Удмуртъёслэн музъемъёссы.

Трос блогъёсты уд лыдӟиське, дыр. Соин ик Дневники нимо блогысь тае адӟытэм потэ вал:

Украина - со, пе, древнеудмуртская земля.

1. укр. Київ — собственно, ‘Кыев город, город Кыя’. Из славянских языков название не этимологизируется, ПВЛ справделиво указывает на происхождение названия города от личного имени.

< удм. Кый ‘(имя основателя города)’ ~ кый ‘змея’.

2. нем. Lemberg — современное навзание Львов носит явно позднейший характер. Происхождение названия Lemberg/Lemburg, в свою очередь, не имеет удовлетворительного объяснения.

< удм. льӧм ‘черёмуха’; вторая часть — калька с удм. выр ‘холм’ (если исходная форма -berg) или от удм. кар ‘град, крепость’ (если от -burg). Учитывая семантику, вариант с выр считаю более предпочтительным: Льӧмвыр ‘черёмуховый холм’.

Естественно, что территория современной Укрляндии не явлется крайней западной границей древнеудмуртских земель. Обращает на себя внимание скопление в Центральной Европе гидронимов на -va (Vltava, Drava etc) ~ удм. ву (< *va) ‘вода; *река’, коми ва (‘вода; река’).

Та выллем антиутопиеской теориосты кемалась кылылэм вал ини. Удмуртъёс ярато ик асьсэзыс. Ярато ке но, малы ке улон интыосысьтызы пегӟо. Быдэс Европа, Европа гинэ но ӧвӧл, дыр, удмуртъёслэн азьло улон интызы. Али ӧвӧл ни ук, мар веранэз на. Ноку но ӧй вал, ушъяськыса гинэ уло, юнме.

Та выллем теориосты мукет калыкъёс но учкылыны кутскизы ке... Серем. Асьтэос валаськоды, дыр.

Таиз но серемлэсь серем. Луысал ке мукет доказательствоос, оскымонъёсыгес.

ӟучъёс удмуртъёс сярысь.

Берпуметӥ "Пепелац"ын ортчись удмурт позыръяськонэ ветлыкум, трос мар удмуртъёс сярысь тодӥ. Шонерзэ вераса, ӟучъёслэн удмуртъёс сярысь валанзы сярысь. Мыным таосыз но соосыз понна но ӝожмыт луиз. Удмуртъёс асьсэзыс возьыны уг быгато шуыса, нош ӟучьёс сокем шузиесь шуыса.

Барын ужась официанткаос, пе, удмуртъёсты уг ярато. Толэзяз огпол гинэ, пе, сокем срач луэ соослэн залазы. Удмуртъёс, пе, аракы вӧзы сылалтэм огреч куро. Кин, пе, туала дыре, аракыез сылалтэм огречен куртче. Соин но, пе, со удмуртъёсты уг яраты. Тае кылэм бере, мынам копак мукет калыкен герӟаськем стереотип тодам лыктӥз. Мон, кӧня со барын пукылӥ ни, огпол но сылалтэм огреч сиыса пукисьёсты ӧй адӟы на. Как будто удмуртъёс толэзяз огпол гинэ "Пепелац"е ветло. Уг оскы.

Барысь васькыса, сёросэ пыри. Со куспын ӧс усьтӥськиз но закодысь нылэз поттӥзы. Сое кык пиос кунултыса мырдэм-мырдэм гардероб дорозь вуттӥзы. Синъёсыз бушесь, вамышъяны уг ни быгаты, дӥсез котмемын, номыре уг вала. Оло серекъялод, оло бӧрдод. Малы сомында, пе, юод? Оскем бервылзэ пол миськись утялтыны кутскиз. Мон солэсь юаны малпай:

- Трос пол-а Тӥляд татын озьы луэ?
- Тӥляд дискотекаос дыръя гинэ! - йыркуръяськыса беренвазиз со, - лыкто гуртъёсысь, клубъёстӥ ветлыны уг быгато, оскытозь юо, асьсэзыс гуртын кожало-а мар-а! Эн ветлэ вал озьы ке.

Талы мон мар вазьыны ӧй вала ни. Кошки.

Пукиськом табере гардероб дорын. Возьмаськом Гришалэсь Танялэн телефоназ удмурт шрифтъёс пуктэмзэ. Чипчирганъёс прак люкаськизы вал, кырӟаны кутскизы. Мон соосты видеое пуктӥсько. Ми вӧзы султӥз ӟуч пияш. Сылэ но сылэ, уг кошкы. Сырдэм вазиз ни.

- Мар, пе, тӥ татын цирк лэсьтӥськоды. Кин, пе, туала арын удмурт кылын вераське на. Кыӵе гуртысь вуиды, - шуэ. Ми отын негодуэ... Но таиз сярысь берлогес. Со сярысь воксё нимаз гожтоно. Вакчияк вераса, удмурт луыны стрёмно шуиз. ОЗЬЫ ИК ВЕРАЗ.

Эх, куанеръёс, малпай мон, (берпуметӥезлы верай ик), Тӥ сокем востэмесь, визьтэмесь ук. Тӥни Тӥ кадьёслэсь ик общественной мнение но кылдытӥське. Кызьы ваньзы малпало, Тӥ но отчы ик. Адӟысалды ке, со кудӟем массаысь визен чилясь синъёсты. Адӟиды ке но, пал кыл но уд поттэ, малы ке шуоно мерлык тӥ кадь уг малпа, соос понна кемалась малпаськизы ни. Табере со малпанъёс, стереотипъёс ӟуч мерлыклэн вираз пыӵамын ни. Ма удмуртъёс но кыдёке ӧз кошке, уз но кошке.

Сьӧд Ӟуч

Мон сыӵе зарни дуннеын улӥсько вылэм. Нош туннэ, кӧня ке минут талэсь азьло, зарни ӧсам йыгаськись Сьӧд Ӟуч. Мон усьтӥ, мон - умойлы оскись сюлмо.

Со вылэм визьтэм но кык вылӥ образованиен. Мырдэм-мырдэм шедьтӥ сыӵе адямиез, кинлы дышетскон - со корочка гинэ, юнме, так. Шонерзэ вераса, со ачиз лыктӥз мон доры. Удмурт шаерын но дышетскемын ӧвӧл, Тольятиын.

Со Сьӧд Ӟучъёслэсь салам но ӧз вайы, локан ведраен гинэ вуиз. Но малыке но, со локан ведраез ачиз вылэ ик киськиз. Котырысьтыз сыӵе зын потыны кутскиз, нош со шуэ:
-КЫТЫСЬ СОКЕМ ЗЫН ЛЫКТЭ, УГ ВАЛАСЬКЫ.
-МА ТАНИ УКНО УСЬТЭМЫН, РАСИСТ ШАЕР ПАЛАСЬ ТӧЛ ПЕЛЬТЭ КАДЬ, -беренвази мон солы.

Со малпаз, ваем локан ведразэ мынам зарни коркам кисьтӥз но шонер лэсьтӥз шуыса. Ма мон огнам ук, нош Ӟуч шаер бадӟым. Мон гуртын вордӥськи, нош гуртысь адямилы городын инты ӧвӧл.

- Чай юоды-а? - юасько.
- Малы юоды-а? юод-а шу!- беренвазе со.
- Ма мон Тӥледыз гажасько, соин уг быгатӥськы Тӥледлы Тон шуыны.
- Ма мон но тонэ гажасько.
- Иське, малы мон уг быгатӥськы Тон азьын кырӟалляны аслэсьтым удмурт гуръёсме.
- Со стрёмно!
- Малы Тон мон доры лыктӥд?
- Валэктыны, удмуртъёс- сӥтянъёс, нош ӟучъёс - чиньыос шуыса. Иворъёс. Удмуртъёс.
- Тӥ со "иворъёс" но "удмуртъёс" кылъёсын трослы узыргес.
- Мон?
-Тӥ. Ӟеч луэ.
_______________________________________________________

Ӵуказе ваньзэ валэкто. Туннэ со Сьӧд Ӟуч туж зол вожме поттӥз. Уг яра визьтэм адямиослы ӧсъёсты усьтылыны. Ма мон тодско-а мар-а вал. Ӵуказе ваньзэ валэкто.

Огназ. Гожтэттэк.

Малы меда мон весь оген кылем адямиосты синйылтӥсько. Зэмзэ ке, соос ӧвӧл огназы, огшоры соос асьсэсыз озьы пукто, но оломар но йыраз малпало. Висён ке, висён ини адямиослэн.

Одӥгпол барын пукисько вал. Мукет ӝӧк сьӧрын кык нылъёс пуко. Соос доры тодмотэм мужик лыктӥз но шуэ:

-Толэзь ортыса, мон кошкисько. Ожгаре шуыны луэ. ӟучъёсты утьыны, Донецке.

Ачиз золгес ик юэмын ни, но дӥсяськемын чылкыт. Очкиен, одӥг син улаз сӥнякен. Сыӵе противоречие. Озьы вераз но, кышноослы гожтэтсэ мытӥз:

- Потэ ке, лыдӟе, потэ ке, кесялэ. Толэзь, кык ортчыса.

Соосыз мар вазьыны ик паймизы. Воргорон но валаз. Я, азяз гожтэтсэ кесяса уд кушты ук. Одӥгез гожтэтсэ басьтӥз но кисыяз донгиз.

- Лыдӟе. Мон берто но вуо. Жаль, монэ татын нокин но уг возьма шуыса. Жаль.

Воргорон аслаз ӝӧкез сьӧры пуксьыса гинэ вуттӥз но, кышномуртъёс доры туганъёссы вуизы. Тамак кыскыны поталлям, лэся.

Визьлюк.

Валерий Кудиновлэн Фэйсбук бамысьтыз веранзэ адӟи: "подпишусь на всех, кто не постит про Украину". Мыным тазьы ке тунсыко, мар отын али луэ. Но юнме калык гинэ быре.

Одӥгзэ уг валаськы, малы кыӵе ке но ӟуч кунлэн улосвылъёсаз митингъёс лэсьтыны кулэ? Мар отын Россиялэн азьмуртэзлы йыраз шукке, соку ик ивор мерлыко огазеяськонъёсы вуэ. Тросэс со огазеяськонъёс кунлэн бурд улаз кыллё ук. Студенческой отрядъёс, кылсярысь, ваньзэ лэсьто, мар малпа ВВП. Алигес тӥни Украинаысь калыклы морально юрттыны шуыса, студентъёсты Ижкар ульчае поттӥзы (дышетскисьёсты гинэ ӧз). Ну и потӥзы студентъёс, эшшо огпол асьсэзыс адӟизы, ӟыгыръяськизы, косказы но гуртазы бертӥзы. И мар? Украиналы ӵын кадь, кин, кытын, ку соослы морально юрттэ шуыса. Сьӧд куака-а мар-а удмурт но мукет калыкъёслэсь мылкыд ӝутӥсь кылъёссэс украинецъёслы вуттэ.  

Со ваньмыз "ПОКАЗУХА", так сказать. ВВП аслыз каллен Украинатӥ уян пыж лэсьтэ. Визьлюк.

Сектантъёс.

Удмурточкалэсь "Тӧдьы адями" постсэ лыдӟи.

 Малы меда со котьку огназ ветлэ? Кытын солэн эшъёсыз? Со адямиос пӧлы кыӵе ке но оскон, религия пыртыны турттэ ук. Иське, солэн эшъёсыз кулэ луыны. Но малы ке но мон весяк сое оген адӟисько. Со кадь тӧдьы дӥсяськем адямиез ӧй ни пумиталля.

Огпол гуртэ бертыны трамваен "Южкае"  васькисько вал. Со но трамвайын пуке вал. Кӧня ке улыса, со интыысьтыз султӥз но быдэс трамвай тыр яратон сярысь вераны кутскиз. Яратон- со тужгес но чылкыт кулэ чувство; матысьёстэс ӧд яратэ ке, огнады кылёды; яратон адямиосты вылӥе ӝутэ да марда шуыса. Озьы. Мыным со борды немар ни ватсаны.

Тунсыко, малы меда со озьы ветлэ? Мерлыкез умой пала воштэмез потэ?

Тросэз малпало, дыр, со сектант шуыса. Но со выллем огазеяськонъёс уксё вылын возисько ук. Тани гуртъёстӥ туж ярато адямиос ветлыны, книгаоссэс вузало, калыкез асьсэ пала кыско, уксёзэс поныны косо. Нош адямиос, асьсэ осконзылэсь куштӥськыса, мыно ук соос сьӧры. Паймод но бырод куддыръя. Ма урод палыз гинэ ӧвӧл татын.

Тани бӧляк гуртын вань одӥг семья. Анай-атайёсы юо вал. Огпол соос доры вуизы протестантъёс. Пумен соос Ижкаре протестанъёслэн вӧсяськонъёсазы ветлыны кутскизы, аракызэс пыдлогес ватӥзы, осконзы сярысь гурт калыклы вераны, "встали на путь истинный", так сказать. Табере соослэн кузьыли мында нылпиоссы, аракы борды уг кутылӥсько ни.

Тужгес но яратоно интыос сектантъёслы- нылпи юртъёс. Анай-атайтэк кылем гинэ ӧвӧл, ӧлексы нылпиосты но соос, кырныж чипыосты кадь, кырмо но асьсэ пузкаразы нуо. Уг тодӥськы кызьы, йырзэс берыкто но кун уксёзэс кыскыны кутско, куддыръя улон интызэс но басьто но оскись пиналъёсты шур кузя лэзё (кунэн сётэм улон интыоссэс).

Нош кин меда со - Тӧдьы Адями?

Оген. Сакырен.

Туннэ параысь мукет сюрестӥ бертыны малпай. Ноку но отӥ уг ветлӥськы вал, нош туннэ малпай. Пересь кышномуртэз пумитай.

- Ой, марке мыным урод луиз, - йыр бордаз кутскыса, пересь кышномурт корт кенер борды пыкиськиз.

Ма мар мон, вӧзтӥз табере кошком-а мар-а? Дугдӥ.

-Мар Тӥледын луиз? - юасько ни мон.

-Ой, марке мыным урод, йыр пӧрме, ӧскем потэ, - валэктэ. 

Со эшшо сыӵе артистично вера на, шудэ гинэ, нокытӥыз но уг висьы кадь. Ма мыным мар кыле на, верамезлы оскыны кулэ луиз. Скорое жингыртыны ӧм быгатэ. Жингыртысалмы ке но, кема вуысал.

-Кыдёкын-а улӥськоды? Вае коть келяло.

Со сумказэ мыным  шумпотыса сётӥз но, ойдо, шуиз. Сюрес вамен гинэ потоно вал. Со куспын со мынам йӧнаса но , аварие сюремзэ но, сакырлы ветлэмзэ но, огназ улэмзэ но, туннэ мар сиемзэ но вераса вуттӥз. Корка дорозяз но ой келя, ачим мыно ни, шуиз...

______________________________________

 Кышкыт оген улыны, луоз та кышномуртлэн кадь: тулыс куазен сакыред быроз но, вузкаронниысь бертыкуд, йырыд пӧрмоз... 

Я коть.

Я коть нылъёслы сяськаос кузьмало. Пусйымон нуналъёсы яратӥсьёс ог-огзылы кузьымъёс, кузьымъёс, кузьымъёс.

Я коть.

Я коть кинлы ке озьы уг, я коть кин ке но ог-огзылы... Ваньзы огкадесь медаз луэ.
_________________________________________

Туспуктэмъёсты учкыса.

Пересь тулкым.

-Улон пумен секытгес луэ ни, - шуэ дядяй, - Та тулыс марзэ ке вуттоз ни, дыр. Возьма, возьма, ожгар но ваёз.

Куддыръя пуккод дядяй дорын но огшоры вераськемзэ кылзӥськиськод. Телевизор но радио но уг лэзья кадь, но тодэ, мар дуннеын луэ.Паймисько солы.

Кыӵе ке конфликтъёс сярысь тодэ ке, одно ик Совето Союзэс тодаз ваёз. Бирюлёвоын учыр сярысь тодӥз но, шуэ:
- Азьло коть Таджик, коть ӟуч, котькин мед луоз, но ог-огмэс гажаса улӥм,  одӥг тэркыысь сиськылӥм. Нош али, али, вийыло ук ог-огзэс, вийыло. Кызьы со озьы луоз, пе.

Нош тулыслэсь ожгарзэ со Украина ласянь возьма. Тулкымъяське на мылкыдыз, шыпыт коркан ке но улэ. 

Шумпотон.

Сузэрелэн туннэ тужгес но шудогес нуналыз вал, дыр. "Пузкар"-ез учкиз. Мылкыдыз лобӟемын вал. Юа мынэсьтым: "Кыкетӥ Пузкар луоз-а мара?"
Хех. Мон гинэ-а мар-а кыкетӥ люкетсэ уг возьмаськы. Мынам сыӵе юанэ чик но ӧз кылдылы.

Нош "Пузкар" кино азьын, со доры лыктэм пичи нылаш. Шораз учке но мыня, пе. Тямыс мартэн ӟечкыласа, со Такъянэлы ас киыныз суредам открытка кузьмам.

Сыӵе мусо! Открытка самолётлы пӧрме на. Кыӵе фантазиез нылашлэн. Любой Бикузин паймоз. 

Нош эшшо мон сузэрелы удмурт шрифтъёс компьютераз кыскыны юрттӥ на. Табере со сизьметӥ инбамын лоба ни. Тӥляд но котькуд нуналды сыӵе мед луоз. Пичи нылаш кадь ик, ас киыным открыткаос лэсьтом но матысь эшъёсылы кузьмало-а мар-а. Шумпотон ук со. Уг быгатӥськы ке но, зато вань сюлмысьтым, яратыса.

Тау!

Революция.

Туннэ университетын мон кие тунсыко газет шедиз. Огшоры А4 форматэн, ньыль полоса, векчи гинэ. Нош нимыз... Сак кариське: "Революция"!!!!!!!!!!!!! "Пролетарии всех стран, объединяйтесь!", пе. Газета Всесоюзной Молодой Гвардии Большевиков. Толшоре потэмын вылэм ини, Красноярск карын. Красноярскысь но татчыозь ву ай.  Аудиториязэс бадӟыматыны турттыку, тӥни кыӵе ерисесь луо огазеяськонъёс. Уг малпаськы вал, та дыре большевикъёслэн но огазеяськонзы вань на шуыса. Эшшо со кунлэн шоркараз ӧвӧл на уг, со "ляб" Красноярскын. Мускоын та огазеяськон улыны ӧз быгатысалыз, отын единорос-нашистъёс ваньзэсты зӥбыло.  Большевикъёс пӧлы пыремды потэ ке, газетын куриськон но кельтэмын. Сектантъёс, малпай ас поннам.

Ну и потэ со коммунистъёслэн ньыль полосаен газетсы, ну и гожъяло соос отчы СССР СЯРЫСЬ патриотической кылбуръёс, калыклэн автобусъёсын ворттылон понна уксё тыронлы пумит ӝутскемез сярысь, Коммунизм-атайёслэн марлы дышетэмзы сярысь, ну и... Нош азьланяз мар? Кытчы ке со вуттоз-а?

Тае гожъяса пукыкум, Удмуртиын быръёнъёс вуо ни шуыса малпан йырам лыктӥз. Кулэ дыръя, дыр, "Революция" газет вуиз Удмуртие. Луысал ке пичи революция асьме шаерын. Со Волковъёс но Соловьёвъёс интые пуксьысалзы ке ... (уг вера кинъёс), удмуртъёс понна рай луысал, нош ӟучъёс понна визьмогес луон (билингвизм сярысь). 7-тӥ класъёсын дышетскыкум, весь малпаськисько вал Волковез интыысьтыз сэрпалтон сярысь. Историез яратӥсько вал, нош Волковез уг! Эшшо улэпкын вераськемзэ адӟеме бере, пайми, кызьы сыӵе луыны кулэ: безответственной, возьдаськисьтэм, ваньзы вылэ вылӥысен учкись, мар верамзэ валасьтэм...

Ярам, уг поты ни со сярысь вераськем. Ачим но шузи. http://instagram.com/p/lKsxhIsJwL/

Возьмасько тулысэз.

Тулыслэн куинетӥ нуналэз гинэ ай кадь но. Но.

Туннэ ог-час мында юнме кар кузя поръяй. Яратӥсько тулыс куазен шалтай-балтай ветлыны но котырысьтым тунсыко суредъёсты синйылтыны. Туннэ мон ой шӧды на тулыс куазез. Выри, выри шокчыны кот, шуныт омырез, но со кезьытгес вал на. Мон понна, тулыс омыр ой вал на туннэ, соин ик бертӥ.

Мынам вань супергерое - Адями-Чонари (берыктӥд ке мукет кылысь). Мон сое горд Чонари гинэ шуисько. Тани туннэ со мон сьӧры кар кузя лобаса ветлӥз.

Дугдылонниын кык школаын дышетскись нылашъёс сыло вал. Огез ӝужытгес, кыкетӥез соизлэсь быдэс йырлы лапеггес.; ӝужытэз бӧрдэ. Нош лапегез сое буйгатыны турттэ: ас бордаз ӝиптэ, синкылиоссэ ӵушылэ, йырсизэ тупатэ. Пичи нылъёслы Горд Чонарие вань улонлы герӟась сӥньыс сётӥз. 

УдГУ палан вань "Подросток" клуб. Со возтӥ куинь покчи пияшъёс кошко вал. Огез вакчи штанен, мукетыз кузьгес, нош куинетӥез огшоры штаниен. Соос шоры учкыса ик, узыр-кезьыр луи. Штани улазы колготкиоссы но ой вал. Я коть клубе пыризы. Горд Чонарие ымзэ гинэ усьтыса сылӥз, паймеменыз кезьытлэсь но утьыны ӧз вуы.

Площадь инбамтӥ, куакаос сюан дыръя кадь, кыӵе ке но тылобурдоос лобало, векчи кесясько. Яблокпуос вылын пуко, со тол тылобурдоос ай, пуко, небыт комокъёс кадь, пештырскыса. Гон улазы омырез шунто соос. Соос понна но тулыс вуэмын ӧвӧл на.

Возьмасько тулысэз. 

Киноос.

Туннэ кык кино учки. Кыкез но калык сярысь, солэн улон-вылонэз но сям-йылолъёсыз сярысь.

Нырысетӥез - "Небесные жёны луговых мари". Гожъялляй вал ини таиз сярысь. Кыкетӥзэ учкисько ни. Татын 25 нылъёс сярысь новеллаос возьматэмын. Котькуд новеллаын поръёслэн кыӵе ке но традициязы, легендазы возьматӥське. Пор калыклэн мифологиез туж умой адӟытэмын. Кино Денис Осокинлэн книгаезъя лэсьтэмын. Пуктӥсез пор ӧвӧл, соин ик поръёс туж ишкиськыса та кино сярысь тодазы вайыло. ӧз кельшы соослы, киноез лэсьтӥсь пор калыкез озьы возьматӥз шуыса. Кызьы возьматӥз? Учкиды ке, валалоды. Контактын вань со кино.

Кыкетӥез - "Под снегом". Со Япониялэн сям-йылолъёсыз но тодмо мадёсъёсыз сярысь немец кино. Документальной. Яратӥсько сыӵе киноосты, кытысь мон пайдазэ шедьтӥсько. Нош Япониын вылаз эшшо туж трос пӧртэм легендаос на. Кино шӧдтэк шорысь быриз, "Пузкар" кадь. Туж затянутой кадръёс вал ке но, соос мӧзмыны уг сёто кадь. Зарезьлэсь тулкымъяськемзэ возьматыкузы, мон, киноысь аслам дуннеям кошкыса, вуттӥ вал ни, но мон ӧй мӧзмы. Кельшо киноос, кытын ӧжыт верасько.

Нош вуоно вордӥськонэ, 3-тӥ южтолэзе, "Дружба"-ын ик Лев Вахитовлэсь трилогиязэ возьматозы. Асэныз но вераськыны луоз. Мелодрамаос интые мур но аспӧртэмлыко кино учкемды потӥз ке, ветлэ Ижевский киноклубен ортчытэм сеансъёсы. Ижкарын котьма вань, Ижкарын ваньмыз вань. Мыным потэ, Ижкар Парижлы кельше шуыса. Мон ноку но ӧй адӟылы Эйфелева башняез, но мыным потэ, со "Дружбы народов" монументмылы кельше шуыса. Соизлы, кудӥз тымет дорын сылэ.

Пузкар

Кӧня ке час талэсь азьло тросэз витизы "Пузкар" киноез, табере кино ласянь малпанъёсты возьмало. Мон уг вера солэсь урод палъёссэ, актёръёслэн шудэмзы но куд-ог тупасьтэм интыос ласянь. Сойзэ мед мукетъёсыз вералозы.

Кинотеатре вуэме бере ик, мылкыды куашказ. Йырам соку ик юан кылдӥз, кыӵе амалъя ӧтён билетъёс сёткамын вал? Удмурт культурае кыӵе ке но челеп ватсамзы понна? Озьы ке, сэре мон ӧтем адямиос пӧлысь адӟи сооссэ, кудъёсыз удмурт лулчеберет понна номыр но ӧз лэсьтэ на, ватсало на, уг но малпало лэсьтыны. Пинал дыръязы нош копак удмурт кыллэсь куштӥськон мылкыдын ветлылӥзы. Адӟи сыӵеоссэ. Нош Таня Тихонова, кылсярысь, премьера дыре огъяулонниын, дэрем вурыса но удмурт калык кырӟанъёс кырӟаса, пукиз.

Пуксимы залэ. Кутскизы министръёс вераськыны. Мон малы ке но сыӵе со министръёсты уг яратӥськы, адями лулзэс уг тодӥськы, дыр, соин. Мыным потэ, соос номыр но уг каро, улыны гинэ люкето шуыса. Шонертэм, дыр, со; огшоры мынам кылдэм стереотипе. Ма тросэз депутатъёс уженызы ушъяськыны быгато, дыр, но мон ӧжытэзлы гинэ оскисько.

 Я. Тани Лариса Николаевна Буранова шуиз: матысь дыре, кинотеатре лыктыку, мед, пе, быръён луоз, кыӵе удмурт кылын киное мыноно. ЫЫ, малпай ас поннам, Тӥ нырысь удмурт кылэз школаосын одно ик дышетыны косэ вал, катэз мед кутозы шуыса, жугиське вал, соку учкись но, удмурт лулчеберетын вань удысъёс но азьпалтӥськысалзы. Соку адямиос тодысалзы, кин понна ужано, кинлы лэсьтоно. Нош али удмурт "элита" ваньзэ лэсьтэ удмурт "элиталы", кытчы пыре 300 адями? (Уг яратӥськы со "элита" кылэз). Киное 300 адями ӧтемын вал.

Соловьёв Владимир Михайловичлэсь но юаллям, асьме республикаямы удмурт киноос но вань-а мар-а шуыса. Министръёс асьсэос но уг тодо тӥни, кыӵе эшшо отын удмурт кыл на. Кыӵе милям депутатъёсмы, уй-уй-уй.

Уродзэ уг вера шуи но, ӧй чида, лэся. Но со кино ласянь ӧвӧл. Тани кутскиз кино. "Пузкар". Киносуредъёсъя но, шудӥсьёслэн выремзыя но, ваньмызъя "Пузкар" "Узы-борылэсь" сю поллы устогес лэсьтэмын. Соин мон туж шумпотӥсько: вань азьлане вамыш, но со кыкетӥ гинэ вамыш ук ай. Мынам сюлэмы шумпотэ ке, ымныры но пальыша ни, мылкыдме соку ик верам потэ. Вӧзам пукись эше ик уродъяськыны кутскиз вал ни. Тон актёръёс шоры эн учкы, киноез, пе, учкы!

Тодмо ымныръёс шудо бере, нырысь ик со ымныръёсты синйылтӥсько ини, синмаськисько дото зол, малыке шуоно соос талантоесь, талантоесь, соин ик туж мусоесь. Дышем бере гинэ, кутски сюжетсэ да марзэ валаны. Но соку кинолэн пумыз вуэ вылэм ни. Соин ик ӵуказе но ветлысал на, табере ини сюжетсэ учкыны.

Тросэзлэн сыӵе мылкыдыз кылдӥз: кинолэн кыкетӥ люкетэз кулэ луыны. Мыным быронэз кельшиз. Адями малпаськонэ усиз ук, со кинозалысь буш ӧз поты, озьыен кино удалтӥз. Мон понна ваньмыз валамон вал: удмурт адями  гуртын гинэ шудо, соин ик пумаз кык туганъёс, кучапиен шудыса, серекъяса, сюрес кузя гурт пала вамышто. Но малы удмурт адями гуртын то шудо? Малы со карын инты уг шедьты, малы кар сое изъянтэ но урод пала воштэ. Удмурт егитъёс карын но быгато ужаны, удмуртлык Ижкарын гинэ азинске, удмурт гуртъёсын егитъёс таӵе ужпум сярысь уг но тодо, пока каре уг сюро ( гуртшколаосын удмурт кылэз дышето на ке ) .  Ижкарын гинэ кутске нюръяськон.

Туж трос ужпумъёс пусйыны выремын. Как будто ӵуказе дунне быроз, нош "Пузкар" - со берпуметӥ кино. Соин ик татын вань ужпумъёсты ӝутоно. Пусйыны пусйизы, нош пумозяз ӧз вуттэ.

Нош кытчы но сюриллямтэ кино лэсьтӥсьёс: ипподром, аэропорт, курутой коттеджной инты, кафее, галереяе, ын пушкы... Суредъёс туж чебересь вал. Тау! Мон ой возьма вал, сокем серьёзно но чебер луоз шуыса.

Зато вань адямиос кадь, ми Удмурточкаен кизилиослэсь автографъёс басьяны кошким. Табере мынам вань автографъёсы мусо шудӥсьёслэсь но Петрушлэсь. Тау кино понна!

Кошкыкум кассирлэсь юай, ӵуказелы кӧня буш инты кылемын на шуыса. 30-мын пала гинэ на, пайми, отын сэрегъёсын мышказ гинэ на.

Эйфория ай мынам. Киноез выльысь учконо. Тау!

Польшаысь челеп.

Туннэ мыным Юлия Волкова жингыртӥз. Солы но "Пузкар" киное билет вуэм. Ми туннэ мынӥськом КЫКЕТӤ УДМУРТ КИНО учкыны. Лякизы сое Польшаын.

Алигес тодматски туж таланто Польшаысь режиссёрлэн творчествоеныз. Солэн нимыз Роман Полански. Ужаны кутскемын со вакчи видеосуредъёсысен. Солэн ужъёсаз котькуд деталез, буёлэн шудэмез, действиез мур малпан нуэ. Ваньмыз огшоры ӧвӧл. Туж зол ассоциативной гожез адӟиське. Учкелэ, тӥледлы но кельшоз, соос кема ик уг мыно, вакчиесь. Кылсярысь, "Двое мужчин со шкафом", "Когда падают ангелы", "Лампа". Интернетысь шедьтоды.

Пётр Палган но Польшаысь. "Пузкар" - солэн кыкетӥ киноез.

Преподавательлы шуисько:

-27-тӥ тулыспалэ кыкетӥ удмурт кино потоз ини.

-Кин сценарий гожтӥз? Нош ик-а со? Кызьы ай, Дарали Лели?

-ЫЫ.

________________________

-Ойдо асьмеос но кыӵе ке короткометражной фильм лэсьтом. Но Видео-арт выллем.

-Ойдо.

пузкар вуэ.

Пузкар! Чуказе Пузкар ни. Кыче потэ, кыче потэ со суредэз адзем.
Ветлэ, 150 манеттэс эн жалялэ. Эксклюзив, собере уд но шедьты ни. 

Тросаз учыръёсы.

Пуктӥзы ТРК "Столицае" кылписпу. Малпан кылдӥз - улонэ пыӵаз. !Кема ик дыр ӧз ортчы. Малы меда тау уг шуо лэсьтэм уж понна. Умой ук, табере удмурт кылписпу вань. Но со писпуэз "мерттэмзы" бере, та ужрад сярысь ожыт ӟеч кыл кылӥ ай. 

Тани, кылсярысь:

1. " Увидев #кылписпу на фотках, недоархитектор-недомузыкант Анатоль Галиханов подверг его конструктивной критике: - если по дизайну. очень уж громоздкая несоразмерная ножка по отношению ко всей композиции вышла. потом она черная, жесско не гармонирует. ну никак. оранжевые листики по цвету слишком пастельных тонов, можно было ярче - на контрасте сыграть по отношению к кроне. и их, как и в проекте амареевском, нужно в растяжку пустить - от яркому к бледному. ну вопщем это то что я навскидку заметил. еще раз повторюсь, это все перфекционизм мой) " (Юмшан57 огинысь)
2. Писпу буёлогес луысал ке, тунсыкогес но луысал, дыр. А так со мозмытгес ожытак. Ну, конечно, со мынам малпанэ. Мукетъёсызлы, может быть, кельшиз... (Удмурточкалэн малпанэз)

Мынам вераме уг поты, со писпу идеальной но солэсь урод палъёссэ шараяны уг яра шуыса. Мынам верам потэ, нырысь тау шуыны кулэ, дыр, шуыса. Собере ини шиосты лэзьяны. Кин ке но тыршиз ук, со писпуэ кужымзэ но мылкыдзэ понӥз. Тау, сыӵе писпу кылдӥз шуыса. Нош ӧз кылдысалыз ке? Соку нош ик мукет "-" кылъёс луысалзы. 

Мукет идеяос ласянь но таӵе ик суред луэ, тросаз учыръёсы. 

Тау! шуыны эн вунэтылэ, ӝӧк сьӧрысь но султыку "тау" шуоно, ӵукна султыку но, умой ивор кылыку но, котьку но котькинлы. 

Тау.

Иллюзиос яке зэмзэ ик озьы?

Ваньмыз марке воштӥське, но улон быдэсак воштӥське меда? Тани Министръёс креслооссэс бушато, соос интые мукетъёсыз пуксё. Одӥгез егитъёслэн ужзыя министрысь йӧскалыкъя министр луэ, Азьмуртлэн Азьмурт луон дырез быре, школаосын удмурт кылэз одно ик дышетоно шуыса, кӧня ужъёс нуисько. Нош со вамышъёслэсь воштӥське меда оглом улон? Волков кошкоз, яке нош ик Азьмурт луоз-а (марке верало, Мускоын сыӵе кат дасямын ини шуыса, но со лушкем осконтэм вераськонъёс)? Министръёс вошъясько но, марке вылез улонэ пыӵа-а? Тросаз учыръёсын, мон воштӥськонъёсты уг шӧдӥськы.

Удмурт кылъя но собыдӟа ужрад нуиське. Таизлы тау, тросгес вераськон мынӥз ке, та ужез нуонъя группа будоз. Вань сыӵе теория, "спираль молчания" нимаське. Со теориялэн авторез Э. Ноель-Нойман шуэ, кин аслаз кужымезлы но верамезлы оске, со сьӧры тросгес адями мынэ. Кык малпанъёс ваче вуыку, адями соос пӧлысь быръёз тужгес но ненегзэ, сӥтяназ вень медаз бышкалскы но сюлэмыз гань-гань мед кокаськоз шуыса. Нош ненег малпан соиз, кудӥз сьӧрын тросгес адями сылэ.Со нылпи садын кадь: огез нылпи "фу" шуиз ке, со бӧрсьы тросэз пиналъёс"фу" шуыны кутскозы, нош кылемез номыр уз шуэ. Нош кин номыр уг вера, аслэсьтыз малпанзэ уг шарая, со шараям малпанэн автоматически соглаш луэ, малыке шуоно пумит уг султы. Угось, сыӵе мерлэн катъёсыз. Мар карод на. Удмурт кылъя ужын но тани, соглаш луисьёс будо, иворъёс пумен умой пала воштӥсько. Толэзь азьло изданиосын мон пумит луисьёслэсь малпанъёсынызы тросгес пумиськисько ке вал, али удмурт кылэз школаосын одно ик дышетонлэсь кулэлыксэ тросэз адямиос валало ни. Яке со мынам иллюзиосы гинэ-а?

Тау!

*Туспуктэмез Зангариклэн. Та пуктэм писпу сылэ ТРК "Столицаын". Куарлэн огпалаз удмурт кыл, нош мукет палаз ӟуч. Удмурт кыл в массы, так сказать)

)

Совето Союз дыръя адямиос коркаосысьтызы ӧсъёссэс, капкаоссэс уг ӵогало вылэм. Ма гуртъёсын али но куд-огъёсыз уг ворсало на. Кыӵе адямиос вискын кусыпъёс вылӥллям. Городын али дыре сыӵезэ син азе ик пуктыны уг луы ни.

Кулэ, дыр, гуртын ас котырам кыӵе ке но инфраструктура лэсьтыны. Соку мӧзмыт уз луы отын. Ма куное каре вуыло.

Ярам.

Тау!

Психологъёсын.

Туж аспӧртэмлыко эскеронэ сюри. Дышетскем бере, огъяулонние бертыны одъясько вал ини. Кытысь-марысь сюрес азям эше потӥз. Со психологлы дышетске, кутӥз но монэ дышетскон бӧлетэ пыртӥз. Пыри: азям пӧртэм ӝӧкъёс сьӧрын дышетскисьёс пуко. Мыняло. Ярам, малпай ас поннам.

Пукси, нош азям кык коробка пуктӥзы. Одӥгез тӧдьы А4 бумага улысь, нош мукетыз "Фруктовый остров" сок улысь. Юанъёс сётъяны кутскизы.

-Кудзэ тон таос пӧлысь бырйысалыд?

- "Фруктовый остров". Малыке шуоно со "Фруктовый остров", соиз - мӧзмытгес коробкады. Таиз коть чыгыр-лыз буёло.

-Со волшебный коробка, - шуэ ини таре со пияше, - мае тон отысь поттысалыд?

- Номыре но,- шуисько,- мон отчы понысал? Бон, потэ ке тодэмды, мар отысь поттысал, малпасько али. 

Соку йырам лыктӥз Венедикт Ерофеевлэн "Москва-Петушки" поэмаез. Отын Веня "Ю" буква сярысь вералля вал. "Ю"- со быдэс творчество кадь, мае ке но ю но малпанъёстэ гожты. Веня юэ вал но малпаське вал, маке но вылӥ сярысь малпаське вал. "Ю" буква одно ик йырысь потэ вал (одӥг учырын йырысь вир "Ю" буква луыса вияз). Юон солэсь улонзэ но малпанъёссэ бугыръя вал. Тӥни со тодам лыктӥз но верай:

- "Ю" буква отысь поттысал.

- Малы "Ю"? 

- Тӥляд тетрадяды сыӵе юан ӧвӧл! - шуисько, валэктэме ӧз поты но.

- Вань, - мынектӥз пияше.

- Венедикт Ерофеевез лыдӟид-а?

-Ой.

-Иське уг валэкты. Лыдӟы, - шуисько.

-Я,- пе.

Табере азям кыкетӥ коробказэс понӥзы. Таиз но, пе, волшебный.

- Нош татчы тон мар понысалыд? Сое, марлэсь тынад весяклы люкиськемед потэ.

- Ммм. ӧвӧл мынам сыӵе арберие.

Веранэ куспын выж шоры учки но, пыдкутчанме адӟи.

-Пыдкутчанме понысал!, - шумпотыса ик верай.

-Малы? - паймем синъёсын учкыса, юаз пияше.

- Малы, малы! Пыдкутчанме мон синмаськыса басьтӥсько ук. Нош дыр ортчыса, со урод луэ. Жаг куянэ куштӥд ке, со отын мукет жагъёс пӧлын сисьмоз. Нош кӧня со тынэсьтыд пыдъёстэ утиз. Тынад аслад но сое куштэмед уз поты ни, сокем дышод со борды. Нош кӧня ке дыр ортчиз ке, со пыдкутчанэз та коробкаысьтыды поттыны луоз. Соку тынад улон шоры учкемед воштӥськоз ни. Кин тодэ, вуж пыдкутчанэд шоры учкыса, тон тодад ваёд ортчемзэ но серекъялод азьвыл улон шоры учкемед вылын.

Я. Табере мыным мукет коробкаос сётӥзы. Пушказ понӥзы пичи туп, но тодыны косӥзы, кыӵе фигура ватэмын со коробкаос пушкын. Татын мон копак "пукси". Йырам кыӵе фигура лыктӥз, созэ ик верай ни.

- Тон кыӵе факультетын дышетскиськод? - юаз пияшкае.

- А вот тодэ, тӥ монэ со фигураостэс тодыны косӥськоды ук, - серектӥ мон.

Тӥни сыӵе эскеронэ сюри мон. Малпасько кӧня ке но юрттӥ дыр, со психологъёслы. Но соослэн сюлэмъёсазы паймон но мынян гинэ кылиз кадь. Мар йырам лыктӥз, со ик верай. Мон понна, вань веранэ зэм вал.

Пусъёно нуналъёс.

Куинь нунал талэсь азьло зориз. Зор усиз но соку ик кынмиз - сюресъёс вылын, лымы вылын, курткаос вылын йӧ кылдӥз. Кӧня адями гылӟыса, усизы, дыр, но сӥтянъёссэс шуккизы. Та нуналэ ваньзы кытчы ке но дырто вал, дыр, вань шутэтскон интыосын бадӟым черодъёс луылӥзы, соин йырин стресс. Соку вал "басурманский" праздник.

Тӥни котькуд сыӵе нуналъёсы возьмаськод мае ке но. Возьмаськод, возьмаськод, но номыр но уг луы. Мылкыд куашка да марда, собере ӝытпал зорыны кутске.

Нош луысал ке огшоры нунал. Номыр но ӧд возьмасал. Туганэд отын огшоры нуналэ лыктысал ке тон доры, лэсьтысал ке кузьым, сю поллы шумпотымонгес луысал. Малы ке шуоно: тон ӧд возьма со кузьымез, со вал шуак! Нош кыӵе шуак! кыӵе ке праздникъёсы. Та нуналъёсы сӥтян ӝуа ини, возьмаса.

Соин ик огшоры нуналъёсты но яркыт карыны тыршоно. Котыр адямиосты пусъем нуналъёсы гинэ ӧвӧл шумпоттоно. Соосты весяк пальпоттоно, шудо кароно.

Тау!

"Брезентовая цапля"

Туннэ мон "Брезентовая цапля" нимо постмодернистской литературной ӝытын вал. Татын авторъёс асьсэлэсь кылбуръёссэс лыдӟо. Яратоно кадь ӝыт. Но, жаляса верано, туннэ со вал берпуметӥез. Андрей  Гоголев, кин вылын та уж возиське вал, Ижкарысь кошке. Жаль.

Андрей Гоголевлэн творчествоеныз мон кык ар талэсь азьло гинэ тодматски ай. Нырысьсэ мон соин кылбур лыдӟонъёсын тодматски кадь, точно уг тодӥськы ни. Но тусбуйзэ адӟем бере, соку ик синмаськи. Синмаськи солэн котькуд выросэзлы, кылызлы, куараезлы, тыбыраз кылдэм лёгезлы, гожъяськемъёсызлы - солэн образэзлы. Тани татысь шедьтыны быгаткоды солэсь гожтосъёссэ. Яратӥсько посмодернэз. Яратӥсько Андрей Гоголевез.

"Брезентовая цапля - со тужгес но кужмоез, мар мон та карлы лэсьтыны быгатӥ", - шуиз со. Сыӵе ӝытъёс Ижкарын ожыт, яке, шонергес верад ке, воксё ӧвӧл. Куинь ар куспын та ужрад туж тодмо но кылбурчиослы бальзам кадь луиз. Яке шуод Аракы, кудӥз гожъяськыны выль мылкыд, мукет кылбурчиосын тодматскыны но ӵошен узырмыны луонлык сётӥз.

"Цапля" усьтӥз выль пинал усто кылбурчиосты, кылсярысь, Мария Абих. "Цапляын" нырысьсэ кылбуръёссэ лыдӟыкуз, солы 14 арес гинэ вал. Нош кыӵе кужмо вал ини со. Таня Репина, али дырлы солэн "Монография" нимо бичетэз но потэмын ни. Но трос мукет мужикъёс (нимъёссэс уг тодӥськы ни, оломар но эн малпалэ, озьы ке туннэ Мария Абих  гинэ нылъёс пӧлысь вал, кылемъёсыз ваньзы мужикъёс, удмурт кылбурчиос пӧлын мукет суред, нылъёсгес кылбурало, кыӵе пӧртэм тӥни).

Тодматске, тани со:

Вӧсь (святой) кадь Гоголев.

Тани та кофтаен туннэ но вал. Фото 1,5 ар талэсь азьло лэсьтэмын.

"Человечество" нимо кылбур бичет но "Ленин. Самолет. Девушка" прозаез книгаосын потэмын ни. Прозазэ пдф версиен татысь лыдӟыны быгатоды. Лыдӟе, со постмодерн, Тӥледлы кельшоз, со туала. Но со туала Гоголев кошке Ижкарысь. Кылдозы на меда литӝытъёс? Мон шуисько: "Луозы. Одӥгез ке но, "цапля" кадь ик регулярно, подпитанно, стимулирующе, тепло... но мукет адямиослы, мукет кылын, мукет визьмын". Возмалэ литӝытъёсты, кин яратэ литератураез.

Тау!

Водка ворме...

Пукиськод тазьы 3 часын уйин, чай юыса, вераськыса. Со дыре мар гинэ йыре уг лыкты. Нош эшед кошкемез бере, комнатаын шыпыт луэ. Ваньзы сизьыметӥ уйвӧт адӟо ни, дыр, нош тынад кӧтыд гинэ чоръя. Пукиськод ноутбук азьын, нош пеляд тодмотэм крезьгуръёс проводъёс кузя вуо.

Тани, кылсярысь, "Лукошко" вузкаронниысь учыр. Мынам горд йыро юлтоше отын загоратьтэ.

Лыктэ, пе, кассае воргорон. Кияз - чекушка, нош синъёсаз - валантэм мылкыд: басьтоно водкаез яке ӧвӧл. Юанэзлы валэктон утча:
-Басьтӥ ке, нош ик кышноеным йырсиясько ук. Туннэ зарплата басьтӥ вал, ӵапак туннэ ик кышно но командировкаысь бертӥз. "Уг юиськы", - шуи ни вал солы. Басьтом-а?
-Ма асьтэос тодӥськоды, - шуэ солы горд йыро юлтоше. Нош аслыз тросгес барыш поттыны кулэ.
- Я, бен, басьто но. Карточкаен тыри ке, СМС кышнолэн телефоназ вуоз. Кин со СМСъёсты но малпам. Азьло соостэк но капчиен улӥськом вал ук. Нерад каро копак. Кисыям но трос уксёе ӧвӧл. Кӧня сылэ таи мынам? - весь кассирен вераськыны турттэ.
-Чекушкады - 87 манет.
- Ой, мед-а мар-а ни, ыы ведь. Кышнолы "сю манетме ыштӥ" шуо!

Куанерлэн сюлмыз ӧз чида. Кышноезлэсь кышканзэ водка вормиз. Водка ваньзэ ворме: уксёез но, начар улонэз но, семьяез но, йырез но, сюлэмез но, яратонэз но. Водкаез меда мар ворме?

Мусульманин

Одӥг веросме поттыны уг быгатӥськы вал. Табере со печате потӥз ни. Соин ик оригиналзэ татчы но гожтыны быгатӥсько. Нимыз: Мусульманин. Печатьын со мукетгес, валамон ини. Нош вал со таӵе:

Мускоысь уйшор бере гинэ вырӟоно луэ. Кинешма пала мынӥсьёс вань мугъёсъя керӟегъяськыны дасесь. Валамон: бер ини, ваньзы жадемын, иземзы потэ. Проводниклы вань адямиосты вагонэ пуктоно, чаляк валес котыр сёткано, чаен сектано но югыт тылъёсты кысоно. 

Али пӧсьтолэзь. Озьы ке но уйёсы туж кезьыт кариське. Вагонэ вӧлдэттӥ сяна, пытсам укнотӥ но, шуласа ик, кезьыт омыр пыре. Кӧня адями висьыны усиз ни. Озьы ке но штудентъёс* ужало. Кытчы пырод на, Ивикаре барыш поттыны вуизы ук.  Кык шобрет улэ ватӥськыса, пуко ини табере соос ас ужан интыязы но чидатэк возьмало шунды ӝужамез. Вуоз ӵукна – вуоз изён но шуныт дыр. Та уж улонзэс йыринь-чукинь кариз ни. Уйин пассажиръёс изё. Но туннэ марке огез титан вӧзы султӥз но сылэ, изьыны уг дырты. Салонын югыт тылъёс кысэмын ни, крыж корридорын гинэ югыт. Ӵапак та крыж корридорын сылэ пӧсь вуэн чан, проводниклэн ужан но шутэтскон интыез но сёрос. Пияш укно пала берытскемын, со ортчись суредъёсты синмыныз келя. Малпаське, дыр, марке сярысь.

Марайко,  ужан интыысьтыз потыкуз, пияшез синйылтӥз. Сылэ ке, мед сылоз шуыса, малпаз ас понназ но  номыр ӧз вазьы. Со куспын пияш Марайко пала берытскиз но, нылашлэсь курень синъёссэ шедьтыса, юаз:

- Тӥляд йыр висемлэсь эмъюмды вань-а?

-Мар луиз? Температурады вань?

-Вань кадь кӧня ке.

-Возьма ай, шедьто, дыр. Аслам ӧвӧл. Вань ужъёсме быдэсто но утчало.

Тау карыса сямен, пияш Марайко шоры учкиз. Нылашлэн трос ик ужез ӧй вал ни, кинлы ке чай нуоно но бервыл тусьты-пуньы миськоно. Пияш нимзэ вераз ке но, Марайколэн йыраз со ӧз кыльы. Ним вунэмын, нылаш понна, со огшоры Дагестанец. Армиын Россия кунмылэсь данзэ уте, ракетаосын вырыны  дышетске. Ӵапак али Мускоысь служитьтон интыяз мынэ. Палэнэ военной училищее дышетскыны пырыны ветлэм. Сомында осконэз сюлэмаз ӝуа вылэм, но … пырымтэ. Ачиз шоры учкид ке: чиед, пичи. Быдэс улонзэ армиын служба нуыны вордскемын ӧвӧл кадь. Пеймыт  куо, бадӟым ныро, пӧсь сямо- зэмос гурезь интыосын улӥсь.

Марайколэн чыры-пыры ужъёсты быдэсъян висказ, Дагетанец доры  50-тон аресъем пиосмурт лыктӥз. Пинал пияшлэн меӵак синъёсаз учкыса, ымныр дораз матэктыса, шыпыт куараен со вазиз:

-Виськод?

-Оо.

- Иисус Христосэз ӧть.

- Маин со мыным юрттоз. Со пророк гинэ.

- Инмар – со яратон. Висён – со дьявол.

- Кызьы висён дьявол луоз? Сатана – со кулонлэн кылчинэз, кудӥз адысь уллямын. И тодӥськод-а, мар понна? Йӧнъяськемез понна. - Кесяськыса вераськыны кутскиз Дагетанец, - Исса – Аллахлэн чиньыез.

- Котькуд адямилэн аслаз Инмар-кылчинэз. Со котьку юрттэ аслаз нылпиезлы,- шыпыт вераз воргорон.

- Инмар одӥг, солэн ымныръёсыз но нимъёсыз трос!

 «Марлы осконо? Малы ӧвӧл! Марлы! Мугез тодмо. Тани кин ке но Инмарез Аллах шуэ, кин ке Иисус, кин ке Будда. Но Инмар одӥг ук! Я мукетыз Инмарлы уг оскы, аслыз гинэ, кичӧлтӥсезлы гинэ, писпулы но коркаезлы гинэ. Со но оскон. Озьыен, ӧвӧл та дунне вылын чылкыт атеистъёс?», - сыӵе малпан чилектӥз Марайколэн йыраз. Дагестанецлэсь но воргоронлэсь вакчияк вераськемзэс кылыса, Марайко кышказ. Вераськисьёслэн синъёссы ӝуало, соос ченгешо, асьсэ религиязэс умое поттыны выро.

«Гаврилов Посад» нимо станция матэктӥз. Татын поезд 15 минут сылэ. Ваньзы изё ини. Дагестанец гинэ уг. Кизилиё инбам улэ со Марайкоен ӵош  потӥз. Нылаш вагон питранъёслэсь ӟырдамзэс эскериз но вагонлэн пырон азяз султӥз. Озьыен, ваньмыз умой, Дагестанец гинэ ӟырдамын.

- Адӟид-а, кытын тон вал? – юаз Марайколэсь пияш.

- Кытын?

- ӧд вала –а мар-а? Тон отын вал, - но Дагестанец кытынзэ чиньыеныз гинэ но ӧз возьматы. Марайко учкемезъя валаз, кудпала учкыны, - оломар но вераськиськод ук. Кытын, бон, мон вал?

Дагестанец номыр но берен уг вазьы. Марайколэсь синъёссэ гинэ порыса, сылэ. Озьы ог-куинь минут улыса, нылаш ӧз чида, выльысь юаз:

-Ну, и кытын меда мон вал тонъя?

- Тон одӥг дыре музъем вылын но липет вылын но вал.

-Кызьы мон липет йылэ вуом? Тон мар?

Дагестанец та юанлы валэктон ӧз сёты, кескич синъёсын гинэ учкиз Марайко шоры. Малпаськы ачид шуыса, вераз кадь. Юбо вылысь тылъёс гинэ пилэсь кылъёссэ валазы. Соос ук Марайколэсь ӝыны мугорзэ тӧдьы коркалэн борддор вылаз лякизы но котлэсь вожектэм липет вылэ ӝутӥзы.

- Тон валэкты мыным, кызьы адями Инмар луыны быгатэ? – кӧня ке дыр ортчыса, юаз христианкалэсь мусульманин.

- Озьы ик. Нырысь со адями вал, собере…

- Мон лыдӟи тӥлесьтыд Библиядэс. Святой дух лыктэ но Марияез пияно каре. Кытысь Святой духлэн кидысэз? Со адями но пудо-живот ӧвӧл ук. Милям но вань Иисусмы. Только милям со пророк Исса, адями. Инмарез нокин но адӟыны уг быгаты. Вот ку тӥляд адямиос вӧсяськыны кутско?

Пияш христианствоез валэктыны косэ. Но, Марайколэсь верамзэ куспетӥ карыса, пырик аслэсьтыз малпанъёссэ вера. Соин вылды нылашлэн  валэктон мылкыдыз чылкак быриз.

- Котьку быгато. Но тросэз пересьмыса гинэ Инмарлы оскыны кутско но черкъёсы мыно.

Пияш Марайколэн верамезлы туж паймиз. Солэн йыраз уг тэры, со уг вала христианствоез. Со понна та дунне вылын мусульманство гинэ вань.

-Тӥляд нош ку?- юаз Дагестанецлэсь Марайко. Ӧз юасал ке но, пи та юанлы валэктон сётысал.

 -Вот. Нош милям вӧсясько соку, ку адямилэн просветлениез луэ. Котькӧня арескын. Мынам простветление армия азьын вуиз. Мон  азьло кыскисько но юисько вал. Али нош ваньзэ валай. Вӧсяськисько. Шонер улыны тыршисько.

Та станциын сылон дыр ортчиз. Марайко Дагестанецез вагонэ пырыны косӥз, ачиз но сьӧраз тубиз. Поезд азьлане вырӟиз.

Эмъюм юэмез бере, пияш аслаз интыяз кошкиз. Кырын кезьыт вал, мугор кынмиз. Чай юон басьтыса, Марайко мукет проводник доры бӧляк вагонэ вамыштӥз. Чай шунтэ, вераськонъёс кыстӥськись дырез виё. Тамак кыскон тамбуртӥ потыку, нылаш нош ик Дагестанецез адӟиз. Со тамак пурккетыса, сылэ вал. Марайко, шораз учкыса, мыняз но корт ӧс сьӧры ышиз.

Котькуд адями оске аслаз Инмарезлы. 

Тау.

Али но вуоно даур.

"Даур artist-лэн сюлэмез пыр потэ",
 шуиз ас вакытаз Гётэ.
 Со artist интые поэт шуиз вал. Нош кин со поэт? Со сыӵе ик artist. Аrtist - со пыдэстэм вышкы кадь, мур, малпанъёсын узыр адями. Малпанъёсыз но солэн кыӵе ке формаен йырын гинэ уг, дунне вылэ но вордӥсько.

Нош огдыре кӧня гуртъёсын быремын вал. Али но каллен-каллен соос куашканы кутско ини. Вал Пуро гурт вӧзын бырем гурт, но визьмо адямиос сое улӟытӥзы, шутэтскон инты усьтӥзы. Табере со шутэтскон инты кузёезлы барыш вае, гуртэн ульчаез но будэ.

Вань на Пуро вӧзын мукет гурт. Отын улэ мынам дядяе (песяатае). ӝыныез улӥсьёссы пересьёс гинэ на. Мынам анае отын вордскемын, нош али шуэ: "Мон кышкасько ини отчы ветлыны: котыр куашкам но куашкан калэ вуэм коркаос, кӧшкемыт ульчаос". Кин тодэ, ог-даур ортчыса, отын кулэм муртъёслэн лулъёссы гинэ но улыны кылёзы на, дыр. Дядяйлэн корказьысьтыз шедьтӥ дядяелэн анаезлэсь дэремзэ. Сое кей но сиымтэ на, нош нэнэелэсь зыбынзэ коть али но нуллы. Соиз понна коть шумпотӥсько, но сандык сисьме, сэрегъёсы кортлэсь ке но лэсьтэмын.

Тани огшоры удмурт Зямбай гуртын чипсы поттонъя заводзы но, пе, вань. ӟечокъёс. Озьыен вань ужан интыоз - гурт уз быры, азьланьтӥськоз. Нош мар вань Пуроын, Починкаын? Куашкась совхоз, кытын скал гидъёссы гинэ но тӧлъя-буръя ветло ини? Кузёзы уксё сярысь гинэ малпаське, ыжпиоссы вордскыса вуо-а, уг-а, но сопал дуннее лобӟылэмысь ӧз дугдылэ на.

Ализэ ӧд дунъя ке, гырпумдэс куртчылыса, эн пуке. Толыкез уз луы ни.

Тау.

Творчество.

Творчествоен вырон процессэз бытовуха быдтэ.

Яратылӥсько пукыны конференциосын, мае ке выльзэ тодӥсько ке, эшшо но золгес шумпотӥсько. Тани берпуметӥ конференциын кылем толэзе вал. "Удмурт кыл журналистикаын" - темаез. Кема ик кыстӥськиз та ужрад, докладъёс трос вал, докладчикъёслэн но кылзы уг быры. Та ваньмыз конференц-залын ортчиз. Со УдГУ-лэн нырысетӥ корпусаз интыяське, нош докладчикъёс ваньзы кыкетӥ корпусын пуко. Соослы татчы переходтӥ лыктыны кулэ луиз. Малы мон али сое верасько? Ма ӵапак со нуналэ кыкетӥ корпусысь тараканъёсты, пе, травитьто. Операция 15 часын, пе, кутскоз, переходэз ворсалозы, нош нырысетӥ корпусын пукись докладчикъёслэн вань дӥськутсы кыкетӥ корпусын. Тӥни озьы чаляк гинэ 15 чсозь конференциез ортчытӥзы, пыр-поч йылпумъянъёс но лэсьтыса ӧз вуттэ, пумаз курткаоссы сярысь гинэ малпаськизы на вал, дыр. Ма ярам, толалтэ ук, урамтӥ уд мыны ук кыкетӥ корпусэ. Ох уж, со тараканъёс, конференциез но йылаз-пыдаз вуттыны ӧз сётэ.

Яке тани гожъяськись нылэз басьтом. Со творческой адями, кудӥзлэн весь лыдӟиськемез, лобамез, гожъяськемез потэ. Со озьы ик улэ......... бызьтозяз. Собере дырыз но гожъяськыны уг луы ни, мылкыдыз но воштӥське, сюлмаськонъёсыз но семьяеныз герӟаське. Озьы ик быро тросэз таланто нылкышноос. Ма соослэн адӟонзы сыӵе. Соин ик, гожъяське, пока яратондэс ӧд шедьтэ на.

Но татын но "но"-ез вань. Творчествоен вырыны кин сиён сётэ? Конечно, улон, солэн вань удысъёсыз, тубатъёсыз, дуннеосыз, шапыкъёсыз...(кызьы потэ вермды, озьы ик). Улон сётэ малпаськыны амал, суредаськыны материал, гожъяськыны учыръёс. Кыӵе узыр котькуд адями! Пушкады ӧд возьысалды ке со узырлыктэс, ми но кужмогес луысалмы. Огъя искусстволэн шыкысэз но бадӟымгес луысал. Возьматэ асьтэдыс.

Тау! Кык арнялы тӥледын люкиськисько. Дукесме вуро, тулыс вуэ ини.

Дырпус.

Мон кие толон бадӟым шумпотон вуиз. Табере мон шудо. Тӥледыз но шудо карыны быгато. Мон соосты тӥледлы вузаны быгатӥсько.

Мон кие толон  вуиз дырпус!

Нош мар гинэ ӧй вал, отчы туспуктэм лэсьтыку.

Котькуд толэзь - пӧртэм интыосын. Мон тӥни бусытӥ поръяй. Капкатӥ потыкумы, капкамес ворсаны вунэтӥськеммы. Чуньы но осликмы но бусые поръяны потӥзы. Кыӵе воля вал, дыр, соку соослы. Ворттылыса кӧтсы но ӧз тыры, вылды, берен азбаре пыртӥзы, собере - бур нуналэн ӝокыт гид.

Таяз арын трос дырпусъёс поттэмын вал. Богдан шуиз, Инвожо календарез, пе, уж дорам ошо. Яке анаезлы сёто, анаез доры ӵышкиськыны лыктэм адямиос, пе, мед адӟозы чебер удмурт нылашъёсты. Нош "Mademoiselle Oudmourte" - гуртам. * Календаръёс табере на все случаи жизни, так сказать)

Таяз арын календаръёсын котькуд нылашлэсь чеберзэ возьмато. "Инвожо", "Удмурт дунне", "Ильинлэн соц. дырпусэз", "Mademoiselle Oudmourte". Отын нылаш маин ке но герӟамын: инкуазен, мер шуг-секытъёсын. Образ вань, туж гармоничной, тупась, аспӧртэмлыко.

Вуоно арын табере мар меда луоз? Пиосты- а мар-а туспуктозы? Нылъёс пӧлын собере ажиотаж, дыр, луоз, кызьы али пиос пӧлын. Могдос.

Удмурт кышноослэн сямъёссы.

Кык пӧртэм кышноос.

Одӥг ныллэн компьютерез ӧвӧл. Лариса солы рефератъёс лэсьтыны юрттэ.
- Кӧня ке уксё коть тыныд сётоно, - шу Ларисалы ныл.
- Кулэ ӧвӧл! Тон мар. - черекъя Лариса.
- Кӧня верай ни, сыӵе ӟеч луыны уг яра шуыса. Меркантильной но луоно. ӟеч луон сямыд штанидэ уз кышъя.

Чукырна.

Огшоры гуртын улӥсь Олён. Сямыз сярысь тазьы вераны луоз: Олён-болён бутылка, чыштыр-чаштыр попадья. Мерлыко шуг-секытъёс сое уг сюлмаськыто. Нош матысьёссэ обидэ кельтэм понна, йырситэк кельтоз.
- Вот тани, удмурт кылэз школаосын одно ик дышетон сярысь кат кутыны туртто. Тросэз пумит талы. Ми ожмаськиськом, ожмаськиськом но, толыкез ӧвӧл! Тон но вера вал кылдэ, - шуисько мон солы.
- Мар бон вералом мон, - беренвазе со.
- Марке но. Тросэз тӥни озьы вазьылытэк но пуко. Нош тэтчасьёсыз ожыт. Ми трос кузя луысалмы ке, соку валасько.
- Ымдэс ворсалэ, но, бл*дь, нах*й, дышетэ удмурт кылэз, шуысал мон, - серектӥз Олён.

Чукырна ик.

- Ми 8 мартэ каша кариськом.
- Ы-Ы, - шуисько мон.
- Маша Юрие лыктоз!
-Со азьын тон ветлӥд ке мон доры, мыно, - шуисько.
- Мон тон дорын 23 февралез пумитало. Нош тон мон дорын 8 мартэз.
Пумит луэмъёсты кылзонэз ик ӧвӧл ни.

Нылкышно но арлыдо воргорон.

Нылкышнолы 19 арес. N воргоронлы 50-тон пала. Суббота нунал вуиз, нылкышнолы- шутэтскон, юон, позыръяськон, нош уксёез ӧвӧл.
- Щас, N сётоз ай. Жингыртоно.
- Весь-а мар-а со тӥледлы сётъя?
- Ма ыы.
-Мон ни за что ой сётысал, - шуисько.
- Ма мар солы. Творог, йӧл картошка Ижкар базаре вузаны ветлэ но. Уксёез ваньмызлы тырме.
Озьы, дыр, но. N воргоронлэн вань чыжы-выжыосыз, нош нылаш солы - огшоры пинал, чебер, соин одӥг гуртын улӥсь нылаш.

***

Комнатаям эше пыре. Лариса солы шуэ:
- Ойдо ӟыгыртӥськом.
Эше мыняса сылэ но номыр берен уг вазьы.
- Эх тон!

Нош ик удмурт кылмы сярысь.

Лыдӟи Сусанинысь "«Бурановские бабушки» разбудили у жителей Удмуртии интерес к национальному языку" нимо материалэз.

"Председатель постоянной комиссии Госсовета Удмуртской Республики по науке, образованию, культуре и молодежной политике Наталья Сударикова", вера:

«Молодежь сегодня заговорила, запела, и заобщалась на удмуртском языке. А кто дал импульс этот? Бабушки бурановские. Посмотрите, как сильно это заложено жизнью самой, природой, историей. Это надо приветствовать и надо давать возможность тем, кто этим интересуется».

Ы-Ы (Да неужели!) шуыса малпай ас поннам. Ноку но бон ӧй вераськысал аслам кылыным, Брангуртысь песянайёс ӧз вормысалзы ке. Ма мар шуод, азьло но аслам кылыным уг вераськиськы вал ук. Котырысь эшъёсы но озьы ик, лэся. АВТОБУСЪЁСЫН НО, УЛЬЧАОСЫН НО, ӟуч кыл шобрет улэ ватскыса, ветлӥзы.

Мукет адямиос, Евровидениын песянайёс вормем бере, удмурт кылын вераськыны но удмурт кылэз дышетыны мынӥзы, дыр, но.  Но мон сыӵе адямиосты одӥгзэ но уг тодӥськы. 

Мон соглаш, песянайёс трос мар шаермы понна лэсьтӥзы. Табере Россиын коть Удмуртилэсь автоматъёссэ (и то со Калашниковлэсь вордскем но тыршем интызэ уг тодо) гинэ ук, Брангурт музъемзэ но тодазы вайыло на. 

Учком Финляндиез. Отын кык кун кылъёс: финский но шведский. Кыӵе ке муниципал кылдытэтазы швед калыксы 6 %-лэсь трос ке, отысь школаосын одно ик швед кылэз дышето. Нош Удмуртиын малпаськоды, кӧня удмуртъёс уло? "Ненег пилемъёс" вылын пукись "инмаръёлэн" копак - а мар-а удмурт кылэз быдтэмзы потэ ини. Мед мынысалзы мукет улос-вылосэ, кытын чылкак ӟучъёс гинэ уло. Нош Россия соин ик узыр, музъемъёсаз сомында калыкъёс, культураос, кылъёс, йылолъёс сяськаясько шуыса. Нош со сяськаос пушйысалзы ке, кыӵе чебер суред луысал. Валаськоды- а, уд-а, сое "инмаръёс"? Яке сокем шузиесь!!! Колераос, кызьы шуысал мынам нэнэе.

Тау.

Тыныд гожтэт.

Чырткем, не. Толэзьлы ышылӥ кадь. Междуземьетӥ лобаса ветлӥ. Отын тонэн герӟет ӧй вал. Но мон ӟольгыриосме тон доры кельтӥ вал. Соос, кезьытлэсь пегӟыса, берен мон доры вуизы. Берытскеме потэ-а, уг-а вал, уг тодкы, ӟольгыриосы кошкизы тон дорысь но.

Тодэмед потэ дыр, кыӵе Междуземьеын улон. Отын ваньзы шудо. Татын котькыӵе улонъёс вань - соин ик та дунне узыр. Нош отын ваньмыз одӥг кадь - вань улӥсьёс ог-огзэс ярато, быдэс нуналъёсын шудо, инкуазь шапыкъёсын верасько. "Нош мар собере?", - юай мон соослэсь. Шузи синъёсын учкизы но юанэдлы валэктон берлогес сётом шуизы. Оски, ыы, юанэ сярысь мукет нуналаз ик вунэтӥзы ни.

Тани вуи. Вуи но вӧтай, кызьы мон кыӵе ке но тодмотэм адямилэсь пегӟисько. Кошкисько но лушкем оскисько, со монэ уз лэзьы, мон сьӧры мыноз шуыса. Вамышъёссэ кылӥ но ганяк луи. Кемалы меда? Кар шыпыт азбаръёсысь калыко ульчае потэм бере, лулылэн зэмзэ ик со адями дорысь кошкемез потӥз. Чалякгес вамышъяны кутски. Азьпалан эшъёсы сыло вал. Воргорон калыклэсь кышказ но интыяз дугдӥз. Мон берытски но адӟи, кызьы со сюрес кожонын мынэсьтым кошкемме учкыса сылэ вал. Со дорысь но, эшъёсы вӧзысь но кошки. Со мыным тодмотэм ук вал, нош кыӵе ке но кужым лулме бордаз кыске вал.

Вуыло на меда мон Междуземье музъемъёсы? Отын улӥсьёслы сётэм юанэлы валэктон утчаса гинэ ке. Ма кин тодэ, уйвӧтысь тодмотэм воргорон улон интыме но тодэ, дыр.
__________________________________________

Тонъёс трос. Тон - тӥ ваньды. Та гожтэт котькудӥзлы тӥ пӧлысь.

Калашниковез Мускоын, пе, ватозы.

Вадлян, 23.12,  ӝыт, команатаысь ӧсме усьтӥ, пырыса гинэ вуттӥ но, нылъёсмы шуо, Калашников кулэм, Калашников кулэм. Мон мынясько, мылкыды умой, шор площадьын нискыламы, киное ветлӥмы. Тӥни ӵапак "Хоббит" киноез учкыку, Калашниковлэн "дырыз вуэм". Собере Такъян жингыртэ, нош ик мыным со иворез вера. Пыӵал лэсьтӥсьлэн кулэмез бере час но ӧз ортчы, нош ӝыны кун та иворез тодэ вал ини.

Табере Смирновлэсь пыӵалзэ ушъяны кутскозы ни. Табере Калашниковлэсь шойзэ воксё Муское лэзё. Смирнов вордскем музъемаз кылле, но Калашниковез мурт сюе согозы?

Со Удмурт шаерын улэмын ук. Уг валаськы, малы сое Муское ватыны кулэ шуыса. Со Мытищи шуоназы Калашниковтэк кулэм муртъёс уг тырмо-а мар-а? Кин пӧлын, кӧня муртлэн лыосыз вылын, кӧня сантиметр (кыӵе метр на!) сю улын со кыллёз? Мон Калашников интые вань ӵыжы-выжыосызлэсь кӧтъёссэс, изьыкузы, кырмасал.

 Ма пересь луллы кулэ на, вордскем музъем, дуно шаер сяна? Юнме, дарманьто ини. Муско, Муско. Мусколы пыӵал гинэ кулэ, кыӵе дано адямилэн улонэз на солы, солы сотэк но тырме. Дано адямиез пичи калыкез но вордскем шаерез, гажаса, уте но вордэ. Анай кадь.

Тодам вайи на, школаын дышетскыкум Контр Страйк шудонэз яратӥсько вал. Одно ик Калашниковлэсь автоматсэ утчаса ветлылӥ. Кельше вал соин террористъёсты вийылыны.

Куазь сярысь.

Лымы шуна, асфальт вылын ву пуке, омыр кот, сюрес вылын ӝожон. Мар та, мар та? Нош арня ортчыса Выль ар! Туннэ университетысь бертозям, куанер сапегъёсы котмыса быризы. Нош Тол Бабайлы дунне.

2011 арын Донецкын та дыре писпуоссы вожектыны кутскиллям, бадьпуосы пучыос потӥллям. Я бон, Донецк палан оглом куазез ик шунытгес но.

Куке но лымытэк но Выль ар пумитаммы вань. Анай-атайёс тодо на. Нош ми пичигес дыръя, музъем ик кезьытлэсь пилиськылэмын вал, нош ватыны сое немаин. Туж зол висиз, дыр, со толэ музъем, Туж зол курадӟиз, дыр, Кылдысин. Яке соку Кылдысин Куазен керетӥз, яке Инмарен.

Али, оштолэзе лымыез возьмаса, нерад луиськиз. Толсурлэн кутсконаз Куазь лымызэ лэзиз ик.
- Мар ке но та туж зол жобаськыны но, толаськыны но кутскиз. Оштолэзь понна лымы усе -а мар-а,- шуисько анайлы.
- Со Мускоысь циклон лыктэ. Эшшо ог-кык арня, пе, со кузёяськоз на.

Нош али Европатӥ анлантический циклон, пе, ветлэ. Соин йырин ми пала шуныт тӧлъёс вуо, омырлэн температураез 10 градуслы шунытгес луэ. Озьыен, циклон ӧз пуксьы ке, Выль арлы лымылэсь номыр но уз кыльы ни. Тӥни мар.

Шаурма. Колбаса. Кыстыбей.

Мырдэм-мырдэм катоке но вуи. Одӥг нуналэ укнотӥ усись лымы шоры учкыкум, коньки вылын нискыланы чидантэм мылкыд  ӝутскиз. Пичи дыръям нэнэй дорысь коньки шедьтӥ вал. Со 40 размеро пыдлы. "Собере мар?" шуыса малпай но эшъёсме гурт тымет вылэ конькиен нискыланы поттӥ. Али уг валаськы, кызьы ми нискылам. Конькие пыдесозямы выйим вал, дыр.

Куазь шуныт. Но тол бамъёсме чепылляз ик. "Яблоклэсь но гордо бамъёсы" луизы. Кӧты сюмаз на. Вузкаронние мынытозямы, одӥг интыысь шаурма кылэз адӟим. Пырим. Азямы азер выж вылысь лымыез ӵуже вал. Тӧдьы дӥсен. Кускыз пась. Валаськоды дыр кыӵе суред ми адӟим. Быдэсак тӧдьы мугор вылын сьӧд, гоно кус пиштэ. Нош ми шаурмалы пырим. Пичи укнозы доры матэктӥм, нош мини-кухняязы со азеръёс кык кузя. Тани таиз, гоно кус, эшшо отчы чуртнаськыса пыриз на. Пыриз но милемлы шаурма лэсьтыны кутскиз. Али гинэ ӵужиськиз, кизэ ӧз миськы, ми азьын ик ваньзэ лэсьтӥз. Ма я ини, табере коть одӥсько, кызьы шаурма лэсьтӥське, но кызьы сое лэсьто таӵе интыосын.

Чималиен "Колбаса" спектакле вамыштӥм. Бере кылиськом вал ини, соин ик кыштыр гинэ гидкуазьёстӥ кошким. Вуттӥм. "Les Partisans" театр мыным кельше, соослэн вань одӥг стильзы. Али тани валай, вань шудӥсьёссы огвыллем шудо шуыса. Соин ик вань спектаклъёссы огвыллемесь луо. Юнме шорысь ӟуч спектакле удмурт кырӟанъёс лэзьязы. "Глазовский вотяк" шуыса кырӟаны кутскизы но, сюлмы ик чутрак луиз. Кырӟанлэн котькуд кылыз чигем венен сюлмам бышкалскиз. Не в тему вал, воксё.

Гань-гань, жадемме валаса, огъяулонние вуи. Татын туннэ шыпыт. Кыстыбей лэсьтон атмосфера. Огез картошка кисаль пӧзьтэ, мукетыз кыстыбей погылля, куинетӥез сое пыже. Нош сиськыны пуксьыкумы: ньылетӥез чайнике ву вае, витетӥез кружкаосмес миське, куатетӥез турын чай лэсьтэ... Оглом ваньмы. Тау! Кыстыбей туж ческыт кошкиз. Аслам ке, аслам ини, мар шуод на. Эшшо эшъёс ке вӧзын но анай кыл кыл йылын.

Тылобурдоос

Туннэ сыӵе шуныт куазь вал. Таӵе тол мыным кельше. Толон концертысь бертыкумы, чиньыос но маръёс но кынмыса усьыло вал ини. Нош туннэ пальпотэмысь ой дугдылы.

- ӝоген тулыс вуоз ини, - шуэ Лариса, одӥг комнатаын улӥсь нылаш, - шыркичъёслы каръёс лэсьтыны кутсконо ини.

Тодӥсько на, кызьы, сӥльёсмес пакетэ поныса, кыре ошиськом вал. Нош пислэгъёс лыкто но пакетэз кокчаны кутско. Тӥни озьы студентъёс тылобурдоосты но утё, асьсэзыс но обидэ уг кельто. 

Дыдыкъёс канализационной люкъёс вылын шунтӥськыса пуко. Нокинлэсь но уг кышкало, пештырско но ӝутскись шуныт омырез гонъёсынызы бичало.

Физкультураысь бертыкум, йыр вылтӥм лобась дыдыкез синйылтӥ. Со, кинэ ке утчаса, куд пала кожыны тодытэк кадь, лобаз, лобаз но укно шоры пыриз. Таӵ! пель дорозям вуиз. Куанер дыдык, кинэ меда со укноысь адӟиз? Номыре валатэк, со нош ик бурдъёсыныз шонаны кутскиз но син азьысьтым лобӟыса кошкиз.

Яке тани сюан дыръя, тӧдьы дыдыкъёсты инбаме лэзё. Соос кышноен картъёслэсь яратонзэс вылӥе ӝуто кадь но котьку сюлэмъёсазы кельто. Нош со дыдыкъёс эрикоесь ӧвӧл ук. Соос берен асьсэ кузёзы доры берытско. Нош яратон, кудзэ выль семья дыдыкъёслы оскиз? Пытсэт сьӧрын, дыдыкъёсын ӵош.

Туннэ зэмзэ ик шуныт куазь. Комнатаям туннэ трос адямиос вуылӥзы, соос шунтӥзы котырме. Юимы турынэн чай, но тылобурдоос сярысь ӧм вераське. Ларисамы гинэ, со котькуд минут шырчикъёслы каръёс лэсьтон сярысь малпаське.

"Активатор". Чуралиос.

Бадӟым классъёсын дышеткись чуралиослэсь гожъямъёссэс лыдӟыса потӥ. Оглом вераса, соос пӧлысь ӝыныез огшоры ужрадъёссы сярысь ивортон сётъяллязы. Отын ортчиз, яке ортчоз... Нош асьсэлэн малпанъёссы ӧй вал. Блог мон понна - со адямилэн малпанъёсыз, аслаз дуннеез, кудзэ со усьтэ мукет адямиослы. Висъям потэ вал Настя Лебедеваез. Солэн вал аслаз ӧрез, со мода сярысь гожъя, ачиз но дӥськут вуре, киужен выре. Блогысьтыз нылашлэсь ужъёссэ но адӟыны луоз. ӟечок. Солэн блогез татын.

Тросэз асьсэ школазы сярысь гожъязы. Туж умой. Табере тодӥськом, кыӵе улонэн уло соослэн школаоссы, маин туала школаын дышетскисьёс выро, тунсыкъясько. Гожъяськон культура ласянь блогъёсты учкид ке, тросэз уг чаклало шонер гожъяськон катъёсты, янгышъёсын гожъясько. Али дырлы блогъёсты лыдӟыны ярато. Адямиосты но астэ гажан вылысь чакласьконо, дыр, кӧня ке.

Тросэз блогъёс удмурт кылын но нуиськизы. Тани Мария Туроваез, удмурт кылын постъёсыз понна, "Дарт" газет висъяз. Зэмзэ ик-а анай кыл туала луыны кутске ини. Тани аслэсьтым школа аръёсме тодам вайисько ке, паймисько. Мон ас поннам ӟуч кылын вераськыны яратӥсько вал, яке немец кылын. Малпаськисько но вал ӟуч кылын. Эшшо ӟуч кырӟанъёсты немец кылэ берыктылыса ветлӥсько вал.  Нош али йырам удмурт кылъёс бергало.

Ваньзэ тае лыдэ басьтыса, нырысетӥ инты Италмас лицейын дышетскись Паша Вахрушевлэн блогезлы сётэмын вал. Озьы ик кулэ вал луыны. Солэн вольыт кылыз, катъёсты чакла, визьмо, аслаз малпанэз вань. Туж дӥсьтӥсь, мерлыкын аслэсьтыз интызэ тодэ, кылзэ но вераны уг кепыра ни. Но одӥгзэ пусйысал, кызьы Бикузин Женя шуысал, гожъяськон амалэз "академической".

Кылбуре Екатеринбургозь вуиз.

Проводникъёслэн отрядъёссы ОСТО "ЭКСПРЕСС" ним улын ужало. Со организацие пыро Удмурт шаерысь, Киров но Екатеринбург улосвылосъёсысь отрядъёс. Таяз арын солы тырмиз 45 арес. Солы сӥлы карыса, кылбур гожтыны косӥзы. Мон но гожтӥ - удмурт кылын. Косӥзы вал ӟуч кылэ берыктыны, мон пумит луи, со мынам кылбуре уз луы ни шуыса. Табере тодӥськоды- а мар! Тани.

Комментарийзэ но кылбурзэ пыр-поч лыдӟид ке, оло бӧрдод, оло серекъялод. Кылбурын вань кылъёс лякылэмын, нош мон умой вриант лэзи вал. Эшшо со газет Екатеринбургын потэмын на. Эшшо со пуктэм юан. Ижкарын отрядъёс Екатеринбурглы пумит уж нуо кадь. Нош со ваньмыз одӥг адямиен йырин, кудзэ Екатеринбургын националисткаен лыдъяло, дыр. Мыным гинэ-а озьы меда потӥз? Яке редакторез сокем эксцентричной, но журналистикалэсь этиказэ валасьтэм адями. Яке ачим сыӵегес. Но кин меда тужгес но умойзэ берыктэм кылбурез бырйоз? Екатеринбургын тодо удмурт кылэз? Ачим ик - а мар-а эксперто ӧрие куриськоно.

Сьӧд пиджакъёс.

Немар карыны шуыса, юнме укно доры султӥ но пелляськем шоры учкисько. Университет. Корридор. Мон вӧзын кык воргоронъёс верасько. Соос вылын чылкыт костюм, ымныръёссы но вӧен кадь маллямын.
Огез мукетызлы шуэ:
- Со кулэтэм слухъёсты быдтоно.
-Я, - шуэ мукетыз
- Тазьы верано, озьы кароно, мед мукетызлы оскозы.
- Лэсьтом.

Кизэс ог-огзылы сёто но люкисько.

Тӥни мар милям котырамы берга. Кызьы потэ, озьы ик вылӥысь адямиос мерлыкез посо. Нош ми оскиськом ини. Милям ужмы пичи: соосъя улыны. Милям эрикмы но гань-гань улонмы "вылӥ адямиослэн" малпам катъёсазы. Йырам Джордж Оруэллэн "1984" нимо романэз йырам лыктӥз. Адямиос валантэмез уг ярато. Соослы кулэ ваньмыз конкретноез.

Ну и оске, малпай ас поннам, но озьы ик, пелляськем шоры учкыса, укно дорын сылыны кыли.

Испан ӝыт

Испан ӝыт. Туннэ мында кунгож сьӧрысь вуэм адямиосты ӧй адӟылы на вал. Татын кореецъёс но, испанецъёс но, полякъёс но. Нош пӧлазы удмуртъёс. Именно удмуртъёс.

Туж шуныт но тунсыко ортчиз. Уг тодӥськы вал, Коррида дыръя ошъёсты виё шуыса. Огшоры вормо но пытсэт улэ улляло гинэ кадь потэ вал. Ошъёс жаль потӥзы. Я коть али Коррида Испаниын катэн лэзьымтэ шулдръяськон каремын. Вань на соослэн мукет фестивальёссы.
Кылсярысь, помидорен лэзьяськон, горд помидор "зарезь" пӧлын уян. Та юмшанын 150 тонна помидор, пе, кутӥське. Эшшо соос ошъёслэсь пеганы ярато на. Кыӵе ке ульчае ош уллёез лэзё но, етӥзъёсызгес соослэсь пегӟо.

Кӧня адреналин пальккиське! Ошъёс лёгалозы но ужзы быриз. Соос туж-туж пӧсь йӧскалык, лэся. Шулдыръяськоназы но вань сюлэмзэс поныса юмшало, дартзэс котыр пазьго, тул-тул! Мынам но сюлмам куддыр сыӵе мылкыд ӝуатске.

Испан кырӟан кырӟам, коктейль юим, испан вераськемез кылӥм. Нош пумаз... Пумаз испан эктон дышетӥм. Киынымы улмоез вай бордысь ишкалтӥськом, сииськиськом но мышкамы куштӥськом. Грацио.

Пумаз перепеч сиеме потыны кутскиз.

 http://instagram.com/p/hv3JeFMJ8p/

Ванялэн но 4 чебер пиослэн концертазы.

Тодисько на, кызьы нырысьсэ удмурт егит кизилиосын концертэ ветли вал. 10 классын одиг школаын дышетскисьёсме " Амисо Вотт" группаен гочати но "Бадзым буд, шаере!" концертэ шонти. Кыче мынам синъёсы жуатскизы соку, сюлэм золгес кокаськыны кутскиз, сыче шумпоти. Эшъёсы но удмуртлыкез ултияса возись зибет улысь мозмытскизы. Тани туннэ Белослудцевлэн концертаз но сыче ик лоптэм мылкыды вал. Школаын дышетскыку, амисовоттъёс мыным выль дарт кузьмазы, нош али - Ваня но 4 чебер пиос? Озьы, дыр. Тау.

Вотэсын та концерт сярысь трос малпанъёс гожтэмын вал ини. #вашкала сярысь верад ке: шонер-а овол-а ваньзылы тодмо калык луэм кырзанъёслэсь крезьгурзэ воштыны? Зэмзэ ке, ачим но уг тодиськы, мар та ласянь вераны. Но мыным туж тунсыко вал. Со вал группалэн аслаз крезьгур тулкымез, вуж кырзанъёсты асьсэ сюлэмзы пыр поттонэз, аслобонэз но улон шоры учкемез. Соослэн вань асьсэ стильзы, кудиз мукет стильёс полысь висъяське.  

"Les Partisans" театрэз туж гажасько, постановкаосазы ветлисько. Мон соосты адзисько ке, соку ик син азям пуксё тодьы но горд буёлъёс. Руководительзы тодьы йырсиё но весь горд юбкаен ветлэ, соин дыр. Тани татын но соос вал горд но тодьы костюмъёсын, образъёсын.
Актёръёс трос кузя ке но, котькудиз соос полысь шудэ, котькудизлэн синъёсазы кыче ке мылкыд адзиське.

Возам кыче ке зуч пиос пукизы, инстаграммитьтыса. Нош мон интыям куд-ог дыръя ситянэным выртыса, киосыным шонаса, пуки. Шумпотонэ уртчемын вал. #туала понна.

Огъяулонни пурзиз.

2 час уйин. Милям огъяулонниямы улон бугыръяськыны кутскиз. Милемлы пумит комнатаын весяк очникъёс уло вал. Кылем арысь отысь ваньзы кошкизы, жыны ар комната буш кыллиз. Тани али отчы пиос пыризы, заочникъёс. Соослы сессия дыръя немар карыны ук, соин нылъёс дорти ветло. Ми доры но пыраллязы вал, чайник куризы. 

Так вот. Соос одиг нылъёс доры чемгес пыралляны кутскиллям, шуры-муры отын да мар да. Со комнатаысь ик ныллэн пияшез вожаны кутскем. Кутскиз ук табере. . .  Уйшор берегес ик вань крылоысьтымы пиос со заочникъёсты интыязы пуктыны лыктизы. Кесяськизы, кесяськизы но пазьгиськизы. Тани кык час ортчиз но нош ик кесяськемъёс кылиськыны кутскизы. Заочникъёс нош ик со нылъёс доры лыктиллям лэся, нош вожась туган отын пуке вылэм. Жугиськизы мар.

Кемалась таче страстьёс ой вал ини. Кылем арын гинэ тини юыны яратись спортсмен весь мыжыкеныз сэзъяськыса ветлэ вал. Аракы гульымзэ коттэ но ачиз урме. Нош та учырын яратон-яратон лэся. Пось пиос. Нылъёсты утисьёс. Крылоысьтымы пиос эшшо вань нылъёслэсь юаса ветлизы на, оз исалэ -а соосты заочникъёс шуыса. Зечесь.

Заочникъёс кошкизыке, нош ик шыпыт но мусо луоз ини дыр. 

Киное ветлэм сярысь

Нош ик Ижкар. Нош ик уй. Шутэтскон нуналъёс  адямиосты коркаосысьтызы потто. Геналэн синпелетэз вылти нылпиос тэтчало. Нокыче анай-атайёссы матын но овол. Кыдёкынгес сэзъяськыса воргорон кошке. Эшъяськон кинокуа возын адямиос люкаськемын. Уйшор. 

"Адельлэн улонэз" нимо киное мынисько. 

Огнам лыкти. Алигес валай, мон кадь малпаськись адямиос ожыт шуыса. Соин ик нокинэ чертыса ой кыльы ни. "Небесные жены луговых мари" киное эшме черти вал но, со куанер мырдэм -мырдэм учкиз. Жаль ик потиз. Я, Пукси. Кино кутскиз, жыны зал буш, нош вань интыосы билетъёс вузамын. Ооо, нырысь дас минутсэ адямиос пыраны кутскизы. !!!!! Уг яратиськы. Мар мукет адямиослы люкетыса ветло, дырыз дыръя вуэмзы уг луы - а мар-а. Я, шыпытгес луиз. Шутэтскон нунал но уйшор бер бере, валаськоды, дыр, кыче состояниен адямиос пуко. Кыти ке зал пумын нылъёс весь серекъяса пукизы, огпал пуконын пукисез воксё умме усиз, нош мукет палысез котырысь вина бервыл зын лосъяськиз, вылаз со сумкаысьтыз бальзамзэ куддыр потталяз на. Йыр ик пормыны кутскиз. 

Кино бырем бере, кыштыр гинэ берти. Куазь шуныт, машинаос ожыт, чус но югыт. Кино оглом кельшиз. Вань мар понна Пальмовой ветвь сётыны. Нош шутэтскон нуналъёсы но эшшо уйшор бере на киное огнам уг ни ветлы. 

сяська

Та нуналъёсы кылем арын лымыез тросгес вал.  Таяз арын ожытгес. Кылем арын туж кезьыт но чус куазь вал, таяз арын шуныт но пелляськись. Кылем арын вось вал, таяз арын чидамон.

Таяз ар вообще интересной вал шуыса, вазиз мыным Чимали.

Сяська тол куазен кынме шуыса, гожтиськем на. Эше шуиз:"Нош выжыез кыле, но тулыс выльысь вордиське". Озьы. Соин ик юнме овол. Ваньмыз шонер. Тулысэз возьмано.

Толон таче малпанъёс мынам лобась йырам вуизы. 

Гожтэм книга тузонзыса кылле

Туннэ "Столица" вузаськонниын показ вал. Аслэсьтым ужме быдтэм бере, сузэреным сиён басьтыны кошким. Со куспын жокмы сьоры мукет адямиос пуксьыса вуттилям ини. Соин сузэреным огназ пукись кышномурт возы пуксим. Со котьмае тодэмез потись вылэм. Нырысь мода возьматись нылъёсмы сярысь малнъёссэ вераз, выли модаен чошатиз. Мон, пе, вал сыче диськут возьматонъёсын, да марда. Собере агенство сярысь юалляськыны кутскиз.

Со но мар валэкти, соглаш луиз. Кыче бон гуртысь шуыса, юаз на. Пуроысь, шуисько. Табере топонимика сярысь юалляськыны кутскиз. Ваньзэ валэкти, малы отын Байситово, малы Пуро. Ушъяз, тросэз гурт нимъёссэз уг тодо ни ук.

Маслова Татьяна Васильевна - озьы вал кышномуртлэн нимыз. Со Удмурт шаерысь гуртъёслэн нимзылэсь семиотиказэ эскере. 150 гуртлэсь нимзэс гожъям ни, табере, пе, книга поттыны уксё люкасько. 60 сюрс манет кулэ.  Зеч уж)

Котьмар уксё борды пыкиське, мар шуод на. 

#тодмотэм

Мар улонын тужгес но вось карисез?
Ку тон возьмаськод, возьмаськод, малпаськод, кызьы луоз? Нош ваньмыз юнме. Со яратоноосын озьы. Соосты гинэ возьмаськод, соос возын гинэ астэ адзиськод. Со адямиос сярысь гинэ овол, лултэм арбериос сярысь но.

Тани алигес мынам ноутбуке мон вылэ куатаськиз но киысьтым выж вылэ тэтчиз. "Табере йыртим кутыса уд нуллы ни" - шуиз, дыр. Нош зэмзэ ке, мынам со тужгес но яратоно эше вал. Со котьку мыным юрттылиз. Нош мон, неблагодарной нылпи, сое ой гажа.

Яке, али "Столицаысь" бертыку, сузэреным азбаръёсти кошки. Кыче ке но воргорон, Надя, Надя шуыса монэ оте. Мон берытски но беренвази: " Здравствуйте, к сожаленью меня зовут Маша и фамилия совсем другая, не Надина". Со жожомиз, йырзэ лэзиз но, омырез чыжаса, азьлань кошкиз.

"Секрет" кино алигес учки. Отын вераське, кызьы асьмелэн малпанъёсмы улонэ пычало. Зэмзэ ик озьы. Коть оске, коть эн. Но Вселенной малпаськыса уг кылльы, мае тон йырад кемагес возиськод но чемгес син азяд пуктылиськод, со ик тон доры матэктыны кутске. Уродэз сярысь ке малпаськиськод, уродэз лыктэ, умоез ке- умоез. Соин ик, тырше чемгес умоез сярысь малпаськыны, чем эн вожъяське, эн уродъяське, соку тиляд улонды  шуныт тылын пиштыны кутскоз. 

Пычал поттись шаер

Алигес Удмурт шаерамы Путин вуылиз вал. Калашников доры пырам, зечкылам сое. Но со нуналэ ик кошкем. Гуртэ берти но анай-атайлы верасько ини:

- Путин Ижкаре ветлэм. Калашников доры лыктэм, кузьым сётэм но берен Мускояз кошкем.
- Кыче кузьым? - юа мынэсьтым анай.
- Уг тодиськы, - шуисько.
- Кулонтэм эмъюм? - серекъя анай.
Вераськон  вискамы Ванягай пыриз:
- Калашниковез кемалась вийыны одъяло ини. Никоновлэн автоматэз умойгес, пе. Но пока Калашников уз кулы, Никоновлэсь автоматсэ лыдэ уз басьтэ.
- Кыче дан ини Калашниковлы, - вази мон.

Ма мар карод на али, Геннадий Никонов но кулэмын ини. Тайзэ конструкторез Калашниковлэсь вылиегес жутонлэсь кыче толыкез на. Малы со кулэ?

Куддыръя потэ, Ижкар со конструкторъёсын но пычалъёсыныз гинэ тодмо луэ шуыса. Путин но тини Калашниковез сяна, номыр но асьме шаерысьтымы уг шедьты лэся. Тини мар кулэ милям кунмылы но солэн выли азьмуртэзлы. Алигес Со шуылиз вал, котькуд адями, солэн культураез, национальностез кун понна валтись дун луэ шуыса. Ыы. Озьы лэся, но уг шодиськы малы ке но. 

Арган куара

Берпумети толэзьзэ куддыръя укно сьорысьтым арган шудэм куараез кылисько. Со куараос пель дорозь вуо ке, соку ик укно доры мынисько. Учкисько, учкисько но нокинэ уг адзиськы. Та дырозь мыным тодмотэм вал, кинъёс озьы арганэз кыскаса ветло. Татын со, Ижкарын, нош мон огъяулонниын.

Туннэ но тани арган шудэмез кыли. Озьы ик кыштыр гинэ укно борды баменым жиптиськи но адзи. Туннэ мон адзи арганчиез. Со "Чипчирган" ансамбльысь выль пиос вылиллям. "Перепечкинэ" мыно, дыр, шуыса, малпай. Кин ке мыным киыныз шонай. Берлогес тодмай, Женялэн мугорыз кошке шуыса.

Кин тодэ, мукет нуналъёсы соос ик яке мукетъёсыз, арганэн шудыса, мынам укно ултим ортчылизы. Я коть, арган куараез но карысь кылисько, ато та "Спирит маркетысь" кесяськем куараос пелез куддыр вандыло. 

Анайёс.

Огпол гуртэ бертыку, автобусысь тодмоме адзи. Со- пинал анай, семьяез возись. Пиез малыке но сьораз ой вал, азьло соосты  котьку но чошен адзисько вал. Анайлэн кияз бадзым пыр адскись пакет вал. Валай: со пиезлы салам вае - выль шудонъёс, ческыт сиёнъёс. Тодисько на, кызьы городмамае борды бызьса мыныса  зыгыртскисько вал. Со, угось, арнялы огпол гуртэ вуэ, но милемлы одно ик кыче ке салам вае вал. Пинал анай нылпиез сярысь сюлмаське.

Адямиос котькычеосыз вань. Мукет дыръя Ижкарын автобусын мынисько. Чугун сюрес вокзал палан анай пуксиз, возаз кык нылпиез. Одигезлы 8 аресъёс пала, нош мукетызлы -3. Нылпиосыз кырсесь, аслаз ымнырыз торнамын. Пичи пиезлэн мугорыз бадзым ке но,  анай сое кияз возе. Автобусын калыкез ожыт вал, соин ик мон соос сьоры учкылыны кутски.

Бадзым нылыз рюкзаксэ усьтиз но соскаен бутылка поттиз. Бутылка кылем йолын курмемын вал. Анай озьы ик отчы сок пониз, ворсаз, сэзъяз но пиезлы сётиз. Вань курмем йол сокен гылтиськиз, нош пичи пияш сое шумпотыса ик юиз ни. Собере анайлэн киосаз уме усиз. Малы малпасько, анай сое пыд вылаз уг пукты, пияшлэн пыдкутчанэз вылымтэ, гольык пыдъёсыз мачаесь. Куанересь но шудоесь. Нылаш анаеныз мыняса вераське, мар ке сярысь юалляське, нош анаез солы валэктэ, уг кесяськы, эшшо изись пизэ гадь бордаз жиптэ на.

Сюлмы шуг луиз.

Огдырлы ке но, мед берен пичи пиналлы пормысал.

Кемалась тазьы гуртэ бертылэм вал ини. Анайлэн мылкыдыз лоптэмын вал. Ми бертон нуналъёсы уж дораз шутэтскыны маза сётиллям. Со кык нунал Милемыз порамен сюдиз. Вот, малсько, жумми ни кадь. Зокталаез мертан вылэ султи но, коскай: эшшо золгес куйиськем на. Зэмос удмурт пияшлэн идеалэз луисько ини. Удмуртъёслы кой, зок пыдо, кузь йырсиё, тукыль бамо, векчи синмо кышномуртъёс, пе, чебер йото.

Чукна монэ Ванягай пичи нылпиез кадь сайкатиз. Пукон вылэ мыным пумит пуксиз но монэн вераськыны кутскиз. Кырын пеймыт на, кезьыт, нош корка паймымон шуныт потиз. Султы, шуэ, чай ю, каллен дасяськы, эн дырты) Со котьку мынэсьтым сапегъёсме кремен малляса кельтэ. Италмасэ дышетскыны но келякуз, котьку пыткутчанэ чиля вал. Али но тани ос азьын сапегъёсы шумпотыса сыло, пыдкуке вунэтиз вал ни дыр, ку сое берпуметсэ кремен зыразы.

Туннэ мыным Инмар шуд сётиз: Ижкарозь ик машинаен лыкти. Уг яратиськы автобусэн ветлыны, со трос интыосы дугдылэ, соин ик дыр юнме быре. Но автобусын астэ липет улын кадь кожаськод. Котырад трос адямиос, соос тон котырын сю полэс борддор кылдыто кадь. Тани чукна машинае пукси но сюлэмы кышказ: пичи инты, возам арлыдо пиосмурт, азьпалан шоре донгиськись сюрес. Шумахер кадь, одиг час интые жыны час куспын Ижкаре вуим. Нош машиналэн мыш пуконъёсаз пичи нылаш нылпи креслоез борды думемын вал. Куанер огназлы мозмыт луылиз лэся. Куддыръя "папа, папа" шуылиз, "ать". Атаез но солы "ать" шуыса вазьылиз.

"Ой, нылы, нылы". "Ать, мусое!", "Куто, куто, куто..." Нылпи яратон полын будыны кулэ. 

"Огни" номыр о:з кары.

Туж кельшиз ИСК факультетлэн постановкаез. Шуди:з оди:г адями, пал кыл но о:з потты, но вань сюлэмшугъяськонъёссэ выросъёсыз пыр возьматыны быгати:з. Ч:уж занавеска- озьы нимаське вал сценказы, кышкась адями сярысь. Зал шыпыт пукыса, учкиз, кызьы адями ч:уж занавескалэсь кышкаса улыны быгатэ. Туж таланто пияш.

Нош яратоно журналистикая факультетэ "мукет адямиосты" кужмо пуктэм"Человек-подушка" постановкаеныз паймыти:з. Мон кызьы малпай вал, озьы ик шуди:зы. Тани куать ар соос огкадь шудо ини, вань геройёссы, выросъёссы, шудон амалъёссы арысь аре оди:г адямиен, шонерзэ вераз ке, кык адямиен, лэсьти:ське бере, мон понна со ческыт о:во:л ни. Браво! шудэмзы понна. Но, кызьы дунъясь о:ри пусйиз, авторлэсь сьо:д юморзэсоос о:з валалэ, но ваньзэ туж серьёзно пукти:зы. Нош тач:е пьессаосты озьы пуктыны кулэ о:во:л, со кышкыт. Яке радъясьёсыз но сыч:е ик кышкытэсь-а? Университетэз быдтыса но татысь кошкемзы уг луы, интыязы пуко кадь)

Адз:ом ини, таяз аре но тужгес умой шуди:сь понна синмелет басьтозы-а, яке уз-а?Оглом кельшиз, но потэ вал ини журналистъёслэсь мукет шудэмзэс адз:ем. 

"Огни" паймыт:из

Толон "Огни большого вуза" вожвылъяськонын Дикий трэш вал со, кызьы шуысал Таня нимо эше. Вань спектакльёс по:лысь висъяськиз Удмурт филология факультет. Мынам уг поты шуэм, со удмуртъёс, соос озьы быгати:зы шуыса. Кызьы быгати:зы? Кызьы со ОЗЬЫ? О:во:л. Ваньмыз вал огшоры, шуди:зы огшоры, актёръёс кадь театрально о:й вал. Темаеныз туж чакласькыса ужано луиз, дыр.

"Ваньмон дыр" гожти:з ни та спектакльзы сярысь. Вакчияк сюжетсэ отысь быгаткоды учкыны.
Мынам реакция сярысь потэ верам. Во:зам пукись нылаш, журналистикая факультетысь кыкети: курсысь, шуэ: "От кого, но от удмуртской филологии я этого не ожидала". Гогы, малпай ас поннам. Мон но ко:ня ке асме вень вылын кадь пукко кожай, но берпумети: судэн сцена, монэ во:й п:олы сэрпалти:з - мон куани:, мон шумпоти:. Журналистъёслэн нош ик луоз бо:рдон, туж мур малпаськыти:сь тема, яратон, деградация... Зэмзэ ке, куддыръя акыльти:сько со сентиментализмлэсь. Туннэ соос сцена вылын луозы. Учком, мар по:рмоз. Котькуд ар соосты пусъё.

Ваньзы гань-гань пуко вал, нош Удмурт филологиялэсь спектакльзэ учкыку, тросэзлэн тыбыръёссы шонерскизы, синъёссы шузимизы, тросэз серекъяз, факультет понна возьдаськиз. Тросэз султыса кошкизы.

Кин кызьы та ласянь малпа ини. Нош мон малпасько, со вал-эрик. Мелэ ти:ледлы кадь. Со улонлэн оди:г палыз. Жюриос но кыклы люкиськизы: кин ке шуиз, туж зол пуктэмын вал шуыса, нош кин ке, тышкаськиз, оди:г пичи но художественностез о:й вал шуыса. Театр - со искусство ук. Иське искусство - со мар?

Мынам ко:ты тыриз "треш" шуонэн, но  спектакльлэн пуштросэзъя маиз ке но о:з тырмы. Смыслзэ быдэсак о:йгес вала, дыр. Мыным кулэ вал пичи ке но мар ке пушкам пыч:атыны. Жаль, о:й шедьты мае пыч:атыны. 

"Огни" вожме потти:зы.

Али УдГУ-ын "Огни большого вуза" нимо театр ортче. Котькуд факультет аслаз постановкаеныз ассэ возьматэ. Ч:апак толон отчы малпай мыныны. Кылем арын но вуыли: вал. Кельшиз.

Нош толон нырысети: ик психологъёс сценказэс пукти:зы. Учкисьёс туж трос, пуксён инты ик о:во:л. Ваньмыз умой мынэ вал, декорациос, шуди:сьёс, куаразы кыли:ське, зал пумын ке но сыли:сько вал. Ло:пшо Педунь поттозь, ваньмыз умой вал) Вань пуштроссэ йыринь-чукинь берыкти:зы. Ло:пшо Педунь- могдос учыръёсы сюрись воргорон- луиз чурыт, нокинэ но жалясьтэм, секси пичи пияш, эшшо гусар ди:ськутэн на. Со сыч:е юмор, дыр, вал, но мон о:й вала. Котьмар шуэ, но Ло:пшо Педунь - со Баба-Яга о:во:л. Эшшо удмурт кырз:ан лэзизы но, сцена вылын з:уч эктон эктыны кутскизы, "Барыня-сударыня" выллем, крезьгурез з:учлы укша вал, соин-а мар-а. Удмурт лулчеберетэз серекъяса но йыринь-чукинь берыктыса кушти:зы кадь. Юан кылдэ: кытын соослэн выли: дышетсконнизы но кыч:е мерлыкын соос будэмын. Соос- кин пути:з та сценкаез. Мон пумозяз учкыны о:й чида, кошки.

Туннэ филология факультет но мукет кыля зол факультетъёс сцена вылын луозы. Туннэ но ветло)