Фотосет

Туннэ ветлӥ Полина Кубисталэн студияз. ӵуазе кстати солэн студиезлэн открытиез луоз. Сыӵе отын шуныт, куанык, нокыӵе энергия но уг кошкы, наоборот, отын ваньмыз - котькуд адями, котькуд арбери, омыр но - тыныд капчи мылкыд сёто, кужым пыӵато.

Фотосессия вал. Мон, пе, модали вал ук. Дарали Лелилы тау. Зэм но, азьвыл мон сое ӧй но валалля вал, дыр. Но туннэ валай: "Маdemoaselle Oudmourte" модая агентство мынэсьтым камералэсь кышканме но возьдаськемме быдтӥз. Дарали Лели, тау!

Но татын (камера азьын астэ раскованно возён) мукет факторъёс но вал. Кылсярысь, мыным вал туж умой: Полина Кубисталэн дӥськутаз мыным туж комфортно вал, макияж мыным туж усто лэсьтӥзы (мон шедьтӥ сое), йырсиме но, паймоно кадь, ымнырыя, туж усто тупатӥзы. Соин ик мынам мылкыды эшшо но вылӥе ӝутскемын вал. Со командаен ужан зэм но трос зигардэ тынэсьтыд уг басьты, уж вӧй вылтӥ кадь мынэ. Нош Полиналэн вань аслаз командаез. Котькудӥз соос полысь ог-огзэс валаса ужало. ӟечокъёс прак.

Котькуд адямилэн аслаз визажистэз но парикмахерез кулэ луыны, кудъёсыз тонэн одӥг тулкым вылын ужало. Соку тыныд но кельшоз, соослэн но мылкыдзы умой луоз. Мыным туж яразы визажист Татьяна Рябова, йырсиез пуктӥсь Вика Фролова. Соос туж устоесь. Самой-Самоесь. Честно.

Фотосет кутскон азьын, Полина монэ настроитьтыны выриз, гань-гань кариськы, эн кышка шуыса. Со быгатэ. Мон копак синмаськыса кошки соос дорысь, солэн студиысьтыз.

Одно ик мыно ӵуказе дэремзэ басьтыны, кемалась ӧдъясько вал ни. Фотосет асьтэлы каремды потэ ке, дэмласько, мынэ Гриша Степанов доры, тиледлы образ но лэсьтозы, чебер туспуктэмъёс но, капчи мылкыд но кузьмалозы. Тӥни сыӵе пичияк явной реклама.

#zemos_udmurt_veme

Туннэ "Грифон" арт-центрын удмурт мультфильм лэсьтонлы уксё бичанъя концерт ортчиз. Бичаллям 12 сюрслэсь ятыр. Калыкез паймымон трос люкаськиз.

Тӥ уд тодӥське, кыӵе вал со концертын мусо, шуныт но куанык. Пичи пиналъёс нош кӧня вуизы. Шак одӥг интыын - бадӟымъес но, егитъёс но, покчиос но. Нош со ваньмыз Ижкарлэн шораз, кыче ке гуртын ӧвӧл.

 Ку концертэз нуэ пичи пи, кырӟало Камалиос - сюлэм ик небӟе. Нош кыче соос дӥсьтӥсесь, возьаськисьтэмесь. Тӥни кыӵе вуоно поколение. Малпасько, соос удмурт дуннеез йыринь-чукинь берыктозы шуыса. Вылӥе ӝутскозы но трос малпанъёссэс быдэсмытозы. Тани сцена вылын сылэ вал динамик. Одӥг пичи пияшлы со синмаз усиз ни. Анаез дорысь пегӟе но сцена вылэ со коробка доры мынэ. Анаез сое нуэ отысь, нош соиз нош ик. Кыӵе целецстремлённой, малпасько, депутат луоз.

Нош эшшо Пичи Пурга ёросысь Иваново-Самарск гуртысь пиналъёс быдэс автобусэн концертэ юри лыктӥллям. Паймымон. Света Ручкина соослы удмурт мультфильмлы уксё бичанъя эстафета сётӥз. Табере соос но гуртазы концерт лэсьтозы, удмурт мультфильм лэсьтон понна уксё бичалозы, но эстафетаз мукет школалы сётозы. Умой малпан так ке.

Одӥг залын кин мар кариз ке но, нокин но ог-огезлы ӧз люкеты кадь. Ми концерт учкыса пуким, нош вӧзамы ик пиналъёс кесяськыса бызьылӥзы, чай юон вискын вераськыса бадӟымъёс сылӥзы. Сыӵе неформальной обстановка вал.

Тодӥсько на, кызьы нырысетӥ курсын ми гуртамы концерт пуктӥм вал. Отын ми возьматӥм удмурт кылэ берыктэм украин мультикез. Сое берыктон но куаразэ гожтон вылын Алексей Пикулев (Пушнер) ужаз. "Ну ты заходи, если чё!". Сое тӥни. Туж умой вал со. Туж. Тани со.

Пик

Туннэ операторское искусство параын сыӵе вылӥ ӟечлыко видеоос учким. Искусство ке искусство. Вообще улонлэн котькуд шапыкез но ужанлэн, хоббилэн котькуд удысэз - искусство. Улонысь кулэ адӟыны детальёсты  - соос сыӵе мур пуштрос пушкзы вато. Тӥ уд но тодӥське. Нош кытчы мынэ со техника - азьлане но азьлане - устогес но устогес луэ. Нош пик кытын.

Пик - со точка, кытчыозь вань фирмаос вуозы но огкадь луозы. Кылсярысь, Сони, Кэнон, Никон фотоаппаратъёс маин ке но пӧртэм луо на али дырлы. Нош ды ортчыса, соос луозы одӥг кадесь. Потэмын ни FullHD-лэсь ӟечлыкгес видео качество. Со 4K. Вань фотоаппаратъёс со качество доры кыстӥськозы. Кыстӥськозы но одӥг кадь пуштросо луозы. Аппаратъёслэн вылзы гинэ пӧртэм луоз на.

Глобализация вань удысъёсын. Со калыкъёсын герӟаськем висьытӥсь ужпум кадь. Куке но вань йӧскалыкъёс бырозы. Вань адямиос одӥг кылын вераськыны кутскозы, одӥг пространствоын улозы.

Антиутопия.

Who is who?

Сергей Арзамазовлэн туала литературалы сӥзем лекциязэ лыдӟиз. Малпасько вал, мар ке тужгес но тунсыкозэ, выльзэ кыло. Таяз тулыс "Галерея" арт-центрын лекциез туж тунсыко вал. Нош таиз буш. Сое огшоры кылзӥськыса пукыны но умой. Гань-гань кураез, вера марке.

Калыкез лыктӥз так, соос, кинлы тунсыко. Пайми, Андрей Гоголев сыӵе воштӥськем. Жуммем, табере со удмуртъёслэн дуннеязы пырон ӧс утча кадь. Шуэ, стоит -а берыктылыны удмурт кылысь ӟуч кылэ но ӟуч кылысь удмурт кылэ. Малы меда уд? Но юнме дыр быдтонтэм понна, умойгес луоз, дыр, удмурт егитъёслэн литературазэс ӟуч кылэ берыктыны. Соку лыдӟисьёс тросгес луозы.

Тросэз али лыдӟиськыны уг яраты ук. Эше тани, Славчи, уг яратӥськы, шуэ, лыдӟиськыны. Сюлэм ик оломар луэ. Кин понна, мар понна иське поттӥськом газет. !!!

Но туж тунсыко одӥг пусъемез вал. Кызьы азьвыл писательёс туж узыр улӥзы, квартираос кунлэсь басьязы. Нош собере система сӧриськиз. Писательёс луизы журналистъёс, уксёзы но ӧжытгес луиз. Писательёслэн статуссы быриз, гожъяськон удыс уксё ӧжытгес сётыны кутскиз, соос юыны кутскизы. Тодамы гинэ ваём В. Романовез, М. Федотовез... Жаль, кыӵе жаль. Нош собере пиосмуртъёс гожъяськон удысысь копак кошкизы - мае ми адӟиськом али. Пиослы семьяоссэс сюдыны кулэ ук.

Нош удмурт литературалэн азьлань сюресэз? Кытын? Удмурт гуртъёсысь потэм гожъяськисьёс вылын гинэ со возиськоз, пе. Нош удмурт кыл быриз ке. Сыӵе мӧзмыт луиз мыным, ку Алексей удмурт литературалэсь азьлань сюрессэ ӧз адӟы. Нош мон оскисько, со луоз. Со вань. Огшоры критикъёс уг тунсыкъясько ни выль гожъямъёсын.

Лекция лыдӟисьмы блогъёсты но лыдӟемын ӧвӧл. Нош блогъёсысь гожъмъёсты "вотэс литература" шуыса учкид ке. Яке куд-огъёсыз удмурт литератураын выль жанр кылдыто яке синтез жанров.

ӧз тырмы маиз ке. Удмурт туала литературалэсь суредзэ со быдэсак ӧз кылдыты. Но визьмолы визьмо критик кадь. Who is who? ыы.

Симфония оркестр Быгыын

Мынам оперативносте али воксё зашкаливает. Туннэ уйвӧтам но адӟи ни исамзэс. Тани кӧня ке нунал ортчыса, гожтӥсько кызьы мон нош ик вуи Быгые - мон понна туж мусо но яратоно интые. Асьтэдыс гинэ ми интые пуктэ - мынӥськод Ижкарысь Быгые час но ӝыны верантэм урод сюресъёстӥ, котыр мувӧй кыскон аппаратъёс музъемлэсь кужымзэ кыско - вань та суредэз адӟыса тон эмоционально туж жадьыса вуиськод Быгые. Нош отын тонэ кема витем куноез кадь пумитало - котьку табанен но турын чаен - соку ик вань жадем быре. Ноку но та мусо фин-угор дуннелэн шоркарысьтыз урод мылкыдэн уд бертӥськы. Али но озьы ик вал.

Быгыын туннэ симфония  оркестр концерт сётэ. Конечно, егитъёс - Ижкарысь крезьгуро колледжысь шудӥсьёс, Нижний Новгородысь китаецъёс (кызьы шуиз соослэн дышетӥсьсы, дуннеын котькуд витетӥез - китаец, милям вузамы но озьы ик. 800 адями пӧлысь), Франциысь скрипкаен шудӥсьёс но туж егит востэм француз - композитор Кристоф Арфан. Валаськоды, дыр, ваньмыз бюджетно, дунтэк сыӵе. Та ужрадэн вылӥыз туж респектабельно адскиз ке но дыр, но пушсэ веръяса номырзэ но ческытсэ уд шӧдӥськы.

Оркестр кык композиция шудӥз. Нырысетӥез тӥни со самой К. Арфанлэсь "Приглашение в путешествие" но В. Новиковлэсь  "О, Париж, Париж"-зэ. Зэмзэ ке, егит композиторлэн произведенияз мыным гаромния ӧз тырмы. ОТын, пе, удмурт крезьгуръёслэн мотивъёссы вал. Вал. Со Юминовлэн экспедициеныз Бобья-УЧАЕ ФОЛЬКЛОР БИЧАНЫ ВЕТЛЭМ.

НО МАИЗ МОГДОСэз? Юасько со куанер пилэсь, малы тон калык крезьгурен тунсыкъяськыны кутскид шуыса. Со шуэ, акыльтӥз академической крезьгур. Нош Франциысь гуртъёстӥ ветлӥд-а? Ӧй, шуэ. Малы? Соос Парижлэсь кыдёкын, пе. НОш мон шоркарын улӥсько, соин ӧз пӧрмы потаны. Нош Удмуртия Парижлы кыӵе матын! Вить минут мынонэз прак. Зэмзэ ке, со сокем востэм пияш, гуртъёстӥ но огназ ветлыны уз дӥсьты, возьдаськоз. Наш татын экспедиция вал.   Фотое но пуксьыкуз, ымынырме шузи пепертӥ кадь шуыса малпа лэся но, йырзэ улӥе лэзе, синъёссэ ватэ. Чудо. Но дӥсяськемын со туж чебер, ачиз но туж чебер. Пукиз огшоры калык пӧлын - заллэн шораз ик. Кылзӥськиз аслэсьтыз пӧрамзэ.

Так ке со экзотика. Симфония оркестр огшоры гуртын.  Юминов ужа калык понна, яке аслэсьтыз самолюбизэ вешан понна? Городын со аслаз егитъёслэсь кылдытэм симфония оркестреныз но французлэн ыль  композициеныз кинэ паймытысал но кыӵе удовольствие басьтысал лэсьтэм ужезлэсь? Татын весъёс вылын мукет палыз мед кыскоз - гурт калык сярысь сюлмаськон но соосты шумпоттон.

Но концерт азьын тужгес но тунсыко люкетэз вал - кӧтырес ӝӧк. Отын Быги - фин-угор дуннелэн шоркарыз сярысь, Юминовлэн пӧртэм ӵектосъёсыз сярысь вераським. Быгыос туж зол пӧсекъязы, соослы мииннац одӥг копейкаен но одӥг мылкыдын ӧз юрттэ шуыса. Ваньзэ асьсэос лэсьтӥзы. Юрттэт курыса вазиськылонлы - чалмыт. ШАрканзы юрттэм коть. Нош проект гуртсэс умой карон понна, коркаооссы дорозь сюрес лэсьтон понна кылдытэмын вал. ВСё-таки кунгож сьӧрысь татчы ветлылозы ук. Но, ар ортчиз ни, тани толэзь мар ортчыса, Быгыос асьсэ нимзэс мукет интылы сётозы ни, нош сюресэз али но ӧз лэсьтэ на. Оскыто соосыз, лэсьтозы шуыса, толсурозь, пе.

Кельшиз гуртсылэн главаез. Со тэк уг пукы, малпанъёссэ шараяны уг кышка,  ШОнерак министерствое мынэ. Но солы, пе, шуо, ми муниципал кылдытэтъёслэн тӧроосынызы ум ужаське. Вот, котьмар каре собере. НОш район чалмыт пуке. Аслам ёросэя тодӥсько, кыӵе соос востэм пуко но вылӥ структураослэсь сӥтянъёссэс ӵушылэ. Быгыос жаль потӥзы. Шӧдӥ, кӧня соос кужымзэс но мылкыдзэс но быдтӥзы ни та проект выэ. ТОдады гинэ вае, кызьы ортчиз Быг-Быг фестиваль. Миннац но ӧз юртты ке, кызьы соос озьы сыӵе умой радъяны быгатӥзы. Паймисько но йыбырттӥсько.

Юминов Эгра ёросысь Сэп гуртысь нылпиосын аппликация мультфильм лэсьтӥллям. Ӟечесь, ярам. Бобья -Уча гуртын гожтэм Рекрут гурлы Мускоысь нылаш песокен суредъёс лэсьтылэм, озьы клип форма оглом пӧрмем. Но мыным уг кельшы Юминовлэн позициез. Со понна ӧвӧл нимаз мари калыклэн культураез, удмуртъёслэн сям-йылолъёссылэн нюансъёссы. Со культураез огломак учке, глобализация ӧрын малпаське. Нош со ӧрын ваньмыз одӥг луэ - калык но, культура но, кыл но.

Берло вал фуршет. Сии трос фвиноград но вераськи мыло-кыдо  Му нимо китаеецен. Шуэ, уг поты вал, пе, татчы лыктэме. Консерваториын, пе, косӥзы. НОш татчы лыктэм бере, мыным кельшиз шуэ. Татын туж умой. 

Палэс

Удмурт дуннее гожъямъёсме тырыны малпай) Тани одӥгез. Палэс сярысь.

Вань меда туала удмурт проза?

8-тӥ куарусёнэ Генераллэн юртаз ортчиз туала прозалы сӥзем «Палэс» ӝыт. 
Палэсмуртэз уйпал ёросъёсын Палэс гинэ шуо. Озьыен та ним ӝытлэн пуштросэз сярысь вераз - «магической реализм» но туала удмурт проза. 

Вань меда туала удмурт литератураез кылдытӥсьёс? Шуыны луоз, чиньыен лыдъямон гинэ ке но, вань гожъяськыны мылкыд карисьёс. Но соослэсь мылкыдзэс нокин но уг кужмояты, будӥсь кужымез уг юнматы, литературае сюрес уг усьты. Кызьы усто спортсмен быре урод тренировкаос, яке ас понназ марке дауртэмез бере, но азьланяз яратоно уженыз вырыны солэн тазалыкез куашка, озьы ик егит гожъяськись но, аслыз инъет шедьтытэк, ыше но азьланяз уг гожъяськы ни. Совето вакытэ кадь, али гожъяськисьёс уг дунъясько ни. Тодэ гинэ вайид ке, кызьы ачиз Сталин кенешыны Максим Горький доры гуртаз ветлэ вал...  

Та ӝытэ но трос ик адями ӧз вуы - асьсэос гожъяськисьёс, интернетын бамзэс нуисьёс но соослэн эшъёссы. Вуиз «Инвожо» журналысь суредаськись Миша Николаев но ваиз ваньзылы йыр поромытӥсь кузьым - али гинэ печатлам «Пен-клублэн» альманахез, журналэн выль номерез. Номырин но уд ӵошаты сое, ку тон берыкъяськод зӧк туала журналлэсь бамъёссэ, паймиськод кыллэн узырлыкезлы, пӧртэм литератураослэн аспӧртэмлыкъёссылы но нырыныд кыскиськод али гинэ типографиысь потэм журналлэсь зынзэ. 
 
Егитъёс озьы ик тодматскизы латиноамерикан литератураын йылаз-пыдаз вуэм «магической реализм» амалэн. Маин ке но со  «этнофутуризмен» но одӥг радэ луэ. Кызьы пусъе кылосбуръя доктор Татьяна Ивановна Зайцева «Удмуртская проза второй половины ХХ-ХХI века: национальный мир и человек» монографияз, али дыре Россиысь фин-угор литератураез эскерисьёс «этнофутуризм» радын кутскизы вераськыны «магическое видение действительности» сярысь.  Озьыен «этнофутуризм» но «магической реализм» матын луо. Фин-угоръёс дуннеез вашкала улон пыр валаны турттӥзы («этнофутуризм» шуон вордӥськиз эстон литератураын но ХХ-тӥ даурлэн пумаз мукет литератураосы вӧлмыны кутскиз), нош латиноамериканецъёс - улонын луись магия пыр. Ӝытэ лыктэмъёс Хорхе Борхеслэн «Книга песка» новеллаез вылын магической реализмлэсь тодметъёссэ пусйизы. Озьы ик пал кыл верамын вал Габриель Маркес но солэн книгаосыз сярысь. 

Пумаз асьсэ гожъямъёссэс лыдӟизы удмурт кылосбуръя факультетын дышетскисьёс Марина Пахомова но Николай Михайлов, Питерын улэмез сярысь мадиз малпаськон манереныз пӧртэм луись Дарали Лели но «уйвӧтысь чуръёсыныз» тодматӥз Мария Векшина. Котькуд гожтэм сярысь егитъёс асьсэ мылкыдъёссэс веразы. Озьыен, диалог пӧрмиз. Азьланяз но удмурт литературалы сӥзем ӝытъёс луозы на.

Резиденция

Резиденциысь мон вазьгес кошки, соин ик ӧй адӟы нокыӵе странез. Бадӟым но паськыт тубат вылын гинэ кӧня ке "ог-огзэс яратӥсьёс" сыло вал.

Туж умой, мон вазьгес кошки шуыса. Нырысь кылдэм мылкыдме нокин но ӧз куашкаты. Черодын сылӥсько. Мышкам пиос. Одӥгез шуэ, юри чебер дӥсяськи, кышкай, уз лэзе шуыса. Валантэм обстановка. Табере та Пепелац ӧвӧл ни. Малпасько вал, интыез трос шуыса. Но увы кадь, сомындагес ик. Огшоры азьло адямиос ӝыныез барын пуке вал, эктӥсез эктэ вал. Нош али - ваньмыз огазьын. Кӧня калык люкаськиз... Танцполын нош ик шӧкчон интыез ӧй вал.

Мон вылӥысен учки ваньзы шоры. Умой, пока экто, уз жугиське, дыр. Солань-талань ветлонъямымныръёс шоры учкылӥ - пань-пань юэмын ӧвӧл кадь - дӥсьёссэс синйылтӥ - ммм, так ке тросэз валаса дӥсяськемын. Ваньмыз сыӵе гань-гань интеллигентно потӥз. Интызэ валаса кадь - зарниям кортъёс, чилясь пол, да марда... Уг тодӥськы - пространствоен бадӟымен йырин номырзэ уродзэ ӧй адӟы кадь.

Клипез возьматӥзы ук, Ваньмыз Арт-экспедициысь ... Зэм ке, со 10 нуналъёс туж шудоесь, яркытэсь, шунытэсь нуналъёс вал. Мон трос мар аслым басьтӥ, нош телефонной связь ӧз луысал ке, мон воксё губка кадь луысал но экспедиция пумын мылкыдэн пачыласал... Мыным кельшиз клип. Кин ке но шуиз любительский. Но мыным кельшиз. Со кыӵе ке мукет. Со ӧвӧл "Италмас". Кык нунал ортчыса, Петыре телевизор пыр адӟем сое. Серекъяз гинэ.

Бертыны потӥ. Клуб азьын вполне сазь пиос сыло. Одӥгеныз мар ке вераськыны кутским. Сазь, визьмо вераськиз, Алнашысь, мынам одӥгез яратоно гуртъёсы пӧлысь...

"вотэс литература"

Странность сыӵе, вал дыр, ку удмурт блогъёсты лыдӟылӥзы. Тау соослы, кин блогеръёсты тодмо кариз. Но али валасько: блогъёс акыльтӥзы. Газет тодам лыктӥз - азьвыл солэн кӧня подпискаез вал, нош собере, нош али? Озьы ик блогъёслэн но, лыдӟисьёссы кулэсмо кадь. Тросэз тодӥзы ни, мар со блог. Нош гожъяськисьёс сярысь ке, кин ке шедьтӥз аслыз аудитория, яке аудитория сое шедьтӥз (удмурт "вотэс" гожъяськисъёслы кыкетӥзэ лякыны шонергес луоз кадь потэ). Алиосыз блогеръёс мукетъёсызлы гожяъськыны мылкыд сёто. Мед азьланьскоз та уж.

Тани Россиысь писатель Денис Драгунский ветлӥз Ижкаре. "Читай, Ижевск!" фестивале, пумиськиз лыдӟисьёсыныз. Пумиськонын со шуиз, али, пе, кылдэ аспӧртэмлыко "вотэс литература". Солэн туж трос умой палъёсыз. Нырысь ик, дунтэм. Кыкетӥез,  солэн ӧсъёсыз котькинлы усьтэмын. Куинетӥез, вотэс кутскись авторез тодмо каре, солы аудитория кылдытэ, озьыен, книга но поттӥз ке, соос ӝажы вылын тузонӟыса уз кылле. Ньылетӥез, автор, весь гожъяськыса, кылзэ волятэ. Витетӥез, гожъямъёс сярысь отзывъёсын тодматскыны луэ, комментарий кельтыны. Но валтӥсез плюс, гожъяськисен но лыдӟисен диалог кылдэ, интерактив. Нош урод палъёсыз сярысь верад ке, (таиз аслам малпанъёсы ни) вотэсын ӧвӧл редактор, кудӥз возьматоз кутскись авторлэсь янгышъёссэ, валэктоз солы соосты. Вотэсын ӧвӧл на зэмос критика... Но эшшо, яра-а меда блогъёсты "вотэс литературае" пыртыны (нош Денис Драгунский отчы блогъёсты но пыртӥз)? Риторической юан яке мар?

Гожъяськисез гожъяськоз ни, нош лыдӟисез лыдӟоз.

Тау.

Удмуртъёс Америкаын

Богдан Анфиногеноен Оля Тронинаен, "Шунды" огазеяськонлэн кивалтӥсез, ветлӥзы Америкае но со континентын улон сярысь мынэсьтым вань стереотипъёсме куашкатӥзы. Малпаськоды отын вань свобода? Да отын тыныд пал кыл но вераны уз сётэ. Америкаен ӵошатыса, милям воксё демократилэн вань прелестьёсыз адӟисько ай. Туннэ вылаз эшшо параын "Отдел новостей"  американский сериалысь люкетсэ возьматӥзы. Юри, учкелэ ай нырысетӥ серизэ, валалоды, малы со мерлыклы ӧз кельшы.

Одӥг телешоуын куноослы учкисьёс юанъёс сётъяло. Одӥгез учкись юан сётӥз: "Маин Америка выликой держава луэ?" Патриотъёс кадь, вань куноос валэктон сётӥзы. Соос пӧлысь одӥгез шуиз - свободаеныз Америка великий луэ. Нош куинетӥез кӧня возиськиз, но сое юанъёсын довели шуод-а мар-а, но со пуштӥз. Кыӵе свобода шуэ Америкаын... (отӥзэ асьтэос учке). Соку мынам пушкам ваньмыз  - малы ке но мынэсьтым сюлэмме туж висьыто политикаен герӟаськем юанъёс - бугырскиз, мон соку ик патриот луи, дыр, пичильтык гинэ.

Богданлэсь но Олялэсь вераськонъёссэ кылыса, син азе пуксись суредъёс йыре уг пыро. Индеецъёс али гинэ но резервациын, асьсэ автономной музъем вылазы, кытын соос асьсэлы вождьёс быръё, племязылэн катъёссыя уло на, али гинэ но, милемыз тӧдьы куо адямиос уг ярато, ми но соосты ум яратӥське шуыса верасько на. Уло, пе, туж куанер, 60% -тэз ужтэк кыллё (асьсэлэн ик, пе, ужамзы уг поты, субсидиос вылын но музъемзы понна арендалэсь поттэм уксё вылын кыллё), егитъёс, шудо азьлань улонлы оскытэк, ошкисько, тросэз юо... Тӥ эн малпалэ, соос али гинэ ке но виг-вамъёсын но пӧртэм шалашъёсын уло шуыса. Соослэн вань сыӵе ик тыро-пыдо коркаоссы, юртъерзы. Соослэн огшоры уг поты умой улонэ потэмзы, "тӧдьыосын" кусыпъёс кылдытэмзы, азинскемзы но стереотипъёслэсь куштӥськемзы.

Нош мар бордын парадокс? Соос мукет йӧскалыкъёслэсь но цивилизацилэсь кенераськыса уло. Малпалод, асьсэ калыксылэсь культуразэс но анай кылзэс утё. Но... Но соос тросэз уг тодо ни асьсэ кылзэс, верасько, ваньзы кадь, англи кылын. Угось Америкаез англи кыл огазея - отын ӧвӧл "йӧскалык", "мукет кунысь адями", "мукет осконэн улӥсь" валанъёс, отын ваньзы ог-огзэс одӥг радэ пукто. Тӥни кытын уло глобализация. Я коть Америкаез но милесьтым континетмес океан висъя. Индеецъёс сярысь... Нош тодӥськоды-а, кызьы тодо, индеец тон, яке ӧвӧл. Паймоно кадь: вирзэс, пе, эскеро. Кӧня процент возьматоз - сомында процентлы ик тон индеец. Соослэн карточкаоссы но вань: тон индеец, тонэ ултӥяны уг яра. Али отын туж чурытэсь катъёс кутэмын йӧскалыкъёсты гажанъя. "Сьӧд куо адямиосты" нигер шуыны, олокыӵе но кылъёсын соослы вазиськыны уг яра.  Соин ик таосыз (индеецъёс но негръёс) сьӧраз ортчо ни - соослы ваньмыз с рук сходит.

Нош культуразы но индеецъёслэн быдэсак быриз ке? Соос со борды уг кутско. Валтӥсез соослы - вирзы. Соин ик, лэзя, мукет калыкъёсын но вераськыны уг дырто. Асьме кунын коть калыкъёсты утёнъя программаос вань, вань Ассамблея народов России. Соос тэк всё-равно уг пуко, дыр. Нош Америкаын ӧвӧл коренной калыкъёсты утись катъёс. ӧвӧл.

Сакырын Быдӟым Крезь

Куке но Чудья ӝытъёс ортчытъяны Перепечкинын кутскиз вал. Кубызлы, Арганлы сӥземъёсыз радъяськизы, нош крезь дорозь ӧм вуэ. Ма соку кема ик дыр ӧз ортчы, Вероника Фёдорова Быдӟым Крезьлы ӝыт ортчытӥз. Перепечкинын ик, кылем толалтэ. Сыӵе обстановка вал отын - вылӥ, кизьныны но кышкыт. Быдэс " крезь оркестр" шудӥз. Всё-таки со удмуртъёслэн валтӥсь крезьгуро интсрументсы - нырысетӥез Инмарен чашъем вӧсь пужымлэсь лэсьтэмын.

Так справка (простить каре ӟуч кылын шуыса):

"Крезь (удм. пение, напев; крезьгур – мелодия) – струнный щипковый инструмент. Имеет корпус из еловых досок в виде полукруга длиной у основания до 830 мм, с небольшими выступами на концах и выемкой в середине. От 14 до 24-32-38 жильных струн натянуты между фигурным деревянным струнодержателем и колками. Есть внутренние резонирующие струны, натянутые внутри корпуса для улучшения качества звучания (резонирующие струны встречаются не во всех инструментах).
Удмуртские гусли – крезь – имеют две разновидности: простые гусли (крезь) и великие гусли (быдӟым крезь). Характер звучания светлый, чистый. При игре инструмент держат на коленях полукружием к себе, правой рукой играют мелодию, левой – басы. Крезь существовал в Удмуртии как бытовой и культовый инструмент. Как бытовой звучал на свадьбах, во время календарных праздников (после «официальной» части, когда водили хороводы), затем повседневно. Как культовый инструмент быдӟым крезь звучал во время общественных молений, ритуальных танцев, молебных напевов – например, "мелодии небесной росы" (инву утчан гур). Гусляр (крезьчи) участвовал в выборе хранителей Великого святилища, жрецов и других служителей языческого культа. Древняя история крезя изучена недостаточно, археологических находок не существует, в то же время инструменты этого типа характерны для многих финно-угорских народов, воспеты в песнях, эпосе, традиции их использования в религиозной обрядности восходят к периоду древнеуральской языковой общности". Андрей Воронцов.

Пайми вал, ку Танечка Тихонова Капустинлэн мастерскояз ветлыны кутскиз но аслыз куско крезь лэсьтӥз. Молодец ни  со. Сыӵе бадӟым предисловие вал мар борды...

Сакырын туннэ крезьлы сӥзем ӝыт ортчиз. Шонерзэ вераса, С. Капустинлэн студиезлэн дискеныз калыкез тодматӥзы. Отчы крезь тулкымъёс гожтэмын: пыж крезен но, быӟым крезен но пӧрмытэм крезьгуръёс. Михаил Рябов нош крезь - контрабас лэсьтэм. Зӧк струнаосын - черкъёсын азьло, пе, службаос контрабас куара улсын нуисько вал, соин ик крезь-контрабас со вӧсьлыко инструмен.

Тӥ кылзӥське гинэ, кыӵе куара поттэ крезь - ненег тулкым кадь ортче со сяськаос вылтӥ но соос вылысь мушъёсты сэзъялтэ, собере мушъёс каллен со доры лобӟыны кутско... Крезь куара - со инкуазь вальслы кельше.

Быдӟым крезен шудӥз Вероника Фёдорова, куско крезен шудыса, кырӟазы Танечка Тихонова но Валерия Фёдорова, Капустин аслэсьтыз малпам крезьгуръёссэ кык крезьёс вылын шудӥз, Михаил Рябов "Муш утён гур" лэзиз.

Туж шуныт вал татын, туж шуныт. Калыкез, мон понна, ожытгес люкаськиз. Но эстэтъёс, мон шуысал.

Тау.

Так, оломар тодам лыктӥз.

Мынам потӥзы выль геройёсы - Марго но Донды. Маргоез идиллисстической улонэ пыртӥ но табере солэн отысь кошкемез уг поты ни. Со кыске тамак, яратэ аслэсьтыз муспотонзэ, кылчинзэ Т.-ез, юэ вина. Нош Т.-ез весь сое шонер сюресэ поттыны выре но уг вормы - ӟигарыз быре.

Марголэн дуннеяз вуыса, мон тодам вайи, кызьы кылем арын ветлӥ француз киное "Жизнь Адель". Тодӥсько на вал, али кадь ик, кызьы мон мылкыдъёсме, блоге потто шуыса, гожтӥ вал. Но блогысь малы ке ӧй шедьты. Валай, кыӵе ӧжытсэ гинэ мон татчы пыртӥсько. Ага.

Веросэ пӧрме постмодернистской. "Кенеш"- ын матысь дыре потозы ни мукетъёсыз.

Эшшо В. Ерофеевлэсь "Москва-Петушки" прозаен гожтэм поэмазэ лыдӟем бере,  мылкыды ӝутскиз вал со выллем марке малпаны. Но одӥг абзацлэсь кыдёке ӧй кошкы на. Кемалась вал ни со. Вунӥз ни со, мылкыд но мукет луиз ни. Та ке тунсыко луысалыз но, кызьы мыным потэ, шузигес. Вераськысал бадӟым стажен алкашъёсын яке "кыдзы бертэм" (йырвизьзы берытскем) адямиосын. Соослэн дуннезы, мон понна, тужгес но тунсыко.

Тани ветлӥ вал позыръяськонэ. Ваньмыз сыӵе цивильно: кафе, инбам, кезьыт, ӝӧк сьӧрын юыса пуко, зусъёс вылын адямиос пуко, мукетъёсыз экто. Нош одӥгаз ӟус вылын пуке трос аръёс ӵоже юись мурт. Солы 35 аръёс сяна ӧвӧл на. Котькуд нунал юэ ке но, кыӵе дӥсяськыса со потэм кафее. Пиджакен (вуж ни ке но, всё-равно, адске, атаез киысь яке со дыръёсысь  кылемын со шуыса), брюкиен (пиджакез кадь ик) но ботинкаен (известен-а, тӧдьы краскаен-а саптаськемын ке но, всё-таки ботинка). Юэ ке но, дӥськутэз погмаськемын ӧвӧл, пиджакез  бирдыямын - сыӵе туж интеллигентной алкаш. Пуке себе ӟус вылын но крезьгур кылзӥське, кайфоватьтэ. Эктыны но эктысал, дыр, но пыд йылаз сылыны уг быгаты вал ни, соин ик пукыса киосыныз выртэ, йырыныз крезьгуръя эктэ. Нош дискотека бырем бере, ӟус вылысьтыз султӥз но, сопалась тапала шонаськыса гурт палаз вамыштӥз.

Нош табере тодамы ваём суббта ӝытъёсы (и не только) юись егит пиосты... Соослэн мыжыкъёссы чик но крезьгуръя уг лобало... Табере кылдэ юан: кызьы улыны шонер яке кызьы юыны шонер?

Мылкыд

Жади морально. Ӵукна вазь султӥ. Лулы шугъяське, гань-гань кариськемез уг луы. Уйин но кык дуннеос вискын сылӥз. Таисьтыз но кошкемез потэ, сояз но потыны уг  вормы. Озьы ик сопалась тапала пӧсекъяса ветлӥз но мырдэм-мырдэм уйвӧт дуннее усиз. Кемалы луысал ке.

Ӵукна ӵук султӥ ... Озьы ик наркотический мандражен улӥ быдэс нунал. Сюлмы туж зол кокаськиз, нош малы? Валантэм. Пушкын весь тылпу ӝуаз, ваньмыз пӧзиз... Озьы ик со кужым вань лулме жадьтытӥз. Нош нунал озьы ик ортчиз.

Жади. Жади но умме уси.

.точка

Вот вань учыр "Брангурт песянайёсын". Тросэз тодо вал ини. озьы луоз шуыса. Табере со ансамбль - бренд, ним, процесслэн вылбамыз, нош пушкыз - неважно. Зэм но, шоу-бизнеслы неважно. Ансамбльлэн составез воштӥськысал куке но. Номыр но соин уд кары. Табере "ББ-лэн" историяз вуиз реальной точка, кудӥз продюссеръёсын пӧрмытэмын буш запятойлы. 

Екатерина Васильева - кылбурчи

Тодматски туннэ выль мон понна кылбурчиен Екатерина Васильеваен. Вордӥськемын со Шаркан ёросысь тросэзлы тодмо Быгы гуртын. Туж аспӧртэмлыко нылаш. Нырысь ик, кылбуръёсыныз тодматскыса, мон сое сыӵе шыпыт нылашен син азям пуктӥ. Но ку жингыртӥ но куаразэ кылӥ, ваньыз йыринь-чукинь берытскиз, сюлэмы лӧптӥз. Туж ненег, но со дыре ик жингрес куара соку ик ас бордаз кыскыны кутскиз кадь. 

Зэм но, со туж етӥз, вераськыны яратӥсь, усьтэм лулын, ваньзэ сюлмыныз шӧдӥсь нылаш. Но со дыре ик со котьку но азьлане кыстӥськись, пуктэм ужпумъёсты быдэсъясь, зол сямын. Сыӵе противоречивой натура кадь. "Нюко - гопо". Поэзиез но туж паймымон - удмурт литератураын солэн темаез ваньмынызы уг кутӥськы - интим. Тани учке гинэ, кыӵе чуръёсыз.

Бирдыме йӧтӥськод ке,

Кышномурт асме кожаськод.

Кин гинэ дӥсьтоз сыӵе малпанъёссэ шараяны. Нош со шонерак вера ваньзэ ("Чумолё вылэ тубод жадьыса" Татын Чумолё - со ӟызы кышномурт), улонысь образъёсты басьтэ ("усьтӥськиз ошмесэ, шукыен жальыр бызе" ошмес - кыӵе тунсыко метафора), мылкыдъёссэ сюлэмысьтыз кисьтэ ("Я, ӟыгыръя мукетсэ, сое яратӥськод ке"). Куд-ог дыръя лирической героез - со ачиз автор, нош куддыръя - со азьпал улонысьтыз ачиз-кышномурт (кылбуръёсаз герой я пияно, я яратоно, я яратонтэм, н ачиз со котьку яратэ). Темаез но быдэс творчествоезлэн одӥг - яратон. Но тросэз гожъямъёсыз солэн блокнотаз ик кылемын, малыке шуоно соос "слишком интим", соин ик издательёс соосты уг потто.

Ачиз кылбурчи шуэ, со школаын урод дышетскиз. Озьы ке но солэсь туж усто кылбурчи кылдэмын - Инкуазен, пе, быгатон сётэмын. Адӟиське, нылаш улонын трос сюлэмшугъяськонъёс адӟемын но вань мылкыдъёс сюлэмез пыр поттэмын. Тани, шуэ, Кузебай Герд Кузонэ дышетскыны тыбыраз котомкаен 400 километр пыдын мынэм. Солэн валтӥсь ужпумез дышетскон вал. Мыным но озьы ик, шуэ со, главное дышетскон, кыӵе оценка но уг пукто ке, дышетскыса визьме будэтӥсько. Так ке, пе, мынам пунктуациен янгышъёс луо, соин ик мон кылбуръёс гожъясько дыр, кытчы потэ, отчы ик пуктӥсько знак. Со туж умой тодэ Алла Кузнецовалэсь творчествозэ. Гажа Эрик Батуевез. Уг яраты Бродскиез. Улонын  - визьмо. Тодэ сое, мар солы кулэ. 

Али дырлы солэн вань ини кык пичи сборникъёсыз "Бурдъёсы вордӥсько" но "Малпанлэн шыпыртэмез". Азьланяз ӧдъя веросъёсын бичет поттэмез.

Тау улонлы, мон сыӵе адямиен тодмаски шуыса.

Пинал мылкыд - юмал йӧлпыд. Part III.

Берпуметӥзэ бертылыкум, ми концерт пуктӥм. "Пинал мылкыд -юмал йӧлпыд". Таиз ар куинетӥез ни. Малпаськод, тыро-пыдо концертлы кулэ дасяськыны ӝыны толэзь? Но али вакытэ озьы ноку уг пӧрмы. Пиосмы вуизы толон, нош ӵуказеяз концерт дась вал ни. Озьы, кызьы быгатӥськом. Пиосмы милям зарниесь ведь.

Концерт кутскон азьын Уӵыёв понна куара сётонъя агитация вал. Милям, концерт пуктӥсьёсмылэн, вань мылкыдмы куашказ. Кыӵе конерт на, Соос милемыз секыт зӥбетэн пачкато ке.

Таиз ӝыт туж бышкиськись луиз, Подводкаосын егитъёсмы мерлыко ужпумъёсы ӝутылӥзы.

Ё, ву понна кылкутӥсь, телефон пыр вераськыса мынэ. Со доры лыктэ ву.
-Тон кин? - юан Ё.
-Мон гумыостӥ кошкись ву, - вазе соиз.
-Мар бон тон ветлӥськод?
- Мынам азям куинь ужпум.
-Кыӵе?
- Мырдэм -мырдэм адямиослэн коркаосазы кылдыны, собере... шуак бырыны.
-Нош куинетӥез?
- Куинетӥезлы дсяськисько гинэ ай.
-Кызьы?
- Толалтэлы. Кынмыны. Собере гумыосын луоз буш.

Концертэ, верай ни вал, вуизы "бадӟым адямиос". Пургаласез удмурт кылэз умой уг тоды, ярам, Нош муниципал кылдытэтмылэн йырыз мыняса пукиз. Та бере ик луиз кыкетӥез подводка. Таиз - гуртын асфальт ӧвӧлтэмен.

 Герой асфальтэн пумиське.
- Тон кин? - юа Н.
- Ма тон монэ адӟылэмед ӧвӧл, дыр. Мон асфальт! - шуэ соиз.
- Ма, озьы. Мон Matiz-ме гурт пуме кельтӥсько. Таӵе сӥзьыл куазен корка дорозям вуыны машинаен уг луы, нӧдэ. 
- Я куке но тон доры но вуо, дыр ай, - оскытӥз асфальт.

Кызьы ке но озьыгес. Таиз бере Милям Йырмы гордэктӥз.  Пургаысезлы куаретӥз, со милемыз озьы серекъяло ук шуыса. Я, бон, валало ке. Кичабымон. Мон пайми, соос концертэз пумозяз учкизы. Азьло ӝыны дырзэ пуко но кошко вал.

Пуроысь егитъёслэн быгатонлыксылы паймыса но, клубысь ужасной условиоссэ адӟыса но (колонкаос сӧриськемын, мой акустика ӧвӧл, ремонт сю ар талэсь азьло лэсьтэмын ни, микшермы жаде), Культурая Начальник юрттыны ӧз кариськы, сипыртӥз мар ке куронъёстэс санэ басьтом шуыса, но солэн верамысьтыз валамон вал - со вылӥ структураостэк одӥг вамыш но лэсьтыны уг быгаты. Неужели ёросъёсъёслэн одӥг пичи но автономизы ӧвӧл. Уг оскиськы.

Концерт бере, соос милемын чай юыса пукизы на, лӥятыны выризы. Коть кузьымен лыктэ-а мар-а вал, калыкез ас цельёстыя использоватьтыны ӧдъяськоды бере (быръёнъёслы агитация сярысь татын мон верасько).

Мар кароно на, калыклы юрттэт шедьтон понна? Соос асьсеос гинэ асьсэлы юрттыны быгато, кызьы мон валасько.

Быръёнъёс сярысь.

"Номыр но милемлы уз юртты. Нокыӵе агитация. Революция со понна лэсьтоно, собере ӝыны адямиосты вийылыны". (блогеръёслэн законзыя кӧня ке уло, уг вера кин озьы шуиз)

Быръёнъёслы агитация чырты дорозь вуиз ни. Нош кыӵе отын несправедливость. Кыӵе ке депутатлы агитация ортчытыны сёто 50 млн манет, нош кинлы 50 сюрс. Ну, и кудӥз вормоз, малпаськоды? 50 сюрс куд-ог адямиослы сӥтянзэс гинэ ӵушылыны тырмоз, нош 50 млн зарнияны но.

Нош милям вуоно азьмуртмы (малпасько, тӥ тодӥськоды ни солэсь нимзэ) вань структураосты кияз кутӥз ни, тӥ уд оске, черкез но. Син азяды гинэ пуктэ, вато кулэм адямиез, нош черкын ужась шуэ: "Быръёнъёс вуо ни. Кин понна куарадэс сётоды?" Нош гурт калык одӥг кандидатэз сяна, нокудзэс уг тоды ни. "Кинъёс пӧлысь бон быръёно?" Нош соиз таосызлы вера: "Удмурт калыклы кулэ удмурт азьмурт. А. Уӵы." Бон со Уӵыёв али чирдоз, чирдоз но, туж оскисько, куараез уз пуксьы шуыса. Туж умой тодӥсько на,  али "трон" вылаз пуксьыкуз, со оскытӥз, калык мылкыд ӧз кары ке, аслэсьтым кандидатураме быръёнъёсы уг потты. "Конечно" - малпай мон ас поннам соку. Таӵе учыре кыӵе мылкыд карон на, мукет кандитаурослы кыл но уг сёто ке (может сёто, нош соосыз дунгысъёс). Малы мон озьы шуисько? Тани малы

Котькуд ар гуртысьтымы егитъёс "ПИнал мылкыд-юмал йӧлпыд" концерт пукто. Клуб ужасьёс та сярысь, конечно, ваньзылы верало, ар куспын концертъёс чиньыен лыдъямон сяна уг лэсьтыло бере. Соин ик вуиз ми доры егитъёсын ужанъя, культурая но спортъя начальник. Озьы три в одном - ни рыба, ни мясо, сыӵеос сярысь шуо кадь. Концерт азьын кутскиз агитация нуыны. Лыктэлэ быръёнъёсы, мед луоз 99 процент, тӥледлы но милемлы умой, тӥ Уӵыёв понна куарадэс сётӥщды ке. Яра, шуэ, конечно, кӧня ке куарадэс мукет партиосысь кандидатураослы но сётыны. Но тросэз мед луоз А. понна. Калыкез шузи кожа. Валэктэ, малы Путинлэн рейтингъёсыз вылӥе ӝутскизы, нош Обамалэн лэзькизы. Ярам.

Нош маиз  монэ бакомытӥз. Со шонерак валэктон сётӥз таӵе юанлы: малы Россиын сомында партиос. Кулэ, пе Западлы возьматыны, асьмелэн демократия шуыса. Соин ик вань мукет партиос. Нош асьмелы, шуэ, стабильностез возьматыны кулэ. Соин куарадэс сётоно одӥгез понна. Озьы верасько ини, азьвыл коть быръёнъёс азьын сойзэ лэсьтом, тайзэ тупатом шуыло вал. Но марке но коть дауртылӥзы. Наш али - тӥни. Тӥ милемлы А.С. понна куара, ми тӥледлы - куасьмем мыжык.  Милям гуртамы лампочкаос но уг тыро ни, всё равно ӝуыса бырозы, шуо.

Так ке трос юанъёс калык сётъяз. Со начальник оглом вераз - кылме уг сёткы, но марке карыны тыршо. Кыл ӧз сёты ке, озьы ик со юанъёс та залэ ик кылёзы. Солэн вераськемез бере, вань мылкыд куашказ, концерт ик пуктэм ӧз поты ни. Нош бадӟым классъёсын дышетскисьёс, кыӵе сое кылзӥськизы, ымзэс ик усьтыса. Нош егитъёс - ӧз чидалэ. Пургаысь культурая начальник клубе умой колонкаос но лэзьыны уг быгаты. Кыӵе милям начальникъёсмы. Мыным озьы шуыны капчи, конечно, но мар ке но лэсьтэмзы луэ дыр ук соослэн.  

Озьы ни, школаын но клубын ужасьёсты ваньзэсты агитироватьтыса ветлыны косӥлшлям. Сиён пӧрась, бон, мар озьы ветлыса улоз. НО куанеръёсты кышкатъяло, Баграш-Бигратӥ, пе, эскерисьёс коркась корка  ветлӥллям, агитация лэсьтэмын-а ӧвӧл-а шуыса. Уксё, пе, кураторъёслы тырозы (милемыз, пе, "кураторъёс" шуо, кыл но бон шедьто, модной). Ческытатыны ческытато, нош кӧтсэс уг тыртыто, уг сёто уксё.

Озьы. 

Дарт.

Дартэз лэсьтэм бере, мон шумпотыса гуртэ бертӥ. Угосьсое лэсьтон  кыӵе ке самостоятельной вал. Тайзэ газетэз мынам вашкала но туала улонъёслэн герӟетъёссылы сӥзем потӥз. Тани этнофутуризмъя симпозиум ортчиз кадь, Арт-экспедиция фольклор бичаса ветлӥз (зэм но, мыным туж кельшиз гуртъёслэн ортчем сюрестӥз "вамышъяны", кылзӥськыны анай-атайёслэн учыръёссэс), Ижкарысь Генераллэн коркаяз но шуак пырыса, экскурсие сюри кадь, егитъёс но анайъёссылэн дэремъёсынызы ветло - сое но поттӥ...

Но мукет нуналаз газетме учкыкум, сизьыметӥ полоса вылын бакоми. Кытын "Анайлэн шыкысьтыз" материал? Кытын вашкала дырпус?!  Мон шоры учке 2012-тӥ арлэн толсур толэзяз потэм полоса!!!! Кызьы-мар, мон азьын ик со полосаез печате лэзизы кадь но... Озьы луэ ни, номыр уд кары. Адямиос но янгышало.

Соин но вылды, лыдӟисьлы та газет туж несерьёзной потӥз, дыр. Сизьыметӥ полоса усем бере, ачим но сое пӧртэм валантэм детальёслэсь лякылэм мозаикалы, пумозяз пыжымтэ перепечлы кельшытыны кутски. Но татын вань материалъёсын шӧдӥське одӥг тема - Вашкалаез -туала. Может тӥ монэн соглаш ӧвӧл?

Туннэ лыдӟи Удмурточкалэсь Дартлэн таиз номер сярысь малпанъёссэ. Зэмзэ ке, шумпотӥ, малпанъёс шараясько шуыса. Даралиен но пумиськи, со шуиз: "Мыным аналитика ӧз тырмы!" Таиныз но мон кӧняке соглаш, информационнойгес пӧрмиз. Но ваньмыз азьланяз, малпасько.

Мон понна Дарт - со феномен, кудзэ кулэ утьыны но азинтыны. Дарт - со удмурт егитъёс пӧлын одӥгез туала, серьёзной, аналитическо-информационной но пайдаё газет луыны кулэ. Мынам опытэ но уггес тырмы на, дыр. Но мон, шумпотыса, вырисько та газет бордын. Соин ик, вань критикаез лыдэ басьтыса, азьлань мыно. Тау Вера Штыковалы но Настя Шумиловалы, соос но вань сюлэмзэс поныса, лэсьто та газетэз. Мон шуысал, али Дартлэн изюминкаез, яркыт сиез - со та кык нылъёсэн творчествозы - комиксъёссы но тунсыко идеяосы (Мунё но Туно). Нылъёсын ӵош поттэм Дарт зэм но ческытгес кошке.

Таяз номерын зэм но ӧжыт авторъёс вал. Но куарусён матэктӥз ини, выль авторъёс вуозы городэ но чилектыса шуккиськозы Дартлэн инбамаз. Марайко соосты огазе гинэ люкалоз на.

Дарали кошкем бере, мон курдай кӧня ке. Дарт Даралилэн кадь уз луы ни шуыса, нош ваньзы дышемын ни солэн тунсыко Дартэзлы. Пото мукет Дарт, копак мукет! Ачим кыӵе шумпотыса но паймыса ньылӥсько валДаралилэсь котькуд номерзэ. Нош мон традиционнойгес шуод-а мар-а, Дартэз мӧзмытгес каро кадь потӥз. Идеяос трос, мон соосты улонэ шонер пыӵатыны уг быгатӥськы на, лэся. Но, мукет палысен, кыӵе со шонер? Котькуд адямилэн аслаз дуннеез, аслаз Дартэз.

Возьмалэ вуоно Дартэз, но вералэ мылкыдъёстэс. Нош ми, ас палысенымы, газетэс азьлане нуом но солэсь лулзэ шедьтом. Малпасько, вуоноез газет луоз "Дарт, а не личный дневник". Хотя таиз но мыным озьы уг поты.

Сергей Матвеевлэн гожъяськемез сярысь

Маиныз Сергей Матвеев монэ сокем бордаз кыске? Уг валаськы. Одӥгез шуэ, эн лыдӟы на сое, тыныд вазь на, векчи пияла пуштросо кылдэ сӧроз, лыдӟы классикъёсты. Мукетыз пайме, озьы-а, яраткод Матвеевез...

Нош маиныз со бордаз кыске? Нырысьсэ мон соин кыкетӥ курсын Вера Григорьевнаен радъям пумиськонын тодматски. Книгаез киям сюриз но зыми со "Инсьӧр пӧртмаськонъёсы". Али но потэме уг луы на. "Шузи" романозяз туганме но вуттӥ вал.

Мыным потэ, солэн гожъямъёсыз пиосмуртлы но, нылъёсмуртлы но тупалоз. Пилы, малы ке шуоно со ваньмыз пилэн синмыныз, нош ныллы, малы ке шуоно почти быдэс прозаез солэн нылъёс сярысь. Солэн геройёсыз туж синмаськисесь, ачим кадь ик. Нош кызьы уд синмаськы чебер яке творческой адямиослы. Та ласянь мыным Западын XX-тӥ даурлэн нырысетӥ аръёсыз кельшо, ку нылъёс "феминизм" кылэз поттаны кутскизы но улонэз быдэсак веръязы: кыскизы, юизы, нылъёсты пиосын радэ яратылӥзы... Марлен Дитрих, Фрида Кало, Париж, Фицджеральд...

Тани кылем толэзе киям кутӥ "Кенеш" журналэз, нош отын Сергей МАтвеевлэн "Нылкышно" роман-чигвесьысь люкетъёсыз. Шумпотӥ! Таяз толэзе вуиз - со романысь нош ик мукет люкетъёсыз... Сое лыдӟыса, шуоды-а тӥ, удмурт литература интыяз сылэ яке удмурт кыл туж куанер шуыса. Уд! Огшоры, кин ке азьтэм но азьлане уг азиинскы. Кызьы вьетнамецъёс ваненыз шумпотыса уло, но узырмыны уг дырто, озьы ик ми но.

Вера Григорьевна Пантелеева Сергей Матвеевлэн кылбурет дуннеез сярысь 

Юмал йӧлпыд

Адӟиськом - сюлэм пыртӥ поттӥськом - вунэтӥськом!

Лыдӟисько туж субъективной дунъянъёсты но паймисько адямиослы. Соос трос дыр ӵоже одӥг кырӟанзэс но одӥг эктонзэс быдэстыса уло. Котькуд арберилэн вань трос пӧртэм паллъёсыз. Боды гинэ но кык пумо. Нош пинал мылкыдъёс сое адӟемзы уг поты. Ачим но соос пӧлы пырисько. Кулэ-а иське сыӵе туж субъективной анализъёс лэсьтыны? Кулэ, дыр. Но мон отысь одӥг "эгозэ" гинэ адӟисько. Оскисько, пинал мылкыд кисьмалоз, нош юмал йӧлпыд тыраз-пыдаз вуоз.

Палэнскыны - улыны - узырмыны! Озьы, дыр.

Шундыкар

"Шундыкар" лагере вуылӥм. Чинно-важно охрана милемлы пропуск лэсьтӥз. Ринат Гафуров ӧсъёс доры пумитаз но вожатойъёс доры нуиз. Соос ӟусъёс вылын пуко но ӝытлы кыӵе ке ужрад малпало. Котькудӥз марлыке но кинлы ке но пӧрмемын.

Алина Чернова, пе, анай йӧл!

Мон ноку нота лагере ӧй ветлылы на вал. Кылдымтэ, лэся, вылэм. Огшоры адямиен гинэ вуыны шуд усиз.

Ми вуыку, пиналъёс специалистъёсын ужало вал на. Соин ик мон соос дортӥ кошки. Ксюша Ворончихина отрядэныз дэрем вурыса пуко. Солэн нылпиосыз тросэз ӟучомемын ни. Одӥгез воксё татчы удмурт кылзэ волятыны вуэм. Со ныл милемын удмурт кылын вераськыны выриз. Пӧрме ини, но трос тыршоно на. Ньыль дэремъёс инкуазь материалъёслэсь лэсьтӥсько- етӥнлэсь басма, сюйлэсь но пулэсь весьёс, сӥньысъёс. Вӧзаз комнатаын ик крезь лэсьтӥсьёс тыршо. Сыӵе тыршисесь. Таосызлы ваньзы паймо, ма, конечно, ньыль нунал гинэ ортчиз на, нош соослэн крезьёссы дасесь ини. Буяны гинэ кылемын на. Женя Бикузинлэн выныз та отрядын - Тимур. Декаысь аккустика пасьлэсь формаос малпам. Троссэ соос пӧлысь мукет нылпиос но ужазы кутэмын.

Эстрадаос сцена вылын эктон пукто, фольклоръёс но экто-кырӟало. Соослэн Бобя-Учаысь "Арганчи" ансамбле ветлӥсь нылзы вань, со арганэн шудэ. Ваньзы, ваньзы марке но даурто, тэк уг пуко. Соос ужаны лыктэмын ук. Мӧзмыны дырзы ӧвӧл.

Толон, пе, туж нассыщенной нуналзы вал. Фотокросс, кырӟанэс сценалы пӧрмытон но концерт. Нылпиос туж жадиллям, котькуд отрядтӥ ортчыку толло нуналзэс веразы. Со понна вожатойёслы капчи - пиналъёс уйин уг алякто ни, изё. Вожаойёс но нуналаз 3-4 час сяна изьыны уг сюры. Уйёсы планёркаосын пуко, вуоно нуналэз малпаса пуко. ӵукна нош вазь султо ни. Ымныръёссы жадемынгес ини. Нош зато кӧня выль эмоциос...

"Шундыкаре" трос пол вуылэм ныпиос асьсэзыс шаплыгес возё, кӧня ке кизилимон сямзы но адӟиське ни. Нош мукетъёсыз востэмесьгес на, выль адямиослы, специалистъёслы дышыны выро, каллен висьыны усё. Сменалэн пумаз соослэн виръёсазы удмуртлык нимо вирус ветлоз ни.

Мон но луысал кӧня ке вожатой. Адӟысал, кызьы "Шундыкар" нылпиосты удмуртомытэ.

Хы! шуиз Софронов.

Тужгес но устоез отряд-  суредаськоон но Миша Николаев. Нылпиос комиксъёс суредало.

Чильтро вожатойёс. Крестьянинова - тыл. Мукетыл Алина - йӧл. таосын уд мӧзмы.

Литеераторъёс. Туннэ мырдэм-мырдэм шунды потӥз.

Тимур крезьзэ лэсьтэ - декаяз чорыг вандэмын.

Берпумети 10-ти. Чем-Куюк

10-ти нунал.

Тани туннэ арт-экспедицилэн берпумети нуналыз. Вазьгес султим. мастер-классъесты нуисьёс жадемын ни. Тани жоген луоз берпумети концерт но ми бертом гуртэ. Котькуд уй гань-гань изьыли, но туннэ чукнапал сайкалляй.

Чем-Куюк гуртын туж трос пичи пиналъёс вуизы. Бадзымъёсыз полысь чиньыен гинэ лыдъямон.

Сиськеммы бере, милемыз Ключевка гуртэ нуизы. Юри Азамат пыр потыса, бусыти котырским. Татысен но, мукет матысь интыосын но Четкер вырйыл адзиське. Со королева кадь, вылиын пуке но гуртъес шоры учке. Ключевка гуртын вуж куашкам черксэс выльдо, выльысен пукто. Со черк Голюшурмаысь ваемын вылэм, 1903-ти арын усьтэмын. Нош 1937-ти арын сое ворсаллям но колхоз складлы пормытиллям. Али куашкам вуж черклэн фундаментэз вылын сыче ик черк пукто: пулэсь, жужыт, кузь, куинь люкетэн. Возаз кирпичлэсь колокольня гинэ ватсамын на. Али валтись куполэз жутэмын ни, нош пушсэ лэсьтоно на, колокольнязы но жыные гинэ жутэмын на.  Но ужасьёс веразы, таяз арын валтись залаз служба ортчоз ни шуыса.

Гуртын ик, но таиз черклэсь палэнынгес мукет черк жуто, фундаментлы музъем гудэмын ни. Татын службаос огшоры нуналъёсы, пе, ортчозы, нош сояз - Быдзым нуналъёсы гинэ. Азьланяз монастырь но лэсьтозы на, пе. Сыче усто проект. Выль пуктиськись черк возын восям ошмессин но вань, солэн кошкись вуосыз тыметэн чыпемын но писпуосын котыртэмын, нош гуртысь потыса, паськыт бусыосы сюриськод. Чебер инты, пересьмыны татчы монастыре лыктоно, пе.

Азьлань сюресмы Кузьымвыр пыр кошкиз. Та гуртысь егитъёс полын трос тодмо адямиос. Дима Иванов, Елена Елькина но солэн братэз, Алина Антонова.

Милемлы веразы гуртлэн нимыныз герзаськем кык мадёс. Нырысетиез: гурт котырын паськытэсь буыос но умой музъем. Ас вакытаз татысь колхоз туж узыр  вылэм. Гурт кузя умой му - соин ик Кузямувыр. Кыкетиез: гуртоос ог-огзылы кузьымъёс лэсьтыны ярато вылэм. Кузьымъёссэс шур кузя но лэзьяса шудылиллям. Та палъёсын трос вуос, быдэс Удмуртиын кадь ик.

Кузьымувыр Четкер гурезьлэн выжыяз интыяськемын. Четкер - со, иське, выли инты. Татын ог-огзы борсьы, тубат кадь, ньыль Четкеръёс кошко. Пичиез- Нырысети Четкер, собере Кыкети, Куинети но Ньылети - самой выли точка, Алнаш ёросын, таос сяна, Четкеръёс овол ни, пе. Ньылети Четкер йылын чурак пужымъёс мерттэмын. Азьло школаын дышетскисьёсты юри нюлэс мерттыны нулло вал. Кыдёкысен со нюлэс вырйыллэн шляпаез кадь адске, яке бокс амалъя чышкем йырси. Жади тубыса, ваньзы жадизы, но жалянэз овол. Кыче чебер суред татысен усьтиське, почти вань гуртъёс адзисько: Азамат, Кузямувыр, Чем-Куюк, Варзи-Ятчи.

Огпол, пе, гурезь йылэ тракторист трактореныз ик тубем но врйылысен гырыса улие васькем. Ми сое тодыса, паймим, кызьы со таче меч гурезьысь васькыса, улэп кылем на шуыса. Монмырдэм-мырдэм гылзыса туби но, васьки но. Четкер гурезь выжыын азьвыл концерт но пуктыло вылэм. Артистъёс гурезь улын, чошкыт интыын, экто-кырзало, нош учкисьёс гурезе ик пуксё, амфитеатрын кадь, нокыче пуконъёс но кулэ овол, шобрет волдид но пуксид.

Нош ик бырем гуртъёс сярысь. Азьвыл тати туж трос зуч гуртъёс вылиллям, но раскулачивание кутскем бере, зучъёс кошкылын кутскиллям, озьы гуртъёссы но быриллям. Кузямувырын но одиг ульчаын зучъёс гинэ улиллям вылэм. Но зучъёс сокем ужасесь овол бере, тросэз кема чидамтэ лэся. Ошмессы но соослэн зуч ошмес шуыса нимаське.

Четкер гурезь мышкын бигер гурт вань. Отысь вузаськисьёс Кузямувыре ветло вылэм. Али но магазин азязы бигер гуртысь одиг пиосмурт, яблок вузаса, пуке вал.

9-тӥ нуналаз Чем-Куюкын

Чем-Куюке толон уйин вуим. Милемыз сюдӥзы но изьыны выдтӥзы. Нырысетӥ гурт, кытын милемыз пумитан гурен оз эркиялэ.

Татын ми изим школаын, матъёс вылын, ог-огмы борды ӝиптӥськыса. Мукет нуналаз нырысь ик милемыз гуртэн тодматӥзы. Удмурт кылын дышетисьлы Елена Герасимовналы тау вераны кулэ. Со милемлы, гурттӥ вамышъяса, мар гинэ ӧз мадьы. Тапочка урамтӥ тубыса, кытын ӵыж выль школа интыяськемын, ми мынӥм ошмес доры. Азьло мисьтаськон машинаос ӧй вал, гуртоос толалтэ бере ошмес доры люкаськылӥллям но ошмес дырдыын мисьтаськылиллям. Черодэн, пе, кышномуртъёс сыло вал.

Лудорвайысь тӧлвукоез тодӥськоды, дыр. Со но Чем-Куюкысь нуэмын, музее 1992-тӥ арын вуттэмын. Владимир Романов, та гуртэ вуылыкуз, бӧрдса сямен, пе, шуиз: утелэ тӧлвукодэз, сётэ кытчы ке но. Нылпиос тӧлвуколэн бурдаз пуксьылӥллям но бергаллям. 10 адямиез но бурдыз ӝут вылэм. Со тӧлвукоез  пуктэм Федор Ефимович Драгомиров 1912-тӥ арын. Со узыр крестьянин вылэм, аслэсьтыз ужзэ нуэм. Но Совето Союз дыръя соосты раскулачитьтӥллям. Фёдор Ефимовичлэн сюлмыз кутыса кулэм. Семьязэ Дальний Восток пала лэзиллям, но соос отчы вуиллямтэ, Свердловск улосвылэ улыны кылиллям. Берло ини семья берен Чем-Куюке берыктӥськем. Но Драгомиров семья Фёдор Ефимовичлэсь ужзэ азьланьтӥллямтэ ни.

Ошмес дорысь ми тубим Никонов Андрейлэн ульчаяз. Рублевка, пе, шуо. Отын узыр адямиос уло. Зэм но бадӟым но аспӧртэмлыко коркаос сыло татын. Нош кыӵе узыр гурт, котьмаин: садъёсын но, коркаосын но. Уйпал ёросъёсысь вуыса но озьы мыным потӥз, дыр, но со зэмзэ озьы.

Берен школае вуим. Милемлы школалэн гуждораз ӝук пӧсьтӥллям, зарни песяйёсмы пыжиськемъёс вайиллям. Инкуазьын ваньмыз ческыт кошке. Ӝӧъёс кызьпуос улын сыло. Та кызьпуос вуж школа азьын мерттылэмын вылэм, соослы 60 ар пала ни.

Берло Богданлы клип сниматьтӥзы на. Влад Степановлэн сомында ужез луиз. Кӧня соослэн котьмар лэсьтыны мылкыдзы. Паймисько таослы. Котькуд гуртын пичиен-пичиен клип люкетъёсты сниматьтӥзы. Экспедициысь ваньзэ-ваньзэ басьтыны выризы. Мон гинэ оломар кари кадь.

Уг оскиськы, ӵуказе берпуметӥ нунал ни шуыса. Азьвыл нуналъёс но ӧй вал кадь. Но таӵе экспедициос кулэ. Тон адӟиськод одӥг калыклэсь пӧртэм культураоссэс, сям-йылолъёссэс, вераськонъёссэс, музъемзылэн аспӧртэмлыкъёссэ. Всё-таки кулэ гажаны писпулэсь котькуд вайзэ. Писпу одӥг ваен писпу ӧвӧл ни. Со веськрес, чебер, узыр трос вайёсын, куаръёсын но емышъёсын.

Драгомировлэн пызь возён складэз. XX-тӥ даурлэн кутсконаз пуктэмын, али ке но сылэ на. Уд щуы, солы 100 ар ни шуыса.

Пиналъёс вал вылын ворттыло. Берло со пичи пиез адӟим, кызьы со вал вылын огназ Шумахер кадь ворттыса кошкиз. Синмаськымон.

Чем-Куюкын ошмес ву кык пол ӵыпемын.

Иваново-САмарс 8-тӥ нунал.

Туннэ концерт. Туннэ Надя Николаева сниматьтӥз. Туннэ ми кошкиськом ни, берпуметӥ гуртэ.

Мон итератураен мастер-класс нуыны кулэ вал. Но одӥг гуртын но пиналъёс гожъяськыны ӧз лыктэ. Сыӵе учыр пиналъёс пӧлын. Соин ик ветлӥсько шыль-мыль, ачим огнам гожъяськыса пукко. Аня Образцова ужтэк ветлэмме адӟиз но, ойдо, пе, модель лу. Ми тонэ суредалом. Пуки борддоре но куд-ог дыръя нылпиос шоры учкыса. Соос пичигес на, оин ик дышетыны шуг, интыязы пукыса жадё.

Берло Богдан сьӧры фольклор бичаны калъяськи. Лисаапайдоры куное мынӥм. Но солэн коркаез пытсамын вал. Соин ик мыним Веркапай доры. Алина Черновалэн двоюродной апаез Кати Коротаева туж быгатэ пересьёсын вераськыны. Ачиз но трос пол экспедициосы потамын но. Пайми, песянайъёсын огкыл шедьтэ. Мон озьы уг быгатӥськы. Мон сурасько гинэ соосты.

Берло Лисаапаез но шедьтӥм. Со сандыкысьтыз  киужъёссэ потӥз. Яркыт, чебер, усто.

Концертэ, конешно, бадӟым адямиос вуизы. Муниципал кылдытэтлэн йырыз, Пчи Пургалась но кин ке но. Ма тани-тани быръёнъёс вуо ни. Пичи Пургалан гинэ озьы кадь, пользуются, пользуются моментом. Ми но концерт пуктыкумы ми доры вуизы вал соос. Сюлэм уг чида, так ке.

Самой тос калык татын люкаськиз. Быдэс зал, ваньзылэн синъёссы ӝуало, зол чабизы. КУзьымъёс но сётъязы.

Концерт быриз, автобусмы вуиз. Келяны туж задор келязы. Ур-вар. Сектаса-кырӟаса-бӧрдыса.

Иваново-Самарск. 7-ти нунал.

Тани сизьымети нуналзэ ни артэкспедиция сюрес вылын. Вуоно гурт- берпуметиез. Жадем но ымнырын адскыны кутске ни. Озьы ке но Иваново-Самарскын зигар кытысь ке но потэ на.

Чукна сиськеммы бере мыним Соловьёвъёслэн семьязы доры куное. Туж мыло-кыдоесь. Перепеч дур кутыны дышетским. Пиос гур эстизы. Гуртысь егитъёсты ожыт маин паймытыны луэ шуыса, кин ке но керзегъяськиз. Ваньзы бон перепеч кутыны быгато ни, конешно. Озьы ик гын сапег но енгитъёс полысь кин ке лэсьтыны быгатэ, нош ки ке но уг. Перепеч кутонэн кадь ик учыр.

Собере нош ик мастер-классъёс. Мукет гуртъёсын чошатыса, Иваново-Самарскын нылпиос мастер-классъёсы тросгес лыктизы. Тросгес но покчиесьгес. Таня Тихонова но Лиля Леонтьева дорын нылпиос Урам эктон ик эктыны тырмо. Сётаки лымшорын гуртъёс тросгес, узыргес но улэпесьгес. Уйпал гуртъёсысь ульчаосысь сомында калыкез ой адзылы, коня татын.

Ужамзы бере Алина Черновалэн семьяезлэн пасекаяз вуылим. Кемалась буханкаен ворттылэм вал ни, ностальгия. Тодисько на, кызьы пораськисьёс ужасьёслы бусые буханкаен сиён нуллизы. Мон, пичи марке, соос сьоры калъяськыли. Пукиськод буханкаын, инты трос, нош укноти бусыос, нюлэсъёс ортчо.

Футбол шудыны кытысь меда кать потиз на.  Шудыса вань жадемме лэзи но иземысь сайкай кадь. Нылъёс берло кезьыт вуэ пыразы на. Тыметысь вань чипейёсты но пасекаысь мушъёсты шузимытыса кельтим дыр. Туж чебер инты - пасека нюлэсэн котыртэмы, ошмес чыпемын, пичи корка, уха, компот, льомпуос но гуждор. Шудоесь, мар кулэ на.

Пузкар киное но трос гинэ калык лыктиз.

Мыным кельше татын, Пичи Пурга ук, аслам ёросэ, соин но дыр.

Иваново-Самарск. 6-ти нунал.

Толон Иваново-самарске жыт вуим. Шунды пуксемын ой вал на, скалъёс берто вал ни. Милемыз Алина Черновалэн семьяез пумитаз. Алина ачиз но удмурт дэрем дисяз. Соку ик тодмай Пургаез: ми палани пичи дырысен удмурт дэрем нулло, Пасха дыръя куинь аресъемъёслы но удмурт дэрем вуро. Сюкасьсы но портэм вал, компотсы но кинлы ке интыяз кошкиз. Быгато пумитаны. Быдэc арня, пе, милемыз пумитаны дасяськиллям.

Кык корка интыяським. Ваньмыз кыче ке но шуныт, куанык, аслам гуртам кадь. Мунчо бере, гурт клубе позыръяськыны потим. Кемалась эктэм вал ни, эшшо ке на гурт клубын.  Шумпотыса мыни, жадьытозям тэтчай. Одиг коркан изисьёс милесьтым вазьгес изьыны кошкизы. Ми Коротаева Катаяез келяса гурт кузя кошким.

Пеймыт. Гурт шур дурын майыгын пуксемын. Котыр нюлэс но вырйылъёс. Туннэ кот, соин бус волдиськемын. Иваново-Самарск кык гуртэз герза - Ули но Вуж Постол. Клуб, магазинъёс, школа, садик Ули Постолын интыясько. Нош Катя улэ Ули Постолын. Шур вамен потыса ми тубим вырйылэ. Бусыти вамышъяса Иваново-Самарсклэн одигаз выли точкаяз тубим. Татысен быдэс гурт адзиське. Мон малы ке та гуртэз Адлер палъёслы кельшыти, бусэн йырин-а мар-а, со пыр нюлэслэн но вырйылъёслэн гожъёссы  но гуртлэн пиштись тылъёссы гинэ адскылизы.

 Куке но гурт котырын сомында гуртъёс матын шокало, нош отын сомында колхозъёс ужало вылэм. Нош али Иваново-Самарск но "Югдон" колхоз гинэ на. Кирпич завод но вылэм. 60-ти аръёсы колхозъёс ворсаськыны кутскиллям, нош гурт калык мукет азе кошкем. Озьы быремын Рождественское, Кубыста гуртъёс.

Вырйылын кема ом улэ ни. Нош шур улие ваьскыса, шурвамен потыса, Вуж Постолысь Ули Постолэ вамыштим.

___________________________________________

http://kudymuly.blogspot.ru/2014/08/blog-post_43.html - Артэкспедициялэн емышез.Эгра ёросысь Кабачигуртысь Дарья Лекомцева удмурт кылын блог усьтиз. Нош мылкыдыз кыче бурдъяськемын. 

5-тӥ но 6-тӥ нунал. Мон ӧй кыльы Кекоранэ.

Кабачигуртысь ми кошким Якшур-Бӧдья ёросысь Кекоран черкогуртэ. Отын собыдӟа школа но черк. Школазы 1869-тӥ аръёсысен ужа ни, 2009-тӥ арын выльзэ пуктӥллям, интернатэн маин. Туж бадӟым. Черксы но вуж ни. Тӧдьы буёл мугорысьтыз ломдыса усьылэ, соин солэн кыӵе ке но аслаз аспӧртэмлыко чеберлыкез вань, со электика стилен быдэстэмын. Черк 1844-тӥ арын усьтэмын, 1910-тӥ арын дуръёсаз эшшо ӝутӥллям на.

Собере эшъёсы кошкизы Пушиналы сӥзем синпелет доры. Мон отчы ӧй вуы ни. Ижкаре кошки. Кекоранын туннэ Ворекъян фестиваль. #артэкспедиция но бусыын изёз но тыл выылн уха пӧзьтоз. Я коть таиз уй туж кезьыт ӧй вал. Азьвыл коркан но изьыса кынмыны шедьылӥм. Нош мон кошки сюанэ. 

Чимошур но Коваль гурт

Арт-экспедиция кутскем  тырысь ортчиз ни 4 нунал, вуим ни кык гуртэ. Милям пыдъёсамы каллен Жадем вуэ ни, нош сюлэмъёсамы выль мылкыдъёсты возьман. Туж пайдаё ветлиськом фольклор бичан ласянь. Мон доры, литературая мастер-классъёсы ветлись ӧвӧл бере мон Богдан сьӧры фольклор бичаны калъяськисько.

Озьы Кез ёросын Ковалёво гуртэ вуылим. Туж жаль, отысь калык гурт кылдэмзэ уг тоды ни шуыса. Но ас вакытаз отын улиллям Коваль выжыысь 8 семья. Соя ик гуртсылэн нимзы но пӧрмемын. Али отын 13 корка но 27 улисез. Туж трос куашкам вуж коркаоссы, вал гидзы но конюхлэн улон интыез каллен сисьме ни, кузёзы ӧвӧл ни но. Гуртын одиг ульча гинэ. Гуртоос "Искра" азьветлись колхозын ужало. Скал гидзы гуртазы ик. Эшшо татын вордскемын Тамара Тихонова.

Тамара Тихоновалэн корка азяз. Анаезлэн но нимыз Тамара вылэм, берло атаез Тамара нимо выль кышно басьтэм.

Ковальгуртын одӥг урам. Таиз тупалыз. 1940-тӥ аръёсы со быдэск ӝуам. Пиналъёс озьы тылын шудӥллям.

Богдан конюхлэн корказ. Куке но татын клуб но интыяськем. Милям анайёсмы быдӟаос концерт но татын пуктылӥллям на. 

Урамлэн сопалыз. Сюрес ферма доры нуэ. Отӥзя коркаос уг сыло ни.

Бырем юртъер.

Куштӥськем конюшня.

Эгра ёросын мон вуи Чимошур гуртэ. Та гуртын 4 ульча, валтсез Сибирь тракт сюрес дурти ог кык иськем пала кыстиське. Тросэз улисьёсыз - палэнысь лыктэмъёс. Совето вакыт дыръя, потиз сыӵе кат, кудиз непереспективной гуртъёсты бырон калэ вуттиз. Калыклы шуизы, гурты сёравно быроз, бер ӧвӧл на, мукет гуртэ интыяське. Озьы Кабачигурт муниципал кылдытэтын быремын Беризёвыр, Шербет, Генчеил, Зелёный Бор. Али гинэ но калык жаля отысь кошкемзэ. Шербет гуртысь потэмъёсты бичазы вал, бӧрдыса, пе, верало, кыӵе вал татын шулдыр интыос. 

Чимошурлэн азьло нимыз Чумошур вылэм. Чум - со кенос, шур дурын кеносъёс (коркаос). Угось Чумошур Лоза ву дурын пуксемын, нош калык чумъёсын улэ вылэм. Нош али татын бадӟым но паськыт юртъеръёс пуктэмын ни. Кызьы Марта Рафиловна, Чимошур клубын ужась шуиз, татын баринъёс, пе.

Кабачигуртын

Кабачигуртэ вуыку милемыз Портмаськись Пужым дорын пумитазы. Малы, малпасько, милемыз сюрес дуре дугдыны косизы. Учкиськом, но писпуос полысь куасьмем писпу адзиське. Мугорыз куасьмемын ни, сулэз усьылэмын, нош гырказ кыр мушъёслы уморто понэмын. Та нюлэскын Вось Пужым Кузё кадь сылэ: конгылё но зок киосыныз вылие жутиське но мукет писпуосты зыгыртэ, мугорзэ куинь адямиос гинэ, ваче кутскыса, зыгыртыны быгатозы. Но жаль, писпу каллен сисьме ни. Одиг пиосмурт войнаысь сосырмыса бертэм, пыдъёсыз ортчал висиллям. Сое та пужым доры ыстиллям. Коньдон со дыре трос ой вал бере, со сьораз корт юдэс басьтэм. Писпулэсь тазалык курыса, писпулэн сулаз кортсэ понэм. Со дырысен воргоронлэн пыдъёсыз ожытгес висьыллиллям ни. Али но пужым доры адямиос куронэн ветло но выжыяз коньдон кисьтало.

Кабачигурт бадзым ке но овол, гуртазы тыро-пыдо культурая юртсы, покчи ёзо школазы но нылпи садзы. Бадзымгес нылпиоссы Эграла ветло, 8,5 километре. Ёрос центрлы гурт матын ке но интыяськемын, Кабачиын 90 процентэз адямиос - удмуртъёс.

Милемыз нуллизы музеязы. Пайми, калык туж гажа удмурт сямъёсты, шудонъёсты но вашкала улон-вылонэз. Озьы соос удмурт шудонъёс люкаса, пичи буклет поттиллям, песянайессылэсь чушконэ пуктэм пужыоссэс бичаллям, портэм дэра дэремъёс (ул, изён дэрем, шулдыръяськонэ потан, ужан дэремъёс) утиллям.

Бускель, Гереево гуртын, тодмо гожъяськись Петр Кириллович Поздеев вордскемын. Милемыз нуллизы солэн гуртаз, возьматизы куашкам корказэ. Кабачигуртын солы сизем библиотка но усьтэмын. Гожъяськись кулэм бере, кышноез гурт библиотекалы Петр Кирилловичлэсь 2000 пала удмурт книгаоссэ сётэм. Эксклюзивнойёсыз но вань.

Нош юртъерзэ гуртоос утьыны быгатиллямтэ, музей усьтыны коньдон ёрос шедьтымтэ. Озьы ик юртъер куашкам. Берло гырпумзэс куртчылозы на. Но берло мар на.

                               Пётр Кириллович Поздеевлэн куштӥськем коркаез

Паймытизы библиотекаын ужасьёс. Вань сюлэмзэс поныса, бичало фольклор материалъёс, реферат гожъяло, сям-йылолъёсты гожъяса кельто.

                Музейазы кельтэм удмурт шудонъёс. Таосыз - чиж.

Кабачигурт муниципал кылдытэтэ укмыс гурт пыре, кытын 1400 пала адями улэ.

Александрово

 Арт-экспедициен вуим Кез ёросэ. Нырысети ёрос, нырысьсэ мон вуи татчы. Ижкарысен уйпала кыдёкыгес кошкыку, чемгес адзисько куштиськем гуртъёс, начар вуж коркаос. Кезын но сомында вуж коркаос сыло, кык этажъемесь бадзымесь, кузесь.

Александрово черкогурт Кезысен ог дасо километре интыяськемын. Нюлэс пыр потыса автобус укноысен шур адзиськиз. бур палаз жужыт вырйылын коркаос сыло, отысь меч сюрес шур вылти ортчыса бур пала коже. Отын но писпуос полысь коркаос адско. Пижманка шур Александрово черкогуртэз кыклы люке. Кузямувыр но Александрово. Вань юртъеръёс, вань бакчаос, куд-ог сяська будэтон интыос но кенерен котыртэмын.

Справка:

=====================================

Александрово черкогуртлэн историысьтыз

Александрово черкогурт Пижманка шурен кыклы люкиське - Кузямувырлы но Александроволы.  1850-тӥ арын Пижманка шур доры бӧляк Апачысь гуртоос лыктӥллям но нырысетӥ коркаос пуктыны кутскиллям. Выль улон интызэс соос Кузямувыр, чырсам музъем, шуыса нималлям.1895-тӥ арын гуртын кык классъем школа усьтӥськем. Пиналъёс татын куать ар ӵоже дышетскиллям. Пижманкалэн мукет пал ярдураз соку нюлэс будэ вылэм. Та палъёс котьмаин узыр вылӥллям:  нюлэскын трос пӧйшуръёс, шурын лудӵӧжъёс но чорыгъёс. Инкуазьлэн узырлыкез, пӧйшурасьёсты сяна, христин осконэз волмытисъёсты но мальдытэм. Огпол Кузямувырын улӥсь Васильев Афанасий Васильевич шур сопала потэм но кызьпулэн вай вылысьтыз дунчылкыт Александр Невскийлэсь мудорзэ шедьтэм. Та учыр соку ик матысь гуртъёсы но вӧлмем. Черкын ужасьёс но тодӥллям. Озьы 1901-тӥ арын Иван Чарушинлэн ӵектосэзъя но гурт калыклэн юрттэмезъя дунчылкыт Александр Невский нимо пу черк ӝутскем. Черклэн нимызъя ик Пижманка шур сопалэз Александровское шуыны кутскиллям. Черкын ужасьёс понна татчы ик кык этажъем корка жутӥллям. Али дырлы но со коркан уло на. 1896-тӥ арысен черк вӧзын кык классъем школа куать ар ӵоже нылпиосты дышетэм. Совето вакытэ черкез Кезэ нуиллям но клуб интые возиллям.
Али дырлы Александрово черкогуртын 88 юртъерын 330 адями улэ.

======================================

Гурт бадӟым. Алксандровоын коркаос вылесь, кирпичлэсь. Татын кык этажъем кирпич школа, чебер капкаё клуб интыяськемын. Кузямувыр пересьгес ке, отын коркаос но вужесьгес. Поръякумы кык этажъем кеносэз но адзим. Фермае мыныку, Чималилэн коркаез чеберъяське. Усьтиськемын кадь со, котькинэ куное возьма.  Тросаз юртъеръёсын кык корка сылэ - вужез но вылез, кыкез ик пу коръёслэсь лэсьтэмын.

Тини сыче Александроов черкогуртлэн кык портэм ёросъёс - ненег пу, песянай кадь шуныт, но юн из, егитъёс кадь етиз.

Александрово палысь Кузямувыре тубыку. Пижманка шурез ӵыпем тымет.

Вырйылысь тубыса, вуим Кузямувырлэн пересь ульчаяз. Со нырысетӥез вал дыр.

Синйылтэ, кыӵе коркаос сыло татын. Вуж, Нош вӧзаз куд-ог юртъеръёсын выль коркаос пуктылэмын, тросэз коръёслэс ик.

Клубе пырыку чебермам корка. Тапал юртъеръёс чисто кенерен котыртэмын. Гуртъёс но. Тани клубе гинэ но капкатӥ пыроно. Сикын уло, соин-а мар-а.

***

Сахарын ӧжыт ке но, вань удмурт книгаос. Басьтӥ отысь Егор Загребинлэсь "Яратонэ тон, вожанэ" очеркъёсын но веросъёсын книгазэ но шедьтӥ трос кизилиосты (удмурт театрын ужасьёс но гожъяськисьёс сярысь трос очеркъёсыз татын вань) но вольыт кыл. Михаил Федотов сярысь очерксэ лыдӟи но, гожъяськисьёслэн сюзысьзылэсь йырзэс яратыны кутски, нош Михаил Федотовлы нош ик пайми.

Тӧдьы адями

Ижкартӥ ветлӥсь Тӧдьы Адямиез котькинлэн адӟемез вань, дыр. Туннэ со мон доры но вуылӥз. Дырын-дырын пыралля,  нош но нош аслэсьтыз весь одӥг малпанъёссэ вералля но кошкыны уг вала ни.

Ас вакытаз со Удмуртлыкен герӟаськем ужпумъёсты ӝутка вылэм, удмурт понна висе вылэм. Удмурт КЕнеш кылдытӥсьёс пӧлын со вылэм. Нош кышноез понна Кышномурт КЕнеш кылдытыны малпам, кызьы со ачиз шуиз. Трос мар лэсьтэм, короче.

Но визьмыныз йырин солэн йырыз берытскемын ни. Оломар но вера, мирозданилэн выжыезлэн представителез шуэ. Инмар милемын, музъем ИНмарлэн мугорыз, ми сое вӧсяськытэк но гыриськом - со выллем языческой малпанъёс.

Куке но со вал Пичи Пурга ёросысь Баграш-Бигра гуртысь Семён Ботников. Нош али олокин. Маин улэ, валантэм.

Матвеев, Арво Валтон но яратоно писателе

Кемалась лыдӟиськем ни вал. Нош удмурт книгаосты берпуметсэ киям кутылэмме ик вунэтӥ ни. "Кенеш"-ъёс доры ветлыкум, эстон гожъяськисьлэсь Арво Валтонлэсь книгазэ синйылтӥ. Киям кутӥ, нырысетӥ бамзэ усьтӥ но отын киын, ручкаен гожтэмын: "Акулалы каракалэсь: адӟид ке, пе, медаз вӧсь кары". Писательме тодӥсько - Муш Нади сое удмурт литература зарезьыстыз акула шуыса нимам. Нош Арво Валтон - карака? Та гожъяськисен али гинэ тодматскисько ай.

"Кенеш" журналлэсь берпуметӥ номерзэ учкыны кутски. Нырысетӥ произведение ик - Сергей Матвеевлэн "Нылкышно" роман-чигвесьысьтыз люкетъёсыз. Паймисько мон та гожъяськисьлы, солэн удмурт кылэз тодэмезлы, кыл узырлыкезлы. Лыдӟисько но валасько, мынам йырам сыӵе образъёс, кыл сочетаниос, предложениос ноку но уз лыктэ шуыса. Одӥг абзац - быдэс предложение, озьы ке но валалмон предложение. Удмурт Лермонтов кадь. Тӥни, вуӵкетӥсьёс, лыдӟе вал Сергей Матвеевез, адӟысалды, макем милям "куанер" удмурт кылмы.

Сергей Матвеев кышномуртъёсты яратэ. Соос сярысь гожъя, тунсыко гожъя но гажа.  Кутски но лыдӟыны, дугдытскеме ӧз луы ни.

"Кенеш" журналын вань тунсыко гожъямъёс. Соос егитъёсыз шумпотыса витё. Нош визьмоосэ котькин но котькытын яратэ.  

Куюк - печаль

Шаерамы сомында бырем гуртъёс. Уйпал ёросъёстӥ ортчиськод ке, вылысьтыз вылаз бырем яке пичи но вуж гуртъёс шедё, егитъёс каръёсы кыстӥсько. Лымшорын коть ваньмыз выльдӥське на кадь, гуртъёс уло. Нош быремъёсыз выльысен улӟо.

Ува ёросысь Вамья гуртэ вуылӥ вал. Со гурт быре ини. Нюлэс пыр сюрестӥ потыса, со гуртэ капсула пушкы кадь пыркод. Котыр нюлэсъёс, шур но инбам. Вамья гуртын одӥг улӥсез сяна ӧвӧл ни. Со гуртлэн тӧроез кадь, улэ, муш вордэ но шумпотэ. Яке мӧзме, сойзэ уг тодӥськы ни. Нош котыр сисьмем, бекырскем коркаос, пушнер но люгы. Отын бон али одӥг кин ке выль корка пуктӥз. Но со совсем в других целях. Уг тупа со ӵыж выль корка та интыосы.

Флор Васильевлэн Бердыш гуртаз но одӥг улӥсез гинэ кылемын на. Вуылоно отчы. Ас синмыным адӟыны улэ, кыӵе ульчаостӥ поръязы гожъяськисьёс, кыӵе инкуазь пӧлын будӥзы, кыӵе коркан улӥзы. Табере зор-кот куазь дыръя Бердыше тракторен гинэ вуыны луэ на, пе. Тӥни кыӵе со Флор Васильевлэн бусыос пӧлы ышем "столицаез".

Ми палан, Пичи Пурга ёросын, Куюки гурт вань. Удмурт нимыз - Аксак-Починка.   Нош малы Куюки шуыса нималлям, али тодӥ. Куке но ста гурт бырон калэ вуэмын вал ни.  Нош кыллюкамез усьтӥд ке, шедьтод "куюк" кылэз. Ӟуч кылэ со "печаль" яке "печальный" шуыса берыктӥське. Эх, гурт быре ни, кыӵе печаль. Нош али Куюки гуртэ ӵыж выль коркаос пуктэмын ни, одӥг ульчаын вить пала семья улэ, тымет дорын шутэтскон база интыяське. Озьы тӥни. Лышорын гуртъёс Ижкарлы матынгес бере, соос уло на.

Куазь сазь.

Таиз гужем нерад кариз ни кадь. Арысь аре куазь кӧшкемытгес луэ. Кылем арын ӝыны гужем кынмыса ветлӥ, висемысь ик ӧй дугдылы. Вылаз вордӥськем палъёсылэсь кыдёке кошкыны шеди на вал. Соин ик пуш ласянь но, выл ласянь но виси. Ӧз кельшыты мугоры выль интыез, выль адямиосты но Иваново омырез. Туэ кезьытгес ке но, уг висиськы, но кынмисько.

- Шунды мемей чаль, чаль, пилем дядяй кош-кош! Яке кызьы шуо удмурт бигеръёс, Тӥре, пуртэ киям, куто, ӵого, вандо.

Оломар ини. Куазь сазь, йыркуръяське, лэся.

Быгыын. 1-тӥ нунал.

Бере кылисько. Озьы ке но, Быг-Быг!

Шарканэ мынам вуылэме ӧй вал на. Быгие кемалась лыктэм потэ вал ни. Кыӵе меда со фин-угор лулчеберетлэн шоркарыз? Фин-угор сиёнъёс пӧранъя фестивале вуи но, ӧй жаля. Одӥгез гинэ, мон электроникъёслэсь жадиськем ини. Экто шуыса малпай но, Тиммерхановалэн но Котельниковлэсь "лишь бы отделаться" ымныръёссэс адӟи но кошки. Соос но акыльтӥлям ни, лэся.

Та выллем фестивальёс но куд-ог адямиослы акыльтӥзы вал ни. "Гербер" отын арысь аре, весь одӥг кадь ортче, нокытчы но уг буды. Нош татын маиз ке но мукет вал: "Герберлэсь" трос лёгетлы вылынгес. Но сизьым ошмес йылтӥ нуллӥсь нылашлэн "чилясь" дэремез... Кытын тон, Татьяна Никитична Москвина? Шарканын тонэ уг тодо меда?

Нырысетӥ нуналаз, конечно, валантэм вал. Юля висьыны усем.  Ми Удмурточкаен быдэс ӝытсэ со сярысь сюлмаськыса ветлӥм. Собыдӟа ужрадэз дасяса... Со кужмо ини так ке. Тӥни Пронин, кин со идеальной удмуртка!

Яратӥсько гуртъёсты котыръяны. Быгыен тодматскыны шумпотыса мынӥ. Милемыз сизьым ошмес йылтӥ нуллӥзы, но одӥгез кыдёкын ик вал бере, отчыозь ӧз нуэ. Пайми, одӥг гуртын сомында ошмесъёс пото шуыса. Нош кӧня ас киын чебермам коркаооссы! Пумен эмъюмлы ярась турынъёс бичам. Инна Тополева, французъёслэн кураторзы, Мать-и-мачехаез ишкалтӥз но шуэ одӥг француженкалы:
- Та мать-и-мачеха. Огпалтӥз сюранай кадь кезьыт (вольыт палыз), нош мукет палыз анай кадь шуныт но небыт.
Соиз паймиз. Нош удмуртъёс сое бакакуар шуо. Француз кылын та будослэн кыӵе меда этимологиез. Кыӵе пӧртэм йӧскалыкъёслэн дунневаланзы.

Сиён пӧранъя ӵошатсконэ но пӧртэм калыкъёс люкаськизы. Франциысь Жюли Поли, Киров улосвылысь Каркова Антонина, Эстониысь Тауно Ласик, Коми-Пермякъёслэн музъем вылысьтызы Снегирёва Татьяна, Дэри ёросысь Кондратьев Евгений, Марий Элысь Щербакова Галина но Ижкарысь Царегородцева Ольга. Ваньзылы одӥг кадь продуктъёс сётӥзы. Эстонецъёс тужгес но шаплыесь вал. Ку мукетъёсызлэн вал паника, мар пӧраны. Тауно Ласиклэн чорыгъёсыз маринадэн банкаын уяло вал ни. Со ик вормиз. Мар шуод на, со шеф-повар ук. Сиёнзэ но калык пӧлы поттыны быгатэ. Пӧрам сиёназ Эстон кункышетлэн вань буёлъёсыз, пе, вань. Мукетъёсыз борды кадь, "Быгы" кыл эстонецлэн сиён бордаз ӧз лякиськы.

Нош варсез лэсьтонъя мастер-классэз ноку но уг вунэты. Табере ачим но лэсьто ни. Мон лымшор палась бере, милям ю-нянь удалтэ. Соин ик ӟеглэсь ӧжыт мар лэсьтӥськом. Варсен юон сярысь ноку но кылэм ӧй вал. Натур продукт - лавкаысь вань газировкаослэсь ческыт. Озьы ик кулэ.

Быгиос быгато вылэм шулдыртыны но дырез пайдаё карыны. Тау!

Туспуктэмъёс татын: http://vk.com/bygishorkar?z=album-52694539_199694076

Азаматын

Азамат. Та гуртын Усо шурлэн синмыз. Отын Бикузинъёс уло.

Бигер шаер гурезё но нюлэсо. Урсыгуртын лапасъёссы но музъем пушкы, гудыса, лэсьтэмын. Хоббитъёслэн кадь. Удмурт музъем вольытгес. Алнашысен Азаматозь милемыз чылкак шонер сюрес нуиз. Одӥг пол гинэ кожыса, ми вуим гуртэ.

Нюлэсъёссы куасьмемын. Сомында аръёс ӵоже кыз будэ, будэ, нош одӥг аре солы ву тырмыт уг сюры ни но, куасьмыны кутске, син азьын ӵужектэ. Со сьӧры мукетъёсыз но куасьмыны кутско. Учкиськод но, нюлэс ӧвӧл ни. Милям но гуртын озьы нюлэсмы куасьмиз, вадлян арын сое утялтӥзы - куасьмем писпуосты коразы. Гурт шимес адскыны кутскиз - куштэм нылпи кадь.

Азаматэ пырыку ик, та гурт мынам сюлмам усиз. Писпуосыныз, усьтӥськеменыз, шур дуре нуись коркаостэм, шыпыт сюресэныз, ӝужыт царь-борщевикъёсыныз... Малы ке мон сое Починка гуртэлы (нэнэелэн но дядяелэн гуртэз) кельшытӥ. Нош нэнэй-дядяй гурт всё-равно шунытгес потэ.