"Ижкар" огазеяськонлэн адӟытонэз

Лыктӥськом этнофутуризмъя адӟытонъёсы, но яратон ӵыпетын уяны кутскиськод кадь. Лобанов шуэ, котьмарлэн дӥнез - яратон. Умой философия, ыы ведь. Этнофутуризм - со яратон. Артистъёслэн "Ижкар" огазеяськонзы кыӵе ке симпозиум ортчытэ ке, отын одӥг керетонъёс но уг пото, дыр. Отын творчество гинэ, котьмар ласянь. Мыным потэ, со мерлыклэн вылӥ лёгетэз. Азьпалан - Инмар гинэ на. 

Мон шуысал, суредаськыкузы но, ТВорческая ДАЧАын пукыса та дуннеысь лобӟыкузы но соос тубатсылэн вылӥ лёгетозяз вуо но Инмарлэсь ымнырзэ адӟо. Яке кинлэсь ке но-а. Ужъёссэс гинэ учке ай. 

Таяз адӟытонын Гири Григорьев мон доры лыктӥз но шуэ, Маша, мае ке валаськод-а? 

- ЫЫ, - шуисько.

- Валэкты мыным, шуэ Гири.

Но ведь котькуд адямилэн аслаз валанэз. Матэктӥм Сергей Орловлэн "Фантом" суредэз доры.

Со суред кык люкето. Вылӥяз суредамын валантэм пудо-живот: пӧртэм пельёсын, трос сюръёсын, быжен, оглом скаллы кельше. Но синъёсаз учкиськод ке, паймиськод соослы: сайкыт чагыр лыз мур иньам кадь. Ымдуръёсыз - адямилэн, соос мыняло. Соку мон валай - со адями. Со бадӟым чылкыт луло адями. Вылтырыз - неважно, валаськоды-а, адями ымнырыныз но мугорыныз шуш луыны быгатэ, главное сюлмыз бадӟым мед луоз. Скал тусъем адямилэн ангесысьтыз мар ке музъеме ваське, суредлэн кыкетӥ люкетаз, мон малпасько, со ШУД. 

Нош отын адӟиськом трос АДЯМИОСТЫ, татын соос зэм но адямиос ни, малыке шуоно вань ымныръёссы, киоссы, чиньыоссы. Соос ваньзы бадӟым бугоре биняськемын. Биняськемын вожвылъяськыса.  Шуд понна жугиськыса. 

Гириен суредэз сэрттыса-пертчыса сылӥськом ни. Солэн но соку синъёыз усьтӥськизы кадь. Со суредысь детальёсты адӟыны кутскиз: 

- Со животлэн пыдъёсыз кортнамын ук. Может суредлэн улӥ люкетэз - со музъем пушкысь урод кужымъёс.

Татын лыктэ Дарали но шуэ: 

- Тӥ туж мусо адӟиськиськоды та картина азьын, даже дӥсьтылэн буёлъёссы но огкадесь, но ми кошкиськом ни.

Яратыны котькин быгатэ, просто тросэз адямиос пегӟо солэсь, кышкало валантэм луыны но малпаськыны мылзы уг поты. Усьтӥське, шуо мон тӥледлы, эн кышкалэ валантэмлэсь. Соку точно Инмарез адӟоды. Нош со трос ымныро.

"Чияпуэд". Ашальчи

Богдан Анфиногеновлэн инстаграм бамысьтыз адӟи Ашальчилэсь кылбурзэ:

Чияпуэд сяськаяське...

Чигошур ву чиль-чиль бызе...

Сьӧд дуринчи сяська сюпсе,

Чияпуэд сяськаяське...

Чебер ылмурт туж яратэ, 

Чебер пилы туж синмаське -

Тӧдьы бамыз ӵыж ӵыжектэ...

Чияпуэд сяськаяське...

Та Ашальчилэн кылбурез гожтэмын 1925 -тӥ арын, ку солы вал 27 арес. Сыӵе огшоры но яратоно кадь кылбур. Туала кылбурчиос ваньзэ сураны туртто, кылъёсын шудо, валантэм кылбуръёс гожъяло. Тани со - Ашальчи - Быдӟым кылбурчи. Всё простое гениально.

Туннэ, 16 оштолэзе, солы тырмысал 116 арес. Мон паймисько солэн чиданэзлы, визьмызлы, улонэзлы. Испан суредаськисен Фрида Калоен мон сое одӥг радэ пуктысал. Нош Фрида мон понна Инмар интые. Учкелэ со сярысь кино, озьы ик нимаське, "Фрида", соку валалоды, кыӵе со кужмо кышномурт, кӧня солэн чиданэз. Ашальчи но со кадь ик. СОФИН уж пыр потыса но, сюлэмыз ӧз эгырӟы. Тюрьма, творчестволэсь куштӥськон, висись муртъёс, сютэм аръёс... Нош Ашальчи кылиз сыӵе огшоры, ненег, котьку юрттыны дась, матысьёсыз сярысь сюлмаськись. 

Та дунне вылын тросгес сыӵе адямиос мед луозы.

Мон та дырозь "Чияпуэд сяськаяське" кылбурлэсь нырысетӥ чурзэ гинэ тодӥсько вал. Но пичи дырысен йырвиям пыӵамын вал - та кылбур яратон сярысь. Малы ке но Ашальчилэн вань кылбуръёсыз пӧлысь мынам сознаниям таиз нырысетӥ интыын сылэ. Малызэ валэктыны уг быгатӥськы.  

Ваньмыз та дунне вылын яратон сярысь. Ваньмыз яратон вылын возиське. Валасалзы ке сое адямиос, ӧз ышкиськысалзы ке матысьёссы вылэ, котькинлэн чияпуэз котьку сяськаяськысалыз но емышъёс сётъясалыз. Нош тросэз адямиос асьсэ чияпузы сярысь гинэ малпасько. Нош Ашальчи мукет сямен гожтӥз ук. Со "чияпуЭ сяськаяське" ӧз шуы, со вераз "чияпуЭД сяськаяське". Валады?

Пусъёно нуналъёс.

Куинь нунал талэсь азьло зориз. Зор усиз но соку ик кынмиз - сюресъёс вылын, лымы вылын, курткаос вылын йӧ кылдӥз. Кӧня адями гылӟыса, усизы, дыр, но сӥтянъёссэс шуккизы. Та нуналэ ваньзы кытчы ке но дырто вал, дыр, вань шутэтскон интыосын бадӟым черодъёс луылӥзы, соин йырин стресс. Соку вал "басурманский" праздник.

Тӥни котькуд сыӵе нуналъёсы возьмаськод мае ке но. Возьмаськод, возьмаськод, но номыр но уг луы. Мылкыд куашка да марда, собере ӝытпал зорыны кутске.

Нош луысал ке огшоры нунал. Номыр но ӧд возьмасал. Туганэд отын огшоры нуналэ лыктысал ке тон доры, лэсьтысал ке кузьым, сю поллы шумпотымонгес луысал. Малы ке шуоно: тон ӧд возьма со кузьымез, со вал шуак! Нош кыӵе шуак! кыӵе ке праздникъёсы. Та нуналъёсы сӥтян ӝуа ини, возьмаса.

Соин ик огшоры нуналъёсты но яркыт карыны тыршоно. Котыр адямиосты пусъем нуналъёсы гинэ ӧвӧл шумпоттоно. Соосты весяк пальпоттоно, шудо кароно.

Тау!

Мар со яратон ПИ ПОННА?

Нылъёсмурт понна яратон - со быдэс улонэз. Яратонтэк со уз быгаты: эшез вылэ ке но яратонзэ кисьтоз. Нош пи понна мар луэ яратон?

Со солы ӧвӧл кыӵе ке но туж кулэ арбери. Яратса, со мукет ужъёслэсь гинэ шутэтске. Шутэтске но выльысь кутске ужаны, суредаськыны, кылбур гожъяны да мар да. Яратон одӥг пичи но вдохновение пӧлы уг пыры, кышномуртъёслэн кадь. Ужаны кутскыса, пи нош ик вунэтэ яратоно адямизэ. Жадиз ке, со нош ик берытскоз шутэтскыны, но яратоз кӧня ке дырлы. Ваньмыз сьӧд сюлмозяз вуиз ке, тышказ йӧтны кутскиз ке, со нош ик усёз нылкышнолэн яратон зарезяз, солэн шуныт киосаз но сылмоз. Яратон со понна - со мукет ужъёс лэсьтыны пыкъет.

Нош нылкышно понна ваньмыз наоборот: со кутскоз улыны, малыке шуоно со яратэ. Яратон сётэ солы ужаны выль мылкыд. Со ӧз яраты ке, вообще номыр но уз кар ни.

P.S. Одӥг источникысь шедьтӥ! Со мынам малпанэ ӧвӧл.

Нош аслэсьтым мон ватсасал на. Нылмуртлэн номыр но каремез уз пот ни, яратоно адямиезлэсь но яратонзэ оз шӧд ни ке. Нош со яратон периодически гинэ луэ. К сожаленью.

Мукет потӥз

Мыным туннэ со кыӵе ке но мукет потӥз. Туж ненег. Солэн сьӧд сюлмыз мӧзмиз ни кадь вешамлэсь, небыт килэсь, шумпоттӥсь кылъёслэсь. Али дораз луысал ке, со мон вылэ кисьтыал со яратонзэ, кудзэ мон солэсь курисько вал азьло.

Мон сое яратко. Та куинь толэзь куспын мон дыши ни та солы верам кылъёс борды, дыши ни небыт куараелы. Со куара ик буйгатэ асме но, сое но. Туннэ мыным со туж жаль потӥз. Нырысьсэ дыр милям валче улонамы. Борддоръёсазы но ӧсъёсазы – котькытчы пиос «мон тонэ яратӥсько» кылъёс, пе, гожъяло! Мӧзмон соослэн сюлэмъёсазы но видимо каръяське. Туннэ нырысьсэ шӧдӥ, со но мӧзме шуыса. Вераськемезъя, берпуметӥ нуналъёсыз ортчемез сярысь мадемезъя, мылкыдызъя. Буйгатыны тырши кадь кӧня ке. Но уг пӧрмытӥськы на ай зэмос нылаш кадь небыт луыны, весь лэзьяськисько на бышкись кылъёсын. Чида ини, куанере.

Но узыр ортчись нуналъёс пӧлын мон куддыръя сое тодам но уг вайиськы. Мон уг быгаты вераны, мон сотэк улыны уг быгаты шуыса. Малыке шуоно – мон улко! Улко но ужасько, улко но гожъяськисько, улко но …. улко но яратко.