Коммунизм вакытэ

Татын, валтӥсез, Ленин!

Ӵукна султӥсько, мынӥсько уж доры, уж бере мынӥсько университетэ, дышетскыса берен гуртэ бертӥсько. Озьы котькуд нунал. Ваньмыз радызъя. Нош мар та улонлэн палэназ луэ, адӟыса уг вуиськы.  Туннэ нуналэлэсь та радзэ тӥяй но валай, вот кытын тунсыко малпанъёс, вот кытын мукет улон. Толон, значит мон верай ни, дуннеын хаос шуыса. Нош туннэ мон верало, мар малпало со хаос сярысь шор ёзо поколениысь адямиос, коммунизм вакытэ будэм муртъёс.

Озьыен. Кинлы ке пофиг. Егитъёслы пофиг, соос телевизор уг учко, уг лыдӟо иворъёсты, пуко контактазы чебер дэремъёс учкыса но всякой розыгрышъёсты репоститьтыса. Мыным но пофиг, мкш валасько, асьмеос со бадӟым политикаын векчи кутъёс шуыса но, бызгетэм сяна, номырзэ воштыны ум быгатэ.

Озьыен, кылзӥськыса пуки Городмамалэсь малпанъёссэ всякой Сириысь пуштылонъёс сярысь, Россилэн Турциен кусыпъёссы сярысь... Мыняса кылзӥськи. Одӥгзэ гинэ юаны гинэ кылиз на точка пуктон понна. Юай.

- Ваньзэ тае учкыса, малпаськод, дыр, асьмеос умой улӥськом шуыса?

- Уг, - шуиз Городмама. - Войнаез возьмаса улӥськом.

- Войнаез?

- Война луоз, пе. Соку вань адямиос ог-радэ султозы. Кредитъёс ӝуалозы, ваньзы огкадь луозы.

Коммунизм вакытэ будэм адямиослэн йырвиымазы коммунизмлэн идеяосыз муре пыӵамын. Туж муре. Осконзы туж юн. Туж юн.

Сельхоз базар

Ӧтчазы монэ одӥг ужрадэ. Гурт удысъя академие, калыкъёслы сӥзем фестивале. Принципез таӵе: котькуд факультет быръе аслыз калыкез но возьматэ солэсь культуарзэ, улон-вылонзэ, сям-йылолъёссэ. Ярам. Мон жюри.

Лыктӥсько, фойеын ӵаш потто. Сиён-юонъёсты, пе, тани татын возьмато. Удмуртъёсты нокин уг возьматы. Кызьы берло шуиз, радъясьсы, ми, пе, удмурт культураез возьматон понна палэнысь адямиосты ӧтиськом. Сельхозкаын внеучебной ужен вырисьёслэн Тӧрозы улэ Селычкаын, ну чортэм ини со отысь ансамблез. Соос картошка кисален перепеч кутӥллям,   стаканъёсы кефир, ряженка понӥллям - тани, пе, удмуртъёслэн сиён-юонзы. Пичи нылпиос, Селычка школаысь ик, дыг-мог кырӟазы "Кинъёс, кинъёс лыктӥллям"... Кытысь-марысь, малпасько, со таосыз шедьтӥз, эшшо егитъёс пӧлы пыртӥз на. Соосыз, бен, шумпото, Селычкаысьтызы поттӥзы шуыса, Тау каро со кышномуртлы (со эшшо Селычкаын кыӵе псевдоудмурт культураез возьматӥсь тур радъяз на. Учке Интернетысь юромо "От Инмара до Иднакара" нимаське), я коть, пе, ми дорыны улыны интыяськиз. Кулэлыксэс табере валало ук.

Селычкаысь кышномуртъёслэн ансамбльлзы не ансамбль, шуод-а мар-а. Дӥсяськемын, кин мар шедьтэм. Огезлэн пыдаз кут, мукетызлэслэн колоша, куинетӥезлэн каблукен тол сапег, Дэремъёссы но айшетъёссы ваньзылэн пӧртэмесь, уксё тӥрлыкъёссы оломар. Эклектика. Пӧлазы пиналъёс. Тае адӟыса ик, валамон, удмуртъёс сярысь олокыӵе но стереотипъёс но малпанъёс кылдо шуыса. Будто удмурт культура улэ пересьёслэн но пиналъёслэн сюлэмъёсазы - пересьёслэн, мкш соослы немар карыны ни, пиналъёслэн, мкш соосты косо.

 Ярам, арган кыскало, экто, тапырто, адске, вот студентъёс пӧлын  удмуртъёс вань. Кин ӧз возьдаськы, кышномуртъёсын ӵош эктӥз ни, но тросэз палэнын сылӥзы, ымныръёсазы чидан мылкыд адске.

- Тӥ, пе, сокем эн дунъялэ, - шуэ ини мыным радъясьсы, - адӟиськоды милям татын базар кадь ортче.

Кышномуртлэн главное кылыз мынэ, киыз но мынысал на ке.

Та ужрадэ ведь эшшо чортэмын вал культурая министр, спортъя но егитъёсын ужан политикая министр. Лыктӥллямтэ. ӵок ни. Студентъёс возьматӥзы калык культураосты. Егитъёс умой дасяськиллям, радъясьёслы дыр тырмымтэ тыро-пыдо дасяськыны. УдГУ-ын уровень мукетгес, профессионализм вылӥынгес. Озьы пуки ини мон, оломарзэ но малпаса, сцена вылэ потӥзы "Ватка" студиысь нылъёс. Возьматӥзы "Ярдуртэм нюлэс" постановкаез. Тросэз оло валазы, оло ӧз, но фестиваль пумын быдэс залысь кылиз ог ӝыныез гинэ. Якшур-Бӧдьяысь "Тӧдьы юсь" этно-ансамбль потӥз кырӟаз.

Ах, верам потэ на вал, Селычкаысь ансамбль возьматӥз армие келян сям-йылолэз. Сцена вылэ потӥзы кышномуртъёс, пияш, солэн туганэз, туала дэремен, ӝужыт беро каблуке, пельпумъёсаз кышет. Кышномуртъёс, валаське, сцена вылын ассэс возьыны дышемын ӧвӧл. Янгышало, ог-огзэс донгало, али тон потӥськод шуыса, тон тазьы вераны кулэ шуыса. Кулко вал ни. "Чипчирганэз" чортэ-а мар-а вал.

Школа празднике вуи кадь. Фестивальлэн пумаз, со валтӥсьмы кинлы кыӵе инты сётыны ачиз малпаз (малы ми кулэ вал, уг тодӥськы!). Сцена вылэ потӥз, чебер кылъёс вераз но шуиз, призъёс арлы йылпумъянъёс лэсьтыку луозы. Сыӵе отношение.

 Берло ини радъясьёсыныз вераським но, огез шуэ: "Ну тон ӵошатӥд, УдГУ-эз но Сельхозэз, отын кӧня активистъёс, нош татын весь одӥг ымныръёс. Дасяським то, бен, одӥг арня гинэ."

Оло воштӥське ачиз кыл?

"Удмурт дуннелэн" конференциез ортчиз. Трос докладъёс вал. Тужгес резонанснойёсыз вал гожъяськон кылъя но правилоосъя.

Туннэ мыным сётӥзы лыдӟыны одӥг текст. Ӟуч кылын. Лыдӟыны кутски, 3-тӥ предложениозь вуи но пуштӥ: КӧНЯ ГРАММАТИЧЕСКОЙ НО ЛОГИЧЕСКОЙ ЯНГЫШЪЁСЫЗ (мон татын уг вераськы ни орфографическойёсыз ласянь). Зэмзэ ке, мынам сое пумозяз лыдӟем ӧз луы. Тон гожъяськиськод ке, гожты качественной текст, гажа кӧня ке лыдӟисьтэ. Таӵе дыръёсы мон валаны кутскисько Ольга Владимировна Вахитоваез, "УД" газетысь, кыл кутӥсь серкетарез, тӥя текстъёсты редакторез, шуом, ку со "Дарт" газетэ вуэм материалъёсты эскере. Егитъёс, угось, гожъясько !!! Ачим но куке но сыӵе ик гожъяськисько вал, тодӥсько, малпаськытэк, но малпаса, мон шонер гожтӥсько шуыса.

Конференциын Вера Григорьевна Пантелеева докладаз  газет бамъёсын стилистической янгышъёсын тырмем предложениосты пыртӥз. Тӥледлы сое кылыны кулэ вал... Сыӵе югдур, логикаез суран, грамматической янгышъёсын гожъяськон - удмурт газет-журналъёсты туж ӵем пумиськыло, ӟучъёс пӧлын но. Эпидемия! Оло со туала кыл сыӵе, туала малпаськон ӧр? Шонертэмез матысь дыре луоз шонер?

Удмурт кылын гожъяськонъя берпуметӥ правилоос потӥзы 2002-тӥ арын. Соку газет-журналъёс пӧлын сураськонъёс кылдӥзы. Кыӵе правилоосъя текстъёсты эскероно, вуж яке выль. Али но ваньзы пӧртэм сямен ужало. "Кенеш" журнал вужезъя, "Удмурт дунне" вылезъя. Ольга Владимировна верамъя, правилоос пумозяз вуттэмын ӧвӧл, ӝыны вамыш гинэ лэсьтэмын, соин ик ужаку трос сураськонъёс кылдо. Но кӧня аръёс мыно ини со правилоос ласянь вераськонъёс-ченгешонъёс? Кин пумозяз-йылозяз вуттоз соосты? Валамон, кулэ госсаказ, кивалтӥсьёс доры йыгаськоно. Сотэк та вераськонъёслэн пумзы но пайдазы но уз луы.

Вакчияк, гажано лыдӟисьёс но егит писательёс, гожъяськыкуды малпаське, кызьы кылъёстэс радъяськоды.

Чудьяосын "Читай, Ижевскын!"

Чудьяосын "Читай, Ижевск!" фестивале пыриськимы вал, шор площадьысь шатёре, ми доры, так-то трос калык люкаськиз. Туннэ со понна тау каронъёс сётъязы.

Кельше, кызьы ужа Некрасов нимо библиотека. Ваньмыз сярысь иворто, ваньзылы внимание сёто, уг вунэто. Нимысьтыз ӧтён лэзё, со сяна жингырто на, туннэ луоз шуыса. Тани туннэ пыри гинэ но, кивалтӥсьсы монэ тодэ на, Векшина ук, пе.

Возьматӥзы вакчияк видеоролик, кызьы ортчиз фестиваль. Богдан Анфиногеновлэн кылбур лыдӟемез отчы пыремын, Таня Тихонова но Лиля Леонтьевалэн кырӟамзы. Берлогес со видеоез Dart группае поном.

Тау карон сётыкузы, тунсыкъяськизы, кыӵе со Dart газет но кытысь сое басьтыны луэ. Чудьяос сярысь вакчияк верай на.

Берен интыям пуксьыкум, кышномурт шуэ:

- Тӥляд классной площадкады вал!

Шумпотӥ, мар.

М. Пахомовалэн туспуктэмез.

Бредберия улон

Пуксисько автобусэ. Адямиос уж дорысьтызы берто. Мон - гуртэ. Тодӥськоды-а, соос ӧвӧл та дуннеын, соос быдэсак выемын телефонъёсазы. Паймисько. Соку ик тодэ лыктэ Рэй Бредберилэн "451 градус по Фарингейту" антиутопизэ, кытын валтӥсь геройлэн кышноез уен-нуналэн наушникъёсын ветлэ, " телевизионный родственникъёсын" вераське. Таосыз но. Сыӵе пуке 15 адями, ваньзы телефонъёсазы.

Азьло коть автобусъёсын вераськемъёсты кылзӥськыны луэ вал. Кинлэн ке пенсиез уг тырмы, кин ке висе, кин ке Сирия но Путин сярысь вераське. Тунсыко вал тодыны, маин улэ калык.  Нош али чус. Соин ик мон учкисько укно сьӧрысь вошъяськись суредъёс шоры, кылзӥсько машиналэсь ыргетэмзэ но малпасько - арысь аре та коркаос вужмо, арысь аре та гуртъёс пичигес кылё. Куазь чебер на, сӥзьыл ук.

!

- "Газетты мрачный. Егитъёслы тунсыко ӧвӧл, пересьёслы кадь." - Dart сярысь. https://issuu.com/udmdunne/docs/ud_71__25396__f8b12be5cb0628/1?e=0

Кылсярысь, тани мукетыз малпан.

Со ик Э. Хемингуэйлэн "Прощай, оружие!" романэз сярысь:
- 80-тӥ бамаз вуи но, ӧй ни лыдӟы. Мӧзмыт. Весь огкадь действие мынэ, номыриз уг воштӥськы.Интересныесь, сӥзьыл-гужем ожмасько но, толалтэ вуэ, лымы усе но - ожзы дугдэ.

Кинлы мар

***

Телевизорын иворъёсты возьмато. Вераське кыӵе ке министр, кышномурт, тазалыкен герӟаськем юанъёсъя. Мама шуэ:

- Причёсказэ коть воштэм ни ай. Ато весь одӥг кадь йырсизэ нуллэ вал.

Кинлы мар, кечлы - куар.

***

Арганчилы синмаськыны
кулэ чебер ветлыны.
Если чебер ӧд ке ветлы,
со тонэ уз яраты!

Вуылӥ Кияса гуртысь одӥг гуртэ. Соос доры вуэм выль арганчи. Талы соос туж шумпото. Ансамльёссы угось гуртазы одиг гинэ ӧвӧл. 

Арганчиослэн вань кыӵе ке харизмазы. Огшоры улонын номырин син шоры уг йӧто кадь но арганзэс кутыса сцена вылэ пото ке, синъёссы ӝуаны кутско, ымнырзы пиштэ. Нош тон, соку ик синмаськиськод. Собере ас поннад малпаськод ини, малы меда эктыны уд быгатӥськы. Яке: малы аслад туганэд арганэн уг шуды.

Кинлы мар.

«Мае адӟи, сое ик гожтӥ» — таӵе амалъя гожъяськон литература ӧвӧл

«Удмуртия» книга поттониысь проза ёзэн кивалтӥсь Сергей Матвеев одӥг интервьюаз вераз: удмурт литератураын вань трос егит усто авторъёс, но соослэн гожъямъёсазы трос жагез. Со пӧлысь шуг адӟыны дуно арбериез.

Кылем арын егитъёслэн Dart газетсы кутскиз радъяны литературалы сӥзем ӝытъёс. Отчы 10-лэсь ятыр адями огпол но ӧз вуылы. Гожъяськисьёсмы мында ик милям лыдӟисьёсмы но ӧжыт? Озьы шуыны уз луы. Тодосчиослэн пусъемзыя, дыр воштӥськемен, воштӥське лыдӟисьлэн тусыз но. Лыдӟись вань, сое шедьтоно гинэ. Одӥгез амал — вотэсэз уже кутон. Озьы ик кариз Влад Андреев, 2013-тӥ арын вотэсын «Удмурт кылбурчи» огинзэ кылдытыса. Одӥг интыысь табере шедьтыны луэ егит авторъёслэсь гожъямъёссэс! Ми табере тодӥськом, удмурт кылосбуръя факультетын гинэ кылбурчиос уг кыдало шуыса. Али огинэз нуэ егит кылбурчи Богдан Анфиногенов.

— Мон рос-прос басьтӥськи та группа борды, малы ке шуоно туж потэ вал, Интернетын удмурт поэзия мед улӟоз но улоз шуыса, — вера кылбурчи.

Бен, огин кылдӥз, син азе пуксиз егит кылбурчиослэн но лыдӟисьёслэн зэмос лыдзы. Но татын кылдэ мукет юан: кыӵе ӟечлыкен кылбуръёс отын печатласько? Угось вотэсысь тросэзлэн кылбурчиослэн ӧвӧл кылэмзы критикъёслэсь дунъетсэс, ӧвӧл тодэмзы удмурт литературалэн классикъёсыз сярысь но. Соослэн дышетӥсьёссы — ӟуч Эдуард Асадов, Вера Полозкова но мукет туала гожъяськисьёс.

«Удмурт кылбурчи» огинысь кылбуръёсты учкиськод ке, валаськод: лыдӟыны номырзэ. Кабъёс тӥямын: рифма ӧвӧл, ритм тэтча но чутэ. Оло, дыр ортчыса, кылбуръёслэн, кызьы али лыдзы, озьы ик ӟечлыксы будоз. Но кызьы? Егит автор, школа кружокысь потыса, уг шедьты ни кылбуран тубатэз. Кемалась ворсаськиз Удмурт кун университетын литературая «Вуюись» кружок, уг кылдыты сое Удмуртиысь писательёслэн огазеяськонзы но.

Озьы ке но книга бичетъёс пото, соя ик ми дунъяны быгатӥськом туала удмурт литературалэсь ымнырзэ. Тодамы ваём берло дыре егитъёсын поттэм книгаосты. Соос пӧлын — Микаль Михайловлэн «Мон одӥг пол уг сайка улыны», Марина Пахомовалэн «Йыртэмпол», Богдан Анфиногеновлэн «Айшет будущего» кылбур бичетъёссы. Азьло аръёсты кутӥд ке, вераны кулэ Оля Трониналэсь «Йыромем йыртэмась», Лариса Ореховалэсь «Ярдуртэм нюлэс», Дарали Лелилэсь «Гур сьӧрысь суредъёс» книгаоссэс… Та но мукет авторъёслэсь творчествозэс учкыса, луоз-а меда вераны, кыӵе ӧръя кошке удмурт литература?

— 10 ар талэсь азьло удмурт литератураын этнофутуризм кузёяське ке вал, али сыӵе яркыт ӧрез висъяны уз луы, — вера Виктор Шибанов. — Котькуд авторлэн аслаз гожъяськон амалэз, темаосыз. Дарали Лели кутскыкуз этнофутуризм амалъя гожъяськиз ке, университетэз быдтыкуз, со гламур пала кыстӥськиз ни. Рэплэн кабъёсызъя гожъяське Пичи Пурга ёросысь Алексей Пикулев.

Котькуд автор кылдытэ туала удмурт литературалэсь аспӧртэмлыко ымнырзэ. Кылосбур тодосъя кандидат Виктор Шибанов пусъе солэсь куд-ог тодметъёссэ. Нырысетӥез тодмет — со азьвыл штампъёсъя гожъяськон. Мон ватсасал на, мукет кылбурчиослэсь адӟем карон. Али удмурт литератураын тужгес адӟымон автор Богдан Анфиногенов луэ. Солэн аслаз аспӧртэмлыко гожъяськон амалэз — кылбуръёсаз ӟуч но англи кылъёсты кутон. Табере вотэсысь егит кылбурчиослэсь гожъямъёссэс учкиськом ке, валаськом, солэсь адӟем каро тросэз егит авторъёс. «Удмурт кылбурчи» огинэз усьтӥд ке, со выллем кылбуръёс тон вылэ ведра дурысь кадь кисьтӥськозы. Кылсярысь, гожтэ Полина Куликова: «Тон черекъяд — разверглись небеса. Тон черекъяд, аслыд ачид паймыса». Богдан ӟуч но англи кылъёсты валаса кутэ ке, Полиналэсь малы ӟуч кылъёсты кутэмзэ мон уг валаськы.

Кыкетӥ тодмет, кудзэ висъя Виктор Шибанов, со литературной куронъёсъя гожъяськонлы пумитъяськон. Басьтом Пичи Пурга ёросысь Алексей Пикулевез. Сое тупатъяны кутскиськод ке, вера тодосчи, кылъёссэ воштыны егит кылбурчи пумит луэ. Со кырӟанэлэн кылъёсыз, со вотэсын вӧлмемын ни, соин ик мон кылъёсме уг тупатъя ни, шуэ. Нялтас вераса, тросэз кылбурчиос гожъямъёссэс тупатъянлы пумит луо. Угось, кызьы соос малпало, редакторъёс соослэсь кылбур стильзэс музон каро.

Туэ Свердловск улосвылысь Каменск-Уральский каре бичаськизы егит гожъяськисьёс. Аслым но отчы сюрыны шуд усиз. Тросэз дунъясьёс пусйизы, адямиослэн егит дыръязы гожъяськемзы потэ, нош тыбыр сьӧразы улонзы ӧвӧл на. «Мае адӟи, сое ик гожтӥ» амалъя гожъяськон — литература ӧвӧл на. Мукетыз ужпум — егитъёслэн кылзы тӥяськемын. Тросэз удмурт егитъёс ӟуч кылын малпасько, предложениоссылэн радлыкез но ӟуч. Та шуг-секытэн пумисько вань калык литератураос, угось ӟуч кыллэн кужмыз золгес. Но кызьы тупатоно югдурез, куке нылпиос уен-нуналэн вотэсын пуко, ӧжыт лыдӟисько но стилистика бордын уг ужало?

— Егит гожъяськисьёслэн ужъёссы суро-пожо, ӟучо-удмурто луо. Егитъёс утчасько, улон шоры мукет сямен учко. Дыр азьлань кошке, но литературалэн, чеберлыко кыллэн законъёсыз уг воштӥсько, — вера «Кенеш» журналысь проза отделэн кивалтӥсь Олег Четкарёв. — Тодэ лыктэ 50-тӥ аръёсысь «Советской Удмуртия». Со вакытэ кыл сӧриськемын вал, вуоно писательёс гожъяськизы ӟуч конструкциосын. Но 1980-тӥ аръёсы литературае лыкто Г. Красильников, Р. Валишин. Соослы луыса литература йӧнаны кутске, кыл тупатске, кылдэ мукет ӟечлыкен литература. Оскисько, асьме литератураын кылдозы на выль Красильниковъёс.

Питик дуно

Гуртэ бертӥсько. Автобус бускель гуртозь гинэ мынэ. Соин ик гуртозям сюрес кузя 12 километр пыдын мыноно луэ. Тани бертӥсько мон сыӵе, малы ке туннэ машинаос ик чик ӧвӧл, ӝыны сюресме пыдын ортчи ни.

Дугдӥз "Семёрка". Пуксим, э ярам коть эшеным вал. Машинаын сыӵе сюлмо юэмъёс. Пӧлазы одӥг кышномурт, водительлэн кышноез лэся. Юэмын зол, шофёрмы сюреслэсь синзэ палэнтэ ке, машинаез соку ик трак урдэс пала кошке. Эшмы доры, пе, куное мынӥськом, Пурое. Асьсэос эшсылэсь нимзэ но уг тодо.

Вӧсяськыса но кызьы ортчим ни сюресмылэн ӝыныезлэсь ӝынызэ. Эше васькиз мукет гуртэ, мон соос пӧлын огнам кыли, асламез гуртэ кыдёкынгес вал на. Пересь бабуш вамышъя. Тодмай - Амань Сандрапай, туж шаплы песянай. Бодызэ ӝутӥз ини, дугдэ, монэ пуктэ шуыса. Шофёрмы, туж сюлмо юэм мурт, валамон дугдӥз ни. Вӧзаз пукисьёсыз ӧз но лэзе ке но.
- Мар мар тӥ, - шуэ, - песянай ук, пуктоно.

Озьы со трак урдсы дугдӥз. Амань Сандрапай шаплы гинэ машинае пуксиз но пумомиз. Ымпумтӥз шыпыт гинэ мыным шуэ:
- Таос кудӟемын, лэся.
-Ы-Ы, - шуисько.
Тараторитьтыса вераськись кышномурт кылем сюресэз шып улыса, вырӟылытэк пукиз. Синъёсыз гинэ одӥз пиосмурт вылысь мукетыз вылэ тэтчаллязы.

Потӥм. И татын Амань Сандрапайлэн ымысьтыз вань кылъёс кисьтӥськизы. Кызьы, кылсярысь, бражка сылэ, собере люкаськем газъёс банкалэсь крышказэ пезьдыто но ву шукыяськыса уртче, озьы ик татын но. Эшшо син азяды пуктэ на, кызьы артистъёс пересьёсты театрын шудо, ӵапак сыӵе ик интонациен вераське Амань Сандрапай, чабкиськыса ик.

Кисьтӥськиз:

- Остэ, быри, быри. Кудӟемын ук, кудӟемын соос, эшшо руле пуксё на. Вӧзаз кышноез пуке вал, лэся. Кызьы со но лэзем картсэ машинае пуксьыны. От нылы вера. Тон, мама, нокинлэсь уд кышкаськы. Кышка вал тон кӧня ке. Нош мон сёравно уг кышкаськы. Котькыӵе машинае пуксисько. Инмаре монэн сьӧрам ветлэ - тани сумкая, кисыям. Линия дурысен огпол пукси. Сьӧдъёс вылӥллям. 2 пиос, кышномуртсы одӥг. Нош мар ке карсалзы ке. Уксёе жаль ӧвӧл, коть ваньзэ мед басьтозы....

Татын мон интыям ик кулӥсько вал ни!

... питик дуно ук ай (киыныз ик возьматыса вераз).

Вот, малпасько, пересьёс. Вералозы ке, вералозы ни. Адӟемын ини уго соос троссэ.

Дышетскытэк но визьмо

Магистрант мон. Дышетсконмек гинэ азьланьтӥ шуыса вераме потэ вал, малы ке шуоно пумозяз уг валаськы магистрант кыллэсь пуштроссэ. Бакалаврлэсь пӧртэмзэ но шӧдӥсько. Нырысетӥ параысен ик милесьтым юазы ни, кыӵе темалы диссертцидэ сӥзёд? Лыдӟиськоно трос, найчной ужъёсыт. Мыным кельше.

Эшшо ми пӧлын туж трос арлыдо дышетскисьёс. Тросэз соос пӧлын УдГУ-ын ик ужало. Юасько, 50 аресъем кышномуртлэсь:
- Малы тӥ выльысен дышетскыны лыктӥды на?
- Ӧтизы но - лыктӥ, - вера со. Собере кӧян ке улыса ватса на:
- 40 арестэс тырмытэмды бере, ужлы ёрмыса асьтэос но вылыьсен дышетскыны лыктоды ай.

Ыы, пе, малпай ас поннам. Но татын пӧртэм поколениосысь но пӧртэм гос. строй вакытъёсы будэм адямиослэн улон шоры учконзы ваче пумисько. Мон, кылсярысь, пукысал гуртын, но яратоно книгаосты, яратоно темая научной ужъёсты лыдӟысал. Нокин азьын кыл ӧй кутысал, косэмъя гуртысь ужъёс ӧй быдэсъясал. Яке улонэз шулдыртон понна кошкысал дуннеез котыръяны. Яке кыӵе ке ужрад радъясал. Яке тымет дуре корка пуктыны кутскысал, яке шутэтскон база.

Городэ одӥг классын дышетскем матысь эшеным мынӥськом.
- Кыӵе мар дышетсконэд мынэ, - юасько. Со но магистратурае пыриз.
- Уг вутты, дыр, дышесткыса. Берозь ужасько, - шуэ. - Но пересьмама дышетсыкын косэ. Уждэ кушты но, дышетскы, пе.

Озьы со, дышетскыны луонлыксэс ыштэм анай-атайёсмы, песянай-песятайёсмы милемыз дышесткыны косо. Валало меда соос, магистръёслэн но вылӥ образование басьтэм адямиослэн лыдзы будэмен ӵош, ыше вылӥ образованилэн дуныз но. Кызьы, кылсярысь, ыштэ смыслзэ сю пол одӥг ужез быдэстэм но.

Тӥни озьы, пукисько параын но малпасько, мынам анае дышетскытэк но визьмо шуыса.

Книгаын - писательлэн улонэз.

Лыдӟисько Сергей Матвеевлэсь "Чорыглэсь лушкам кылбуранъёссэ" но валасько, кыӵе зол солэн лирической героез кельше мынамезлы. Лыдӟисько туганъёс куспын кылдэм  отысь вераськонэз, но малпасько, мынам но сыӵе ик диалогъёсы пӧрмо шуыса. Сое валасько но секрекъяны кутскисько. Горисько быдэс комната тыр. Кызьы?

Мынам но лирической герое "Эго".  Сыӵе сьӧд сюлмо, возьыттэм нылмурт. Номыр карыны уг быгатӥськы, но со сыӵе пӧрме. Мукет ласянь, со мынам "дурочка", ваньзылы оске, синмаське таланто пиослы, синмаське сётэм кылзы понна кыл кутӥсь адямиослы.

Кутски вал гожъяны антиутопия. Пӧрмиз утопия. Кутски вал кылдытыны "идеальной удмурт кар", социальной. Кылдӥз "сэрего", пӧртэм яратонъёсын пӧзись роман, любовной. Ку меда кылдоз мукет тема?

Чехиысь туала гожъяськись Милан Кундеран "Книга смеха и забвения" книгаяз вера. Писательёс гожъяськыны кутско аслыд. Тон вераськод ортчем нуналэд сярысь кышноеды, нош со пельёссэ ворса, уг кылзы тонэ. Нош тынад пушкад ваньмыз пӧзе, сое кытчы ке поттоно. СОИН ИК ТОН КУТӤСЬКОД КИЯД РУЧКА НО КИСЬТӤСЬКОД ВАНЬ МАЛПАНЪЁСТЭ. КЫШНО УГ КЫЛЗЫ КЕ, МЕД ЛЫДӞОЗЫ МУКЕТ АДЯМИОС.

Зэм но, котькуд писатель аслаз произведенияз аслэсьтыз улонзэ возьматэ, яке лулзэ. Сотэк нокызьы, котьмар вералэ. 

"Шобрет" новелла

"Сакыр" арт-интыын Дарали ортчытӥз лыдӟиськон ӝыт. Бырйиз В. Ар-Сергилэсь "Пашка Педо - транзин" вероссэ но мынэсьтым новелламе. Кельшо, пе, соос  ог-огзылы.

Зэм но. Геройёс но огкадесь, произведениослэн пумъёссы но огвыллемесь. Ужпумъёс но отын-татын огкадесь ӝутэмын. Ачим паймисько: композициезъя но.

Лыдӟе Ар-Сергилэн вероссэ, ӵошатон понна. Нош аслэсьтымзэ тани поттӥсько, вакчиятыса со "Удмурт дуннелэн" "Ингож" ватсэтаз сётэмын.  

Шобрет

Тулыс вуэ. Куазь оло зоре, оло лымыя – валантэм. Натӥлэн сюлмыз оло калык пӧлы куриське, оло лул серегъёсаз ватӥськемез потэ. Мар ке кароно! Натӥ шкаф пыдсысьтыз поттэ кроссовкиоссэ но бызьылыны ярась штаньзэ. Катаоссэ кияз кутыса бергатэ но ӧс вадьсы сэрпалтэ, штаньзэ берен шкафаз донге но… тур-пар юбказэ дӥсяса, поръяны потэ.

- Берлогес бызьылыны пото, - нырултӥз Натӥ.

Бер ӝытэн но тулысэн шокась Ижкар Натӥ вылэ секыт шобретсэ куштӥз. Нылаш ӝока, секыт зӥбетлэсь мозмытскыны выре но уг быгаты. Шобрет улысь потон утчаса, ӟигар быре, нош шобрет пумтэм.

«Луысалзы ке киям бадӟым качыос, шобретэз бадӟым челепъёслы вандыса куштысал, - малпа ас понназ Натӥ. - Соку мон со басма юдэсъёсты буясал но сётысал курадӟись адямиослы. Котькуд юдэс адямилэсь сюлэм –висёнзэ пачкатыса быдтысал, нош яркыт буёлэз шуд кузьмасал».

Натӥ Ижкарлэн шор сюлмаз вуиз. Татын сылэ зарни липето черк. Котыр пурысь юртъёс сыло, нош черклэн зарни липетэз котьку зарниен пиштэ. Али отчы быдэс Ижкарысь калык люкаське. Син азяды гинэ пуктэ. Ӵуказе – Великтэм. Адямиос уйин коркаосысьтызы пото но, кызьы кузьылиос зор азьын каразы дырто, озьы ик соос но: черке вуо но вуо, вуо но вуо. Инмарлы оско бере, ӵок ни. Инмарлы оскисьёс чылкытэсь, шуо, соин ик оскы. Но со адямиос пӧлысь Натӥ одӥг шудо но югыт пиштӥсь адямиез уг адӟы – ваньзы сьӧд лулоесь. Сьӧлыкаса ик вуо соос татчы. Сьӧлыксэс шараяло, куштӥсько солэсь, но, черкысь потыса, выльысь сьӧлыканы кошко. Ӧз, таос пӧлысь огезлы но Натӥ шобретысьтыз юдэссэ ӧз сётысалыз.

Черк вӧзтӥ ортчыса, Натӥ ульча кузя гань-гань васькиз. Азяз - «Уй бубыли» кафе. Куке но тодмо эшез Натӥлы вералляз, кызьы уйин та кафе вӧзысь дугдылонниын автобус возьмаса сылӥз. Соку калык Ижкарын туж трос ӧй вал на, машинаос но али кадь пумтэм ӧй вал, нош уй бубылиос поръяло вал ни.

«Та дугдылонни вӧзы, та вакытэ ик, луоз, дугдӥз сьӧд чилясь машина. Руль сьӧрын пукись пиосмурт киыныз ик шонтыса «Айда кошким!» шуиз. Зол ик кышказ, дыр, эше. Татын уй бубылиос сыло ук. Шузи», - эшезлэсь верамзэ тодаз вае Натӥ. Али со та кафе вӧзтӥ кошке но нокыӵе уй бубылиосты уг адӟы. Али соос мукет возь вылъёстӥ лобало ни. Таосыз Натӥлэн яркыт шобрет юдэсъёсызтэк но ӟеч уло.

Натӥ азьлань вамыштӥз. Мынэ, тодыса кытчызэ. Бызьылыны потон интые, тур-пар юбказэ дӥсяса со кошкиз «Мусур» баре. Кошкиз огназ, кошкиз валаны: сюлмыз калык пӧлы ик куриське, яке лул серегъёсаз ватӥськемез потэ. Тани ӝоген син азяз адскиз бадӟым букваосын тылын пиштӥсь «М сур» гожтэм. «у» букваез малыке уг ӝуа ни. Пырон азьын пиосмуртъёс тамак кыскыса сыло, ог-огзылы мадё, кызьы соос кышномуртъёсты котыръязы но кылем уйзэс тодазы вайыны тыршо. Натӥ соос шоры учкытэк, усьтӥз ӟукыртӥсь корт ӧсэс. Нырпельёсаз соку ик сураськем зын шуккиськиз: макмыр, аракы, чебурек, кизь, пӧсям пи мугор…

«Мусур» бӧлетэ калык тыр люкаськемын. Борддоръёс синучконъёсын лякылэмын. Тодмотэм ымныръёс пӧлын тодмоосыз пиштыло. Уг пот соосты адӟем, малпаз ас понназ Натӥ, но сэргын сылӥсь пичи ӝӧк сьӧры огназ пуксиз.

Со шоры мырӟиськиз югыт кузь йырсиё нылаш. Син улаз ошиськылэм бадӟым пуйыосссэ ватэм: ымдуръёсызлэн куасьмемез лемлет помадаен ватэмын, питырес бамъёсыз льӧль пызен наштамын.

- Озьы тӥни Натӥ, - шуиз аслыз нылаш. – Пуком ми тонэн кыкнамы татын. Ньылонмес коттом, кӧтмес тыром, сюлэммес буйгатом но кошком.

Татчы люкаськем калык – ваньзы огназы кылемын, котыразы адямиос вань ке но, сюлэмзылы матынэз ӧвӧл. Татчы вуыса соос тырмытыны туртто тыртэм лул посудзэс. Вераськонъёсын, сурен. Натӥлэн йыраз, соосты адӟыса, малпанъёс бугыръясько:

«Малы меда мон весь оген кылем адямиос доры кыстӥськисько. Тани учкиськод соос шоры, огшоры адямиос кадь, соос ӧвӧл кадь огназы. Асьсэ малпанъёсазы гинэ соос огназы. Мӧзмо, жаляло асьсэзыс, возьмало, ку соосты шумпоттозы, кытчы ке чортозы яке эркияса возёзы. Висён со, висён ни».

Со дыре одӥг ӝӧк сьӧрысь воргорон султӥз. Ачиз золгес ик юэмын ни, но дӥсяськемын чылкыт. Катаосыз, пурысь штаниосыз, лемлет дэремез. Очкиен. Оодӥг син улаз сӥнякез ӧз луыса ке, юан кылдысал: тон мар татын кариськод, интеллигентной адями? Со синйылтӥз мукет ӝӧк сьӧрын пукись кык нылъёсты. Соос доры воргорон матэгес лыктӥз но шуэ:

-Толэзь ортыса, мон кошкисько. Ожгаре но сое шуыны луэ. Ӟучъёсты утьыны, Донецке.

Кышноослы гожтэтсэ мытӥз:

- Потэ ке, лыдӟе, потэ ке, кесялэ. Толэзь я кык ортчыса. Оло мон уг берты ни, оло сӧсырмо, мон гу тодӥськы. Ттын но мон нокинлы кулэ ӧвӧл, сои ник кошко.

Соосыз мар вазьыны ик паймизы. Одӥгез воргоронлэн киысьтыз гожтэтсэ басьтӥз но кисыяз донгиз.

- Лыдӟе. Жаль, монэ татын нокин но уг возьма шуыса. Жаль.

Воргорон берен аслаз ӝӧкез сьӧры пуксиз. Кышномуртъёс доры кытысь-отысь туганъёссы вуизы. Воргорон мур лулӟиз.

Солы сётоно меда шобретлэсь ог юдэссэ? Носо огшоры ассэ гинэ курадӟытэ, со мукет сямен но улыны быгатэ ук. Тани таиз, кудӥз али костылен «Ой, тӥ чебер нылъёс» кырӟанъя эктэ быгатэ уже интыяськыны, уен-нуналэн ато та барын юыса кылле. Кӧня али сӧсыр адямиослы уж. Нош таиз шоры учкыса ик оломар луоно: малы тон астэ быдтӥськод? Учкы ай, ымнырыд тӧрнамын, дӥськутэз кесяськемын, мугорыз кырсь, котыртӥд кутъёс лобало ни. Тон быгатӥськод ук одӥг ӵукна султыны но шуыны аслыд: «Уг! Уг ни юы. Мыно документъёсме лэсьтыны но уж утчаны». Малпалод, таӵе дыре кужмо кышномурт гинэ таосты киултыны быгатоз на яке кужмо яратон. Но тани барлэн одӥг сэрегаз пуко огогзэсты кужмо яратӥсьёс, кыкназы но огкадесь: юо, кыско. Натӥ аливаньзэсты, жуг-жагез кадь, пуйые ӵужыса понысал но сямзэс кыдатыны нуысалыз. Кытчы? Кытчы ке, кытын трос уж, Малпаськыны но дырзы медаз кыльысал ни.

Нокинлы кулэ ӧвӧл сётыны шбретлэсь юдэсъёссэ, зэмзэ ке, ӧвӧл пачкатӥсь шобрет но. Вань мылкыд, кудзэ луэ воштыны. Натӥ сое вала но «Мусурлэн» одӥг сэргаз пыштурынэн чай юыса пуке. Крезьгуро автоматысь «Ой, тӥ чебер нылёс» кырӟан чузъяське, нош адямиос озьы ик юо, кыско, экто. Мед.

Огъяулонниысь кышномуртъёс

 Огъяулонниысь староста бича подписъёс:
- Воштоно управляющий компаниез. Юнме, пе, уксё кесьыса возе!
- Огъяулоннилэн мурӝолысьтыз улляно М. но А. вузкаронниосты, мар юнме татын ми вылы уло!
- Юрт вылын  реклама ошиськыса улэ, нош ми уксёзэ ум адӟиське!
Али вуо быръёнъёс.
- Сётэ курадэс М. Б. понна, со милемлы та ужпумъёсмес серттыны-пертчыны юрттоз, эшшо азбармес котырто, шуиз на.

Старосталы пумит вань  мукет группировка. "КУРИЛЬЩИКЪЁС", кызьы соосты нима страосталэн командаез. Ог-огзэсты материтьтыса возё, урод вераськонъёс вӧлмыто... ну валады. Прямо страсти. Таосызлэн йырзы уксё бича выж миськисьлы уждун тырон понна, унитаз но газ плита воштон понна. Ӝынызэ кисыяз донге, кызьы вера староста. Озьы ик со малпа, рекламалэсь но подвалын интыськись магазинъёслэсь но соос уксё басьто шуыса. "Курильщикъёс" бырйёнъёсы пыриськыны уг туртто.

Огъяулонни романтика. Тарканъёс.

Огъяулонни. Татын. Уло семьяос. Уло ини кемалась. Асьсэ тараканъёсынызы - ӝӧк вылъёсазы но йыръёсазы.

89-тӥ комната. Удмуртарня. Ӝыт. Ӧсъёс мышкын кесяськем куараос кылӥсько - воргорон юыса бертэм, сьӧраз эшшо эшсэ кутэм на. Со инвалид, ужаны уг ужа. Кышноез Нефтемашын тырше. Чиньыосазы зундэсъёссы ӧвӧл,  комнатаысьтызы ог-огзэсты улляса калзы быре.
Тани ӧс усьтӥське но, воргоронлэн эшез, йырзэ уллань лэсьыса, комнатаысь ганяк потэ, корт ӧсэз пытса. Укно доры кошке. Сьӧраз гордэктэм ымнырын Вася потэ (озьы медло нимыз) но корт ӧсъёсты жон! пытса. Эшез доры укно дуре мынэ. Тамак кенӝыто. Укноос усьтэмын, тол тамак ӵынэз берен корридоре пельтэ.
Тани кӧняети сӥзьыл ни та комнатаын суред уг воштӥськы: Вася юыса бертэ. Кышноез керетэ. Нош нылзы шып гинэ будэ.

88-тӥ комната. Таиз комната мынамез вӧзын интыяськемын. Татын азьвыл пересь кышномурт улэ, котьку шыпыт луылэ вал. Пенсие потэмез бере но ужаз заводын. Ӵемысь куное ветлылӥзы нылпиосыз. Ужаны дугдэмед бере, шуылӥзы - пересь ӧвӧл на ук, ужаны но быгатӥськод на вал. Кӧня ке дыр ортчыса пересь улыны кошкиз гуртэ. Табере отын улэ пинал ныл. Борддор сьӧрысь телевизор куара кылӥське - валамон, Мтв-ысь клипъёсты учке.


87-тӥ комната. Котькуд ӝыт ӧсъёс мышкы ыше тӧдьы йырсиё 20 аресъем пияш. Дышетске со университетын. Анаез - туж чылкыт но умой дӥсяськись кышномурт. Атаез - йӧн-йӧн, паськыт пельпумо, ӝужыт воргорон. Семьялэн вань машинаез. Комната азьын пыд ӵушон.
Матысь дыре семья квартирае улыны выжоз ни, дыр.

86-тӥ комната. Татын улэ кышномурт. Огназ. Быдэс улонзэ ни ужа Ижмаш больницаын, медсестраен. Юбкаен Плюшкин. Мар шедьтэ - ваньзэ вае комнатаяз, гуртын марлы ке яралоз ай шуыса. Брюки - вынызлы, пу юдэс - корка борды шуккыны, паралон? Оло диван вуро ай. Дырысь дыре кышномурт дораз сузэрезлэсь нылъёссэ ӧтьылэ - уксё сётэ, пыжем куреген сюдэ. Сюлмаське ваньзы сярысь.

85-тӥ комната. Гуртысь кышномурт вуиз городэ нылыз сьӧры. Со улэ та комнатаын, нылызлэн семьяез одӥг этажлы улӥынгес. Арнялы огпол соос ваньзы ӵош бертыло гуртэ. Кышномурт вань люкам арбериоссэ гуртысь корказ нуыны турттэ. Нылыз кесяське: " Нош ик машинаын интыез ӧвӧл ни!" Тулыс со бакча сиёнлы рассада кизе. Отпуск потыкуз, кошке гуртэ. Нылыз нош ик зуле: "Малы тон соосты мерттӥськод? Отпуск дыръяд, кин соос вылэ ву кисьталоз?" Сӥзьыл вуэ но быдэс семьяез шумпотыса сие кышномуртлэсь вуэм помидоръёссэ.

Полина Кончиталы адӟем кариз кадь

Значит учкиськом Евровидение, ну так, паралелльно. Полина Гагариналэсь но Финляндиысь рок-группалэсь кырӟамзэс гинэ ачим учки. Комнатаысь эше сыӵе шуэ: "Вот милямъёс арысь аре вормисьёслэсь адӟем каро. Одӥг аре сыӵе энергичной пияш вормиз, вуоно аре милям но энергичной номер каризы, кылем арын вормиз романтичной кырӟанэн Кончита, туэ Полина Гагариналэн но номерез сыӵе ик".

Ӵошатон понна юри учки ук Кончиталэсь номерзэ. Кылем арын Австриысь Кончита одӥг интыяз сылыса кырӟанзэ нёжъяз, тӧдьы дэремен сцена вылэ потӥз, интыысьтыз воксё ӧз вырӟылы. Нош табере ӵошатэ Полина Гагариналэсь туэ номерзэ. Прак сыӵе ик: тӧдьы дэремен, интыысьтыз ӧз вырӟылы, нёжъяз Кончиталэнлы тупась кырӟан. Эшшо: 2010-тӥ арын задор кырӟанэныз вормиз Германиысь Лена Майер, 2011-тӥ арын Евровидениын тэтчаз Алексей Воробьёв. Брангуртысь песянайёс гинэ вал мукетэсь, ито соосты отчы лэзьыны уг одъяло вал, Россиысь  кизилиос пӧлын вормизы ке но.

Фантазизы уг тырмы ни, лэся. Вуоно арын мар возьмалом?

Эшшо сыӵе тенденция мынэ: нырысь вормиз Кончита, туннэ, кин тодэ, оло Финляндиысь мусо даун пиос вормозы. 

Антиутопия кыӵе ке

Али ми, зэмзэ ке, поистине исторической дыре улӥськомы. Мар луоз азьланяз? Кыӵе государственной строй воштоз та "мнимой" демократиез? Сётозы на-а шокчыны блоггеръёслы (мон али шуисько зэмос блогеръёс сярысь, кудъёссызлэн малпанъёссы обществолэсь малпанъёссэ воштыны быгато, кудъёсызлэсь кышка Правительство)? Нокин но та юанлы валэктон уг тоды.

Ну ярам, тодамы ваём Вангаез, тайзэ ваньзы тодо, дыр. Со шуиз вал, Путин вакытэ луоз война, но Россия отын вормоз. Эшшо, пе, Россиын калык нырысь Президентсэ, сӥлы карыса, карлудъёсы потоз. Нош собере кутскоз граждан ож, малыке шуоно калык акыльтоз та системалэсь, кытын государство нокинлы шоканы омыр, лобаны эрик уз сёты ни...

Мистикаысь табере литературае выжом. Эше вераз вал "Время сэконд хенд" книга сярысь. Сое гожтӥз Светлана Алексиевич. Дэмласько та писателен интеврвьюез лыдӟыны.  "Время сэконд хенд" - со "Красный человек. Голоса утопии" сериысьтыз берпуметӥ (5-тӥ) книгаез. Эше верамъя, автор анализириоватьтэ дуннеын али кылдэм югдурез. В итоге: Россия ӝутскоз, вань кунъёслэсь кужмо луоз, нош, дыр ортчыса, трос люкетъёслы пазьгиськоз. Мон малпамъя, улосвылъёсын адямиослэн самосознанизы шуныт шыкысысьтызы потоз но, али улонлэсь зэмос ымнырзэ адӟыса, Азьмуртлы пумит султоз. Озьы, нырысь, кылсярысь, Чечня   бунт ӝутоз, собере Татарстан, берло оло Удмуртия но. Татын юан кылдэ: кыӵе основания улосвылъёс асьсэлэсь государствозэс кылдытозы. Уз луы-а меда со основание йӧскалык бордын? Нош ик берытскиськом отчы, мар бордысен  азинскыны кутске котькуд государство. 

Али  Ижкаре вуылӥзы туж тодмо оппозиционеръёс, журналист расследовательёс. Григорий Пасько, Алексей Симонов, Галина Сидорова, Елена Масюк, Игорь Корольков. Тӥляд со нимъёсты кылэмды ӧвӧл ке, (куд огзэ коть вань, дыр, всё-таки), но оске мыным, со кадь бадӟым журналистъёс, особенно али пророссийской дыре, ӧвӧл. Со, дыр, берпуметӥосыз пӧлысь, кудъёсыз дӥсьто на П-лы, мерлыклэн куэм малпанъёсызлы но кунлэн сиситемаезлы пумит кылзэс вераны. 

Соос ваньзы сямен шуо: госудасртво котькытысь утча иностранной агентъёсты, Журналистъёслэн фондъёссылы уг сёто уксё, пӧртэм огазеяськонъёс кунгож сьӧры ужало шуыса, судэ иск сёто, оппозиционеръёсты пытсэт сьӧры пукто, яке воксё виё (Борис Немцовез ватон ужрадын, кстати, Ксения Собчак доры кышномурт лыктэм но шуэм: "Ты - следующая!") Блогъёсты пыр учкыса уло (по ключевым словам мониторитьто). И тӥ малпаськоды, Интернетын эрик вань шуыса? Усьтэ грани.ру оппозиционной интернет-порталэз, уд ик быгатэ - заблокироватьтэмын. Блогеръёсты экстремизм но национализм (таиз улэ удмурт блогеръёс точно сюрозы) понна пытсало. Матысь дыре, малпасько, интернет но быдэсак государстволэн кияз кутэмын луоз, мкш иностранной порталъёсты ворсалозы. Кызьы Китайын - отын ведь уг тодо гуглэз, отын асьсэлэн, западлэсь котыртэм интернетсы. И ми, удмуртъёс, асьме кылынымы гожъяськыны ум быгатэ ни - малыке шуоно государственной кыл - ӟуч. П. удмуртэз уг тоды ук. Да и со но куке но кулоз ни. 

Антиутопия кыӵе ке. О. Хаксли "О дивный новый мир", Е. Замятин "Мы", Д. Оруэлл "1984", Р. Брэдбери "451 градус по Фарингейту"... улон со.

:-)

Огъяулонниын оломар но луэ. Куддыръя удмуртъёсты  адӟемпотостэм каро. Ачим мон сыӵе учыре ӧй сюры на, ну и умой. Жугиськыны кутскысал, дыр. А так, уг валаськы, кыӵе шузи кулэ луыны таӵе кылъёс верась адями:

"Мне не нравиться удмуртский. И когда я в комнате - не разговаривай на нём! Или хотя бы не по полчаса!"

Ммм? При том со адями журналист, кудӥз ужалоз кыӵе ке газетын, куддыръя гожъялоз пересь нэнэйёс сярысь но пӧртэм йӧскалык адямиос сярысь. Со журналист тодэ этикаез (туж оскисько). Со журналист тунсыкъяськись (туж оскисько), но,  пӧртэм культураосты пыӵатыса, будӥсь, визьмогес луись, дыр.

Со вуоно журналист доры, комнатаяз, мон эшшо 3 удмуртъёсты интыясал на. Визьмогес мед луоз шуыса.

Зэмос лул. Кытын тон?

Кыӵе со туала удмурт нылаш? 

"Эль ныл" фестивальын Татьяна Москвинаен вераським. 

- Блогеръёсын календарьдэс учки шуэ. Кытын тон,  Татьяна Москвина шуиськод отын - шуэ Татьяна Никитична мыным. - Сюлэм ик шумпотӥз та темаез ӝутэмед понна. Нокин но азьло озьы открыто ӧз вералля на со сярысь. Уд кышкаськы.

Мон дыг-мог луи. Мар вераны ӧй вала ни. 

"Та выллем фестивальёс но куд-ог адямиослы акыльтӥзы вал ни. "Гербер" отын арысь аре, весь одӥг кадь ортче, нокытчы но уг буды. Нош татын маиз ке но мукет вал: "Герберлэсь" трос лёгетлы вылынгес. Но сизьым ошмес йылтӥ нуллӥсь нылашлэн "чилясь" дэремез... Кытын тон, Татьяна Никитична Москвина? Шарканын тонэ уг тодо меда?"

Та гожтэме ласянь вераз Татьяна Никитична. Мон, шуэ, Шарканэ ачим но вазиськылӥ,  тӥледлы шаркан сямо удмурт дэрем вуро шуыса. ӦЗ КЫЛЗӤСЬКЕ, ПЕ. Кыӵе чебер шаркан дэрем, нош соос ялан со чилясь дэремъёссэс вуро. Котькӧня вера, но адямиос уг валало.

Бен, кӧня эн вера, но адямиос уг валало, кыӵе синмез сутэ чилясь стилизованной удмурт дэрем. Огшорыгес, удмуртлэн лул инкуазезлы матынгес луыны секыт лэся.

Тани "Эльнылэ" вуиз Пермьын "KAMWA" фестивалез радъясь Наталия Шостина. Со, пе, фестивале вуи вазьгес, соку нылъёс буясько на вылэм. Вот, шуэ, юасько, пе, модалиослэсь: "Удмуртъёслэн кыӵе естественной буяськемзы?" Яке шуом, кызьы азьло удмурт нылъёс буялляськизы. Нылъёс, пе, шугомизы но веразы ик, удмурт кышномуртъёс уг буясько вал шуыса. "И малы иське тӥ али синлысъёстэс буяськоды но ымдуръёстэс наштаськоды?" - юай, пе, нылъёслэсь Наталия. Риторической юан, ыы ведь.

Ваньмыз фальш, эрико ымныр ватэмын маска сьӧрын. Сю полэс туала дӥськутъёс улысь уд шедьты ни чылкыт, номырин ватымтэ но саптамтэ зэмос лулэз. 

"Инвожо" сярысь

Вот кутӥсько киям "Инвожо" журналэз. Шумпотыса кутӥсько - татысь тунсыко материалъёс лыдӟыны луоз шуыса: литература, крезьгур, улон сярысь. Бамъёссэ берыкъяны кутскисько но, уг валаськы, куд пала вамыштэ журнал.

Солэн собыдӟа потенциалэз. Потэ, шуом, толэзьлы огпол, кӧня дыр вань ӟечлыко материал лэсьтыны, пӧртэм удысъёсысь маке тунсыкозэ шедьтыны, мае уг тоды визьмо лыдӟись. Туала лыдӟисьлы мыд-мыд журнал кулэ, сое лыдӟыса лыдӟисьлэн лулыз мед буръяськоз, буш медаз кыльы. 

Егитъёслы журнал шуыса нима со ассэ, азьло художественно-публицистический вал на. Али малыке ӧвӧл ни, озьы али пусйысал на ке, мон пӧсекъясал, дыр, журнал бамъёсысь публицистикаез шедьтытэк. 

"Udmurt image" ӵектоссы сярысь кӧня ке кыл верам потэ. Проект туж тунсыко, ыы ведь. Соглаш. Но кызьы со быдэстэмын!. Кылемаз Журналлэн вылбамысьтыз Алексей Пикулевлэсь ымнырзэ адӟыса, мынам сереме гинэ потӥз. Кызьы, Инмаре, со Амань Олёш, кудзэ мон сомында аръёс ӵоже тодӥсько? Кытын солэн аслаз стилез? Кытын солэн тур-пар штанъёсыз но реп стилез. Солэн со стилез вань ук, мар кариськод тон пиосын Никита Ильин!

Вот, ӧд тоды ке, Ваня Белослудцевез но Алексей Пикулевез улонын, но соосын та журналын гинэ тодматскысал ке, малпасал ас поннам: "Ну, и маин соос ог-огзылэсь пӧртэм луо?" Ладно, Ваняез кызьы но озьы тодмай ик, нош Олёшез - ой!Эшшо та проектлэн мукет палыз вань на ук. Со - интервью. 

Пыр-почгес, ӟечгес со интеврьюез лэсьтыны луэ, дыр, малпасько. Тунсыкогес отын, кыӵе ке изюминкаен. Татын мукет интеврьюоссы сярысь но вераны кулэ. Вот лыдӟи мон Александр Шломанэн, Дмитрий Корепановен интервьосты, но сыӵе осадок кылиз, будто та материалъёсты чаляк гинэ лэсьтӥзы, вот кылиз одӥг час, кулэ номерез поттыны. Авторъёс нош кыштыр-кыштыр гинэ юалляськизы но асьсэ пыр поттытэк гожтӥзы. Кӧты ӝож луэ. 

Ма малпасько, азьло "Инвожо" пыр-поч лэсьтӥське вал кадь. 2000-тӥ аръёсы туж кужмо литреатурной критика но вал, пӧртэм удысъёсысь материалъёс но вал. Школаын дышеткыкум лыдӟылӥсько вал. Али но, юри,ӵошатон понна, поттӥ кровать улысьтым 2006-тӥ аръёсысь журналъёсты. Огласянь зӧкгес но вылэм, материалъёсыз но трос пумо темаё вылӥллям. Лыдӟисько, но шумпотко. 

Нош табере уг тодӥськы. Да эшшо дизайнэз ласянь. Точечно сыӵе кинлэн ке вкусэзвань, одӥг бамаз умой дизайн, нош мукетаз оскем потэ. Д и мукет аръёсы потэм номеръёсын но со проблема шӧдӥське. Усьтом берпуметӥ номерысь 56-тӥ бамез. Текстэз туж тунсыко дизайнэн пуктэмын, нош туспуктэмъёсыз ваньзэ портитьто. Ӟечгес соосты пуктыны луэ ук. Миша Николаевлэн суредъёсыз туж сюлмыя, туалаесь соос. 2-3-тӥ бамъёсысь материалэз вообще лыдӟем уг пот. Что за пичи пиналлы кадь дизайн!

Дыр то мынэ, улон то азьлань кошке. Толэзьлы одӥг пол потӥсь журналлы, малпасько, котыр ласянь ӟеч луыны кулэ. нош али, кызьы мыным потэ, журнал лэсьтӥське школаын дышетскись егитъёслы. Так, соослы ярам шуыса. Мыным тунсыкогес лыдӟыны азьло аръёсысь номеръёсты. 

Всё. Табере аслам гожтэме сярысь кыл вералэ. 

Ярдуртэм нюлэс

"Ватка" театре мон 1-тӥ курсын ачим но ветлыны кутски вал. Школа дыръям ми постановкаос пуктылӥськом вал бере, туж потэ вал та хоббиме азьланьтэм. Но малы ке ӧз пӧрмы отчы кыльыны, иське, улонам мукетыз гажаноезгес уже вал.

Тани 3 ар учксько ни мон "Ватка" театрлэсь шудэмзэ. Котькуд ар ветлӥсько постановкаязы, котькуд ар учкисьёссылэн лыдзы уг буды. Маин со герӟаськемын? Культураентунсыкъяськись удмурт егитъёс пумен быро, лэся. Ледниковый период сыӵе.

Котькуд ар та театр кыӵе ке выль амал шедьтэ. Озьы ке но одӥгез уг воштӥськы: котькуд постановка поэтической ӧртӥ кошке. Василий Серафимович Ушаковлэн, режиссёрзылэн, сыӵе лулыз ни, лэся. Солэн котькуд адӟытонэз ненег, кырӟась, югыт. Тодады гинэ вае "Матӥ но Марданынсь" Матӥлэсь чылкыт лулзэ. Со шоры учкыса, син азе пуктӥськод ненег тылобурдоез, кудзэ бордаз йӧтскыса гинэ вӧсь карод кадь. "Солдатъёс ке кошко" поэтической адӟытонын войнын матысь адямиоссэс ыштэм кышноослэн кайгыронзы возьматэмын вал. Татын но героиняос чылкыт лулоесь.

Со бордын ик Ушаковлэн постановкаосызлэн кужмыз: егит артистъёс шедьто кадь кадь огкыл егит сюлмо режиссёрен. Но "Ватка" театр уг пӧрмы классической театрлы, со луэ экспериментальной актёръёслэн шудэмзы но, адӟытон пуктэм ласянь но. Соосты учкыса лул ик шутэтске, мкш со - мукет.

"Ярдуртэм нюлэс". 4 чебер нылъёс, нюлэс нылъёс. Постановка пыр потэ одӥг малпан: туннэ тон нырысьсэ сайкад.  Котькуд нунал - сётэ марке выльзэ. Котькуд нунал нюлэс нылъёс маин ке но пумисько, шуг-секытъёсын но шумпотонъёсын пумисько.

Та адӟытон Лариса Ореховалэн кылбуръёсызъя пуктэмын. 20 минут куспын нылъёс трос мылкыдъёсты возьматӥзы. Я соос ненег нюлэс нылъёс, я соос гозыосын керттылэм лулъёс, я соос сьӧд кужымъёс... Та потсановкаын та дунне вылын улӥсь вань мылкыдъёс сураськизы кадь, но зир-зир бергаса огазеяськизы.

Адӟытон вал минималистической. Реквзитъёссы ӧжыт, но котькудӥз соослэн асьсэ пуштроссы вал, асьсэ кужымзы. Басмаослэсь лэсьтэм тряпкаез адӟыса, но сое син азям лулоен пуктыса, мугор ик юзыр-кезьыр луиз.

Ярдуртэм нюлэс - пумтэм дунне, кытысь ваньзэ шедьтыны луэ, кытын котькуд адями котькин луыны луэ. Нош тон котькуд нунал выльысен сайкаськод, но котькуд нунал усьтӥськод ярдуртэм нюлэслэсь выль писпузэ.

Тау, "Ватка" театрлы, тау Лариса Ореховалы, таӵе аспӧртэмлыко адӟытон понна.

Дуэ

Удмуртъёс ноку но верблюдэз адӟылэмзы ӧй вал. Соин ик али верблюд шуонзы - "дуэ" - искусственно малпам кыл. Но кытысь со потэмын то?Туннэ дото зл серекъяй, куӵыктыны ик кутски.

Верблюдлэн дуэ видэз,пе, вань. Кыӵе ке но визьмо удмурт адями верблюдлэсь видъёссэ изучатьтӥз но, малпаз, лэся, верблюдэз удмурт сямен ӟуч кылын дуэ шуыны. Могдос.

Динаен учыр

Дина (2,5 аресъем нылаш) адӟиз лымы улысь потэм жуг-жагез. Мамаеныз садикысь гуртаз бертэ. Сюрес дурын канфет бумагаос.
- Мама, мар со? - жуг-жаг шоры возьматыса юа.
- Бумагаос, пичие.
-Канфетлэсь-а?
-Ы-ы.
- Кин сое татчы куям? Какакъёс!

Пичи пиналлэн но кыӵе культураез ни. Канфетсэ но усьтэ ке, бумагазэ котьку жаг куян ведрае куштоз.

Алексей Иванов

Ваньзы возьмазы Алексей Ивановен пумиськонэз. Реклама но сокем ӧй вал, нош люкаськиз быдэс зал.

Книгаосты лыдӟыса, тон азе пуксе авторлэн ымнырыз, сямыз, оглом, -  тусыз. Телевизор пыр возьмато но, тон малпаськод:
- ооо, кыӵе со классный, пумиськысал соин, вераськысал соин.

Но тани, со вуэ тон доры (яратӥсько Ижкарез таӵе луонлыкъёс сётъямез понна). Тон мынӥськод со доры, кылзӥськиськод сое, но валаськод, умойгес луысал, мон тонэ та улонам ӧй адӟысал ке.

Мон жаляй, сое адӟи шуыса. Зэмос Алексей Иванов ӧз тупа мынам йырам кылдэм Алексей Ивановлэн образеныз. Уг тодӥськы малы, но со мыным вылтӥяськись потӥз. Огласянь, ваньзы шуо, со огшоры вераське, чёкатьтэ, кызьы вераз Удмурточка. Но вань солэн мукет сямыз но. Кызьы, кылсярысь, ужало кык эшъёс-дояркаос. Огез кошке Ижкаре  чорыг сузяны, нош таиз гуртаз ик скал кыскисе кыле. Ижкарын ужасез уз но вераськы ни скал кыскисен. Нош чорыг сузясьлэн маиз гинэ воштӥськиз улоназ? Уксё тросгес басьтыны кутскиз? Озьы ик Ивановен но. Вераське кадь огшоры, яратэ кадь Уралэз, историез, гожъяськонэз, но...улӥысь, сӥтьысь ӝутскем адями шуэ ке, Пермь - сисьмемын шуыса. Пермь, кытысь со потӥз, кудӥз сое тодмо кариз, книгаос кузьмаз. Уг тодскы. Та мынам аслам малпанэ. Мынам сюлмы ик ёркак луиз, солэсь та кылъёссэ кылыса.

- Солэн ӧй вал дышетӥсез. Ачиз дышетскиз.
- Литератураын одӥг произведение но сюлэмзэ ӧз берыкты, кельшисьёсыз вань
- Со аполитичный ӧвӧл ке но, али дырлы ымез ворсаса пукыны кулэ, шуэ. Котыр ваньзы асьсэлэсь малпанзэс шараяло. Соин ик ӧз вераськы Немцов сярысь но.

Одӥг удмурт гожъяськись шуиз, со, пе, пичи калыкъёсты ултӥя.

Со визьмо, вань гожъяськисьъёс кадь, целеустремлённой (литератураын али шоркарысь писательёс гинэ пиштыны быгато, нош А. И. ӝуатскиз), аслаз продюссерской агентствоез вань ни(трос проектъёс улонэ пыӵатыны быгатэ, телевидение кыстӥське). Со аспӧртэмлыко.

***

Азьвыл кылбурасько ук вал. Али тросгес прозаен. Али мылкыдъёс мукетэсь ни, улонэ мукет, учыръёс мукетэсь.

Кылбуретлы кулэ сюлэмез вырӟытӥсь мылкыдъёс, проза вылэ улонысь паймытӥсь учыръёс выдо.

***

Синкабакъёс вылэ-улэ,
умме усем уг лу маке.
укно сьорын туж бер сизьыл,
зор-кот сылэ синъёс азьын,
металлургед сюлмез сьӧдма,
яратонэ ке но буя
мынам кысэм мылкыдъёсме -
та ёрослэсь ульчаоссэ.

Мусо куа

Дэбес ёросысь Лесагуртысь таӵе мадёсэз тодӥ.

Москва, тодӥськод-а малы, пе, озьы нимаське. Удмуртъёс азьло отын со палъёсын уло вылэм - отын, пе, сьӧд музъем чебер нянь сётэ. Ӟучъёс лыктӥзы, пе, уллязы асьме калыкез, удмуртъёс кышкасесь бере. Нош удмуртъёс со музъемзэс Мусо куа шуо вылэм но, ӟучъёс  собере Москва шуыны кутскилля.

Муско - Мусо куа.

Могдос.

Данёгурт

Вот ас понназ гань-гань семьяын кадь улӥсь калык Дэбес ёросысь Данёгуртын. Потӥзы ваньзы клубе - газетэн пумиськонэ. Сӥлы каризы  куке но газет бамъёсы потэм котькуд адямизэз, данъяськизы. Ӝӧк сьӧры тужгес умой инты висъязы. Анайзы - библиотекарь Антонида Хохрякова котькудзэ ушъяз, тыбыраз вешаз, ӟеч кылъёс вераз. Быдэс коркан шуныт шуныт луиз. Эшшо 35 ар ӵоже кырӟась "Купанча" ансамбльзы котькудзылы крезьгуро салам лэзиз на.

Мусо, сыӵе мусо. Мар кулэ на ужась калыклы, ку тынэсьтыд уждэ адӟо но тонэн семьяед даъяське. Номыр кулэ ӧвӧл ни - со шудо луэ.

Нош та клубысь кыре потӥськод но - 15 градус кезьыт. Газзы котькуд коркан ӧвӧл, муръёосысь ӵын инбаме шонер ӝутӥське. Нош клуб азьын лымылэсь лэсьтэм Тол Бабай, кеч но мукет фигураос. Гуртазы нылпиос одӥг-кык - бускель гуртэ дышетскыны ветло. Ма клубе но копак пересь калык люкаськиз. Но татын коть колхоззы вань на. Соин кышномурт кивалтэ - Татьяна Хохрякова. Мужикъёсты интыязы пуктэ, бригадирзы но сыӵе ик: йыг-йыг бадӟым мугоро кышномурт Нина Протопопова. Со эшшо пенсионеръёсын кивалтэ, ужа, гуртаз муш вордэ. Кужмо!

"Шулдыръяськыны" яратӥсь воргоронъёссы но вань. Заллэн берпуметӥ пуконъёсаз пукизы но куддыр асьсэ малпанъёссэс вераллязы. Калык верамъя, ас вакытаз трос, пе, пиос гуртазы кышнотэк кылемын. Пиос корказэс уг кушто, нош кышномуртъёс гуртысь кошко. Ма кин лыктоз ужтэм интые. Таӵе югдур тросаз удмурт гуртъёсын ук. Инфраструктура ӧвӧл ведь гуртын. Тани али валатскозы но, нош ик гурт удыс борды кутскозы. Но кӧня ар ӝтыны вырозы гуртэз? Нош бырем гуртъёсты но улонъёсты уд берыкты ни ук. Кыӵе кужмыз гуртлэн - ассэ гинэ уг, адямиез но быдтэ. Озьы оген кылем воргоронъёслэн ӧвӧл семьяоссы.

Татын Зинаида Рябининалэн кылбурысьтыз чуръёсыз тодэ лыкто:

...Мон асме жаляса ваи одӥг пинал
Табере калыке ӧжыт потэ.

Мукет гуртъёсын кадь, Данёгуртын асьслэн быдӟым адямиоссы вань. Мон шуисько быдӟым, малыке шуоно соос улоназы трос мае адӟемын ни.

Монэ паймытӥз одӥг кышномурт. Сое ожгар дыръя Смоленскысь та палъёсы лэзиллям анаеныз но пичи сузэр-вынъёсыныз ӵош .  Валамон ини, соослэн гуртсы быдэсак сутэмын вал, отын мынӥз ожгар. Эммигрантъёсын поезд, пе, быдэс толэзь Удмуртие вуыны выриз. Тупике пукто, пе, вал, мукет поездъёсты лэзё. Сиён уг тырмы, нылпиос висьыса куло, кулэм нылпиосты станцие куштыса кельтыны косо вылэм (шӧй висёнэз нуэ). Озьы та кышномуртлэн но пичи сузэрез кулэм. Кирове вуиллям вылэм ни. Анайзылы, пе, шуо, кельты кулэм нылпидэ. Валаськоды, дыр, кызьы со аслэсьтыз нылпизэ олокытчы кельтоз. Киров стоянкаын адями шӧйёслэсь быдэс гурезь, пе, люкаськемын ни. Анаез нылпизэ отчы понэ, кошке, сюлмыз уг чида но пиналызлэсь шӧйзэ берен кияз кутэ...

Озьы соос вуиллям, нырысь Кезэ, собере Дэбесысь Данёгуртэ. Ужамын фельдшерен, зор-кот-а, толалтэ тӧласькыку-а - котькыӵе куазен гуртъёсты котыртылэм. Нош азьло транспорт ӧй вал.

Тӥни, соос сярысь романъёс гожъяны кулэ, соослы йыбырттылыны кулэ, нош ми кыӵе ке Аброськинэз почётной гражданин Удмуртии кариськом!

Олокытчы кошки. Дэбес ёросын котькуд гурт - история. Табере валасько, макем узыресь вылӥллям Кузебай Герд но Григорий Верещагин. Нош со учыръёсты ӧд кельты ке, соос адямиосын ӵош кошкозы. Мар кылёз на собере? Сям-йылолъёсмес но вунэтӥськом ни но.

Тау!

Дэбес

Мынам кутскизы гуртъёстӥ калтыртонъёс. Со понна улонэлы тау шуисько.

Нырысьсэ Дэбес ёростӥ мон ортчи Арт-экспедицилы луыса. Пыр потыкумы, мон бадӟым лыз черкез но сюрес дурысь кык этажъем трос квартираё коркаосты сяна номыре ӧй адӟы. Уй палъёсысь огшоры черкогурт, малпай мон соку, - куанер, начар но пичи. Озьы вылымтэ.

Паймоно кадь, маиныз меда Дэбес ас бордаз кыске. Одӥг пол гинэ ветлыса, валасько, отын вань бордаз кыскись кужымез. Шунды Мумыез юнме Дэбес ёросысь ӧз шедьтэ, дыр, ук.
Шедьтӥзы сое Зарни Варни (Варни гурт) гуртысь шайвылысь. IX дауръёсы ик удмуртъёс Шунды-мумыез возьматӥсь пельугыос нулло вылэм ни.

"Куке но вашкала удмуртъёс Инмаръёссылы оскемысь дугдӥллям но Шунды-мумы соослы
шунытсэ сётэмысь дугдэм. Озьы пересьёс Варни нимо пияшез келяллям утчаны Шундыез. Пияш сое гурт дурысь шедьтэм.  Шунды-Мумы сое адӟыса шуэ: мон нокинлы но адӟиськиськы. Нош тон лыктӥд бере, шуо тыныд: мертты пужым -  Инмаренвераськыны, мертты кыз -  куазен вераськыны. Мертты кызьпу -   куазьлы йыббырттыны. Пияш озьы ик лэсьтэм но Шунды-Мумы калыклы нош ик шунытсэ сётыны кутскем".

Таӵе чебер мадёс вань Шунды-Мумы сярысь. Нош Варни - со, пе, шурлэн нимыз. Вашкала удмурт кылын "варни" со, пе, "гурезьёс вискытӥ чукыръяськыса бызись". Варни шур зэмзэ но озьы ик бызе.

***
Зарниысь кырсе выжом. Дэбестӥ ортчемын Сибирь тракт. Пичи дыръям Кедра Митрейлэсь "Сурсву" вероссэ лыдӟем бере, мон син азям пуктылӥ, кызьы куосын шобыртэм бадӟым салазкияз Екатерина II тӧдьы валъёс Дэбес сюрестӥ ворттылтӥзы, нош сьӧраз кортнам сютэм, ӟызы ссыльныйёсты лек военнойёс Сибире нуылӥзы.

Дэбесын пырам Сибирь трактлы сӥзем музее. Со юртын ссыльнойёс кӧлаллям. Туспуктэмъёсты учкылӥсько.
- Кыӵе жаль пото, соос пӧлын ссылкае юнме шедылэмъёс кӧня . - туспуктэмысь ссыльнойёсты адӟыса, ас поннам малпай кадь. Но мыным пумит вазись луиз:
- Соос пӧлын трос йыртэмасьёс вал, злостныйёсыз между прочем.

Буйгастки кӧня ке. Сибирь трактысь потэмын трос визькылъёс. Кылсярысь, "доставить живым или мёртвым". Солэн пуштросэз таӵе. Сюрес вылын адямиос висьыса, жуммыса кулылӥзы. Нош Сибирёзь сюрессы 2 ар кыстӥськиз. Со дыр куспын ӝыныез бригадазы сюрес вылэ ик катьтэммылэ но вал. Нош конвоиръёс котькуд ссыльной понна кыл куто вал, одӥгез но соос пӧлысь медаз пегӟы шуыса. Кулэм муртъёсты "пункт передачиын" гинэ кельяллязы. Озьы одӥг пункт перевалысен мукет пункт перевалозь кулэм муртэз мукет ссыльнойёс пельпум вылазы поныса яке ньыж кыскыса нуизы. Котькуд перевалын бригадаез списокъя эскеро вылэм.

- Кытын Иванов?
- Тани шӧез!
- Ага, ӧз пегӟы, кулӥз!

Нош шӧйзэ ӧз вайысалзы ке, Иванов пегӟемен лыдяськысалыз.  Кинлы ке сюрысал.

Конвоиръёс котькуд пункт перевалаын вошъяськылӥзы. Зураысь Дэбесэ зураос ссыльнойёсты вайылӥзы, дэбесъёс  бригадаез  мукетъёсызлы киысь кие сётъязы.

***
Библиотеказы Дэбесъёслэн вуж коркан интыяськемын - но макем со чебер ай. Кин шуоз,
удмуртъёс азьло пеймыт улӥллям шуыса. Одӥг пичи но озьы ӧвӧл. Собыдӟа корка пуктэмын, сыӵе архитектураен: укноосыз бадӟымесь, улӥын, кыкетӥ этаже тубатъёс... Отчы пыраны кулэ. Жаль сыӵе коркаез куашкатыны, но солэн но дырыз вуоз ни ук. Шӧдӥсько ни, берпуметӥ шокчемъёсыз шӧдӥсько ни.

Дэбес - уйпал удмуртъёслэн центрзы, ваньмыз ласянь. Мон сое валай. Кстати, Варниын азьло удмуртъёслэн карзы вылэм. Иднакар выллем.

***

Администрацилэн кыкетӥ этажаз сылӥсько вал. Укное учки но син азям Дэбес кырым пыдэс вылам кадь пуксиз: коркаос-коркаос, Чупчи шур, Байгурезь но нюлэсъёс.

"Байгурезь йылысен  учкисько тон шоры  Тӧдьы Кам кадь паськыт Чупчи шур". Байгурезь йылэ ӧй туба. Таяз арын фин-угор журналистъёслэн фестивальзы отын ортчоз ай. Ваньмыз азьланяз.

Озьыен, берытско на мон дорад, Дэбес.

***
Кӧня ке туспуктэмъёс.

Север

Андрей Першинлэн "Север" адӟытоназ олокинэз но вал: кореец, удмурт, ӟуч... Соку дядяелэн верамез тодэ лыктэ - ваньзы одӥг тусьтыысь сисько. Ӧвӧл искусстволэн национальностез, со - огазея. Соин ик искусство тулкым вылын веттаськыса тон эрико луиськод, но со дыре ик аслыд шуныт корка шедьтӥськод.

Андрей Першин мон понна, быдэсыз искусство. Азьло мон озьы уг малпаськы вал. Учки куке но 3D берпуметӥ ужзэ. Зэм ке, дото ӧз кельшы вал. Мар малпасько, Першин но Першин. Кыӵе мон янгышай, тӥ уд ик тодӥське. 

Вераськыса сылӥськом.

- Тон вӧзын сыло удмурт блогеръёс, кудъёсыз тон сярысь ярато гожъяны, - вера Лёша Шкляев.

- Да? Вань удмурт блогосфера? - паймиз Першин.

- Да эшшо кыӵе!

Мон пукси пукон вылэ. Соос сылӥзы.

***

Палэнын сылӥсько. "Гагино" кинозэ возьматэмез бере, Першин маке вераны кутске. 

- Отын так ке политической моментъёс но вал, но мон соосты куштӥ. Сталин сярысь пересь трос вералляз. Туж тунсыко арбериос вералляз. Кылсярысь, ми, пе, сое туж гажаськом вал. Нош Сталин кулэм бере, кышкам зол. Милям йырамы уг пыры вал, мар табере луоз странаен. 

Сталинтэк адямиос страназэс уг адӟо ни вылэм, иське. Мон дядяелэсь юалляськи вал куке но Сталин сярысь.

- Тӥ Сталинэз яратылӥды-а?

- Оломар. Шуо, со трос адямиосты репрессироватьтӥз. Мон армиын вал, ку со кулӥз. Горбачёв дыръя туж шимес вал: Афганистанын ожгар... Со вылэ мынам йыры кур, кӧня адямиез быдтӥз, - шуиз дядяе.

***

Чимали бергес вуиз. 

- Азьло ужъёссэ адӟи вал ни. Учкисько но адӟиско, кадръёсаз суредъёсыз аслам кадь. Собере тодӥ, со Кезысь шуыса. Шумпотӥ пушкам.

Чимали, угось, ачиз Кез ёросысь.

***

- На столе есть перепечи, угощайтесь. Друзья испекли, - киноос бырем бере.

- Можно сделать пельмень пати в Творческой даче.

- Пельмени я умею.

- Можем перепеч пати. Мы научим. - висказы пырим ми.

***

- Тросэз мар вань "Город" видеоям, пророчество луиз, - аслы ачиз паймыса вераз Першин.

Паймоно кадь. Крымез, кылсярысь, Россия ас бордаз ватсаз. асэныз огазеяз.

- Мне очень нравится одна фраза на удмуртском. Кин тодэ.

Валаськоды-а, со кыл чырткемесь, ӟеч яке мон тонэ яратӥсько ӧвӧл. Со "КИН ТОДЭ". Макем мур пуштросо адями! Соин вераськем но вераськем потэ.

Кортна, мар.

Тросэз, лэся, малпало, журналистика милям продажной шуыса. Нош блогеръёсты веранэз ик ӧвӧл. Валасько, ӟучьёсыз сярысь озьы малпаны луэ ик, дыр. Но удмуртъёсыз сярысь озьы малпад ке. Да эшшо удмурт блогеръёс сярысь, кудъёсыз пӧлын 4-5-ез гинэ дырысь дыръя гожъясько. 

Шумпотыса гожтысал малпанъёсме ужрад сярысь, кудаз ветлӥ. Но ку тыныд шуо: табере возьмасько репортаждэ, валаськод, ммм, мар понна тон чортӥд монэ. Тон мон борды блогерлы кадь вазиськиськод-а? ... Ми борды таӵе отношение ласянь асьмелэн но виноватмы вань. 

Озьы тӥни луэ, лэся, кортнаны выро эрико блогеръёсты, использоватьтыны. Туала виртуальной улонэ кытын ужрадзы кылёз на, вотэс чуръёсын ӧз кызльы ке. 

Корна, мар, только со кортнамды тӥляд кемалы ӧвӧл. Валан вуоз, сылмоз егит мылкыд. Тау кылэз коть вунэтоно ӧвӧл.

Дядяй война сярысь

Мынам дядяе али улэ огназ. Ну, кызьы огназ. Пичи пиеныз, кудӥзлы 39 арес.

Тодӥсько на, кызьы пичи дыръя дядяй тышкаське вал милемыз кема телевизор учкеммы понна. Куке но солэн корказ тросаз вал нылпиосыз, кышноез, мон сузэреным. Солы со дыръёсы шыпыт корка уйвӧтъёсаз вуэ вал дыр.

Нош али солы кулэ соин вераськись адями, сое кылзӥсь адями. Пуксиськод куддыр вӧзаз, но юиськод солэсь малпанъёссэ. Варсь кадь ческыт но кӧттырмон кошке.

Сои мынам али политикаен тунсыкъяське. Донбассэз учком ай, шуоз но, лэзёз телевизорзэ. Со улоназ трос мае адӟемын ни, соин ик котьку историысь учыръёсты тодаз вае.

- Кызьы меда уло на соос отын? Подвалъёсын ватскыса пуко ук. Армиын служитьтыкум, лини дуре вуим вал. Поезд дугдӥз. Вагонъёсыз тросаз вьетнам сиротаос. США бомбитьтӥз вал кыӵе Вьетнамез. Нош сиротаосты Кубане, пе, нуо. Отын соосты сюдозы, утялтозы, но война бырем бере, берен келялозы.

Украина пыр милемыз Германие лэзизы вал. Кыӵе узыр палъёс вал. Нош али кыӵе бомбитьто.

Армиын котькин вал. Я ӟуч, удмурт,  украинец тон - ваньмы одӥг тэркыысь сиським.

Нош али тэркыын ӝуксы ваньзылы уг тырмы ни. Отысь ик ожмаськон потэ.

Кулэ-а егитъёслы театр?

Сыӵе треш котыр: литература котырын улон улӟиз, валамон, дыр, малы, эшшо - мон понна со вал шуак - улӟе удмурт театр.

Сыӵе ужпум: вань-а егитъёслы театр? Шонергес вераны луоз, вань-а удмурт егитъёслы театр. Тани тодӥськом Паша Зоринлэсь "Les Partisans" театрзэ, "Молодой человек"... Соослэн спектакльёсазы ветлэ вань интеллигенция. Филармониысь пичи залэ калык уг тэры. "Les Partisans" - со маке дуноез Ижкар дуннеын. Туэ со ӧтемын вал Муское "Золотая маска" фестивале пыриськыны. Но:

Минкульт Удмуртии против молодежного театра

МММ? Минкультэз кивалтӥсь куке но вал егитъёсын ужась министр. Кыӵе тунсыко пӧрме, озьы ук эшъёс? Со министр табере кык поллы золгес кулэ вал кадь но культура понна ужась егитъёслы дур басьтыны. Но солы, видимо, дуногес мукетыз? Хых, мар солы дуногес? Тунсыко. Яке эшшо одӥг вариант вань на: министрез Павел Зорин ӧз вала. Таиз вариант скоро вотэсэ вӧлмоз ик, дыр, ку со вуысь чылкыт потон понна муг утчаны кутскоз. Но оске мыным, шедьтоз ук! Но блоггеръёслэн кылъёссы лэчытэсь.

Малпасько, скоро удмурт театр но экспериментальной площадкаос радъяны кутскоз, кытын егит драматургъёс, режиссёръёс но актёръёс лулэз улӟытӥсь бомба лэсьтозы. Егитъёслэн ведь уг поты ветлэмзы со "традиционной мӧзмыт спетакльёсы". Мӧзмыт, малы ке шуоно ӧвӧл отын выль шӧм, ӧвӧл туала даурлэн аспӧртэмлыкъёсыз. Вань театръёсын кадь ик пукто классической спектаклъёсты. Но адями сизьым пол одӥг спектакле уз ветлы ук. Валасько, мынам туганэ старых укладов адями, но со коть котькуд спектакле ветлысалыз, но сыӵе егитъёс ӧжыт ук.

Оскисько мон, вакчяк вераса, егитъёслы театр кылдоз шуыса. Мон ваньзэ лэсьто, мар мынэсьтым кулэ луоз.

Али тодам ваи, кызьы кыкетӥ курсын мон удмурт группаме люкай вал, спектакль кыче ке пуктом шуыса. Дугдӥм "Насток но Исьток" вылын, малы меда туала пьеса ӧм быръе? Шузиос мар. Озьы ик зынмиз спектакльмы но.

Мукет ласянь. Вань ук "Ватка" театр. Соослэн спектакльёсазы кӧня адями ветлэ? И то соос одӥг пол араз спектакль пукто. Одӥг пол! Ӝыны зал люкаське ке, со сыӵе шумпотон ни. Татысь кылдэ юан: вань-а удмурт егитъёслэн культура созидания, лулэз узырмытон культура?

Андрей Першин

Кезысь Андрей Першин Муское кошкем: ужаны но улыны. Озьы ик кошко вань таланто адямиос, оло соослэн лулзы татын пачка, оло луонлыкъёс уг тырмо... 

- Табере уйпал Удмуртилэсь чеберлыксэ Мускоын адӟытӥсько, - шуэ со. -  Анимация вылын трос уг ужаськы ни. Со вылэ дыр трос кулэ, нош мыным асме сюдыны кулэ. Соин видео вылэ выжи. Но али заказъёсты быдэсъясько, отын мынам творчество почти ӧвӧл ни, заказчиклэн куронъёсыз гинэ.

Солэсь ик кышка "Ижевский киноклубез" валтӥсь но - Андрей Смирнов. Кошко, пе, но шоркаре, уксёлэсь шӧмзэ шӧдыса, уг творитьто ни, быдто асьсэзыс, шонертэм сюрестӥ кошко.

Жаль, конечно, но: Мар карод? Озьы ведь.

Андрей ужаны кутскемын анимация бордысен. Гениальной аниматор, суредаськись. Солэн туж аспӧртэмлыко кадръёсыз. Берло, ку дырыз тырмыны кутскыстэ ни, видео борды кутскем. Нырысетӥ ужез: куар лобӟе но котыръя Ижкар ульчаосты. Сыӵе импрессионизм, Куар бордын гинэ фокусировка возиське, нош котыр яркыт пятноос, инбам, асвальт. Но со виштыосъя но ми тодмаськом Ижкарез, ми валаськом, кытӥ лобӟе куар. Прекрасно.

Тужгес но мыным матын луизы солэн очеркъёсыз. Вот яратӥсько адямиос пыр возьматэм мерлыко ужпумъёсты. Со понна вылӥ мастер луыны кулэ, мкш со туж шуг но секыт маке. Першин одӥгаз видеояз шуэ, яратко учкыны куштӥськем юртъёс шоры: соослэн асьсэлэн историзы, отын куке но улӥзы, но сое куштӥзы. Першин суреда уйпал пейзажъёсты, куштӥськем гуртъёсты... Мӧзмонэз но, жалянэз но вань отын, куддыр шумпотонэз но. Россия сярысь огласянь туж писсимистичной анимациез вань. Но со шуэ, мон яратӥсько Россиез. Со Ижкарез но яратэ:

- Малы мон кышкалом Ижкарлэсь. Мыным татын улыны, яратонме шедтыны на, - шуэ огез героез. Эшшо со уг кышка мерлыко проблемаосты ӝутыны, со мерлыко проблемаос при том локальноесь. Кылсярысь, Президентлэн Резиденциезлэн капка азьзэ ӵужись дворник быдтэм УдГУ-эз, со нимало менеджер уличной чистоты-а мар-а, кызьы ке но озьы вал. Ирониез туж трос ужъёсаз.

Андрей Першинлэн берпуметӥ ужез - "Курка, ӵож но мукетъёсыз" удмурт выжыкыллы анимация. Возьматыны ӧдъяськом, пе, вал но сое, ӟуч субтитръёсыз вылӥллямтэ.

Евгений Кузнецов, Ижкарысь тужгес тодмо видеоос лэсьтӥсь прям кылъёс ӧз шедьты ни вераны. Кызьы, пе, тон Чепецкой ГЭС-эз озьы сниматьтыны быгатӥд? Ми кӧня котыръям вал сое, но сыӵе кадръёс лэсьтыны ӧм быгатэ.  Эшшо, кызьы, пе, тон, недостатокез художественной приёмлы пӧрмытын быгатӥд. Татын Кузнецов кадръёсысь фокусировка ӧвӧлтэмзэ шуэ. Андрейлэн каръёсыз размытыесь, резвокстез отын ӧвӧл. Мукет оператор соосты брак шуыса ӵушысалыз ни, но Першин - со гений. Со кылдытэ импрессионизм, солэн сыӵе приёмез. При том не намеренной. Мынам, пе, объективе секытэн фокусировачке, соин ик сыӵе кадръёс пӧрмо. Мукетъёссэ, пе, воксё учкыны ик уг луы.

Бадӟым таланто адями гинэ озьы быгатэ ваньзэ лэсьтыны. Бракез чеберлыко амаллы пӧрмытыны.

Нош сеанс бырем бере, ку сылком вал гардеробдорын, со милемлы (Вера, Дарали) лично огшоры шуиз: "Тау, лыктэмды понна". Та ке со туж востэм пияшка, прак удмурт кадь, но зато бадӟым таланто. Учкисьёс азе вераськыны поттӥзы куанерез, ассэ кытчы донгыны ик ӧз вала ни, возьдаськиз - неуютно вал солы.

Учкелэ видеоссэ, соос туж устоесь: "КИТЕЖ", "Россия", "Майские каникулы", "Север", "Курка, ӵӧж но мукетъёсыз" в конце концов.. 16 тулыспалэ "Галерея" центрын Андрей Першинлэн адӟытонэз радъяскоз, трос букваос борды ватсаса.

"Ижкар" огазеяськонлэн адӟытонэз

Лыктӥськом этнофутуризмъя адӟытонъёсы, но яратон ӵыпетын уяны кутскиськод кадь. Лобанов шуэ, котьмарлэн дӥнез - яратон. Умой философия, ыы ведь. Этнофутуризм - со яратон. Артистъёслэн "Ижкар" огазеяськонзы кыӵе ке симпозиум ортчытэ ке, отын одӥг керетонъёс но уг пото, дыр. Отын творчество гинэ, котьмар ласянь. Мыным потэ, со мерлыклэн вылӥ лёгетэз. Азьпалан - Инмар гинэ на. 

Мон шуысал, суредаськыкузы но, ТВорческая ДАЧАын пукыса та дуннеысь лобӟыкузы но соос тубатсылэн вылӥ лёгетозяз вуо но Инмарлэсь ымнырзэ адӟо. Яке кинлэсь ке но-а. Ужъёссэс гинэ учке ай. 

Таяз адӟытонын Гири Григорьев мон доры лыктӥз но шуэ, Маша, мае ке валаськод-а? 

- ЫЫ, - шуисько.

- Валэкты мыным, шуэ Гири.

Но ведь котькуд адямилэн аслаз валанэз. Матэктӥм Сергей Орловлэн "Фантом" суредэз доры.

Со суред кык люкето. Вылӥяз суредамын валантэм пудо-живот: пӧртэм пельёсын, трос сюръёсын, быжен, оглом скаллы кельше. Но синъёсаз учкиськод ке, паймиськод соослы: сайкыт чагыр лыз мур иньам кадь. Ымдуръёсыз - адямилэн, соос мыняло. Соку мон валай - со адями. Со бадӟым чылкыт луло адями. Вылтырыз - неважно, валаськоды-а, адями ымнырыныз но мугорыныз шуш луыны быгатэ, главное сюлмыз бадӟым мед луоз. Скал тусъем адямилэн ангесысьтыз мар ке музъеме ваське, суредлэн кыкетӥ люкетаз, мон малпасько, со ШУД. 

Нош отын адӟиськом трос АДЯМИОСТЫ, татын соос зэм но адямиос ни, малыке шуоно вань ымныръёссы, киоссы, чиньыоссы. Соос ваньзы бадӟым бугоре биняськемын. Биняськемын вожвылъяськыса.  Шуд понна жугиськыса. 

Гириен суредэз сэрттыса-пертчыса сылӥськом ни. Солэн но соку синъёыз усьтӥськизы кадь. Со суредысь детальёсты адӟыны кутскиз: 

- Со животлэн пыдъёсыз кортнамын ук. Может суредлэн улӥ люкетэз - со музъем пушкысь урод кужымъёс.

Татын лыктэ Дарали но шуэ: 

- Тӥ туж мусо адӟиськиськоды та картина азьын, даже дӥсьтылэн буёлъёссы но огкадесь, но ми кошкиськом ни.

Яратыны котькин быгатэ, просто тросэз адямиос пегӟо солэсь, кышкало валантэм луыны но малпаськыны мылзы уг поты. Усьтӥське, шуо мон тӥледлы, эн кышкалэ валантэмлэсь. Соку точно Инмарез адӟоды. Нош со трос ымныро.