Утчасько

среда, 25 декабря 2013 г.

Калашниковез Мускоын, пе, ватозы.

Вадлян, 23.12,  ӝыт, команатаысь ӧсме усьтӥ, пырыса гинэ вуттӥ но, нылъёсмы шуо, Калашников кулэм, Калашников кулэм. Мон мынясько, мылкыды умой, шор площадьын нискыламы, киное ветлӥмы. Тӥни ӵапак "Хоббит" киноез учкыку, Калашниковлэн "дырыз вуэм". Собере Такъян жингыртэ, нош ик мыным со иворез вера. Пыӵал лэсьтӥсьлэн кулэмез бере час но ӧз ортчы, нош ӝыны кун та иворез тодэ вал ини.

Табере Смирновлэсь пыӵалзэ ушъяны кутскозы ни. Табере Калашниковлэсь шойзэ воксё Муское лэзё. Смирнов вордскем музъемаз кылле, но Калашниковез мурт сюе согозы?

Со Удмурт шаерын улэмын ук. Уг валаськы, малы сое Муское ватыны кулэ шуыса. Со Мытищи шуоназы Калашниковтэк кулэм муртъёс уг тырмо-а мар-а? Кин пӧлын, кӧня муртлэн лыосыз вылын, кӧня сантиметр (кыӵе метр на!) сю улын со кыллёз? Мон Калашников интые вань ӵыжы-выжыосызлэсь кӧтъёссэс, изьыкузы, кырмасал.

 Ма пересь луллы кулэ на, вордскем музъем, дуно шаер сяна? Юнме, дарманьто ини. Муско, Муско. Мусколы пыӵал гинэ кулэ, кыӵе дано адямилэн улонэз на солы, солы сотэк но тырме. Дано адямиез пичи калыкез но вордскем шаерез, гажаса, уте но вордэ. Анай кадь.

Тодам вайи на, школаын дышетскыкум Контр Страйк шудонэз яратӥсько вал. Одно ик Калашниковлэсь автоматсэ утчаса ветлылӥ. Кельше вал соин террористъёсты вийылыны.



вторник, 24 декабря 2013 г.

Куазь сярысь.

Лымы шуна, асфальт вылын ву пуке, омыр кот, сюрес вылын ӝожон. Мар та, мар та? Нош арня ортчыса Выль ар! Туннэ университетысь бертозям, куанер сапегъёсы котмыса быризы. Нош Тол Бабайлы дунне.

2011 арын Донецкын та дыре писпуоссы вожектыны кутскиллям, бадьпуосы пучыос потӥллям. Я бон, Донецк палан оглом куазез ик шунытгес но.

Куке но лымытэк но Выль ар пумитаммы вань. Анай-атайёс тодо на. Нош ми пичигес дыръя, музъем ик кезьытлэсь пилиськылэмын вал, нош ватыны сое немаин. Туж зол висиз, дыр, со толэ музъем, Туж зол курадӟиз, дыр, Кылдысин. Яке соку Кылдысин Куазен керетӥз, яке Инмарен.

Али, оштолэзе лымыез возьмаса, нерад луиськиз. Толсурлэн кутсконаз Куазь лымызэ лэзиз ик.
- Мар ке но та туж зол жобаськыны но, толаськыны но кутскиз. Оштолэзь понна лымы усе -а мар-а,- шуисько анайлы.
- Со Мускоысь циклон лыктэ. Эшшо ог-кык арня, пе, со кузёяськоз на.

Нош али Европатӥ анлантический циклон, пе, ветлэ. Соин йырин ми пала шуныт тӧлъёс вуо, омырлэн температураез 10 градуслы шунытгес луэ. Озьыен, циклон ӧз пуксьы ке, Выль арлы лымылэсь номыр но уз кыльы ни. Тӥни мар.

воскресенье, 22 декабря 2013 г.

Шаурма. Колбаса. Кыстыбей.

Мырдэм-мырдэм катоке но вуи. Одӥг нуналэ укнотӥ усись лымы шоры учкыкум, коньки вылын нискыланы чидантэм мылкыд  ӝутскиз. Пичи дыръям нэнэй дорысь коньки шедьтӥ вал. Со 40 размеро пыдлы. "Собере мар?" шуыса малпай но эшъёсме гурт тымет вылэ конькиен нискыланы поттӥ. Али уг валаськы, кызьы ми нискылам. Конькие пыдесозямы выйим вал, дыр.

Куазь шуныт. Но тол бамъёсме чепылляз ик. "Яблоклэсь но гордо бамъёсы" луизы. Кӧты сюмаз на. Вузкаронние мынытозямы, одӥг интыысь шаурма кылэз адӟим. Пырим. Азямы азер выж вылысь лымыез ӵуже вал. Тӧдьы дӥсен. Кускыз пась. Валаськоды дыр кыӵе суред ми адӟим. Быдэсак тӧдьы мугор вылын сьӧд, гоно кус пиштэ. Нош ми шаурмалы пырим. Пичи укнозы доры матэктӥм, нош мини-кухняязы со азеръёс кык кузя. Тани таиз, гоно кус, эшшо отчы чуртнаськыса пыриз на. Пыриз но милемлы шаурма лэсьтыны кутскиз. Али гинэ ӵужиськиз, кизэ ӧз миськы, ми азьын ик ваньзэ лэсьтӥз. Ма я ини, табере коть одӥсько, кызьы шаурма лэсьтӥське, но кызьы сое лэсьто таӵе интыосын.

Чималиен "Колбаса" спектакле вамыштӥм. Бере кылиськом вал ини, соин ик кыштыр гинэ гидкуазьёстӥ кошким. Вуттӥм. "Les Partisans" театр мыным кельше, соослэн вань одӥг стильзы. Али тани валай, вань шудӥсьёссы огвыллем шудо шуыса. Соин ик вань спектаклъёссы огвыллемесь луо. Юнме шорысь ӟуч спектакле удмурт кырӟанъёс лэзьязы. "Глазовский вотяк" шуыса кырӟаны кутскизы но, сюлмы ик чутрак луиз. Кырӟанлэн котькуд кылыз чигем венен сюлмам бышкалскиз. Не в тему вал, воксё.

Гань-гань, жадемме валаса, огъяулонние вуи. Татын туннэ шыпыт. Кыстыбей лэсьтон атмосфера. Огез картошка кисаль пӧзьтэ, мукетыз кыстыбей погылля, куинетӥез сое пыже. Нош сиськыны пуксьыкумы: ньылетӥез чайнике ву вае, витетӥез кружкаосмес миське, куатетӥез турын чай лэсьтэ... Оглом ваньмы. Тау! Кыстыбей туж ческыт кошкиз. Аслам ке, аслам ини, мар шуод на. Эшшо эшъёс ке вӧзын но анай кыл кыл йылын.

среда, 18 декабря 2013 г.

Тылобурдоос

Туннэ сыӵе шуныт куазь вал. Таӵе тол мыным кельше. Толон концертысь бертыкумы, чиньыос но маръёс но кынмыса усьыло вал ини. Нош туннэ пальпотэмысь ой дугдылы.

- ӝоген тулыс вуоз ини, - шуэ Лариса, одӥг комнатаын улӥсь нылаш, - шыркичъёслы каръёс лэсьтыны кутсконо ини.

Тодӥсько на, кызьы, сӥльёсмес пакетэ поныса, кыре ошиськом вал. Нош пислэгъёс лыкто но пакетэз кокчаны кутско. Тӥни озьы студентъёс тылобурдоосты но утё, асьсэзыс но обидэ уг кельто. 

Дыдыкъёс канализационной люкъёс вылын шунтӥськыса пуко. Нокинлэсь но уг кышкало, пештырско но ӝутскись шуныт омырез гонъёсынызы бичало.

Физкультураысь бертыкум, йыр вылтӥм лобась дыдыкез синйылтӥ. Со, кинэ ке утчаса, куд пала кожыны тодытэк кадь, лобаз, лобаз но укно шоры пыриз. Таӵ! пель дорозям вуиз. Куанер дыдык, кинэ меда со укноысь адӟиз? Номыре валатэк, со нош ик бурдъёсыныз шонаны кутскиз но син азьысьтым лобӟыса кошкиз.

Яке тани сюан дыръя, тӧдьы дыдыкъёсты инбаме лэзё. Соос кышноен картъёслэсь яратонзэс вылӥе ӝуто кадь но котьку сюлэмъёсазы кельто. Нош со дыдыкъёс эрикоесь ӧвӧл ук. Соос берен асьсэ кузёзы доры берытско. Нош яратон, кудзэ выль семья дыдыкъёслы оскиз? Пытсэт сьӧрын, дыдыкъёсын ӵош.

Туннэ зэмзэ ик шуныт куазь. Комнатаям туннэ трос адямиос вуылӥзы, соос шунтӥзы котырме. Юимы турынэн чай, но тылобурдоос сярысь ӧм вераське. Ларисамы гинэ, со котькуд минут шырчикъёслы каръёс лэсьтон сярысь малпаське.

вторник, 17 декабря 2013 г.

"Активатор". Чуралиос.

Бадӟым классъёсын дышеткись чуралиослэсь гожъямъёссэс лыдӟыса потӥ. Оглом вераса, соос пӧлысь ӝыныез огшоры ужрадъёссы сярысь ивортон сётъяллязы. Отын ортчиз, яке ортчоз... Нош асьсэлэн малпанъёссы ӧй вал. Блог мон понна - со адямилэн малпанъёсыз, аслаз дуннеез, кудзэ со усьтэ мукет адямиослы. Висъям потэ вал Настя Лебедеваез. Солэн вал аслаз ӧрез, со мода сярысь гожъя, ачиз но дӥськут вуре, киужен выре. Блогысьтыз нылашлэсь ужъёссэ но адӟыны луоз. ӟечок. Солэн блогез татын.

Тросэз асьсэ школазы сярысь гожъязы. Туж умой. Табере тодӥськом, кыӵе улонэн уло соослэн школаоссы, маин туала школаын дышетскисьёс выро, тунсыкъясько. Гожъяськон культура ласянь блогъёсты учкид ке, тросэз уг чаклало шонер гожъяськон катъёсты, янгышъёсын гожъясько. Али дырлы блогъёсты лыдӟыны ярато. Адямиосты но астэ гажан вылысь чакласьконо, дыр, кӧня ке.

Тросэз блогъёс удмурт кылын но нуиськизы. Тани Мария Туроваез, удмурт кылын постъёсыз понна, "Дарт" газет висъяз. Зэмзэ ик-а анай кыл туала луыны кутске ини. Тани аслэсьтым школа аръёсме тодам вайисько ке, паймисько. Мон ас поннам ӟуч кылын вераськыны яратӥсько вал, яке немец кылын. Малпаськисько но вал ӟуч кылын. Эшшо ӟуч кырӟанъёсты немец кылэ берыктылыса ветлӥсько вал.  Нош али йырам удмурт кылъёс бергало.

Ваньзэ тае лыдэ басьтыса, нырысетӥ инты Италмас лицейын дышетскись Паша Вахрушевлэн блогезлы сётэмын вал. Озьы ик кулэ вал луыны. Солэн вольыт кылыз, катъёсты чакла, визьмо, аслаз малпанэз вань. Туж дӥсьтӥсь, мерлыкын аслэсьтыз интызэ тодэ, кылзэ но вераны уг кепыра ни. Но одӥгзэ пусйысал, кызьы Бикузин Женя шуысал, гожъяськон амалэз "академической".

понедельник, 16 декабря 2013 г.

Кылбуре Екатеринбургозь вуиз.

Проводникъёслэн отрядъёссы ОСТО "ЭКСПРЕСС" ним улын ужало. Со организацие пыро Удмурт шаерысь, Киров но Екатеринбург улосвылосъёсысь отрядъёс. Таяз арын солы тырмиз 45 арес. Солы сӥлы карыса, кылбур гожтыны косӥзы. Мон но гожтӥ - удмурт кылын. Косӥзы вал ӟуч кылэ берыктыны, мон пумит луи, со мынам кылбуре уз луы ни шуыса. Табере тодӥськоды- а мар! Тани.
Комментарийзэ но кылбурзэ пыр-поч лыдӟид ке, оло бӧрдод, оло серекъялод. Кылбурын вань кылъёс лякылэмын, нош мон умой вриант лэзи вал. Эшшо со газет Екатеринбургын потэмын на. Эшшо со пуктэм юан. Ижкарын отрядъёс Екатеринбурглы пумит уж нуо кадь. Нош со ваньмыз одӥг адямиен йырин, кудзэ Екатеринбургын националисткаен лыдъяло, дыр. Мыным гинэ-а озьы меда потӥз? Яке редакторез сокем эксцентричной, но журналистикалэсь этиказэ валасьтэм адями. Яке ачим сыӵегес. Но кин меда тужгес но умойзэ берыктэм кылбурез бырйоз? Екатеринбургын тодо удмурт кылэз? Ачим ик - а мар-а эксперто ӧрие куриськоно.

четверг, 12 декабря 2013 г.

Сьӧд пиджакъёс.

Немар карыны шуыса, юнме укно доры султӥ но пелляськем шоры учкисько. Университет. Корридор. Мон вӧзын кык воргоронъёс верасько. Соос вылын чылкыт костюм, ымныръёссы но вӧен кадь маллямын.
Огез мукетызлы шуэ:
- Со кулэтэм слухъёсты быдтоно.
-Я, - шуэ мукетыз
- Тазьы верано, озьы кароно, мед мукетызлы оскозы.
- Лэсьтом.

Кизэс ог-огзылы сёто но люкисько.

Тӥни мар милям котырамы берга. Кызьы потэ, озьы ик вылӥысь адямиос мерлыкез посо. Нош ми оскиськом ини. Милям ужмы пичи: соосъя улыны. Милям эрикмы но гань-гань улонмы "вылӥ адямиослэн" малпам катъёсазы. Йырам Джордж Оруэллэн "1984" нимо романэз йырам лыктӥз. Адямиос валантэмез уг ярато. Соослы кулэ ваньмыз конкретноез.

Ну и оске, малпай ас поннам, но озьы ик, пелляськем шоры учкыса, укно дорын сылыны кыли.

вторник, 10 декабря 2013 г.

Испан ӝыт

Испан ӝыт. Туннэ мында кунгож сьӧрысь вуэм адямиосты ӧй адӟылы на вал. Татын кореецъёс но, испанецъёс но, полякъёс но. Нош пӧлазы удмуртъёс. Именно удмуртъёс.

Туж шуныт но тунсыко ортчиз. Уг тодӥськы вал, Коррида дыръя ошъёсты виё шуыса. Огшоры вормо но пытсэт улэ улляло гинэ кадь потэ вал. Ошъёс жаль потӥзы. Я коть али Коррида Испаниын катэн лэзьымтэ шулдръяськон каремын. Вань на соослэн мукет фестивальёссы.
Кылсярысь, помидорен лэзьяськон, горд помидор "зарезь" пӧлын уян. Та юмшанын 150 тонна помидор, пе, кутӥське. Эшшо соос ошъёслэсь пеганы ярато на. Кыӵе ке ульчае ош уллёез лэзё но, етӥзъёсызгес соослэсь пегӟо.

Кӧня адреналин пальккиське! Ошъёс лёгалозы но ужзы быриз. Соос туж-туж пӧсь йӧскалык, лэся. Шулдыръяськоназы но вань сюлэмзэс поныса юмшало, дартзэс котыр пазьго, тул-тул! Мынам но сюлмам куддыр сыӵе мылкыд ӝуатске.

Испан кырӟан кырӟам, коктейль юим, испан вераськемез кылӥм. Нош пумаз... Пумаз испан эктон дышетӥм. Киынымы улмоез вай бордысь ишкалтӥськом, сииськиськом но мышкамы куштӥськом. Грацио.

Пумаз перепеч сиеме потыны кутскиз.

 http://instagram.com/p/hv3JeFMJ8p/


пятница, 6 декабря 2013 г.

Ванялэн но 4 чебер пиослэн концертазы.

Тодисько на, кызьы нырысьсэ удмурт егит кизилиосын концертэ ветли вал. 10 классын одиг школаын дышетскисьёсме " Амисо Вотт" группаен гочати но "Бадзым буд, шаере!" концертэ шонти. Кыче мынам синъёсы жуатскизы соку, сюлэм золгес кокаськыны кутскиз, сыче шумпоти. Эшъёсы но удмуртлыкез ултияса возись зибет улысь мозмытскизы. Тани туннэ Белослудцевлэн концертаз но сыче ик лоптэм мылкыды вал. Школаын дышетскыку, амисовоттъёс мыным выль дарт кузьмазы, нош али - Ваня но 4 чебер пиос? Озьы, дыр. Тау.

Вотэсын та концерт сярысь трос малпанъёс гожтэмын вал ини. #вашкала сярысь верад ке: шонер-а овол-а ваньзылы тодмо калык луэм кырзанъёслэсь крезьгурзэ воштыны? Зэмзэ ке, ачим но уг тодиськы, мар та ласянь вераны. Но мыным туж тунсыко вал. Со вал группалэн аслаз крезьгур тулкымез, вуж кырзанъёсты асьсэ сюлэмзы пыр поттонэз, аслобонэз но улон шоры учкемез. Соослэн вань асьсэ стильзы, кудиз мукет стильёс полысь висъяське.  

"Les Partisans" театрэз туж гажасько, постановкаосазы ветлисько. Мон соосты адзисько ке, соку ик син азям пуксё тодьы но горд буёлъёс. Руководительзы тодьы йырсиё но весь горд юбкаен ветлэ, соин дыр. Тани татын но соос вал горд но тодьы костюмъёсын, образъёсын.
Актёръёс трос кузя ке но, котькудиз соос полысь шудэ, котькудизлэн синъёсазы кыче ке мылкыд адзиське.

Возам кыче ке зуч пиос пукизы, инстаграммитьтыса. Нош мон интыям куд-ог дыръя ситянэным выртыса, киосыным шонаса, пуки. Шумпотонэ уртчемын вал. #туала понна.



среда, 4 декабря 2013 г.

Огъяулонни пурзиз.

2 час уйин. Милям огъяулонниямы улон бугыръяськыны кутскиз. Милемлы пумит комнатаын весяк очникъёс уло вал. Кылем арысь отысь ваньзы кошкизы, жыны ар комната буш кыллиз. Тани али отчы пиос пыризы, заочникъёс. Соослы сессия дыръя немар карыны ук, соин нылъёс дорти ветло. Ми доры но пыраллязы вал, чайник куризы. 

Так вот. Соос одиг нылъёс доры чемгес пыралляны кутскиллям, шуры-муры отын да мар да. Со комнатаысь ик ныллэн пияшез вожаны кутскем. Кутскиз ук табере. . .  Уйшор берегес ик вань крылоысьтымы пиос со заочникъёсты интыязы пуктыны лыктизы. Кесяськизы, кесяськизы но пазьгиськизы. Тани кык час ортчиз но нош ик кесяськемъёс кылиськыны кутскизы. Заочникъёс нош ик со нылъёс доры лыктиллям лэся, нош вожась туган отын пуке вылэм. Жугиськизы мар.

Кемалась таче страстьёс ой вал ини. Кылем арын гинэ тини юыны яратись спортсмен весь мыжыкеныз сэзъяськыса ветлэ вал. Аракы гульымзэ коттэ но ачиз урме. Нош та учырын яратон-яратон лэся. Пось пиос. Нылъёсты утисьёс. Крылоысьтымы пиос эшшо вань нылъёслэсь юаса ветлизы на, оз исалэ -а соосты заочникъёс шуыса. Зечесь.

Заочникъёс кошкизыке, нош ик шыпыт но мусо луоз ини дыр. 

вторник, 3 декабря 2013 г.

Киное ветлэм сярысь

Нош ик Ижкар. Нош ик уй. Шутэтскон нуналъёс  адямиосты коркаосысьтызы потто. Геналэн синпелетэз вылти нылпиос тэтчало. Нокыче анай-атайёссы матын но овол. Кыдёкынгес сэзъяськыса воргорон кошке. Эшъяськон кинокуа возын адямиос люкаськемын. Уйшор. 

"Адельлэн улонэз" нимо киное мынисько. 

Огнам лыкти. Алигес валай, мон кадь малпаськись адямиос ожыт шуыса. Соин ик нокинэ чертыса ой кыльы ни. "Небесные жены луговых мари" киное эшме черти вал но, со куанер мырдэм -мырдэм учкиз. Жаль ик потиз. Я, Пукси. Кино кутскиз, жыны зал буш, нош вань интыосы билетъёс вузамын. Ооо, нырысь дас минутсэ адямиос пыраны кутскизы. !!!!! Уг яратиськы. Мар мукет адямиослы люкетыса ветло, дырыз дыръя вуэмзы уг луы - а мар-а. Я, шыпытгес луиз. Шутэтскон нунал но уйшор бер бере, валаськоды, дыр, кыче состояниен адямиос пуко. Кыти ке зал пумын нылъёс весь серекъяса пукизы, огпал пуконын пукисез воксё умме усиз, нош мукет палысез котырысь вина бервыл зын лосъяськиз, вылаз со сумкаысьтыз бальзамзэ куддыр потталяз на. Йыр ик пормыны кутскиз. 

Кино бырем бере, кыштыр гинэ берти. Куазь шуныт, машинаос ожыт, чус но югыт. Кино оглом кельшиз. Вань мар понна Пальмовой ветвь сётыны. Нош шутэтскон нуналъёсы но эшшо уйшор бере на киное огнам уг ни ветлы. 

понедельник, 2 декабря 2013 г.

сяська

Та нуналъёсы кылем арын лымыез тросгес вал.  Таяз арын ожытгес. Кылем арын туж кезьыт но чус куазь вал, таяз арын шуныт но пелляськись. Кылем арын вось вал, таяз арын чидамон.

Таяз ар вообще интересной вал шуыса, вазиз мыным Чимали.

Сяська тол куазен кынме шуыса, гожтиськем на. Эше шуиз:"Нош выжыез кыле, но тулыс выльысь вордиське". Озьы. Соин ик юнме овол. Ваньмыз шонер. Тулысэз возьмано.

Толон таче малпанъёс мынам лобась йырам вуизы. 

суббота, 30 ноября 2013 г.

Гожтэм книга тузонзыса кылле

Туннэ "Столица" вузаськонниын показ вал. Аслэсьтым ужме быдтэм бере, сузэреным сиён басьтыны кошким. Со куспын жокмы сьоры мукет адямиос пуксьыса вуттилям ини. Соин сузэреным огназ пукись кышномурт возы пуксим. Со котьмае тодэмез потись вылэм. Нырысь мода возьматись нылъёсмы сярысь малнъёссэ вераз, выли модаен чошатиз. Мон, пе, вал сыче диськут возьматонъёсын, да марда. Собере агенство сярысь юалляськыны кутскиз.

Со но мар валэкти, соглаш луиз. Кыче бон гуртысь шуыса, юаз на. Пуроысь, шуисько. Табере топонимика сярысь юалляськыны кутскиз. Ваньзэ валэкти, малы отын Байситово, малы Пуро. Ушъяз, тросэз гурт нимъёссэз уг тодо ни ук.

Маслова Татьяна Васильевна - озьы вал кышномуртлэн нимыз. Со Удмурт шаерысь гуртъёслэн нимзылэсь семиотиказэ эскере. 150 гуртлэсь нимзэс гожъям ни, табере, пе, книга поттыны уксё люкасько. 60 сюрс манет кулэ.  Зеч уж)

Котьмар уксё борды пыкиське, мар шуод на. 

#тодмотэм

Мар улонын тужгес но вось карисез?
Ку тон возьмаськод, возьмаськод, малпаськод, кызьы луоз? Нош ваньмыз юнме. Со яратоноосын озьы. Соосты гинэ возьмаськод, соос возын гинэ астэ адзиськод. Со адямиос сярысь гинэ овол, лултэм арбериос сярысь но.

Тани алигес мынам ноутбуке мон вылэ куатаськиз но киысьтым выж вылэ тэтчиз. "Табере йыртим кутыса уд нуллы ни" - шуиз, дыр. Нош зэмзэ ке, мынам со тужгес но яратоно эше вал. Со котьку мыным юрттылиз. Нош мон, неблагодарной нылпи, сое ой гажа.

Яке, али "Столицаысь" бертыку, сузэреным азбаръёсти кошки. Кыче ке но воргорон, Надя, Надя шуыса монэ оте. Мон берытски но беренвази: " Здравствуйте, к сожаленью меня зовут Маша и фамилия совсем другая, не Надина". Со жожомиз, йырзэ лэзиз но, омырез чыжаса, азьлань кошкиз.

"Секрет" кино алигес учки. Отын вераське, кызьы асьмелэн малпанъёсмы улонэ пычало. Зэмзэ ик озьы. Коть оске, коть эн. Но Вселенной малпаськыса уг кылльы, мае тон йырад кемагес возиськод но чемгес син азяд пуктылиськод, со ик тон доры матэктыны кутске. Уродэз сярысь ке малпаськиськод, уродэз лыктэ, умоез ке- умоез. Соин ик, тырше чемгес умоез сярысь малпаськыны, чем эн вожъяське, эн уродъяське, соку тиляд улонды  шуныт тылын пиштыны кутскоз. 

четверг, 28 ноября 2013 г.

Пычал поттись шаер

Алигес Удмурт шаерамы Путин вуылиз вал. Калашников доры пырам, зечкылам сое. Но со нуналэ ик кошкем. Гуртэ берти но анай-атайлы верасько ини:

- Путин Ижкаре ветлэм. Калашников доры лыктэм, кузьым сётэм но берен Мускояз кошкем.
- Кыче кузьым? - юа мынэсьтым анай.
- Уг тодиськы, - шуисько.
- Кулонтэм эмъюм? - серекъя анай.
Вераськон  вискамы Ванягай пыриз:
- Калашниковез кемалась вийыны одъяло ини. Никоновлэн автоматэз умойгес, пе. Но пока Калашников уз кулы, Никоновлэсь автоматсэ лыдэ уз басьтэ.
- Кыче дан ини Калашниковлы, - вази мон.

Ма мар карод на али, Геннадий Никонов но кулэмын ини. Тайзэ конструкторез Калашниковлэсь вылиегес жутонлэсь кыче толыкез на. Малы со кулэ?

Куддыръя потэ, Ижкар со конструкторъёсын но пычалъёсыныз гинэ тодмо луэ шуыса. Путин но тини Калашниковез сяна, номыр но асьме шаерысьтымы уг шедьты лэся. Тини мар кулэ милям кунмылы но солэн выли азьмуртэзлы. Алигес Со шуылиз вал, котькуд адями, солэн культураез, национальностез кун понна валтись дун луэ шуыса. Ыы. Озьы лэся, но уг шодиськы малы ке но. 

среда, 27 ноября 2013 г.

Арган куара

Берпумети толэзьзэ куддыръя укно сьорысьтым арган шудэм куараез кылисько. Со куараос пель дорозь вуо ке, соку ик укно доры мынисько. Учкисько, учкисько но нокинэ уг адзиськы. Та дырозь мыным тодмотэм вал, кинъёс озьы арганэз кыскаса ветло. Татын со, Ижкарын, нош мон огъяулонниын.

Туннэ но тани арган шудэмез кыли. Озьы ик кыштыр гинэ укно борды баменым жиптиськи но адзи. Туннэ мон адзи арганчиез. Со "Чипчирган" ансамбльысь выль пиос вылиллям. "Перепечкинэ" мыно, дыр, шуыса, малпай. Кин ке мыным киыныз шонай. Берлогес тодмай, Женялэн мугорыз кошке шуыса.

Кин тодэ, мукет нуналъёсы соос ик яке мукетъёсыз, арганэн шудыса, мынам укно ултим ортчылизы. Я коть, арган куараез но карысь кылисько, ато та "Спирит маркетысь" кесяськем куараос пелез куддыр вандыло. 

вторник, 26 ноября 2013 г.

Анайёс.

Огпол гуртэ бертыку, автобусысь тодмоме адзи. Со- пинал анай, семьяез возись. Пиез малыке но сьораз ой вал, азьло соосты  котьку но чошен адзисько вал. Анайлэн кияз бадзым пыр адскись пакет вал. Валай: со пиезлы салам вае - выль шудонъёс, ческыт сиёнъёс. Тодисько на, кызьы городмамае борды бызьса мыныса  зыгыртскисько вал. Со, угось, арнялы огпол гуртэ вуэ, но милемлы одно ик кыче ке салам вае вал. Пинал анай нылпиез сярысь сюлмаське.

Адямиос котькычеосыз вань. Мукет дыръя Ижкарын автобусын мынисько. Чугун сюрес вокзал палан анай пуксиз, возаз кык нылпиез. Одигезлы 8 аресъёс пала, нош мукетызлы -3. Нылпиосыз кырсесь, аслаз ымнырыз торнамын. Пичи пиезлэн мугорыз бадзым ке но,  анай сое кияз возе. Автобусын калыкез ожыт вал, соин ик мон соос сьоры учкылыны кутски.

Бадзым нылыз рюкзаксэ усьтиз но соскаен бутылка поттиз. Бутылка кылем йолын курмемын вал. Анай озьы ик отчы сок пониз, ворсаз, сэзъяз но пиезлы сётиз. Вань курмем йол сокен гылтиськиз, нош пичи пияш сое шумпотыса ик юиз ни. Собере анайлэн киосаз уме усиз. Малы малпасько, анай сое пыд вылаз уг пукты, пияшлэн пыдкутчанэз вылымтэ, гольык пыдъёсыз мачаесь. Куанересь но шудоесь. Нылаш анаеныз мыняса вераське, мар ке сярысь юалляське, нош анаез солы валэктэ, уг кесяськы, эшшо изись пизэ гадь бордаз жиптэ на.

Сюлмы шуг луиз.

понедельник, 25 ноября 2013 г.

Огдырлы ке но, мед берен пичи пиналлы пормысал.

Кемалась тазьы гуртэ бертылэм вал ини. Анайлэн мылкыдыз лоптэмын вал. Ми бертон нуналъёсы уж дораз шутэтскыны маза сётиллям. Со кык нунал Милемыз порамен сюдиз. Вот, малсько, жумми ни кадь. Зокталаез мертан вылэ султи но, коскай: эшшо золгес куйиськем на. Зэмос удмурт пияшлэн идеалэз луисько ини. Удмуртъёслы кой, зок пыдо, кузь йырсиё, тукыль бамо, векчи синмо кышномуртъёс, пе, чебер йото.

Чукна монэ Ванягай пичи нылпиез кадь сайкатиз. Пукон вылэ мыным пумит пуксиз но монэн вераськыны кутскиз. Кырын пеймыт на, кезьыт, нош корка паймымон шуныт потиз. Султы, шуэ, чай ю, каллен дасяськы, эн дырты) Со котьку мынэсьтым сапегъёсме кремен малляса кельтэ. Италмасэ дышетскыны но келякуз, котьку пыткутчанэ чиля вал. Али но тани ос азьын сапегъёсы шумпотыса сыло, пыдкуке вунэтиз вал ни дыр, ку сое берпуметсэ кремен зыразы.

Туннэ мыным Инмар шуд сётиз: Ижкарозь ик машинаен лыкти. Уг яратиськы автобусэн ветлыны, со трос интыосы дугдылэ, соин ик дыр юнме быре. Но автобусын астэ липет улын кадь кожаськод. Котырад трос адямиос, соос тон котырын сю полэс борддор кылдыто кадь. Тани чукна машинае пукси но сюлэмы кышказ: пичи инты, возам арлыдо пиосмурт, азьпалан шоре донгиськись сюрес. Шумахер кадь, одиг час интые жыны час куспын Ижкаре вуим. Нош машиналэн мыш пуконъёсаз пичи нылаш нылпи креслоез борды думемын вал. Куанер огназлы мозмыт луылиз лэся. Куддыръя "папа, папа" шуылиз, "ать". Атаез но солы "ать" шуыса вазьылиз.

"Ой, нылы, нылы". "Ать, мусое!", "Куто, куто, куто..." Нылпи яратон полын будыны кулэ. 

воскресенье, 24 ноября 2013 г.

"Огни" номыр о:з кары.

Туж кельшиз ИСК факультетлэн постановкаез. Шуди:з оди:г адями, пал кыл но о:з потты, но вань сюлэмшугъяськонъёссэ выросъёсыз пыр возьматыны быгати:з. Ч:уж занавеска- озьы нимаське вал сценказы, кышкась адями сярысь. Зал шыпыт пукыса, учкиз, кызьы адями ч:уж занавескалэсь кышкаса улыны быгатэ. Туж таланто пияш.

Нош яратоно журналистикая факультетэ "мукет адямиосты" кужмо пуктэм"Человек-подушка" постановкаеныз паймыти:з. Мон кызьы малпай вал, озьы ик шуди:зы. Тани куать ар соос огкадь шудо ини, вань геройёссы, выросъёссы, шудон амалъёссы арысь аре оди:г адямиен, шонерзэ вераз ке, кык адямиен, лэсьти:ське бере, мон понна со ческыт о:во:л ни. Браво! шудэмзы понна. Но, кызьы дунъясь о:ри пусйиз, авторлэсь сьо:д юморзэсоос о:з валалэ, но ваньзэ туж серьёзно пукти:зы. Нош тач:е пьессаосты озьы пуктыны кулэ о:во:л, со кышкыт. Яке радъясьёсыз но сыч:е ик кышкытэсь-а? Университетэз быдтыса но татысь кошкемзы уг луы, интыязы пуко кадь)

Адз:ом ини, таяз аре но тужгес умой шуди:сь понна синмелет басьтозы-а, яке уз-а?Оглом кельшиз, но потэ вал ини журналистъёслэсь мукет шудэмзэс адз:ем. 

четверг, 21 ноября 2013 г.

"Огни" паймыт:из

Толон "Огни большого вуза" вожвылъяськонын Дикий трэш вал со, кызьы шуысал Таня нимо эше. Вань спектакльёс по:лысь висъяськиз Удмурт филология факультет. Мынам уг поты шуэм, со удмуртъёс, соос озьы быгати:зы шуыса. Кызьы быгати:зы? Кызьы со ОЗЬЫ? О:во:л. Ваньмыз вал огшоры, шуди:зы огшоры, актёръёс кадь театрально о:й вал. Темаеныз туж чакласькыса ужано луиз, дыр.

"Ваньмон дыр" гожти:з ни та спектакльзы сярысь. Вакчияк сюжетсэ отысь быгаткоды учкыны.
Мынам реакция сярысь потэ верам. Во:зам пукись нылаш, журналистикая факультетысь кыкети: курсысь, шуэ: "От кого, но от удмуртской филологии я этого не ожидала". Гогы, малпай ас поннам. Мон но ко:ня ке асме вень вылын кадь пукко кожай, но берпумети: судэн сцена, монэ во:й п:олы сэрпалти:з - мон куани:, мон шумпоти:. Журналистъёслэн нош ик луоз бо:рдон, туж мур малпаськыти:сь тема, яратон, деградация... Зэмзэ ке, куддыръя акыльти:сько со сентиментализмлэсь. Туннэ соос сцена вылын луозы. Учком, мар по:рмоз. Котькуд ар соосты пусъё.

Ваньзы гань-гань пуко вал, нош Удмурт филологиялэсь спектакльзэ учкыку, тросэзлэн тыбыръёссы шонерскизы, синъёссы шузимизы, тросэз серекъяз, факультет понна возьдаськиз. Тросэз султыса кошкизы.

Кин кызьы та ласянь малпа ини. Нош мон малпасько, со вал-эрик. Мелэ ти:ледлы кадь. Со улонлэн оди:г палыз. Жюриос но кыклы люкиськизы: кин ке шуиз, туж зол пуктэмын вал шуыса, нош кин ке, тышкаськиз, оди:г пичи но художественностез о:й вал шуыса. Театр - со искусство ук. Иське искусство - со мар?

Мынам ко:ты тыриз "треш" шуонэн, но  спектакльлэн пуштросэзъя маиз ке но о:з тырмы. Смыслзэ быдэсак о:йгес вала, дыр. Мыным кулэ вал пичи ке но мар ке пушкам пыч:атыны. Жаль, о:й шедьты мае пыч:атыны. 

среда, 20 ноября 2013 г.

"Огни" вожме потти:зы.

Али УдГУ-ын "Огни большого вуза" нимо театр ортче. Котькуд факультет аслаз постановкаеныз ассэ возьматэ. Ч:апак толон отчы малпай мыныны. Кылем арын но вуыли: вал. Кельшиз.

Нош толон нырысети: ик психологъёс сценказэс пукти:зы. Учкисьёс туж трос, пуксён инты ик о:во:л. Ваньмыз умой мынэ вал, декорациос, шуди:сьёс, куаразы кыли:ське, зал пумын ке но сыли:сько вал. Ло:пшо Педунь поттозь, ваньмыз умой вал) Вань пуштроссэ йыринь-чукинь берыкти:зы. Ло:пшо Педунь- могдос учыръёсы сюрись воргорон- луиз чурыт, нокинэ но жалясьтэм, секси пичи пияш, эшшо гусар ди:ськутэн на. Со сыч:е юмор, дыр, вал, но мон о:й вала. Котьмар шуэ, но Ло:пшо Педунь - со Баба-Яга о:во:л. Эшшо удмурт кырз:ан лэзизы но, сцена вылын з:уч эктон эктыны кутскизы, "Барыня-сударыня" выллем, крезьгурез з:учлы укша вал, соин-а мар-а. Удмурт лулчеберетэз серекъяса но йыринь-чукинь берыктыса кушти:зы кадь. Юан кылдэ: кытын соослэн выли: дышетсконнизы но кыч:е мерлыкын соос будэмын. Соос- кин пути:з та сценкаез. Мон пумозяз учкыны о:й чида, кошки.

Туннэ филология факультет но мукет кыля зол факультетъёс сцена вылын луозы. Туннэ но ветло) 

понедельник, 18 ноября 2013 г.

Факультетмы но ректор

Али кыч:е ке но кашмар факультетамы. Компьютерной аудиториямес басьтыны туртто, нош факультетмес мукет факультет борды ватсаны туртто. Структурализация но укрупнение, пе. Нош ректормылэн факультетэн вераськемез уг поты, неку шуэ, но пумиськон нуналэз кыдёкегес каре. Ачим сюлэмшугъяськыны кутски ини лэся. Вадлян та ласянь уйво:т адз:и.

Студенческой отрядъёсын но со яратэ пумиськылыны, али но нош ик вань отрядъёсысь пиналъёсты люказ. Котьку сямен ик  буш кылъёссэ кытчы ке но кыдёке лэзьяз, нош студентъёс мо:змыса пукизы. Вераськиз но табере милесьтым юанъёсмес возьма. Со куспын сГалина Витальевна  ж:ужыт коркалэн балконаз вуиз, кызьы ке но витети: этаже, дыр. Мон ой чида, юай: " Мар пегаса ветли:ськоды, журналистикая факультетысь деканатэн пумиськонэ уд лыкти:ське, тыбыр мышкын оломар но даурти:ськоды. Киды лыдэ-а мар-а?"
Нош со кытысь ке но витети: этажлэн балконысьтыз: "Мынам дыры вань ыы, мон депутат на так-то, мынам семьяе вань". Нош мон тодко, солэн нокыч:е семьяез о:во:л шуыса. Табере ми соин ч:ош солэн квартираяз вуим кадь. Ог-огмес гань-гань возиськом. Квартираез туж шикарной, Античной выллем. Кыллисько ини табере мон солэн чурыт, сяськаё басмалэсь диван вылаз. Со во:зам пуксиз, но кускиз вераны, кыч:е солэн улонэз урод, нокин но сое уг жаля, уг юртты шуыса.... Со выллем, нош кияз сурен пияла бутылка. Мар мон, кылзи:ськи ини, кытчы пырод на.

Сое но, факультетэз но валано. Солы кытысь ке выли:ысь шуизы,дыр, но, нош со лэсьтэ. Ужез сыч:е. 

воскресенье, 17 ноября 2013 г.

Небесные жёны луговых мари.

Небесные жёны луговых мари

Мырдэм мон отчы вуыли:, ар куспын та кино олокыч:е но фестивальёсын пусъемын вал ини. Ваньзылы со о:во:л, со о:во:л попса. Славчилы о:з кельшы, со мукет адями, со о:з вала, малы сыч:е кино лэсьтыны кулэ вал шуыса. 23 новелла, ваньзы оскон вылэ пыкиськемын. Котькуд нылаш ас понназ аспо:ртэмлыко, со оске но мукетъёсызлы оскон сётэ. Котькуди:злэн аслаз осконэз. Удмуртъёс сыч:е кино лэсьтыны уз ди:сьтэ, дыр. Мари калыкын удмурт но бигер виръёс сураськемын, соин ик соос,  оди:г палысен, инкуазьлы оскисесь, но, мукет палысен, шаплыесь, по:сесь.

Гольык - со возьыт о:во:л. Со чылкытлык. Небесные жёны. Кызьы шуэ Ремарк, кышномуртэз "нужно боготворить, либо оставлять".

Кин яратэ аспо:ртэм киноез, ветлэ, уд жалялэ. 20 числоось мыноз на со. 

суббота, 16 ноября 2013 г.

Календарь вылэ.

Мумыдорын сыч:е мусо пудо-животъёссы: осёл, вал, пуныос...  Ваньзы небытэсь но гуртоесь. О:сэз усьтыса кельти:ллям но соос пегз:изы. Эрик. Туннэ ми календарь вылэ туспуксим. Котькуд ныл- мукет толэзь. 

зэмос "Топ-модельын" кадь вал. Таняез туспуктыку, ч:ын муръёысь поти:з. Ксюша пудо-животъёсты улти:яны выриз. Настя Кузебай Гердлэн кылбур бичетэныз сама романтик. Ирина котьку чебер, котькызьы но котькытын. Мыным туж кельшиз. Табере возьмалэ календарьёсты.

Таиз та "Эльныл" фестивальын. 

Шунды потэ, туспуктись шуэ, поттэ чаляк оштолэзез, шунды ж:оген ватскоз ук. Лымы усьыны кутске, кыштыр гинэ южтолэзь потэ. Ч:ын, чалякгес туспуктоно. Пуны котькуд кадре сюрыны выриз. Модель. Ческыт ж:ук но турынэн чай. Озьы ти:ни. Тау!

пятница, 15 ноября 2013 г.

Вакчияк. Шуркынмон сярысь

туннэ уйин ворди:ськиз выль ч:ектос. Шыкыс, сандык, бубыли, инвис, шу, шупу... Кызьы потэ, нимзэ о:м бырйе на. Турынэн чай юыса, куинь одногруппникъёс. Мон, Дина но Стёпа.

Чуказе султоно вазь. Календарь вылэ шуркынмон толэзез пуктоно. Ярати:сько та толэзез: яратоно адямие вордскиз, кошкиз но бертоз, си:зьыллэсь йо:натэ, выль то:дьы но чылкыт лымы усе, шуръёс кынмо, чорыгъёслы шуныт луэ, чорыгасьёс трос, соин ик вуын ули:сьёс уг ж:окало.
 Ти:ни, вакчияк озьы.

Позыръяськонын

Васькисько выли:ысь пу шонер тубатти: ... Сыч:е кылбуре вань.

Толон озьы  "Пепелац" клублэн корт тубатти:з васькисько. Богданлэн кырз:амез бере, кошкем поти:з вал, шыпытын пукем. Но о:згес по:рмы. Чипчирганысь нылъёс дэра удмурт дэремъёсын но туала Богдан. Ullapalla выллапалась берен уллапалаз берытскиз но Мурж:олысь кырз:аны кутскиз. Уллапалан чебер нылъёс уло, нош гулбечын бакча сиёнъёс но, сылалти:ськемъёс но, луо но, аракы но ватэмын луэ.

Мон уг яраткы ж:окыт интыез. Мыным кулэ эрик. Соин ик берпумети:осыз позыръяськонъёс уг кельшо вал ини. Адямиез трос- интыез ожыт. Таязэ яблок возьмась интыос шедыли:зы ик. Огпол кин ке но мышкыти:м донгиз ик монэ, оти:егес мын шуыса кадь. Мон о:ч карыса, озьы ик экти:сько.

Двоюродной сузэрелы, Женялы, выль проект кельшиз, азьлоезлэсь золгес, мыным кадь ик. Ми соин з:ыгыртскыса крезьгур улсын бергам. Котыр ч:аш потто, нош ми ог-огмылэн пельёсамы кесяськиськом. крезьгур зол ке но вал, мон сое кыли:. Мон сое валай, мон сое валасько.

среда, 13 ноября 2013 г.

Нош ик Кузебай Герд. Тау!

Пересьмемъям пумен валасько, кыч:е мон шузи, трос мае уг тоди:ськы но арберилэсь мур пуш дуннезэ уг адз:иськы шуыса. Тани. Дышети:ськом ми школаын Кузебай Гердэз. Собере мар, кылбурчи но кылбурчи, эшшо удмуртлыкез ж:ути:сь но азьмыни:сь. Озьы гинэ. Нош кыч:е солэн лулыз вал? Мае со та дунне вылын адз:из? Ко:ня шуг-секытъёсты вормиз! Сое тодысалмы ке, адямиез мургес валасалмы. Азьло мон Гердлэсь ымнырзэ гинэ син азям пукти:сько вал, нош али лултуссэ но.

192-1929-ти: аръёсы со дышетскемын Мускоын, фольклористикая аспирантураез быдтэмын. Брюсовен, Рукавишниковен вераськемын, соослэн лекциосазы ветлэмын. Туннэ параын Вера Григорьевна милемлы солэсь кылбуръёссэ лыдз:из. Аслэсьтыз удмурт кылбуръёссэ зуч кылэ берыктэм. Валаськоды-а, з:уч кылын кылбуръёсыз сю поллы кужмогес. Солы Брюсов азьын ули:е усьыны уг яра ук. . Нош Рукавишников з:уч литературае триолет жанрез пыртэм. Та  амалэн гожтэм кылбур бичетъёсыз но потэмын, тая пара но институтын нуэ вылэм. Озьы Кузебай Герд  "Уйшор тол" кылбурзэ берыктэ триолет жанрен. Берыктэмез выль кылбур луэ ини, темаоссы но мотивъёссы гинэ оди:г. Вера Григорьевна малпа, со Рукавишниковлэн параезлы, дыр, "Ветру Уйшора" кылбурзэ берыктиз. Соин ик триолет жанрен.

Эгоист. Успешной ук. Вылти:яськись, нылъёслы кельше ук.

Муско вакытаз ко:ня со лэсьтыса вуиз. З:уч издательствоын удмурт отделение усьти:з, озьы со дыре туж трос удмурт книгаос печатламын. Нош 1927-ти:но 1932-ти: аръёсы "Поэтическая антология народов СССР" книга потэ. Со бичетын 8 удмурт кылбур пыртэмын: Ашальчилэн, Кузебайлэн, Клабуковлэн... Нош чошатыса верад ке, беларус кылын куинь гинэ кылбур пыртэмын. Озьыен, Кузебай Гердлы трос бызьылоно луиз дыр, со тямыс кылбуръёсты антологиын мед печатлалозы шуыса. Трос мар тоди: Вера Григорьевналэн параяз.

 Тау, Вера Григорьевналы. Со мыным выль инвисъёс усьтэ но улон шоры пыр- почгес учкыны дышетэ. 

вторник, 12 ноября 2013 г.

Пиян: толон, туннэ но ч:указе.

Нош ик туала вашкалаеныз пумиськон сярысь верам потэ. Жаляса верано, вашкалалэн моч:ез быре ини, со мар карыны уг вала, синкылиосыосыз гинэ быльырало.

Оди:г эшелэсь трос мар тоди:сько. Со, мон понна, азвесь шыкыс. Анаез, пе, семьяязы нылпиюртысь пинал басьтыны турттэ. Аслаз нылпиосыз бадз:ымесь ини, анай бурд улысь потыса, лобз:изы ни. Нош анай-атайёсыз егитэсь на.  Анаез школа кивалти:сь луыса ужа бере, аслыз нылпи вайён муг шуг-секытъёс кылдытэ. Кызьы,пе, сотэк школа улоз? О:й ужа ке, кин семьязэ сюдоз-вордоз? Кызьы ке но озьы. Туала дыре пырик материальной ценностьёс духовнойёсызлэсь выли:ынгес сыло.

Та уж сярысь тодэм  песянайзы. Тоди:ськоды-а, со бо:рдыны кутскем. Азьло дыръёсы ули:сь пересь адямилэн йыраз уг тэры, аслыд пиятозь кызьы нош мурт нылпиез вордод? Туала калык понна со огшоры луэ ук. Пересьлы со валантэм.

Нош азьланяз учкид ке. Али туж во:лмемын суррогатной анайлык шуон. Вуоз, дыр, сыч:е но дыр, ку семьяын анай ачиз уз пия ни. Со мукет кышномуртэз пиятоз. Татын но уксё берга. 

воскресенье, 10 ноября 2013 г.

Эк-эк-эк

-Нош вань- а меда немецко-русский словарь? Кызьы, кылсярысь, английско-русский. -юаз одиг комнатаын улись нылаш.

Зол ини. Мынам комнатаям сыче нылаш улэ. Нимызъя туала улонлэсь аспортэмлыксэ пусйим: лизология. Нылашлэн нимыз Лиза. Куддыр юнме олокыче юанъёс сётъя. Ма кызьы уд тоды одиг сое, шуыса малпалод ас поннад. Нош со зэмзэ ик, лэся уг тоды. Зато тодэ Кузебай Гердэз но кызьы но озьы удмурт кылэз дышетыны выре. Со азьын котькуд адями ассэ гений кожалоз, дыр.

Университетысь дышетисьёс шуо, арысь аре соос доры шузигес дышетскисьёс вуо, пе. Нош ми визьмоесь мукет ласянь. Кескичесь туала студентъёс. Киын гожъян интые, вотэсысь Ctrl C но ctrl V каро, кагаз вылэ потто но ваньмыз дась. Яке кулэтэм иворлык вылти синмынызы чаляк ортчо но, йыразы номыр уг кыльы.

Туннэ Удмурточка шуиз, XIX-ти даурлэн пумысьтыз литератураын геройёс-рационалистъёс кылдылыны кутскизы. Соос малпало, малы мыным тодыны сое, мар мынам улонам кулэ уз луы?


Соос огшоры уг быгато тодон-валанъёссэз улоназы пычатыны. Яке сокем асьтэмесь, что эскеремзы но уг поты. Та дунне вылын ваньмыз малы ке но кулэ, номыр но юнме овол. 

четверг, 7 ноября 2013 г.

ибырвесь

Зечбуресь. Шудон быриз. Тани трос  Коньыосты ыбылизы но малпасько, пойшурасьёслэн котсы тыриз шуыса.  Табере шуркынмон толэзь. Та толэзе шур кынмоз но кык ышем сюлэмъёслы ог-огзы доры мыныны сюрес усьтиськоз.

Адямиос ярато ортчем улонзэс тодазы вайылыны. Мынам но улонам ортчемез нош ик выль кужымен пиштиз. Та толэзе мукет ортчем кужым нош ик ассэ тодаз вайытоз. Уг поты. Нош кызьы сое вийыны? Коньывуон толэзь быриз ни ук.

Ярам. мырдэм-мырдэм аслым  ыргонлэсь пельугы басьти. Ибырвесь. Табере ыргон йыр висёнэз бурмытоз. Кык лудуеч кутэмын кадь. Чебер но пайдаё но. Василий Степанов аслаз мастерскояз чертиз. 022. Адзо ини, кызьы мынам пельугые вордскиз.

Туннэ куазь туж шуныт. Берпумети нуналъёсы со жокатэ ке но, туннэ мынэсьтым поръян мылкыдме жуатиз. Славчиез коть огъяулонниысьтыз потти. А то со танчикъёссэ сяна, номыр но улоназ уг пырты ни. Туннэ со мыным тужгес но шудо потиз. Ымнырыз пиштэ вал. Тини сыче сизьыл шуныт нунал. Компьютер сьорын весь пуконо овол соин ик. 

среда, 30 октября 2013 г.

СОФИН

СОФИН. Удгуын ортчиз котырес жок. "националистъёс" сярысь  историяя факультетысь нырысети курсын дышетскисьёс докладъёссэс лыдзизы. Соиз ярам. Обсуждение дыръя, одигез магистранка вераны шедьтиз, та уж сярысь азьло воксе оз кылылы шуыса. Паймыса бырисько вал ини. Сое, шуисько огшоры оглом историысь но тодыны кулэ. Милемлы, пе, преподаватель юромо со сярысь оз вералля, та темалы сизем урокмы но ой вал. Нош история? СОФИН выллем ужъёс котькуд калык полын нуиськиз ук. Эх шу, малпасько. Я коть лъкаськем студентъёс полысь тросэз монэн соглаш луизы. Озьыен, соос коть тодо.

Александр Григорьевич Шкляев вераз, кызьы Украинае воргорон доры ветлиз, кудиз Кузебай Гердэн одиг лагерьын пукемын. Герд горд рубашкаен, пе, вал. Со воргоронэн но Кузебаен трос вераськиллямтэ, поэтмы туж вераським, пе, вылэм, соин ик таиз вылэ трос дыр но сюрымтэ ни.
____________________________
-Смска вуиз-а?
-Кыче?- сумкаысьтым телефонме потти но лыдзи: "Времена не выбирают. В них живут и умирают".   Мон со кылъёсты тетрадям гожти вал. 
- Адзи мон. Соин ик лэзи. Мон тодисько, тон сое блогад гожтод шуыса.

Кызьы табере уд гожты?

понедельник, 28 октября 2013 г.

Жокыт

Туннэ сузэре пыраз. Кутскиз вераны, кызьы со огъяулонниын улиз. Удмурточкалэн постэз соку ик йырам лыктиз. Сузэре вера, одиг палаз удмуртъёс туки- туки- ту.... шуыса весь, пе, кырзало. Уйшор бер- а, нуназе - а, соослы чын! Вылиысь бускельёссы кырзан лэзе но, пе, асьсэос кырзанзылэсь золгес кесясько на, шуэ. Умудряются- озьы вераз.

Нош гуртын туж шыпыт вал. Дукесэлэн пумозяз вуттымтэ вужерез гинэ мыным изьыны люкетиз. Кыре потыса, гадь тросам шокчисько но, сыче шулдыр луэ. Туннэ карын озьы карыны туртти но гекай, ньылонэ вань газъёс, тузон, эшшо марке на пуксиз кадь.
Тупаны но кулэ ук, та кылбурлы эшшо анализ туннэ лэсьти на. Испания.  Федерико Гарсиа Лорка "Заря".

У зари над Нью-Йорком
четыре ослизлых опоры
и вороньи ветра,
береляшие затхлую воду.
У зари над Нью-Йорком
ступени безвыходных лестниц,
где в пыли она ищет
печальный рисунок фиалки.
Восходит заря, но ничьих она губ не затеплит -
немыслимо завтра и некуда деться надежде.
Голодные деньги порой прошумят
над бульваром,
спеша расклевать позабытого в парке ребенка,
И кто пробудился, тот чувствует
каждым суставом,
что рая не будет и крохи любви не насытят,
что снова смыкается тина законов и чисел,
трясина бесцветной игры и бесплодного пота.
Рассвет умирает, глухой от кандального лязга,
в содоме заносчивых знаний, отринувших землю.
И снова, кренясь от бессонницы, тянутся люди,
как будто прибитые к суше кровавым потопом.



Сюрес

Тодиськод-а, кытын солэн пумыз? Пыдэстэм вышкы пыдсын.

Аслэсьтым ачим юай но, ачим ик аслым валэктон сёти. Нош ик африкатаостэк гожъяськисько, ноутбукме пильыны шедьти. Сисьмем ки. Я, нош али коня ке сюрес сярысь.

Автобусын мынисько, укноти суредъёсты адзисько:
Сяська Насьта кадь дисяськем нэнэйка аслэсьтыз дядяйказэ Ижкаре келя.
Сюрес вожын корт кирос сылэ.
Пересь нэнэйка  дядяйкаезлэсь юа, кыче интые пуксем шуыса.
Сюрес дурын кирос сылэ, со вылын - пластмасс сяська. Кирос вылэ, пе, мултэссэ ошылыны уг яра. Кулэм муртлы со сю поллы секытгес, пе, йотэ, куасалске.
Арлыдо кызьпуослэн вайёсыз вылын лыз штань ошкиське.
Посадка дурын ик нош кирос сылэ.
Сюрес вожын машинаос сыло, соос городэ пыро.

Нош тодиськоды-а, кытын солэн пумыз?

Хани-мани

Ти уд оске, кытчы мон ветли. Мон все-таки отчы вуи.  Потэ вал адзем со интыез но со адямиосты. Кинлэн фантазиез зол ужа, туж зол паймоз ни дыр. Ну бен я. "Хани-мани" клубе ветли. Отын чагыръёс но льольёс сюрыло.  

Соос но адямиос ук, огшоры маин ке но ваньзылэсь висъясько. Со аспортэмлыксы понна, соосты ултияны уг яра ук. Мар карод на, соос "дыдыкъёс" шуыса. (Малы ке но соосты дыдыкъёс шуэм потэ. Соос сыче мимими :D, дыдык кузпалъёс кадь). 

Озьы ке но люкаськон интызы, клубзы, кыче ке но пасьын, сиськонни выллемын. Отчы пыри но, асме гурт уй клубын кадь кожай. Крезьгурез но, коркаез но, котырыз но сычегес. Пичи концерт выллем возьматизы. Зуч эстрадаысь артистъёс вылэ пародия. Заслуженный артист, пародиосъя театрлэн кивалтисез (нимзэ уг тодкы ни) микрофонэ ымзэ усья, фонограмма. Я коть со зэмос кырзанъя ымзэ усьяса вуттэ вал, нош солэн юрттисьёсыз, ассистенткаосыз, яке, шонергес вераса, ассистентъёсыз, воксе текстлэсь бере кыле вал. Невпопад. Зато кыче шоу вал! ой ёй ёй. 

Монъя, учкисьёс азе потиськод ке, ваньзэ пыр-поч лэсьтоно. Тини кытын соослэн адями гажанзы. Тачеоссэ но. 

Уг вера ни, мар мон эшшо отын адзи на. Юрзымгес коня ке. Огъяулонниям вуэме бере, мугоры юзыр-кезьыр луиз, диськутме соку ик миськыны коти. 

пятница, 25 октября 2013 г.

Лыдӟисьёс.

Чумолё Олёш "Оломарно"-ын милемлы Маринаен вераз, куддыръя блогъёсамы пырасько шуыса. Тунсыко, пе, луысал тодыны, кызьы, "Битва удмуртских блогинь" * шараям бере, тӥляд улонды воштӥськиз.  Тӥни солэн юанэзлы валэктон сётэм потэ.

 Азьло кагаз вылэ тросгес гожъяськисько вал, табере татчы. Лыдӟисьёсы 5 поллы тросгес луизы. Кытӥ-отӥ соос монэ паймытъяло но. Улын Юри гуртэ вуылӥ вал. Отын уйин клуб азязы сылыкум кылӥсько: "Марайко, Марайко". Монэ со гуртын Векшинаен но Марьяен гинэ тодо. Пайми, кин та, мар та. Котыр учкисько но - пеймыт, нокинэ уг адӟиськы. Кӧня ке улыса, дорам пияшка вуиз. Кытысь тодӥськод, монэ озьы нимало шуыса? Ма шуэ, "Юмшан57" огинэ пырасько, отысь адӟи вал; асьмеос тодмо вал ини. ЫЫ, малпасько. Со монэ автобусысен ик синйылтэм вылэм ини, Миша нимо Бутылкалэн бускелез.

Яке куддыр вазьыло, блогдэ лыдӟиськом шуыса. Туж тунсыко отын, капчи лыдӟыны. Тӥни озьы- ваньмыз огшоры. Малы ке нокин но уродзэ уг вера. Куддыр тодэм потэ ук медальлэсь мукет палзэ но. Мон куатаськись ӧвӧл, яратӥсько критикаез. Тупатскыны тыршисько, но асме уг ыштӥськы.


среда, 23 октября 2013 г.

Пыдэстэм вышкы

Свято-Михайловский собор дорын пересь, уксё курыса, пуке. Славчи сое адӟиз но шуэ:

-Уг валаськы, малы соос озьы пуко. Соосты ӵыжы-выжыоссы гуртысьтызы улляло?  Пыкыло, уг ужало но семьялы нокыӵе пайда уг вайо шуыса? Дэбесын озьы одӥг  кышномурт куинь пол ериз ни вал. Ма со юыны коньдон бича. Совето власть дыръёсысь папортсэ возьматэ, мынам тани номаи но ӧвӧл, шуэ, паспортэ но. 

Озьы ке но, кышномурт номыр но уг кары, улонэз уиойгес мед луоз шуыса. Малы солы Росси паспорт? Солэн коркаез пырик ульчаос. Вӧлдэт- инбам, выж-музъем, нош борддоръёсыз ӧвӧл.

- Эшшо одӥг видео учки на вал. Отын пересь бӧрдэ. Мон Россия понна ӧй ожмаськы, шуэ, СССР понна, соин ик СССР паспортэ но дуно; мар али улон та: укноосын решёткаос сыло, заборъёсын замокъёс ошкисько; война дыръя,  узбек-а, бигер-а, ӟуч-а, таджик-а - ваньмы одӥг тусьтыысь сиськиськом вал.

Ми "Аксион" завод возтӥ, адямиос ветлон сюрестӥ поръяськом. Нош милемын артэ  кыӵе ке тушо, фуфайкаен пересь вамышъя, сьӧраз асфальт вылтӥ ик салазкизэ кыске. Со ас дуннеяз. Милемын ӵош адямиос ветлон сюрестӥ уг мыны, лобась машинаослы пумит кошке, бадӟым сюрес кузя.

Со  бадӟым сюрес кузя ас дуннеяз, "пыдэстэм вышкые" усе.


вторник, 22 октября 2013 г.

Удмуртъёслэн семьязы

Толон "Малпа выль кыл" ӵектослэн йылпумъянъёсыз лэсьтэмын вал. Отын "Удмурт Кенеш" огазеяськонысь Викторов нимтуло визьмо воргорон вераськиз. Вот мае мон тодӥ.

Азьло удмуртъёслэн матриархат вылэм. Кышномурт котырын трос пиосмуртъёс улӥллям, со соослэсь нылпи вайылэ вылэм. Но кудӥз пинал, кыӵе воргоронлэсь, нокин но тодылымтэ. Анай вань ке, ярам. Со дыръёсты "семья" интые "котыр" кыл кутыло вылэм. Куке но мыным шуизы вал, тынад одӥг пичи но семья сярысь понятиосыд ӧвӧл. Тӥни, та иворез тодэм бере, асме реабилитироватьтӥ кадь. Иське, мон -  кытысь ке но вашкалась вуэм, яке,  мукет сямен вераса, выльысь вордскем вашкала нылкышно. Могдос.

Берло ини, кунын христианизация ортчыку, ӟучъёс пыр удмуртъёс пӧлы туала семья сярысь валан вуэм. Но соку одӥг коркаын выжыысь трос семьяос улӥллям. В тесноте , да не в обиде кадь. Мынам анаелэн семьяезлэн коркаез Тюрагай нимаськем. Чебер, ыы ведь? Тодӥсько на, кызьы нэнэй пичи нуноклы (мыным) вералля вал со сярысь. Нош мон эшшо сю миллион юанъёс сётъясько на вал. Берло ини со Тюрагай коркась семъяос асьсэлы выль корка пуктылыны кутскиллям. Озьы  гуртлэн шур сопалась ульчаосыз потӥллям.

Нэнэй шуэ вал, Тюрагай выжылэн болякъёсыз та гуртын самой трос вылӥллям, нош али тани куать корка сяна кылемын ӧвӧл ни. Сыӵе вераськон кызьы ке но 2005-тӥ аръёсы вал, пасха карон нуналэ. Ми палъёсын вань вылӥ нуналъёсты  бӧлякъёсын пусйыло.

"Перепечкинын"

Марайко. "Перепечкин" сиськонниын туж мусо нылашъёс ужало. Огез соос пӧлысь Маша Семёнова. Ми сое огшоры Семёнкина шуиськом. "Перепечкинлы" туж характерной нимтул. Куд-ог дыръя пырасько ке, соосын вераськыса сылӥськом. Кӧня калыкты вал ини туннэ? ӧд жаде на-а? Кыӵе тунсыко учыръёс вал ини туннэ?

Туж трос кунгожсьӧрысь адямиос, пе, ветло. Итальянецъёс али тани вуылӥллям. Трос-а ужын иностранецъёсын тодматскод? Нош "Перепечкинэ" ветло. Табере со шаерлэн йӧскалык интыез ини. Вань финно-угоръёсты кытын сюдыны  но удмурт сиёнэз возьматыны.

Озьы ке но юэмъёс но вуыло, пе. Кудъёсыз асьсэзыс киязы возьыны уг быгато. Мон син азям пуктӥсько, кызьы, кылсярысь, "Пепелац", "Огни большого города", "БВИ" кадь клубъёсын официанткаосын узыр но кудӟем калык вераське. Комнатаям нылашкае ӵапак  клубын ужамын. Официанткаос удмурт сиськонниын коть визьмоесь, быгато асьсэзыс шонер но чылкыт возьыны.

Алигес соосын удмурт сюан сярысь вераськиськом. Огез официанка шаермылэн уйпалъёсысьтыз. Со шуэ, милям воксё со йылолъёсты уг чаклало ни, тӥляд удмурт дэремъёсын но сюан каро на, лэся. Ми, ыы, шуиськом. Семёнкина шуэ, анай-атай выжыос нюны сюан дыръя нылпилэн атаезлэсь иштаньзэс куашкато. Анай но штанен ке, солэсь но. Соин ик куд-огъёсыз дасясько ни, калэн штаньзэс керттыло.

Удмуртъёслэн вань куинь сюанзы: вордскон, нуны сюан (каша), бызён сюан но кулон сюан.

воскресенье, 20 октября 2013 г.

#инкуазьнылпиос

Карын но инкуазь шормуӵъёс (остров) вылӥллям на. Тае валаме понна, та Корниловлы. Со эшшо "Курутой пуны" мультикеныз тодмо на, самой со.

Арнянуналэ огъяулонниын пуко но вань ужъёсме быдэсто шуыса, малпай вал. Ыы, али ик, бызьса мыныса. Шуак, кытысь ке вотэс пыдсысь Корнилов потӥз но ойдолэ, пе, шпикачки сиыны мыном. Город пушкын ик нюлэс, шур бызе. Отчы пырем бере, мон чылкак вунэтӥ, кытын ке но матын машинаос ворттыло но заводъёс ужало шуыса.

Уг поты вал карлэсь одӥг шапыксэ но адӟеме. Но тӧло интые интыяським, панорамаен ӝужыт коркаослэн липетъёссы адскизы. Сюбег сюрестӥ бызьылӥзы, мотоен ворттылӥзы. Няньмы кылиз, со няньмес пуны но ӧз сиы. Та городын соос дышиллям ини, лэся, Педигри да марда вылын кылльыны. Гуртын коть пуные шумпотыса лопкатысал ини.

Дыр чаляк ортчиз, нюлэстӥ, гопъёстӥ потыса, нош ик карлэн сюрес вылаз потӥм. Сыӵе шыпыт но умой вал нюлэскын, нош али эшъёсылэсь вераськемзэс но мырдэм кылӥсько. ӵемгес потано.
Луэ ук ай сыӵе адямиос, кудъёсыз быдэсак инкуазен огазе луо. Бикузин Женя милям сыӵе, дӥськутэныз но тусыныз но #инкуазьнылпи кадь.

С шормуӵ-нюлэскысь пичи улон интыез синйылтӥ. Липет, ас киын лэсьтэм гур, огпалдуртӥз шур бызе, мукет палтӥз пичи гурезь, котыр писпуос... Кык пал дуртӥз ик пуныос кыллё. Тӥни озьы уло куд-ог адямиос, Европаын, пе, тросэз озьы, уксё но сюре ке. #инкуазьнылпиос.


Вань жуг-жаг со тӧдьы пакетын)


суббота, 19 октября 2013 г.

"Пьяные" пьесаын но зэмос улонын

"Мон уг быгаткы ни тае учкыны! Одӥг мат кошкиз", - воргорон озьыгес   кеськиз но, пукон вылысьтыз сультыса, ӧссэ таӵ! гинэ вораз но залысь потӥз. 

Бен, вал отын матэз но. Куд - ог интыосын, со пелез ик вандыса, чузъяськиз. Мон Иван Вырыпаевлэн "Пьяные" нимо пьесаезлэн лыдӟоназ озьы ветлӥ. "Les Partisans" труппаысь шудӥсьёс сое быдэстӥзы. Оглом вераса, ярам) Туж кельшиз соослэн выросъёссы, зэмос кудӟемъёс кадь ик вал. Быгато. Пьесаын геройёс визьпогъёс. Инмар, яратон сярысь верасько. Юэмъёслэн ымдуръёсынызы Инмар, пе, вераське. Соос одно ик зэмоссэ вералозы, усыкмем йыр ӧрекчаськыны уг быгаты ни. Мылкыд пӧзе, ваньмыз кыре потэ. Пьесаын кык эшъёс ог-огзэс дышето, валаны тыршо. Мыжыкъёссы уг лыдо.

http://instagram.com/p/fpytSfsJ-Y/

Нош кызьы луэ зэмос улонын? Кылем арняе гуртэ бертыкум, таӵе учыре сюри: 

Автостанциын билет басьтыны черодын сылӥсько. Кыӵе ке но юэм пиосмурт весь ныр улаз мар ке бӧтьыртэ но бӧтьыртэ. Кылзӥськыны кутски. Тунсыко луиз, мар сярысь ас понназ вераське. " Мон сое жуго! Каменное вуи ке, киосыным но, пыдъёсыным но тэшкало. Телефонме лушкамез понна, от****. Мон уг быгаткы а мар- а жугиськыны! Мон так- то кужмо! (ачиз ӟызы, пичи, юэмын) Мон шоры нылъёс но учко на..." Сыӵе кылъёсты ныр улаз бӧтьыртэ, одӥг малпанзэ кык пол но куинь пол но вера. Берло йыркуръяськемзэ ой кылы ни. Билет басьтӥ но автобусэ доры кошки.

Котькыӵеосыз вань. Пьесаын интеллегентной юисьёс, нош автостанциын но гуртъёсын -------. Пӧртэм драмаос. 


пятница, 18 октября 2013 г.

Таунунал но оломарно.

Оломарно кырӟазы, оломарно но возьматӥзы, оломарно пуктӥзы. Тодӥськоды-а, могдос вал.

"Тау" фестивальын модалиосынымы Пукро нимо Даралилэсь коллекциязэ возьматӥм. Пукро дыръя удмуртъёс пӧртмаськыса ветло вал.  Выламы кылем басмалэсь лэсьтэм мунёос тэчылэмын вал, дэремъёс дэралэсь. Кызьы Дарали шуиз, сӥзьыл вуэмен мылкыд но воштӥське. Со мылкыдын ик коллекция но лэсьтэмын.

Калыкез тырмыт люкаськиз. Богданчиклэс выль Мурӝол Undegrоund ӵектоссэ кылзӥськизы. Этнофутуризмзэ мукет оръёслы со али но ӧз вошты на. "Выходите из засиженной юрты, кто бы что бы ни говорил, мы - супер удмурты..." кылъёсты кылыса, малы ке но ӟуч кылбурысь одӥг чур тодам лыктӥз:  "Враги сожгли родную хату..." "Тау" фестивальысь туспуктэмъёс татын.

Чимали туж мусо дэремъёс вуре. "Пепелац" позыръяськонын мынэсьтым юало, Сапожникова - а, пе, вуриз. Осто, малпасько, солэн копак мукет стилез но. Чимали, шуисько.

Милям Удмурточкаен постъёсмыя пуктэм вербатимъёс (потановкалэн нимыз) могдос потӥзы. Надя Наговицына ӟечок. Оглом мылкыдме валам, но тросаз интонациосыз мукет пуктэмын вал. Ми паймим, собыдӟа текстэз дышетӥллям шуыса. Постановказэс умой малпаллям на. "Кин ке деградирует, кин ке статичен" нимо вербати мыныку, Светлана Пикулева мыняса кылзӥз, мыным бадӟым чиньызэ возьматӥз, ӟечок, пе. Кепырай.  "Куинь Светӥос" кырӟаку, вӧзам сылӥсь воргорон туж сак кылзӥськиз,  синъёссы ик ӝуало вал. Зэмос удмурт адями!










Толон мае ке но валай

Толон мае ке но валай. 

Нырысетӥез. Милемыз котыртӥсь пиос  ваньместы одӥг дыре ярато. Одӥгзэ но бырйыны уг быгато.  Шур бызе но бызе, ярдурысь жуг-жагес сьӧраз нуэ. Выль нылашъёсын тодматсконо луэ, озьыен, выль синмаськонъёс выль сюлэмшугъяськонъёс ваё. Валасько, бырйыны шуг, но мынам сюлэм висе, адӟиське ке, кызьы мукетъёсыз висё - яратса. Вылез вуэ ке но, вужез нокытчы уг кошкы. Синмасько-акыльто-вошто-акыльто-берытско. Озьыгес луэ. Толон куанер, сӥть кадь кудӟем Корниловлэсь йырзэ сиим. Но толыкез ӧй вал.

Кыкетӥез. Арлыдо воргоронъёсты капчигес но шудогес яратыны. Соослэн егит дырзы ортчемын ни, соин ӵош задор мылкыдзы но. Пинал нылъёс соослэсь сюлэмъёссэс пиналмыто. Воргорон нылашсэ уте, кузьымъёс лэсьтэ, шудо карыны турттэ, нош нылашлэсь номыр но сыӵезэ уг куры, внимание гинэ мед луоз. Вить минут куспын автобусын тодматскем воргоронэлэсь шунытсэ шӧдӥ. Соин вал туж капчи, кепыран сямы тодам но ӧз лыкты.

Куинетӥез. Уг поты ваньзылы тодмо луэм. Но ужам потэ. Асьсэлы кулэ ке, огшоры етӥз тодмоосы вӧзам ӝиптӥськыны кутско. Нош соос доры юрттэтлы вазиськиськод ке, шиш но кукиш.

Тараканъёслэн улоназы  сыӵе валанъёс вань меда? Соослы толон шулдыр вал! Нылъёсы нош ик тусьты-пуньызэс миськиллямтэ.

четверг, 17 октября 2013 г.

Воргоронэн тодматскон.

Яратӥсько ӵукнаысен ик "деловой" луыны. "Кенеш" журналэ ветлӥ. Отын нырысетӥ шуосэ понна, тышкасалзы.  Автобусэн бертыкум, воргоронэн тодматски. Тани "Университет" дугдылонни вуиз, нош мон уг потӥськы. Со юа мынэсьтым:
- Тӥ студент ӧвӧл-а мар-а?
- Студент. Мон радиозаводэ потӥсько. - беренвази мон.
- Малы отчы?
- Мон огъяулонниям бертӥсько. Тани со, - учкеменым улон интые шоры возьматӥ.
- Озьыен, ӵош потом. Тӥ сэре кин луоды?
-Журналист.
- Данъясько!
- Нош Тӥ - спортсмен? - Зенит шевронэн югыт лыз куртказэ адӟыса, юай воргоронлэсь.
- Азьло вырисько вал, нош али пичиосты дышетӥсько. - вераз со. Воргоронэ Алексей Васильевич Сунцов вылэм. Берло вотэсысь бугыръяськыса, тодӥ, со  "Зенит" нимо футболэн шудӥсьёслэн клубзылэн кивалтӥсез шуыса. Нош со уж дораз автобусэн ветлэ. Пыдын гинэ ветлэ дыр но, туннэ зоре вал. Пайми солы.
- Стипендия басьтӥськоды-а? - автобусысь потон азямы юаз на со.
- Басьтӥсько.
- Мон студент дыръя стипендия 35 манет вал ай. Татчыозь тырмылӥз, - киыныз йыр вылтӥз шонтыса,  вераз воргорон. - Азьло трамвай билет 3 коньы сылэ вал. Озьы ведь? - кондукторлы вазиськиз со.
- Бен. Нянь колды но 5 коньыен вал. Сыӵе небыт, ческыт...- вераз билет вузась.

У-у-у малпасько. Азьло, иське, 1 манет тыр 12 колды нянь басьтыны луэ вал, нош 35 манет  тыр 420 колды! Нош али? Али стипендия 1500 манет котырын, нянь сылэ кызьы ке но 16 манет. Озьыен, стипендия вылэ 93 быдэс колды нянь усе.

- Мӧзмиськоды со дыръёслэсь? - кыкназылэсь но юай мон.
- Ма уг, огшоры верам потэ, коммунизм дыръя но туж умой вал шуыса.
Стипендияя учкид ке, так-то  коммунизм дыръя 4,5 поллы умойгес вылэм.

Нош кондуктор Совето Союзлэсь мӧзме ик кадь. Мыным озьы потӥз. Йырам соку ик Шоркинлэн кырӟанэз шудыны кутскиз: "Вордӥськи мон Пуроын, Пичи Пурга районын... Лу визьмо весь шуизы, визьтэмлы ӧвӧл сюрес коммунизме". Визьмо -а, ӧвӧл-а, но мон пырик шудо.




среда, 16 октября 2013 г.

"Палэзян"

"Палэзян" фестиваль дыръя, "Мынам Удмуртие" ТРК Татьяна Москвиналэсь интервью басьтӥз. Мон, палэнын кылзӥськыса, сылӥ. Москвина оглом удмурт киужъёслэсь аспӧртэмлыкъёссэ вераз, малы дэремлэн бирӟетэз шортӥз уг лэсьтӥськы, кызьы усточиос котькуд басма кусокез жалялязы, синэз мальдытӥсь дӥсьёс пӧрмытъязы. Мон но та ӝытэ ас киыным вурем дэремме дӥсяй вал.

Женя шуэ, дэрем тонэ утьыны кулэ ук, нош чыртыыд гольык. Мон беренвази: "Мынам чыртые но, суй пожесъёсы но, дэрем улэ но пужыятэмын".

Нош Москвина паймымон кышномурт. Тубаттӥ ӵошен тубыку, вераськыны кутским. Паймоды, со футбол учкыны яратэ. ӵуказе, Россия Азербайджанэн, пе, шудоз.

- Тӥ паймымон кышномурт, - шуисько.
- Ма мар, тунсыко ук. Али отборочный тур мынэ.

Эшшо туннэ мариецъёсын тодматски на. Соослэн сямзы татаръёслы но удмуртъёслы но кельше. Мусоесь соос. Женя соосты удмурт бальзамен тодматӥз. Кельшем, кытысь басьтоно луоз шуыса, юазы.

Нош мон сотэк но кудӟемын вал. Мынэсьтым йырме выль тодматсконъёс, кылос, калык лулчеберет, "Чипчирган" гуръёс но "Айкай" шудонъёс пӧромыто. Палэзямы шулдыр.

Бутылка кушемнимо эше шуиз вал, дикой супырӟем яблок но кудӟытэ шуыса. Палэзь но, иське.




понедельник, 14 октября 2013 г.

"Ижевская область"

"Ижевская область"!!!!!!!!!!!!!!!!!!!!!!!!!!!!! Нылъёслы Мускоысь Нырысетӥ каналэн лэсьтэм видеосуредэз возьматӥ. Отын удмурт семья, удмурт калык сярысь вераське. Ну так, огшоры обзор, лябгес. Корреспондент ваньзэ вера, нош пумаз.................................. Ижевская область, пе. Нырысьсэ кылӥсько. Мускоын куд-ог дыръя Удмуртская область шуыны ярато, нош таиз учыр воксё серем ӧвӧл ини. Корреспондент школаын огшоры географиез но а мар-а ӧз дышеты? Возьыт! Тӥни, оскы собере журналистъёслы. Интернет но ныр улаз, учкы вал, кытчы вуылӥз. Элькунамы пырыкуз, "Удмуртия" гожтэмез ӧз адӟы меда? Копак.

Мар кунэн луэ? Кызетӥ даурысь кунгож литература шузи массаос сярысь гожъяз. Ваньмыз со тодмо сюрестӥ ик мынэ, лэся. Книгаосты уг лыдӟо ни (Рэй Брэдбери. "451 градус по Фаренгейту"), яке, кызьы шуиз одӥг преподавательмы, вузкаронниын ӝажыос книгаослэсь някырско, нош лыдӟыны немае. Туннэ УдГУ-ысь таӵе гожтос адӟи на:


Эшшо, Россия Болонской процесс борды ӝиптӥськемез бере, кунамы студентъёс шузигес но шузигес луо. Тросэз озьы верало. Со журналисткая но озьы шуыны луоз. Нош Америкаын али ик уг тодо ни, пе, асьме планетамы Шунды котыртӥ берга шуыса. Соос наоборот малпало. Милям но озьы луоз ни-а мара. Визьмо адямиос ичи ке, кунлы капчигес соосын кивалтыны ( Джордж Оруэлл"1984"). 

воскресенье, 13 октября 2013 г.

Гурт ныл

Эше доры вуылӥ. Тросэз егитъёс школа бере техникумъёсы но училищеосы дышетскыны пыро. Гурт калык шумпотэ, пиналъёссылы дышетскыны маза сюре шуыса. Умой улонлы осконзы ӝуатске.


Вылӥ дышетсконниысь студентъёс вылӥысен учко техникумъёсын дышетскисьёс шоры. Нош "техникумчиос" асьсэзыс шузи каро, визьмы, пе, уз тырмы вылӥ дышетсконниын дышетскыны.
Малы меда соос асьсэлы уг оско? Тросэз соос пӧлысь туж визьмоесь, улонэз валамъя куд-ог вылӥ дышетсконниысь студентъёслэсь но вылӥынгес сыло. Бадӟымъяськон сямзы соослэн чик но ӧвӧл, гуртысь шуыса-а мар-а, соин.

Тӥни, эше доры ветлӥ, шуисько. Со училищеын дышетске. Кылем арын азьтэменыз дышетсконзэ куштӥз, но таяз арын анай-атайесыз дышетсконние выльысь пырыны косӥзы. Дышетске ини табере. Калык сямъёсты мынэсьтым тросгес тодэ, дыр.

Зундэсме бадӟым чиньыям нуллӥсько. Та ласянь со шуиз, кулэмъёслы гинэ бадӟым чиньыязы зундэс дӥсяло, пе.

ӝӧк сьӧрын ог-огмылы ваче пукиськом. Солэн алаз пичи сузэрез. Вай куто, шуи но киосме ӝӧк вылтӥ лэзи. Со султӥз, ӝӧкез котыртӥз но дыдызэ киям сётӥз. Шуэ, ӝӧк вылтӥ   уг яра сётканы. (Инмарлэн тыбырыз).

Юыкуз чипсыез усиз. Шуэ, таиз кулэмъёслы. Туннэ кисьтон. Музъемлы но курбон кулэ сётъяны.

И мар, со уг тоды ке Михаил Федотовлэсь творчествозэ. Зато монэ кылзэ, ку мон со кылбурчи сярысь верасько. "Малы тӥяй..." калык кырӟанэз кырӟасько ке, со но ныр улаз гурланы кутске. Со гурт нылаш, удмурт вирын, калык тодосэз пыӵатӥсь Бутылка.


Мусо дядяе.

 Такъянай сузэре Починка гуртэ дядяез эскерыны ветлэм. Куазь зоре бере, сьӧраз зонтик кутэм. Дядяй зонтиксэ адӟем но шуэ, пе:
- Та али 4 копейка сылэ дыр ни, ыы ведь. Азьло 3 копейкаен басьяськом вал. Трамвай но 16 манет луэм ини (эмъяськонние ветлыса, тодэм). Мон коть дунтэк ворттылӥсько. Нош тон ӝыны дунэн ветлӥськод дыр ук?

Кыӵе умой, со вашкала улонэн улэ на шуыса. Ми доры куное лыктэ но, ортчемзэ тодаз вайыны кутске. Мон, диктофон кутыса, вань верамзэ гожтыны рад. Куддыр огшоры дораз улэм потэ, вашкала улонэ зымем. Солэн гуртаз телефон но мар но уг куты. Цивилизацилэсь вандэмын кадь. Тодкоды-а, кыӵе со шумпотон: вуж коркаос, ӟазегъёс, сигйыл, шуныт гур, вуж комодъёс, вашкала зын... Таня Починкае ветлэмзэ вераны кутскиз но, мон дядяйлэсь мӧзмемме валай.

Гажалэ песяйёстэс, соослэн котькуд нуналзы али зарни интыын. Пересьмыса, соос золгес гажаны кутско нунокъёссэс но нылпиоссэс. Соос асьсэос нылпиос кадь луо ини, вань сюлмаськонъёссы, синкылиоссы но шумпотонзы ымныразы пишто. Соослэн туж узыр дуннезы, узырмытэ асьтэлэсь но вож улондэс. Вашкалалэн ог челепез ке но мед кылёз та туала, номае но жалясьтэм улонэ.

суббота, 12 октября 2013 г.

Компьютере выйемъёс.


Тросэзлэн пиослэн мар ужзы? Шудо соос! ӝыны нуналзэс компьютер азьын быдто. Видите ли, соос озьы шутэтско, яратоно ужен выро. Мукет уж асьсэлы уг шедьто ни. Асьсэлы пайдаё уж но уг ни ке шедьто, кыӵе пиос, иське, милемз котырто на.

Одӥгез эше но весь шудэ. Йыры ик кур луэ. Али но тани вераськиськом но, мар, шуисько, кариськод?
- Шудко. Туннэ наконец то танк т54 басьто ни.
- Ужас
- Ма ужас. Ма со шудон гинэ хобби можно шуыны.
- Хобби ыы. Тон коняетӥ курсын ни.. и кӧня дыр тон со хоббиед вылэ быдтӥськод?!
-А марлы быдтод на дыр?
-Пичи эте. 30 арескад но озьы шу, ява.
- Дорам электрик пыраз мужик лет, наверно, 45 и вера тон но а мара пе та шудонэн шудкод? Мынам фетфердинандэ вань, тынад, пе, кыӵе танкъёсыд.
- Бырем адямиос.

Тӥни кызьы. Та дырлы, кыӵе меда соос асьсэ азе ужпумъёс пукто на? Кызьы та яке мукет шудонын 10-тӥ раундэ потыны? Эшелэн сыӵе курутой машинаез вань ини (шудонын), мыным но чалякгес басьтоно вал ни.

Нош улонын машина басьтон сярысь малпанъёс льӧлесь гинэ кылё? Туган но ачиз сюроз, уксё но инбамысь усёз шуыса, малпало, дыр.

Я, мед! Эше шуиз, дышетскон быриз ке, адӟом.
- ы-ы - шуи мон. Соос сярысь сюлмаськиськод но, нош соослы нокытчыязы но уг йӧты.



пятница, 11 октября 2013 г.

Венгер психоаналитик

Мон туннэ татчы ӟуч челеп пырто. Ференци Шандор нимо венгер психоаналитик сярысь лыдӟи. ооо... Марзэ гинэ но ӧй тоды. Со Зигмунд Фрейдлэн малпанъёсыныз соглаш луылэм. Нош огпол соос керетӥллям.
 Вот что пишет Фрейд по этому поводу: «Мне кажется, что различие между нами обостряется в мелочах, деталях техники, и это заслуживает обсуждения. Вы не делали никакой тайны из того, что целуете своих пациентов и позволяете им целовать себя... До сих пор в своей технике мы твердо придерживались убеждения, что пациентам следует отказывать в эротическом удовлетворении... Наиболее молодым среди наших товарищей окажется трудно сохранять в отношениях с пациентами ту позицию, которую они выбрали изначально». И вскоре крестный отец Ференци, наблюдая за практикой своего ученика, «оживлявшего» его декларации, скажет себе: наверняка стоило технику материнской нежности к пациенту не доводить до поцелуя.

Вот кыӵе со практив вылэм, венгер психоаналитик.


четверг, 10 октября 2013 г.

уйин.

Сӥзьыл зор но вае шумпотон, кузьма шунытсэ. Векчи зор веша кадь тынэсьтыд жадем лулдэ, буйгатэ мылкыддэ.

Уйин черк вӧзтӥ ортчыку, йырад но уг шуккы, тон пыраклы умме усем адямиослэн шӧйёссы вылтӥ ветлӥськод шуыса. Нош кыӵе уйвӧтъёс меда соос адӟо со дуннеын, кытын милемыз но возьмало кылчинъёс. Кылчинъёс каллен милемыз со дуннее нуо, утьыса. Али со шӧйёсты гудо, бичало но мукет азе вато. Уг поты городын пересь дырме ортчытэм. Потэ гуртысьтым  Манак шайвылын вийем попъёсын ӵош кыллем.

Огшоры юись но та улонын номыр но лэсьтӥсь адямиосты кемалась адӟем вал ини. Адӟи, юрдӥ. Уг поты ни адӟем. Но соос но кыӵе ке но пайда мерлыклы ваё ук.  Отын вузаськисьёслы барыш поттыны юртто, демографиез ӝуто, куштэм нылпиослэсь лыдзэс будэто...

Вешай, вешай коӵышпиез, нош со кутӥз но вылам кизяз. ахахахах




психологический параллелизм

Зор ултӥ "Удмурт дунне" редакцие мынӥсько. Адямиос шоры учкыса, мыняй ас поннам: психологический параллелизм. Отӥ нылпи анаеныз мынэ, нылпи бӧрдэ. Татӥ, нырзэс ошыса, мукет адямиос ортчо, дырто, котмемзы, дыр, уг поты. Нош пересь нэнэй, каллен гинэ боды вылаз пыкиськыса, зорез но уг шӧды кадь, азьлань гызмыльтэ.

вторник, 8 октября 2013 г.

Арган ӝыт. Шудон

Туннэ ӝытмес гуртысь юмшанэн ӵошатыны луоз. Эктӥм, кырӟам, шудӥм. Тӥни кызьы тунсыко калтырто вал асьме выжыосмы. Пыдъёсы ик кӧня ке жадем пӧрма луизы. Тодам вайи гурт юмшанъёсмес, кызьы коркась корка, арганэн шудыса, ветлылӥськом вал. Кызьы арганчи дугдылытэк шудэ. Сое сектало, солэн син азяз вань эктӥсьёс одӥг ӝуклы пӧрмо ини, нош со пырик шудэ но шудэ, шудэ но шудэ. Пыд йылаз уг сылы ни, синъёсыз ворсаськемын, но шудыны шудэ! Паймымон. Вань сюлэмзэ поныса, арганзэ кыска.

Одӥг 22 аресъем тодмое шуэ. Султӥсько, пе, но ӵукна, марке киосы висё. Берло гинэ тодам вайи, толон Выль Ар вал шуыса.

Мыным возьыт, мон ожыт калык кырӟанъёсты тодӥсько шуыса, нош шудонъёсты воксё уг тодӥськы. Калык шыкысэз дунъяны но утьыны кулэ.

Милям Таганка вырйылэ азьло песятайёс но песянайес  шудыны потало вал. Гурт паськытамен, отчы коркаос пуктылыны ӧдъязы. Пересьёс веразы вал, уг яра! Со вӧсь инты, со шудон инты, отын кылчинъёс уло. ӧз кылзӥське, али отын кык ульча ини. Трос урод учыръёс со вырйылын улӥсь семьяос адӟизы ни, нырысетӥ аръёсаз особенно. Али шыпытгес ни кадь.

Егитъёс али но таӵе шудонъёсы потасалзы ке. Пуро! Кыкетӥ пункт!

Туж бадӟым тау вераме потэ:
Таня Тихоновалы. Со милям зарни киё, жингрес куараё. Сюлэм шунытсэ со котьку но кузьмаса кельтоз.  Милям яратоно Танимы!
Лиля Леонтьевалы. Солэн туннэ аресыз вал. Таниенымы ӵош зарни куараеныз кырӟаз, эктӥз. Со милям туж лякыт капчи сямо.
Женя Бикузинлы. Ну тайзэ ваньзы тодо ини. Трос мар луэ гожтыны со сярысь. Со туннэ милям арганчи эксей вал. Кӧня мар шудӥз! Со милям бадӟым ӟечок.
Марина Сергеевалы. Туспуктэмъёсыз понна. Со милям туж таланто нылашкамы. Вот так вот, нош тӥляд сыӵе эшты ӧвӧл!
Эшшо Богданчиклы, Денис Корниловлы, сыӵе муоесь вал туннэ, чырты бублиосын. тау, соос вань шуыса.

Хорысь нылъёслы, "Чипчирган"-ысь егит гармонистъёслы. Туж умой шудон ортчиз. Зэмос юмшанэ кадь ветлӥм. Удмурт интелегенто пиосмы милемыз огъяулонни дорозь ик келязы.

Татын туспуктэмъёс Аськей Маринӥмылэсь: http://vk.com/album30368250_180818950

понедельник, 7 октября 2013 г.

али

Куке но веськырес льӧмпу куашказ. Вуиз сӥзьыл. Лудӟазегъёс но лудӵожъёс Улын Вуко ӵыпетысьтымы лымшор пала лобӟизы, нош векчи чорыгъёс ву вылэ лӧптӥзы. Вутурын сяськаяське, кидыс уськытэ но "зарни" тыметэз адямиослы уянтэм каре.

Гуртэ бертылӥ. Анайлы бакча котырзэ утялтыны юрттӥм, сяськаоссэ октӥм-калтӥм. Табере азбарын буш.

Сяськаос гужемзэ будӥзы но сӥзьылзэ кыед пӧлы сюризы.  Шӧдо меда соос асьсэлэсь шудо дырзэс?

Евгений Гришковец шуэ, "туж шуг ке но, мон яратӥсько та дырез. Озьыен, мон туала, мон тыршисько али дыр понна".

Дыре палэнтӥм ортче.  Мон уг валаськы, кызьы улонам пыро но кошко адямиос. Мон соосты тодыса ик уг вуттӥськы, соин ик кошкемзэс но уг валаськы, соин ик кутыны но уг выриськы. Мон уг шедьтӥськы сое, мар али мыным кулэ. Юалоды мае? Нош мон верало: мон уг тодӥськы, мар мыным кулэ.

воскресенье, 6 октября 2013 г.

Сӥть

Огшоры музейёслы кулэ уксё, кыдёке ум ветлэ,  басьтом  нимысьтыз Кузебай Герд нимо Йӧскалык музеймес.  ӵемысь сопалтӥ ветлӥсько, ӵемысь адӟисько та выллем гожтэмъёсты: "С 1 октября по 10 ноября в Национальном музее им. Кузебая Герда работает уникальная выставка «Планета обезьян»".

Музеезлы сыӵе-а сюрес Кузебай Гердлэн сӥземез потэ вал? Со сю пол "пыраклы изён интыяз" берытскиз ни,  дыр.

Тӥ син азяды гинэ пуктэ: калык арбериос, Ижкар история, удмурт, ӟуч, бигер дӥсьёс, йӧскалык синпелетъёс, нош отын ик маймылъёс, кыйёс, бубылиос, но мукет животъёс. Соос бордысь зын потэ на ук, соос отын сӥтясько, кизяло, нош со вань зын Йӧскалык музейлэн борддоръёсаз пыӵа. Я коть экспонатъёс стекло улын, ито не ваньмыз.

Кошки музейлэн "йырыз" (кивалтӥсез) доры.


четверг, 3 октября 2013 г.

#ваньмызумой.

Одӥг тунсыко параын Евгений Гришковецлэсь сценкаоссэ учким. Огшоры учыръёсты, маскара вераса, куштэ. Саркастически вера ваньзэ, шонер, пыӵкылэ.

Огъяулонниын туннэ пукыкум, Женяен серекъяса сое учким. Дэмласько солэсь спектакль-монологъёссэ учкыны. А то тросэз выемын  бӧрдонэз пӧськытӥсь но со дыре ик #ваньмызумой бырись киноосы.

S-BAR- ысь таӵе мусо тылобурдо басьтӥ. Отын туннэ тунсыко ярмарка ортчиз: Ирина Загребина сумкаосыныз, Надя Сапожникова но солэн тодмоез весьёсын, калиграфия, юбкаос но пӧсь глинтвейн.

 Но мон тылобурдое сярысь. Мон малы ке но, ваньмызлэсь смыслзэ утчасько. Символъёс вылэ
соку ик син усе. Туж кема бырйи, мар басьтыны. Аськей (Ащкей?) Маринӥ, я басьты ни  мар ке но, тани тазэ басьты шуыса, вӧзам сылэ вал ни. Я, бен, бырйи. Только, шуисько, солэн синъёсыз ворсамын. Со ышем тылобурдо кадь лобӟе аслыз тодмотэм сюрестӥз. Со уг адӟы, мар котыраз, со аслаз дуннеяз выемын. Марина, шуэ, со просто спокойный (яке умиротвореннный). Кыӵе ке но сыӵе смыслэн вераз.

Тӥни одӥг макеысь котькуд адями аслэсьтыз смыслзэ адӟе. Мон но Маринӥ тылобурдо шоры пӧртэм синъёсын учким. Нош мынам басьтэм абериосы монэн герӟаськемын кадь. Котькудӥз! Соин ик мон туж бырйиськись. Та тылобурдо но мынам лулылэсь чельыпсэ басьтоз, но одно ик аслэсьтыз марзэ ке но мыным сётоз. Мон окисько. Со мынам.

Мар меда верасал та ласянь Евгений Гришковец? Пыӵкысал, дыр, что за бред шуыса. Но тылобурдое ноку но синъёссэ уз усьты, озьы ик лобалоз аслаз дуннеяз. Соин ик  #ваньмызумой.

среда, 2 октября 2013 г.

Сураськи. Ыши.

Кырын шымыртӥсь кезьыт. Коркаос рос-прос уг эстӥсько на. ӵукна шобрет улысь ик потэм уг поты. Туннэ шузи адямилэн аслаз нюлэсказ ышон нуналыз вал. Мырдэм-мырдэм вуи "Кенеш" журналэ. Отын  монэ возьмало вал ини. Келязы Лидия Степановна доры, вайизы Олег Геннадьевич доры. Сӥзьыл куазен отын кезьыт, борддоръёссы ӵужесь, гольыкесь, гылытэсь.

Чаен сектазы, турын чаен. Улмоен ческытатӥзы, гурт улмоен. Мон туж умой валасько, гурт улмо но турын чай монэ визьмоятыны но удмурт кылэз валан сюрес вылэ султытыны кулэ шуыса.

Табере мынам вань дышетӥсе. Табере мыным азьлань улонэ быдэсак валантэм луиз, бус пӧлы ышиз. Кылбуръёсы? Тани лыдӟе кылем арын гожтэмзэ:


Кутске ӵектос «Дась вить нунал»!
Уйшор азьын кошкон возьма,
Кытын мыным тодмо ӧвӧл
Сюлэм мӧзмон гуръёс токма. 

Таӵе тылпу потӥз  зорлэсь.
Кытын шапык - со малпанъёс,
Дуно шаер палась пегӟем
Инсьӧр пала аслобонъёс.

Но вань ужпум кутсконъёсын.
Котькуд нунал - мукет валан.
Нош уй узыр уйвӧтъёсын,
Кытын мон нош ик тӥ пӧлын.

Валады-а, марзэ ке? Валады ке, туж умой. Чечы. Яратко но лыдӟисько Сергей Матвеевез. Со, пе, мынэсьтым али гинэ кыдатскись кылбуранме суралоз но пожалоз гинэ. Тӥни, кылбуръёсыя адске ни, пе.

Огдырлы берытсконо ваньзы пӧлы, классикъёс доры, удмурт кылэз мед шӧдом шуыса. Стилистикае - кашмар! ӟуч амалэн гожтэм веросъёс, лыдӟисез уллясь, валантэм кылбуръёс! 
Но малы удмурт кылын озьы уг яра гожъяськыны, экспериментъёс пуктылыны, модернизм ӧртӥ кошкыны? Валасько, али удмурт кыл туж туала, ӟучлы матын. Традиционной мышление асьме анай-атайёсын ӵош кулэ, нош классическоез воксё нэнэй-дядяйёсын. Потэ дядяен, нэнэен улэм.

Табере мынам вань дышетӥсе, ас югдаз кӧня ке. Озьы ке но - вань. Табере мон копак сураськи ни: печатной яке электронной журналистика, яке воксё литературной журнал "Кенеш". Потэ луэм куинь мугоро. 

Оглом шуизы, мон туж визьмо нылаш. Веросъёсылэн тунсыко сюжетэз, быгатонлыкъёсы адско. Олег Геннадьевич  "Мусульманин" веросэлэсь нырысетӥ абзацсэ гинэ лыдӟем на вылэм. Ушъяз. Пайдаё азьлань сюресме адӟиз но... чалмиз. 




вторник, 1 октября 2013 г.

Кисьмамтэ.


"Привет.
Тани дыр ортче. Скоро Выль ар вуоз. Тодкод на-а берпуметӥ Выль арез, кызьы со ортчиз? Али контактын Пискуновалэн братэз, Вовик, одӥг фотографиез демонтиватор карем. Отын мон Машиеным кудӟемын, синъёс чиляло…. нош улаз гожтэмын: "сколько процентов алкаголя в их крови?" Могдос. Алигес филармоние ветлӥм удмурт концертэ...выль группаос кырӟазы. Мыным кельшиз. Одӥг удмурт группа вань - "Амисо вот!". Соос тужгес но задоресь вал. Куинь кузя кырӟало, кыкез электрогитараен шудэ, куатетӥез дискьёсын, барабанъёс сьӧрын пуке. Волков Костя кадь вал. Кыдёкысен ымнырзэ умой ӧй адӟы".

"Да ну, там большинство вотячек"

Туннэ физькультураысь бертыкум, бызылӥсь "спортсменъёс" шоры донгиськи.
Ммм, малпасько, бызьыло, умой. Стадионысь потӥсь нылъёс трос вал. Соос милемыз, конечно, синйылтӥзы ни. Огез, учкы, кӧня, шуэ. Нош мукетыз солы беренвазе: "Да ну, там большинство вотячек". Сьӧраз бызьыса, берпалаз чыжем потӥз. Но соос кыдёкын вал ини. Лек учкемен гинэ келяй на.

Туж кема со пилэсь верамзэ йырам бергатӥ. Кемалась таӵе веранъёсын ӧй пумиськылы вал ни. Мар шуод на. Со тодысал ке, ачиз но вотяк шуыса, али "Зенит" котыртӥ ӧз бызьысалыз. Кытчы ке но Муско пала вуысал ини.

... номыр уг пот ни верам. Огшоры: !!!!!!!!!!!!!!!!!!!!!!!!!!!!!!!!!!!!!!!!!!!!!

понедельник, 30 сентября 2013 г.

Валаны турттоно.

Огъяулонние "Калленом" фестивальлэсь флаеръёссэ лякылын потӥ. Пырон холлэ вуи. Отын "хачикъёс" сыло вал. Огез пичи укно пыр охранникен вераське. Охранник аслаз будкаяз пуке. Шуак кесяськем куара кылӥськиз. Мон йырме хачикъёс пала берыктӥ. Огез охранник шоры кесяське:
-Ты кто такой, чтобы мне приказывать!!!!!
Кызьы валай, охранник журналэ лыктэмзы ласянь гожтӥськыны косэм. Соиз гожтӥськем, но со пумысен марке керетон потэм. Со "хачикъёс" туж дерзкоесь. Асьсэос уг валало но, мыжыкъёсынызы шонаськыны кутско.

"Мусульманин" веросысь люкет:


Марайколэн чыры-пыры ужъёсты быдэсъян висказ, Дагетанец доры  50-тон аресъем пиосмурт лыктӥз. Пинал пияшлэн меӵак синъёсаз учкыса, ымныр дораз матэктыса, шыпыт куараен со вазиз:
-Виськод?
-Оо.
- Иисус Христосэз ӧть.
- Маин со мыным юрттоз. Со пророк гинэ.
- Инмар – со яратон. Висён – со дьявол.
- Кызьы висён дьявол луоз? Сатана – со кулонлэн кылчинэз, кудӥз адысь уллямын. И тодӥськод-а, мар понна? Йӧнъяськемез понна. - Кесяськыса вераськыны кутскиз Дагетанец, - Исса – Аллахлэн чиньыез.
- Котькуд адямилэн аслаз Инмар-кылчинэз. Со котьку юрттэ аслаз нылпиезлы, - шыпыт вера воргорон.
- Инмар одӥг, солэн ымныръёсыз но нимъёсыз трос!
Пумиськизы кык сюлэмъёс: огез пӧсь, мукетыз гань-гань.

воскресенье, 29 сентября 2013 г.

"Монографие" мынон сюрес вылын диалог

Студенческой отрядъёслэн фетивальысьтызы бертыкум, эшъёсылы вераны шедьтӥ, Татьяна Репиналэн "Монография" нимо книга потэмезлы сӥзем ӝытэ мыно шуыса. Валя сьӧрам калъяськиз, кемалась, пе, сыӵе ӝытъёсы ветлэм потэ вал ини.

"Грифон" адӟытонние мыныкум, юалляськыны кутскиз:
- Мар тон сыӵе ӝытъёслэсь басьтӥськод?
- Уг тодкы. Мыным кельше. Яратко литератураез. Нош Ижкарын пинал кылбурчилэн бичетэз потэ ке, кызьы ӝытаз уд мыны? Ачим мар но со гожъяны вырисько бере.
- Мар со гожъямъёсыныд тон добиваешься?
- Ма номыр но. Гожъяськон али дырлы - со мынам лулылэн лобамез. Лыдӟисьёсылы гожъямъёсы кельшизы ке, мон туж шудо луо. Улом ини, ог-огмес яратыса.
- Нош уксё? Мар вылын тон улод?
- Уксё лыктэ но, быре но. Вал но, скал но. Кӧттырем адями уз гожъяськы ни. Сютэм уг кулы, дыр. Тон бон азьланяз мар карыны одъяськод?
- Мынам али азьланез сярысь нокыӵе но малпанъёсы ӧвӧл. Целе но ӧвӧл.

Фестивальын куинь нунал куспын рос-прос ӧм изе. Жадим. Но Татьяна Репина дорын мон сайкай. Нош эше умме усиз. Тӥни озьы луэ. Со ӧз кылы:

-Кажись, талант?!
-Кажись талант!
... (лирический герой гожъямъёссэ лыдӟисьёслы возьматэ. "Они до слёз". )
-А делать что?
-А что еще? Писать.
-Ну а семья?
- А что семья?
-Где деньги брать?
-Да это практика.
- А как? Писать?
- Какой писать! Пахать.
-Но ведь талант.
-Ну да, талант. 
...
                                        Татьяна Репиналэн гожтэмез. Курсивен - аслам валэктэме.


Пересь

Кин уг лыдӟы "Удмурт дунне" газетэз, но куддыр пыра блогам! Тӥледлы поттӥсько та веросэз. Со ярысь вераськон: http://marjamoll.blogspot.ru/2013/09/blog-post_17.html

Пересь.


Марайко вагонэзлэсь ӧсъёссэ усьтӥз, тубатсэ лэзиз но васькиз платформа вылэ. Котыр корт юбоос сыло – вокзалэз югдыто. Женя нимо проводница кыштыр гинэ кошкиз вузкаронни пала. Ӝыны час куспын вуттоз ог кык сю метръем платформаез ортчыны но кык чугун сюресъёсты выжыны, собере берен. Зӧк, пичи мугорзэ маялляса, кезьыт тылъёс югдыто нылашлэсь сюрессэ. Котьку сямен, Пеппилэн кадь кык йырси пунэтэз, кудъёсыз нылашез пиналлы пӧрмыто, но тӧдьы гожъёсын сьӧд кофтаез, кудӥз сое эшшо но зӧкгес каре, юртто Женяез котькытысь но котьку тодманы.
Вагонысь васькыкуз ик, Марайко секыт ӟус вылын пукись воргоронэз синйылтӥз. Тылъёс зол ик пишто ке но, ымнырыз уй куазен умой уг адскы. Оглом гинэ вераны луоз: тушо, тӧрнам сюбег синмо, кырсь бамо. Вӧзаз костыль кылле.
- Чырткем, – вазиз со нылашлы.
- Умоесь.
- Кытчы мынкоды?
- Кинешмае.
- Кызьы тынад нимыд?
- Марайко.
- Мынам Александр.
Александров станция. Татчы азьло трос кылзэс верась адямиосты лэзьяло вылэм. Тодмо продюсер Айзеншпис но уксё куронэн шедемез бере та каре лэземын вал: Мускоын, пе, сыӵеослы улыны уг яра. Соин ик, вылды, татын сомында кӧшкемыт адямиос. Муско котырын туж трос каръёс, кытчы адямиосты «малпаськыны» лэзьяло вал…
- Тон туж чебер кышномурт.
- Ы-ы.
Марайко азьын пересь пиосмурт, полтарашкаысь аракы юыса, пуке. Гудырикошкон, соин ик уйёсы кезьытгес ик кариськылэ. Мускоысь Кинешмае мыныку, поезд котьку но кыкетӥ платформае дугдылэ. Пиосмурт нырысетӥ платформаысь паськыт секыт ӟус вылын пуке. Вераськисьёс вискын одӥг чугун сюрес, но нырысетӥ платформа кыкетӥезлэсь ӝужыт. Быдэс метрлы ӝужытгес.
- Кӧня минут ортчыса, кошкиськоды?
Бисерен браслетъёсыз пӧлы ышем часэз шоры учкыса, Марайко вазиз:
- Кызь.
- Мынам часэ платиналэсь лэсьтэмын. Тодӥськоды-а, мар со платина? – ушъяськыны кутскиз воргорон. Но со ушъяськемез пельёсты уг ванды
- кызьы егит калык ассэ умой палысен возьматыны турттэ. Солэн огшоры та иворез верамез потӥз. Солы со туж кулэ луись, верано маке кадь йӧтэ.
- Металл.
- Со зарнилэсь но дуногес. Дядяйлэсь кылемын, ньыльдон куатетӥ арын лэсьтэмын. Валаськод-а?
Марайколэн йыраз малпан чилектӥз: «Та чассэ со ноку но виналы уз вошты, дыр».
- Мынам дядяе «вор в законе» вал. Нош мон алкаш. Мон кошкысал тонэн, но мыным дачаям мыныны кулэ. Тӥляд поездды дачае вӧзы уг дугдылы. Тодӥськод-а, мынам Рублёвкаын квартирае вань, но мон отчы кемалась ӧй вуылы ни. Али мыным дачаен но тырме. Машинаме отчы кельтӥ, соин ик немаин мыныны луоз. Мон азьло олокытчы но машинаосме келлясько вал. Эше весь пыкылэ со понна, али но…
Мукет сюрес кузя поезд ортчиз. Корт питранъёс чугун рельсаос борды шуккисько но пересьлэсь кылъёссэ ньылыса сьӧразы нуо. Егит ныл адӟе, кызьы кузь пурысьтам туш пӧлы выем ымдуръёс усьясько, но мыня. Воргорон огназ кылемын: кызьы Габриель Маркеслэн «Сто лет одиночества» книгаяз Буэндия семья огназ кылён пӧлы выемын вал, озьы ик та пересез но мӧзмон пачкатэ. Со аслаз мӧзмонэныз огкылэ вуэмын ни. Нош вина кулэ дыръя котьку но эш кузьма.
Вераськыны люкетӥсь поезд кошкиз. Нош Пересь весь вераське на. Усыкмем воргоронлэн юанъёсызлы Марайко одӥг-ог «ярам», «ы-ы», «я» лэчыт кылъёссэ чугун сюрес сопала лэзья. Пересьлы соин но тырме.
- Малы тӥ юиськоды? – воргоронэн мытэм вераськонэз куспетӥ карыса, юаз Марайко.
Егит проводница быдэс та вакчи улонэз ӵоже валаны турттэ сыӵе адямиосты. Нош таӵе юан сётэмез бере пельёссэ, валэктон интые, шыпыт тӧл гинэ вешалля. Али но озьы ик, но тӧл вӧзы эшшо гудырикошкон толэзьлэн кот но кезьыт омырез ватсаськиз на.
Гурт улонэз тодыса, нылаш туж трос тордосъёсты адӟылэмын ини. Соос нылашлэн сюлмаз жалян уг сайкато ни. Огшоры кезьыт но лэчыт синъёсын учке со кемалась вошъямтэ дӥськутэ бинялскем мугорзы шоры. Гуртын пиосмуртъёс пичи дырысенызы ик виналы дышетэмын. Анайёс, пӧзьтэм самогонэн сектаса, пиоссэс калгыны лэзьяло. Мар юнме калык пӧлти юон утчаса ветлод?
- Мон огнам ӧвӧл. Мынам пичи пие Германиын улэ но дораз ӧте: атай, кушты вань ужъёстэ, лыкты ми доры. Нош мон пенсиын ини. Пенсия 37 сюрс басьтӥсько. Татчыозь тырме со мыным, – курмем бадӟым чиньыеныз чырты кузяз лэзиз воргорон. – Мон ожгарчи вал, Афганистанын тӥни…
Пересь вера но вера, трос дыр луысал ке, быдэс улонзэ вераса куштысал, дыр, Марайколэн пыдъёсыз улэ. Но пересьлэн зулемез, пель сьӧртӥз кошкыса, Марайколэн йырвизьмаз чечыен вӧлдӥське. Нылаш трос марлы ӧз оскы. Воргорон мувӧй бизнесэн но вырем ни. Пересь вераськыку, нылаш аслаз малпанъёсаз уяз: «Сием потэ ни мар ке но. Ку меда бурмозы та пинъёсы, нерад луиськиз ни. Эшшо дас вить минут кылиз на. Мукет отрядысь нылаш пиньёсыныз йырин гуртаз берытскиз ук, эмчиос шуизы, пиньёсыз усьыны быгатозы. Мынам пиньёсыным коть озьы медаз луы вал. Кык арня тани гуртозь кылиз на. Эх, кыӵе пинь лулсэръёс лӧптэмын. Имбирен но лимонэн пӧсь ву юоно луоз, дыр. Умой ук».
- Мон тон доры вуо, кык нунал ортчыса. Москвае Ярославской вокзалэ. Мынам отын машинае кельтэмын, «Мерседес». Мон тонэн али мынысал, но поезд дачаям уг дугдылы.. Мон тонэ, кык нунал ортчыса, басьто. Туннэ уг быгаты, юэмын ни тросгес, машинае отчы кельтэмын. Тон быгаткод-а машинаез нуллыны?
- Ы-ы.
- Мон тонэ обожаю. Мон вуо, кык нунал ортчыса, только машинаез ачид нуод, нош мон вӧзад пуко. Тон мыным пи пияд ке, мон тонэ ки вылам нулло. Тамирчик нималом, дядяйме кадь. Мон юэмысь дугдо.
- Тӥляд вань ни ук пиосты.
- Ма, соос немецъёс. Огез тӥни улэ Франкфурт-на-Майне карын. Кышное но отын ик.
Пиосмурт огдырлы чалмиз. Полтарашказэ ӝутћз но «асьмеос понна» шуыса нош ик ӟузиз нап-ӵуж вуэз.
- Кызьы тӥляд нимды? – юаз нылаш.
- Александр, верай ни ук вал, – куараяз куатаськон сямлэн одӥг шапыкез но ӧз кылӥськы.
Нылаш тодаз вайиз, воргорон нимзэ вазенгес вераз шуыса. Соин мылкыдыз кӧня ке пожаськиз. Пересь соин сомында вераське ини, нош со нимзэ но йыраз ӧз поны. Тӥни озьы адямиос кылзӥсько ог-огзэс…
- Тон беризь кадь.
- Ы-ы.
- Мон тонэ Путинэн тодмато.
- Я.
Динамикъёсысь тодмо куара чузъяськиз: поезд, 5 минут ортчыса, сюрессэ азьланьтоз. Дыр вуиз платформаысь тамбуре тубыны но пересен огӝужда луыны. Вузкаронние уксё воштыны кошкем проводница аслаз вагоназ бызьыса берен вуиз. Ныллэсь векчи куараен нёръямзэ кылыса но кык йырси керттэтлэсь лэйкамзэ адӟыса, пиосмурт мынектӥз.
- Эх! Пичи нылаш бызьылэ.
- Со проводница.
- Со? Со нылаш. Кызьы проводница? Со пичи нылаш, – оскытэк аслэсьтыз вера пересь воргорон. Солэн аслаз синъёсызлы, аслаз малпанъёсызлы оскемез потэ. Марайколэн ӧз поты ни солэсь оскемзэ быдтэмез.
- Ӟеч луэ ни!
- Мон тонэ Мускоын пумитало, одно ик. Яратко тонэ.
Кык огназы кылем адямиосты висъясь чугун сюрестӥ поезд матэктыны кутскиз. Тани-тани со кык пӧртэм дуннеын улӥсьёсты люкоз. Воргорон, поездлэсь матэктэмзэ адӟыса, чиньыоссэ ымдураз йӧттӥз, чупасько тонэ, шуиз кадь нылашлы. Поезд секыт вагонъёсыныз нырысетӥ платформаез ватӥз. Марайко вагонъёс вискытӥ гинэ адӟылӥз на пересь мугорез, ӟусэз но кенер сьӧрысь вить этажъем коркаосты. Тани ӝоген нылашлэн поездэз но вырӟиз. Александров станция но воргорон ӵошен кылизы пумитаны выль составъёсты, нош Кинешмае мынӥсь поезд, омырез вандыса, нуиз Марайкоез азьлане.