вурыса но удмурт калык кырӟанъёс кырӟаса, пукиз.

Пуксимы залэ. Кутскизы министръёс вераськыны. Мон малы ке но сыӵе со министръёсты уг яратӥськы, адями лулзэс уг тодӥськы, дыр, соин. Мыным потэ, соос номыр но уг каро, улыны гинэ люкето шуыса. Шонертэм, дыр, со; огшоры мынам кылдэм стереотипе. Ма тросэз депутатъёс уженызы ушъяськыны быгато, дыр, но мон ӧжытэзлы гинэ оскисько.

 Я. Тани Лариса Николаевна Буранова шуиз: матысь дыре, кинотеатре лыктыку, мед, пе, быръён луоз, кыӵе удмурт кылын киное мыноно. ЫЫ, малпай ас поннам, Тӥ нырысь удмурт кылэз школаосын одно ик дышетыны косэ вал, катэз мед кутозы шуыса, жугиське вал, соку учкись но, удмурт лулчеберетын вань удысъёс но азьпалтӥськысалзы. Соку адямиос тодысалзы, кин понна ужано, кинлы лэсьтоно. Нош али удмурт "элита" ваньзэ лэсьтэ удмурт "элиталы", кытчы пыре 300 адями? (Уг яратӥськы со "элита" кылэз). Киное 300 адями ӧтемын вал.

Соловьёв Владимир Михайловичлэсь но юаллям, асьме республикаямы удмурт киноос но вань-а мар-а шуыса. Министръёс асьсэос но уг тодо тӥни, кыӵе эшшо отын удмурт кыл на. Кыӵе милям депутатъёсмы, уй-уй-уй.

Уродзэ уг вера шуи но, ӧй чида, лэся. Но со кино ласянь ӧвӧл. Тани кутскиз кино. "Пузкар". Киносуредъёсъя но, шудӥсьёслэн выремзыя но, ваньмызъя "Пузкар" "Узы-борылэсь" сю поллы устогес лэсьтэмын. Соин мон туж шумпотӥсько: вань азьлане вамыш, но со кыкетӥ гинэ вамыш ук ай. Мынам сюлэмы шумпотэ ке, ымныры но пальыша ни, мылкыдме соку ик верам потэ. Вӧзам пукись эше ик уродъяськыны кутскиз вал ни. Тон актёръёс шоры эн учкы, киноез, пе, учкы!

Тодмо ымныръёс шудо бере, нырысь ик со ымныръёсты синйылтӥсько ини, синмаськисько дото зол, малыке шуоно соос талантоесь, талантоесь, соин ик туж мусоесь. Дышем бере гинэ, кутски сюжетсэ да марзэ валаны. Но соку кинолэн пумыз вуэ вылэм ни. Соин ик ӵуказе но ветлысал на, табере ини сюжетсэ учкыны.

Тросэзлэн сыӵе мылкыдыз кылдӥз: кинолэн кыкетӥ люкетэз кулэ луыны. Мыным быронэз кельшиз. Адями малпаськонэ усиз ук, со кинозалысь буш ӧз поты, озьыен кино удалтӥз. Мон понна ваньмыз валамон вал: удмурт адями  гуртын гинэ шудо, соин ик пумаз кык туганъёс, кучапиен шудыса, серекъяса, сюрес кузя гурт пала вамышто. Но малы удмурт адями гуртын то шудо? Малы со карын инты уг шедьты, малы кар сое изъянтэ но урод пала воштэ. Удмурт егитъёс карын но быгато ужаны, удмуртлык Ижкарын гинэ азинске, удмурт гуртъёсын егитъёс таӵе ужпум сярысь уг но тодо, пока каре уг сюро ( гуртшколаосын удмурт кылэз дышето на ке ) .  Ижкарын гинэ кутске нюръяськон.

Туж трос ужпумъёс пусйыны выремын. Как будто ӵуказе дунне быроз, нош "Пузкар" - со берпуметӥ кино. Соин ик татын вань ужпумъёсты ӝутоно. Пусйыны пусйизы, нош пумозяз ӧз вуттэ.

Нош кытчы но сюриллямтэ кино лэсьтӥсьёс: ипподром, аэропорт, курутой коттеджной инты, кафее, галереяе, ын пушкы... Суредъёс туж чебересь вал. Тау! Мон ой возьма вал, сокем серьёзно но чебер луоз шуыса.

Зато вань адямиос кадь, ми Удмурточкаен кизилиослэсь автографъёс басьяны кошким. Табере мынам вань автографъёсы мусо шудӥсьёслэсь но Петрушлэсь. Тау кино понна!

Кошкыкум кассирлэсь юай, ӵуказелы кӧня буш инты кылемын на шуыса. 30-мын пала гинэ на, пайми, отын сэрегъёсын мышказ гинэ на.

Эйфория ай мынам. Киноез выльысь учконо. Тау!

Психологъёсын.

Туж аспӧртэмлыко эскеронэ сюри. Дышетскем бере, огъяулонние бертыны одъясько вал ини. Кытысь-марысь сюрес азям эше потӥз. Со психологлы дышетске, кутӥз но монэ дышетскон бӧлетэ пыртӥз. Пыри: азям пӧртэм ӝӧкъёс сьӧрын дышетскисьёс пуко. Мыняло. Ярам, малпай ас поннам.

Пукси, нош азям кык коробка пуктӥзы. Одӥгез тӧдьы А4 бумага улысь, нош мукетыз "Фруктовый остров" сок улысь. Юанъёс сётъяны кутскизы.

-Кудзэ тон таос пӧлысь бырйысалыд?

- "Фруктовый остров". Малыке шуоно со "Фруктовый остров", соиз - мӧзмытгес коробкады. Таиз коть чыгыр-лыз буёло.

-Со волшебный коробка, - шуэ ини таре со пияше, - мае тон отысь поттысалыд?

- Номыре но,- шуисько,- мон отчы понысал? Бон, потэ ке тодэмды, мар отысь поттысал, малпасько али. 

Соку йырам лыктӥз Венедикт Ерофеевлэн "Москва-Петушки" поэмаез. Отын Веня "Ю" буква сярысь вералля вал. "Ю"- со быдэс творчество кадь, мае ке но ю но малпанъёстэ гожты. Веня юэ вал но малпаське вал, маке но вылӥ сярысь малпаське вал. "Ю" буква одно ик йырысь потэ вал (одӥг учырын йырысь вир "Ю" буква луыса вияз). Юон солэсь улонзэ но малпанъёссэ бугыръя вал. Тӥни со тодам лыктӥз но верай:

- "Ю" буква отысь поттысал.

- Малы "Ю"? 

- Тӥляд тетрадяды сыӵе юан ӧвӧл! - шуисько, валэктэме ӧз поты но.

- Вань, - мынектӥз пияше.

- Венедикт Ерофеевез лыдӟид-а?

-Ой.

-Иське уг валэкты. Лыдӟы, - шуисько.

-Я,- пе.

Табере азям кыкетӥ коробказэс понӥзы. Таиз но, пе, волшебный.

- Нош татчы тон мар понысалыд? Сое, марлэсь тынад весяклы люкиськемед потэ.

- Ммм. ӧвӧл мынам сыӵе арберие.

Веранэ куспын выж шоры учки но, пыдкутчанме адӟи.

-Пыдкутчанме понысал!, - шумпотыса ик верай.

-Малы? - паймем синъёсын учкыса, юаз пияше.

- Малы, малы! Пыдкутчанме мон синмаськыса басьтӥсько ук. Нош дыр ортчыса, со урод луэ. Жаг куянэ куштӥд ке, со отын мукет жагъёс пӧлын сисьмоз. Нош кӧня со тынэсьтыд пыдъёстэ утиз. Тынад аслад но сое куштэмед уз поты ни, сокем дышод со борды. Нош кӧня ке дыр ортчиз ке, со пыдкутчанэз та коробкаысьтыды поттыны луоз. Соку тынад улон шоры учкемед воштӥськоз ни. Кин тодэ, вуж пыдкутчанэд шоры учкыса, тон тодад ваёд ортчемзэ но серекъялод азьвыл улон шоры учкемед вылын.

Я. Табере мыным мукет коробкаос сётӥзы. Пушказ понӥзы пичи туп, но тодыны косӥзы, кыӵе фигура ватэмын со коробкаос пушкын. Татын мон копак "пукси". Йырам кыӵе фигура лыктӥз, созэ ик верай ни.

- Тон кыӵе факультетын дышетскиськод? - юаз пияшкае.

- А вот тодэ, тӥ монэ со фигураостэс тодыны косӥськоды ук, - серектӥ мон.

Тӥни сыӵе эскеронэ сюри мон. Малпасько кӧня ке но юрттӥ дыр, со психологъёслы. Но соослэн сюлэмъёсазы паймон но мынян гинэ кылиз кадь. Мар йырам лыктӥз, со ик верай. Мон понна, вань веранэ зэм вал.

Водка ворме...

Пукиськод тазьы 3 часын уйин, чай юыса, вераськыса. Со дыре мар гинэ йыре уг лыкты. Нош эшед кошкемез бере, комнатаын шыпыт луэ. Ваньзы сизьыметӥ уйвӧт адӟо ни, дыр, нош тынад кӧтыд гинэ чоръя. Пукиськод ноутбук азьын, нош пеляд тодмотэм крезьгуръёс проводъёс кузя вуо.

Тани, кылсярысь, "Лукошко" вузкаронниысь учыр. Мынам горд йыро юлтоше отын загоратьтэ.

Лыктэ, пе, кассае воргорон. Кияз - чекушка, нош синъёсаз - валантэм мылкыд: басьтоно водкаез яке ӧвӧл. Юанэзлы валэктон утча:
-Басьтӥ ке, нош ик кышноеным йырсиясько ук. Туннэ зарплата басьтӥ вал, ӵапак туннэ ик кышно но командировкаысь бертӥз. "Уг юиськы", - шуи ни вал солы. Басьтом-а?
-Ма асьтэос тодӥськоды, - шуэ солы горд йыро юлтоше. Нош аслыз тросгес барыш поттыны кулэ.
- Я, бен, басьто но. Карточкаен тыри ке, СМС кышнолэн телефоназ вуоз. Кин со СМСъёсты но малпам. Азьло соостэк но капчиен улӥськом вал ук. Нерад каро копак. Кисыям но трос уксёе ӧвӧл. Кӧня сылэ таи мынам? - весь кассирен вераськыны турттэ.
-Чекушкады - 87 манет.
- Ой, мед-а мар-а ни, ыы ведь. Кышнолы "сю манетме ыштӥ" шуо!

Куанерлэн сюлмыз ӧз чида. Кышноезлэсь кышканзэ водка вормиз. Водка ваньзэ ворме: уксёез но, начар улонэз но, семьяез но, йырез но, сюлэмез но, яратонэз но. Водкаез меда мар ворме?

Али но вуоно даур.

"Даур artist-лэн сюлэмез пыр потэ",
 шуиз ас вакытаз Гётэ.
 Со artist интые поэт шуиз вал. Нош кин со поэт? Со сыӵе ик artist. Аrtist - со пыдэстэм вышкы кадь, мур, малпанъёсын узыр адями. Малпанъёсыз но солэн кыӵе ке формаен йырын гинэ уг, дунне вылэ но вордӥсько.

Нош огдыре кӧня гуртъёсын быремын вал. Али но каллен-каллен соос куашканы кутско ини. Вал Пуро гурт вӧзын бырем гурт, но визьмо адямиос сое улӟытӥзы, шутэтскон инты усьтӥзы. Табере со шутэтскон инты кузёезлы барыш вае, гуртэн ульчаез но будэ.

Вань на Пуро вӧзын мукет гурт. Отын улэ мынам дядяе (песяатае). ӝыныез улӥсьёссы пересьёс гинэ на. Мынам анае отын вордскемын, нош али шуэ: "Мон кышкасько ини отчы ветлыны: котыр куашкам но куашкан калэ вуэм коркаос, кӧшкемыт ульчаос". Кин тодэ, ог-даур ортчыса, отын кулэм муртъёслэн лулъёссы гинэ но улыны кылёзы на, дыр. Дядяйлэн корказьысьтыз шедьтӥ дядяелэн анаезлэсь дэремзэ. Сое кей но сиымтэ на, нош нэнэелэсь зыбынзэ коть али но нуллы. Соиз понна коть шумпотӥсько, но сандык сисьме, сэрегъёсы кортлэсь ке но лэсьтэмын.

Тани огшоры удмурт Зямбай гуртын чипсы поттонъя заводзы но, пе, вань. ӟечокъёс. Озьыен вань ужан интыоз - гурт уз быры, азьланьтӥськоз. Нош мар вань Пуроын, Починкаын? Куашкась совхоз, кытын скал гидъёссы гинэ но тӧлъя-буръя ветло ини? Кузёзы уксё сярысь гинэ малпаське, ыжпиоссы вордскыса вуо-а, уг-а, но сопал дуннее лобӟылэмысь ӧз дугдылэ на.

Ализэ ӧд дунъя ке, гырпумдэс куртчылыса, эн пуке. Толыкез уз луы ни.

Тау.

"Да ну, там большинство вотячек"

Туннэ физькультураысь бертыкум, бызылӥсь "спортсменъёс" шоры донгиськи.
Ммм, малпасько, бызьыло, умой. Стадионысь потӥсь нылъёс трос вал. Соос милемыз, конечно, синйылтӥзы ни. Огез, учкы, кӧня, шуэ. Нош мукетыз солы беренвазе: "Да ну, там большинство вотячек". Сьӧраз бызьыса, берпалаз чыжем потӥз. Но соос кыдёкын вал ини. Лек учкемен гинэ келяй на.

Туж кема со пилэсь верамзэ йырам бергатӥ. Кемалась таӵе веранъёсын ӧй пумиськылы вал ни. Мар шуод на. Со тодысал ке, ачиз но вотяк шуыса, али "Зенит" котыртӥ ӧз бызьысалыз. Кытчы ке но Муско пала вуысал ини.

... номыр уг пот ни верам. Огшоры: !!!!!!!!!!!!!!!!!!!!!!!!!!!!!!!!!!!!!!!!!!!!!

Валаны турттоно.

Огъяулонние "Калленом" фестивальлэсь флаеръёссэ лякылын потӥ. Пырон холлэ вуи. Отын "хачикъёс" сыло вал. Огез пичи укно пыр охранникен вераське. Охранник аслаз будкаяз пуке. Шуак кесяськем куара кылӥськиз. Мон йырме хачикъёс пала берыктӥ. Огез охранник шоры кесяське:
-Ты кто такой, чтобы мне приказывать!!!!!
Кызьы валай, охранник журналэ лыктэмзы ласянь гожтӥськыны косэм. Соиз гожтӥськем, но со пумысен марке керетон потэм. Со "хачикъёс" туж дерзкоесь. Асьсэос уг валало но, мыжыкъёсынызы шонаськыны кутско.

"Мусульманин" веросысь люкет:

Марайколэн чыры-пыры ужъёсты быдэсъян висказ, Дагетанец доры  50-тон аресъем пиосмурт лыктӥз. Пинал пияшлэн меӵак синъёсаз учкыса, ымныр дораз матэктыса, шыпыт куараен со вазиз:

-Виськод?

-Оо.

- Иисус Христосэз ӧть.

- Маин со мыным юрттоз. Со пророк гинэ.

- Инмар – со яратон. Висён – со дьявол.

- Кызьы висён дьявол луоз? Сатана – со кулонлэн кылчинэз, кудӥз адысь уллямын. И тодӥськод-а, мар понна? Йӧнъяськемез понна. - Кесяськыса вераськыны кутскиз Дагетанец, - Исса – Аллахлэн чиньыез.

- Котькуд адямилэн аслаз Инмар-кылчинэз. Со котьку юрттэ аслаз нылпиезлы, - шыпыт вера воргорон.

- Инмар одӥг, солэн ымныръёсыз но нимъёсыз трос!

Пумиськизы кык сюлэмъёс: огез пӧсь, мукетыз гань-гань.

Починка

Сузэреным Починка (Кутер-Кутон) гуртэ ветлӥ. Отын мынам дядяе улэ. Пересь ке но но туж шаплы на. Хозяйствояз муш сямен берга, созэ лэсьтоз, тайзэ лэсьтоз, шыд сие шуоз, кампет сётоз. Пиналгес дыръяз копак сыӵе ой вал. Пересьмон марзэ меда адямилэсь воштэ?


Нош гуртлэн ваньмыз куашка. Али Починкаын куашкам коркаосыз тросгес ини, нош кыӵе чебер интыос отын.

    Тымет, кытын мон уяны дыши. Кылем арын отын вань чорыгъёссы зынмиллям, али сӥзьыл Ижкар тыметын кадь вутурын будэ, пинал чорыгъёс выль интызылы синмасько.

     Нюлэсъёс. Соос но куасьмыса быро ини. Одӥг аре зоръёс ӧй вал, со тырысен милям ёросамы вань нюлэъёс куасьмыны кутскизы ини марке. Адямиос соосты корало, интыязы номыр уг мертто. Милям школамы вож нюлэсэн котыртэмын вал. Толалтэ ми отӥ куасъёсын бызьылӥм, гужем кускылиос бичаса ветлӥм, сӥзьыл усем куаръёсын лэзьяським. Огпол гуртэ бертӥ но, учкисько, нюлэс интые куасьмес писпу вайъёс гинэ кыллё на.  Шимес суред. Мыным вӧсь вал.


  Ошмесъёс. Азьло гуртоос соос сьӧры сыӵе учко но котьку ик сузяло вал. Али тросэз семьяос, кытын вань мужикъёс, ву скважинаос асьсэлы гудыло, но ошмесъёс соослы кулэ ӧвӧл ини. Ошмесъёсты котыртыны пересьёслэн моӵсы уг тырмы ни, нош пиналъёслы со кулэез но ӧвӧл. Дядяй шуэ: "Тани колодча но куашка ини, кин табере тупатоз на сое? Тани Герейъёс но асьсэлы ву буритьтӥзы".

  
Кин, кин - нокин. Яке кинлэн ву скважинаез ӧвӧл, и то мылыз гинэ потӥз ке.
Мон самой яркыт пинал дыр нуналъёсме татын ортчытӥ. Тодӥсько на чорыганы ветлэмме, узы-боры, губи бичамме, скалъёсты возьмамме. Татын ваньмыз вал умой, мон малпамъя, калык инкуазен огкылысь улэ вал (калык инкуазьлы юрттэ, инкуазь солы емышъёсыныз тау каре). Нош Пуро Починкалэсь соку ик кыдёкегес вамыштэмын вал ини. Мон шумпотыса вуисько вал нэнэй доры, Починка гуртлэн киосаз. Кызьы нэнэйлэн ӟыгыртэмез шунтэ вал, озьы ик Починкалэн шокамез но буйгатэ вал мынэсьтым сюлэмме. Нош али мон будӥ ни, нэнэй кулӥз ни, Пуролэсь пересь Починка губырске но губырске. Дачаос гинэ, виштыос кадь, чиляло на гуртлэн азбараз.

Арган куара шергес кылиськыны кутске ини

Коснуналэ уйин гуртэ бертыку, шур сопалась арган шудэмез кыли, возаз шулдыр кырзась куараос итиськизы на. Сыче шумпоти. Кемалась кылэм вал ини сыче юмшанъёсты.

Пичи дырысьтым тодисько на, кызьы быдэс ульчаен Виль ужрадын жук сиыса пукиськом вал. Мужикъёс арганэн шудо, мукетъёсыз кырзало но котыр тапырто. Пиналъёс шумпотыса бызьыло. Тылпу тачыртэ, лысву пыдэз коттэ, гудырикошкон кизилиос пишто, кезьыт толэзь вожъяськыса кадь золгес пиштэ. Малы ке но котькуд Виле сыче усто куазь луылэ вал. Син азям сычеен кылиз со шулдыръяськон. Но Адямиос вискын капиталлистической кусыпъёс юнмам бере, со юмшан сямъёс дырен чош сылмыны кутско ини. Вилез но кыче кемалась ом пумиталлялэ ни. Адямиос ог- огзылы вожъяськисесьгес луизы, кескичесьгес. Болякъёс вискын но керетонъёс чемысь поталляны кутскизы ни, кыче отын нюк пыдсы огазе люкаськон на? Асьсэзыс гинэ тодса уло на.

Огпол Улын Юри гуртэ ветли вал. Гербер шулдыръяськонэ сюри. Жытаз Дышетисьёс туж мудрон йылолэз жутыны одъяллям. Кык ульчаос вискын пумиськон, огез ульча куноя мукетсэ. Шыд, вина, саламъёс, арган, кырзанъёс, эктонъёс. Егит эшъёсылы шуисько, ойдолэ мыном, удмурт дэрем дисялом но мыном. Огез мынам мылкыдын жуатскиз, соин ик мукетыз но пумит оз луы. Эшъёсылэн дэремъёссы вал, мыным но усьтыр-табыр шедьтизы. Кыче ке но ульча Киров ульчаез куноя вал, эшъёсы чапак Киров ульчаысь. Таре мыним но, егитъёс полысь гинэ овол, Киров ульчаысь но ми гинэ куинь кузя сяна нокин но вуымтэ. Нырмес ом лэзе, кин ке но малпаз, дыр, тросгес сюроз шуыса. Куноосты пумитан кырзан кырзам но пуксим. Туж кельшиз. Милям гуртын марке кыкети арзэ Герберез но уг пумитало ни.

Али егитъёс полын арганэн шудисьёсыз ожыт ини. Милям гуртын тырмыт ай. Улын Юриын
нош ныл но шудэ. Возам сылись эше Ульча пумитанын арганэз кысканы кутскиз, ноку но ой малпасал,  озьы быгатэ шуыса. ГАЖАНО КЫШНО ЛУОЗ!

нимтэм

Матысь адями сое уд шуы. Но аресаз «семейный кругаз» пыртыса, йырме усыкмытӥз ик. Али нылаш изе, кызьы изё кровать вӧзаз носкиосыз, туфлиез, проводъёс но корт дас манет, югыт тыл соослэсь уйвӧтсэс уг кышкаты. Ӵуказе уйпал ёросъёсы кошкисько. Ужъёсме быдэстыны уй азьпалам. Син азям «Инвожо» журнал но Кельмаковлэн «Удмурт дунне» газетлэн кылэз ласянь критической материалэз но «Перепечкинэ» 500 манетлы сертификат.

 Бадӟым Удмурт Диктант гожтэм понна, результатъёссэ вераны юри ӝыт ортчытӥзы. Ар-Серги лично ымнырам ик вераз, тыныд но книгаме, пе, сӥзи: «БУД, гажаса, …». Но со сурам, лэся, мынам Векшина фамилия, мон уг тодкы, кин со Киршина. Туж бадӟым фанатэз луысал ке, ӝоже усьсал.  ??малыке но Ижкаре вуэм бере, фамилияме сурало, то Ившина, то тани. Векшина, вроде сыӵе дано но тодмо фамилия. Кушем ним-а мар-а басьтоно??

Туннэ копак гажанэным вераськем ӧз поты. Со монэ шӧдэ кадь, ку мон уг быгаткы солы дырме висъяны, я со малпанэн нуналам, йырам гинэ но уг чилекты. Бертыса, вирсэръёсме паськытатӥ, но йырсазьме нош ик ыштыны ӧй быгаты. Сюлмысьтым ӟечкылай Фаняез но Женяез диктант гожтэменызы. Татар пи, пе, удмуртлэсь умойгес гожтэм. Малы? Малпаське ни асьтэос.

Оло вань, оло ӧвӧл

Выль Ар бере мукет форматэ выжо. Али мынам копак зачётной арня мынэ: дышетсконъя но, вань ужъёсме быдэстонъя но, вань малпанъёсме радъянъя но. Йылпумъянъёс одно ик лэсьто ай, нош али огзэ гинэ верало:

                                                                  Мон оло вань, оло ӧвӧл!

Соин ик вуоно арын мон кулэ карисьлы котьку мед луом. Тыршо. Таиз ар переходной мед луоз. Али тодко ни, кыӵе удысын мон асме узырто но возьмато. Малпам ӵектосъёсме улонэ пыӵато!
Матысь дыре ышо кык арнялы, кошкисько кунмылэн шунды ӝуӝан палаз. Нош собере кутском! Кыйлэсь кышкасько ке но, азьлань мынон понна, кышканэз пачкатоно) Озьы ведь, эшъёс!

Гольык ветлыны мылкыд карисьлэн удмурт кылэз дышетэмез потӥз

Мыным контактын одӥг адями гожтӥз, удмурт кылэз дышетэм потэ шуыса. Туж, пе, кылъёсты яратко. Эшшо ужасько, дышетскисько на шуэ, и мон, пе, натурист. Предлог  удмурт кыл дышетон вал, нош на самом деле со аслаз тунсыкъяськонэз сярысь вераны, популяризоватьтыны кутскиз. Вот шнырик малпасько. Адямилы 24 арес ни, нош со натурист на.

Кин со сыӵе натурист? Натурист - адями, кин уг возьдаськы адямиос пӧлтӥ гольык ветлыны, адямиос пумит уг луо ке. Со озьы шуиз, но мон малпасько, мер пумит ке но, соос пырик дӥськутсэс куштыны дась. Остэ! Тон, шуэ, монэ шонертэм гинэ эн вала. Ма мон соку ик мукет ассоциациос кылдӥзы. А именно. Удмуртъёс, асьсэ возьдаськон сямынызы, ноку но дыр гольык адямиосын эрико вераськыны уз быгатэ. Эшшо натуристъёс пӧлы ноку но уз выйе, асьсэос но сыӵеесь уз луэ. Может луоз сыӵе учыр, куке удмурт луоз юэмын, яке ыштоз йырсазьзэ.

Ну тӥ син азяды гинэ пуктэ: мынӥды тӥ кыӵе ке но литературной ӝытэ, нош отын гольык адями пуке. Бон вечеринкаын - а, клубын-а соиз кӧня ке валамонгес ни дыр но, нош огшоры улон учыръёсын? Со натуристэ шуэ ни, котьку, пе, потэ вал мынам тунсыкъяськонэ сярысь телевизор пыр мед  вералозы шуыса, мед адямиос тодозы шуыса.

Сыӵе ӧр, конечно, улонын вань! Соин ик мон сое копак уг палэнтӥськы, но монъя, со - не этично! И мон дорозь уг вуы юанэлы валэктон: мар соослэн озьы возьматэмзы потэ?
Ну вот, дышетӥз но ӧз но ни со удмурт кылэз, натурист луэмез сярысь гинэ оломар  мадиз но ышиз!
P.S. Саунаын гинэ соослы улыны кулэ вал дыр)ХД

Энергетик бордысен кутском.

 Тани соос - карысь будӥсь пиналъёс. Асьме кунмылэсь азьланьзэ лэсьтӥсьёс шуод-а мара... Ижкарысь огшоры азбар.
................................................
Адӟиськоды- а, соос пыр адскись одноразовой стаканчикъёсысь марке но юо. Со напиток ӧвӧл, эн малпалэ!

Тӥни мар юо соос------------------------------------------------------------------------------------>>>>>>>>>

Ну. конечно, соос монэ адӟизы.

- Нас снимаюююююююююют! - чир кесяськыса, кин кытчы пегӟиз. Пазьгиськизы, кыӵе ке урод йыруж лэсьтэмзы бере кадь.
Энергетик бордысен кутскыса, мар борды меда соос басьтӥськозы? (риторический юан)

Азьтэм.

Остэ, кӧня котырам азьтэм адямиос. Честно ке соос мынэсьтым вожме потто. Удмуртъёс особенно пуко ас дуннеязы но номыр но уг каро. Мынам ӟигары уг тырмы тӥледын нюръяськыса. Кызьы меда одъяськоды азьлань сюрестэс лякылыны. Сое, кагаз вылэ суредаса но йырын чебермаса гинэ, уд пӧрмыты ук. Жаляса верано анай-атайды но котьку вӧзады тӥледыз киултыса азьлане уз нуэ. Яке марлэсь ке кышкаськоды-а? Но тӥ понна нокин но бырйыны сюрес кожондэс уз быгаты! Куке но асьтэлы ик кулэ луоз кожыны, вазьгес-а, бергес-а, но кулэ луоз. Улон  тӥледлы бырйыны шанс сётэ. Малпаськыса сое лэсьтоно. Нош мон аслым бырйи ни. Табере та сюресысь кошкыны уг быгаты ни, матысь бадӟым из шоры дото зол ой пазьгиськы ке. Но куддыръя сыӵе паника монэ кутэ. Сюлэм тул-тул кокаське, йыры шузиме, мар карыны уг валаськы ни: мар борды нырысьсэ кутсконо, мае нырысьсэ быдэстоно, вутто меда со пумиськонэ мыныса, ку гожто контрольной ужме... Соин йырин ик кышкасько из борды ӝимыны. Та дыре куддыр азьтэмъяськыны но кулэ вал дыр но, выль интые медам шеде шуыса, но со азьтэмъяськон эшшо но трос ужъёс ватса на.

Кык кизилиос сярысь кӧня ке малпанъёсы.

"Кык кизилиос" концерт. Кинлы ке туж зол кельшем, нош мон нош ик шедьтӥсько шэкъёссэ.

Зэмзэ ке вераса, удмурт классика, "Шулдыр ӝыт"выллем, сьӧд сюлмозь вуиз ини. Кык кырӟан кылзыса, пельъёсы шуяны кутскизы. Пинал аудиторилы соослэн программазы учкемын ӧвӧл, бадӟымъёсызгес  шумпотыса кывлзӥсько ке но, милемлы марке выльзэ кулэ ини. Тӥ шуоды, эн ветлы уг кельшы ке! Ма уг пересьми ке ветло, конечно, просто мыным валантэм огез: лулчеберетъя кивалтӥсез пинал нылаш- Наталия Ушакова - тусызъя кызь вить аресъем. Солэн сюлмыз феерия, экзотика, выльдӥськон уг куры меда?

Малы адямиос выль муртъёслы сюлэмъёссэс усьтыны кышкало! Вот быръёнъёс азьын соослэн гурт лулчеберетъя юртъёсазы концертэн Геннадий Ганьков но Анна Плотникова кадьёс ветло, но соос со кырӟасьёсты сяна уг тодо. Нош ог-кудъёсыз выль нимъёс кельшо ке но, соос одно ик куаразэс сётозы пичи дырысен тодмо артистъёслы. Кызьы вал "Зарни перепеч"-ын, татын но озьы ик! Плотникова балалайкаен сцена вылэ потысал ке, вормысалыз меда со?

  

Выль туфляосы эшшо пыдъёсме пачкато на вал!

Но мыным туж кельшиз Алексей Ложкинлэн саркастической малпанъёсыз но дэмланъёсыз, Асме но со пушкысь таиз ласянь адӟи кадь. Ванялэн фан - группаез Молодцы! "Ваня ЗБС" - нырысетӥ рядын пукись "бадӟымъёс" паймыса, пегӟыны ӧз малпалэ меда? Но котькуд номер, кызьы гожтэ Мария Золотарёва аслаз Блогаз, аспӧртэмлыко вал. Мынам солэн кадь кӧты ӧз тыры ке но, ӧз но сюма шуом.