Тонэ музъем кыске

Туннэ та кезьыт, шӧдтэк шорысь вуэм, тол нунуалэ мынам потӥз гуртэ бертэм. Пуксьыны небыт диван вылам, ганяк луыны шуныт коркам но огшоры керттӥськыса пукеме. Кин ке телевизор учке, кин ке кухняын ыжиське, нош мон укисько ас малпанъёсам но киужен вырисько - номыр кулэ ӧвӧл ни.

Кезьыт. Уг яратӥськы толалтэез. Мугортӥм вир уг ни кадь кошкы, пыдъёсы кезьытэсь ветло, ыжгон носки но уг юртты. Солы туннэ Петыре шуиз: "Тонэ музъем бордаз кыске".

Тазьы малпаськи но валай, кулэм бере уг поты музъемын кыллеме. Толалтэ - кезьыт, йӧ, тулыс но сӥзьыл - кот, дэри, ву, гужем - кӧс сюй. Уг поты одӥг пичи но. Малпасько, мынам лулы лобалоз кытӥ ке но та дуннетӥ но жаляса учкоз мугорыз шоры, кудӥз (я дэри,  я кот, я йӧ) музъемын кылле но сисьме. Конечно, лулылы луоз неприятно.

Соин ик кутоно но сутоно со укылтэм мугорез, сутоно но пеньзэ тӧлъя лэзёно, эшшо тӧлъя лэзёно сое гужем, шундыё но ыркыт тӧло куазь дыръя. Ух, соку лулы шумпотоз, нош мугорылэн пырыосыз инкуазьлэн луллюкетъёсыз луозы.

Нерад

Котькытын бюрократия. Со уголовной ужъёсын но. Йыружез сэрттон-перттчон интые, куанер следовательёс сомында дырзэс быдто бумага гожъян понна, свидетельёсты сю миллион пол одӥгез сярысь юан понна.

Сюри вал одӥг серемес (мон  понна) учыре. Свидетель луи. Йыружчиез но, следовательёсты но жаляса быри. Сойзэ шузи но тыро-пыдо луымтэез понна, нош таоссэ сомында бумагаос гожъян понна.

Мон соослы аслэсьтым показаниосме ожытсэ 7 пол верай кадь - ачим акыльтӥ. Нош кыӵе жади морально. Та учыр мон пушкысь вань кужымме сюпсиз, лулме, кот дӥськутэз кадь, позыртӥз.

Чаклаське, эн сюрылэ олокытчы но. Асьтэос ик нерад луоды.

Выль куара

Да, эшшо. Лушалэн  #идеальныевыходные хэштэг пуштросаз "Выль куара" шоу-проект вал на.

Татчы но вуылӥ. Кыӵе пӧртэмесь соос- кырӟасьёс. Быдэс улосэ шуккиськем Быгы гуртлэн нимыз та концертын но чузъяськись. Ксюша Кузьмина туж эмоционально кырӟаз калык кырӟанэз - бызись ныллэсь бӧрдон гурзэ. Мон синмаськи, но вань сценалэн катъёсыз. Кызьы шуиз тодмое, мынам солэсь мугорзэ шонертэм потэ вал, со весь губырскыса кырӟаз. Но монъя, со озьы вань сюлэмзэ понса кисьтӥз кылъёсты - мынам сое уг поты вал шонертэм. Мон шумпотӥ, со тросэзлы учкисьёслы кельшиз но Дартлы ӝыны арлы подписка солэн кияз вуиз шуыса. Мед лыдӟиськоз)

Тӥни. Котькуд концертын удмурт адями маскаръяське, концерт аслыз ачиз лэсьтэ. Малы кулэ адямилы люкетыны. Со видите ли кырӟа, тулкымъяське, нош отын кин ке но сяськаен сцена вылын эктыны кутске. Яке сцена дурын вань кужмысьтыз тапыртыны) Уг валаськы, урод-а со, умой-а. Но ку зал шорысь церемонно, вань кукъёс вылтӥ ортчыса (кызьы Евгений Онегин), учкись потэ кесяськыса эктыны. "Выль куара" шоу-пректын, малпасько, артистъёсты дунъяны кулэ вал, а не кырӟан улын эктыны.

Уг тодскы.

Эшшо. Малы концертэз нуисьёс сценарийзэс огпол но пумозяз лыдӟытэк, пото сцена вылэ. Озьы ик учкисьлэн вань лобась мылкыдыз куашка. Секыт-а мар-а сценариз огпол коть лыдӟыса потыны. Озьы ик "10 гужем нунал" группа "10 гужемлы" пӧрме. Гажалэ учкисьёсты, собере тӥледыз но гажалозы.

Нош конкурсанъёс вал пӧртэмесь - ваньзы яратоно кадесь. Таӵе проектъёс соос понна кулэ радъяны, мкш соослы кулэ дышыны сцена вылны асьсэзыс возьыны, куаразэс пуктыны да марда. Малпасько, соос асьсэлы басьтӥзы бадӟым пайда.

Тау, "Шулдыр ӝытлы". Но ужазы стилистъёсты кутэ на вал.

"Эктон корка" но Палэзян

Мон ӧй ветлы Палэзянэ, кудӥзлэн уровенез шуизы резко усиз, мкш концертын чисто эстрада вал, нош пӧртэм калык кырӟан-эктонъёс тю-тю. Мон ӧй ветлы Элькуноведение, кудӥз мынэ вал со вакытэ, ку мон Аксионэ мукет концертлы билет бсьтыны ветлӥ но адӟи Гонинэз, кудӥз мынэсьтым юаз: "Вань на-а билетъёс?" Уг тодӥськы. Умой так ке, арысь аре одӥг концертъёс мыно шуыса, регулярноесь луо. Но мынам отчы мынэм ӧз поты ни - кӧт тыриз.

Мынам кӧты сюма калык творчествоен йырин гинэ. Соин ик ноку но уг кельты "Эктон коркаез". Таязэ мон отысь адӟи Эстониысь сету ансамблез. Соослэн гуртсы фин-угор дуннелэн кыкетӥ шоркарез луиз. Зэм ке, туж зол адӟем потэ вал мынам соосты. Туж эмоциональноесь но вань сюлмысьтызы но быдэс мугорынызы кырӟало (озьы вань мугорынызы кырӟало). Синмаськи соослы. Одӥгезлэн гадь вылаз, уксётӥлыкез чилясь тусьтылэсь лэсьтэмын вал. Могдос йӧскалык уксётӥрлыксы, мукет, асьмелэн кадь ӧвӧл. Малы меда именно "тусьты"?

.

Сыӵе мусо сетуос. Соос ӧз кыле "Палэзян" гала-концертэ. Соос кошкиллям Быгы гуртэ фин-угор шоркарлэсь синпелетсэ киязы кутыны. Нош кыче усто кырӟазы вал "Эктон коркан" ...

Озьы ик болгаръёс лыктэмын вал на. Сыӵе чебересь пиос-нылъёс, туж чебересь. Нош кыӵе эктӥзы. Пол ДДН-ын гылыт, эктӥсьёслэн ботинкаоссы гылӟо, нош соос сёравно экто. Синмаськыса учки: котьку пальпото, эмоционально экто, адямилы энергия кузьмало кадь ("Айкай"-лэсь но мон сыӵе ик, но сю поллы золгес, энергетиказэс шӧдӥсько). Таосыз но гала-концертэ кылиллямтэ, бертӥллям. Мар та, мар та? "Палэзянэ" нырысетӥзэ ветлэмме тодам вайисько... Тодам вайисько но бордӥсько... (туж сентиментальной нота честно ке). Кытчы пыризы калык кырӟанъёс но эктонъёс, малы кылос "Палэзянэз" огшоры эстрада концертлы пӧрмытӥзы. Адямиос билет тодыса басьто ук, калык творчествоез адӟозы шуыса.

Кемалась эктэм вал ни. "Эктон корка" - сыӵе утопичной эктон-позыръяськонъёс утопичной удмурт дуннеын. Но соос вань ук - соос зэмос. Соин ик сюлэм шумпотэ. Но та эктонъёсы, маиз куд-ог адямиослы паймымонэз луэ, трос егиъёс лыкто. Вот малы шуисько утопично зэмос.

Туж яратӥсько ветлыны татчы - калык эконъёсты эктыны. Таязэ ветлыкум, тани выль эктон тодӥ. Поръёс колоннаен огогзылы пумит султо, нош пиос пумит сылӥсь ныл азьын нырысь усто эктыны быгатэмзэ возьмато, нош собере чорто эктыны. Сыӵе усто. Удмуртъёслэн апай эктон вӧлмемынгес кадь, ку нылаш пиос азьын экто.

Эшшо паймисько на поръёслэн дэремъёссылы. Соос туж тузӥесь, чилясесь но гольтресэсь шуысал мон. Дэремзылэн сӧзулыз котырак пужъятэмын, вылаз айшетсы но чебермамын на. Сомында чидан но дыр кулэ сое пужъятыса пукыны. Ми айшетмес пужъятӥськом ке, ушъяськыса ветлӥськом ни но. Нош туала нылъёслэн сое но пужъятэмзы уг поты ни - басьтэм аппликация ляко яке чильтэр вуро но тӥни.

Кельшиз. Ярам концертэ ӧй ветлы.

Ижкаре.

Туннэ нош ик люкаськылӥм Арт-экспедициен. Ми доры ПФО-гъя таӵе проектъёсын валтӥсь адями лыктӥз. Мон солы Ижкарлэн исторической но территориальной центртӥз нуллӥ. Сыӵе визьмо (философи наукосъя кандидат) но со дыре ик туж огшоры кышномурт. Валаськоды-а, солэн потӥз лыктэмез ми доры, вераськемез милемын.

Зэм ке, мон туж яратӥсько Ижкарез - со мынам пичи дыръёсысеным ик вире пыӵам кар кадь, мон сое вань сюлмысьтым яратӥсько но гажасько. Со ӧвӧл удмурт кар, со промышленностен кар. Нош солэн  культурной пластэз али гинэ азинскыны кутске ай, но солэн кутсконаз ми - егитъёс. Чалякгес валам ке, Ижкармы сярысь вань мар вераын шуыса, тросгес культурной арбериосты но тунсыко историосты утьыса вуттом. Я коть Генеральский дом музейлы пӧрмытэмын ни. Я коть музейный квартал (оскисько туж) кылдоз ни.

Тазьы учкид ке, кӧня Ижкарын заводъёс. Ма соос шоры учкид ке (танк, пыӵал поттон, машина, мото, радиодетальёс лэсьтон заводъёс), асьме шорплошадьысь кузь тубатлэн вань лёгетъёсыз зарниямын луыны кулэ вал ни. Нош кытын со зарни? Луысалмы ке ми Татарсан, нош ми Удсмуртия. Нош соин данъяськыны кулэ. Кызьы шуиз Елена Викторовна, философи наукаосъя кандидат. Лучше гордой луыны (со удмуртъёс сярысь озьы), чем кураськись но кисые пырись (татаръёс сярысь). Но котькуд йӧскалык чебер ас понназ, соин ик ум снтэмалэ соосты юнме.

Со кышномурт ачиз вордӥськемын Нижний Новгородын. Соин лэся черкъёсты туспуктылыса ветлӥз. Эшшо, тайзэ мон ачим ӧй вала малы, асфальт вылысь гожъямъёсты (Учебники у "Пирожковой") но Горький паркысь замок ошылон корт писпуэз. МММ?

Туннэ куазь удалтӥз. Кызьы вераз мыным телефонэ: 8 градус, дымок. Бус быдэс Иж тымет вылын вӧлдӥсьемын вал. Сопал ярдурыз ик ӧз адӟиськы. Сыӵе чебер суред: бус пыр заводлэн турбаосыз вылӥе ӝутӥсько, Дуннеысь самой бадӟым прудмылэн пумыз уг адскы, Усто!

Синмаськисько. Кызьы кошкод та карысь? Ми ӧм азинтэ ке сое, кин азинтоз? Мускоын улӥсьёс ӝокало ни асьсэ каразы. нош кызьы ӝокалод Ижкарлэн вӧл-вӧл ульчаосаз. Хотя татын трос мукет аспектъёсыз.

Кытын?Ку?Мар?

Кытын?Ку?Мар?

"Шунды" огазеяськон таӵе шудон радъяз. Ми но отчы пыриським, Арт-экспедиция. Тросэз оскизы вал милемлы, ми но кадь оским вал асьмелы. Но... Ничё, зато скоро Богданлэн сборникез потоз, солы коть юрттӥм. (мон ставкаос сярысь верасько). Зэм ке, ми вормысалмы. ӧм луысалмы ке, тормозъёс, яке ӧм утчасалмы ке капчи юанысь подвохсэ. Нош собере ӧм луысалмы ке тырттыгаос, яке вить секунд коть малпаськысалмы ке. Но милям командаын визьмо адямиос вал, мон малпасько. Просто милемлы не повезло кӧня ке. Озьы, котькӧня оправдание утча ни.

Куд-ог юанъёс вал неоднозначноесь. Кылсярысь, со лампочкаен юан. Кызьы, пе, кышнолэн картэз валаз, со тайный комнатае пыраз шуыса. Валэктонэз: али кысэм лампочкаысь шуныт, пе, мынэ на вал. Но кызьы со сое валалоз, если ӝуатэм лампочкалы дыр трос кулэ ӧвӧл, со чаляк ӟырда но шунытсэ пазьгыны кутске ни, при том лампочка ӝужытын, потолок улын. Ми малпаськом, милям сётэм валэктонмы но отчасти шонер вал шуыса. Тузон пурӟемъя но тузонын чиньыос кылемъя, карт валаз, кышноез тайный комнатае пыраз шуыса.

Асьсэос юанъёс малпаллясалзы ке, шудӥсьёслы но капчигеслуысал. Малыке шуоно ми йырамы юанэз удмурт кылысь удмурт кылэ берыктыса пуким на. Юанъёс ӟуч кылысь валантэм берыктэмын вал. Со видеоюанъёсын но ӵошатыса, озьы шуыны луэ. Малыке но видеоюанъёс капчиен милемын воспринимались, может соос огшоры удмурт кылын верамын вал но юан шараян азьын йырвизь пыр поттэмын вал? Яке ми шонер удмурт кылэз секытэн валаськом ни, пересьмиськом, кыллэн воштӥськемез сьӧры ум вуттӥське уиськыса.

А так ке туж умой вал. Тау "Шунды"-ослы. Йырвийым вылысь тузон кӧня ке пурӟиз кадь.

Мультмалпанъёс

Толон бертӥськом эшеным Стёпа Коньковен дышетскемысь. Одӥг параын " Варвара краса, длинная коса" выжыкыл сярысь вераськон кутскиз вал. Мукет нуналаз, тани ӵапак али бертыкумы, Стёпа мыным шуэ, учки мон со выжыкылэз. Вообще, пе, али совето вакытэ лэсьтэм выжыкылъёсты учкылыны кутски, туж кельшо.

Зэм но, сыӵе тунсыко но паймымон выжыкылъёс лэсьтыло вал Совето вакытэ. Мон пичи дыръям паймыса пукисько вал, кызьы Баба-Яга лоба, салазкиос ас понназы ӵошкыт интытӥ гылӟо, нош адямиос олокинъёслы но пӧрмо. Кызьы? Паймисько ке но, уг малпаськиськы вал со технической моментъёс сярысь. Сыӵе гармония кылдыто вал мон понна со выжыкылъёс.

Али малпаськисько но, валасько, нылпиослы сыӵе выжыкылъёсын пичи дырысенызы ик кыӵе ке идеология, вылӥ ценностъёсты пыӵато вал шуыса. Нылпи сое валатэк но, выжыкылъёсты учкыса, вала вал ни, мар урод, нош мар умой.

Табере юнме йырам лыктӥзы мультикъёс. Кылсярысь, "Ёжик в тумане". Солэсь мур пуштроссэ куд-ог бадӟым адямиос но уз валалэ, нош мультикез учко вал нылпиос. Нылпиосты гажало вал, пыӵато вал соослы визь но шузиен ноку но уг лыдъяло вал. Озьы пинал учке "Ёжик в тумане" но на подсознательном уровне солэн визьмаз мар ке пыӵа, бадӟым будыса, со та мультфильмез учкиз ке, солэн тодаз лыктоз, нош мон таӵе вывод лэсьтӥ вал ни ук шуыса. Соку киноос но литературной произведениос но кылдылӥзы, кытысь адӟыны луэ, макем визьмоесь советский нылпиос. ("Приключения электроников", кылсярысь). Кстати, "Приключения электрониковез" американской "Дети шпионов" киноен но  чошатыны луэ.

Табере американской мультфильмъёс сярысь. Малы ке но мынам йырам соку ик лыктӥз Телепузикъёс сярысь телепрограмма. Уд ӵошаты "Ёжик в тумане" но мукет совето вакытысь мультикъёсын. Тем более Телепузикъёс лэсьтэмын вылэм умственно отсталой нылпиослы. Мукет мультфильмъёссы но соослэн кыӵе ке но фееричноесь, но бессодержательноесь. Тӥни сыӵе мон патриот. Но татын мон вань мультфильмъёс сярысь озьы вераны уг быгатӥськы. Вань устоосыз но. Всё-таки уг яра ук точно шуыны, асьме кунын визьмо адямиос, нош Америкаын визьтэмъёс шуыса. Ну так, валады, дыр иронияме. 

Короленко...

Вот люказы вань мерлыко ужъёсъя гожъяськись журналистъёсты, блогеръёсты, возьматӥзы соослы Короленко ӟуч драмтеатрлэсь али состоянизэ но оскытӥзы, та юртэз тупатыны-выльдыны уз луы шуыса. Но пумиськон кутсокнын ик шуизы, ми номыр вераны ум быгатӥське, мар луоз азьланяз та зданиен. Но та юанлы валэктон, малпасько, котькин тодэ ни.

Ижкарын Ӟуч Драмтеатрез  (1961-тӥ арын солы сётэмын вал Короленколэн нимыз)  куинь ар талэсь азьло выль здание выжтӥзы но Короленколэсь нимзэ бордысьтыз куштӥзы. Табере солэн вуж зданиез куашка но каллен сисьме. Ми али отчы вуылӥм но туж трос чебер выжыкылъёс кылӥм.

Та театр (сылэ Карла Маркса ульчаын, прак центрын) ӝутэмын 1946-тӥ арын. Ӵошатыса верад ке, Удмурт драмтеатр 1931-тӥ арын усьтӥськиз. Удмуртсэ, тау, келтыны туртто, алигес лэсьтӥзы капитальной ремонт, табере отын ваньмыз пиштэ. Нош Ӟуч драмтеатрлэсь юртсэ, кызьы мон валасько, уз ни тупатэ. Малы?

Нырысетӥез, юрт куашкан калэ вуэмын. Мумы корез, пе, пырдэ ни, нош гулбечын вить сантиметръем ву пуке, нокытчы уг кошкы, нош липет пыр зор ву вия.

Кыкетӥез, та юртлэн нокыӵе архитектурной дунлыкез ӧвӧл. Удмурт драмтеатр, пе, со чылкыт сталинский конструктивизм, нош ӟуч драмтеатр суро-пожо стилен ӝутэмын. Ми, архитектураез валасьтэм адямиос, озьы ик оском ни соослы. Просто, пе, ижкарчиос дышизы ни со юртлы, соин ик малпало, со чебер шуыса. (озьы ӧвӧл-а мар-а?)

Куинетӥез, юртэз тупатон-выльдон туж дуно усёз. Со интые выль юрт ӝутыны дунтэмгес луоз, пе. Таиз валамон, к чему. Юасько, нош Удмурт театрез тупатӥзы ук, при том со таизлэсь трослы вазьгес ужаны кутскиз,озьыен трос поллы начаргес вал, нош малы тайзэ но уд тупаты. Нош мыным берен вазё, нырысь агрессивно, тӥ тодӥды-а, кӧня уксё отчы куштӥзы?! Собере буйгасагес, яра, дыр, но...(вератэк но валамон ини).

Ньылетӥез, ӧвӧл ужпум, кудзэ азьланяз быдэстысалыз та юрт. Сётӥд ке татчы пӧртэм клубъёслы (по интересам) инты, кыӵе пайда ваёзы соос Элькунлы. Усьтӥд ке, вузкарон центр - таиз устогес ини юан, перспективнойгес. 2012-тӥ арын, ку ворсазы зданиез, вераллязы вал, татчы эмъюрт усьтозы шуыса. Нош али кылӥ, юрт интые автовокзал но лэсьтыны одъяло вал шуыса. Остэ, Иньмаре, малпай ас поннам.

Эшшо монэ туж висьытэ Короленколэн бюстэз. Кытын со, кытчы сое? Али, пе, со, куанер, кылле кытын ке. Ӟуч драмтеатрлэн выль юртэз азьын сое интыяны неуместно ни, пе, малыке шуоно театр Короленколэсь нимзэ уг нуллы ни. Табеер со огшоры ӟуч драмтеатр. Вань, пе, таӵе малпанъёс: Короленколэсь бюстсэ Гогольлэн бульвараз пуктыны, собере азьланяз кылдытыны гожъяськисьёслэсь скульптурной галерея, яке мукет тупась шутэтскон интые Короленкоез пуктыны. Но татын вань смыслъёс ышо-быро.

Кин со удмуртёс понна - Короленко. Со кӧшкемыт Мултан ужын удмуртъёсты утиз. Удмурт шаермылы солэн фигураез туж значимой но дуно луыны кулэ. Нош со галереяенызы Ижкарлэн администрациез сое огшоры писательёс радэ пукто, ултӥяло, но гожъяськисьлэсь Удмурт шаерен кусыпъёссэ тӥяло. Тӥни кытчы политика кошке. Нош эскеры гинэ, пукты ай Путинэз Соловьёв радэ (Соос кыкназы но Йыръёс). Мар луоз? Дунне быроз.

Кӧшкемыт. Кулэ ӧвӧл кивалтӥсьёслы культурной центръёс, лыдэ уг басьто соос огшоры адямиослэсь куронъёссэс но малпанъёссэс. Соослы кулэ вузкаронниос, кудъёсыз ваёзы уксё.
"Уксё, уксё гинэ, уксё".

Нош Короленко?

ӟеч лу, ГАЖАНО КОРОЛЕНКО. Ми тонэ ум вунэтэ.

Туспуктэмъёс. Без комментариев.

Сӥзьыл состояниос

Тодскоды-а мар сюлэмез вӧсь каре. Эшшо ке на али, сӥзьыл, ку кырын кезьыт, пурысь, кот но секыт. 

Шуо, 30 аресъем пиос, по статистике, ӵемгес асьсэзыс быдто. Соослэн кутске кризис среднего возраста, вылаз малпанъёс югдурез узато на (кылсярысь, ӧвӧл семья, корка, тырмыт уксё сётӥсь уж, ке семьяын кусыпъёс тэргало... со выллем). ... Ожытсэ одӥгзэ сыӵезэ тодӥсько. Семьяез сярысь чик сюлмаськытэк, П. улонысь кошкиз.

Куд-ог дыръя пытсэт сьӧры но шӧдтэк шорысь сюро. Адямилэн ӟеч уж лэсьтэмез потэ, но со ӟеч уж аслыз уродэн берытске. Ожытсэ одӥгзэ сыӵезэ тодӥсько. В. юнме пытсэт сьӧрын пуке, нош егит дырыз ныр ултӥз кошке. П. В.-лэн эшез.

В.: Мон пукисько. Нош воляын матысь адямиосы улонысь кошко. Мон соосты ноку но уг адӟы ни.

- Кӧня гинэ пукисько ай, нош мыным потэ -10 ар ортчиз ни.

Таӵе сӥзьыл пытсэт сьӧрын сю поллы пурысьгес, кезьытгес но страньгес луэ, дыр.

Элькун... Область

Удмурт Элькун вроде как. Но сыӵе парадокс: удмурт кыл Элькунамы ӧвӧл, пе, эшшо нош Йӧскалык политикая министерствоез быдтыны туртто. Быдтозы но, в недалёком будущем. Одӥг палысен, мар со министерство лэсьтэ? Пичиен-пичиен солэсь ужзэ мукет министерствоос быдэсъяло. Кылсярысь, ужрадъёс - минкультуры, удмурт  кылэз школаосын дышетон - минобразования... Нош отын котькуд вань йӧскалык буёлэз.

Тазьы учкиськод ке, каллен-каллен Элькун  куашка ни. Луоз кыӵе ке но Россиысь мукет улосвылъёс пӧлы ышем Удмуртская область. Одӥг пичи но  сыӵе сюрес Трокай Борисовлэн уг поты вал сӥземез Удмурт музъемлы. Со, кин удмурт музъеммылы автономия сётӥз, гробаз сю пол берыскиз, дыр, ни.

Соловьёв, пе, чылкыт удмурт, шуэ мыным одӥгез эше. Маро, шуэ, Удмурт Элькунлы Удмурт Азьмурт кулэ. Сое ик бырйи. Кыӵе, малпасько ас поннам, калыклэсь йырзэс то берыктӥллям ни. Инаугурациын мырдэм-мырдэм со Удмурт Азьмуртмы удмурт кылын присяга сётӥз но. 

Ммм..

Уло кык бускель гуртъёс. Одӥгез малпа, вот со гуртын сыӵе тыршисьёс уло, уг юо, ужало весь. Йыдызы одӥг гектарысь 40 центнер поттӥзы. Нош милям - кырым пыдэс. Юо, колхозын уксё ӧз тыре ке, уз но ужалэ ни. Бускель гуртамы ӟечокъёс ик ини уло. Нош кыкетӥез гурт малпа: отын но юо, ми дорын но юо, ваньмы одӥг кадь улӥськом.

Нырысетӥяз туала экономической системаен висись адямиос уло, нош кыкетӥ гуртын куммнизм улэ на, СССР-ын вордскем калыклэн вирсэръёстӥз Сталинлэн идеологической вирыз кошке. Нош СССР куашкам бере, та гуртысь калыклэн вань льӧльмалпанъёссы, азьланезлы осконзы куашказ но соос кутскизы бутылка борды - куддыръя озьы но потэ ни мыным.  Юо, соин йырин соослэсь вань зарплатазэс кушто. Нош соос всё-равно ужало. Ужало но юо. Толыкез то ужамзылэсь луэ. Ниче, мар ке но та дунне вылын дауртоно ук.

Тросэз гуртъёс йыг-йыг пыд вылысьтызы усемын ни, малыке шуоно, азьвыл ваытъёсы кадь, колхозъёс уг пушъё ни, гурт удыс уг азинскы, элькунлы со кулэ ӧвӧл. Особенно характерно таӵе югдур шаермылэн уйпалаз. Кӧня гуртъёс быремын, быро но бырозы на. Тросэз, майбыр но умой улон утчаса, Ижкаре пегӟо, лымшор пала вуо. Уйпалъёс котьку малпаллязы, лымшоръёс узыргес уло шуыса. Озьы ик вань, дыр, со. Тапалан, угось, ю нянь но умойгес удалтэ вал.

Туннэ параын одӥг нылаш (Воткакарын со улэ) шуэ, Шаркан пала губияны ветлӥм. Отын, пе, туж чебер нюлэсъёс но узыр гуртъёс. Вотка ёросысь гуртъёсын ӵошатыса, Шаркан палан, пе, туж майбыр улэ. Нош малы,пе, озьы? Кызьы шуэ мынам песянае, Шаркан ёросын, пе, удмуртъёс уло.

Вот кызьы, удмуртъёс шаерамы ӟучъёслэсь узыргес уло. Воткакарын улӥсь нылаш сыӵе вывод лэсьтӥз.

Мм...

.

ӧвӧл пинал удмурт гожъяськисьёс? 

Усьтӥ туннэ "Кенеш" журналлэсь выль номерз. Отын регулярно печатлаське Елена Фёдорова. Арзамазов, синйылты вал сое. Эшшо одӥг выль автор туала удмурт литературалэн шыкысаз. Туж капчиен лыдӟиське Алнаш ёросысь Туймыйыл гуртысь нылкышно, со эшшо туж усто публицист на. Гожъяське удмурт кыллэн вань катъёсызъя, шонер но "кенеш"-о. 

Фотосет

Туннэ ветлӥ Полина Кубисталэн студияз. ӵуазе кстати солэн студиезлэн открытиез луоз. Сыӵе отын шуныт, куанык, нокыӵе энергия но уг кошкы, наоборот, отын ваньмыз - котькуд адями, котькуд арбери, омыр но - тыныд капчи мылкыд сёто, кужым пыӵато.

Фотосессия вал. Мон, пе, модали вал ук. Дарали Лелилы тау. Зэм но, азьвыл мон сое ӧй но валалля вал, дыр. Но туннэ валай: "Маdemoaselle Oudmourte" модая агентство мынэсьтым камералэсь кышканме но возьдаськемме быдтӥз. Дарали Лели, тау!

Но татын (камера азьын астэ раскованно возён) мукет факторъёс но вал. Кылсярысь, мыным вал туж умой: Полина Кубисталэн дӥськутаз мыным туж комфортно вал, макияж мыным туж усто лэсьтӥзы (мон шедьтӥ сое), йырсиме но, паймоно кадь, ымнырыя, туж усто тупатӥзы. Соин ик мынам мылкыды эшшо но вылӥе ӝутскемын вал. Со командаен ужан зэм но трос зигардэ тынэсьтыд уг басьты, уж вӧй вылтӥ кадь мынэ. Нош Полиналэн вань аслаз командаез. Котькудӥз соос полысь ог-огзэс валаса ужало. ӟечокъёс прак.

Котькуд адямилэн аслаз визажистэз но парикмахерез кулэ луыны, кудъёсыз тонэн одӥг тулкым вылын ужало. Соку тыныд но кельшоз, соослэн но мылкыдзы умой луоз. Мыным туж яразы визажист Татьяна Рябова, йырсиез пуктӥсь Вика Фролова. Соос туж устоесь. Самой-Самоесь. Честно.

Фотосет кутскон азьын, Полина монэ настроитьтыны выриз, гань-гань кариськы, эн кышка шуыса. Со быгатэ. Мон копак синмаськыса кошки соос дорысь, солэн студиысьтыз.

Одно ик мыно ӵуказе дэремзэ басьтыны, кемалась ӧдъясько вал ни. Фотосет асьтэлы каремды потэ ке, дэмласько, мынэ Гриша Степанов доры, тиледлы образ но лэсьтозы, чебер туспуктэмъёс но, капчи мылкыд но кузьмалозы. Тӥни сыӵе пичияк явной реклама.

#zemos_udmurt_veme

Туннэ "Грифон" арт-центрын удмурт мультфильм лэсьтонлы уксё бичанъя концерт ортчиз. Бичаллям 12 сюрслэсь ятыр. Калыкез паймымон трос люкаськиз.

Тӥ уд тодӥське, кыӵе вал со концертын мусо, шуныт но куанык. Пичи пиналъёс нош кӧня вуизы. Шак одӥг интыын - бадӟымъес но, егитъёс но, покчиос но. Нош со ваньмыз Ижкарлэн шораз, кыче ке гуртын ӧвӧл.

 Ку концертэз нуэ пичи пи, кырӟало Камалиос - сюлэм ик небӟе. Нош кыче соос дӥсьтӥсесь, возьаськисьтэмесь. Тӥни кыӵе вуоно поколение. Малпасько, соос удмурт дуннеез йыринь-чукинь берыктозы шуыса. Вылӥе ӝутскозы но трос малпанъёссэс быдэсмытозы. Тани сцена вылын сылэ вал динамик. Одӥг пичи пияшлы со синмаз усиз ни. Анаез дорысь пегӟе но сцена вылэ со коробка доры мынэ. Анаез сое нуэ отысь, нош соиз нош ик. Кыӵе целецстремлённой, малпасько, депутат луоз.

Нош эшшо Пичи Пурга ёросысь Иваново-Самарск гуртысь пиналъёс быдэс автобусэн концертэ юри лыктӥллям. Паймымон. Света Ручкина соослы удмурт мультфильмлы уксё бичанъя эстафета сётӥз. Табере соос но гуртазы концерт лэсьтозы, удмурт мультфильм лэсьтон понна уксё бичалозы, но эстафетаз мукет школалы сётозы. Умой малпан так ке.

Одӥг залын кин мар кариз ке но, нокин но ог-огезлы ӧз люкеты кадь. Ми концерт учкыса пуким, нош вӧзамы ик пиналъёс кесяськыса бызьылӥзы, чай юон вискын вераськыса бадӟымъёс сылӥзы. Сыӵе неформальной обстановка вал.

Тодӥсько на, кызьы нырысетӥ курсын ми гуртамы концерт пуктӥм вал. Отын ми возьматӥм удмурт кылэ берыктэм украин мультикез. Сое берыктон но куаразэ гожтон вылын Алексей Пикулев (Пушнер) ужаз. "Ну ты заходи, если чё!". Сое тӥни. Туж умой вал со. Туж. Тани со.

Пик

Туннэ операторское искусство параын сыӵе вылӥ ӟечлыко видеоос учким. Искусство ке искусство. Вообще улонлэн котькуд шапыкез но ужанлэн, хоббилэн котькуд удысэз - искусство. Улонысь кулэ адӟыны детальёсты  - соос сыӵе мур пуштрос пушкзы вато. Тӥ уд но тодӥське. Нош кытчы мынэ со техника - азьлане но азьлане - устогес но устогес луэ. Нош пик кытын.

Пик - со точка, кытчыозь вань фирмаос вуозы но огкадь луозы. Кылсярысь, Сони, Кэнон, Никон фотоаппаратъёс маин ке но пӧртэм луо на али дырлы. Нош ды ортчыса, соос луозы одӥг кадесь. Потэмын ни FullHD-лэсь ӟечлыкгес видео качество. Со 4K. Вань фотоаппаратъёс со качество доры кыстӥськозы. Кыстӥськозы но одӥг кадь пуштросо луозы. Аппаратъёслэн вылзы гинэ пӧртэм луоз на.

Глобализация вань удысъёсын. Со калыкъёсын герӟаськем висьытӥсь ужпум кадь. Куке но вань йӧскалыкъёс бырозы. Вань адямиос одӥг кылын вераськыны кутскозы, одӥг пространствоын улозы.

Антиутопия.

Who is who?

Сергей Арзамазовлэн туала литературалы сӥзем лекциязэ лыдӟиз. Малпасько вал, мар ке тужгес но тунсыкозэ, выльзэ кыло. Таяз тулыс "Галерея" арт-центрын лекциез туж тунсыко вал. Нош таиз буш. Сое огшоры кылзӥськыса пукыны но умой. Гань-гань кураез, вера марке.

Калыкез лыктӥз так, соос, кинлы тунсыко. Пайми, Андрей Гоголев сыӵе воштӥськем. Жуммем, табере со удмуртъёслэн дуннеязы пырон ӧс утча кадь. Шуэ, стоит -а берыктылыны удмурт кылысь ӟуч кылэ но ӟуч кылысь удмурт кылэ. Малы меда уд? Но юнме дыр быдтонтэм понна, умойгес луоз, дыр, удмурт егитъёслэн литературазэс ӟуч кылэ берыктыны. Соку лыдӟисьёс тросгес луозы.

Тросэз али лыдӟиськыны уг яраты ук. Эше тани, Славчи, уг яратӥськы, шуэ, лыдӟиськыны. Сюлэм ик оломар луэ. Кин понна, мар понна иське поттӥськом газет. !!!

Но туж тунсыко одӥг пусъемез вал. Кызьы азьвыл писательёс туж узыр улӥзы, квартираос кунлэсь басьязы. Нош собере система сӧриськиз. Писательёс луизы журналистъёс, уксёзы но ӧжытгес луиз. Писательёслэн статуссы быриз, гожъяськон удыс уксё ӧжытгес сётыны кутскиз, соос юыны кутскизы. Тодамы гинэ ваём В. Романовез, М. Федотовез... Жаль, кыӵе жаль. Нош собере пиосмуртъёс гожъяськон удысысь копак кошкизы - мае ми адӟиськом али. Пиослы семьяоссэс сюдыны кулэ ук.

Нош удмурт литературалэн азьлань сюресэз? Кытын? Удмурт гуртъёсысь потэм гожъяськисьёс вылын гинэ со возиськоз, пе. Нош удмурт кыл быриз ке. Сыӵе мӧзмыт луиз мыным, ку Алексей удмурт литературалэсь азьлань сюрессэ ӧз адӟы. Нош мон оскисько, со луоз. Со вань. Огшоры критикъёс уг тунсыкъясько ни выль гожъямъёсын.

Лекция лыдӟисьмы блогъёсты но лыдӟемын ӧвӧл. Нош блогъёсысь гожъмъёсты "вотэс литература" шуыса учкид ке. Яке куд-огъёсыз удмурт литератураын выль жанр кылдыто яке синтез жанров.

ӧз тырмы маиз ке. Удмурт туала литературалэсь суредзэ со быдэсак ӧз кылдыты. Но визьмолы визьмо критик кадь. Who is who? ыы.

Симфония оркестр Быгыын

Мынам оперативносте али воксё зашкаливает. Туннэ уйвӧтам но адӟи ни исамзэс. Тани кӧня ке нунал ортчыса, гожтӥсько кызьы мон нош ик вуи Быгые - мон понна туж мусо но яратоно интые. Асьтэдыс гинэ ми интые пуктэ - мынӥськод Ижкарысь Быгые час но ӝыны верантэм урод сюресъёстӥ, котыр мувӧй кыскон аппаратъёс музъемлэсь кужымзэ кыско - вань та суредэз адӟыса тон эмоционально туж жадьыса вуиськод Быгые. Нош отын тонэ кема витем куноез кадь пумитало - котьку табанен но турын чаен - соку ик вань жадем быре. Ноку но та мусо фин-угор дуннелэн шоркарысьтыз урод мылкыдэн уд бертӥськы. Али но озьы ик вал.

Быгыын туннэ симфония  оркестр концерт сётэ. Конечно, егитъёс - Ижкарысь крезьгуро колледжысь шудӥсьёс, Нижний Новгородысь китаецъёс (кызьы шуиз соослэн дышетӥсьсы, дуннеын котькуд витетӥез - китаец, милям вузамы но озьы ик. 800 адями пӧлысь), Франциысь скрипкаен шудӥсьёс но туж егит востэм француз - композитор Кристоф Арфан. Валаськоды, дыр, ваньмыз бюджетно, дунтэк сыӵе. Та ужрадэн вылӥыз туж респектабельно адскиз ке но дыр, но пушсэ веръяса номырзэ но ческытсэ уд шӧдӥськы.

Оркестр кык композиция шудӥз. Нырысетӥез тӥни со самой К. Арфанлэсь "Приглашение в путешествие" но В. Новиковлэсь  "О, Париж, Париж"-зэ. Зэмзэ ке, егит композиторлэн произведенияз мыным гаромния ӧз тырмы. ОТын, пе, удмурт крезьгуръёслэн мотивъёссы вал. Вал. Со Юминовлэн экспедициеныз Бобья-УЧАЕ ФОЛЬКЛОР БИЧАНЫ ВЕТЛЭМ.

НО МАИЗ МОГДОСэз? Юасько со куанер пилэсь, малы тон калык крезьгурен тунсыкъяськыны кутскид шуыса. Со шуэ, акыльтӥз академической крезьгур. Нош Франциысь гуртъёстӥ ветлӥд-а? Ӧй, шуэ. Малы? Соос Парижлэсь кыдёкын, пе. НОш мон шоркарын улӥсько, соин ӧз пӧрмы потаны. Нош Удмуртия Парижлы кыӵе матын! Вить минут мынонэз прак. Зэмзэ ке, со сокем востэм пияш, гуртъёстӥ но огназ ветлыны уз дӥсьты, возьдаськоз. Наш татын экспедиция вал.   Фотое но пуксьыкуз, ымынырме шузи пепертӥ кадь шуыса малпа лэся но, йырзэ улӥе лэзе, синъёссэ ватэ. Чудо. Но дӥсяськемын со туж чебер, ачиз но туж чебер. Пукиз огшоры калык пӧлын - заллэн шораз ик. Кылзӥськиз аслэсьтыз пӧрамзэ.

Так ке со экзотика. Симфония оркестр огшоры гуртын.  Юминов ужа калык понна, яке аслэсьтыз самолюбизэ вешан понна? Городын со аслаз егитъёслэсь кылдытэм симфония оркестреныз но французлэн ыль  композициеныз кинэ паймытысал но кыӵе удовольствие басьтысал лэсьтэм ужезлэсь? Татын весъёс вылын мукет палыз мед кыскоз - гурт калык сярысь сюлмаськон но соосты шумпоттон.

Но концерт азьын тужгес но тунсыко люкетэз вал - кӧтырес ӝӧк. Отын Быги - фин-угор дуннелэн шоркарыз сярысь, Юминовлэн пӧртэм ӵектосъёсыз сярысь вераським. Быгыос туж зол пӧсекъязы, соослы мииннац одӥг копейкаен но одӥг мылкыдын ӧз юрттэ шуыса. Ваньзэ асьсэос лэсьтӥзы. Юрттэт курыса вазиськылонлы - чалмыт. ШАрканзы юрттэм коть. Нош проект гуртсэс умой карон понна, коркаооссы дорозь сюрес лэсьтон понна кылдытэмын вал. ВСё-таки кунгож сьӧрысь татчы ветлылозы ук. Но, ар ортчиз ни, тани толэзь мар ортчыса, Быгыос асьсэ нимзэс мукет интылы сётозы ни, нош сюресэз али но ӧз лэсьтэ на. Оскыто соосыз, лэсьтозы шуыса, толсурозь, пе.

Кельшиз гуртсылэн главаез. Со тэк уг пукы, малпанъёссэ шараяны уг кышка,  ШОнерак министерствое мынэ. Но солы, пе, шуо, ми муниципал кылдытэтъёслэн тӧроосынызы ум ужаське. Вот, котьмар каре собере. НОш район чалмыт пуке. Аслам ёросэя тодӥсько, кыӵе соос востэм пуко но вылӥ структураослэсь сӥтянъёссэс ӵушылэ. Быгыос жаль потӥзы. Шӧдӥ, кӧня соос кужымзэс но мылкыдзэс но быдтӥзы ни та проект выэ. ТОдады гинэ вае, кызьы ортчиз Быг-Быг фестиваль. Миннац но ӧз юртты ке, кызьы соос озьы сыӵе умой радъяны быгатӥзы. Паймисько но йыбырттӥсько.

Юминов Эгра ёросысь Сэп гуртысь нылпиосын аппликация мультфильм лэсьтӥллям. Ӟечесь, ярам. Бобья -Уча гуртын гожтэм Рекрут гурлы Мускоысь нылаш песокен суредъёс лэсьтылэм, озьы клип форма оглом пӧрмем. Но мыным уг кельшы Юминовлэн позициез. Со понна ӧвӧл нимаз мари калыклэн культураез, удмуртъёслэн сям-йылолъёссылэн нюансъёссы. Со культураез огломак учке, глобализация ӧрын малпаське. Нош со ӧрын ваньмыз одӥг луэ - калык но, культура но, кыл но.

Берло вал фуршет. Сии трос фвиноград но вераськи мыло-кыдо  Му нимо китаеецен. Шуэ, уг поты вал, пе, татчы лыктэме. Консерваториын, пе, косӥзы. НОш татчы лыктэм бере, мыным кельшиз шуэ. Татын туж умой. 

Палэс

Удмурт дуннее гожъямъёсме тырыны малпай) Тани одӥгез. Палэс сярысь.

Вань меда туала удмурт проза?

8-тӥ куарусёнэ Генераллэн юртаз ортчиз туала прозалы сӥзем «Палэс» ӝыт. 
Палэсмуртэз уйпал ёросъёсын Палэс гинэ шуо. Озьыен та ним ӝытлэн пуштросэз сярысь вераз - «магической реализм» но туала удмурт проза. 

Вань меда туала удмурт литератураез кылдытӥсьёс? Шуыны луоз, чиньыен лыдъямон гинэ ке но, вань гожъяськыны мылкыд карисьёс. Но соослэсь мылкыдзэс нокин но уг кужмояты, будӥсь кужымез уг юнматы, литературае сюрес уг усьты. Кызьы усто спортсмен быре урод тренировкаос, яке ас понназ марке дауртэмез бере, но азьланяз яратоно уженыз вырыны солэн тазалыкез куашка, озьы ик егит гожъяськись но, аслыз инъет шедьтытэк, ыше но азьланяз уг гожъяськы ни. Совето вакытэ кадь, али гожъяськисьёс уг дунъясько ни. Тодэ гинэ вайид ке, кызьы ачиз Сталин кенешыны Максим Горький доры гуртаз ветлэ вал...  

Та ӝытэ но трос ик адями ӧз вуы - асьсэос гожъяськисьёс, интернетын бамзэс нуисьёс но соослэн эшъёссы. Вуиз «Инвожо» журналысь суредаськись Миша Николаев но ваиз ваньзылы йыр поромытӥсь кузьым - али гинэ печатлам «Пен-клублэн» альманахез, журналэн выль номерез. Номырин но уд ӵошаты сое, ку тон берыкъяськод зӧк туала журналлэсь бамъёссэ, паймиськод кыллэн узырлыкезлы, пӧртэм литератураослэн аспӧртэмлыкъёссылы но нырыныд кыскиськод али гинэ типографиысь потэм журналлэсь зынзэ. 
 
Егитъёс озьы ик тодматскизы латиноамерикан литератураын йылаз-пыдаз вуэм «магической реализм» амалэн. Маин ке но со  «этнофутуризмен» но одӥг радэ луэ. Кызьы пусъе кылосбуръя доктор Татьяна Ивановна Зайцева «Удмуртская проза второй половины ХХ-ХХI века: национальный мир и человек» монографияз, али дыре Россиысь фин-угор литератураез эскерисьёс «этнофутуризм» радын кутскизы вераськыны «магическое видение действительности» сярысь.  Озьыен «этнофутуризм» но «магической реализм» матын луо. Фин-угоръёс дуннеез вашкала улон пыр валаны турттӥзы («этнофутуризм» шуон вордӥськиз эстон литератураын но ХХ-тӥ даурлэн пумаз мукет литератураосы вӧлмыны кутскиз), нош латиноамериканецъёс - улонын луись магия пыр. Ӝытэ лыктэмъёс Хорхе Борхеслэн «Книга песка» новеллаез вылын магической реализмлэсь тодметъёссэ пусйизы. Озьы ик пал кыл верамын вал Габриель Маркес но солэн книгаосыз сярысь. 

Пумаз асьсэ гожъямъёссэс лыдӟизы удмурт кылосбуръя факультетын дышетскисьёс Марина Пахомова но Николай Михайлов, Питерын улэмез сярысь мадиз малпаськон манереныз пӧртэм луись Дарали Лели но «уйвӧтысь чуръёсыныз» тодматӥз Мария Векшина. Котькуд гожтэм сярысь егитъёс асьсэ мылкыдъёссэс веразы. Озьыен, диалог пӧрмиз. Азьланяз но удмурт литературалы сӥзем ӝытъёс луозы на.

Резиденция

Резиденциысь мон вазьгес кошки, соин ик ӧй адӟы нокыӵе странез. Бадӟым но паськыт тубат вылын гинэ кӧня ке "ог-огзэс яратӥсьёс" сыло вал.

Туж умой, мон вазьгес кошки шуыса. Нырысь кылдэм мылкыдме нокин но ӧз куашкаты. Черодын сылӥсько. Мышкам пиос. Одӥгез шуэ, юри чебер дӥсяськи, кышкай, уз лэзе шуыса. Валантэм обстановка. Табере та Пепелац ӧвӧл ни. Малпасько вал, интыез трос шуыса. Но увы кадь, сомындагес ик. Огшоры азьло адямиос ӝыныез барын пуке вал, эктӥсез эктэ вал. Нош али - ваньмыз огазьын. Кӧня калык люкаськиз... Танцполын нош ик шӧкчон интыез ӧй вал.

Мон вылӥысен учки ваньзы шоры. Умой, пока экто, уз жугиське, дыр. Солань-талань ветлонъямымныръёс шоры учкылӥ - пань-пань юэмын ӧвӧл кадь - дӥсьёссэс синйылтӥ - ммм, так ке тросэз валаса дӥсяськемын. Ваньмыз сыӵе гань-гань интеллигентно потӥз. Интызэ валаса кадь - зарниям кортъёс, чилясь пол, да марда... Уг тодӥськы - пространствоен бадӟымен йырин номырзэ уродзэ ӧй адӟы кадь.

Клипез возьматӥзы ук, Ваньмыз Арт-экспедициысь ... Зэм ке, со 10 нуналъёс туж шудоесь, яркытэсь, шунытэсь нуналъёс вал. Мон трос мар аслым басьтӥ, нош телефонной связь ӧз луысал ке, мон воксё губка кадь луысал но экспедиция пумын мылкыдэн пачыласал... Мыным кельшиз клип. Кин ке но шуиз любительский. Но мыным кельшиз. Со кыӵе ке мукет. Со ӧвӧл "Италмас". Кык нунал ортчыса, Петыре телевизор пыр адӟем сое. Серекъяз гинэ.

Бертыны потӥ. Клуб азьын вполне сазь пиос сыло. Одӥгеныз мар ке вераськыны кутским. Сазь, визьмо вераськиз, Алнашысь, мынам одӥгез яратоно гуртъёсы пӧлысь...

"вотэс литература"

Странность сыӵе, вал дыр, ку удмурт блогъёсты лыдӟылӥзы. Тау соослы, кин блогеръёсты тодмо кариз. Но али валасько: блогъёс акыльтӥзы. Газет тодам лыктӥз - азьвыл солэн кӧня подпискаез вал, нош собере, нош али? Озьы ик блогъёслэн но, лыдӟисьёссы кулэсмо кадь. Тросэз тодӥзы ни, мар со блог. Нош гожъяськисьёс сярысь ке, кин ке шедьтӥз аслыз аудитория, яке аудитория сое шедьтӥз (удмурт "вотэс" гожъяськисъёслы кыкетӥзэ лякыны шонергес луоз кадь потэ). Алиосыз блогеръёс мукетъёсызлы гожяъськыны мылкыд сёто. Мед азьланьскоз та уж.

Тани Россиысь писатель Денис Драгунский ветлӥз Ижкаре. "Читай, Ижевск!" фестивале, пумиськиз лыдӟисьёсыныз. Пумиськонын со шуиз, али, пе, кылдэ аспӧртэмлыко "вотэс литература". Солэн туж трос умой палъёсыз. Нырысь ик, дунтэм. Кыкетӥез,  солэн ӧсъёсыз котькинлы усьтэмын. Куинетӥез, вотэс кутскись авторез тодмо каре, солы аудитория кылдытэ, озьыен, книга но поттӥз ке, соос ӝажы вылын тузонӟыса уз кылле. Ньылетӥез, автор, весь гожъяськыса, кылзэ волятэ. Витетӥез, гожъямъёс сярысь отзывъёсын тодматскыны луэ, комментарий кельтыны. Но валтӥсез плюс, гожъяськисен но лыдӟисен диалог кылдэ, интерактив. Нош урод палъёсыз сярысь верад ке, (таиз аслам малпанъёсы ни) вотэсын ӧвӧл редактор, кудӥз возьматоз кутскись авторлэсь янгышъёссэ, валэктоз солы соосты. Вотэсын ӧвӧл на зэмос критика... Но эшшо, яра-а меда блогъёсты "вотэс литературае" пыртыны (нош Денис Драгунский отчы блогъёсты но пыртӥз)? Риторической юан яке мар?

Гожъяськисез гожъяськоз ни, нош лыдӟисез лыдӟоз.

Тау.

Удмуртъёс Америкаын

Богдан Анфиногеноен Оля Тронинаен, "Шунды" огазеяськонлэн кивалтӥсез, ветлӥзы Америкае но со континентын улон сярысь мынэсьтым вань стереотипъёсме куашкатӥзы. Малпаськоды отын вань свобода? Да отын тыныд пал кыл но вераны уз сётэ. Америкаен ӵошатыса, милям воксё демократилэн вань прелестьёсыз адӟисько ай. Туннэ вылаз эшшо параын "Отдел новостей"  американский сериалысь люкетсэ возьматӥзы. Юри, учкелэ ай нырысетӥ серизэ, валалоды, малы со мерлыклы ӧз кельшы.

Одӥг телешоуын куноослы учкисьёс юанъёс сётъяло. Одӥгез учкись юан сётӥз: "Маин Америка выликой держава луэ?" Патриотъёс кадь, вань куноос валэктон сётӥзы. Соос пӧлысь одӥгез шуиз - свободаеныз Америка великий луэ. Нош куинетӥез кӧня возиськиз, но сое юанъёсын довели шуод-а мар-а, но со пуштӥз. Кыӵе свобода шуэ Америкаын... (отӥзэ асьтэос учке). Соку мынам пушкам ваньмыз  - малы ке но мынэсьтым сюлэмме туж висьыто политикаен герӟаськем юанъёс - бугырскиз, мон соку ик патриот луи, дыр, пичильтык гинэ.

Богданлэсь но Олялэсь вераськонъёссэ кылыса, син азе пуксись суредъёс йыре уг пыро. Индеецъёс али гинэ но резервациын, асьсэ автономной музъем вылазы, кытын соос асьсэлы вождьёс быръё, племязылэн катъёссыя уло на, али гинэ но, милемыз тӧдьы куо адямиос уг ярато, ми но соосты ум яратӥське шуыса верасько на. Уло, пе, туж куанер, 60% -тэз ужтэк кыллё (асьсэлэн ик, пе, ужамзы уг поты, субсидиос вылын но музъемзы понна арендалэсь поттэм уксё вылын кыллё), егитъёс, шудо азьлань улонлы оскытэк, ошкисько, тросэз юо... Тӥ эн малпалэ, соос али гинэ ке но виг-вамъёсын но пӧртэм шалашъёсын уло шуыса. Соослэн вань сыӵе ик тыро-пыдо коркаоссы, юртъерзы. Соослэн огшоры уг поты умой улонэ потэмзы, "тӧдьыосын" кусыпъёс кылдытэмзы, азинскемзы но стереотипъёслэсь куштӥськемзы.

Нош мар бордын парадокс? Соос мукет йӧскалыкъёслэсь но цивилизацилэсь кенераськыса уло. Малпалод, асьсэ калыксылэсь культуразэс но анай кылзэс утё. Но... Но соос тросэз уг тодо ни асьсэ кылзэс, верасько, ваньзы кадь, англи кылын. Угось Америкаез англи кыл огазея - отын ӧвӧл "йӧскалык", "мукет кунысь адями", "мукет осконэн улӥсь" валанъёс, отын ваньзы ог-огзэс одӥг радэ пукто. Тӥни кытын уло глобализация. Я коть Америкаез но милесьтым континетмес океан висъя. Индеецъёс сярысь... Нош тодӥськоды-а, кызьы тодо, индеец тон, яке ӧвӧл. Паймоно кадь: вирзэс, пе, эскеро. Кӧня процент возьматоз - сомында процентлы ик тон индеец. Соослэн карточкаоссы но вань: тон индеец, тонэ ултӥяны уг яра. Али отын туж чурытэсь катъёс кутэмын йӧскалыкъёсты гажанъя. "Сьӧд куо адямиосты" нигер шуыны, олокыӵе но кылъёсын соослы вазиськыны уг яра.  Соин ик таосыз (индеецъёс но негръёс) сьӧраз ортчо ни - соослы ваньмыз с рук сходит.

Нош культуразы но индеецъёслэн быдэсак быриз ке? Соос со борды уг кутско. Валтӥсез соослы - вирзы. Соин ик, лэзя, мукет калыкъёсын но вераськыны уг дырто. Асьме кунын коть калыкъёсты утёнъя программаос вань, вань Ассамблея народов России. Соос тэк всё-равно уг пуко, дыр. Нош Америкаын ӧвӧл коренной калыкъёсты утись катъёс. ӧвӧл.

Сакырын Быдӟым Крезь

Куке но Чудья ӝытъёс ортчытъяны Перепечкинын кутскиз вал. Кубызлы, Арганлы сӥземъёсыз радъяськизы, нош крезь дорозь ӧм вуэ. Ма соку кема ик дыр ӧз ортчы, Вероника Фёдорова Быдӟым Крезьлы ӝыт ортчытӥз. Перепечкинын ик, кылем толалтэ. Сыӵе обстановка вал отын - вылӥ, кизьныны но кышкыт. Быдэс " крезь оркестр" шудӥз. Всё-таки со удмуртъёслэн валтӥсь крезьгуро интсрументсы - нырысетӥез Инмарен чашъем вӧсь пужымлэсь лэсьтэмын.

Так справка (простить каре ӟуч кылын шуыса):

"Крезь (удм. пение, напев; крезьгур – мелодия) – струнный щипковый инструмент. Имеет корпус из еловых досок в виде полукруга длиной у основания до 830 мм, с небольшими выступами на концах и выемкой в середине. От 14 до 24-32-38 жильных струн натянуты между фигурным деревянным струнодержателем и колками. Есть внутренние резонирующие струны, натянутые внутри корпуса для улучшения качества звучания (резонирующие струны встречаются не во всех инструментах).
Удмуртские гусли – крезь – имеют две разновидности: простые гусли (крезь) и великие гусли (быдӟым крезь). Характер звучания светлый, чистый. При игре инструмент держат на коленях полукружием к себе, правой рукой играют мелодию, левой – басы. Крезь существовал в Удмуртии как бытовой и культовый инструмент. Как бытовой звучал на свадьбах, во время календарных праздников (после «официальной» части, когда водили хороводы), затем повседневно. Как культовый инструмент быдӟым крезь звучал во время общественных молений, ритуальных танцев, молебных напевов – например, "мелодии небесной росы" (инву утчан гур). Гусляр (крезьчи) участвовал в выборе хранителей Великого святилища, жрецов и других служителей языческого культа. Древняя история крезя изучена недостаточно, археологических находок не существует, в то же время инструменты этого типа характерны для многих финно-угорских народов, воспеты в песнях, эпосе, традиции их использования в религиозной обрядности восходят к периоду древнеуральской языковой общности". Андрей Воронцов.

Пайми вал, ку Танечка Тихонова Капустинлэн мастерскояз ветлыны кутскиз но аслыз куско крезь лэсьтӥз. Молодец ни  со. Сыӵе бадӟым предисловие вал мар борды...

Сакырын туннэ крезьлы сӥзем ӝыт ортчиз. Шонерзэ вераса, С. Капустинлэн студиезлэн дискеныз калыкез тодматӥзы. Отчы крезь тулкымъёс гожтэмын: пыж крезен но, быӟым крезен но пӧрмытэм крезьгуръёс. Михаил Рябов нош крезь - контрабас лэсьтэм. Зӧк струнаосын - черкъёсын азьло, пе, службаос контрабас куара улсын нуисько вал, соин ик крезь-контрабас со вӧсьлыко инструмен.

Тӥ кылзӥське гинэ, кыӵе куара поттэ крезь - ненег тулкым кадь ортче со сяськаос вылтӥ но соос вылысь мушъёсты сэзъялтэ, собере мушъёс каллен со доры лобӟыны кутско... Крезь куара - со инкуазь вальслы кельше.

Быдӟым крезен шудӥз Вероника Фёдорова, куско крезен шудыса, кырӟазы Танечка Тихонова но Валерия Фёдорова, Капустин аслэсьтыз малпам крезьгуръёссэ кык крезьёс вылын шудӥз, Михаил Рябов "Муш утён гур" лэзиз.

Туж шуныт вал татын, туж шуныт. Калыкез, мон понна, ожытгес люкаськиз. Но эстэтъёс, мон шуысал.

Тау.

Так, оломар тодам лыктӥз.

Мынам потӥзы выль геройёсы - Марго но Донды. Маргоез идиллисстической улонэ пыртӥ но табере солэн отысь кошкемез уг поты ни. Со кыске тамак, яратэ аслэсьтыз муспотонзэ, кылчинзэ Т.-ез, юэ вина. Нош Т.-ез весь сое шонер сюресэ поттыны выре но уг вормы - ӟигарыз быре.

Марголэн дуннеяз вуыса, мон тодам вайи, кызьы кылем арын ветлӥ француз киное "Жизнь Адель". Тодӥсько на вал, али кадь ик, кызьы мон мылкыдъёсме, блоге потто шуыса, гожтӥ вал. Но блогысь малы ке ӧй шедьты. Валай, кыӵе ӧжытсэ гинэ мон татчы пыртӥсько. Ага.

Веросэ пӧрме постмодернистской. "Кенеш"- ын матысь дыре потозы ни мукетъёсыз.

Эшшо В. Ерофеевлэсь "Москва-Петушки" прозаен гожтэм поэмазэ лыдӟем бере,  мылкыды ӝутскиз вал со выллем марке малпаны. Но одӥг абзацлэсь кыдёке ӧй кошкы на. Кемалась вал ни со. Вунӥз ни со, мылкыд но мукет луиз ни. Та ке тунсыко луысалыз но, кызьы мыным потэ, шузигес. Вераськысал бадӟым стажен алкашъёсын яке "кыдзы бертэм" (йырвизьзы берытскем) адямиосын. Соослэн дуннезы, мон понна, тужгес но тунсыко.

Тани ветлӥ вал позыръяськонэ. Ваньмыз сыӵе цивильно: кафе, инбам, кезьыт, ӝӧк сьӧрын юыса пуко, зусъёс вылын адямиос пуко, мукетъёсыз экто. Нош одӥгаз ӟус вылын пуке трос аръёс ӵоже юись мурт. Солы 35 аръёс сяна ӧвӧл на. Котькуд нунал юэ ке но, кыӵе дӥсяськыса со потэм кафее. Пиджакен (вуж ни ке но, всё-равно, адске, атаез киысь яке со дыръёсысь  кылемын со шуыса), брюкиен (пиджакез кадь ик) но ботинкаен (известен-а, тӧдьы краскаен-а саптаськемын ке но, всё-таки ботинка). Юэ ке но, дӥськутэз погмаськемын ӧвӧл, пиджакез  бирдыямын - сыӵе туж интеллигентной алкаш. Пуке себе ӟус вылын но крезьгур кылзӥське, кайфоватьтэ. Эктыны но эктысал, дыр, но пыд йылаз сылыны уг быгаты вал ни, соин ик пукыса киосыныз выртэ, йырыныз крезьгуръя эктэ. Нош дискотека бырем бере, ӟус вылысьтыз султӥз но, сопалась тапала шонаськыса гурт палаз вамыштӥз.

Нош табере тодамы ваём суббта ӝытъёсы (и не только) юись егит пиосты... Соослэн мыжыкъёссы чик но крезьгуръя уг лобало... Табере кылдэ юан: кызьы улыны шонер яке кызьы юыны шонер?

Мылкыд

Жади морально. Ӵукна вазь султӥ. Лулы шугъяське, гань-гань кариськемез уг луы. Уйин но кык дуннеос вискын сылӥз. Таисьтыз но кошкемез потэ, сояз но потыны уг  вормы. Озьы ик сопалась тапала пӧсекъяса ветлӥз но мырдэм-мырдэм уйвӧт дуннее усиз. Кемалы луысал ке.

Ӵукна ӵук султӥ ... Озьы ик наркотический мандражен улӥ быдэс нунал. Сюлмы туж зол кокаськиз, нош малы? Валантэм. Пушкын весь тылпу ӝуаз, ваньмыз пӧзиз... Озьы ик со кужым вань лулме жадьтытӥз. Нош нунал озьы ик ортчиз.

Жади. Жади но умме уси.

.точка

Вот вань учыр "Брангурт песянайёсын". Тросэз тодо вал ини. озьы луоз шуыса. Табере со ансамбль - бренд, ним, процесслэн вылбамыз, нош пушкыз - неважно. Зэм но, шоу-бизнеслы неважно. Ансамбльлэн составез воштӥськысал куке но. Номыр но соин уд кары. Табере "ББ-лэн" историяз вуиз реальной точка, кудӥз продюссеръёсын пӧрмытэмын буш запятойлы. 

Екатерина Васильева - кылбурчи

Тодматски туннэ выль мон понна кылбурчиен Екатерина Васильеваен. Вордӥськемын со Шаркан ёросысь тросэзлы тодмо Быгы гуртын. Туж аспӧртэмлыко нылаш. Нырысь ик, кылбуръёсыныз тодматскыса, мон сое сыӵе шыпыт нылашен син азям пуктӥ. Но ку жингыртӥ но куаразэ кылӥ, ваньыз йыринь-чукинь берытскиз, сюлэмы лӧптӥз. Туж ненег, но со дыре ик жингрес куара соку ик ас бордаз кыскыны кутскиз кадь. 

Зэм но, со туж етӥз, вераськыны яратӥсь, усьтэм лулын, ваньзэ сюлмыныз шӧдӥсь нылаш. Но со дыре ик со котьку но азьлане кыстӥськись, пуктэм ужпумъёсты быдэсъясь, зол сямын. Сыӵе противоречивой натура кадь. "Нюко - гопо". Поэзиез но туж паймымон - удмурт литератураын солэн темаез ваньмынызы уг кутӥськы - интим. Тани учке гинэ, кыӵе чуръёсыз.

Бирдыме йӧтӥськод ке,

Кышномурт асме кожаськод.

Кин гинэ дӥсьтоз сыӵе малпанъёссэ шараяны. Нош со шонерак вера ваньзэ ("Чумолё вылэ тубод жадьыса" Татын Чумолё - со ӟызы кышномурт), улонысь образъёсты басьтэ ("усьтӥськиз ошмесэ, шукыен жальыр бызе" ошмес - кыӵе тунсыко метафора), мылкыдъёссэ сюлэмысьтыз кисьтэ ("Я, ӟыгыръя мукетсэ, сое яратӥськод ке"). Куд-ог дыръя лирической героез - со ачиз автор, нош куддыръя - со азьпал улонысьтыз ачиз-кышномурт (кылбуръёсаз герой я пияно, я яратоно, я яратонтэм, н ачиз со котьку яратэ). Темаез но быдэс творчествоезлэн одӥг - яратон. Но тросэз гожъямъёсыз солэн блокнотаз ик кылемын, малыке шуоно соос "слишком интим", соин ик издательёс соосты уг потто.

Ачиз кылбурчи шуэ, со школаын урод дышетскиз. Озьы ке но солэсь туж усто кылбурчи кылдэмын - Инкуазен, пе, быгатон сётэмын. Адӟиське, нылаш улонын трос сюлэмшугъяськонъёс адӟемын но вань мылкыдъёс сюлэмез пыр поттэмын. Тани, шуэ, Кузебай Герд Кузонэ дышетскыны тыбыраз котомкаен 400 километр пыдын мынэм. Солэн валтӥсь ужпумез дышетскон вал. Мыным но озьы ик, шуэ со, главное дышетскон, кыӵе оценка но уг пукто ке, дышетскыса визьме будэтӥсько. Так ке, пе, мынам пунктуациен янгышъёс луо, соин ик мон кылбуръёс гожъясько дыр, кытчы потэ, отчы ик пуктӥсько знак. Со туж умой тодэ Алла Кузнецовалэсь творчествозэ. Гажа Эрик Батуевез. Уг яраты Бродскиез. Улонын  - визьмо. Тодэ сое, мар солы кулэ. 

Али дырлы солэн вань ини кык пичи сборникъёсыз "Бурдъёсы вордӥсько" но "Малпанлэн шыпыртэмез". Азьланяз ӧдъя веросъёсын бичет поттэмез.

Тау улонлы, мон сыӵе адямиен тодмаски шуыса.

Пинал мылкыд - юмал йӧлпыд. Part III.

Берпуметӥзэ бертылыкум, ми концерт пуктӥм. "Пинал мылкыд -юмал йӧлпыд". Таиз ар куинетӥез ни. Малпаськод, тыро-пыдо концертлы кулэ дасяськыны ӝыны толэзь? Но али вакытэ озьы ноку уг пӧрмы. Пиосмы вуизы толон, нош ӵуказеяз концерт дась вал ни. Озьы, кызьы быгатӥськом. Пиосмы милям зарниесь ведь.

Концерт кутскон азьын Уӵыёв понна куара сётонъя агитация вал. Милям, концерт пуктӥсьёсмылэн, вань мылкыдмы куашказ. Кыӵе конерт на, Соос милемыз секыт зӥбетэн пачкато ке.

Таиз ӝыт туж бышкиськись луиз, Подводкаосын егитъёсмы мерлыко ужпумъёсы ӝутылӥзы.

Ё, ву понна кылкутӥсь, телефон пыр вераськыса мынэ. Со доры лыктэ ву.
-Тон кин? - юан Ё.
-Мон гумыостӥ кошкись ву, - вазе соиз.
-Мар бон тон ветлӥськод?
- Мынам азям куинь ужпум.
-Кыӵе?
- Мырдэм -мырдэм адямиослэн коркаосазы кылдыны, собере... шуак бырыны.
-Нош куинетӥез?
- Куинетӥезлы дсяськисько гинэ ай.
-Кызьы?
- Толалтэлы. Кынмыны. Собере гумыосын луоз буш.

Концертэ, верай ни вал, вуизы "бадӟым адямиос". Пургаласез удмурт кылэз умой уг тоды, ярам, Нош муниципал кылдытэтмылэн йырыз мыняса пукиз. Та бере ик луиз кыкетӥез подводка. Таиз - гуртын асфальт ӧвӧлтэмен.

 Герой асфальтэн пумиське.
- Тон кин? - юа Н.
- Ма тон монэ адӟылэмед ӧвӧл, дыр. Мон асфальт! - шуэ соиз.
- Ма, озьы. Мон Matiz-ме гурт пуме кельтӥсько. Таӵе сӥзьыл куазен корка дорозям вуыны машинаен уг луы, нӧдэ. 
- Я куке но тон доры но вуо, дыр ай, - оскытӥз асфальт.

Кызьы ке но озьыгес. Таиз бере Милям Йырмы гордэктӥз.  Пургаысезлы куаретӥз, со милемыз озьы серекъяло ук шуыса. Я, бон, валало ке. Кичабымон. Мон пайми, соос концертэз пумозяз учкизы. Азьло ӝыны дырзэ пуко но кошко вал.

Пуроысь егитъёслэн быгатонлыксылы паймыса но, клубысь ужасной условиоссэ адӟыса но (колонкаос сӧриськемын, мой акустика ӧвӧл, ремонт сю ар талэсь азьло лэсьтэмын ни, микшермы жаде), Культурая Начальник юрттыны ӧз кариськы, сипыртӥз мар ке куронъёстэс санэ басьтом шуыса, но солэн верамысьтыз валамон вал - со вылӥ структураостэк одӥг вамыш но лэсьтыны уг быгаты. Неужели ёросъёсъёслэн одӥг пичи но автономизы ӧвӧл. Уг оскиськы.

Концерт бере, соос милемын чай юыса пукизы на, лӥятыны выризы. Коть кузьымен лыктэ-а мар-а вал, калыкез ас цельёстыя использоватьтыны ӧдъяськоды бере (быръёнъёслы агитация сярысь татын мон верасько).

Мар кароно на, калыклы юрттэт шедьтон понна? Соос асьсеос гинэ асьсэлы юрттыны быгато, кызьы мон валасько.

Быръёнъёс сярысь.

"Номыр но милемлы уз юртты. Нокыӵе агитация. Революция со понна лэсьтоно, собере ӝыны адямиосты вийылыны". (блогеръёслэн законзыя кӧня ке уло, уг вера кин озьы шуиз)

Быръёнъёслы агитация чырты дорозь вуиз ни. Нош кыӵе отын несправедливость. Кыӵе ке депутатлы агитация ортчытыны сёто 50 млн манет, нош кинлы 50 сюрс. Ну, и кудӥз вормоз, малпаськоды? 50 сюрс куд-ог адямиослы сӥтянзэс гинэ ӵушылыны тырмоз, нош 50 млн зарнияны но.

Нош милям вуоно азьмуртмы (малпасько, тӥ тодӥськоды ни солэсь нимзэ) вань структураосты кияз кутӥз ни, тӥ уд оске, черкез но. Син азяды гинэ пуктэ, вато кулэм адямиез, нош черкын ужась шуэ: "Быръёнъёс вуо ни. Кин понна куарадэс сётоды?" Нош гурт калык одӥг кандидатэз сяна, нокудзэс уг тоды ни. "Кинъёс пӧлысь бон быръёно?" Нош соиз таосызлы вера: "Удмурт калыклы кулэ удмурт азьмурт. А. Уӵы." Бон со Уӵыёв али чирдоз, чирдоз но, туж оскисько, куараез уз пуксьы шуыса. Туж умой тодӥсько на,  али "трон" вылаз пуксьыкуз, со оскытӥз, калык мылкыд ӧз кары ке, аслэсьтым кандидатураме быръёнъёсы уг потты. "Конечно" - малпай мон ас поннам соку. Таӵе учыре кыӵе мылкыд карон на, мукет кандитаурослы кыл но уг сёто ке (может сёто, нош соосыз дунгысъёс). Малы мон озьы шуисько? Тани малы

Котькуд ар гуртысьтымы егитъёс "ПИнал мылкыд-юмал йӧлпыд" концерт пукто. Клуб ужасьёс та сярысь, конечно, ваньзылы верало, ар куспын концертъёс чиньыен лыдъямон сяна уг лэсьтыло бере. Соин ик вуиз ми доры егитъёсын ужанъя, культурая но спортъя начальник. Озьы три в одном - ни рыба, ни мясо, сыӵеос сярысь шуо кадь. Концерт азьын кутскиз агитация нуыны. Лыктэлэ быръёнъёсы, мед луоз 99 процент, тӥледлы но милемлы умой, тӥ Уӵыёв понна куарадэс сётӥщды ке. Яра, шуэ, конечно, кӧня ке куарадэс мукет партиосысь кандидатураослы но сётыны. Но тросэз мед луоз А. понна. Калыкез шузи кожа. Валэктэ, малы Путинлэн рейтингъёсыз вылӥе ӝутскизы, нош Обамалэн лэзькизы. Ярам.

Нош маиз  монэ бакомытӥз. Со шонерак валэктон сётӥз таӵе юанлы: малы Россиын сомында партиос. Кулэ, пе Западлы возьматыны, асьмелэн демократия шуыса. Соин ик вань мукет партиос. Нош асьмелы, шуэ, стабильностез возьматыны кулэ. Соин куарадэс сётоно одӥгез понна. Озьы верасько ини, азьвыл коть быръёнъёс азьын сойзэ лэсьтом, тайзэ тупатом шуыло вал. Но марке но коть дауртылӥзы. Наш али - тӥни. Тӥ милемлы А.С. понна куара, ми тӥледлы - куасьмем мыжык.  Милям гуртамы лампочкаос но уг тыро ни, всё равно ӝуыса бырозы, шуо.

Так ке трос юанъёс калык сётъяз. Со начальник оглом вераз - кылме уг сёткы, но марке карыны тыршо. Кыл ӧз сёты ке, озьы ик со юанъёс та залэ ик кылёзы. Солэн вераськемез бере, вань мылкыд куашказ, концерт ик пуктэм ӧз поты ни. Нош бадӟым классъёсын дышетскисьёс, кыӵе сое кылзӥськизы, ымзэс ик усьтыса. Нош егитъёс - ӧз чидалэ. Пургаысь культурая начальник клубе умой колонкаос но лэзьыны уг быгаты. Кыӵе милям начальникъёсмы. Мыным озьы шуыны капчи, конечно, но мар ке но лэсьтэмзы луэ дыр ук соослэн.  

Озьы ни, школаын но клубын ужасьёсты ваньзэсты агитироватьтыса ветлыны косӥлшлям. Сиён пӧрась, бон, мар озьы ветлыса улоз. НО куанеръёсты кышкатъяло, Баграш-Бигратӥ, пе, эскерисьёс коркась корка  ветлӥллям, агитация лэсьтэмын-а ӧвӧл-а шуыса. Уксё, пе, кураторъёслы тырозы (милемыз, пе, "кураторъёс" шуо, кыл но бон шедьто, модной). Ческытатыны ческытато, нош кӧтсэс уг тыртыто, уг сёто уксё.

Озьы. 

Дарт.

Дартэз лэсьтэм бере, мон шумпотыса гуртэ бертӥ. Угосьсое лэсьтон  кыӵе ке самостоятельной вал. Тайзэ газетэз мынам вашкала но туала улонъёслэн герӟетъёссылы сӥзем потӥз. Тани этнофутуризмъя симпозиум ортчиз кадь, Арт-экспедиция фольклор бичаса ветлӥз (зэм но, мыным туж кельшиз гуртъёслэн ортчем сюрестӥз "вамышъяны", кылзӥськыны анай-атайёслэн учыръёссэс), Ижкарысь Генераллэн коркаяз но шуак пырыса, экскурсие сюри кадь, егитъёс но анайъёссылэн дэремъёсынызы ветло - сое но поттӥ...

Но мукет нуналаз газетме учкыкум, сизьыметӥ полоса вылын бакоми. Кытын "Анайлэн шыкысьтыз" материал? Кытын вашкала дырпус?!  Мон шоры учке 2012-тӥ арлэн толсур толэзяз потэм полоса!!!! Кызьы-мар, мон азьын ик со полосаез печате лэзизы кадь но... Озьы луэ ни, номыр уд кары. Адямиос но янгышало.

Соин но вылды, лыдӟисьлы та газет туж несерьёзной потӥз, дыр. Сизьыметӥ полоса усем бере, ачим но сое пӧртэм валантэм детальёслэсь лякылэм мозаикалы, пумозяз пыжымтэ перепечлы кельшытыны кутски. Но татын вань материалъёсын шӧдӥське одӥг тема - Вашкалаез -туала. Может тӥ монэн соглаш ӧвӧл?

Туннэ лыдӟи Удмурточкалэсь Дартлэн таиз номер сярысь малпанъёссэ. Зэмзэ ке, шумпотӥ, малпанъёс шараясько шуыса. Даралиен но пумиськи, со шуиз: "Мыным аналитика ӧз тырмы!" Таиныз но мон кӧняке соглаш, информационнойгес пӧрмиз. Но ваньмыз азьланяз, малпасько.

Мон понна Дарт - со феномен, кудзэ кулэ утьыны но азинтыны. Дарт - со удмурт егитъёс пӧлын одӥгез туала, серьёзной, аналитическо-информационной но пайдаё газет луыны кулэ. Мынам опытэ но уггес тырмы на, дыр. Но мон, шумпотыса, вырисько та газет бордын. Соин ик, вань критикаез лыдэ басьтыса, азьлань мыно. Тау Вера Штыковалы но Настя Шумиловалы, соос но вань сюлэмзэс поныса, лэсьто та газетэз. Мон шуысал, али Дартлэн изюминкаез, яркыт сиез - со та кык нылъёсэн творчествозы - комиксъёссы но тунсыко идеяосы (Мунё но Туно). Нылъёсын ӵош поттэм Дарт зэм но ческытгес кошке.

Таяз номерын зэм но ӧжыт авторъёс вал. Но куарусён матэктӥз ини, выль авторъёс вуозы городэ но чилектыса шуккиськозы Дартлэн инбамаз. Марайко соосты огазе гинэ люкалоз на.

Дарали кошкем бере, мон курдай кӧня ке. Дарт Даралилэн кадь уз луы ни шуыса, нош ваньзы дышемын ни солэн тунсыко Дартэзлы. Пото мукет Дарт, копак мукет! Ачим кыӵе шумпотыса но паймыса ньылӥсько валДаралилэсь котькуд номерзэ. Нош мон традиционнойгес шуод-а мар-а, Дартэз мӧзмытгес каро кадь потӥз. Идеяос трос, мон соосты улонэ шонер пыӵатыны уг быгатӥськы на, лэся. Но, мукет палысен, кыӵе со шонер? Котькуд адямилэн аслаз дуннеез, аслаз Дартэз.

Возьмалэ вуоно Дартэз, но вералэ мылкыдъёстэс. Нош ми, ас палысенымы, газетэс азьлане нуом но солэсь лулзэ шедьтом. Малпасько, вуоноез газет луоз "Дарт, а не личный дневник". Хотя таиз но мыным озьы уг поты.

Сергей Матвеевлэн гожъяськемез сярысь

Маиныз Сергей Матвеев монэ сокем бордаз кыске? Уг валаськы. Одӥгез шуэ, эн лыдӟы на сое, тыныд вазь на, векчи пияла пуштросо кылдэ сӧроз, лыдӟы классикъёсты. Мукетыз пайме, озьы-а, яраткод Матвеевез...

Нош маиныз со бордаз кыске? Нырысьсэ мон соин кыкетӥ курсын Вера Григорьевнаен радъям пумиськонын тодматски. Книгаез киям сюриз но зыми со "Инсьӧр пӧртмаськонъёсы". Али но потэме уг луы на. "Шузи" романозяз туганме но вуттӥ вал.

Мыным потэ, солэн гожъямъёсыз пиосмуртлы но, нылъёсмуртлы но тупалоз. Пилы, малы ке шуоно со ваньмыз пилэн синмыныз, нош ныллы, малы ке шуоно почти быдэс прозаез солэн нылъёс сярысь. Солэн геройёсыз туж синмаськисесь, ачим кадь ик. Нош кызьы уд синмаськы чебер яке творческой адямиослы. Та ласянь мыным Западын XX-тӥ даурлэн нырысетӥ аръёсыз кельшо, ку нылъёс "феминизм" кылэз поттаны кутскизы но улонэз быдэсак веръязы: кыскизы, юизы, нылъёсты пиосын радэ яратылӥзы... Марлен Дитрих, Фрида Кало, Париж, Фицджеральд...

Тани кылем толэзе киям кутӥ "Кенеш" журналэз, нош отын Сергей МАтвеевлэн "Нылкышно" роман-чигвесьысь люкетъёсыз. Шумпотӥ! Таяз толэзе вуиз - со романысь нош ик мукет люкетъёсыз... Сое лыдӟыса, шуоды-а тӥ, удмурт литература интыяз сылэ яке удмурт кыл туж куанер шуыса. Уд! Огшоры, кин ке азьтэм но азьлане уг азиинскы. Кызьы вьетнамецъёс ваненыз шумпотыса уло, но узырмыны уг дырто, озьы ик ми но.

Вера Григорьевна Пантелеева Сергей Матвеевлэн кылбурет дуннеез сярысь 

Юмал йӧлпыд

Адӟиськом - сюлэм пыртӥ поттӥськом - вунэтӥськом!

Лыдӟисько туж субъективной дунъянъёсты но паймисько адямиослы. Соос трос дыр ӵоже одӥг кырӟанзэс но одӥг эктонзэс быдэстыса уло. Котькуд арберилэн вань трос пӧртэм паллъёсыз. Боды гинэ но кык пумо. Нош пинал мылкыдъёс сое адӟемзы уг поты. Ачим но соос пӧлы пырисько. Кулэ-а иське сыӵе туж субъективной анализъёс лэсьтыны? Кулэ, дыр. Но мон отысь одӥг "эгозэ" гинэ адӟисько. Оскисько, пинал мылкыд кисьмалоз, нош юмал йӧлпыд тыраз-пыдаз вуоз.

Палэнскыны - улыны - узырмыны! Озьы, дыр.

Шундыкар

"Шундыкар" лагере вуылӥм. Чинно-важно охрана милемлы пропуск лэсьтӥз. Ринат Гафуров ӧсъёс доры пумитаз но вожатойъёс доры нуиз. Соос ӟусъёс вылын пуко но ӝытлы кыӵе ке ужрад малпало. Котькудӥз марлыке но кинлы ке но пӧрмемын.

Алина Чернова, пе, анай йӧл!

Мон ноку нота лагере ӧй ветлылы на вал. Кылдымтэ, лэся, вылэм. Огшоры адямиен гинэ вуыны шуд усиз.

Ми вуыку, пиналъёс специалистъёсын ужало вал на. Соин ик мон соос дортӥ кошки. Ксюша Ворончихина отрядэныз дэрем вурыса пуко. Солэн нылпиосыз тросэз ӟучомемын ни. Одӥгез воксё татчы удмурт кылзэ волятыны вуэм. Со ныл милемын удмурт кылын вераськыны выриз. Пӧрме ини, но трос тыршоно на. Ньыль дэремъёс инкуазь материалъёслэсь лэсьтӥсько- етӥнлэсь басма, сюйлэсь но пулэсь весьёс, сӥньысъёс. Вӧзаз комнатаын ик крезь лэсьтӥсьёс тыршо. Сыӵе тыршисесь. Таосызлы ваньзы паймо, ма, конечно, ньыль нунал гинэ ортчиз на, нош соослэн крезьёссы дасесь ини. Буяны гинэ кылемын на. Женя Бикузинлэн выныз та отрядын - Тимур. Декаысь аккустика пасьлэсь формаос малпам. Троссэ соос пӧлысь мукет нылпиос но ужазы кутэмын.

Эстрадаос сцена вылын эктон пукто, фольклоръёс но экто-кырӟало. Соослэн Бобя-Учаысь "Арганчи" ансамбле ветлӥсь нылзы вань, со арганэн шудэ. Ваньзы, ваньзы марке но даурто, тэк уг пуко. Соос ужаны лыктэмын ук. Мӧзмыны дырзы ӧвӧл.

Толон, пе, туж нассыщенной нуналзы вал. Фотокросс, кырӟанэс сценалы пӧрмытон но концерт. Нылпиос туж жадиллям, котькуд отрядтӥ ортчыку толло нуналзэс веразы. Со понна вожатойёслы капчи - пиналъёс уйин уг алякто ни, изё. Вожаойёс но нуналаз 3-4 час сяна изьыны уг сюры. Уйёсы планёркаосын пуко, вуоно нуналэз малпаса пуко. ӵукна нош вазь султо ни. Ымныръёссы жадемынгес ини. Нош зато кӧня выль эмоциос...

"Шундыкаре" трос пол вуылэм ныпиос асьсэзыс шаплыгес возё, кӧня ке кизилимон сямзы но адӟиське ни. Нош мукетъёсыз востэмесьгес на, выль адямиослы, специалистъёслы дышыны выро, каллен висьыны усё. Сменалэн пумаз соослэн виръёсазы удмуртлык нимо вирус ветлоз ни.

Мон но луысал кӧня ке вожатой. Адӟысал, кызьы "Шундыкар" нылпиосты удмуртомытэ.

Хы! шуиз Софронов.

Тужгес но устоез отряд-  суредаськоон но Миша Николаев. Нылпиос комиксъёс суредало.

Чильтро вожатойёс. Крестьянинова - тыл. Мукетыл Алина - йӧл. таосын уд мӧзмы.

Литеераторъёс. Туннэ мырдэм-мырдэм шунды потӥз.

Тимур крезьзэ лэсьтэ - декаяз чорыг вандэмын.

Берпумети 10-ти. Чем-Куюк

10-ти нунал.

Тани туннэ арт-экспедицилэн берпумети нуналыз. Вазьгес султим. мастер-классъесты нуисьёс жадемын ни. Тани жоген луоз берпумети концерт но ми бертом гуртэ. Котькуд уй гань-гань изьыли, но туннэ чукнапал сайкалляй.

Чем-Куюк гуртын туж трос пичи пиналъёс вуизы. Бадзымъёсыз полысь чиньыен гинэ лыдъямон.

Сиськеммы бере, милемыз Ключевка гуртэ нуизы. Юри Азамат пыр потыса, бусыти котырским. Татысен но, мукет матысь интыосын но Четкер вырйыл адзиське. Со королева кадь, вылиын пуке но гуртъес шоры учке. Ключевка гуртын вуж куашкам черксэс выльдо, выльысен пукто. Со черк Голюшурмаысь ваемын вылэм, 1903-ти арын усьтэмын. Нош 1937-ти арын сое ворсаллям но колхоз складлы пормытиллям. Али куашкам вуж черклэн фундаментэз вылын сыче ик черк пукто: пулэсь, жужыт, кузь, куинь люкетэн. Возаз кирпичлэсь колокольня гинэ ватсамын на. Али валтись куполэз жутэмын ни, нош пушсэ лэсьтоно на, колокольнязы но жыные гинэ жутэмын на.  Но ужасьёс веразы, таяз арын валтись залаз служба ортчоз ни шуыса.

Гуртын ик, но таиз черклэсь палэнынгес мукет черк жуто, фундаментлы музъем гудэмын ни. Татын службаос огшоры нуналъёсы, пе, ортчозы, нош сояз - Быдзым нуналъёсы гинэ. Азьланяз монастырь но лэсьтозы на, пе. Сыче усто проект. Выль пуктиськись черк возын восям ошмессин но вань, солэн кошкись вуосыз тыметэн чыпемын но писпуосын котыртэмын, нош гуртысь потыса, паськыт бусыосы сюриськод. Чебер инты, пересьмыны татчы монастыре лыктоно, пе.

Азьлань сюресмы Кузьымвыр пыр кошкиз. Та гуртысь егитъёс полын трос тодмо адямиос. Дима Иванов, Елена Елькина но солэн братэз, Алина Антонова.

Милемлы веразы гуртлэн нимыныз герзаськем кык мадёс. Нырысетиез: гурт котырын паськытэсь буыос но умой музъем. Ас вакытаз татысь колхоз туж узыр  вылэм. Гурт кузя умой му - соин ик Кузямувыр. Кыкетиез: гуртоос ог-огзылы кузьымъёс лэсьтыны ярато вылэм. Кузьымъёссэс шур кузя но лэзьяса шудылиллям. Та палъёсын трос вуос, быдэс Удмуртиын кадь ик.

Кузьымувыр Четкер гурезьлэн выжыяз интыяськемын. Четкер - со, иське, выли инты. Татын ог-огзы борсьы, тубат кадь, ньыль Четкеръёс кошко. Пичиез- Нырысети Четкер, собере Кыкети, Куинети но Ньылети - самой выли точка, Алнаш ёросын, таос сяна, Четкеръёс овол ни, пе. Ньылети Четкер йылын чурак пужымъёс мерттэмын. Азьло школаын дышетскисьёсты юри нюлэс мерттыны нулло вал. Кыдёкысен со нюлэс вырйыллэн шляпаез кадь адске, яке бокс амалъя чышкем йырси. Жади тубыса, ваньзы жадизы, но жалянэз овол. Кыче чебер суред татысен усьтиське, почти вань гуртъёс адзисько: Азамат, Кузямувыр, Чем-Куюк, Варзи-Ятчи.

Огпол, пе, гурезь йылэ тракторист трактореныз ик тубем но врйылысен гырыса улие васькем. Ми сое тодыса, паймим, кызьы со таче меч гурезьысь васькыса, улэп кылем на шуыса. Монмырдэм-мырдэм гылзыса туби но, васьки но. Четкер гурезь выжыын азьвыл концерт но пуктыло вылэм. Артистъёс гурезь улын, чошкыт интыын, экто-кырзало, нош учкисьёс гурезе ик пуксё, амфитеатрын кадь, нокыче пуконъёс но кулэ овол, шобрет волдид но пуксид.

Нош ик бырем гуртъёс сярысь. Азьвыл тати туж трос зуч гуртъёс вылиллям, но раскулачивание кутскем бере, зучъёс кошкылын кутскиллям, озьы гуртъёссы но быриллям. Кузямувырын но одиг ульчаын зучъёс гинэ улиллям вылэм. Но зучъёс сокем ужасесь овол бере, тросэз кема чидамтэ лэся. Ошмессы но соослэн зуч ошмес шуыса нимаське.

Четкер гурезь мышкын бигер гурт вань. Отысь вузаськисьёс Кузямувыре ветло вылэм. Али но магазин азязы бигер гуртысь одиг пиосмурт, яблок вузаса, пуке вал.

9-тӥ нуналаз Чем-Куюкын

Чем-Куюке толон уйин вуим. Милемыз сюдӥзы но изьыны выдтӥзы. Нырысетӥ гурт, кытын милемыз пумитан гурен оз эркиялэ.

Татын ми изим школаын, матъёс вылын, ог-огмы борды ӝиптӥськыса. Мукет нуналаз нырысь ик милемыз гуртэн тодматӥзы. Удмурт кылын дышетисьлы Елена Герасимовналы тау вераны кулэ. Со милемлы, гурттӥ вамышъяса, мар гинэ ӧз мадьы. Тапочка урамтӥ тубыса, кытын ӵыж выль школа интыяськемын, ми мынӥм ошмес доры. Азьло мисьтаськон машинаос ӧй вал, гуртоос толалтэ бере ошмес доры люкаськылӥллям но ошмес дырдыын мисьтаськылиллям. Черодэн, пе, кышномуртъёс сыло вал.

Лудорвайысь тӧлвукоез тодӥськоды, дыр. Со но Чем-Куюкысь нуэмын, музее 1992-тӥ арын вуттэмын. Владимир Романов, та гуртэ вуылыкуз, бӧрдса сямен, пе, шуиз: утелэ тӧлвукодэз, сётэ кытчы ке но. Нылпиос тӧлвуколэн бурдаз пуксьылӥллям но бергаллям. 10 адямиез но бурдыз ӝут вылэм. Со тӧлвукоез  пуктэм Федор Ефимович Драгомиров 1912-тӥ арын. Со узыр крестьянин вылэм, аслэсьтыз ужзэ нуэм. Но Совето Союз дыръя соосты раскулачитьтӥллям. Фёдор Ефимовичлэн сюлмыз кутыса кулэм. Семьязэ Дальний Восток пала лэзиллям, но соос отчы вуиллямтэ, Свердловск улосвылэ улыны кылиллям. Берло ини семья берен Чем-Куюке берыктӥськем. Но Драгомиров семья Фёдор Ефимовичлэсь ужзэ азьланьтӥллямтэ ни.

Ошмес дорысь ми тубим Никонов Андрейлэн ульчаяз. Рублевка, пе, шуо. Отын узыр адямиос уло. Зэм но бадӟым но аспӧртэмлыко коркаос сыло татын. Нош кыӵе узыр гурт, котьмаин: садъёсын но, коркаосын но. Уйпал ёросъёсысь вуыса но озьы мыным потӥз, дыр, но со зэмзэ озьы.

Берен школае вуим. Милемлы школалэн гуждораз ӝук пӧсьтӥллям, зарни песяйёсмы пыжиськемъёс вайиллям. Инкуазьын ваньмыз ческыт кошке. Ӝӧъёс кызьпуос улын сыло. Та кызьпуос вуж школа азьын мерттылэмын вылэм, соослы 60 ар пала ни.

Берло Богданлы клип сниматьтӥзы на. Влад Степановлэн сомында ужез луиз. Кӧня соослэн котьмар лэсьтыны мылкыдзы. Паймисько таослы. Котькуд гуртын пичиен-пичиен клип люкетъёсты сниматьтӥзы. Экспедициысь ваньзэ-ваньзэ басьтыны выризы. Мон гинэ оломар кари кадь.

Уг оскиськы, ӵуказе берпуметӥ нунал ни шуыса. Азьвыл нуналъёс но ӧй вал кадь. Но таӵе экспедициос кулэ. Тон адӟиськод одӥг калыклэсь пӧртэм культураоссэс, сям-йылолъёссэс, вераськонъёссэс, музъемзылэн аспӧртэмлыкъёссэ. Всё-таки кулэ гажаны писпулэсь котькуд вайзэ. Писпу одӥг ваен писпу ӧвӧл ни. Со веськрес, чебер, узыр трос вайёсын, куаръёсын но емышъёсын.

Драгомировлэн пызь возён складэз. XX-тӥ даурлэн кутсконаз пуктэмын, али ке но сылэ на. Уд щуы, солы 100 ар ни шуыса.

Пиналъёс вал вылын ворттыло. Берло со пичи пиез адӟим, кызьы со вал вылын огназ Шумахер кадь ворттыса кошкиз. Синмаськымон.

Чем-Куюкын ошмес ву кык пол ӵыпемын.

Иваново-САмарс 8-тӥ нунал.

Туннэ концерт. Туннэ Надя Николаева сниматьтӥз. Туннэ ми кошкиськом ни, берпуметӥ гуртэ.

Мон итератураен мастер-класс нуыны кулэ вал. Но одӥг гуртын но пиналъёс гожъяськыны ӧз лыктэ. Сыӵе учыр пиналъёс пӧлын. Соин ик ветлӥсько шыль-мыль, ачим огнам гожъяськыса пукко. Аня Образцова ужтэк ветлэмме адӟиз но, ойдо, пе, модель лу. Ми тонэ суредалом. Пуки борддоре но куд-ог дыръя нылпиос шоры учкыса. Соос пичигес на, оин ик дышетыны шуг, интыязы пукыса жадё.

Берло Богдан сьӧры фольклор бичаны калъяськи. Лисаапайдоры куное мынӥм. Но солэн коркаез пытсамын вал. Соин ик мыним Веркапай доры. Алина Черновалэн двоюродной апаез Кати Коротаева туж быгатэ пересьёсын вераськыны. Ачиз но трос пол экспедициосы потамын но. Пайми, песянайъёсын огкыл шедьтэ. Мон озьы уг быгатӥськы. Мон сурасько гинэ соосты.

Берло Лисаапаез но шедьтӥм. Со сандыкысьтыз  киужъёссэ потӥз. Яркыт, чебер, усто.

Концертэ, конешно, бадӟым адямиос вуизы. Муниципал кылдытэтлэн йырыз, Пчи Пургалась но кин ке но. Ма тани-тани быръёнъёс вуо ни. Пичи Пургалан гинэ озьы кадь, пользуются, пользуются моментом. Ми но концерт пуктыкумы ми доры вуизы вал соос. Сюлэм уг чида, так ке.

Самой тос калык татын люкаськиз. Быдэс зал, ваньзылэн синъёссы ӝуало, зол чабизы. КУзьымъёс но сётъязы.

Концерт быриз, автобусмы вуиз. Келяны туж задор келязы. Ур-вар. Сектаса-кырӟаса-бӧрдыса.

Иваново-Самарск. 7-ти нунал.

Тани сизьымети нуналзэ ни артэкспедиция сюрес вылын. Вуоно гурт- берпуметиез. Жадем но ымнырын адскыны кутске ни. Озьы ке но Иваново-Самарскын зигар кытысь ке но потэ на.

Чукна сиськеммы бере мыним Соловьёвъёслэн семьязы доры куное. Туж мыло-кыдоесь. Перепеч дур кутыны дышетским. Пиос гур эстизы. Гуртысь егитъёсты ожыт маин паймытыны луэ шуыса, кин ке но керзегъяськиз. Ваньзы бон перепеч кутыны быгато ни, конешно. Озьы ик гын сапег но енгитъёс полысь кин ке лэсьтыны быгатэ, нош ки ке но уг. Перепеч кутонэн кадь ик учыр.

Собере нош ик мастер-классъёс. Мукет гуртъёсын чошатыса, Иваново-Самарскын нылпиос мастер-классъёсы тросгес лыктизы. Тросгес но покчиесьгес. Таня Тихонова но Лиля Леонтьева дорын нылпиос Урам эктон ик эктыны тырмо. Сётаки лымшорын гуртъёс тросгес, узыргес но улэпесьгес. Уйпал гуртъёсысь ульчаосысь сомында калыкез ой адзылы, коня татын.

Ужамзы бере Алина Черновалэн семьяезлэн пасекаяз вуылим. Кемалась буханкаен ворттылэм вал ни, ностальгия. Тодисько на, кызьы пораськисьёс ужасьёслы бусые буханкаен сиён нуллизы. Мон, пичи марке, соос сьоры калъяськыли. Пукиськод буханкаын, инты трос, нош укноти бусыос, нюлэсъёс ортчо.

Футбол шудыны кытысь меда кать потиз на.  Шудыса вань жадемме лэзи но иземысь сайкай кадь. Нылъёс берло кезьыт вуэ пыразы на. Тыметысь вань чипейёсты но пасекаысь мушъёсты шузимытыса кельтим дыр. Туж чебер инты - пасека нюлэсэн котыртэмы, ошмес чыпемын, пичи корка, уха, компот, льомпуос но гуждор. Шудоесь, мар кулэ на.

Пузкар киное но трос гинэ калык лыктиз.

Мыным кельше татын, Пичи Пурга ук, аслам ёросэ, соин но дыр.

Иваново-Самарск. 6-ти нунал.

Толон Иваново-самарске жыт вуим. Шунды пуксемын ой вал на, скалъёс берто вал ни. Милемыз Алина Черновалэн семьяез пумитаз. Алина ачиз но удмурт дэрем дисяз. Соку ик тодмай Пургаез: ми палани пичи дырысен удмурт дэрем нулло, Пасха дыръя куинь аресъемъёслы но удмурт дэрем вуро. Сюкасьсы но портэм вал, компотсы но кинлы ке интыяз кошкиз. Быгато пумитаны. Быдэc арня, пе, милемыз пумитаны дасяськиллям.

Кык корка интыяським. Ваньмыз кыче ке но шуныт, куанык, аслам гуртам кадь. Мунчо бере, гурт клубе позыръяськыны потим. Кемалась эктэм вал ни, эшшо ке на гурт клубын.  Шумпотыса мыни, жадьытозям тэтчай. Одиг коркан изисьёс милесьтым вазьгес изьыны кошкизы. Ми Коротаева Катаяез келяса гурт кузя кошким.

Пеймыт. Гурт шур дурын майыгын пуксемын. Котыр нюлэс но вырйылъёс. Туннэ кот, соин бус волдиськемын. Иваново-Самарск кык гуртэз герза - Ули но Вуж Постол. Клуб, магазинъёс, школа, садик Ули Постолын интыясько. Нош Катя улэ Ули Постолын. Шур вамен потыса ми тубим вырйылэ. Бусыти вамышъяса Иваново-Самарсклэн одигаз выли точкаяз тубим. Татысен быдэс гурт адзиське. Мон малы ке та гуртэз Адлер палъёслы кельшыти, бусэн йырин-а мар-а, со пыр нюлэслэн но вырйылъёслэн гожъёссы  но гуртлэн пиштись тылъёссы гинэ адскылизы.

 Куке но гурт котырын сомында гуртъёс матын шокало, нош отын сомында колхозъёс ужало вылэм. Нош али Иваново-Самарск но "Югдон" колхоз гинэ на. Кирпич завод но вылэм. 60-ти аръёсы колхозъёс ворсаськыны кутскиллям, нош гурт калык мукет азе кошкем. Озьы быремын Рождественское, Кубыста гуртъёс.

Вырйылын кема ом улэ ни. Нош шур улие ваьскыса, шурвамен потыса, Вуж Постолысь Ули Постолэ вамыштим.

___________________________________________

http://kudymuly.blogspot.ru/2014/08/blog-post_43.html - Артэкспедициялэн емышез.Эгра ёросысь Кабачигуртысь Дарья Лекомцева удмурт кылын блог усьтиз. Нош мылкыдыз кыче бурдъяськемын.