Утчасько

воскресенье, 28 декабря 2014 г.

Мылкыд

Лымы усе. Туннэ лымы усе. Мон дисяй лемлет пыр адскись кофтаме но чилясь вож пиялаен зундэсме. Зундэсэлэн пиялаез жыны чиньыме зыгыртэ, пыр адскись кофтае жыны мугорме адзытэ. Мон туннэ уг ветлиськы, мон туннэ лобасько, лымыен чош бергасько. Выль Ар кадь вуэ, но мон уг шодиськы солэсь шомзэ. Мон оскысал на Тол Бабайлы но ачим луысал Лымы ныл.

Тон учкы,
Кызьы мынам сьод йырсие
Каллен усе юг выж вылэ,
Нош пыдъёсы мамык полы
Выё но шарк! гинэ жутско.

Я шод:
Жасмин зыно еж мугоры
Вож бадьпуэн някыръяське,
Крезьгур улсын эктись киы
Ыркыт толэн бордад йотске.

Но экты.
Монэн чош кутскы берганы,
Мамык полын пыласькыны:
Пигон жутске йотскемедлэсь,
Ненег, шуныт шокамедлэсь.

Нош мон

Киям куто мылкыдъёстэ,
Палькко шудись тулкымъёсы.

Мед сьоразы... лыз зарезе...
Мед басьтозы тонэ, монэ.





А.А-ен вераськон

 А.А-ен вераськон

- "Дартэз" ти нуыны кутскемлды бере, мыным со золгес кельшыны кутскиз. Ти умой гожъяськиськоды. Лыдзисько.
-...
-Отисько тиледыз Тодосчи юртэ Портмаськонэ журналистэн. Эшъёстэс но кутэ сьорады. 8-ти январе луоз.
- Тросэз шутэтскозы ай со нуналэ.
- Милям егитъёсын кусыпъёсмы овол. Тиледын но кемалась пумиськеме потэ вал ни. Преемственность поколений луыны кулэ. Соглаш -а тон монэн?
- Соглаш, соглаш. Кызьы бон. Вуыны тыршо.

суббота, 27 декабря 2014 г.

Тон зарни

- Ми тонэн ульчаын эктом, ваньзы азьын. Мон дӥсяло кузь зарни дэремме, кудзэ али вури. Тодӥськод на-а адӟытъяй вал зарни бархат басмаме?! Солэсь вури. Дэреме кузь, быдэс мугорме ватэ, кызьы тон яратӥськод, асме но ӧй вунэты: тыбырзэ гольык кельтӥ. Чебер со, тыныд кельшоз. Нош тон дӥсялод сьӧд костюм. Потом асьмеос ульчае но лымы пырыосын ӵош бергаса эктом. Собере мон кынмо, но ми пыром корка. Юом чечыен но турын вылын лэсьтэм пӧсятэм, ӵошен одӥг шобретэн бинялскыса пуком шторкаосын ватымтэ укно азьын. Кырын каллен бергаса лымы усез, нош инбамын пиштозы кизилиос. Мед озьы луоз, лымы но усёз, кизилиос но пиштозы.
- Озьы уг луы ук, мусое.
- Нош та нуналэ луоз. Мон вераськи ни Кылдысинэн. Мон солы пӧсятэмме эскертыны сёто, нош со мыным Выль Арлы одӥг дыре усись мамыкъёсты но пиштӥсь кизилиосты кузьмалоз.
- Тон Зарни.
- Мон Кылчин.


среда, 24 декабря 2014 г.

Одиг зэмос выжыкыл

Лёхи арлэсь трос мурт шаерлэн животъёсыныз улэ ни - сайка мыжык быдӟа чонариен, мисьтаськыны мынэ чельы зӧкта скорпионэн... Котыр лудъёс, ӝужыт гурезьёс, но акылляськись тӧлъёс. Таджикистанын шунды пуксён вакытэ, пе, инбам чебер луэ, нош толэзь ӝутскыку?!. Шунды толэзьлы пӧрме, шуылӥз сыӵе дыръёсы Лёхи, мӧзмылӥз яратоно нылызлэн куараезлэсь, со акыльтылӥз шулась тӧлъёслэсь. Куддыръя Лёхи яратоноезлы гожтэтъёс лэзьялляз, туспуктэмъёс ысъялляз. Сыче романтик.

Пичи кузьым тыныд. Ас синмыныд учкыса, со эшшо но чебергес адӟиське. Соин но, дыр, мон татчы  кыльыны малпай.
Лёхи ачиз ӧз вала, кызьы со Таджикистанэ службае кылиз - куинь арлы контракт гожтӥз. Яратонэзлы нош кыӵе ӟырдыт чуръёс гожъялляз:

"Чырткем, мусое. Мӧзми ни тынэсьтыд, зол-зол ик. Караулын кык нунал сылӥ. Калык ӧвӧл - выль салдатпиос ӧз вуэ на, нош мынам эшъёсы бертӥзы ни. Ми али бусыын палаткаосын улком. Син азямы ик гурезъёс. Ӵуказе мон тубо отчы но телефонам тусме пукто. Лэзё тыныд, учкод. 
Мон татын воштӥськи ни зол. Табере таӵеен тыныд уг но кельшы ни, дыр. Эш кадь, шуисько. Но бертӥ ке, тонэ туж зол ӟыгыръяло".

Адӟонлэсь уд пегӟы, пе. Жугиськем, лэся, со кинэн ке, та ивор кыре-буре медаз поты шуыса, контракт гожтыттӥллям. Табере со контракт гожтэмезлэсь умой палъёссэ утчаны турттэ: трос уксё люкало, анаелы юртто, корка пукто, гуртысь улонлэсь пегӟо, яратонме вунэто... Но номыр таос пӧлысь ӧз зэма на, номыр...

Озьы ик кыкетӥ тулыс вуиз.  Яратонэзлэн вордӥськем нуналыз вуэ - ӵуказе. Лёхи, вань куректонэз пӧсяменыз ӵош кыре мед потоз шуыса, бызьыса ӝужыт гурезь йылэ тубиз. Тубиз но юзмыт уй омыре, сюрс иськеме куаразэ лэзем кадь, гадь тросаз шокчыса, нылашезлы кеськиз: «Туннэ уйвӧтын пумиськом». Лёхилэн куараез омыр тулкымъёс вылтӥ лобӟиз, нырысетӥ гурезь шоры шорк! гинэ донгиськиз но ас дораз ик берен берытскиз. Лёхи шуак! луиз - пушкысьтыз поттэм куректонэз берытскем кылъёсыныз берен лулаз пыриз кадь. Бен, куректонэз берытскиз - уг быгаты со вунэтыны яратонзэ, котьмар кар. 


Лёхи гань-гань кариськиз. Из вылэ выдиз - син азяз кизилиос пазьгиськизы, со лобыса кадь инпырыос полы выйиз но умме усиз. 

Дунне вылын трос интыос. Адямиос улоназы одиг интыысь мукетаз сюро. Уйвӧтъёсазы но, ум сазязы но трос пӧртэм гуртъёс пыр ортчо, тодмотэм писпуосын тодматско, портэм омыръёсын шокало. Но котькуд интыын адямилэн лул-пырыез кыле, кудиз адямиез котькуд ортчем интыеныз герза.

Лёхи изе, нош яратонэз возы кылем лул-пырыез сое мусоез доры вуттэ. Лёхи адзе, кызьы со ширтыса вуэ солэн капка азяз, собере гажанэныз гужем уен вырйылъёсти поръя, кезьыт синъёсыз шоры учке. Тани со нылызлэн аресаз малпа басьтыны сизьымдон сизьым бадзым йыро инвожо сяськаос. Мынэ лавкае, но отын витьтон сяна кыльымтэ на, - зато италмасъёс трос. Оз поты Лёхилэн басьтэмез чуж сяськаосты. "Ярам, куамын куинь льоль инвожодэс вае, открыткае "Мусое!" гожтэ на", - шуиз со вуз карисьлы. Тани со куамын куинь инвожо сяська бичетэныз вуэ яратонэзлэн капка азяз, но...

Телефонэз жингыртиз: мар ке вуэм. Лёхи сайказ.
"33 аресказ, адямиослэсь лулъёссэс утьыса, улонзэ воштиз Инмар. Быгато меда мон утьыны тынэсьтыд лулдэ. Тау,  33 инвожоед понна".


- Мон одъясько вал сизьымдон сизьым сяська кузьманы, но оз пормы, - шара вераз Лёхи. Верам кылъёсыз, омырын зечыраса,  гурезьлэн изъёсыз вылэ лэзькизы. Гажанэз оз кылы сое. Лёхилэн мылкыдыз пуксиз.

суббота, 20 декабря 2014 г.

Веран

- Удмурт кылэз эн тоды но, мода шу, - шуиз Со, блогеръёс сярысь Ваулиналэсь сюжетсэ учкыса.

Куддыр контекстысь вандыса, оломар луэ) 

четверг, 18 декабря 2014 г.

Дэмен сярысь

Уг одъяськы вал ни мерлыко ужпумъёсъя но ужрадъёсъя гожъяськыны. Но быдэсак палэнскыны уг луы - ӧй чида. Альберт Разинлэсь Удмуртлыке гожтэмзэ лыдӟыса, эшшо Бикузинлэсь янгыш малпанзэ адӟыса, мылкыды пуромиз.

Ну, пуки мон "Дэмен" огазеязьконлэн отчётно-выборной конференцияз. Кызьы Альберт Алексеевичез ӧз мыскыллялэ ке но (конференциын со туж умой адӟиськиз, хотя Разин лякиськись турын кадь ке но, кӧня ке дан но гажан кулэ ук луыны дано тодосчи борды), мон солэн малпанъёсыныз соглаш луисько.

Андрей Иванович кутскиз лыдӟыны отчётсэ. Мон нырысь пуки скептично, кыӵе быдэстэм ужъёсыз сярысь со вераны быгатоз? Докладзэ лыдӟе но лыдӟе...мар та, мар та, кытысь сомында ужрадъёс поттӥз со? Мон "Дэмен" огазеяськонлэн ужъёсыз сярысь кылэм ик ӧй вал, ӧвӧл, ӧрекчасько, нырысьсэ мон соослэсь нимзэс адӟи Глафира Никольскаялы сӥзем конференциын. Чеберайёс, Выль ӝук, удмурт лулчеберетлы сӥзем нуналъёс (али, пе, котькуд ёросын таӵе ужрад ортче ни. Да?), Элькуноведение (ух ты) но пӧртэм конференциос ... Зэмзэ ке, всё - та ужрадъёс сярысь со ӝыны час вераськиз. Монэ паймытӥз, кызьы со мукет адямиослэсь ужъёссэс "Дэмен" улэ пыртэ.

Мар сярысь мон? Со Элькуноведениез ик, яке мон уг тодскы вань югдурез, но "Дэмен" огазеяськон зэмзэ но туж трос кужымзэ понӥз та быдӟым ужрадэз лэсьтон понна. Кизнер ёросысь, Воткакарысь, Чайковскысь делегатъёс докладъёс лыдӟыны поталлязы. Но кызьы мон валасько, та "Дэмен" огазеяськонлэн конференциез ке, кулэ возьматыны дэменчиослэсь ужзэс.

 Тани Кизнер ёросысь Кибашлыослэн юртсылэн директорез. Вераз кыӵе ужъёс лэсьтэ юртсы, фестивальёс но, адӟытонъёс но, нылпиосын ужрадъёс но. Но сое ваньзэ Кибашлыослэн юртсы радъя ук - со ваньмыз соослэн проектъёссы. Нош кытын "Дэмен" огазеяськонлэн Кизнер ёросын быдэстэм ужъёссы?

Мукетыз делегат вал Чайковск карысь. Таиз мадиз, кызьы со ансамбленыз Петербурге фестивале вуылӥз, кызьы со понна уксё утчаз, Тау кариз Андрей Ивановичлы, "Гербер" радъякузы, со удмурт коллективъёсты Чайковске лэзьыны быгатӥз шуыса (со, конечно, шуиз, ми доры вуылӥзы сыӵе-сыӵе коллективъёс, но мон ачимъя берыктыса сётӥсько ни). Нош ик, кызьы юрттэ "Дэмен" Чайковскысь ансамбльлы? Мар сярысь вераськон вообще?! Кытын "Дэмен" огазеяськонлэн Чайковск карын пыӵатэм проектъёсыз? ВИдимо, туж зол юрттӥськиз "Гербер" радъякузы...




среда, 10 декабря 2014 г.

БВИ. Nina Karlsson

"Мон экто!". Nina Karlsson. Ӵуказе. 19.00.

Кинлы ке Nina Karlsson. Кинлы ке Лымы Резиденция. Кинлы ке (валантэм, малы со, пурысьтам зын потӥз марке) КУАмын диско.

Яке нырысь БВИ Nina Karlsson, Собере Лымы Резиденция. Вот калтырнаос!

Верам потэ, кстати. Берпуметӥ вариант кельше ке, яке нырысетӥ вариантын нырысетӥез (Nina Karlsson) вазиське, ӵошен мыном, трос адямиез сьӧрам кутыны быгато. На самом деле быгатӥськоды пырыны концертэ дунтэк. Но весь уд. Список лэсьтӥсько, кин Nina Karlssonлэн концертаз мынысал (дунтэк). Вазиське.

Алигес пичи нуныкаелы - Динаелы - вераса пуки Карлсон сярысь. Кызьы со лоба липетъёс вылтӥ, варення сие, Малышен шудэ. 

Нош туннэ мынам пель улам сюриз одӥг кырӟасьлэн - Нина Карллсонлэн - кырӟамез. Мыным потӥз, солэн куараез, Карлсон кадь ик, шудыса липетъёс вылтӥ ветлэ шуыса. Солэн куараез Малыш доры шудыны пыра, тӧл сьӧры уиське, привидениосты кышкатъя, потэ ке, кровать улэ но кышкаса ватске, коркаез но йыринь-чукинь берыктэ. 

Уг тодскы, малы мыным озьы потӥз. Мар меда луоз ӵуказе БВИ-ын? Куараез уз пачка-а трос калык пӧлын, яке со, котькуд адямилэн йыр вылтӥз тэтчалоз?

Nina Karlssonлэн крезьгураз сураськемын блюз, джаз, кабар, куддыр рок тулкымъёс. Нош ачиз со сыӵе мусо но векчи бадьпу кадь. Марголэн (берпуметӥ постъёсысь героинялэн) уйвӧтъёсысьтыз кадь. 

Мар монэ серекъятӥз. Ниналэн кыкетӥ альбомез - «Хамелеон» - Александр Горбачевлы, пе, кельшем. Пумиськылӥзы меда соос? Вераськылӥзы меда? Концертаз мыныса юано-а мар-а.

«I Deny» альбомез, пе, гожтэмын Ильи Лагутенколэн студияз, саундпродюсерез - Павло Шевчуком. Артемий Троицкий гинэ но сое ушъяз но солы пластинка поттӥз. Усто, пе, со. «Вечерний Ургантын» Антон Севидовен но Александр Гордононэн кырӟам.

вторник, 9 декабря 2014 г.

"Очкар-Азман" I

"Очкар-Азман"
Венедикт Ерофеевлы сизьыса.


Гуртэ бертоно мыным. Бен, гуртэ. Венечка, Азманын монэ анае возьма. Нош школаын дышетскыкум, тодиськод-а кызьы гуртэ бертисько вал. Мылкыд лоптэмын, лул-дартэ вылтиз пачыла кадь вал. Чаркае аракы поныку кадь со, малпаськонъяд уд чакласькы ни ке, аракы посудэз тырмытыса вылтиз вияны кутске - кыче жаль вина. Нош татын номыр жаль ой вал - машина бензин интые аракы сиысал ке, гуртэ бертон понна аракыен вань бутыльёсме шофёрлы кузьмасал, яке музъемлы курбонлы сётысал - кисьтысал сюрес вылэ, ой жалясал ук. Ма собере ожыт -а мар-а Очкарын яблокпуос? Тани Трокай Борисов нимо карлудын - чурак будо, нокин но уг ишка, тылобурдоос гинэ толалтэ шумпотыса кокчало. Бичаса брашка но пуктыын луоз, ум кайгыре.

Гуртэ бертоно мыным, Венечка. Шубаме шедьтоно. Шайтан басьтон, малы татын сомында буш зенеликъёс? Мон ой юы сомында, мынам лулы пыдэстэм овол ук. Йыры порме, кезьыт татын, шубаме шедьтоно. Тани!

Нош та шубаме но, Венечка, эше адзиз но серем кариз вал ук. Азманын, пе, вань коньыостэ вийылыса быдтид-а мар-а? Мон ведь ой вала нырысь, малы со озьы шуиз. Луысал ке мон умой ыбылиськись, кызьы азьло дядяе пукыченыз соослэн синмазы ик йоттэ вал, мон но пойшураны ветлысал, дыр. Сизьымдон сизьым шуба но пыдкук но вурысал ни.

Нош та шубаме мыным яратоно адямие кузьмаз вал ук ай. Мон но соку малпай вал, сои мынам пойшурась оло шуыса. Вылымтэ озьы, солэн аслаз заводэз вань - коньыосты будэтэ. Кычеез гинэ отын овол солэн - сьодэз, кучоез, гордэз... Мон ачим яркыт буёлъёсты яратисько бере, со мыным горд коньыослэсь вурем шуба кузьмаз. Эшшо сьод коньы вордыны сётиз на вал. Зол ведь, кыче со монэ яратэ вал, Венечка. Нош мон горд шубаме дисясько, сьод коньыме киям кутисько но Алла Кузнецовалэн бульвартиз поръясько вал. Кыче тырттыга кадь тэтчалляз коньые веськрес бадяръёс вылти.

Нош собере мар, юаськод, Венечка. Собере мынам коньые аслыз пар шедьтиз, оскиськод-а? Поръяськом вал соин дышем сямъя Алла Кузнецовалэн бульвартиз. Малпай вал со нуналэ Азманэ бертоно шуыса. Анае коньыме оз адзы на вал, нош маке потэ вал солэн кияз воземез собыдза шудбурез - быдэс коньыез -  зарни комокез. Коньыме но Азманэ кельтысал, анаелы эш но, уксё но, шунтись но луысал. Тини, ой берты - кезьыт куазьлэсь кышкай. Нош поръякумы, учкисько но, писпуос вылти кучо коньы тэтча. Ма кызьы со уз синмаьскы мынам сьод чилясь гоно коньыелы. Озьы ик чошен писпуос вылти тэтчаса ветлизы, ветлизы но, коньые дорам оз берытскы ни.

Мон валасько сое, Венечка. Мон дорын весь уз улы ук, солы но семья кулэ. Нош коньые яратон пуйы вал ук. Соку тэтчазы, тэтчазы. Мон зуч вылэ пукси но коньые дорам лыктиз. Пельпум вылам тубиз. Мон синъёсме коньые пала берыкти но, толдиськод-а, Венечка, сыче шудо синъёсты мон ноку но ой адзылы на вал. Малдытись тылгизьыосын учкиз мон шоры коньые. Соку мон со ныраз чупай но мын, шуи. Со мыняз. Мыняз бамыныз бам бордам жиптиськиз, пичи киосыныз йырсиосме вешаз но кошкиз. Табере мон уг ветлиськы ни Алла Кузнецовалэн бульвартиз. Коньые медаз мозмы мынэсьтым, мед шудо улоз!

воскресенье, 7 декабря 2014 г.

Лыз ӝуась лампочка

Ульчаын лымы каллен бергаса усе но шобыртэ гольык музъемез. Толсур ини, ӝоген - Выль Ар, нош университет азьын чеберъятэм кыз но уг сылы на. Лыз тылын ӝуась лампочка гинэ матэктӥсь шулдыръяськон сярысь тодэ вайытэ.

Туннэ гинэ зол жобаны кутскиз. Лыз тыл юбо вылын ӝуатске-кысэ, ӝуатске-кысэ, ӝуатске-кысэ... Адямиос со возтӥ ортчыло, лымы со вылэ усе, нош со ӝуатске-кысэ, ӝуатске-кысэ.

- Мон Выль Ар городын каро! - шуэ туганэзлы ныл.
- Котьмар кар, акыльтӥд ни. Пегӟыны гинэ тыныд.
Пияшен ныл дыртыса азьлань кошкизы. Нош лыз тыл ӝуатске-кысэ, нош ӝуатске.

Ӝытлы куазь лымызэ трос уськытӥз, карлуд ӝожонэн тусьтылы пӧрмиз ни кадь: адямиос мача пыдкукъёсынызы (кытысь гинэ таӵе куазен дэри шедьто) тӧдьы лымыез месо но пурысь ӝуклы пӧрмыто. Кытысь ке потӥз утялтскись. Бадӟым лопаткаеныз ӝожонэз карлуд урдсы мычыны кутскиз. Лыз тылэн ӝуась юболэн выжыяз но сюриз. Табере уз кынмы ни, толалтэ быт мычем лымы мугорзэ кускозяз согоз ай. Нош лыз тыл озьы ик ӝуалоз.

ӝуалоз, Выль Ар вуоз но кысоз. Собере карлудэз утялтӥсь лампочкаез вожезлы воштоз. 

среда, 3 декабря 2014 г.

"Экты, тон, экты, чебер чиган ныл" II

***

"Экты, тон, экты, чебер чиган ныл" Медведева апайёслэн кырзанзы пелепонон пыр шуккиськиз Марголэн йыраз но син азяз Эсмиральда пуксиз, кызьы со Парижысь Гревской площадьын эктэ. Эктэ, но котыраз вань калыкъёсты люка. Со шоры учкыны лыктэм Клод Фролло, черкын ужась трос калык пыр уг адзы ни пичи, сюсьтыл кадь, веськрес эктись мугорзэ но берытскыса кезьыт собораз бертэ. Солэн одиг гинэ кышномуртэз кулэ луыны - Париж Богоматерьлэн соборез.

Жингыртись луиз, Марголэн йырысьтыз вань малпанъёс тэлязы. Городысь Тынгыли эшез вылэм:
-Ми гуртад вуим, али корка азяд сылиськом. Пот!
Марго паймыса мар карыны оз вала ни. Йыраз кышет керттиз но кыре потиз. Эшез пичи сузэръёсынызы вуэм.
- Ойдолэ, чай юом, - чырткемъяськиз Марго эшъёсыныз.
Жок вылаз турын чай, борыен йолын чечым пуктиз. Эшъёс пукизы вераськизы но борыяны мыныны малпазы.
Нюкъёс, гопъёс, пумтэм бучыос, шормуч-нюлэсъёс но боры зын... Вай вал татчы чиганъёсты - гуртэ. Кин тодэ, собере тыро-пыдоесьгес но луысалзы оло. Табере соосты уд  вошты ни: быдэс калыклэсь даурзэ йыринь-чукинь берыктоно луоз. Нош одиг адями быдэс калык азьын: яке торо, яке пыры. Но торо но, пыры но уз быгатэ воштыны бадзым корабльлэсь дауръёсын лёгем сюрессэ.
Марго Тынгылилэн сузэреныз Дыдыен одиг бамалысь боры бичаны чошен сюризы. Вераськоназы чиганъёс мерскиськизы.
- Мынам классам дышетске одиг чиганпи. Сое атаез жуге, кураськыса ветлыны косэ. Милям Румыниын трос кураськись чиганъёс, - шуэ Дыды.
- Соос котькытын сычеесь. Румыниын но, кытын соосты мер уг палэнты, Удмуртиын (Россилэсь нимаз улись государство) но, кытын калык соослэсь палэнске. Пушкинлэн поэмаяз коть чиганъёс мерлыкен ваче шуккемын овол. Соин соос вылиынгес кадь, чылкыт лулоесь.
- Мыным кельше Пушкинлэн со поэмаез, чиганъёс зырдыт ярато, ми, удмуртъёс, шыпытгес. 
Со дыре бамаллэн мукет палаз пастукысь скал кеськиз. Марго со пала учкиз но синъёсыныз ингожез вандыса йырзэ каллен вылие жутиз: инбамын кырныж берга. Марголэн йыраз чиган калык гуръёс шудыны кутскизы, но солэн лулыз чиган крезьгуръя дырекъяса вылие жутскиз. Табор кошке инбаме.  Вылтияськон сямзы соосты быдтиз - вылтияськон сямыз быдтэ Маргоез.



среда, 26 ноября 2014 г.

"Экты".. вал "экты, чебер чиган ныл"

"Чиганъёслэн улонзы шулдыр, яке соосты мер уг гажа шуыса, лулзэс ворпо нумыр сие?" - Марго малпаськыса автостанциысь потэ.

Ижкарысь шор автостанциысь весь чиганъёс ветло. Эшшо татын ик базар на, кызьы уз ветлэ. Татын соослы - рай, татын соос асьсэ куназы кадь уло: кылдыто асьсэлэсь катъёссэс, куноослэсь выт куро но экномиказэс возё. Ух, кычеесь!

Марго урам кузя тубе но синйылтэ: одигъёсыз уллёен куанер пияшез котыртиллям но мар ке солы верало, мукетъёсыз  ульча кузя чурак вузкарон палаткаоссэс пуктыллиллям, куинетиосыз юнме вераськыса сыло, нош ньылетиосыз нылпиоссэс мороженной сюдыса гань-гань поръяло.

" Кыче соос чебересь но юрзымесь," - йыраз бергатэ Марго.

Ижкарлэн шунды пуксён палаз, кытын сыло азьвыл криминалысь тороослэн бадзым коркаооссы, кытчы ветлэ 22-ти номеро автобус, уло чиганъёс. Марго огпол отчы жуг-жаг утялтыны ветлиз вал.  Ветлиз, чиганъёслы синмаськиз но, соослэсь юрдиз но. Котыртэм "гуртсылэн" шораз ик бадзым чебер горд кирпичлэсь лэсьтэм корка сылэ, нош котыраз - фанералэсь кокам лапасъёс, кытын изе огшоры чиганъёс. Ваньзы уло жуг-жаг полын. Мылзы потэ ке, сюрес вамен пото но, чашка полы куяло - отын но Байгурезь жужда жаг люкаськемын ни.

Марго соку кема сылиз учкыса чиганъёслэн "гуртсы" шоры. Отын улон позе: кышноос мар ке кесясько, пиос кокасько, нылпиос резь-куаж потто. Тани бадзым пу капка усьтиське но азбарысь пиналъёс пазьгиськыса пото. Каллен вуэ тодьы жигули но чиганпиос со жигулиез шумпотыса пумитало, кызьы кутъёс жуатэм лампочка котырти бергало, озьы ик соос но югыт машина борды кыстисько.

***
Марго пыриз психиатрлэн кабинетаз. Вуж совето зын соку ик ныре пыриз но быдэс мугортиз кезьыт луыса кошкиз. Болетлэн кыкна пал пумаз ог-огзылы пумит пуко кык эмчиос. Пуко гань-гань но кагаз вылэ маке гожъяло. Марго огез доры пуксиз. Сьораз ик пыриз кышномуртэн ныл.

Психиатръёс туж ярато юалляськны. Марго юанъёслы валэктон сётъян висказ крыж учкылыса пукиз ныл шоры - мукет со кыче ке.
-Коня тыныд арес?
- 11
- Кыче тынад национальностед? - юаз ныллэсь врач
- Чиган.
- Кытын улиськод?
-Нылпи юртын
- Кытын со нылпи юртэд, Магаданын-а, космосын-а, кытын?
- (ныл шугъяськиз вераны) Глаз ёросын шу, - сипыртэ чиганнылэн лыктэм кышномурт
- Нылпи юртэ сюрон азяд кинэн улид?
- Папаен но сузэрен.
- Кинлэн сузэреныз?
- Папалэн.
-Папаедлэн ке со сузэрез, иське тыныд со кин луэ?
- ...
- Апай.
- Со мынам сузэре, милям атаймы одиг.
-  Малы али ке но школае уд ветлиськы на!
- Документъёсы ой вал, Вордиськеме сярысь свидетельствое.
- Ма, конечно, анаед тонэ нюлэскын вордиз, дыр, но, кызьы тынад луоз документъёсыд. Лудкечъёс но гондыръёс документъёс уг лэсьтыло ук.






.

воскресенье, 23 ноября 2014 г.

Ж. - мон

Журналист вала аслэсьтыз ответственностьсэ.
Журналист сю пол эскере иворезлэсь шонерзэ.
Журналист трос пол янгыша, ээшо ке солэсн саклыкез ӧвӧл ке.
Журналист лэсьтэ янгыш, собере солэсь лулзэ сие ворпо нумыр.
Журналистлэн йырыз пӧрме, ку со уг вутты материалзэ дырыз-дыръя сдатьтыны.
Журналист - мон.

среда, 19 ноября 2014 г.

Кытчы берытскыны?

Италмас школаын берпуметӥ аръёссэ дышетски вал мон. Женя Корепанова, "Дартэ" куддыръя гожъяськылэ, шуэ, малы ӧд вера вал. Со но али отын дышетске.

мкш. 

Мыным со огшоры школа кадь потэ кытчы вуизы огшоры пиналъёс) Мынам гуртысь школае номырин пӧртэм ӧй вал) Просто со вал 9 классозь гинэ.

РШИ (озьы ми вискамы шуиськом школамес)-ын дышетскисьёс одӥг семья кадь ук, - шуэ Женя.
- Сектантъёс, вот мар называется воспитание РШИ, ФОРМИРОВАНИЕ ОБЩЕСТВЕННОГО МНЕНИЯ!

РШИ котькуд ар марзэ ке но воштэ дышетскон амалзэ, программаоссэ, нылпиосын ужанзэ... Котькуд ар отчы выль дышетӥсьёс вуо. Кужмо, трос тодӥсь дышетӥсьёс кошко, мкш соослы секыт выль формаен ужаны, соос традиционно малпасько ай, традиционно дышето. Нош со выль форма нокыӵе визь нылпиослы уг сёты. Кылсярысь, 45 минут пиналлы одӥг интыяз пукыны уг яра, пе, со быгатэ кутскыны но ортчоно темая одноклассникеныз вераськыны, нош дышетӥсь - куратор гинэ. Кытын отын образовательный процесс?

Али, куинь ар ортчыса, азьвыл школаелэсь номыриз ӧз кыльы ни, ымнырыз воштӥськиз, мон уг тодмаськы ни сое. Мыным некин доры отчы мыныны, медперсонал доры гинэ шат)

Нош табере Журналистикая факультет, кудзэ Удмурт кылосбуръя факультет борды ватсало. Кытчы лыктоз журналистикая факультетэз быдтэм бакалавр? Валантэм. Но марлы пӧрмоз со? Тодмало на меда, куинь ар ортчыса, мон солэсь ымнырзэ?









среда, 12 ноября 2014 г.

Удалтӥз

Мае мон шедьтӥ. Коскан йӧтӥз. Ваньмыз малпамын ни ук, ваньмыз.

Алан Е. Майер "Невезение" верос

Я проснулся от жестокой боли во всем теле. Я открыл глаза и увидел медсестру, стоящую у моей койки.
- Мистер Фуджима, - сказала она, - вам повезло, вам удалось выжить после бомбардировки Хиросимы два дня назад. Но теперь вы в госпитале, вам больше ничего не угрожает. 
Чуть живой от слабости, я спросил: 
- Где я? 
- В Нагасаки, - ответила она. 

Табере аслам пичи новеллае, кудзэ гожтӥ ни ӝыны ар талэсь азьло.

"Удалтӥз" новелла

Пугачёвоын боеприпасъёс пуштылэм бере, пинал офицер эмъяськонниын кылле. Сайказ.
- Кытын мон? - номырзэ но валатэк, вӧзаз сылӥсь ужасьлэсь юаз со.
- Ваньмыз умой. Тӥ шудо, сюлэмды мотор кадь ужа.
- Кытын мон? 
- Кизнерын.


Кеньыртэмъёс

Уг яратӥськы всякой улонлэсь бессмыленной проявлениоссэ. Пуко студентъёс уен-нуналэн контактын. Нош мар азьланяз? Лыдӟо всякой Подслушано в РРРР группаосты, гожто мар ке отчы. Собере малпало ни, дыр. Ооо, мон аслэсьтым малпанме гожтӥ, юнме та дунне вылын уг улӥськы. Сялӟем дыльды, только, асфальт вылын лёгаськыса быре, яке музъеме пыӵа. Солэсь номыр уг кыльы ни.

Сузэре тани Подслушано нырысетӥ огъяулонниысь шедьтэм. Тоже юнме дырзэ быдтыса пуке куддыр.

"удмуртский язык такой некрасивый, и акцент у удмуртов отвратительный. слушать реально противно, но к сожалению никуда не деться пока что. Вот и приходиться терпеть изо дня в день"

Ми малпам тае лыдӟыса: ну и кылзӥське, раз йырады кеньыръёсты уг тырмо. 

PR

Вераськиськом Петыреным "Удмурт дунне" газетлы подпискалэн лыдыз сярысь.
- Кӧня али подписка?
- Азьло вал 7000, али 5000. Подписка дуно сылэ.
- Кӧня?
-800 пала. ӝыны арлы.
- Трос-а мар-а со?!
- Зато марлы гинэ со уг яра. "Удмурт дунне" газет самой умой ӝуа, мунчо эстыны как раз. Туалетной бумагалы экономитьтозы. Мар эшшо гуртам соин каро на?
- Чугун улэ пуктыны луэ.
- Ыы. Шуэ калыклы, куштэм уксёды берен берытскод, окупичке ваньмыз.
- :D Cьӧд пиар.

Журналистика факультет быриз.

Мерзлякова но Байметов вискын ожгар быриз. Вормиз ректор. Табере ӧвӧл ни Журналистикая факультет, Табере ӧвӧл ни нимаз Удмурт филология факультет. Табере соос ӵош, кызьы вал 20 ар талэсь азьло. Мар меда пушказ Александр Григорьевич Шкляевлэн, кудӥз вань лулзэ поныса яна поттӥз вал ас дыръяз журналистикая факультетсэ.

Мыным потэ Удмурт филология факультет золгес. Удмуртэз вормоз, уг тодӥськы, мар луоз журналистикая факультетэн, "Дебютант" студиен, кытын будо вал вуоно телевизионщикъёс.

Жаль. Ваньмыз берытске. Но малы именно удмурт филология факультет борды милемыз ито? Соиз влантэм.

Катастрофа кыӵе ке но.

понедельник, 10 ноября 2014 г.

беженец

"Увинский коробейник" газетын, пе, гожтэмын, беженец ищет беженку для создания отношений шуыса.

Украинаысь контрактникъёсмы но старослужащийёс уг берытско ни, хотя Россиялы уг яра ожгаре пыриськыны. Нош украинецъёс ваньзы пегӟемын ни.

Нош соос борзоесь на. Уваын, пе, кышномурт-беженец улэ огъяулонниын но чагиськыса пуке. мукетъёсыз Россиез сьӧд синмын адӟо, дыр, но всё-равно татын уло.

Улэ, улэ. 

воскресенье, 9 ноября 2014 г.

)

Мыным потэ, мон туж занудо гожъяськыны кутскисько... Яке озьы ик вал азьло но.  

Мылысь-кыдысь

"Мылысь-кыдысь".

Зэм но сыӵе ик атмосфера но кылдытэ "Мылысь-кыдысь" клубысь азьмуртъёс. Сыӵе со вал мукет концерт - нуисьёс мукетэсь, мон мынэмын мукет адямиен, мон тодам вайисько пичи дырме.

Тодӥсько на, кызьы пичи дыръям шупмотыса телевизор пыр учкисько вал "Мылысь-кыдысь" концертэз. Отысь мон адӟисько вал удмурт кизилиосты, кудъёсыз мыным огдыре матын но (тани-тани кидэ телевизор экран борды лякод но, артистъёс борды йӧтӥськод), кыдёкын но кадь. Соос котьку кырӟало вал ретро подсветка улын но чилясь дэремъёсын. Али но син азям пуксе : Капи-кап капи...

Нош тани, 15 ар ортчыса, мон концерэз аслам синмыным адӟисько. Подсветка воштӥськемын ӧвӧл - сыӵе ик. Концерт арлыдоослыгес бере, кырӟанъёс но соослэн егит вакытъёсысьтызы. Вань егит кырӟасьёс но. Кылсярысь, потӥз Тимофей Григорьевых - Иван Григорьевыхлэн пиез. Таланто, оскисько. Но сцена вылэ, арлыдоос азе, дасяькыса потоно ук. Ато ке спектакль пуктӥз кадь: электрогитараен кияз - ачиз шудэ, мон тодэмъя, ӝыны арлэсь ятыргес гинэ ай, так сиоссэ кысказ, типа быгатӥсько шуыса, шнурез но кыскемын ӧй вал, кырӟаз, мон удмурт кылын вераськисько шуыса, ӟуч акцентэн, ымнырзэ тупатъяз, сюлмсьтыз кырӟасько шуыса ӟечок. Но кураез кельшиз - боз-боз, мусо.

Тематической ӝыт - пионеръёслы сӥземын. Ведущийёс кагаз вылысь лыдӟыса уг сыло, Соос тодо сценарйзэс, верасько калыкен огшоры. Сыӵе мылысь-кыдысь.

Концерт ьере Маша Золотареваез Мирела Мазурен адӟи. Соослы но кельшем.

Но мынам кырӟанъёс ласянь мукетгес вкусъёсы. Петыре ни сыӵе - консервативной туж.  

Шунды Кизнерын

Кизнере вуылэме ӧй вал на. Шутэтскон нуналъёсы вуылыны кылдӥз. Пиналъёсын тодматским. Мастер-классъёс, позыръяськонъёс да марда.

Туж потэ вал кылем кыкети нуналаз, ку милемыз Короленколэн музеяз нуллысалзы, Кизнерез возьмасалзы. Но кулэ вал Ижкаре бертыны.

Сыӵе парадокс пӧрме. Куке но Кизнер палан, али со нимаське Короленко гурт, улӥз-вылӥз Владимир Короленко но вань сюлэмзэ "Мултан уж"-лы сётӥз. Озьыен, отын удмуртъёс асьсэ лулчеберетэнызы но калыкенызы данъяськыны кулэ кадь. Соослы Короленко - бадӟым пример луэ. Короленко - ӟуч адями, кудӥз утьыны выриз удмурт калыкез. Нош пиналъёс, дышетӥсьёс но, ӟучомемын ни. Кызьы шуиз Вера Григорьевна, школаын нылпиослэн удмурт кылын вераськыны мылкыдзы вань ке но, дыр, но милям дышетӥсьёсмы дасямын ӧвӧл - соостросэз удмурт кылын вераськыны дасесь ӧвл, малыке шуоно уг тодо сое.

Мастер-класс ортчытыкум, юасько, кин удмурт кылын вераське? Нокин. Шуизы, куд-ог кылъёссэ гинэ валаськом. Соин ик мастер-классэз лучше ӟуч кылын нуыны. Кыӵе жади кадь соку ӟуч кыллэсь. Нылпиос лсянь но учкид ке... Нырысетӥ группа гомӟиз но быдэс занятие, чебер тылпу кадь, ӝуаз. Гожъязы мар ке, мылысь-кыдысь ужазы. Одӥг нылашлы туж синмаськи - Лена нимыз. Визьмо но тодон-валанъёс басьтыны кыстӥське. Со эшшо, пе, кырӟанъёс гожъясько на, крезьгур ачиз, пе, йыраз вуэ. Тулкым кадь, палькке.

Нылпиосын ортчытӥм пресс-конференция. Лена - куномы вал. Туж тунсыко конференция пӧрмиз.

Кыкетӥ группалы номыр но кулэ ӧй вал кадь. Малпаськемзы но ӧз поты.

Дискотекаын но удмурт трекъёсты лэзьяку, нырысь дышыны выризы. Виталий Белков адямиосты вырӟытыны выриз, аяиз тэтчаз, тэтчаз но мукетъёсыз но кутскизы кадь. Мусо пияш, милемыз пумитакузы, со арганэн шудӥзы, нош пиналъёс кырӟазы пумитан гур.

Кӧня пӧртэм интыос удмурт шаерын - кытын ке дась аудитория, кудӥныз туж капчи ужаны. Нош кытын ке ӟучомем нылпиос, кудъёсызлы асьсэ "эгозы" сяна номыр кулэ ӧвӧл. Таосынызы ужаны быгатыны кулэ.

Шунды, шунды!

четверг, 6 ноября 2014 г.

Дунне

Быдэс дуннеын ӧвӧл кадь номыр. Яке, шуом, быдэс дунне - со адямиослэн ас дуннеоссынызы кылдытэм дунне. Мар адӟисько - со мынам дуннеям вань, нош мае уг шӧдӥськы - со ӧвӧл.

Мыным дунне, сылэ-а, уг-а мон азьын гурезь. Яке мон сое уг адӟиськы, яке мон понна со гурезь ӧвӧл. Яратӥсько гурезьёсты. Жадьто соос монэ, шуд кузьмало.

"Удмурт дунне" - та кылын улонлэн вань смыслъёсыз.

Быдэс дунне кырым пыдэс вылам. 

среда, 22 октября 2014 г.

Тонэ музъем кыске

Туннэ та кезьыт, шӧдтэк шорысь вуэм, тол нунуалэ мынам потӥз гуртэ бертэм. Пуксьыны небыт диван вылам, ганяк луыны шуныт коркам но огшоры керттӥськыса пукеме. Кин ке телевизор учке, кин ке кухняын ыжиське, нош мон укисько ас малпанъёсам но киужен вырисько - номыр кулэ ӧвӧл ни.

Кезьыт. Уг яратӥськы толалтэез. Мугортӥм вир уг ни кадь кошкы, пыдъёсы кезьытэсь ветло, ыжгон носки но уг юртты. Солы туннэ Петыре шуиз: "Тонэ музъем бордаз кыске".

Тазьы малпаськи но валай, кулэм бере уг поты музъемын кыллеме. Толалтэ - кезьыт, йӧ, тулыс но сӥзьыл - кот, дэри, ву, гужем - кӧс сюй. Уг поты одӥг пичи но. Малпасько, мынам лулы лобалоз кытӥ ке но та дуннетӥ но жаляса учкоз мугорыз шоры, кудӥз (я дэри,  я кот, я йӧ) музъемын кылле но сисьме. Конечно, лулылы луоз неприятно.

Соин ик кутоно но сутоно со укылтэм мугорез, сутоно но пеньзэ тӧлъя лэзёно, эшшо тӧлъя лэзёно сое гужем, шундыё но ыркыт тӧло куазь дыръя. Ух, соку лулы шумпотоз, нош мугорылэн пырыосыз инкуазьлэн луллюкетъёсыз луозы.


понедельник, 20 октября 2014 г.

Нерад

Котькытын бюрократия. Со уголовной ужъёсын но. Йыружез сэрттон-перттчон интые, куанер следовательёс сомында дырзэс быдто бумага гожъян понна, свидетельёсты сю миллион пол одӥгез сярысь юан понна.

Сюри вал одӥг серемес (мон  понна) учыре. Свидетель луи. Йыружчиез но, следовательёсты но жаляса быри. Сойзэ шузи но тыро-пыдо луымтэез понна, нош таоссэ сомында бумагаос гожъян понна.

Мон соослы аслэсьтым показаниосме ожытсэ 7 пол верай кадь - ачим акыльтӥ. Нош кыӵе жади морально. Та учыр мон пушкысь вань кужымме сюпсиз, лулме, кот дӥськутэз кадь, позыртӥз.

Чаклаське, эн сюрылэ олокытчы но. Асьтэос ик нерад луоды.

Выль куара

Да, эшшо. Лушалэн  #идеальныевыходные хэштэг пуштросаз "Выль куара" шоу-проект вал на.

Татчы но вуылӥ. Кыӵе пӧртэмесь соос- кырӟасьёс. Быдэс улосэ шуккиськем Быгы гуртлэн нимыз та концертын но чузъяськись. Ксюша Кузьмина туж эмоционально кырӟаз калык кырӟанэз - бызись ныллэсь бӧрдон гурзэ. Мон синмаськи, но вань сценалэн катъёсыз. Кызьы шуиз тодмое, мынам солэсь мугорзэ шонертэм потэ вал, со весь губырскыса кырӟаз. Но монъя, со озьы вань сюлэмзэ понса кисьтӥз кылъёсты - мынам сое уг поты вал шонертэм. Мон шумпотӥ, со тросэзлы учкисьёслы кельшиз но Дартлы ӝыны арлы подписка солэн кияз вуиз шуыса. Мед лыдӟиськоз)

Тӥни. Котькуд концертын удмурт адями маскаръяське, концерт аслыз ачиз лэсьтэ. Малы кулэ адямилы люкетыны. Со видите ли кырӟа, тулкымъяське, нош отын кин ке но сяськаен сцена вылын эктыны кутске. Яке сцена дурын вань кужмысьтыз тапыртыны) Уг валаськы, урод-а со, умой-а. Но ку зал шорысь церемонно, вань кукъёс вылтӥ ортчыса (кызьы Евгений Онегин), учкись потэ кесяськыса эктыны. "Выль куара" шоу-пректын, малпасько, артистъёсты дунъяны кулэ вал, а не кырӟан улын эктыны.

Уг тодскы.

Эшшо. Малы концертэз нуисьёс сценарийзэс огпол но пумозяз лыдӟытэк, пото сцена вылэ. Озьы ик учкисьлэн вань лобась мылкыдыз куашка. Секыт-а мар-а сценариз огпол коть лыдӟыса потыны. Озьы ик "10 гужем нунал" группа "10 гужемлы" пӧрме. Гажалэ учкисьёсты, собере тӥледыз но гажалозы.

Нош конкурсанъёс вал пӧртэмесь - ваньзы яратоно кадесь. Таӵе проектъёс соос понна кулэ радъяны, мкш соослы кулэ дышыны сцена вылны асьсэзыс возьыны, куаразэс пуктыны да марда. Малпасько, соос асьсэлы басьтӥзы бадӟым пайда.

Тау, "Шулдыр ӝытлы". Но ужазы стилистъёсты кутэ на вал.






"Эктон корка" но Палэзян

Мон ӧй ветлы Палэзянэ, кудӥзлэн уровенез шуизы резко усиз, мкш концертын чисто эстрада вал, нош пӧртэм калык кырӟан-эктонъёс тю-тю. Мон ӧй ветлы Элькуноведение, кудӥз мынэ вал со вакытэ, ку мон Аксионэ мукет концертлы билет бсьтыны ветлӥ но адӟи Гонинэз, кудӥз мынэсьтым юаз: "Вань на-а билетъёс?" Уг тодӥськы. Умой так ке, арысь аре одӥг концертъёс мыно шуыса, регулярноесь луо. Но мынам отчы мынэм ӧз поты ни - кӧт тыриз.

Мынам кӧты сюма калык творчествоен йырин гинэ. Соин ик ноку но уг кельты "Эктон коркаез". Таязэ мон отысь адӟи Эстониысь сету ансамблез. Соослэн гуртсы фин-угор дуннелэн кыкетӥ шоркарез луиз. Зэм ке, туж зол адӟем потэ вал мынам соосты. Туж эмоциональноесь но вань сюлмысьтызы но быдэс мугорынызы кырӟало (озьы вань мугорынызы кырӟало). Синмаськи соослы. Одӥгезлэн гадь вылаз, уксётӥлыкез чилясь тусьтылэсь лэсьтэмын вал. Могдос йӧскалык уксётӥрлыксы, мукет, асьмелэн кадь ӧвӧл. Малы меда именно "тусьты"?

.

Сыӵе мусо сетуос. Соос ӧз кыле "Палэзян" гала-концертэ. Соос кошкиллям Быгы гуртэ фин-угор шоркарлэсь синпелетсэ киязы кутыны. Нош кыче усто кырӟазы вал "Эктон коркан" ...

Озьы ик болгаръёс лыктэмын вал на. Сыӵе чебересь пиос-нылъёс, туж чебересь. Нош кыӵе эктӥзы. Пол ДДН-ын гылыт, эктӥсьёслэн ботинкаоссы гылӟо, нош соос сёравно экто. Синмаськыса учки: котьку пальпото, эмоционально экто, адямилы энергия кузьмало кадь ("Айкай"-лэсь но мон сыӵе ик, но сю поллы золгес, энергетиказэс шӧдӥсько). Таосыз но гала-концертэ кылиллямтэ, бертӥллям. Мар та, мар та? "Палэзянэ" нырысетӥзэ ветлэмме тодам вайисько... Тодам вайисько но бордӥсько... (туж сентиментальной нота честно ке). Кытчы пыризы калык кырӟанъёс но эктонъёс, малы кылос "Палэзянэз" огшоры эстрада концертлы пӧрмытӥзы. Адямиос билет тодыса басьто ук, калык творчествоез адӟозы шуыса.

Кемалась эктэм вал ни. "Эктон корка" - сыӵе утопичной эктон-позыръяськонъёс утопичной удмурт дуннеын. Но соос вань ук - соос зэмос. Соин ик сюлэм шумпотэ. Но та эктонъёсы, маиз куд-ог адямиослы паймымонэз луэ, трос егиъёс лыкто. Вот малы шуисько утопично зэмос.

Туж яратӥсько ветлыны татчы - калык эконъёсты эктыны. Таязэ ветлыкум, тани выль эктон тодӥ. Поръёс колоннаен огогзылы пумит султо, нош пиос пумит сылӥсь ныл азьын нырысь усто эктыны быгатэмзэ возьмато, нош собере чорто эктыны. Сыӵе усто. Удмуртъёслэн апай эктон вӧлмемынгес кадь, ку нылаш пиос азьын экто.

Эшшо паймисько на поръёслэн дэремъёссылы. Соос туж тузӥесь, чилясесь но гольтресэсь шуысал мон. Дэремзылэн сӧзулыз котырак пужъятэмын, вылаз айшетсы но чебермамын на. Сомында чидан но дыр кулэ сое пужъятыса пукыны. Ми айшетмес пужъятӥськом ке, ушъяськыса ветлӥськом ни но. Нош туала нылъёслэн сое но пужъятэмзы уг поты ни - басьтэм аппликация ляко яке чильтэр вуро но тӥни.

Кельшиз. Ярам концертэ ӧй ветлы.




понедельник, 13 октября 2014 г.

Ижкаре.

Туннэ нош ик люкаськылӥм Арт-экспедициен. Ми доры ПФО-гъя таӵе проектъёсын валтӥсь адями лыктӥз. Мон солы Ижкарлэн исторической но территориальной центртӥз нуллӥ. Сыӵе визьмо (философи наукосъя кандидат) но со дыре ик туж огшоры кышномурт. Валаськоды-а, солэн потӥз лыктэмез ми доры, вераськемез милемын.

Зэм ке, мон туж яратӥсько Ижкарез - со мынам пичи дыръёсысеным ик вире пыӵам кар кадь, мон сое вань сюлмысьтым яратӥсько но гажасько. Со ӧвӧл удмурт кар, со промышленностен кар. Нош солэн  культурной пластэз али гинэ азинскыны кутске ай, но солэн кутсконаз ми - егитъёс. Чалякгес валам ке, Ижкармы сярысь вань мар вераын шуыса, тросгес культурной арбериосты но тунсыко историосты утьыса вуттом. Я коть Генеральский дом музейлы пӧрмытэмын ни. Я коть музейный квартал (оскисько туж) кылдоз ни.

Тазьы учкид ке, кӧня Ижкарын заводъёс. Ма соос шоры учкид ке (танк, пыӵал поттон, машина, мото, радиодетальёс лэсьтон заводъёс), асьме шорплошадьысь кузь тубатлэн вань лёгетъёсыз зарниямын луыны кулэ вал ни. Нош кытын со зарни? Луысалмы ке ми Татарсан, нош ми Удсмуртия. Нош соин данъяськыны кулэ. Кызьы шуиз Елена Викторовна, философи наукаосъя кандидат. Лучше гордой луыны (со удмуртъёс сярысь озьы), чем кураськись но кисые пырись (татаръёс сярысь). Но котькуд йӧскалык чебер ас понназ, соин ик ум снтэмалэ соосты юнме.

Со кышномурт ачиз вордӥськемын Нижний Новгородын. Соин лэся черкъёсты туспуктылыса ветлӥз. Эшшо, тайзэ мон ачим ӧй вала малы, асфальт вылысь гожъямъёсты (Учебники у "Пирожковой") но Горький паркысь замок ошылон корт писпуэз. МММ?

Туннэ куазь удалтӥз. Кызьы вераз мыным телефонэ: 8 градус, дымок. Бус быдэс Иж тымет вылын вӧлдӥсьемын вал. Сопал ярдурыз ик ӧз адӟиськы. Сыӵе чебер суред: бус пыр заводлэн турбаосыз вылӥе ӝутӥсько, Дуннеысь самой бадӟым прудмылэн пумыз уг адскы, Усто!

Синмаськисько. Кызьы кошкод та карысь? Ми ӧм азинтэ ке сое, кин азинтоз? Мускоын улӥсьёс ӝокало ни асьсэ каразы. нош кызьы ӝокалод Ижкарлэн вӧл-вӧл ульчаосаз. Хотя татын трос мукет аспектъёсыз.

четверг, 9 октября 2014 г.

Кытын?Ку?Мар?

Кытын?Ку?Мар?

"Шунды" огазеяськон таӵе шудон радъяз. Ми но отчы пыриським, Арт-экспедиция. Тросэз оскизы вал милемлы, ми но кадь оским вал асьмелы. Но... Ничё, зато скоро Богданлэн сборникез потоз, солы коть юрттӥм. (мон ставкаос сярысь верасько). Зэм ке, ми вормысалмы. ӧм луысалмы ке, тормозъёс, яке ӧм утчасалмы ке капчи юанысь подвохсэ. Нош собере ӧм луысалмы ке тырттыгаос, яке вить секунд коть малпаськысалмы ке. Но милям командаын визьмо адямиос вал, мон малпасько. Просто милемлы не повезло кӧня ке. Озьы, котькӧня оправдание утча ни.

Куд-ог юанъёс вал неоднозначноесь. Кылсярысь, со лампочкаен юан. Кызьы, пе, кышнолэн картэз валаз, со тайный комнатае пыраз шуыса. Валэктонэз: али кысэм лампочкаысь шуныт, пе, мынэ на вал. Но кызьы со сое валалоз, если ӝуатэм лампочкалы дыр трос кулэ ӧвӧл, со чаляк ӟырда но шунытсэ пазьгыны кутске ни, при том лампочка ӝужытын, потолок улын. Ми малпаськом, милям сётэм валэктонмы но отчасти шонер вал шуыса. Тузон пурӟемъя но тузонын чиньыос кылемъя, карт валаз, кышноез тайный комнатае пыраз шуыса.

Асьсэос юанъёс малпаллясалзы ке, шудӥсьёслы но капчигеслуысал. Малыке шуоно ми йырамы юанэз удмурт кылысь удмурт кылэ берыктыса пуким на. Юанъёс ӟуч кылысь валантэм берыктэмын вал. Со видеоюанъёсын но ӵошатыса, озьы шуыны луэ. Малыке но видеоюанъёс капчиен милемын воспринимались, может соос огшоры удмурт кылын верамын вал но юан шараян азьын йырвизь пыр поттэмын вал? Яке ми шонер удмурт кылэз секытэн валаськом ни, пересьмиськом, кыллэн воштӥськемез сьӧры ум вуттӥське уиськыса.

А так ке туж умой вал. Тау "Шунды"-ослы. Йырвийым вылысь тузон кӧня ке пурӟиз кадь.


Мультмалпанъёс

Толон бертӥськом эшеным Стёпа Коньковен дышетскемысь. Одӥг параын " Варвара краса, длинная коса" выжыкыл сярысь вераськон кутскиз вал. Мукет нуналаз, тани ӵапак али бертыкумы, Стёпа мыным шуэ, учки мон со выжыкылэз. Вообще, пе, али совето вакытэ лэсьтэм выжыкылъёсты учкылыны кутски, туж кельшо.

Зэм но, сыӵе тунсыко но паймымон выжыкылъёс лэсьтыло вал Совето вакытэ. Мон пичи дыръям паймыса пукисько вал, кызьы Баба-Яга лоба, салазкиос ас понназы ӵошкыт интытӥ гылӟо, нош адямиос олокинъёслы но пӧрмо. Кызьы? Паймисько ке но, уг малпаськиськы вал со технической моментъёс сярысь. Сыӵе гармония кылдыто вал мон понна со выжыкылъёс.

Али малпаськисько но, валасько, нылпиослы сыӵе выжыкылъёсын пичи дырысенызы ик кыӵе ке идеология, вылӥ ценностъёсты пыӵато вал шуыса. Нылпи сое валатэк но, выжыкылъёсты учкыса, вала вал ни, мар урод, нош мар умой.

Табере юнме йырам лыктӥзы мультикъёс. Кылсярысь, "Ёжик в тумане". Солэсь мур пуштроссэ куд-ог бадӟым адямиос но уз валалэ, нош мультикез учко вал нылпиос. Нылпиосты гажало вал, пыӵато вал соослы визь но шузиен ноку но уг лыдъяло вал. Озьы пинал учке "Ёжик в тумане" но на подсознательном уровне солэн визьмаз мар ке пыӵа, бадӟым будыса, со та мультфильмез учкиз ке, солэн тодаз лыктоз, нош мон таӵе вывод лэсьтӥ вал ни ук шуыса. Соку киноос но литературной произведениос но кылдылӥзы, кытысь адӟыны луэ, макем визьмоесь советский нылпиос. ("Приключения электроников", кылсярысь). Кстати, "Приключения электрониковез" американской "Дети шпионов" киноен но  чошатыны луэ.

Табере американской мультфильмъёс сярысь. Малы ке но мынам йырам соку ик лыктӥз Телепузикъёс сярысь телепрограмма. Уд ӵошаты "Ёжик в тумане" но мукет совето вакытысь мультикъёсын. Тем более Телепузикъёс лэсьтэмын вылэм умственно отсталой нылпиослы. Мукет мультфильмъёссы но соослэн кыӵе ке но фееричноесь, но бессодержательноесь. Тӥни сыӵе мон патриот. Но татын мон вань мультфильмъёс сярысь озьы вераны уг быгатӥськы. Вань устоосыз но. Всё-таки уг яра ук точно шуыны, асьме кунын визьмо адямиос, нош Америкаын визьтэмъёс шуыса. Ну так, валады, дыр иронияме. 

среда, 8 октября 2014 г.

Короленко...

Вот люказы вань мерлыко ужъёсъя гожъяськись журналистъёсты, блогеръёсты, возьматӥзы соослы Короленко ӟуч драмтеатрлэсь али состоянизэ но оскытӥзы, та юртэз тупатыны-выльдыны уз луы шуыса. Но пумиськон кутсокнын ик шуизы, ми номыр вераны ум быгатӥське, мар луоз азьланяз та зданиен. Но та юанлы валэктон, малпасько, котькин тодэ ни.

Ижкарын Ӟуч Драмтеатрез  (1961-тӥ арын солы сётэмын вал Короленколэн нимыз)  куинь ар талэсь азьло выль здание выжтӥзы но Короленколэсь нимзэ бордысьтыз куштӥзы. Табере солэн вуж зданиез куашка но каллен сисьме. Ми али отчы вуылӥм но туж трос чебер выжыкылъёс кылӥм.

Та театр (сылэ Карла Маркса ульчаын, прак центрын) ӝутэмын 1946-тӥ арын. Ӵошатыса верад ке, Удмурт драмтеатр 1931-тӥ арын усьтӥськиз. Удмуртсэ, тау, келтыны туртто, алигес лэсьтӥзы капитальной ремонт, табере отын ваньмыз пиштэ. Нош Ӟуч драмтеатрлэсь юртсэ, кызьы мон валасько, уз ни тупатэ. Малы?

Нырысетӥез, юрт куашкан калэ вуэмын. Мумы корез, пе, пырдэ ни, нош гулбечын вить сантиметръем ву пуке, нокытчы уг кошкы, нош липет пыр зор ву вия.

Кыкетӥез, та юртлэн нокыӵе архитектурной дунлыкез ӧвӧл. Удмурт драмтеатр, пе, со чылкыт сталинский конструктивизм, нош ӟуч драмтеатр суро-пожо стилен ӝутэмын. Ми, архитектураез валасьтэм адямиос, озьы ик оском ни соослы. Просто, пе, ижкарчиос дышизы ни со юртлы, соин ик малпало, со чебер шуыса. (озьы ӧвӧл-а мар-а?)

Куинетӥез, юртэз тупатон-выльдон туж дуно усёз. Со интые выль юрт ӝутыны дунтэмгес луоз, пе. Таиз валамон, к чему. Юасько, нош Удмурт театрез тупатӥзы ук, при том со таизлэсь трослы вазьгес ужаны кутскиз,озьыен трос поллы начаргес вал, нош малы тайзэ но уд тупаты. Нош мыным берен вазё, нырысь агрессивно, тӥ тодӥды-а, кӧня уксё отчы куштӥзы?! Собере буйгасагес, яра, дыр, но...(вератэк но валамон ини).

Ньылетӥез, ӧвӧл ужпум, кудзэ азьланяз быдэстысалыз та юрт. Сётӥд ке татчы пӧртэм клубъёслы (по интересам) инты, кыӵе пайда ваёзы соос Элькунлы. Усьтӥд ке, вузкарон центр - таиз устогес ини юан, перспективнойгес. 2012-тӥ арын, ку ворсазы зданиез, вераллязы вал, татчы эмъюрт усьтозы шуыса. Нош али кылӥ, юрт интые автовокзал но лэсьтыны одъяло вал шуыса. Остэ, Иньмаре, малпай ас поннам.

Эшшо монэ туж висьытэ Короленколэн бюстэз. Кытын со, кытчы сое? Али, пе, со, куанер, кылле кытын ке. Ӟуч драмтеатрлэн выль юртэз азьын сое интыяны неуместно ни, пе, малыке шуоно театр Короленколэсь нимзэ уг нуллы ни. Табеер со огшоры ӟуч драмтеатр. Вань, пе, таӵе малпанъёс: Короленколэсь бюстсэ Гогольлэн бульвараз пуктыны, собере азьланяз кылдытыны гожъяськисьёслэсь скульптурной галерея, яке мукет тупась шутэтскон интые Короленкоез пуктыны. Но татын вань смыслъёс ышо-быро.

Кин со удмуртёс понна - Короленко. Со кӧшкемыт Мултан ужын удмуртъёсты утиз. Удмурт шаермылы солэн фигураез туж значимой но дуно луыны кулэ. Нош со галереяенызы Ижкарлэн администрациез сое огшоры писательёс радэ пукто, ултӥяло, но гожъяськисьлэсь Удмурт шаерен кусыпъёссэ тӥяло. Тӥни кытчы политика кошке. Нош эскеры гинэ, пукты ай Путинэз Соловьёв радэ (Соос кыкназы но Йыръёс). Мар луоз? Дунне быроз.

Кӧшкемыт. Кулэ ӧвӧл кивалтӥсьёслы культурной центръёс, лыдэ уг басьто соос огшоры адямиослэсь куронъёссэс но малпанъёссэс. Соослы кулэ вузкаронниос, кудъёсыз ваёзы уксё.
"Уксё, уксё гинэ, уксё".

Нош Короленко?

ӟеч лу, ГАЖАНО КОРОЛЕНКО. Ми тонэ ум вунэтэ.

Туспуктэмъёс. Без комментариев.













вторник, 7 октября 2014 г.

Сӥзьыл состояниос

Тодскоды-а мар сюлэмез вӧсь каре. Эшшо ке на али, сӥзьыл, ку кырын кезьыт, пурысь, кот но секыт. 

Шуо, 30 аресъем пиос, по статистике, ӵемгес асьсэзыс быдто. Соослэн кутске кризис среднего возраста, вылаз малпанъёс югдурез узато на (кылсярысь, ӧвӧл семья, корка, тырмыт уксё сётӥсь уж, ке семьяын кусыпъёс тэргало... со выллем). ... Ожытсэ одӥгзэ сыӵезэ тодӥсько. Семьяез сярысь чик сюлмаськытэк, П. улонысь кошкиз.

Куд-ог дыръя пытсэт сьӧры но шӧдтэк шорысь сюро. Адямилэн ӟеч уж лэсьтэмез потэ, но со ӟеч уж аслыз уродэн берытске. Ожытсэ одӥгзэ сыӵезэ тодӥсько. В. юнме пытсэт сьӧрын пуке, нош егит дырыз ныр ултӥз кошке. П. В.-лэн эшез.


В.: Мон пукисько. Нош воляын матысь адямиосы улонысь кошко. Мон соосты ноку но уг адӟы ни.

- Кӧня гинэ пукисько ай, нош мыным потэ -10 ар ортчиз ни.

Таӵе сӥзьыл пытсэт сьӧрын сю поллы пурысьгес, кезьытгес но страньгес луэ, дыр.

понедельник, 6 октября 2014 г.

Элькун... Область

Удмурт Элькун вроде как. Но сыӵе парадокс: удмурт кыл Элькунамы ӧвӧл, пе, эшшо нош Йӧскалык политикая министерствоез быдтыны туртто. Быдтозы но, в недалёком будущем. Одӥг палысен, мар со министерство лэсьтэ? Пичиен-пичиен солэсь ужзэ мукет министерствоос быдэсъяло. Кылсярысь, ужрадъёс - минкультуры, удмурт  кылэз школаосын дышетон - минобразования... Нош отын котькуд вань йӧскалык буёлэз.

Тазьы учкиськод ке, каллен-каллен Элькун  куашка ни. Луоз кыӵе ке но Россиысь мукет улосвылъёс пӧлы ышем Удмуртская область. Одӥг пичи но  сыӵе сюрес Трокай Борисовлэн уг поты вал сӥземез Удмурт музъемлы. Со, кин удмурт музъеммылы автономия сётӥз, гробаз сю пол берыскиз, дыр, ни.

Соловьёв, пе, чылкыт удмурт, шуэ мыным одӥгез эше. Маро, шуэ, Удмурт Элькунлы Удмурт Азьмурт кулэ. Сое ик бырйи. Кыӵе, малпасько ас поннам, калыклэсь йырзэс то берыктӥллям ни. Инаугурациын мырдэм-мырдэм со Удмурт Азьмуртмы удмурт кылын присяга сётӥз но. 

Ммм..

Уло кык бускель гуртъёс. Одӥгез малпа, вот со гуртын сыӵе тыршисьёс уло, уг юо, ужало весь. Йыдызы одӥг гектарысь 40 центнер поттӥзы. Нош милям - кырым пыдэс. Юо, колхозын уксё ӧз тыре ке, уз но ужалэ ни. Бускель гуртамы ӟечокъёс ик ини уло. Нош кыкетӥез гурт малпа: отын но юо, ми дорын но юо, ваньмы одӥг кадь улӥськом.

Нырысетӥяз туала экономической системаен висись адямиос уло, нош кыкетӥ гуртын куммнизм улэ на, СССР-ын вордскем калыклэн вирсэръёстӥз Сталинлэн идеологической вирыз кошке. Нош СССР куашкам бере, та гуртысь калыклэн вань льӧльмалпанъёссы, азьланезлы осконзы куашказ но соос кутскизы бутылка борды - куддыръя озьы но потэ ни мыным.  Юо, соин йырин соослэсь вань зарплатазэс кушто. Нош соос всё-равно ужало. Ужало но юо. Толыкез то ужамзылэсь луэ. Ниче, мар ке но та дунне вылын дауртоно ук.

Тросэз гуртъёс йыг-йыг пыд вылысьтызы усемын ни, малыке шуоно, азьвыл ваытъёсы кадь, колхозъёс уг пушъё ни, гурт удыс уг азинскы, элькунлы со кулэ ӧвӧл. Особенно характерно таӵе югдур шаермылэн уйпалаз. Кӧня гуртъёс быремын, быро но бырозы на. Тросэз, майбыр но умой улон утчаса, Ижкаре пегӟо, лымшор пала вуо. Уйпалъёс котьку малпаллязы, лымшоръёс узыргес уло шуыса. Озьы ик вань, дыр, со. Тапалан, угось, ю нянь но умойгес удалтэ вал.

Туннэ параын одӥг нылаш (Воткакарын со улэ) шуэ, Шаркан пала губияны ветлӥм. Отын, пе, туж чебер нюлэсъёс но узыр гуртъёс. Вотка ёросысь гуртъёсын ӵошатыса, Шаркан палан, пе, туж майбыр улэ. Нош малы,пе, озьы? Кызьы шуэ мынам песянае, Шаркан ёросын, пе, удмуртъёс уло.

Вот кызьы, удмуртъёс шаерамы ӟучъёслэсь узыргес уло. Воткакарын улӥсь нылаш сыӵе вывод лэсьтӥз.

Мм...


четверг, 2 октября 2014 г.

.

ӧвӧл пинал удмурт гожъяськисьёс? 

Усьтӥ туннэ "Кенеш" журналлэсь выль номерз. Отын регулярно печатлаське Елена Фёдорова. Арзамазов, синйылты вал сое. Эшшо одӥг выль автор туала удмурт литературалэн шыкысаз. Туж капчиен лыдӟиське Алнаш ёросысь Туймыйыл гуртысь нылкышно, со эшшо туж усто публицист на. Гожъяське удмурт кыллэн вань катъёсызъя, шонер но "кенеш"-о. 

среда, 1 октября 2014 г.

Фотосет

Туннэ ветлӥ Полина Кубисталэн студияз. ӵуазе кстати солэн студиезлэн открытиез луоз. Сыӵе отын шуныт, куанык, нокыӵе энергия но уг кошкы, наоборот, отын ваньмыз - котькуд адями, котькуд арбери, омыр но - тыныд капчи мылкыд сёто, кужым пыӵато.

Фотосессия вал. Мон, пе, модали вал ук. Дарали Лелилы тау. Зэм но, азьвыл мон сое ӧй но валалля вал, дыр. Но туннэ валай: "Маdemoaselle Oudmourte" модая агентство мынэсьтым камералэсь кышканме но возьдаськемме быдтӥз. Дарали Лели, тау!

Но татын (камера азьын астэ раскованно возён) мукет факторъёс но вал. Кылсярысь, мыным вал туж умой: Полина Кубисталэн дӥськутаз мыным туж комфортно вал, макияж мыным туж усто лэсьтӥзы (мон шедьтӥ сое), йырсиме но, паймоно кадь, ымнырыя, туж усто тупатӥзы. Соин ик мынам мылкыды эшшо но вылӥе ӝутскемын вал. Со командаен ужан зэм но трос зигардэ тынэсьтыд уг басьты, уж вӧй вылтӥ кадь мынэ. Нош Полиналэн вань аслаз командаез. Котькудӥз соос полысь ог-огзэс валаса ужало. ӟечокъёс прак.

Котькуд адямилэн аслаз визажистэз но парикмахерез кулэ луыны, кудъёсыз тонэн одӥг тулкым вылын ужало. Соку тыныд но кельшоз, соослэн но мылкыдзы умой луоз. Мыным туж яразы визажист Татьяна Рябова, йырсиез пуктӥсь Вика Фролова. Соос туж устоесь. Самой-Самоесь. Честно.

Фотосет кутскон азьын, Полина монэ настроитьтыны выриз, гань-гань кариськы, эн кышка шуыса. Со быгатэ. Мон копак синмаськыса кошки соос дорысь, солэн студиысьтыз.

Одно ик мыно ӵуказе дэремзэ басьтыны, кемалась ӧдъясько вал ни. Фотосет асьтэлы каремды потэ ке, дэмласько, мынэ Гриша Степанов доры, тиледлы образ но лэсьтозы, чебер туспуктэмъёс но, капчи мылкыд но кузьмалозы. Тӥни сыӵе пичияк явной реклама.





четверг, 25 сентября 2014 г.

#zemos_udmurt_veme

Туннэ "Грифон" арт-центрын удмурт мультфильм лэсьтонлы уксё бичанъя концерт ортчиз. Бичаллям 12 сюрслэсь ятыр. Калыкез паймымон трос люкаськиз.

Тӥ уд тодӥське, кыӵе вал со концертын мусо, шуныт но куанык. Пичи пиналъёс нош кӧня вуизы. Шак одӥг интыын - бадӟымъес но, егитъёс но, покчиос но. Нош со ваньмыз Ижкарлэн шораз, кыче ке гуртын ӧвӧл.

 Ку концертэз нуэ пичи пи, кырӟало Камалиос - сюлэм ик небӟе. Нош кыче соос дӥсьтӥсесь, возьаськисьтэмесь. Тӥни кыӵе вуоно поколение. Малпасько, соос удмурт дуннеез йыринь-чукинь берыктозы шуыса. Вылӥе ӝутскозы но трос малпанъёссэс быдэсмытозы. Тани сцена вылын сылэ вал динамик. Одӥг пичи пияшлы со синмаз усиз ни. Анаез дорысь пегӟе но сцена вылэ со коробка доры мынэ. Анаез сое нуэ отысь, нош соиз нош ик. Кыӵе целецстремлённой, малпасько, депутат луоз.

Нош эшшо Пичи Пурга ёросысь Иваново-Самарск гуртысь пиналъёс быдэс автобусэн концертэ юри лыктӥллям. Паймымон. Света Ручкина соослы удмурт мультфильмлы уксё бичанъя эстафета сётӥз. Табере соос но гуртазы концерт лэсьтозы, удмурт мультфильм лэсьтон понна уксё бичалозы, но эстафетаз мукет школалы сётозы. Умой малпан так ке.

Одӥг залын кин мар кариз ке но, нокин но ог-огезлы ӧз люкеты кадь. Ми концерт учкыса пуким, нош вӧзамы ик пиналъёс кесяськыса бызьылӥзы, чай юон вискын вераськыса бадӟымъёс сылӥзы. Сыӵе неформальной обстановка вал.

Тодӥсько на, кызьы нырысетӥ курсын ми гуртамы концерт пуктӥм вал. Отын ми возьматӥм удмурт кылэ берыктэм украин мультикез. Сое берыктон но куаразэ гожтон вылын Алексей Пикулев (Пушнер) ужаз. "Ну ты заходи, если чё!". Сое тӥни. Туж умой вал со. Туж. Тани со.




среда, 24 сентября 2014 г.

Пик

Туннэ операторское искусство параын сыӵе вылӥ ӟечлыко видеоос учким. Искусство ке искусство. Вообще улонлэн котькуд шапыкез но ужанлэн, хоббилэн котькуд удысэз - искусство. Улонысь кулэ адӟыны детальёсты  - соос сыӵе мур пуштрос пушкзы вато. Тӥ уд но тодӥське. Нош кытчы мынэ со техника - азьлане но азьлане - устогес но устогес луэ. Нош пик кытын.

Пик - со точка, кытчыозь вань фирмаос вуозы но огкадь луозы. Кылсярысь, Сони, Кэнон, Никон фотоаппаратъёс маин ке но пӧртэм луо на али дырлы. Нош ды ортчыса, соос луозы одӥг кадесь. Потэмын ни FullHD-лэсь ӟечлыкгес видео качество. Со 4K. Вань фотоаппаратъёс со качество доры кыстӥськозы. Кыстӥськозы но одӥг кадь пуштросо луозы. Аппаратъёслэн вылзы гинэ пӧртэм луоз на.

Глобализация вань удысъёсын. Со калыкъёсын герӟаськем висьытӥсь ужпум кадь. Куке но вань йӧскалыкъёс бырозы. Вань адямиос одӥг кылын вераськыны кутскозы, одӥг пространствоын улозы.

Антиутопия.

вторник, 23 сентября 2014 г.

Who is who?

Сергей Арзамазовлэн туала литературалы сӥзем лекциязэ лыдӟиз. Малпасько вал, мар ке тужгес но тунсыкозэ, выльзэ кыло. Таяз тулыс "Галерея" арт-центрын лекциез туж тунсыко вал. Нош таиз буш. Сое огшоры кылзӥськыса пукыны но умой. Гань-гань кураез, вера марке.

Калыкез лыктӥз так, соос, кинлы тунсыко. Пайми, Андрей Гоголев сыӵе воштӥськем. Жуммем, табере со удмуртъёслэн дуннеязы пырон ӧс утча кадь. Шуэ, стоит -а берыктылыны удмурт кылысь ӟуч кылэ но ӟуч кылысь удмурт кылэ. Малы меда уд? Но юнме дыр быдтонтэм понна, умойгес луоз, дыр, удмурт егитъёслэн литературазэс ӟуч кылэ берыктыны. Соку лыдӟисьёс тросгес луозы.

Тросэз али лыдӟиськыны уг яраты ук. Эше тани, Славчи, уг яратӥськы, шуэ, лыдӟиськыны. Сюлэм ик оломар луэ. Кин понна, мар понна иське поттӥськом газет. !!!

Но туж тунсыко одӥг пусъемез вал. Кызьы азьвыл писательёс туж узыр улӥзы, квартираос кунлэсь басьязы. Нош собере система сӧриськиз. Писательёс луизы журналистъёс, уксёзы но ӧжытгес луиз. Писательёслэн статуссы быриз, гожъяськон удыс уксё ӧжытгес сётыны кутскиз, соос юыны кутскизы. Тодамы гинэ ваём В. Романовез, М. Федотовез... Жаль, кыӵе жаль. Нош собере пиосмуртъёс гожъяськон удысысь копак кошкизы - мае ми адӟиськом али. Пиослы семьяоссэс сюдыны кулэ ук.

Нош удмурт литературалэн азьлань сюресэз? Кытын? Удмурт гуртъёсысь потэм гожъяськисьёс вылын гинэ со возиськоз, пе. Нош удмурт кыл быриз ке. Сыӵе мӧзмыт луиз мыным, ку Алексей удмурт литературалэсь азьлань сюрессэ ӧз адӟы. Нош мон оскисько, со луоз. Со вань. Огшоры критикъёс уг тунсыкъясько ни выль гожъямъёсын.

Лекция лыдӟисьмы блогъёсты но лыдӟемын ӧвӧл. Нош блогъёсысь гожъмъёсты "вотэс литература" шуыса учкид ке. Яке куд-огъёсыз удмурт литератураын выль жанр кылдыто яке синтез жанров.

ӧз тырмы маиз ке. Удмурт туала литературалэсь суредзэ со быдэсак ӧз кылдыты. Но визьмолы визьмо критик кадь. Who is who? ыы.

понедельник, 22 сентября 2014 г.

Симфония оркестр Быгыын

Мынам оперативносте али воксё зашкаливает. Туннэ уйвӧтам но адӟи ни исамзэс. Тани кӧня ке нунал ортчыса, гожтӥсько кызьы мон нош ик вуи Быгые - мон понна туж мусо но яратоно интые. Асьтэдыс гинэ ми интые пуктэ - мынӥськод Ижкарысь Быгые час но ӝыны верантэм урод сюресъёстӥ, котыр мувӧй кыскон аппаратъёс музъемлэсь кужымзэ кыско - вань та суредэз адӟыса тон эмоционально туж жадьыса вуиськод Быгые. Нош отын тонэ кема витем куноез кадь пумитало - котьку табанен но турын чаен - соку ик вань жадем быре. Ноку но та мусо фин-угор дуннелэн шоркарысьтыз урод мылкыдэн уд бертӥськы. Али но озьы ик вал.

Быгыын туннэ симфония  оркестр концерт сётэ. Конечно, егитъёс - Ижкарысь крезьгуро колледжысь шудӥсьёс, Нижний Новгородысь китаецъёс (кызьы шуиз соослэн дышетӥсьсы, дуннеын котькуд витетӥез - китаец, милям вузамы но озьы ик. 800 адями пӧлысь), Франциысь скрипкаен шудӥсьёс но туж егит востэм француз - композитор Кристоф Арфан. Валаськоды, дыр, ваньмыз бюджетно, дунтэк сыӵе. Та ужрадэн вылӥыз туж респектабельно адскиз ке но дыр, но пушсэ веръяса номырзэ но ческытсэ уд шӧдӥськы.

Оркестр кык композиция шудӥз. Нырысетӥез тӥни со самой К. Арфанлэсь "Приглашение в путешествие" но В. Новиковлэсь  "О, Париж, Париж"-зэ. Зэмзэ ке, егит композиторлэн произведенияз мыным гаромния ӧз тырмы. ОТын, пе, удмурт крезьгуръёслэн мотивъёссы вал. Вал. Со Юминовлэн экспедициеныз Бобья-УЧАЕ ФОЛЬКЛОР БИЧАНЫ ВЕТЛЭМ.

НО МАИЗ МОГДОСэз? Юасько со куанер пилэсь, малы тон калык крезьгурен тунсыкъяськыны кутскид шуыса. Со шуэ, акыльтӥз академической крезьгур. Нош Франциысь гуртъёстӥ ветлӥд-а? Ӧй, шуэ. Малы? Соос Парижлэсь кыдёкын, пе. НОш мон шоркарын улӥсько, соин ӧз пӧрмы потаны. Нош Удмуртия Парижлы кыӵе матын! Вить минут мынонэз прак. Зэмзэ ке, со сокем востэм пияш, гуртъёстӥ но огназ ветлыны уз дӥсьты, возьдаськоз. Наш татын экспедиция вал.   Фотое но пуксьыкуз, ымынырме шузи пепертӥ кадь шуыса малпа лэся но, йырзэ улӥе лэзе, синъёссэ ватэ. Чудо. Но дӥсяськемын со туж чебер, ачиз но туж чебер. Пукиз огшоры калык пӧлын - заллэн шораз ик. Кылзӥськиз аслэсьтыз пӧрамзэ.

Так ке со экзотика. Симфония оркестр огшоры гуртын.  Юминов ужа калык понна, яке аслэсьтыз самолюбизэ вешан понна? Городын со аслаз егитъёслэсь кылдытэм симфония оркестреныз но французлэн ыль  композициеныз кинэ паймытысал но кыӵе удовольствие басьтысал лэсьтэм ужезлэсь? Татын весъёс вылын мукет палыз мед кыскоз - гурт калык сярысь сюлмаськон но соосты шумпоттон.

Но концерт азьын тужгес но тунсыко люкетэз вал - кӧтырес ӝӧк. Отын Быги - фин-угор дуннелэн шоркарыз сярысь, Юминовлэн пӧртэм ӵектосъёсыз сярысь вераським. Быгыос туж зол пӧсекъязы, соослы мииннац одӥг копейкаен но одӥг мылкыдын ӧз юрттэ шуыса. Ваньзэ асьсэос лэсьтӥзы. Юрттэт курыса вазиськылонлы - чалмыт. ШАрканзы юрттэм коть. Нош проект гуртсэс умой карон понна, коркаооссы дорозь сюрес лэсьтон понна кылдытэмын вал. ВСё-таки кунгож сьӧрысь татчы ветлылозы ук. Но, ар ортчиз ни, тани толэзь мар ортчыса, Быгыос асьсэ нимзэс мукет интылы сётозы ни, нош сюресэз али но ӧз лэсьтэ на. Оскыто соосыз, лэсьтозы шуыса, толсурозь, пе.

Кельшиз гуртсылэн главаез. Со тэк уг пукы, малпанъёссэ шараяны уг кышка,  ШОнерак министерствое мынэ. Но солы, пе, шуо, ми муниципал кылдытэтъёслэн тӧроосынызы ум ужаське. Вот, котьмар каре собере. НОш район чалмыт пуке. Аслам ёросэя тодӥсько, кыӵе соос востэм пуко но вылӥ структураослэсь сӥтянъёссэс ӵушылэ. Быгыос жаль потӥзы. Шӧдӥ, кӧня соос кужымзэс но мылкыдзэс но быдтӥзы ни та проект выэ. ТОдады гинэ вае, кызьы ортчиз Быг-Быг фестиваль. Миннац но ӧз юртты ке, кызьы соос озьы сыӵе умой радъяны быгатӥзы. Паймисько но йыбырттӥсько.

Юминов Эгра ёросысь Сэп гуртысь нылпиосын аппликация мультфильм лэсьтӥллям. Ӟечесь, ярам. Бобья -Уча гуртын гожтэм Рекрут гурлы Мускоысь нылаш песокен суредъёс лэсьтылэм, озьы клип форма оглом пӧрмем. Но мыным уг кельшы Юминовлэн позициез. Со понна ӧвӧл нимаз мари калыклэн культураез, удмуртъёслэн сям-йылолъёссылэн нюансъёссы. Со культураез огломак учке, глобализация ӧрын малпаське. Нош со ӧрын ваньмыз одӥг луэ - калык но, культура но, кыл но.

Берло вал фуршет. Сии трос фвиноград но вераськи мыло-кыдо  Му нимо китаеецен. Шуэ, уг поты вал, пе, татчы лыктэме. Консерваториын, пе, косӥзы. НОш татчы лыктэм бере, мыным кельшиз шуэ. Татын туж умой. 




Палэс


Удмурт дуннее гожъямъёсме тырыны малпай) Тани одӥгез. Палэс сярысь.

Вань меда туала удмурт проза?

8-тӥ куарусёнэ Генераллэн юртаз ортчиз туала прозалы сӥзем «Палэс» ӝыт. 

Палэсмуртэз уйпал ёросъёсын Палэс гинэ шуо. Озьыен та ним ӝытлэн пуштросэз сярысь вераз - «магической реализм» но туала удмурт проза. 

Вань меда туала удмурт литератураез кылдытӥсьёс? Шуыны луоз, чиньыен лыдъямон гинэ ке но, вань гожъяськыны мылкыд карисьёс. Но соослэсь мылкыдзэс нокин но уг кужмояты, будӥсь кужымез уг юнматы, литературае сюрес уг усьты. Кызьы усто спортсмен быре урод тренировкаос, яке ас понназ марке дауртэмез бере, но азьланяз яратоно уженыз вырыны солэн тазалыкез куашка, озьы ик егит гожъяськись но, аслыз инъет шедьтытэк, ыше но азьланяз уг гожъяськы ни. Совето вакытэ кадь, али гожъяськисьёс уг дунъясько ни. Тодэ гинэ вайид ке, кызьы ачиз Сталин кенешыны Максим Горький доры гуртаз ветлэ вал...  


Та ӝытэ но трос ик адями ӧз вуы - асьсэос гожъяськисьёс, интернетын бамзэс нуисьёс но соослэн эшъёссы. Вуиз «Инвожо» журналысь суредаськись Миша Николаев но ваиз ваньзылы йыр поромытӥсь кузьым - али гинэ печатлам «Пен-клублэн» альманахез, журналэн выль номерез. Номырин но уд ӵошаты сое, ку тон берыкъяськод зӧк туала журналлэсь бамъёссэ, паймиськод кыллэн узырлыкезлы, пӧртэм литератураослэн аспӧртэмлыкъёссылы но нырыныд кыскиськод али гинэ типографиысь потэм журналлэсь зынзэ. 
 
Егитъёс озьы ик тодматскизы латиноамерикан литератураын йылаз-пыдаз вуэм «магической реализм» амалэн. Маин ке но со  «этнофутуризмен» но одӥг радэ луэ. Кызьы пусъе кылосбуръя доктор Татьяна Ивановна Зайцева «Удмуртская проза второй половины ХХ-ХХI века: национальный мир и человек» монографияз, али дыре Россиысь фин-угор литератураез эскерисьёс «этнофутуризм» радын кутскизы вераськыны «магическое видение действительности» сярысь.  Озьыен «этнофутуризм» но «магической реализм» матын луо. Фин-угоръёс дуннеез вашкала улон пыр валаны турттӥзы («этнофутуризм» шуон вордӥськиз эстон литератураын но ХХ-тӥ даурлэн пумаз мукет литератураосы вӧлмыны кутскиз), нош латиноамериканецъёс - улонын луись магия пыр. Ӝытэ лыктэмъёс Хорхе Борхеслэн «Книга песка» новеллаез вылын магической реализмлэсь тодметъёссэ пусйизы. Озьы ик пал кыл верамын вал Габриель Маркес но солэн книгаосыз сярысь. 


Пумаз асьсэ гожъямъёссэс лыдӟизы удмурт кылосбуръя факультетын дышетскисьёс Марина Пахомова но Николай Михайлов, Питерын улэмез сярысь мадиз малпаськон манереныз пӧртэм луись Дарали Лели но «уйвӧтысь чуръёсыныз» тодматӥз Мария Векшина. Котькуд гожтэм сярысь егитъёс асьсэ мылкыдъёссэс веразы. Озьыен, диалог пӧрмиз. Азьланяз но удмурт литературалы сӥзем ӝытъёс луозы на.

Резиденция

Резиденциысь мон вазьгес кошки, соин ик ӧй адӟы нокыӵе странез. Бадӟым но паськыт тубат вылын гинэ кӧня ке "ог-огзэс яратӥсьёс" сыло вал.

Туж умой, мон вазьгес кошки шуыса. Нырысь кылдэм мылкыдме нокин но ӧз куашкаты. Черодын сылӥсько. Мышкам пиос. Одӥгез шуэ, юри чебер дӥсяськи, кышкай, уз лэзе шуыса. Валантэм обстановка. Табере та Пепелац ӧвӧл ни. Малпасько вал, интыез трос шуыса. Но увы кадь, сомындагес ик. Огшоры азьло адямиос ӝыныез барын пуке вал, эктӥсез эктэ вал. Нош али - ваньмыз огазьын. Кӧня калык люкаськиз... Танцполын нош ик шӧкчон интыез ӧй вал.

Мон вылӥысен учки ваньзы шоры. Умой, пока экто, уз жугиське, дыр. Солань-талань ветлонъямымныръёс шоры учкылӥ - пань-пань юэмын ӧвӧл кадь - дӥсьёссэс синйылтӥ - ммм, так ке тросэз валаса дӥсяськемын. Ваньмыз сыӵе гань-гань интеллигентно потӥз. Интызэ валаса кадь - зарниям кортъёс, чилясь пол, да марда... Уг тодӥськы - пространствоен бадӟымен йырин номырзэ уродзэ ӧй адӟы кадь.

Клипез возьматӥзы ук, Ваньмыз Арт-экспедициысь ... Зэм ке, со 10 нуналъёс туж шудоесь, яркытэсь, шунытэсь нуналъёс вал. Мон трос мар аслым басьтӥ, нош телефонной связь ӧз луысал ке, мон воксё губка кадь луысал но экспедиция пумын мылкыдэн пачыласал... Мыным кельшиз клип. Кин ке но шуиз любительский. Но мыным кельшиз. Со кыӵе ке мукет. Со ӧвӧл "Италмас". Кык нунал ортчыса, Петыре телевизор пыр адӟем сое. Серекъяз гинэ.

Бертыны потӥ. Клуб азьын вполне сазь пиос сыло. Одӥгеныз мар ке вераськыны кутским. Сазь, визьмо вераськиз, Алнашысь, мынам одӥгез яратоно гуртъёсы пӧлысь...


среда, 17 сентября 2014 г.

"вотэс литература"

Странность сыӵе, вал дыр, ку удмурт блогъёсты лыдӟылӥзы. Тау соослы, кин блогеръёсты тодмо кариз. Но али валасько: блогъёс акыльтӥзы. Газет тодам лыктӥз - азьвыл солэн кӧня подпискаез вал, нош собере, нош али? Озьы ик блогъёслэн но, лыдӟисьёссы кулэсмо кадь. Тросэз тодӥзы ни, мар со блог. Нош гожъяськисьёс сярысь ке, кин ке шедьтӥз аслыз аудитория, яке аудитория сое шедьтӥз (удмурт "вотэс" гожъяськисъёслы кыкетӥзэ лякыны шонергес луоз кадь потэ). Алиосыз блогеръёс мукетъёсызлы гожяъськыны мылкыд сёто. Мед азьланьскоз та уж.

Тани Россиысь писатель Денис Драгунский ветлӥз Ижкаре. "Читай, Ижевск!" фестивале, пумиськиз лыдӟисьёсыныз. Пумиськонын со шуиз, али, пе, кылдэ аспӧртэмлыко "вотэс литература". Солэн туж трос умой палъёсыз. Нырысь ик, дунтэм. Кыкетӥез,  солэн ӧсъёсыз котькинлы усьтэмын. Куинетӥез, вотэс кутскись авторез тодмо каре, солы аудитория кылдытэ, озьыен, книга но поттӥз ке, соос ӝажы вылын тузонӟыса уз кылле. Ньылетӥез, автор, весь гожъяськыса, кылзэ волятэ. Витетӥез, гожъямъёс сярысь отзывъёсын тодматскыны луэ, комментарий кельтыны. Но валтӥсез плюс, гожъяськисен но лыдӟисен диалог кылдэ, интерактив. Нош урод палъёсыз сярысь верад ке, (таиз аслам малпанъёсы ни) вотэсын ӧвӧл редактор, кудӥз возьматоз кутскись авторлэсь янгышъёссэ, валэктоз солы соосты. Вотэсын ӧвӧл на зэмос критика... Но эшшо, яра-а меда блогъёсты "вотэс литературае" пыртыны (нош Денис Драгунский отчы блогъёсты но пыртӥз)? Риторической юан яке мар?

Гожъяськисез гожъяськоз ни, нош лыдӟисез лыдӟоз.

Тау.

Удмуртъёс Америкаын

Богдан Анфиногеноен Оля Тронинаен, "Шунды" огазеяськонлэн кивалтӥсез, ветлӥзы Америкае но со континентын улон сярысь мынэсьтым вань стереотипъёсме куашкатӥзы. Малпаськоды отын вань свобода? Да отын тыныд пал кыл но вераны уз сётэ. Америкаен ӵошатыса, милям воксё демократилэн вань прелестьёсыз адӟисько ай. Туннэ вылаз эшшо параын "Отдел новостей"  американский сериалысь люкетсэ возьматӥзы. Юри, учкелэ ай нырысетӥ серизэ, валалоды, малы со мерлыклы ӧз кельшы.

Одӥг телешоуын куноослы учкисьёс юанъёс сётъяло. Одӥгез учкись юан сётӥз: "Маин Америка выликой держава луэ?" Патриотъёс кадь, вань куноос валэктон сётӥзы. Соос пӧлысь одӥгез шуиз - свободаеныз Америка великий луэ. Нош куинетӥез кӧня возиськиз, но сое юанъёсын довели шуод-а мар-а, но со пуштӥз. Кыӵе свобода шуэ Америкаын... (отӥзэ асьтэос учке). Соку мынам пушкам ваньмыз  - малы ке но мынэсьтым сюлэмме туж висьыто политикаен герӟаськем юанъёс - бугырскиз, мон соку ик патриот луи, дыр, пичильтык гинэ.

Богданлэсь но Олялэсь вераськонъёссэ кылыса, син азе пуксись суредъёс йыре уг пыро. Индеецъёс али гинэ но резервациын, асьсэ автономной музъем вылазы, кытын соос асьсэлы вождьёс быръё, племязылэн катъёссыя уло на, али гинэ но, милемыз тӧдьы куо адямиос уг ярато, ми но соосты ум яратӥське шуыса верасько на. Уло, пе, туж куанер, 60% -тэз ужтэк кыллё (асьсэлэн ик, пе, ужамзы уг поты, субсидиос вылын но музъемзы понна арендалэсь поттэм уксё вылын кыллё), егитъёс, шудо азьлань улонлы оскытэк, ошкисько, тросэз юо... Тӥ эн малпалэ, соос али гинэ ке но виг-вамъёсын но пӧртэм шалашъёсын уло шуыса. Соослэн вань сыӵе ик тыро-пыдо коркаоссы, юртъерзы. Соослэн огшоры уг поты умой улонэ потэмзы, "тӧдьыосын" кусыпъёс кылдытэмзы, азинскемзы но стереотипъёслэсь куштӥськемзы.

Нош мар бордын парадокс? Соос мукет йӧскалыкъёслэсь но цивилизацилэсь кенераськыса уло. Малпалод, асьсэ калыксылэсь культуразэс но анай кылзэс утё. Но... Но соос тросэз уг тодо ни асьсэ кылзэс, верасько, ваньзы кадь, англи кылын. Угось Америкаез англи кыл огазея - отын ӧвӧл "йӧскалык", "мукет кунысь адями", "мукет осконэн улӥсь" валанъёс, отын ваньзы ог-огзэс одӥг радэ пукто. Тӥни кытын уло глобализация. Я коть Америкаез но милесьтым континетмес океан висъя. Индеецъёс сярысь... Нош тодӥськоды-а, кызьы тодо, индеец тон, яке ӧвӧл. Паймоно кадь: вирзэс, пе, эскеро. Кӧня процент возьматоз - сомында процентлы ик тон индеец. Соослэн карточкаоссы но вань: тон индеец, тонэ ултӥяны уг яра. Али отын туж чурытэсь катъёс кутэмын йӧскалыкъёсты гажанъя. "Сьӧд куо адямиосты" нигер шуыны, олокыӵе но кылъёсын соослы вазиськыны уг яра.  Соин ик таосыз (индеецъёс но негръёс) сьӧраз ортчо ни - соослы ваньмыз с рук сходит.

Нош культуразы но индеецъёслэн быдэсак быриз ке? Соос со борды уг кутско. Валтӥсез соослы - вирзы. Соин ик, лэзя, мукет калыкъёсын но вераськыны уг дырто. Асьме кунын коть калыкъёсты утёнъя программаос вань, вань Ассамблея народов России. Соос тэк всё-равно уг пуко, дыр. Нош Америкаын ӧвӧл коренной калыкъёсты утись катъёс. ӧвӧл.


вторник, 16 сентября 2014 г.

Сакырын Быдӟым Крезь

Куке но Чудья ӝытъёс ортчытъяны Перепечкинын кутскиз вал. Кубызлы, Арганлы сӥземъёсыз радъяськизы, нош крезь дорозь ӧм вуэ. Ма соку кема ик дыр ӧз ортчы, Вероника Фёдорова Быдӟым Крезьлы ӝыт ортчытӥз. Перепечкинын ик, кылем толалтэ. Сыӵе обстановка вал отын - вылӥ, кизьныны но кышкыт. Быдэс " крезь оркестр" шудӥз. Всё-таки со удмуртъёслэн валтӥсь крезьгуро интсрументсы - нырысетӥез Инмарен чашъем вӧсь пужымлэсь лэсьтэмын.

Так справка (простить каре ӟуч кылын шуыса):

"Крезь (удм. пение, напев; крезьгур – мелодия) – струнный щипковый инструмент. Имеет корпус из еловых досок в виде полукруга длиной у основания до 830 мм, с небольшими выступами на концах и выемкой в середине. От 14 до 24-32-38 жильных струн натянуты между фигурным деревянным струнодержателем и колками. Есть внутренние резонирующие струны, натянутые внутри корпуса для улучшения качества звучания (резонирующие струны встречаются не во всех инструментах).
Удмуртские гусли – крезь – имеют две разновидности: простые гусли (крезь) и великие гусли (быдӟым крезь). Характер звучания светлый, чистый. При игре инструмент держат на коленях полукружием к себе, правой рукой играют мелодию, левой – басы. Крезь существовал в Удмуртии как бытовой и культовый инструмент. Как бытовой звучал на свадьбах, во время календарных праздников (после «официальной» части, когда водили хороводы), затем повседневно. Как культовый инструмент быдӟым крезь звучал во время общественных молений, ритуальных танцев, молебных напевов – например, "мелодии небесной росы" (инву утчан гур). Гусляр (крезьчи) участвовал в выборе хранителей Великого святилища, жрецов и других служителей языческого культа. Древняя история крезя изучена недостаточно, археологических находок не существует, в то же время инструменты этого типа характерны для многих финно-угорских народов, воспеты в песнях, эпосе, традиции их использования в религиозной обрядности восходят к периоду древнеуральской языковой общности". Андрей Воронцов.



Пайми вал, ку Танечка Тихонова Капустинлэн мастерскояз ветлыны кутскиз но аслыз куско крезь лэсьтӥз. Молодец ни  со. Сыӵе бадӟым предисловие вал мар борды...

Сакырын туннэ крезьлы сӥзем ӝыт ортчиз. Шонерзэ вераса, С. Капустинлэн студиезлэн дискеныз калыкез тодматӥзы. Отчы крезь тулкымъёс гожтэмын: пыж крезен но, быӟым крезен но пӧрмытэм крезьгуръёс. Михаил Рябов нош крезь - контрабас лэсьтэм. Зӧк струнаосын - черкъёсын азьло, пе, службаос контрабас куара улсын нуисько вал, соин ик крезь-контрабас со вӧсьлыко инструмен.

Тӥ кылзӥське гинэ, кыӵе куара поттэ крезь - ненег тулкым кадь ортче со сяськаос вылтӥ но соос вылысь мушъёсты сэзъялтэ, собере мушъёс каллен со доры лобӟыны кутско... Крезь куара - со инкуазь вальслы кельше.

Быдӟым крезен шудӥз Вероника Фёдорова, куско крезен шудыса, кырӟазы Танечка Тихонова но Валерия Фёдорова, Капустин аслэсьтыз малпам крезьгуръёссэ кык крезьёс вылын шудӥз, Михаил Рябов "Муш утён гур" лэзиз.

Туж шуныт вал татын, туж шуныт. Калыкез, мон понна, ожытгес люкаськиз. Но эстэтъёс, мон шуысал.

Тау.


понедельник, 15 сентября 2014 г.

Так, оломар тодам лыктӥз.

Мынам потӥзы выль геройёсы - Марго но Донды. Маргоез идиллисстической улонэ пыртӥ но табере солэн отысь кошкемез уг поты ни. Со кыске тамак, яратэ аслэсьтыз муспотонзэ, кылчинзэ Т.-ез, юэ вина. Нош Т.-ез весь сое шонер сюресэ поттыны выре но уг вормы - ӟигарыз быре.

Марголэн дуннеяз вуыса, мон тодам вайи, кызьы кылем арын ветлӥ француз киное "Жизнь Адель". Тодӥсько на вал, али кадь ик, кызьы мон мылкыдъёсме, блоге потто шуыса, гожтӥ вал. Но блогысь малы ке ӧй шедьты. Валай, кыӵе ӧжытсэ гинэ мон татчы пыртӥсько. Ага.

Веросэ пӧрме постмодернистской. "Кенеш"- ын матысь дыре потозы ни мукетъёсыз.

Эшшо В. Ерофеевлэсь "Москва-Петушки" прозаен гожтэм поэмазэ лыдӟем бере,  мылкыды ӝутскиз вал со выллем марке малпаны. Но одӥг абзацлэсь кыдёке ӧй кошкы на. Кемалась вал ни со. Вунӥз ни со, мылкыд но мукет луиз ни. Та ке тунсыко луысалыз но, кызьы мыным потэ, шузигес. Вераськысал бадӟым стажен алкашъёсын яке "кыдзы бертэм" (йырвизьзы берытскем) адямиосын. Соослэн дуннезы, мон понна, тужгес но тунсыко.

Тани ветлӥ вал позыръяськонэ. Ваньмыз сыӵе цивильно: кафе, инбам, кезьыт, ӝӧк сьӧрын юыса пуко, зусъёс вылын адямиос пуко, мукетъёсыз экто. Нош одӥгаз ӟус вылын пуке трос аръёс ӵоже юись мурт. Солы 35 аръёс сяна ӧвӧл на. Котькуд нунал юэ ке но, кыӵе дӥсяськыса со потэм кафее. Пиджакен (вуж ни ке но, всё-равно, адске, атаез киысь яке со дыръёсысь  кылемын со шуыса), брюкиен (пиджакез кадь ик) но ботинкаен (известен-а, тӧдьы краскаен-а саптаськемын ке но, всё-таки ботинка). Юэ ке но, дӥськутэз погмаськемын ӧвӧл, пиджакез  бирдыямын - сыӵе туж интеллигентной алкаш. Пуке себе ӟус вылын но крезьгур кылзӥське, кайфоватьтэ. Эктыны но эктысал, дыр, но пыд йылаз сылыны уг быгаты вал ни, соин ик пукыса киосыныз выртэ, йырыныз крезьгуръя эктэ. Нош дискотека бырем бере, ӟус вылысьтыз султӥз но, сопалась тапала шонаськыса гурт палаз вамыштӥз.

Нош табере тодамы ваём суббта ӝытъёсы (и не только) юись егит пиосты... Соослэн мыжыкъёссы чик но крезьгуръя уг лобало... Табере кылдэ юан: кызьы улыны шонер яке кызьы юыны шонер?

Мылкыд

Жади морально. Ӵукна вазь султӥ. Лулы шугъяське, гань-гань кариськемез уг луы. Уйин но кык дуннеос вискын сылӥз. Таисьтыз но кошкемез потэ, сояз но потыны уг  вормы. Озьы ик сопалась тапала пӧсекъяса ветлӥз но мырдэм-мырдэм уйвӧт дуннее усиз. Кемалы луысал ке.

Ӵукна ӵук султӥ ... Озьы ик наркотический мандражен улӥ быдэс нунал. Сюлмы туж зол кокаськиз, нош малы? Валантэм. Пушкын весь тылпу ӝуаз, ваньмыз пӧзиз... Озьы ик со кужым вань лулме жадьтытӥз. Нош нунал озьы ик ортчиз.

Жади. Жади но умме уси.




воскресенье, 14 сентября 2014 г.

.точка

Вот вань учыр "Брангурт песянайёсын". Тросэз тодо вал ини. озьы луоз шуыса. Табере со ансамбль - бренд, ним, процесслэн вылбамыз, нош пушкыз - неважно. Зэм но, шоу-бизнеслы неважно. Ансамбльлэн составез воштӥськысал куке но. Номыр но соин уд кары. Табере "ББ-лэн" историяз вуиз реальной точка, кудӥз продюссеръёсын пӧрмытэмын буш запятойлы. 

четверг, 11 сентября 2014 г.

Екатерина Васильева - кылбурчи

Тодматски туннэ выль мон понна кылбурчиен Екатерина Васильеваен. Вордӥськемын со Шаркан ёросысь тросэзлы тодмо Быгы гуртын. Туж аспӧртэмлыко нылаш. Нырысь ик, кылбуръёсыныз тодматскыса, мон сое сыӵе шыпыт нылашен син азям пуктӥ. Но ку жингыртӥ но куаразэ кылӥ, ваньыз йыринь-чукинь берытскиз, сюлэмы лӧптӥз. Туж ненег, но со дыре ик жингрес куара соку ик ас бордаз кыскыны кутскиз кадь. 

Зэм но, со туж етӥз, вераськыны яратӥсь, усьтэм лулын, ваньзэ сюлмыныз шӧдӥсь нылаш. Но со дыре ик со котьку но азьлане кыстӥськись, пуктэм ужпумъёсты быдэсъясь, зол сямын. Сыӵе противоречивой натура кадь. "Нюко - гопо". Поэзиез но туж паймымон - удмурт литератураын солэн темаез ваньмынызы уг кутӥськы - интим. Тани учке гинэ, кыӵе чуръёсыз.

Бирдыме йӧтӥськод ке,
Кышномурт асме кожаськод.

Кин гинэ дӥсьтоз сыӵе малпанъёссэ шараяны. Нош со шонерак вера ваньзэ ("Чумолё вылэ тубод жадьыса" Татын Чумолё - со ӟызы кышномурт), улонысь образъёсты басьтэ ("усьтӥськиз ошмесэ, шукыен жальыр бызе" ошмес - кыӵе тунсыко метафора), мылкыдъёссэ сюлэмысьтыз кисьтэ ("Я, ӟыгыръя мукетсэ, сое яратӥськод ке"). Куд-ог дыръя лирической героез - со ачиз автор, нош куддыръя - со азьпал улонысьтыз ачиз-кышномурт (кылбуръёсаз герой я пияно, я яратоно, я яратонтэм, н ачиз со котьку яратэ). Темаез но быдэс творчествоезлэн одӥг - яратон. Но тросэз гожъямъёсыз солэн блокнотаз ик кылемын, малыке шуоно соос "слишком интим", соин ик издательёс соосты уг потто.

Ачиз кылбурчи шуэ, со школаын урод дышетскиз. Озьы ке но солэсь туж усто кылбурчи кылдэмын - Инкуазен, пе, быгатон сётэмын. Адӟиське, нылаш улонын трос сюлэмшугъяськонъёс адӟемын но вань мылкыдъёс сюлэмез пыр поттэмын. Тани, шуэ, Кузебай Герд Кузонэ дышетскыны тыбыраз котомкаен 400 километр пыдын мынэм. Солэн валтӥсь ужпумез дышетскон вал. Мыным но озьы ик, шуэ со, главное дышетскон, кыӵе оценка но уг пукто ке, дышетскыса визьме будэтӥсько. Так ке, пе, мынам пунктуациен янгышъёс луо, соин ик мон кылбуръёс гожъясько дыр, кытчы потэ, отчы ик пуктӥсько знак. Со туж умой тодэ Алла Кузнецовалэсь творчествозэ. Гажа Эрик Батуевез. Уг яраты Бродскиез. Улонын  - визьмо. Тодэ сое, мар солы кулэ. 

Али дырлы солэн вань ини кык пичи сборникъёсыз "Бурдъёсы вордӥсько" но "Малпанлэн шыпыртэмез". Азьланяз ӧдъя веросъёсын бичет поттэмез.

Тау улонлы, мон сыӵе адямиен тодмаски шуыса.