Быгыын. 1-тӥ нунал.

Бере кылисько. Озьы ке но, Быг-Быг!

Шарканэ мынам вуылэме ӧй вал на. Быгие кемалась лыктэм потэ вал ни. Кыӵе меда со фин-угор лулчеберетлэн шоркарыз? Фин-угор сиёнъёс пӧранъя фестивале вуи но, ӧй жаля. Одӥгез гинэ, мон электроникъёслэсь жадиськем ини. Экто шуыса малпай но, Тиммерхановалэн но Котельниковлэсь "лишь бы отделаться" ымныръёссэс адӟи но кошки. Соос но акыльтӥлям ни, лэся.

Та выллем фестивальёс но куд-ог адямиослы акыльтӥзы вал ни. "Гербер" отын арысь аре, весь одӥг кадь ортче, нокытчы но уг буды. Нош татын маиз ке но мукет вал: "Герберлэсь" трос лёгетлы вылынгес. Но сизьым ошмес йылтӥ нуллӥсь нылашлэн "чилясь" дэремез... Кытын тон, Татьяна Никитична Москвина? Шарканын тонэ уг тодо меда?

Нырысетӥ нуналаз, конечно, валантэм вал. Юля висьыны усем.  Ми Удмурточкаен быдэс ӝытсэ со сярысь сюлмаськыса ветлӥм. Собыдӟа ужрадэз дасяса... Со кужмо ини так ке. Тӥни Пронин, кин со идеальной удмуртка!

Яратӥсько гуртъёсты котыръяны. Быгыен тодматскыны шумпотыса мынӥ. Милемыз сизьым ошмес йылтӥ нуллӥзы, но одӥгез кыдёкын ик вал бере, отчыозь ӧз нуэ. Пайми, одӥг гуртын сомында ошмесъёс пото шуыса. Нош кӧня ас киын чебермам коркаооссы! Пумен эмъюмлы ярась турынъёс бичам. Инна Тополева, французъёслэн кураторзы, Мать-и-мачехаез ишкалтӥз но шуэ одӥг француженкалы:
- Та мать-и-мачеха. Огпалтӥз сюранай кадь кезьыт (вольыт палыз), нош мукет палыз анай кадь шуныт но небыт.
Соиз паймиз. Нош удмуртъёс сое бакакуар шуо. Француз кылын та будослэн кыӵе меда этимологиез. Кыӵе пӧртэм йӧскалыкъёслэн дунневаланзы.

Сиён пӧранъя ӵошатсконэ но пӧртэм калыкъёс люкаськизы. Франциысь Жюли Поли, Киров улосвылысь Каркова Антонина, Эстониысь Тауно Ласик, Коми-Пермякъёслэн музъем вылысьтызы Снегирёва Татьяна, Дэри ёросысь Кондратьев Евгений, Марий Элысь Щербакова Галина но Ижкарысь Царегородцева Ольга. Ваньзылы одӥг кадь продуктъёс сётӥзы. Эстонецъёс тужгес но шаплыесь вал. Ку мукетъёсызлэн вал паника, мар пӧраны. Тауно Ласиклэн чорыгъёсыз маринадэн банкаын уяло вал ни. Со ик вормиз. Мар шуод на, со шеф-повар ук. Сиёнзэ но калык пӧлы поттыны быгатэ. Пӧрам сиёназ Эстон кункышетлэн вань буёлъёсыз, пе, вань. Мукетъёсыз борды кадь, "Быгы" кыл эстонецлэн сиён бордаз ӧз лякиськы.

Нош варсез лэсьтонъя мастер-классэз ноку но уг вунэты. Табере ачим но лэсьто ни. Мон лымшор палась бере, милям ю-нянь удалтэ. Соин ик ӟеглэсь ӧжыт мар лэсьтӥськом. Варсен юон сярысь ноку но кылэм ӧй вал. Натур продукт - лавкаысь вань газировкаослэсь ческыт. Озьы ик кулэ.

Быгиос быгато вылэм шулдыртыны но дырез пайдаё карыны. Тау!

Туспуктэмъёс татын: http://vk.com/bygishorkar?z=album-52694539_199694076

Ымныртэм каръёс

Монэ туж Кузонэ кыске вал. Одӥг пол отчы ветлӥ, кык пол, куинь пол, нош берен бертэм уг поты, сюлмы ӝыныё кыле. Со шӧдэ кадь, мыным татын марке но лэсьтоно шуыса. Нош мар, уг валаськы.

Бигеръёслы туж паймисько, кызьы соос ас улосвылзэс азинтыны, Мускоез вень вылэ пуктыны быгато. Соослэн отын ваньмыз чиля, азинске, пушъе. Но каллен-каллен со вань туала чиль чилясьын бигер сям культуразы медаз ышы вал. Но со процесс кутскиз ни кадь. Азьвыл Кузонэ вуыкум, ульчаосысь трос бигер вераськемъёсты кылӥсько вал.Нош берпуметсэ ветлыкум, шӧдскымон ӧжытгес. Мон может янгышасько, но мыным озьы потӥз. Табере Кузон бигер карлы уг кельшы ни. Табере со огшоры, вань мукет каръёслы укша, со номаин но уг висъяськы ни.

Йошкар-Олаез тодам вайисько ке, соку ик син азям ярдурысьтызы горд коркаос син азе пуксё. Соос алигес пуктэмын ай, Венециез адӟем карыса. Табере мукет коркаос но Венеция стилья пуктылӥсько. Кинлы кулэ со кыкетӥ Венеция? Мон лучше поръёслэсь аутентичной городищезэс учкысал. Малпасько, кунгож сьӧрысь туристъёс но монэн соглаш луозы шуыса. Таиз но кар каллен со пӧзись пуртые усе ни.

Жаль.

Берпуметӥзэ Кузонэ ветлыкум, мон нош ик ӝыны сюлмын отысь кошки. Но валай, ярам мон отчы дышетскыны ой кошкы шуыса. Мон берен берытскысал, но выль улон кутскысал, дыр. Отын эрик. Эрик кузьма шумпотон. Озьыен эрик вие искусствоез.

Тау!

Туннэ Перепечкинын

Азьло дыре "Перепечкин" - э туж яратылӥськом вал пыраны. Отын  астэ гуртад кадь кожаськод. Берпуметӥ дыре отчы ӧм вуылэ вал ни. Эшшо Вотэсын ивор вӧлмиз на: Перпечкин Чебуречкин луоз.

Туннэ отчы пырам. Сыӵе ик мусо, туала инты. Но кыӵе ке но буш, мурт. Поваръёссы-а кинъёссы-а залын ик пуко, компотсы ӧй вал, винозы быдэсэн, пе, вузаське, так стаканъёсы ум тыриське. Ярам, мар вань, со ик басьтӥм ни.

Тунсыко потӥз, зэмзэ ик кафе вузамын ини меда шуыса. Жаль потэ, соослы PR-менеджер кулэ. Кассирзы, валатэк, мар сярысь мон юалляськисько, шуиз, директорзы соиз ик ай, пе. Мед Перепечкин ик кыльысал, кутскем ужез пумозяз вуттоно ук. Огшоры политиказэс воштоно, куронъёссэс чурытгес кароно, ужрадъёс ортчытъяно, калыкез маин ке но ас бордаз кысконо. Вераны капчи, конечно.

Ми дась литӝытъёс отын лэсьтылыны. Шумпотыса.
Тау!

Людмила Улицкаяен пумиськон

Малы меда адямиослы  мурт малпанъёс туж тунсыко пото?

Тани туннэ УдГУэ тодмо гожъяськись Людмила Улицкая вуылӥз . Туж яратоно кадь, огшоры, визьмо, арлыдо кышномурт. Зэмзэ ке вераса, азьло мон чик но ой вал тодмо солэн творчествоеныз. Пумиськонын но аслаз гожъяськемез сярысь трос ӧз вера, юанъёс но та сярысь трос ӧй вал. Тани кык-куинь гинэ.

Кызьы со шедьтэ сюжетъёс, книгаосызлы ним малпа да марда? Уг тодскы шуэ, пуксиськод но озьы ик гожтӥське. Нош сюжетъёс, пе, сое пумтэм-йылтэм сого (бича гинэ, улонын соос туж трос). Куд-огъёссэ бордысьтым пезьдытъясько но, шуэ.

Юаллязы Украина сярысь! Ачиз ик куанер акыльтӥз та тема ласянь вераськыны. Уг яра, шуэ Россиялы Украиналэн ужъёсаз пыриськыны. Мед али тупам учырысь ачиз потоз но ӝутӥськоз. Нош солы весь люкето, выль тылпу кынӝытъяло. 

Оглом кышномуртлэн образ сярысь туж трос юанъёс  вал. Яратӥсько, пе, ӟуч кышноосты. Ортчемзэ тодэ ваид ке, соослы котьку но пиосмурт киос ӧз тырмылэ. Вань секыт уж кышномурт пельпум вылэ усьылӥз, со семьязэ утьыны выриз. Нош туала кышномурт мукет ни. Табере солэн нырысетӥ интыын семья уг сылы ни, туала арын солы дышетскон кулэгес.

Озьы Людмила выжиз семья сярысь вераськон вылэ. Али, пе,  "феминизация мужчин но маскулинизация женщин" луэ. Тӥни озьы.

Ачиз гожъяськись творчествоез сярысь шуэ, "мон ваньзэ улонысь басьтӥсько". Соин ик вераськон но улон сярысь тросгес вал, дыр. Гожъяськыны со эркын дыръяз гинэ гожъяське. Мон, шуэ Улицкая, нырысь ик улӥсь адями. Соин ик улон интыям гожъяськеме уг луы, малы ке шуоно отын - улон. Тани али матысь дыре кунгож сьӧры кошко, отын шыпыт интыын кутско ни ужаны.

Солы, пе, вдохновение кулэ ӧвӧл, яке муза весяк Улицкая бордын улэ. Гожъяськисез огшоры, пе, огназ келтоно, нокин но медаз иса но акыльяськы ни шуыса. Соку ини кутско вордӥськыны выль книгаос. Мынам но озьы луысал ке.

Людмила Улицкая автографъёс сётъя.



Улицкаялэсь автограф басьтыны султэм адямиос.

   

Эль ныл-2014

Туэ Эльныл кыкетӥзэ ортчиз. Арт-пространство "Сахар" сомында калыкен тырмемын вал. Та ужрадэ вуыса, тон аслад гуртад кадь вуиськод. Огшоры пуконъёс интые небыт пуфикъёс вылэ пуксиськод. Подиум интые киын лэсьтэм ковёр. Сыӵе югыт шуныт атмосфера. Зэмзэ ке, Сигмаын озьы ӧз луысал.

Мыным потэ, таӵе ужрадъёс модалиослы гинэ ӧвӧл, асьсэ дизайнеръёслы туж бадӟым пайда ваё. Дэрем вурисьёс мар ке выльзэ басьто, мукет пӧртэм идеяосын тодматско, соослэн выль коллекциос лэсьтылыны мылкыдзы ӝутӥське. Трос вал туннэ дизайнеръёс. Чисто ваньзылэн, учкисьёслэн, но чильтыр-мильтыр луэмзы потӥз, дыр.

Ми ставкаос лэсьтӥм вал, кин вормоз шуыса.

Вице-мисс луиз Юлия Лекомцева.

Нош "Эль ныл"-2014  - Дарина Якимова. Шумпотӥсько, анай-атайёсы вуэмын вал шуыса. Нылъёс понна, та ужрад нырысетӥ интыын сылэ вал, дыр.

Модель тыршись луыны кулэ, котьку но кытчы ке кыстӥськись, муш кадь ужась. Так ке ваньмызлы сыӵе луыны кулэ.

Кылем арен ӵошатыса, Дарали туж бадӟым вамыш лэсьтӥз. Нылашъёс но, визажистъёс но, фотосессиос но, спонсоръёс но устогес вал. Тазьы Парижозь но кыдёкын ӧвӧл ни.

Дарали - суперкышномурт!



Герберын кадь.





Эль ныл-2014. Дарина Якимова! ӟечок.

Кибардина модали луонъя мастер-класс пыр потӥз.

Медиа-персонаос.

Пумозяз вуиды ке, тани соос, вань модалиос. Но шораз соослэн мумызы - Дарали.

Ослоп

Кин тодэ Борис Гребенщиковлэсь творчествозэ, валалозы, дыр, монэ. Мон понна со туж тунсыко журналист, кудӥз адямиез визьмо но кулэ тодон-валанъёсын пыӵатэ. "АЭРОСТАТ" передачаезлэсь одӥг коть выпусксэ кылзэ ай, трос мар выльзэ тододы. Со передача тунсыко крезьгурен но тодматэ. Лул ик шутэтске.

Туннэ БГ Ижкаре вуиз. Ижкарез азинтонъя огазеяськон, #арго, соин пресс-конференция ортчытӥз. Сыӵе отчы мынэм потэ, со быдӟым адямилэсь шыпыт куаразэ кылэм. шудо синъёссэ адӟем, шараям малпанъёссэ пыӵатэм потэ вал. Сыӵе потэ вал... Но мыным шуизы, АРГОен эшъяськоно, интыос ӧвӧл ни, ӟеч лу. Кема ӧй малпаськы, берытски но Удмурт драмтеатре кошки. Туннэ отын "Ослоп" вал.

"Ослоп"-лэн нырысетӥ люкетэз туж мӧзмыт но кема кыстӥськись потӥз. Пинал актёръёслы вань на кытчы кыстӥськыны, соослы будоно но будоно ай. Малы ке но уг кельшы, нокыӵе но декорациос ӧвӧл шуыса. Крезьгуръёсын но пӧртэм гожтэм куараосын валаськод, кытын действие ортче. Нош мынам потэ вал адӟем быдэс суред. Одӥг со квадрат формаен колесо вылын бергась арберизэс оты-татчы нуллӥзы. Котькуд сценаын со штуказы вал кадь. Акыльтӥ огпӧртэм. Спектакльысь спектакле со бергась арберизы выже. Валасько, со трос мае воштэ, динамика кылдытэ шуыса. Действие Вятка губерниын удмур гуртын ортче шуэмзы бере, мон понна бадӟым контраст кылдӥз. Сыӵе просвещение лулчеберет вакытысь пуштрес дэремъёсын кузёос но удмурт дэремъёсын ляльчиос. Пьесае удмурт кылос пыртэмын вал: калык кырӟанъёс, куно пумитанъёс... Глинтвейнэз, удмурт кылэ берыктыса, пӧсятэм шуизы кадь. Нош пьесалэн кыкетӥ люкетэз зэмзэ ик кельшиз. Шудӥсьёс но золгес шудӥзы. Дыши, лэся. Динамикаез но, мылкыдъёсты но шӧдӥ. Пьеса , малпаськыса, удмурт калыклы тунсыкогес карон сярысь сюлмаськыса, пуктэмын. Тау, пиналлёс! Тау! БГ сярысь ик вунэтӥ.

Трос ӟучъёс лыктэмын вал, ӝыны зал наушникъёсын пукиз. Табере ӟуч драмтеатре ветлоно.

Киноос.

Туннэ кык кино учки. Кыкез но калык сярысь, солэн улон-вылонэз но сям-йылолъёсыз сярысь.

Нырысетӥез - "Небесные жёны луговых мари". Гожъялляй вал ини таиз сярысь. Кыкетӥзэ учкисько ни. Татын 25 нылъёс сярысь новеллаос возьматэмын. Котькуд новеллаын поръёслэн кыӵе ке но традициязы, легендазы возьматӥське. Пор калыклэн мифологиез туж умой адӟытэмын. Кино Денис Осокинлэн книгаезъя лэсьтэмын. Пуктӥсез пор ӧвӧл, соин ик поръёс туж ишкиськыса та кино сярысь тодазы вайыло. ӧз кельшы соослы, киноез лэсьтӥсь пор калыкез озьы возьматӥз шуыса. Кызьы возьматӥз? Учкиды ке, валалоды. Контактын вань со кино.

Кыкетӥез - "Под снегом". Со Япониялэн сям-йылолъёсыз но тодмо мадёсъёсыз сярысь немец кино. Документальной. Яратӥсько сыӵе киноосты, кытысь мон пайдазэ шедьтӥсько. Нош Япониын вылаз эшшо туж трос пӧртэм легендаос на. Кино шӧдтэк шорысь быриз, "Пузкар" кадь. Туж затянутой кадръёс вал ке но, соос мӧзмыны уг сёто кадь. Зарезьлэсь тулкымъяськемзэ возьматыкузы, мон, киноысь аслам дуннеям кошкыса, вуттӥ вал ни, но мон ӧй мӧзмы. Кельшо киноос, кытын ӧжыт верасько.

Нош вуоно вордӥськонэ, 3-тӥ южтолэзе, "Дружба"-ын ик Лев Вахитовлэсь трилогиязэ возьматозы. Асэныз но вераськыны луоз. Мелодрамаос интые мур но аспӧртэмлыко кино учкемды потӥз ке, ветлэ Ижевский киноклубен ортчытэм сеансъёсы. Ижкарын котьма вань, Ижкарын ваньмыз вань. Мыным потэ, Ижкар Парижлы кельше шуыса. Мон ноку но ӧй адӟылы Эйфелева башняез, но мыным потэ, со "Дружбы народов" монументмылы кельше шуыса. Соизлы, кудӥз тымет дорын сылэ.

Пузкар

Кӧня ке час талэсь азьло тросэз витизы "Пузкар" киноез, табере кино ласянь малпанъёсты возьмало. Мон уг вера солэсь урод палъёссэ, актёръёслэн шудэмзы но куд-ог тупасьтэм интыос ласянь. Сойзэ мед мукетъёсыз вералозы.

Кинотеатре вуэме бере ик, мылкыды куашказ. Йырам соку ик юан кылдӥз, кыӵе амалъя ӧтён билетъёс сёткамын вал? Удмурт культурае кыӵе ке но челеп ватсамзы понна? Озьы ке, сэре мон ӧтем адямиос пӧлысь адӟи сооссэ, кудъёсыз удмурт лулчеберет понна номыр но ӧз лэсьтэ на, ватсало на, уг но малпало лэсьтыны. Пинал дыръязы нош копак удмурт кыллэсь куштӥськон мылкыдын ветлылӥзы. Адӟи сыӵеоссэ. Нош Таня Тихонова, кылсярысь, премьера дыре огъяулонниын, дэрем вурыса но удмурт калык кырӟанъёс кырӟаса, пукиз.

Пуксимы залэ. Кутскизы министръёс вераськыны. Мон малы ке но сыӵе со министръёсты уг яратӥськы, адями лулзэс уг тодӥськы, дыр, соин. Мыным потэ, соос номыр но уг каро, улыны гинэ люкето шуыса. Шонертэм, дыр, со; огшоры мынам кылдэм стереотипе. Ма тросэз депутатъёс уженызы ушъяськыны быгато, дыр, но мон ӧжытэзлы гинэ оскисько.

 Я. Тани Лариса Николаевна Буранова шуиз: матысь дыре, кинотеатре лыктыку, мед, пе, быръён луоз, кыӵе удмурт кылын киное мыноно. ЫЫ, малпай ас поннам, Тӥ нырысь удмурт кылэз школаосын одно ик дышетыны косэ вал, катэз мед кутозы шуыса, жугиське вал, соку учкись но, удмурт лулчеберетын вань удысъёс но азьпалтӥськысалзы. Соку адямиос тодысалзы, кин понна ужано, кинлы лэсьтоно. Нош али удмурт "элита" ваньзэ лэсьтэ удмурт "элиталы", кытчы пыре 300 адями? (Уг яратӥськы со "элита" кылэз). Киное 300 адями ӧтемын вал.

Соловьёв Владимир Михайловичлэсь но юаллям, асьме республикаямы удмурт киноос но вань-а мар-а шуыса. Министръёс асьсэос но уг тодо тӥни, кыӵе эшшо отын удмурт кыл на. Кыӵе милям депутатъёсмы, уй-уй-уй.

Уродзэ уг вера шуи но, ӧй чида, лэся. Но со кино ласянь ӧвӧл. Тани кутскиз кино. "Пузкар". Киносуредъёсъя но, шудӥсьёслэн выремзыя но, ваньмызъя "Пузкар" "Узы-борылэсь" сю поллы устогес лэсьтэмын. Соин мон туж шумпотӥсько: вань азьлане вамыш, но со кыкетӥ гинэ вамыш ук ай. Мынам сюлэмы шумпотэ ке, ымныры но пальыша ни, мылкыдме соку ик верам потэ. Вӧзам пукись эше ик уродъяськыны кутскиз вал ни. Тон актёръёс шоры эн учкы, киноез, пе, учкы!

Тодмо ымныръёс шудо бере, нырысь ик со ымныръёсты синйылтӥсько ини, синмаськисько дото зол, малыке шуоно соос талантоесь, талантоесь, соин ик туж мусоесь. Дышем бере гинэ, кутски сюжетсэ да марзэ валаны. Но соку кинолэн пумыз вуэ вылэм ни. Соин ик ӵуказе но ветлысал на, табере ини сюжетсэ учкыны.

Тросэзлэн сыӵе мылкыдыз кылдӥз: кинолэн кыкетӥ люкетэз кулэ луыны. Мыным быронэз кельшиз. Адями малпаськонэ усиз ук, со кинозалысь буш ӧз поты, озьыен кино удалтӥз. Мон понна ваньмыз валамон вал: удмурт адями  гуртын гинэ шудо, соин ик пумаз кык туганъёс, кучапиен шудыса, серекъяса, сюрес кузя гурт пала вамышто. Но малы удмурт адями гуртын то шудо? Малы со карын инты уг шедьты, малы кар сое изъянтэ но урод пала воштэ. Удмурт егитъёс карын но быгато ужаны, удмуртлык Ижкарын гинэ азинске, удмурт гуртъёсын егитъёс таӵе ужпум сярысь уг но тодо, пока каре уг сюро ( гуртшколаосын удмурт кылэз дышето на ке ) .  Ижкарын гинэ кутске нюръяськон.

Туж трос ужпумъёс пусйыны выремын. Как будто ӵуказе дунне быроз, нош "Пузкар" - со берпуметӥ кино. Соин ик татын вань ужпумъёсты ӝутоно. Пусйыны пусйизы, нош пумозяз ӧз вуттэ.

Нош кытчы но сюриллямтэ кино лэсьтӥсьёс: ипподром, аэропорт, курутой коттеджной инты, кафее, галереяе, ын пушкы... Суредъёс туж чебересь вал. Тау! Мон ой возьма вал, сокем серьёзно но чебер луоз шуыса.

Зато вань адямиос кадь, ми Удмурточкаен кизилиослэсь автографъёс басьяны кошким. Табере мынам вань автографъёсы мусо шудӥсьёслэсь но Петрушлэсь. Тау кино понна!

Кошкыкум кассирлэсь юай, ӵуказелы кӧня буш инты кылемын на шуыса. 30-мын пала гинэ на, пайми, отын сэрегъёсын мышказ гинэ на.

Эйфория ай мынам. Киноез выльысь учконо. Тау!

Психологъёсын.

Туж аспӧртэмлыко эскеронэ сюри. Дышетскем бере, огъяулонние бертыны одъясько вал ини. Кытысь-марысь сюрес азям эше потӥз. Со психологлы дышетске, кутӥз но монэ дышетскон бӧлетэ пыртӥз. Пыри: азям пӧртэм ӝӧкъёс сьӧрын дышетскисьёс пуко. Мыняло. Ярам, малпай ас поннам.

Пукси, нош азям кык коробка пуктӥзы. Одӥгез тӧдьы А4 бумага улысь, нош мукетыз "Фруктовый остров" сок улысь. Юанъёс сётъяны кутскизы.

-Кудзэ тон таос пӧлысь бырйысалыд?

- "Фруктовый остров". Малыке шуоно со "Фруктовый остров", соиз - мӧзмытгес коробкады. Таиз коть чыгыр-лыз буёло.

-Со волшебный коробка, - шуэ ини таре со пияше, - мае тон отысь поттысалыд?

- Номыре но,- шуисько,- мон отчы понысал? Бон, потэ ке тодэмды, мар отысь поттысал, малпасько али. 

Соку йырам лыктӥз Венедикт Ерофеевлэн "Москва-Петушки" поэмаез. Отын Веня "Ю" буква сярысь вералля вал. "Ю"- со быдэс творчество кадь, мае ке но ю но малпанъёстэ гожты. Веня юэ вал но малпаське вал, маке но вылӥ сярысь малпаське вал. "Ю" буква одно ик йырысь потэ вал (одӥг учырын йырысь вир "Ю" буква луыса вияз). Юон солэсь улонзэ но малпанъёссэ бугыръя вал. Тӥни со тодам лыктӥз но верай:

- "Ю" буква отысь поттысал.

- Малы "Ю"? 

- Тӥляд тетрадяды сыӵе юан ӧвӧл! - шуисько, валэктэме ӧз поты но.

- Вань, - мынектӥз пияше.

- Венедикт Ерофеевез лыдӟид-а?

-Ой.

-Иське уг валэкты. Лыдӟы, - шуисько.

-Я,- пе.

Табере азям кыкетӥ коробказэс понӥзы. Таиз но, пе, волшебный.

- Нош татчы тон мар понысалыд? Сое, марлэсь тынад весяклы люкиськемед потэ.

- Ммм. ӧвӧл мынам сыӵе арберие.

Веранэ куспын выж шоры учки но, пыдкутчанме адӟи.

-Пыдкутчанме понысал!, - шумпотыса ик верай.

-Малы? - паймем синъёсын учкыса, юаз пияше.

- Малы, малы! Пыдкутчанме мон синмаськыса басьтӥсько ук. Нош дыр ортчыса, со урод луэ. Жаг куянэ куштӥд ке, со отын мукет жагъёс пӧлын сисьмоз. Нош кӧня со тынэсьтыд пыдъёстэ утиз. Тынад аслад но сое куштэмед уз поты ни, сокем дышод со борды. Нош кӧня ке дыр ортчиз ке, со пыдкутчанэз та коробкаысьтыды поттыны луоз. Соку тынад улон шоры учкемед воштӥськоз ни. Кин тодэ, вуж пыдкутчанэд шоры учкыса, тон тодад ваёд ортчемзэ но серекъялод азьвыл улон шоры учкемед вылын.

Я. Табере мыным мукет коробкаос сётӥзы. Пушказ понӥзы пичи туп, но тодыны косӥзы, кыӵе фигура ватэмын со коробкаос пушкын. Татын мон копак "пукси". Йырам кыӵе фигура лыктӥз, созэ ик верай ни.

- Тон кыӵе факультетын дышетскиськод? - юаз пияшкае.

- А вот тодэ, тӥ монэ со фигураостэс тодыны косӥськоды ук, - серектӥ мон.

Тӥни сыӵе эскеронэ сюри мон. Малпасько кӧня ке но юрттӥ дыр, со психологъёслы. Но соослэн сюлэмъёсазы паймон но мынян гинэ кылиз кадь. Мар йырам лыктӥз, со ик верай. Мон понна, вань веранэ зэм вал.

"Брезентовая цапля"

Туннэ мон "Брезентовая цапля" нимо постмодернистской литературной ӝытын вал. Татын авторъёс асьсэлэсь кылбуръёссэс лыдӟо. Яратоно кадь ӝыт. Но, жаляса верано, туннэ со вал берпуметӥез. Андрей  Гоголев, кин вылын та уж возиське вал, Ижкарысь кошке. Жаль.

Андрей Гоголевлэн творчествоеныз мон кык ар талэсь азьло гинэ тодматски ай. Нырысьсэ мон соин кылбур лыдӟонъёсын тодматски кадь, точно уг тодӥськы ни. Но тусбуйзэ адӟем бере, соку ик синмаськи. Синмаськи солэн котькуд выросэзлы, кылызлы, куараезлы, тыбыраз кылдэм лёгезлы, гожъяськемъёсызлы - солэн образэзлы. Тани татысь шедьтыны быгаткоды солэсь гожтосъёссэ. Яратӥсько посмодернэз. Яратӥсько Андрей Гоголевез.

"Брезентовая цапля - со тужгес но кужмоез, мар мон та карлы лэсьтыны быгатӥ", - шуиз со. Сыӵе ӝытъёс Ижкарын ожыт, яке, шонергес верад ке, воксё ӧвӧл. Куинь ар куспын та ужрад туж тодмо но кылбурчиослы бальзам кадь луиз. Яке шуод Аракы, кудӥз гожъяськыны выль мылкыд, мукет кылбурчиосын тодматскыны но ӵошен узырмыны луонлык сётӥз.

"Цапля" усьтӥз выль пинал усто кылбурчиосты, кылсярысь, Мария Абих. "Цапляын" нырысьсэ кылбуръёссэ лыдӟыкуз, солы 14 арес гинэ вал. Нош кыӵе кужмо вал ини со. Таня Репина, али дырлы солэн "Монография" нимо бичетэз но потэмын ни. Но трос мукет мужикъёс (нимъёссэс уг тодӥськы ни, оломар но эн малпалэ, озьы ке туннэ Мария Абих  гинэ нылъёс пӧлысь вал, кылемъёсыз ваньзы мужикъёс, удмурт кылбурчиос пӧлын мукет суред, нылъёсгес кылбурало, кыӵе пӧртэм тӥни).

Тодматске, тани со:

Вӧсь (святой) кадь Гоголев.

Тани та кофтаен туннэ но вал. Фото 1,5 ар талэсь азьло лэсьтэмын.

"Человечество" нимо кылбур бичет но "Ленин. Самолет. Девушка" прозаез книгаосын потэмын ни. Прозазэ пдф версиен татысь лыдӟыны быгатоды. Лыдӟе, со постмодерн, Тӥледлы кельшоз, со туала. Но со туала Гоголев кошке Ижкарысь. Кылдозы на меда литӝытъёс? Мон шуисько: "Луозы. Одӥгез ке но, "цапля" кадь ик регулярно, подпитанно, стимулирующе, тепло... но мукет адямиослы, мукет кылын, мукет визьмын". Возмалэ литӝытъёсты, кин яратэ литератураез.

Тау!

Воргоронэн тодматскон.

Яратӥсько ӵукнаысен ик "деловой" луыны. "Кенеш" журналэ ветлӥ. Отын нырысетӥ шуосэ понна, тышкасалзы.  Автобусэн бертыкум, воргоронэн тодматски. Тани "Университет" дугдылонни вуиз, нош мон уг потӥськы. Со юа мынэсьтым:
- Тӥ студент ӧвӧл-а мар-а?
- Студент. Мон радиозаводэ потӥсько. - беренвази мон.
- Малы отчы?
- Мон огъяулонниям бертӥсько. Тани со, - учкеменым улон интые шоры возьматӥ.
- Озьыен, ӵош потом. Тӥ сэре кин луоды?
-Журналист.
- Данъясько!
- Нош Тӥ - спортсмен? - Зенит шевронэн югыт лыз куртказэ адӟыса, юай воргоронлэсь.
- Азьло вырисько вал, нош али пичиосты дышетӥсько. - вераз со. Воргоронэ Алексей Васильевич Сунцов вылэм. Берло вотэсысь бугыръяськыса, тодӥ, со  "Зенит" нимо футболэн шудӥсьёслэн клубзылэн кивалтӥсез шуыса. Нош со уж дораз автобусэн ветлэ. Пыдын гинэ ветлэ дыр но, туннэ зоре вал. Пайми солы.
- Стипендия басьтӥськоды-а? - автобусысь потон азямы юаз на со.
- Басьтӥсько.
- Мон студент дыръя стипендия 35 манет вал ай. Татчыозь тырмылӥз, - киыныз йыр вылтӥз шонтыса,  вераз воргорон. - Азьло трамвай билет 3 коньы сылэ вал. Озьы ведь? - кондукторлы вазиськиз со.
- Бен. Нянь колды но 5 коньыен вал. Сыӵе небыт, ческыт...- вераз билет вузась.

У-у-у малпасько. Азьло, иське, 1 манет тыр 12 колды нянь басьтыны луэ вал, нош 35 манет  тыр 420 колды! Нош али? Али стипендия 1500 манет котырын, нянь сылэ кызьы ке но 16 манет. Озьыен, стипендия вылэ 93 быдэс колды нянь усе.

- Мӧзмиськоды со дыръёслэсь? - кыкназылэсь но юай мон.
- Ма уг, огшоры верам потэ, коммунизм дыръя но туж умой вал шуыса.
Стипендияя учкид ке, так-то  коммунизм дыръя 4,5 поллы умойгес вылэм.

Нош кондуктор Совето Союзлэсь мӧзме ик кадь. Мыным озьы потӥз. Йырам соку ик Шоркинлэн кырӟанэз шудыны кутскиз: "Вордӥськи мон Пуроын, Пичи Пурга районын... Лу визьмо весь шуизы, визьтэмлы ӧвӧл сюрес коммунизме". Визьмо -а, ӧвӧл-а, но мон пырик шудо.

Сӥть

Огшоры музейёслы кулэ уксё, кыдёке ум ветлэ,  басьтом  нимысьтыз Кузебай Герд нимо Йӧскалык музеймес.  ӵемысь сопалтӥ ветлӥсько, ӵемысь адӟисько та выллем гожтэмъёсты: "С 1 октября по 10 ноября в Национальном музее им. Кузебая Герда работает уникальная выставка «Планета обезьян»".

Музеезлы сыӵе-а сюрес Кузебай Гердлэн сӥземез потэ вал? Со сю пол "пыраклы изён интыяз" берытскиз ни,  дыр.

Тӥ син азяды гинэ пуктэ: калык арбериос, Ижкар история, удмурт, ӟуч, бигер дӥсьёс, йӧскалык синпелетъёс, нош отын ик маймылъёс, кыйёс, бубылиос, но мукет животъёс. Соос бордысь зын потэ на ук, соос отын сӥтясько, кизяло, нош со вань зын Йӧскалык музейлэн борддоръёсаз пыӵа. Я коть экспонатъёс стекло улын, ито не ваньмыз.

Кошки музейлэн "йырыз" (кивалтӥсез) доры.

Валаны турттоно.

Огъяулонние "Калленом" фестивальлэсь флаеръёссэ лякылын потӥ. Пырон холлэ вуи. Отын "хачикъёс" сыло вал. Огез пичи укно пыр охранникен вераське. Охранник аслаз будкаяз пуке. Шуак кесяськем куара кылӥськиз. Мон йырме хачикъёс пала берыктӥ. Огез охранник шоры кесяське:
-Ты кто такой, чтобы мне приказывать!!!!!
Кызьы валай, охранник журналэ лыктэмзы ласянь гожтӥськыны косэм. Соиз гожтӥськем, но со пумысен марке керетон потэм. Со "хачикъёс" туж дерзкоесь. Асьсэос уг валало но, мыжыкъёсынызы шонаськыны кутско.

"Мусульманин" веросысь люкет:

Марайколэн чыры-пыры ужъёсты быдэсъян висказ, Дагетанец доры  50-тон аресъем пиосмурт лыктӥз. Пинал пияшлэн меӵак синъёсаз учкыса, ымныр дораз матэктыса, шыпыт куараен со вазиз:

-Виськод?

-Оо.

- Иисус Христосэз ӧть.

- Маин со мыным юрттоз. Со пророк гинэ.

- Инмар – со яратон. Висён – со дьявол.

- Кызьы висён дьявол луоз? Сатана – со кулонлэн кылчинэз, кудӥз адысь уллямын. И тодӥськод-а, мар понна? Йӧнъяськемез понна. - Кесяськыса вераськыны кутскиз Дагетанец, - Исса – Аллахлэн чиньыез.

- Котькуд адямилэн аслаз Инмар-кылчинэз. Со котьку юрттэ аслаз нылпиезлы, - шыпыт вера воргорон.

- Инмар одӥг, солэн ымныръёсыз но нимъёсыз трос!

Пумиськизы кык сюлэмъёс: огез пӧсь, мукетыз гань-гань.

"Монографие" мынон сюрес вылын диалог

Студенческой отрядъёслэн фетивальысьтызы бертыкум, эшъёсылы вераны шедьтӥ, Татьяна Репиналэн "Монография" нимо книга потэмезлы сӥзем ӝытэ мыно шуыса. Валя сьӧрам калъяськиз, кемалась, пе, сыӵе ӝытъёсы ветлэм потэ вал ини.

"Грифон" адӟытонние мыныкум, юалляськыны кутскиз:
- Мар тон сыӵе ӝытъёслэсь басьтӥськод?
- Уг тодкы. Мыным кельше. Яратко литератураез. Нош Ижкарын пинал кылбурчилэн бичетэз потэ ке, кызьы ӝытаз уд мыны? Ачим мар но со гожъяны вырисько бере.
- Мар со гожъямъёсыныд тон добиваешься?
- Ма номыр но. Гожъяськон али дырлы - со мынам лулылэн лобамез. Лыдӟисьёсылы гожъямъёсы кельшизы ке, мон туж шудо луо. Улом ини, ог-огмес яратыса.
- Нош уксё? Мар вылын тон улод?
- Уксё лыктэ но, быре но. Вал но, скал но. Кӧттырем адями уз гожъяськы ни. Сютэм уг кулы, дыр. Тон бон азьланяз мар карыны одъяськод?
- Мынам али азьланез сярысь нокыӵе но малпанъёсы ӧвӧл. Целе но ӧвӧл.

Фестивальын куинь нунал куспын рос-прос ӧм изе. Жадим. Но Татьяна Репина дорын мон сайкай. Нош эше умме усиз. Тӥни озьы луэ. Со ӧз кылы:

-Кажись, талант?!
-Кажись талант!
... (лирический герой гожъямъёссэ лыдӟисьёслы возьматэ. "Они до слёз". )
-А делать что?
-А что еще? Писать.
-Ну а семья?
- А что семья?
-Где деньги брать?
-Да это практика.
- А как? Писать?
- Какой писать! Пахать.
-Но ведь талант.
-Ну да, талант. 
...
                                        Татьяна Репиналэн гожтэмез. Курсивен - аслам валэктэме.

Кин ке деградирует, кин ке статичен.

Куддыръя сыӵе тунсыко потэ. Пуро котырын трос гуртъёс, но котькуд гуртын егитъёс маин ке ог-огзылэсь пӧртэмесь луо. Аксакын асьсэ вераськон манерзы, Кечел ӟучомемынгес ини, соослы,  юон, нылъёс но жугиськон сяна, номыр но кулэ ӧвӧл ини. Сундукын юо ке но, туж галанто асьсэзыс возё, котьку нылашлы ӧс усьтозы, кизэс сётозы, сумкадэ нуозы. Мон ваньзы сярысь уг вераськы, оновной масса сярысь. Нош ачим Пуроын улӥсько бере, вань пусъем сямъёсты Пуро егитъёслэсь адӟисько.

Толон потай калтыртыны. Люкаськон интыямы трос ик адями уг пукы вал: Исьнер, Гемит Денис, Амань Дима.

Реп гожъясь пиосмы (Пушнер но Исьнер) но соослэн котыръёссы "туж шонересь" вал азьло: ӧз юэлэ, уг кыскелэ, но кырӟанъёсазы шонер улонэз вылӥе ӝутылӥзы. Нош али мукет сюресэ кожизы ни. Нош вань сыӵе пияш Гемит Денис, кудӥз вордскем тырысьтыз, дыр, аляктыса ветлэ ини.

Тӥни соос ваньзы, сур юыса, пуко.
-Тӥ, - шуисько, Исьнерлы, -  копак портичкиды ини. Тӥ деградироватьтӥськоды, нош Денис тани статичен.
- Мар? Мон сыӵе кылъёсты уг тодкы, - шуэ Гемит Денис.
- Постоянен, иське, - валэктэ солы Амань Дима.

Озьы ке но, кырӟанъёс, кылбуръёс гожъясько на, крезьгурсуредъёс пуктӥсько на, улонэз валанзы  уг сылмы на. Удмурт гуртъёсын гопникъёс гинэ уг будо. Мерлык соосты воштэ. Урод пала яке умой пала? Созэ мерлыклэн катъёсызлэсь юано ини, яке нимаз адямилэсь.


Тылпу дорын пукыса, пиосмы кырӟаны кутскизы, Исьнерен но Амань Димаен ветло "Чебеляйе" но Катков доры кырӟаны пыралляло вал. Озьы соослэн кырӟан мылкыдзы котьку бордазы. Удмурт калык кырӟанъёс чирдыса пукизы на. Мон но куддыр итӥськылӥ. Пуким, вераським, кырӟам но бертӥм.

Оскытэк но тыршытэк, ужедлэсь бадӟым пайда уз луы.

Мыным туж кельше шундыӝужан палан улӥсь калыкъёслэн лулчеберетсы. Уд оске, но йогаен вырыны со туж круто!!!

Таяз шутэтскон нуналъёсы мон нош ик гуртэ ой вуылы. Гуртэ жингыртӥ ик, шуи со да, та да кароно, уг берты. Уг тодкы, ку мон адӟо тӥлесьтыд дуно но сюлэмлы кыдёкын ымныръёстэс. Пасхалы пӧраськыны берто, хоть смыслэз вань - юнме пужыятскыса уг пукы. Нош ми модельной агенствоысьтымы нылъёсынымы "Мумы Дор" удмурт шӧмын лэсьтэм усадьбае ветлӥм. Номыр но жаль ой вал та понна.

Дэриын катаосты пылатыса, вамыштӥм корка пала. Пунызы утӥз, но, ӧс усьтӥськыса, мон шоры шуак потӥз, туж кышкай, утӥз бере. Но со куноосты яратӥсь вылэм, кык пыд йылаз ултыса ик, милемын чырткемъяськиз.

Одӥг модельной школаысь лыктэм фотографъес туспуктон лэсьтонъя но подиумтӥ шонер ветлонъя мастер-класс ортчытӥзы. Ми копак кыдёкын ай та искусствоослэсь.

Чай юыса, йогаен вырим. Тау Катялы, со быгатӥз та ужрадэз мыло-кыдо ортчытыны, йогалэсь пуштроссэ усьтыны. Сюлэмын ганяк луиз, номыр сярысь но малпаськем ӧз поты ни. Сиськыны но пуки но, кытчы ке долгаса, ческыт тибетской ӝукез ымам туйнасько. Улонэ монэ Ваулиналэн жингрес куараез берыктӥз. Ужмес азьланьтоно! Буяськыны дышетским, ветлыны, позироватьтыны.

Зэмзэ ик, туннэ мон узыргес луи. Туспуктэмыь аслэсьтым ымнырме адӟыса, валай, ас бордын ужаны кутсконо шуыса. Азьло мон малпасько вал, номыр но уз пӧрмы шуыса, ваньмыз та пушдуннелы пайдаё но тубатлы юнме вырон шуыса. Малыке но мынам мылкыды воштӥськиз. Та понна, конечно, ваньзылы тау шуыны кулэ: Катялы но, Даралилы но, агенствоысьтымы но милемыз дышетӥсь нылъёслы но, мумыдор усадьбалэн кузёооссылы но, аслым но дыр кӧня ке.

Пӧсятэм уыса, туж зол ваньзылы сӥзем потэ, эн сылэ одӥг интыяды, узырмытэ асьтэдыс, яратоно ужъёсын вырелэ, эн жалялэ асьтэдыс, пересьмыса жалялоды, тубе тубаттӥды инбамлы но шундылы  матыгес! Тӥляд ваньмыз пӧрмоз, осконо но ужано гинэ!

Та ласянь одӥг притча вераме потэ: "Одӥг Адямилы кулэ луэм шурлэн сопал ярдураз потыны. Мыл потытэк, пуксем со пересьлэн пыжаз. Учке но пыжчилэн одӥгаз пулысаз гожтэмын: "вӧсяськы", нош мукетаз: "ужа". Адямилэн тодэмез потӥз, малы озьы, но юаз пересьлэсь. Со номыр но вератэк, кутскиз нырысь одӥг пулысэн нимаз вуэз донганы, собере мукетыныз. Пыж интыяз гинэ бергаса улӥз, азьлань шонер ӧз кошкы. Валад-а, юаз солэсь пересь!"
Туспуктэмъёс*

Южтолэзьлы пусйымон нуналъёс.

Нош ик ӟырдыт нуналъёс кутскизы.

• 17 южтолэзе, ӵуказеулса ни, "Зарни перепеч" концертын удмурт моделья агентвоысьтымы нылъёсмес адӟыны быгатоды. Эркишевлы тул-тул ик юрттом ни.
• 21 южтолэзе Лудорвай музей-заповедникын видео-артъя калыккуспо фестиваль ортчыны куткоз. 
• 21 южтолэзь. "Пепелац". Одӥг кылын ваньмыз верамын.
• Та вискын "Инвожо" лит. ӝыт ортчытэ.
• 26 южтолэзе студвеснаын удмурт филология факультет выступатьтэ. Отын "Неофолк" выль тузӥ колллекциязэ возьматоз. Быдэс арня та фестиваль мыноз. Шутэтскемды потэ ке, одно ик ветлэ. Залэ вазьгес лыктэ, ато интытыэк кылёды.
• 31 южтолэзе Земфиралэн концертэз. Тууууууууууууж потэ вал мынэм!!!!!!

Со сяна куча мукет ужъёс на: яратон, сиён, дышетскон, тунсыкъяськон, азьтэмъяськон, адямиосты "шонер быръён" лэьтыны юрттон....

Кыӵе мылкыды мынам та дыръёсы луэ?                     Таӵе: 

Счастье в чистом виде: грубое, природное, вулканическое 

Пичи воргорон

23 тулыспалэ, ӵапак со нуналэ, мыным туж тунсыко суред  адӟыны кылдӥз. Пичи пияш лымы вылтӥ нюжтӥськыса кытчы ке но мынэ. Прямо по курсу нылпи шудон инты, отын сыӵе аресъем ик нылъёс шудо. Сузэреным со доры матэге лыктыны малпам. Со, главное, маскировачкем ай. Кымессэ ватэ шапка, нош бамъёсыз но нырыз шарфикен бинямын. Синъёсыз гинэ чиляло на. Куараезъя гинэ тодмай, со матысь бӧляк эшелэн племянникез шуыса.

 Со озьы нылъёс доры мынэ вылэм! Автоматэн, типа АК-47. Со даже позироватьтӥз милемлы. Шаплы пияш, будэ вуоно зэмос воргорон!

Ми оьы дядяй доры мукет гуртэ сузэреным потӥм вал. Утялским со дорын. Туж яратко пересьъёсты. Соос котырын шуныт омыр уя кадь потэ.

Оло вань, оло ӧвӧл

Выль Ар бере мукет форматэ выжо. Али мынам копак зачётной арня мынэ: дышетсконъя но, вань ужъёсме быдэстонъя но, вань малпанъёсме радъянъя но. Йылпумъянъёс одно ик лэсьто ай, нош али огзэ гинэ верало:

                                                                  Мон оло вань, оло ӧвӧл!

Соин ик вуоно арын мон кулэ карисьлы котьку мед луом. Тыршо. Таиз ар переходной мед луоз. Али тодко ни, кыӵе удысын мон асме узырто но возьмато. Малпам ӵектосъёсме улонэ пыӵато!
Матысь дыре ышо кык арнялы, кошкисько кунмылэн шунды ӝуӝан палаз. Нош собере кутском! Кыйлэсь кышкасько ке но, азьлань мынон понна, кышканэз пачкатоно) Озьы ведь, эшъёс!