Антиутопия кыӵе ке

Али ми, зэмзэ ке, поистине исторической дыре улӥськомы. Мар луоз азьланяз? Кыӵе государственной строй воштоз та "мнимой" демократиез? Сётозы на-а шокчыны блоггеръёслы (мон али шуисько зэмос блогеръёс сярысь, кудъёссызлэн малпанъёссы обществолэсь малпанъёссэ воштыны быгато, кудъёсызлэсь кышка Правительство)? Нокин но та юанлы валэктон уг тоды.

Ну ярам, тодамы ваём Вангаез, тайзэ ваньзы тодо, дыр. Со шуиз вал, Путин вакытэ луоз война, но Россия отын вормоз. Эшшо, пе, Россиын калык нырысь Президентсэ, сӥлы карыса, карлудъёсы потоз. Нош собере кутскоз граждан ож, малыке шуоно калык акыльтоз та системалэсь, кытын государство нокинлы шоканы омыр, лобаны эрик уз сёты ни...

Мистикаысь табере литературае выжом. Эше вераз вал "Время сэконд хенд" книга сярысь. Сое гожтӥз Светлана Алексиевич. Дэмласько та писателен интеврвьюез лыдӟыны.  "Время сэконд хенд" - со "Красный человек. Голоса утопии" сериысьтыз берпуметӥ (5-тӥ) книгаез. Эше верамъя, автор анализириоватьтэ дуннеын али кылдэм югдурез. В итоге: Россия ӝутскоз, вань кунъёслэсь кужмо луоз, нош, дыр ортчыса, трос люкетъёслы пазьгиськоз. Мон малпамъя, улосвылъёсын адямиослэн самосознанизы шуныт шыкысысьтызы потоз но, али улонлэсь зэмос ымнырзэ адӟыса, Азьмуртлы пумит султоз. Озьы, нырысь, кылсярысь, Чечня   бунт ӝутоз, собере Татарстан, берло оло Удмуртия но. Татын юан кылдэ: кыӵе основания улосвылъёс асьсэлэсь государствозэс кылдытозы. Уз луы-а меда со основание йӧскалык бордын? Нош ик берытскиськом отчы, мар бордысен  азинскыны кутске котькуд государство. 

Али  Ижкаре вуылӥзы туж тодмо оппозиционеръёс, журналист расследовательёс. Григорий Пасько, Алексей Симонов, Галина Сидорова, Елена Масюк, Игорь Корольков. Тӥляд со нимъёсты кылэмды ӧвӧл ке, (куд огзэ коть вань, дыр, всё-таки), но оске мыным, со кадь бадӟым журналистъёс, особенно али пророссийской дыре, ӧвӧл. Со, дыр, берпуметӥосыз пӧлысь, кудъёсыз дӥсьто на П-лы, мерлыклэн куэм малпанъёсызлы но кунлэн сиситемаезлы пумит кылзэс вераны. 

Соос ваньзы сямен шуо: госудасртво котькытысь утча иностранной агентъёсты, Журналистъёслэн фондъёссылы уг сёто уксё, пӧртэм огазеяськонъёс кунгож сьӧры ужало шуыса, судэ иск сёто, оппозиционеръёсты пытсэт сьӧры пукто, яке воксё виё (Борис Немцовез ватон ужрадын, кстати, Ксения Собчак доры кышномурт лыктэм но шуэм: "Ты - следующая!") Блогъёсты пыр учкыса уло (по ключевым словам мониторитьто). И тӥ малпаськоды, Интернетын эрик вань шуыса? Усьтэ грани.ру оппозиционной интернет-порталэз, уд ик быгатэ - заблокироватьтэмын. Блогеръёсты экстремизм но национализм (таиз улэ удмурт блогеръёс точно сюрозы) понна пытсало. Матысь дыре, малпасько, интернет но быдэсак государстволэн кияз кутэмын луоз, мкш иностранной порталъёсты ворсалозы. Кызьы Китайын - отын ведь уг тодо гуглэз, отын асьсэлэн, западлэсь котыртэм интернетсы. И ми, удмуртъёс, асьме кылынымы гожъяськыны ум быгатэ ни - малыке шуоно государственной кыл - ӟуч. П. удмуртэз уг тоды ук. Да и со но куке но кулоз ни. 

Антиутопия кыӵе ке. О. Хаксли "О дивный новый мир", Е. Замятин "Мы", Д. Оруэлл "1984", Р. Брэдбери "451 градус по Фарингейту"... улон со.

:-)

Огъяулонниын оломар но луэ. Куддыръя удмуртъёсты  адӟемпотостэм каро. Ачим мон сыӵе учыре ӧй сюры на, ну и умой. Жугиськыны кутскысал, дыр. А так, уг валаськы, кыӵе шузи кулэ луыны таӵе кылъёс верась адями:

"Мне не нравиться удмуртский. И когда я в комнате - не разговаривай на нём! Или хотя бы не по полчаса!"

Ммм? При том со адями журналист, кудӥз ужалоз кыӵе ке газетын, куддыръя гожъялоз пересь нэнэйёс сярысь но пӧртэм йӧскалык адямиос сярысь. Со журналист тодэ этикаез (туж оскисько). Со журналист тунсыкъяськись (туж оскисько), но,  пӧртэм культураосты пыӵатыса, будӥсь, визьмогес луись, дыр.

Со вуоно журналист доры, комнатаяз, мон эшшо 3 удмуртъёсты интыясал на. Визьмогес мед луоз шуыса.

Зэмос лул. Кытын тон?

Кыӵе со туала удмурт нылаш? 

"Эль ныл" фестивальын Татьяна Москвинаен вераським. 

- Блогеръёсын календарьдэс учки шуэ. Кытын тон,  Татьяна Москвина шуиськод отын - шуэ Татьяна Никитична мыным. - Сюлэм ик шумпотӥз та темаез ӝутэмед понна. Нокин но азьло озьы открыто ӧз вералля на со сярысь. Уд кышкаськы.

Мон дыг-мог луи. Мар вераны ӧй вала ни. 

"Та выллем фестивальёс но куд-ог адямиослы акыльтӥзы вал ни. "Гербер" отын арысь аре, весь одӥг кадь ортче, нокытчы но уг буды. Нош татын маиз ке но мукет вал: "Герберлэсь" трос лёгетлы вылынгес. Но сизьым ошмес йылтӥ нуллӥсь нылашлэн "чилясь" дэремез... Кытын тон, Татьяна Никитична Москвина? Шарканын тонэ уг тодо меда?"

Та гожтэме ласянь вераз Татьяна Никитична. Мон, шуэ, Шарканэ ачим но вазиськылӥ,  тӥледлы шаркан сямо удмурт дэрем вуро шуыса. ӦЗ КЫЛЗӤСЬКЕ, ПЕ. Кыӵе чебер шаркан дэрем, нош соос ялан со чилясь дэремъёссэс вуро. Котькӧня вера, но адямиос уг валало.

Бен, кӧня эн вера, но адямиос уг валало, кыӵе синмез сутэ чилясь стилизованной удмурт дэрем. Огшорыгес, удмуртлэн лул инкуазезлы матынгес луыны секыт лэся.

Тани "Эльнылэ" вуиз Пермьын "KAMWA" фестивалез радъясь Наталия Шостина. Со, пе, фестивале вуи вазьгес, соку нылъёс буясько на вылэм. Вот, шуэ, юасько, пе, модалиослэсь: "Удмуртъёслэн кыӵе естественной буяськемзы?" Яке шуом, кызьы азьло удмурт нылъёс буялляськизы. Нылъёс, пе, шугомизы но веразы ик, удмурт кышномуртъёс уг буясько вал шуыса. "И малы иське тӥ али синлысъёстэс буяськоды но ымдуръёстэс наштаськоды?" - юай, пе, нылъёслэсь Наталия. Риторической юан, ыы ведь.

Ваньмыз фальш, эрико ымныр ватэмын маска сьӧрын. Сю полэс туала дӥськутъёс улысь уд шедьты ни чылкыт, номырин ватымтэ но саптамтэ зэмос лулэз. 

"Инвожо" сярысь

Вот кутӥсько киям "Инвожо" журналэз. Шумпотыса кутӥсько - татысь тунсыко материалъёс лыдӟыны луоз шуыса: литература, крезьгур, улон сярысь. Бамъёссэ берыкъяны кутскисько но, уг валаськы, куд пала вамыштэ журнал.

Солэн собыдӟа потенциалэз. Потэ, шуом, толэзьлы огпол, кӧня дыр вань ӟечлыко материал лэсьтыны, пӧртэм удысъёсысь маке тунсыкозэ шедьтыны, мае уг тоды визьмо лыдӟись. Туала лыдӟисьлы мыд-мыд журнал кулэ, сое лыдӟыса лыдӟисьлэн лулыз мед буръяськоз, буш медаз кыльы. 

Егитъёслы журнал шуыса нима со ассэ, азьло художественно-публицистический вал на. Али малыке ӧвӧл ни, озьы али пусйысал на ке, мон пӧсекъясал, дыр, журнал бамъёсысь публицистикаез шедьтытэк. 

"Udmurt image" ӵектоссы сярысь кӧня ке кыл верам потэ. Проект туж тунсыко, ыы ведь. Соглаш. Но кызьы со быдэстэмын!. Кылемаз Журналлэн вылбамысьтыз Алексей Пикулевлэсь ымнырзэ адӟыса, мынам сереме гинэ потӥз. Кызьы, Инмаре, со Амань Олёш, кудзэ мон сомында аръёс ӵоже тодӥсько? Кытын солэн аслаз стилез? Кытын солэн тур-пар штанъёсыз но реп стилез. Солэн со стилез вань ук, мар кариськод тон пиосын Никита Ильин!

Вот, ӧд тоды ке, Ваня Белослудцевез но Алексей Пикулевез улонын, но соосын та журналын гинэ тодматскысал ке, малпасал ас поннам: "Ну, и маин соос ог-огзылэсь пӧртэм луо?" Ладно, Ваняез кызьы но озьы тодмай ик, нош Олёшез - ой!Эшшо та проектлэн мукет палыз вань на ук. Со - интервью. 

Пыр-почгес, ӟечгес со интеврьюез лэсьтыны луэ, дыр, малпасько. Тунсыкогес отын, кыӵе ке изюминкаен. Татын мукет интеврьюоссы сярысь но вераны кулэ. Вот лыдӟи мон Александр Шломанэн, Дмитрий Корепановен интервьосты, но сыӵе осадок кылиз, будто та материалъёсты чаляк гинэ лэсьтӥзы, вот кылиз одӥг час, кулэ номерез поттыны. Авторъёс нош кыштыр-кыштыр гинэ юалляськизы но асьсэ пыр поттытэк гожтӥзы. Кӧты ӝож луэ. 

Ма малпасько, азьло "Инвожо" пыр-поч лэсьтӥське вал кадь. 2000-тӥ аръёсы туж кужмо литреатурной критика но вал, пӧртэм удысъёсысь материалъёс но вал. Школаын дышеткыкум лыдӟылӥсько вал. Али но, юри,ӵошатон понна, поттӥ кровать улысьтым 2006-тӥ аръёсысь журналъёсты. Огласянь зӧкгес но вылэм, материалъёсыз но трос пумо темаё вылӥллям. Лыдӟисько, но шумпотко. 

Нош табере уг тодӥськы. Да эшшо дизайнэз ласянь. Точечно сыӵе кинлэн ке вкусэзвань, одӥг бамаз умой дизайн, нош мукетаз оскем потэ. Д и мукет аръёсы потэм номеръёсын но со проблема шӧдӥське. Усьтом берпуметӥ номерысь 56-тӥ бамез. Текстэз туж тунсыко дизайнэн пуктэмын, нош туспуктэмъёсыз ваньзэ портитьто. Ӟечгес соосты пуктыны луэ ук. Миша Николаевлэн суредъёсыз туж сюлмыя, туалаесь соос. 2-3-тӥ бамъёсысь материалэз вообще лыдӟем уг пот. Что за пичи пиналлы кадь дизайн!

Дыр то мынэ, улон то азьлань кошке. Толэзьлы одӥг пол потӥсь журналлы, малпасько, котыр ласянь ӟеч луыны кулэ. нош али, кызьы мыным потэ, журнал лэсьтӥське школаын дышетскись егитъёслы. Так, соослы ярам шуыса. Мыным тунсыкогес лыдӟыны азьло аръёсысь номеръёсты. 

Всё. Табере аслам гожтэме сярысь кыл вералэ. 

Ярдуртэм нюлэс

"Ватка" театре мон 1-тӥ курсын ачим но ветлыны кутски вал. Школа дыръям ми постановкаос пуктылӥськом вал бере, туж потэ вал та хоббиме азьланьтэм. Но малы ке ӧз пӧрмы отчы кыльыны, иське, улонам мукетыз гажаноезгес уже вал.

Тани 3 ар учксько ни мон "Ватка" театрлэсь шудэмзэ. Котькуд ар ветлӥсько постановкаязы, котькуд ар учкисьёссылэн лыдзы уг буды. Маин со герӟаськемын? Культураентунсыкъяськись удмурт егитъёс пумен быро, лэся. Ледниковый период сыӵе.

Котькуд ар та театр кыӵе ке выль амал шедьтэ. Озьы ке но одӥгез уг воштӥськы: котькуд постановка поэтической ӧртӥ кошке. Василий Серафимович Ушаковлэн, режиссёрзылэн, сыӵе лулыз ни, лэся. Солэн котькуд адӟытонэз ненег, кырӟась, югыт. Тодады гинэ вае "Матӥ но Марданынсь" Матӥлэсь чылкыт лулзэ. Со шоры учкыса, син азе пуктӥськод ненег тылобурдоез, кудзэ бордаз йӧтскыса гинэ вӧсь карод кадь. "Солдатъёс ке кошко" поэтической адӟытонын войнын матысь адямиоссэс ыштэм кышноослэн кайгыронзы возьматэмын вал. Татын но героиняос чылкыт лулоесь.

Со бордын ик Ушаковлэн постановкаосызлэн кужмыз: егит артистъёс шедьто кадь кадь огкыл егит сюлмо режиссёрен. Но "Ватка" театр уг пӧрмы классической театрлы, со луэ экспериментальной актёръёслэн шудэмзы но, адӟытон пуктэм ласянь но. Соосты учкыса лул ик шутэтске, мкш со - мукет.

"Ярдуртэм нюлэс". 4 чебер нылъёс, нюлэс нылъёс. Постановка пыр потэ одӥг малпан: туннэ тон нырысьсэ сайкад.  Котькуд нунал - сётэ марке выльзэ. Котькуд нунал нюлэс нылъёс маин ке но пумисько, шуг-секытъёсын но шумпотонъёсын пумисько.

Та адӟытон Лариса Ореховалэн кылбуръёсызъя пуктэмын. 20 минут куспын нылъёс трос мылкыдъёсты возьматӥзы. Я соос ненег нюлэс нылъёс, я соос гозыосын керттылэм лулъёс, я соос сьӧд кужымъёс... Та потсановкаын та дунне вылын улӥсь вань мылкыдъёс сураськизы кадь, но зир-зир бергаса огазеяськизы.

Адӟытон вал минималистической. Реквзитъёссы ӧжыт, но котькудӥз соослэн асьсэ пуштроссы вал, асьсэ кужымзы. Басмаослэсь лэсьтэм тряпкаез адӟыса, но сое син азям лулоен пуктыса, мугор ик юзыр-кезьыр луиз.

Ярдуртэм нюлэс - пумтэм дунне, кытысь ваньзэ шедьтыны луэ, кытын котькуд адями котькин луыны луэ. Нош тон котькуд нунал выльысен сайкаськод, но котькуд нунал усьтӥськод ярдуртэм нюлэслэсь выль писпузэ.

Тау, "Ватка" театрлы, тау Лариса Ореховалы, таӵе аспӧртэмлыко адӟытон понна.

Дуэ

Удмуртъёс ноку но верблюдэз адӟылэмзы ӧй вал. Соин ик али верблюд шуонзы - "дуэ" - искусственно малпам кыл. Но кытысь со потэмын то?Туннэ дото зл серекъяй, куӵыктыны ик кутски.

Верблюдлэн дуэ видэз,пе, вань. Кыӵе ке но визьмо удмурт адями верблюдлэсь видъёссэ изучатьтӥз но, малпаз, лэся, верблюдэз удмурт сямен ӟуч кылын дуэ шуыны. Могдос.

Динаен учыр

Дина (2,5 аресъем нылаш) адӟиз лымы улысь потэм жуг-жагез. Мамаеныз садикысь гуртаз бертэ. Сюрес дурын канфет бумагаос.
- Мама, мар со? - жуг-жаг шоры возьматыса юа.
- Бумагаос, пичие.
-Канфетлэсь-а?
-Ы-ы.
- Кин сое татчы куям? Какакъёс!

Пичи пиналлэн но кыӵе культураез ни. Канфетсэ но усьтэ ке, бумагазэ котьку жаг куян ведрае куштоз.

Алексей Иванов

Ваньзы возьмазы Алексей Ивановен пумиськонэз. Реклама но сокем ӧй вал, нош люкаськиз быдэс зал.

Книгаосты лыдӟыса, тон азе пуксе авторлэн ымнырыз, сямыз, оглом, -  тусыз. Телевизор пыр возьмато но, тон малпаськод:
- ооо, кыӵе со классный, пумиськысал соин, вераськысал соин.

Но тани, со вуэ тон доры (яратӥсько Ижкарез таӵе луонлыкъёс сётъямез понна). Тон мынӥськод со доры, кылзӥськиськод сое, но валаськод, умойгес луысал, мон тонэ та улонам ӧй адӟысал ке.

Мон жаляй, сое адӟи шуыса. Зэмос Алексей Иванов ӧз тупа мынам йырам кылдэм Алексей Ивановлэн образеныз. Уг тодӥськы малы, но со мыным вылтӥяськись потӥз. Огласянь, ваньзы шуо, со огшоры вераське, чёкатьтэ, кызьы вераз Удмурточка. Но вань солэн мукет сямыз но. Кызьы, кылсярысь, ужало кык эшъёс-дояркаос. Огез кошке Ижкаре  чорыг сузяны, нош таиз гуртаз ик скал кыскисе кыле. Ижкарын ужасез уз но вераськы ни скал кыскисен. Нош чорыг сузясьлэн маиз гинэ воштӥськиз улоназ? Уксё тросгес басьтыны кутскиз? Озьы ик Ивановен но. Вераське кадь огшоры, яратэ кадь Уралэз, историез, гожъяськонэз, но...улӥысь, сӥтьысь ӝутскем адями шуэ ке, Пермь - сисьмемын шуыса. Пермь, кытысь со потӥз, кудӥз сое тодмо кариз, книгаос кузьмаз. Уг тодскы. Та мынам аслам малпанэ. Мынам сюлмы ик ёркак луиз, солэсь та кылъёссэ кылыса.

- Солэн ӧй вал дышетӥсез. Ачиз дышетскиз.
- Литератураын одӥг произведение но сюлэмзэ ӧз берыкты, кельшисьёсыз вань
- Со аполитичный ӧвӧл ке но, али дырлы ымез ворсаса пукыны кулэ, шуэ. Котыр ваньзы асьсэлэсь малпанзэс шараяло. Соин ик ӧз вераськы Немцов сярысь но.

Одӥг удмурт гожъяськись шуиз, со, пе, пичи калыкъёсты ултӥя.

Со визьмо, вань гожъяськисьъёс кадь, целеустремлённой (литератураын али шоркарысь писательёс гинэ пиштыны быгато, нош А. И. ӝуатскиз), аслаз продюссерской агентствоез вань ни(трос проектъёс улонэ пыӵатыны быгатэ, телевидение кыстӥське). Со аспӧртэмлыко.

***

Азьвыл кылбурасько ук вал. Али тросгес прозаен. Али мылкыдъёс мукетэсь ни, улонэ мукет, учыръёс мукетэсь.

Кылбуретлы кулэ сюлэмез вырӟытӥсь мылкыдъёс, проза вылэ улонысь паймытӥсь учыръёс выдо.

***

Синкабакъёс вылэ-улэ,
умме усем уг лу маке.
укно сьорын туж бер сизьыл,
зор-кот сылэ синъёс азьын,
металлургед сюлмез сьӧдма,
яратонэ ке но буя
мынам кысэм мылкыдъёсме -
та ёрослэсь ульчаоссэ.

Мусо куа

Дэбес ёросысь Лесагуртысь таӵе мадёсэз тодӥ.

Москва, тодӥськод-а малы, пе, озьы нимаське. Удмуртъёс азьло отын со палъёсын уло вылэм - отын, пе, сьӧд музъем чебер нянь сётэ. Ӟучъёс лыктӥзы, пе, уллязы асьме калыкез, удмуртъёс кышкасесь бере. Нош удмуртъёс со музъемзэс Мусо куа шуо вылэм но, ӟучъёс  собере Москва шуыны кутскилля.

Муско - Мусо куа.

Могдос.

Данёгурт

Вот ас понназ гань-гань семьяын кадь улӥсь калык Дэбес ёросысь Данёгуртын. Потӥзы ваньзы клубе - газетэн пумиськонэ. Сӥлы каризы  куке но газет бамъёсы потэм котькуд адямизэз, данъяськизы. Ӝӧк сьӧры тужгес умой инты висъязы. Анайзы - библиотекарь Антонида Хохрякова котькудзэ ушъяз, тыбыраз вешаз, ӟеч кылъёс вераз. Быдэс коркан шуныт шуныт луиз. Эшшо 35 ар ӵоже кырӟась "Купанча" ансамбльзы котькудзылы крезьгуро салам лэзиз на.

Мусо, сыӵе мусо. Мар кулэ на ужась калыклы, ку тынэсьтыд уждэ адӟо но тонэн семьяед даъяське. Номыр кулэ ӧвӧл ни - со шудо луэ.

Нош та клубысь кыре потӥськод но - 15 градус кезьыт. Газзы котькуд коркан ӧвӧл, муръёосысь ӵын инбаме шонер ӝутӥське. Нош клуб азьын лымылэсь лэсьтэм Тол Бабай, кеч но мукет фигураос. Гуртазы нылпиос одӥг-кык - бускель гуртэ дышетскыны ветло. Ма клубе но копак пересь калык люкаськиз. Но татын коть колхоззы вань на. Соин кышномурт кивалтэ - Татьяна Хохрякова. Мужикъёсты интыязы пуктэ, бригадирзы но сыӵе ик: йыг-йыг бадӟым мугоро кышномурт Нина Протопопова. Со эшшо пенсионеръёсын кивалтэ, ужа, гуртаз муш вордэ. Кужмо!

"Шулдыръяськыны" яратӥсь воргоронъёссы но вань. Заллэн берпуметӥ пуконъёсаз пукизы но куддыр асьсэ малпанъёссэс вераллязы. Калык верамъя, ас вакытаз трос, пе, пиос гуртазы кышнотэк кылемын. Пиос корказэс уг кушто, нош кышномуртъёс гуртысь кошко. Ма кин лыктоз ужтэм интые. Таӵе югдур тросаз удмурт гуртъёсын ук. Инфраструктура ӧвӧл ведь гуртын. Тани али валатскозы но, нош ик гурт удыс борды кутскозы. Но кӧня ар ӝтыны вырозы гуртэз? Нош бырем гуртъёсты но улонъёсты уд берыкты ни ук. Кыӵе кужмыз гуртлэн - ассэ гинэ уг, адямиез но быдтэ. Озьы оген кылем воргоронъёслэн ӧвӧл семьяоссы.

Татын Зинаида Рябининалэн кылбурысьтыз чуръёсыз тодэ лыкто:

...Мон асме жаляса ваи одӥг пинал
Табере калыке ӧжыт потэ.

Мукет гуртъёсын кадь, Данёгуртын асьслэн быдӟым адямиоссы вань. Мон шуисько быдӟым, малыке шуоно соос улоназы трос мае адӟемын ни.

Монэ паймытӥз одӥг кышномурт. Сое ожгар дыръя Смоленскысь та палъёсы лэзиллям анаеныз но пичи сузэр-вынъёсыныз ӵош .  Валамон ини, соослэн гуртсы быдэсак сутэмын вал, отын мынӥз ожгар. Эммигрантъёсын поезд, пе, быдэс толэзь Удмуртие вуыны выриз. Тупике пукто, пе, вал, мукет поездъёсты лэзё. Сиён уг тырмы, нылпиос висьыса куло, кулэм нылпиосты станцие куштыса кельтыны косо вылэм (шӧй висёнэз нуэ). Озьы та кышномуртлэн но пичи сузэрез кулэм. Кирове вуиллям вылэм ни. Анайзылы, пе, шуо, кельты кулэм нылпидэ. Валаськоды, дыр, кызьы со аслэсьтыз нылпизэ олокытчы кельтоз. Киров стоянкаын адями шӧйёслэсь быдэс гурезь, пе, люкаськемын ни. Анаез нылпизэ отчы понэ, кошке, сюлмыз уг чида но пиналызлэсь шӧйзэ берен кияз кутэ...

Озьы соос вуиллям, нырысь Кезэ, собере Дэбесысь Данёгуртэ. Ужамын фельдшерен, зор-кот-а, толалтэ тӧласькыку-а - котькыӵе куазен гуртъёсты котыртылэм. Нош азьло транспорт ӧй вал.

Тӥни, соос сярысь романъёс гожъяны кулэ, соослы йыбырттылыны кулэ, нош ми кыӵе ке Аброськинэз почётной гражданин Удмуртии кариськом!

Олокытчы кошки. Дэбес ёросын котькуд гурт - история. Табере валасько, макем узыресь вылӥллям Кузебай Герд но Григорий Верещагин. Нош со учыръёсты ӧд кельты ке, соос адямиосын ӵош кошкозы. Мар кылёз на собере? Сям-йылолъёсмес но вунэтӥськом ни но.

Тау!

Дэбес

Мынам кутскизы гуртъёстӥ калтыртонъёс. Со понна улонэлы тау шуисько.

Нырысьсэ Дэбес ёростӥ мон ортчи Арт-экспедицилы луыса. Пыр потыкумы, мон бадӟым лыз черкез но сюрес дурысь кык этажъем трос квартираё коркаосты сяна номыре ӧй адӟы. Уй палъёсысь огшоры черкогурт, малпай мон соку, - куанер, начар но пичи. Озьы вылымтэ.

Паймоно кадь, маиныз меда Дэбес ас бордаз кыске. Одӥг пол гинэ ветлыса, валасько, отын вань бордаз кыскись кужымез. Шунды Мумыез юнме Дэбес ёросысь ӧз шедьтэ, дыр, ук.
Шедьтӥзы сое Зарни Варни (Варни гурт) гуртысь шайвылысь. IX дауръёсы ик удмуртъёс Шунды-мумыез возьматӥсь пельугыос нулло вылэм ни.

"Куке но вашкала удмуртъёс Инмаръёссылы оскемысь дугдӥллям но Шунды-мумы соослы
шунытсэ сётэмысь дугдэм. Озьы пересьёс Варни нимо пияшез келяллям утчаны Шундыез. Пияш сое гурт дурысь шедьтэм.  Шунды-Мумы сое адӟыса шуэ: мон нокинлы но адӟиськиськы. Нош тон лыктӥд бере, шуо тыныд: мертты пужым -  Инмаренвераськыны, мертты кыз -  куазен вераськыны. Мертты кызьпу -   куазьлы йыббырттыны. Пияш озьы ик лэсьтэм но Шунды-Мумы калыклы нош ик шунытсэ сётыны кутскем".

Таӵе чебер мадёс вань Шунды-Мумы сярысь. Нош Варни - со, пе, шурлэн нимыз. Вашкала удмурт кылын "варни" со, пе, "гурезьёс вискытӥ чукыръяськыса бызись". Варни шур зэмзэ но озьы ик бызе.

***
Зарниысь кырсе выжом. Дэбестӥ ортчемын Сибирь тракт. Пичи дыръям Кедра Митрейлэсь "Сурсву" вероссэ лыдӟем бере, мон син азям пуктылӥ, кызьы куосын шобыртэм бадӟым салазкияз Екатерина II тӧдьы валъёс Дэбес сюрестӥ ворттылтӥзы, нош сьӧраз кортнам сютэм, ӟызы ссыльныйёсты лек военнойёс Сибире нуылӥзы.

Дэбесын пырам Сибирь трактлы сӥзем музее. Со юртын ссыльнойёс кӧлаллям. Туспуктэмъёсты учкылӥсько.
- Кыӵе жаль пото, соос пӧлын ссылкае юнме шедылэмъёс кӧня . - туспуктэмысь ссыльнойёсты адӟыса, ас поннам малпай кадь. Но мыным пумит вазись луиз:
- Соос пӧлын трос йыртэмасьёс вал, злостныйёсыз между прочем.

Буйгастки кӧня ке. Сибирь трактысь потэмын трос визькылъёс. Кылсярысь, "доставить живым или мёртвым". Солэн пуштросэз таӵе. Сюрес вылын адямиос висьыса, жуммыса кулылӥзы. Нош Сибирёзь сюрессы 2 ар кыстӥськиз. Со дыр куспын ӝыныез бригадазы сюрес вылэ ик катьтэммылэ но вал. Нош конвоиръёс котькуд ссыльной понна кыл куто вал, одӥгез но соос пӧлысь медаз пегӟы шуыса. Кулэм муртъёсты "пункт передачиын" гинэ кельяллязы. Озьы одӥг пункт перевалысен мукет пункт перевалозь кулэм муртэз мукет ссыльнойёс пельпум вылазы поныса яке ньыж кыскыса нуизы. Котькуд перевалын бригадаез списокъя эскеро вылэм.

- Кытын Иванов?
- Тани шӧез!
- Ага, ӧз пегӟы, кулӥз!

Нош шӧйзэ ӧз вайысалзы ке, Иванов пегӟемен лыдяськысалыз.  Кинлы ке сюрысал.

Конвоиръёс котькуд пункт перевалаын вошъяськылӥзы. Зураысь Дэбесэ зураос ссыльнойёсты вайылӥзы, дэбесъёс  бригадаез  мукетъёсызлы киысь кие сётъязы.

***
Библиотеказы Дэбесъёслэн вуж коркан интыяськемын - но макем со чебер ай. Кин шуоз,
удмуртъёс азьло пеймыт улӥллям шуыса. Одӥг пичи но озьы ӧвӧл. Собыдӟа корка пуктэмын, сыӵе архитектураен: укноосыз бадӟымесь, улӥын, кыкетӥ этаже тубатъёс... Отчы пыраны кулэ. Жаль сыӵе коркаез куашкатыны, но солэн но дырыз вуоз ни ук. Шӧдӥсько ни, берпуметӥ шокчемъёсыз шӧдӥсько ни.

Дэбес - уйпал удмуртъёслэн центрзы, ваньмыз ласянь. Мон сое валай. Кстати, Варниын азьло удмуртъёслэн карзы вылэм. Иднакар выллем.

***

Администрацилэн кыкетӥ этажаз сылӥсько вал. Укное учки но син азям Дэбес кырым пыдэс вылам кадь пуксиз: коркаос-коркаос, Чупчи шур, Байгурезь но нюлэсъёс.

"Байгурезь йылысен  учкисько тон шоры  Тӧдьы Кам кадь паськыт Чупчи шур". Байгурезь йылэ ӧй туба. Таяз арын фин-угор журналистъёслэн фестивальзы отын ортчоз ай. Ваньмыз азьланяз.

Озьыен, берытско на мон дорад, Дэбес.

***
Кӧня ке туспуктэмъёс.

Север

Андрей Першинлэн "Север" адӟытоназ олокинэз но вал: кореец, удмурт, ӟуч... Соку дядяелэн верамез тодэ лыктэ - ваньзы одӥг тусьтыысь сисько. Ӧвӧл искусстволэн национальностез, со - огазея. Соин ик искусство тулкым вылын веттаськыса тон эрико луиськод, но со дыре ик аслыд шуныт корка шедьтӥськод.

Андрей Першин мон понна, быдэсыз искусство. Азьло мон озьы уг малпаськы вал. Учки куке но 3D берпуметӥ ужзэ. Зэм ке, дото ӧз кельшы вал. Мар малпасько, Першин но Першин. Кыӵе мон янгышай, тӥ уд ик тодӥське. 

Вераськыса сылӥськом.

- Тон вӧзын сыло удмурт блогеръёс, кудъёсыз тон сярысь ярато гожъяны, - вера Лёша Шкляев.

- Да? Вань удмурт блогосфера? - паймиз Першин.

- Да эшшо кыӵе!

Мон пукси пукон вылэ. Соос сылӥзы.

***

Палэнын сылӥсько. "Гагино" кинозэ возьматэмез бере, Першин маке вераны кутске. 

- Отын так ке политической моментъёс но вал, но мон соосты куштӥ. Сталин сярысь пересь трос вералляз. Туж тунсыко арбериос вералляз. Кылсярысь, ми, пе, сое туж гажаськом вал. Нош Сталин кулэм бере, кышкам зол. Милям йырамы уг пыры вал, мар табере луоз странаен. 

Сталинтэк адямиос страназэс уг адӟо ни вылэм, иське. Мон дядяелэсь юалляськи вал куке но Сталин сярысь.

- Тӥ Сталинэз яратылӥды-а?

- Оломар. Шуо, со трос адямиосты репрессироватьтӥз. Мон армиын вал, ку со кулӥз. Горбачёв дыръя туж шимес вал: Афганистанын ожгар... Со вылэ мынам йыры кур, кӧня адямиез быдтӥз, - шуиз дядяе.

***

Чимали бергес вуиз. 

- Азьло ужъёссэ адӟи вал ни. Учкисько но адӟиско, кадръёсаз суредъёсыз аслам кадь. Собере тодӥ, со Кезысь шуыса. Шумпотӥ пушкам.

Чимали, угось, ачиз Кез ёросысь.

***

- На столе есть перепечи, угощайтесь. Друзья испекли, - киноос бырем бере.

- Можно сделать пельмень пати в Творческой даче.

- Пельмени я умею.

- Можем перепеч пати. Мы научим. - висказы пырим ми.

***

- Тросэз мар вань "Город" видеоям, пророчество луиз, - аслы ачиз паймыса вераз Першин.

Паймоно кадь. Крымез, кылсярысь, Россия ас бордаз ватсаз. асэныз огазеяз.

- Мне очень нравится одна фраза на удмуртском. Кин тодэ.

Валаськоды-а, со кыл чырткемесь, ӟеч яке мон тонэ яратӥсько ӧвӧл. Со "КИН ТОДЭ". Макем мур пуштросо адями! Соин вераськем но вераськем потэ.

Кортна, мар.

Тросэз, лэся, малпало, журналистика милям продажной шуыса. Нош блогеръёсты веранэз ик ӧвӧл. Валасько, ӟучьёсыз сярысь озьы малпаны луэ ик, дыр. Но удмуртъёсыз сярысь озьы малпад ке. Да эшшо удмурт блогеръёс сярысь, кудъёсыз пӧлын 4-5-ез гинэ дырысь дыръя гожъясько. 

Шумпотыса гожтысал малпанъёсме ужрад сярысь, кудаз ветлӥ. Но ку тыныд шуо: табере возьмасько репортаждэ, валаськод, ммм, мар понна тон чортӥд монэ. Тон мон борды блогерлы кадь вазиськиськод-а? ... Ми борды таӵе отношение ласянь асьмелэн но виноватмы вань. 

Озьы тӥни луэ, лэся, кортнаны выро эрико блогеръёсты, использоватьтыны. Туала виртуальной улонэ кытын ужрадзы кылёз на, вотэс чуръёсын ӧз кызльы ке. 

Корна, мар, только со кортнамды тӥляд кемалы ӧвӧл. Валан вуоз, сылмоз егит мылкыд. Тау кылэз коть вунэтоно ӧвӧл.

Дядяй война сярысь

Мынам дядяе али улэ огназ. Ну, кызьы огназ. Пичи пиеныз, кудӥзлы 39 арес.

Тодӥсько на, кызьы пичи дыръя дядяй тышкаське вал милемыз кема телевизор учкеммы понна. Куке но солэн корказ тросаз вал нылпиосыз, кышноез, мон сузэреным. Солы со дыръёсы шыпыт корка уйвӧтъёсаз вуэ вал дыр.

Нош али солы кулэ соин вераськись адями, сое кылзӥсь адями. Пуксиськод куддыр вӧзаз, но юиськод солэсь малпанъёссэ. Варсь кадь ческыт но кӧттырмон кошке.

Сои мынам али политикаен тунсыкъяське. Донбассэз учком ай, шуоз но, лэзёз телевизорзэ. Со улоназ трос мае адӟемын ни, соин ик котьку историысь учыръёсты тодаз вае.

- Кызьы меда уло на соос отын? Подвалъёсын ватскыса пуко ук. Армиын служитьтыкум, лини дуре вуим вал. Поезд дугдӥз. Вагонъёсыз тросаз вьетнам сиротаос. США бомбитьтӥз вал кыӵе Вьетнамез. Нош сиротаосты Кубане, пе, нуо. Отын соосты сюдозы, утялтозы, но война бырем бере, берен келялозы.

Украина пыр милемыз Германие лэзизы вал. Кыӵе узыр палъёс вал. Нош али кыӵе бомбитьто.

Армиын котькин вал. Я ӟуч, удмурт,  украинец тон - ваньмы одӥг тэркыысь сиським.

Нош али тэркыын ӝуксы ваньзылы уг тырмы ни. Отысь ик ожмаськон потэ.

Кулэ-а егитъёслы театр?

Сыӵе треш котыр: литература котырын улон улӟиз, валамон, дыр, малы, эшшо - мон понна со вал шуак - улӟе удмурт театр.

Сыӵе ужпум: вань-а егитъёслы театр? Шонергес вераны луоз, вань-а удмурт егитъёслы театр. Тани тодӥськом Паша Зоринлэсь "Les Partisans" театрзэ, "Молодой человек"... Соослэн спектакльёсазы ветлэ вань интеллигенция. Филармониысь пичи залэ калык уг тэры. "Les Partisans" - со маке дуноез Ижкар дуннеын. Туэ со ӧтемын вал Муское "Золотая маска" фестивале пыриськыны. Но:

Минкульт Удмуртии против молодежного театра

МММ? Минкультэз кивалтӥсь куке но вал егитъёсын ужась министр. Кыӵе тунсыко пӧрме, озьы ук эшъёс? Со министр табере кык поллы золгес кулэ вал кадь но культура понна ужась егитъёслы дур басьтыны. Но солы, видимо, дуногес мукетыз? Хых, мар солы дуногес? Тунсыко. Яке эшшо одӥг вариант вань на: министрез Павел Зорин ӧз вала. Таиз вариант скоро вотэсэ вӧлмоз ик, дыр, ку со вуысь чылкыт потон понна муг утчаны кутскоз. Но оске мыным, шедьтоз ук! Но блоггеръёслэн кылъёссы лэчытэсь.

Малпасько, скоро удмурт театр но экспериментальной площадкаос радъяны кутскоз, кытын егит драматургъёс, режиссёръёс но актёръёс лулэз улӟытӥсь бомба лэсьтозы. Егитъёслэн ведь уг поты ветлэмзы со "традиционной мӧзмыт спетакльёсы". Мӧзмыт, малы ке шуоно ӧвӧл отын выль шӧм, ӧвӧл туала даурлэн аспӧртэмлыкъёсыз. Вань театръёсын кадь ик пукто классической спектаклъёсты. Но адями сизьым пол одӥг спектакле уз ветлы ук. Валасько, мынам туганэ старых укладов адями, но со коть котькуд спектакле ветлысалыз, но сыӵе егитъёс ӧжыт ук.

Оскисько мон, вакчяк вераса, егитъёслы театр кылдоз шуыса. Мон ваньзэ лэсьто, мар мынэсьтым кулэ луоз.

Али тодам ваи, кызьы кыкетӥ курсын мон удмурт группаме люкай вал, спектакль кыче ке пуктом шуыса. Дугдӥм "Насток но Исьток" вылын, малы меда туала пьеса ӧм быръе? Шузиос мар. Озьы ик зынмиз спектакльмы но.

Мукет ласянь. Вань ук "Ватка" театр. Соослэн спектакльёсазы кӧня адями ветлэ? И то соос одӥг пол араз спектакль пукто. Одӥг пол! Ӝыны зал люкаське ке, со сыӵе шумпотон ни. Татысь кылдэ юан: вань-а удмурт егитъёслэн культура созидания, лулэз узырмытон культура?

Андрей Першин

Кезысь Андрей Першин Муское кошкем: ужаны но улыны. Озьы ик кошко вань таланто адямиос, оло соослэн лулзы татын пачка, оло луонлыкъёс уг тырмо... 

- Табере уйпал Удмуртилэсь чеберлыксэ Мускоын адӟытӥсько, - шуэ со. -  Анимация вылын трос уг ужаськы ни. Со вылэ дыр трос кулэ, нош мыным асме сюдыны кулэ. Соин видео вылэ выжи. Но али заказъёсты быдэсъясько, отын мынам творчество почти ӧвӧл ни, заказчиклэн куронъёсыз гинэ.

Солэсь ик кышка "Ижевский киноклубез" валтӥсь но - Андрей Смирнов. Кошко, пе, но шоркаре, уксёлэсь шӧмзэ шӧдыса, уг творитьто ни, быдто асьсэзыс, шонертэм сюрестӥ кошко.

Жаль, конечно, но: Мар карод? Озьы ведь.

Андрей ужаны кутскемын анимация бордысен. Гениальной аниматор, суредаськись. Солэн туж аспӧртэмлыко кадръёсыз. Берло, ку дырыз тырмыны кутскыстэ ни, видео борды кутскем. Нырысетӥ ужез: куар лобӟе но котыръя Ижкар ульчаосты. Сыӵе импрессионизм, Куар бордын гинэ фокусировка возиське, нош котыр яркыт пятноос, инбам, асвальт. Но со виштыосъя но ми тодмаськом Ижкарез, ми валаськом, кытӥ лобӟе куар. Прекрасно.

Тужгес но мыным матын луизы солэн очеркъёсыз. Вот яратӥсько адямиос пыр возьматэм мерлыко ужпумъёсты. Со понна вылӥ мастер луыны кулэ, мкш со туж шуг но секыт маке. Першин одӥгаз видеояз шуэ, яратко учкыны куштӥськем юртъёс шоры: соослэн асьсэлэн историзы, отын куке но улӥзы, но сое куштӥзы. Першин суреда уйпал пейзажъёсты, куштӥськем гуртъёсты... Мӧзмонэз но, жалянэз но вань отын, куддыр шумпотонэз но. Россия сярысь огласянь туж писсимистичной анимациез вань. Но со шуэ, мон яратӥсько Россиез. Со Ижкарез но яратэ:

- Малы мон кышкалом Ижкарлэсь. Мыным татын улыны, яратонме шедтыны на, - шуэ огез героез. Эшшо со уг кышка мерлыко проблемаосты ӝутыны, со мерлыко проблемаос при том локальноесь. Кылсярысь, Президентлэн Резиденциезлэн капка азьзэ ӵужись дворник быдтэм УдГУ-эз, со нимало менеджер уличной чистоты-а мар-а, кызьы ке но озьы вал. Ирониез туж трос ужъёсаз.

Андрей Першинлэн берпуметӥ ужез - "Курка, ӵож но мукетъёсыз" удмурт выжыкыллы анимация. Возьматыны ӧдъяськом, пе, вал но сое, ӟуч субтитръёсыз вылӥллямтэ.

Евгений Кузнецов, Ижкарысь тужгес тодмо видеоос лэсьтӥсь прям кылъёс ӧз шедьты ни вераны. Кызьы, пе, тон Чепецкой ГЭС-эз озьы сниматьтыны быгатӥд? Ми кӧня котыръям вал сое, но сыӵе кадръёс лэсьтыны ӧм быгатэ.  Эшшо, кызьы, пе, тон, недостатокез художественной приёмлы пӧрмытын быгатӥд. Татын Кузнецов кадръёсысь фокусировка ӧвӧлтэмзэ шуэ. Андрейлэн каръёсыз размытыесь, резвокстез отын ӧвӧл. Мукет оператор соосты брак шуыса ӵушысалыз ни, но Першин - со гений. Со кылдытэ импрессионизм, солэн сыӵе приёмез. При том не намеренной. Мынам, пе, объективе секытэн фокусировачке, соин ик сыӵе кадръёс пӧрмо. Мукетъёссэ, пе, воксё учкыны ик уг луы.

Бадӟым таланто адями гинэ озьы быгатэ ваньзэ лэсьтыны. Бракез чеберлыко амаллы пӧрмытыны.

Нош сеанс бырем бере, ку сылком вал гардеробдорын, со милемлы (Вера, Дарали) лично огшоры шуиз: "Тау, лыктэмды понна". Та ке со туж востэм пияшка, прак удмурт кадь, но зато бадӟым таланто. Учкисьёс азе вераськыны поттӥзы куанерез, ассэ кытчы донгыны ик ӧз вала ни, возьдаськиз - неуютно вал солы.

Учкелэ видеоссэ, соос туж устоесь: "КИТЕЖ", "Россия", "Майские каникулы", "Север", "Курка, ӵӧж но мукетъёсыз" в конце концов.. 16 тулыспалэ "Галерея" центрын Андрей Першинлэн адӟытонэз радъяскоз, трос букваос борды ватсаса.

"Ижкар" огазеяськонлэн адӟытонэз

Лыктӥськом этнофутуризмъя адӟытонъёсы, но яратон ӵыпетын уяны кутскиськод кадь. Лобанов шуэ, котьмарлэн дӥнез - яратон. Умой философия, ыы ведь. Этнофутуризм - со яратон. Артистъёслэн "Ижкар" огазеяськонзы кыӵе ке симпозиум ортчытэ ке, отын одӥг керетонъёс но уг пото, дыр. Отын творчество гинэ, котьмар ласянь. Мыным потэ, со мерлыклэн вылӥ лёгетэз. Азьпалан - Инмар гинэ на. 

Мон шуысал, суредаськыкузы но, ТВорческая ДАЧАын пукыса та дуннеысь лобӟыкузы но соос тубатсылэн вылӥ лёгетозяз вуо но Инмарлэсь ымнырзэ адӟо. Яке кинлэсь ке но-а. Ужъёссэс гинэ учке ай. 

Таяз адӟытонын Гири Григорьев мон доры лыктӥз но шуэ, Маша, мае ке валаськод-а? 

- ЫЫ, - шуисько.

- Валэкты мыным, шуэ Гири.

Но ведь котькуд адямилэн аслаз валанэз. Матэктӥм Сергей Орловлэн "Фантом" суредэз доры.

Со суред кык люкето. Вылӥяз суредамын валантэм пудо-живот: пӧртэм пельёсын, трос сюръёсын, быжен, оглом скаллы кельше. Но синъёсаз учкиськод ке, паймиськод соослы: сайкыт чагыр лыз мур иньам кадь. Ымдуръёсыз - адямилэн, соос мыняло. Соку мон валай - со адями. Со бадӟым чылкыт луло адями. Вылтырыз - неважно, валаськоды-а, адями ымнырыныз но мугорыныз шуш луыны быгатэ, главное сюлмыз бадӟым мед луоз. Скал тусъем адямилэн ангесысьтыз мар ке музъеме ваське, суредлэн кыкетӥ люкетаз, мон малпасько, со ШУД. 

Нош отын адӟиськом трос АДЯМИОСТЫ, татын соос зэм но адямиос ни, малыке шуоно вань ымныръёссы, киоссы, чиньыоссы. Соос ваньзы бадӟым бугоре биняськемын. Биняськемын вожвылъяськыса.  Шуд понна жугиськыса. 

Гириен суредэз сэрттыса-пертчыса сылӥськом ни. Солэн но соку синъёыз усьтӥськизы кадь. Со суредысь детальёсты адӟыны кутскиз: 

- Со животлэн пыдъёсыз кортнамын ук. Может суредлэн улӥ люкетэз - со музъем пушкысь урод кужымъёс.

Татын лыктэ Дарали но шуэ: 

- Тӥ туж мусо адӟиськиськоды та картина азьын, даже дӥсьтылэн буёлъёссы но огкадесь, но ми кошкиськом ни.

Яратыны котькин быгатэ, просто тросэз адямиос пегӟо солэсь, кышкало валантэм луыны но малпаськыны мылзы уг поты. Усьтӥське, шуо мон тӥледлы, эн кышкалэ валантэмлэсь. Соку точно Инмарез адӟоды. Нош со трос ымныро.

Ерпечкаос но Вить Сергейёс. Огъя малпанъёсы.

- Кыӵе мар ортчиз концерт? 

- Кызьы меда ортчоз, ку быдэс зал тыр люкаськемын кышномуртъёс, нош сцена вылын кырӟало, шудо, тэтчало пиос?

- Иське, тыныд кельшо кырӟась пиос? 

- Кышноос синмасько кырӟась пиослы, эшшо килы устоосызлы, кыллы проворъёсызлы но визьмо йыръёсызлы. Номыр уд кар.

Таиз тужгес легендарной но йырез пӧромтӥсь концерт вал дыр. Табере гурт калык дышиз ни городын ортчись концертъёслы. Соос ваньзы кыӵе ке огвыллемесь радъясько ни. Но татын Дементьев Ложкинэн молодецъёс так ке, артистъёсты умой бырйиллям. Конечно, форматэз валантэм вал. Ӵошатскон, пе, но... Валасько татын вормисе поттыны кинэ ке та кык группаос пӧлысь - со юнме. Малыке шуоно та группаослэн кыкназылэн ик вань асьсэ пыжем чечымъёссы, кудъёссэ калык соку ик сиыса быдтэ но кема чиньыоссэ нюлэ на. Просто Ӵошатскон пумын огшоры йылпумъянъёс лэсьтыны кулэ вал. Раз со ӵошатскон шуыса ялэмын вал. 

"Вить Сергейёс" чилясесь, гольтресэсь, вылӥ эстрадаысь кизилиос кадь пишто. Кырӟанъёсы соослэн - котькуд кышномурт понна комплимент кадь, яркыт бумагае бинялтэм гольтрес камфет. Шораз учкыса сием потэ, но трос уд сиы, гольтыраса окчиськод. Но со чылкак аслам малпанэ. Эшшо таослэн репертуарзы ӟучгес. Нош удмуртъёс со удмуртъёс ни.  

"Ерпечкаос" калыклы матэгес, соос самобытноесь кадь. Асьсэос кылдыто крезьгур (пӧртэм интсрументъёсын шудо) но кырӟало калыкысь потэм удмурт кырӟанъёсты. Соос огшорыесь, гуртысь усточиос, нокыӵе чилясь бумагае бинялтымтэ шекера. Нош шекералэсь уд окчиськы, кӧттэ гинэ тыртӥськод.

Сцена вылэ ерпечкосты ӟечкыланы потэм кышномуртлэн кылъёсыз но сое верало: 

- Кык вылтӥ тӥледлы тау шуисько. Тӥ быдэсъяськоды гуртысьтыды Николай Уткинлэсь кырӟанъёссэ. Со туж данъяськысал Тӥледын. Мон кылӥсько ке кырӟанъёстэс, пичи дыръёсам берытскисько кадь, аслам вордӥськем гуртам. 

(Ерпечкаос вӧлмыто гуртазы кылдэм кырӟанъёсты, гуртысьтызы соос кужым басьто. Озьы ик кулэ.)

Коллективъёс шоры учкыку, соку ик адӟиськод, кыӵе культура Можга карын, нош кыӵе -  Уддяди гуртын. 

Концерт кутскон азьын занавес сьӧры пырай вал. Кыӵе мар артистъёс ни шуыса (мон зэмзэ малпасько вал та концерт ӵошатскон шуыса).

Ерпечкаос, значит гань-ганесь, серьёзной мужикъёс кадь:

- Кыӵе со артист, со уг волновачкы ке. Учкисьёсты асэнымы басьтыны турттӥськом.

Ну, басьтӥзы, мыным потэ. Соослы тросгес сяська но сётъязы, калыклы матынгес ук соос.

Нош Сергейёс туж задоресь прям, соослы али 40 аресъёс ик ӧвӧл кадь, 20 - максимум. 

- Что ни рожа, то Серёжа. 6 ар ни коллективмылы. 3 Генаос азьломкырӟаса ворттыло вал,м3 Светаос вань, нош ми - 5 кузя. Малпам, количествоен сюлэмъёсты басьтом шуыса.

Зэм ке, ку сцена вылысь одӥг дыре чузъяське 5 пӧртэм куара, со туж кужмо. Малпасько ёросазы соосты ярато. Ма так но, пе, концертъёсазы 70 %-эз кышноос. Ушъяськыны ярато, ерпечкаос востэмесьгес татын.

Концертэз нуисьёс ласянь но учкид ке, туж усто вал. Калык артистъёс, быгато шулдыртыны, эшшо, соос уг лыдӟо на кылъёссэ кагаз вылысь. Ваньмыз огшоры - со понна усто. Вань мар арлыдо артистъёслэсь дышетскыны пиналъёсызлы.

Ансамбль "Слим" чортэмын вал, кык группаослэсь выступленоссэс кӧня ке суразы. Типа калык эктнъёсты экто, да марда. Но со ӧй вал калык эктонъёс,  со ужасной пошлость но фальшивость вал. Адямиосты гинэ ӧрекчаса куштӥзы. Соос интые чортэ вал лучше Чебеляйёсты, калык но золгес пумитасалыз. 

Мышкам пуке вал ӟуч кышномурт, удмурт эшез сьӧрам ваем лэся. Со ик берыктыса пуке вал солы, Баймурзинлэсь юморесказэ но, солы валантэм мукет интыосты но.

Нош мар вал концерт пумын. Вань калык султыса соослы чабиз. Кыӵе шумпотон со вал, артистъёслы но, учкисьёслы но. Ксения Никитина-Петрова шуиз, мынам аж синкылиосы асьсэос васькизы.

Усто луысал, Деметьев таӵе концертъёсты радъян сяна, артистъёслы промо кылдытысал ке. Тани, кылсярысь, "Ерпечкаослы" кырӟанъёссэс гожтыны юрттысал ке. Эшшо концертъёсын гуртъёстӥ потаны тур радъясалыз ке. Кыӵе шумпотыса пумитасалзы гуртъёсын кышномуртъёс но, писомуртъёс но. Ваньзылэн городэ лыктэмзэ уг луы ук, да и билетъёс но та концертлы кӧня ке нунал ортчыса быризы. Озьыен, соосты яратэ калык. 

Мон просто тодӥсько на, кыӵе поръясь мылкыдын мынам анае "3Светӥос" концертысь бертӥз.

5 Сергейёс. Сцена вылэ потон азьын

Ерпечкаос.Гань-ганесь.

Валамон мар, эшъяськон вормоз.

Паймымон адямилы

Паймемысь уг дугдӥськы Паша Поздеевлы:-)  Сыӵе адямиос тынэсьтыд мылкыддэ лӧпкыто, шонер ӧре выжто. Туннэ Эктоника программаысь бертыкумы, Зинаида Кирилловна шуэ. Ну вот, кызьы сыӵе адямиен вераськем бере, изем потоз на, щас бертыса гожъяськыны пуксё. Мон, быдэс арня куспын быдэсак шутэтскыса вуттымтэ адями, бертса точно изё шуыса, общагае вуи. Но умме усем ӧз луы, малпаськонэ уси. Йырам ваньмыз берганы кутскиз: тайзэ кароно, сойзэ радъяно, гожтоно, поттоно, шараяно. Изён потонэ олокытчы быриз. Соку Зинаида Кирилловналэн кылъёсыз тодам лыктӥзы. Вот, малпасько, Паша - генератор.

Удмурт интеллигенциын трос адямиос, шуиз Паша. Уг тодскы, мар кулэ, соос мед сайкалозы, активизировачкозы шуыса. Зэм но, мар кулэ? Обществолы кулэлыкез сярысь валан? Аслаз кужымезлы, малпанъёсызлы оскон? Пыкъет, в конце то концов? Мар кулэ? Та ужпум кызьы сылӥз XX-тӥ даурын, озьы ик ӧз быры на. Кузебай Гердъёс котькуд вакытэ вазисько: султэ, сайкалэ удмуртъёс! Но юнме гинэ, лэся, куаразэс, кужымзэс быдто. Удмуртъёс кызьы бабизы, озьы ик бабо. Нош одӥг Паша гинэ югдурез тупатыны уз быгаты. Со зэмзэ ик, одӥг. Нош мар ке но зэмзэ пайдазэ лэсьтӥсь удмурт интеллигенция чиньыен лыдъямон гинэ.

Та нуналэ со сярысь ум ни. Эшшо сю пол ӟечкылам потэ Пашаез та нуналэныз. Луысал ке пересьмись клеткаосты выльдӥсь арбери, мон сое кузьмасал солы гинэ.

#4тулыспал

Редакциын отчы-татчы бызьыло, сойзэ-тайзэ лэсьтоно. ӵаш потто, редакция ачиз пыд йылаз султыса эктэ ни кадь. Ӵукна ик перепеч кутыны кутским, ӵукна ик куноос вуизы - перепеч кутыны юрттӥзы - "Удмурт кенешысь" Семёнов но Хохряков ӟечкыланы вуизы. Туж-туж!

Малы ке но шурдыт вал, кызьы ваньмыз ортчоз. Иж тымет дурысь бертыкумы ни, Вераен малпаськиськом, ваньмыз вӧй вылтӥ ортчиз кадь шуыса.

- Площадьын калык 100-лэсь ятыр люкаськиз

- Инбаме шаръёс лобӟизы (тау, Поздеевлы)
Гожня гуртысь вуэм Зинаида Елизарова Брейн-ринг шудон дыръя вань мылкыдзэ кисьтӥз. Ваньмыз шуэ, кельшиз. Площадьын сыӵе умой шулдыръяським. Кезьытгес вал ке но, всё равно. Перепеч, пе, туж ческыт кошкиз, эктыса, кырӟаса шунским. Сю лыдпусын сылыны, пе, кельшиз!

Шумпотӥсько, гуртысь лыдӟисьёслы "Удмурт дунне" сыӵе праздник лэсьтӥз шуыса. Вуизы Яган-Докъялась, Вуж Сальяысь, Пичи Пургалась, Сэпысь. Мылкыд карисьёс зоопарке но ветлӥзы. Возьмалом табере видеоролик, мар. Гуртоос нош, малпасько, сое милесьтым но золгес возьмало.

- 500-лэсь ятыр перепечъёс пыжиськиз.

- Мон Геннадий Романовен, тужгес но арлыдо ужсенымы, Трокай Борсиовлэн синпелетэз доры сяськаос понӥм. 1918-тӥ арын со "Гудыри" газетэз поттыны кутскиз.

- Брейн-рингын но туж тунсыкоесь юанъёссы вал. Нош лыдӟисьёс мае гинэ уг тодо. Вань юанъёслы валэктонъёс Пероггуртысь Борис Боталов тодэ вал кадь. Но сюресэз визьмо  егитъёслы сётоно - Италмас лицей шаплыгес луиз. Вормиз. Мон ачим трос выльзэ ведь тодӥ. Павел Глезденёв, "Войнаысь иворлэн" поттӥсез тодэ вал куинь кылъёсты: пор, бигер, удмурт. Куинь кылын ик газет поттэ вал. Милемлыбы туала арын озыь. Дк, асьтэмесь ведь.

Газет, кызьы тросэз малпало, дыр, кылем даурысь журналистика шуыса. Но "Удмурт дунне" шоры учкид ке, озьы уд шуы. Со ужаз кыске егит кужымъёсты, кусып возё таланто адямиосын. Туннэ но со адӟиськиз ук - шулдыръяськонын вал егитэз но, пиналэз но, мӧйыез но, арлыдоез но.

Но нунал пумозь, конешно, егитъёс гинэ чидазы на. Газетлэн но вуоноез егитъёс бордын.

- Мар луоз тымет дурын? - мынэмез потыса юаз одӥг кышномурт.
- Вот, - шуисько, - бадӟым сюрприз, тӥ таӵезэ ӧд адӟе на вал!

Мон улонам ваньзэ адӟи ни, шуиз, дыр, ас понназ. Но Брейн-ринг шудон бере Иж тымет дурозь егитёс гинэ вуизы на, кышномуртэ ӧз вуы. Ваньзы жадизы. Но со шумпотон вайись жадён!

Сю аръёс ӝуазы шонерак но, образно но вераса.

Ӵукна. 4-тӥ тулыспал

Верантэм шумпотон, дыр: 4-тӥ тулыспал ортчиз! "Удмурт дуннелы" - 100 ар!

Мон тужгес но ӧжыт стажен ужась, кызьы шуиз Зинаида Кирилловна. Ровно кык нунал ужасько ни газетын (со официально), так ке вал фрилансер. Толон туннэ нуналлы дасяськыса 10 часозь пуким редакциын. Бертӥ но, мугорме но, лулме но шӧдылытэк умме уси.

Ӵукна но, валамон, бер султӥ. Редакцие вуыкум, кылӥсько, кызьы холлын ӵашето. Всё, малпасько, бероми - ВАНЬЗЫ ВУЭМЫН НИ. Пырисько но - монэ кырӟанъёсын, перепечен, чаен пумитало (бер султӥ бере, как раз сиськыса ӧй вуы вал). Пайми, Игра ёросысь Сэп гуртысь"Крезьгур" ансамбль вуэм. Главное, нокинлы вератэк, сюрприз лэсьтыса.

Одӥгез кышномурт шуэ мыным:

-Лыдӟисько сайттэз (контактэз озьы шуиз), отысь ик тодӥ, тӥ туннэ шулдыръяськон кариськоды шуыса. Лыктӥм.

Тӥни кыӵе продвинутой туала калык. Ӟечокъёс!

- Кыӵе мар вуиды?

- Сюресэз вакчиятыны малпам. Лымыез лёгаса, асьмеос асьмелы сюрес лэсьтӥм - сюрес вылымтэ. Зато шыпыт вуим!

Зэм но, сюрприз лэсьтӥзы таос.

Луло писпу

Вашкала дыръёсысен гуртъёсын будо луло писпуос. Соосты уг яра погыръяны но кораны. Эшшо соос портмасько на.

Бертӥськом калтыртэмысь. Эше шуэ:
- Тапалан пӧртмаськись тополь будэ. Сое Аманьлэн песянаез мерттэм вылэм ай. Лулоен мерттэм.
- Кызьы со, лулоен мерттэм?
- Мертто вал ук азьло, писпулэн выжыяз луло маке (кибы яке мар) поныса. Озьы мерттэмын. Со пӧртмаське на. Амань, пе, адӟылэм, кызьы писпуысь кин ке потам.
- Зол.

Так ке зол. Медаз ортче вал та дыръёс.

Тулыс сяськаос

Учкисько но тон шоры, валасько, макем мынам секыт киы. Вози сыӵе тонэ нырысь пуйыын борддорам ошыса - куасьтӥ выжыостэ. Табере малпасько на тонэ кызьы ке но улӟытыны, нош тон уд улӟиськы. Одӥгдэ мерттӥ шуак мон кие сюрем сюен горшоке, мукеттэ вуэ гинэ донги. Улӟод-а, уд-а, будод-а, уд-а?

Паймисько, кызьы сяськаос шӧдо адямилэсь лулкужымзэ, ауразэ, мылкыдзэ. Кин ке мерттэ сяська, солэн улӟе, нош кинлэн ке - уг.

Тонэ мерттыку, мынам туж умой мылкыды вал. Горшок но туннэ сюриз. Кӧня утчай, именно сыӵе пичи, тыныд кадь - горшок. Азьло отын живое дерево будэ вал. Будэ вал но, кулӥз. Мон сое ишкалтӥ но, солэн выжы гуаз тонэ куштӥ. ӧй ик малпа, тӥляд кыкнадылэн ик пӧртэм улонъёсты, сямъёсты, улон интыды но пӧртэм луыны кулэ вал шуыса. Нош мон тонэ вуж корка пыртӥ. Но тон пушъы гинэ, соку мон тыныд мукет корка кузьмало - паськытгес, югытгес, чылкытгес.

Тулыспал вуэ ни: дырпусысь толэзь но, куазьлэн состояниез но. Нош тон уд ик малпаськы на потыны коркаысьтыд. Пот вал ни, пот, сяськае мынам. Шумпотон вайысалыд.

Яратӥсько тулысэз но тулыс сяькаосыз. Соос дуннеез улӟыто, йӧез пильыса бычыяло кадь но дунее бугыртӥсь зынъёсыныз вӧлмо. Котькуд клеткае, котькуд пасе пыӵало но сайкато ваньзэ.

Сыӵеесь ни соос - зынэсь!

4-тӥ тулспал - Удмурт дуннелэн нуналыз

"Удмурт дунне" газет 4-тӥ тулыспалэз озьы ортчытоз!

Блогчиос-а, чуралиос-а, яке огшоры - мылкыд кисьтӥсьёс-а, вань одӥг туж Бадӟым нунал. Со  4-тӥ тулыспал. Сю ар талэсь азьло, 4-тӥ тулыспалэ югыт дуннеез адӟиз вань удмуртъёслэн газетсылэн нырысетӥ номерез.

Нош кинлэн мар луоз 4-тӥ тулыспалэ 2015-тӥ арын? Женя Бикузин очередной селфи армиысь лэсьтоз, яке уз? Даша Шиляева школаын португал эшъёссэ перепечен сюдоз, яке табанен? Марина Сергеева пумозяз синмаськоз школалы, но кылёз аслаз гуртаз ужаны? Сомында юанъёс, юанъёс, прак.

Кинлэн потэ верамез быдэс удмурт дуннелы, кызьы солэн ортче 4-тӥ тулыспалэз,  гожтэлэ блогъёсады, контактэ, Сю ар. 4-тӥ тулыспал группае,
пусъёс таӵе: #4тулыспал #удмуртдунне #100ар.

Озьыен, кылдытӥськом бадӟым книга: Удмурт дуннеын - 4-тӥ тулыспал.

Нош "Удмурт дунне" пусъёз аслэсьтыз Сю арзэ!

1915-тӥ арын со часэ, ку типографиын шыльк-шальк карыса печатласькиз "Врйнаысь ивор",  кин мар кариз. Анай нылпиоссэ сюдӥз, ожгарчиос Нырысетӥ дунневыл ожгарын немычъёсын ожмаськизы (кин ке пленын семьяез сярысь малпаськыса пукиз, кин ке золтӥськыса берпумеӥ минутъёссэ тузон омырен шоказ), пиналъёс кынмыса кезьыт коркаосазы улонлы шумпотыса пукизы. Котькудӥзлэн соос пӧлысь вал аслаз шумпотымон иворез но 4-тӥ тулыспалэз!

Кӧснуналэ

Сомында йӧскалыкъёс люкаськемын та чилясь залын. Чисто арлыдоос, егитъёс кытын? Ми кӧня ке шугомим но ӝытлы планъёс малпаны кутским.

- Шамаханская царица, - шуиз мыным одӥг таджик. Могдос ыы, вылаз дӥсямын куинь полоскаё чагыр костюм.
- Ӧвӧл. Арская царица.
- Малы?
- Мон лымшор палась удмурт ныл.

Кырын туж кезьыт, трамвайёс но ветло шер.
- Мынам али одӥг гинэ куронэ: тулыс чалякгес мед вуоз ни, - та выллем смыслэн вераз Вера.
- И мыным тырмоз 21 арес, - шуи мон.
- !!! - мылкыдъёс, мылкыдъёс.

Учки инбаме, син азям йӧтӥзы трамвай езъёс - выро ни. Кынмыса вуттӥм вал, трамвайын ӧм шуналэ.

Шунам американецъёс но японецъёс дорын гинэ. Японъёс ӧрекчазы ке но, саке сётом шуыса, ми ӧм усе ӝожон пӧлы, ми ӝожонэз мукет адямиос вылэ кисьтӥм. Урод лэсьтӥм? Соос асьсэос куризы со ӝожонэз. Нэнэйзы, пе, ӝожонэн пичи дыръязы соосыз сюдылэ вылэм. Табере валаськоды, дыр, кыӵе шуныт луэ сюлэмзылы, усё ке соос ӝожон пӧлы.

Нош американец лулылэсь одӥг сизэ кыскиз - творчествоез. Бёрдмен - артист, но со висе тодмо луэменыз, кизилияське зол. Соин ик солэн уг луы лобӟемез но ваньзэ куштыса гань-гань кариськемез. Вылтӥяськемез но азьвыл карьераез сое музъем борды кортӵогало. Табере сюлэмыныды шӧдэ, кыӵе урод сыӵе дыръёсы луэ творческой адямилы. Со ӧвӧл эрико, со кортнамын кизилияськонэныз.

Но кызьы развязкатэк. Кино пумын Бёрдман быгатэ чылкытатыны лулзэ но лобӟе вылӥе. Со вылэ йыркуръяськись нылыз адӟе со суредэз, но мынектэ. Солэн кияз сиреньёс - тулыс сяськаос, улон кутсконлэн тодметэз, эшъёсы мынам.

Бугульмаын

Туннэ штаб-квартираын пукыку, тодэ вайи, кызьы ветлӥм бигер шаере. Ижкар-Челны-Бавлы-Урустамак-Бугульма-Кузон-Ижкар.

Верантэм чебер палъёс. Али гинэ валай, кызьы мон синмаськи соослы. Бугульма гурезьлы но бальзамлы. Айкай гурезьлы но Урустамакысь Хоббитъёслэн улон корказылы укшась музъем пушкын лэсьтэм лапасъёслы. Син азяды гинэ пуктэ: гурезь выжыын сыло коркаос, нош лапасъёссы гурезь пушкын. Аааааа! Прям уг быгатӥськы, сюлэм сыче шупмотэ. Гужем, малпасько, мон берытско со палъёсы. Нош эшшо Уралэ но Байкалэ.

Музъемез котыртыса, инкуазьлэсь кужымзэ пыӵатыса улыны - со бадӟым шумпотон луллы.

Малпалэ гинэ, кызьы Айкай гурезь йылын сылыса, тон пыртӥд поттӥськод бигер толлэсь кужымзэ. Бугульма гурезьысь потӥсь ошмес вирсэръёстӥд кошке но тонэ кудӟытэ... Нош кубыз гурен тодматске бигер улосвыл.

Али Женя Бикузинлэсь берпуметӥ кылбурзэ шуак тодам вайи. Карта вылэ пусъёс пуктыса, мон но потысал дуннеез котыртыны. Трос интыослэсь узырлыксэс, визьзэс пыӵатыса, берытскысал вордскем интыосам но соку валасал вордӥськем кӧкыелэсь вань палъёссэ. Дуннеез котыртытэк, тон луод "чиед".

Туспуктэмъёс Бугульмаысь) Туж чебер интыысь.