Кӧшкемыт тымет

Милям нуртын, кемалась ик ӧвӧл - кык ар талэсь азьло-,  Улысь Вуко интые тымет ӵыпизы. Мырдэм-мырдэм. Кемалась возьмам вал ини. Ӵыпизы, но кызьы али тодӥ, отын уг яра пӧласькыны но, чорыганы но, дортӥз ветлыны но.

Со тымет вӧзын ик вань мукет тымет - Чальдӥ. Вуж, мусо, вутурынэн басьтэм, нюлэсэн котыртэм инты. Покчи классын дышетскисьёс отчы чорыганы мынӥллям. Шуак кытысь-марысь нюлэскысь, дото зол утыса, дас пала бадӟым пуныос потӥллям но пиналъёс пала бызьыны кутскиллям. Я коть соосыз, марзэ-созэ валаса,  я кышкаса ни-а, писпу йылэ тубиллям. Кызьы сыӵе пичи шпанаос кыз йылэ тубыны быгатӥллям, мон понна валантэм. Пуныос пиналъёсты "утьыса" жадиллям но кошкиллям. Таосыз великъёсазы пуксьыса, гуртэ чачыратӥллям.

Ми малпам вал, со пуныос кытысь ке но вуэмын шуыса. Яке со кыр пуныос, кудъёсыз уло нюлэсын но пӧйшуръёсты кесяло. Но уж мукет бордын вылэм.

Пуныосты тыметэз ӵыпись, ужбератӥсь отчы лэзем. Нокин но тыметэз доры медаз матэктылы шуыса. Валасько, пуныос Улысь Вукоын гинэ пукысалзы ке, соос мукет гурт дорозь но вуо. Асьсэос кӧшкемытэсь, котькинэ пурыны дасесь, ӝужытэсь но сьӧсесь. Матысь дыре соос, сиён утчаса, гурт кузя но поръяны кутскозы ни. Пастухе потэм пудо-животъёс вылэ тэтчалозы. Адямиос ульчае потаны кышкалозы.

Тӥни кыӵе чурыт но сьӧд сюлмо луыны быгатэ адями. Тымет - со инкуазьлэн люкетэз ук, малы сое аслыд гинэ кароно. Эшшо сыӵе амалъёсын на. Валасько, со ужбергатӥсь асьме гуртысь луысалыз ке, но трос мукет гуртъёсын фермаос ӧз возьысалыз ке.

Адямиос уксё поттон понна, гын вылысь чутыны кутско ни.

Туннэ Перепечкинын

Азьло дыре "Перепечкин" - э туж яратылӥськом вал пыраны. Отын  астэ гуртад кадь кожаськод. Берпуметӥ дыре отчы ӧм вуылэ вал ни. Эшшо Вотэсын ивор вӧлмиз на: Перпечкин Чебуречкин луоз.

Туннэ отчы пырам. Сыӵе ик мусо, туала инты. Но кыӵе ке но буш, мурт. Поваръёссы-а кинъёссы-а залын ик пуко, компотсы ӧй вал, винозы быдэсэн, пе, вузаське, так стаканъёсы ум тыриське. Ярам, мар вань, со ик басьтӥм ни.

Тунсыко потӥз, зэмзэ ик кафе вузамын ини меда шуыса. Жаль потэ, соослы PR-менеджер кулэ. Кассирзы, валатэк, мар сярысь мон юалляськисько, шуиз, директорзы соиз ик ай, пе. Мед Перепечкин ик кыльысал, кутскем ужез пумозяз вуттоно ук. Огшоры политиказэс воштоно, куронъёссэс чурытгес кароно, ужрадъёс ортчытъяно, калыкез маин ке но ас бордаз кысконо. Вераны капчи, конечно.

Ми дась литӝытъёс отын лэсьтылыны. Шумпотыса.
Тау!

Мыным кызь. Part II

Ӧсэ йыгаськись луиз. Усьтӥ, нош отын бадӟым сяська керттэтэн тодмотэм воргорон сылэ.
- Марья?
- Мон
- Тӥледлы сяськаос.
Мон чарка быдӟа синъёсын гинэ учки на со шоры. Мар вазьыны ӧй вала.
Открыткаысь валай: трос иськем ортчыса, Со Ижкаре вуиз ковёр-самолётэн. Со дыре мыным потӥз, Со кытын ке матын но нокытчы ӧз кошкылы шуыса. Но Со малпанъёсыныз гинэ пыраз мон доры, собере берен лобӟиз.
______________________________________________________
Сяська керттэтын вал 33 роза. 33 арескын Иисус кулӥз. Соос кӧня нунал ортчыса шуялозы, озьы ик даур но ортче. Туж сэрыт но валантэм. Со понна ваньмыз йырпӧромымон.
Тау!

Поро кече!

Шутэтскон нуналъёс азьын Йошкар-Ола каре ветлӥ. Отын пор блогёсъя семинар вал. Люказы студентъёсты но малпазы соослэсь блогеръёс пӧрмытыны. Зэмзэ ке, дышетӥсьёс но библиотекаын ужасьёс но лыктӥзы.

Огпаласен, "Порен удмуртэн одиг тусьтыысь сисько", шуо. Нош мукет палысен, та кык калык весь ог-огзы вискын вожвылъясько но ог-огенызы ожмасько вал. Малы ке но потэм ук фразеологизм, "порпиос ыбылисько" шуыса. Озьы бадӟымъёс нылпиоссэс но кышкатъяллязы. Яке шузи шуэм интые, тон Поршурысь-а мар-а шуозы.  Милям гуртмылэсь шур сопалэз но Поршур шуо. Шур тапалъёс сопалъёсты туж яратӥллямтэ, лэся.

Тани ачим но поръёс доры вуи. Автобусэ вазьгес вуиз, пумитасьёсы ӧй вал на, нош телефонэ пуксе, вылаз Теле 2 Марий Элын уг куты на вылэм. Вокзалын диспетчерскойлэн ӧсэз вӧл-вӧл усьтэмын вал. Пыри отчы, лэзизы телефонме "сюдыны", эшшо асме но кофеен сектаны одъяло вал на. Ас понназы серекъяло, шузиясько, мылкыдзы капчи. Котыр коркаос но яркыт яркытэсь, Ижкарын кадь пурысь ӧвӧл. 

Вуим семинаразы. Нырысь, конечно, бадӟым адямиос вераськизы. Университетсылэн ректорзы могдос потӥз.  Со пинал на, ушъяськись. Кутскиз, конечно, университетсэ ушъяны. Сыӵе быдэ вуымтэ малпанъёссэ вера, вера но вера, модератор султӥз ни, "кхы-кхы" шуэ ни. Нош соиз, тайзэ верало на, шуэ но, уг дугды. Сыӵе ик быдэс калыксы но потӥз: номыр сярысь но сюлмаськисьтэм, серекъясь, котьку капчи мылкыдо но быдэ вуымтэ. 

Мон удмурт блогъёс сярысь соослы верай, куд-ог дэмланъёс сётъялляй, кулэ ӧре выжтыны турттӥ... Деловой, пе! Соос понна та семинар туж кулэ но пайдаё ортчиз. Витетӥ курсын дышетскисьёс но пинал дышетӥсьёс но библиотекаын ужасьёс уг быгато интернет-инструменъёсты ужазы кутыны, зэмзэ вераса уг но тодо кызьы. Огез бадӟым курсъёсын дышетскись студентка воксё шуиз: "Блогез нуыны кулэ зэмос журналистъёс, нош огшоры адямилы сое нуыны шуг. Соин ик мон уг кутскы та уж борды". ОПА! Со кутскись журналистлы, шуисько, туж кулэ блог нуыны, гожъяськыны коть устогес кутскоз. Но малпанзэ воштыны пырик ӧй быгаты.

Ваньзы соос блог нуонэз туж шуг уж кожало, кудӥз туж трос дырзэс басьтоз. Та ӝыт бере, соос пӧлысь 10 % гинэ блогъёссэс усьтоз шуыса, мыным потӥз. Но тани одӥгез усьтэм ини: lyavi-tachana.livejournal.com

Соосты дышетӥзы блог усьтыны. Туала дыре со секыт ик ӧвӧл кадь но, но...
Соосты дышетӥзы блог нуыны, конфликтъёс сярысь вераллязы, Липецкысь "жжлэн зарни посолэныз" скайп пыр вераськизы. Сомында ивор соос вылэ усиз бере, семинар пумын соос шузимем кутъёс кадесь ик вал ини.

Радъясьёс сыӵе мусоесь. Уж висказы коскаса пуко. Нылпиослэсь ченгешон сямзэс эскерыку, соос асьсэос но тест лэсьтӥзы. Треннингъёсты туж сак кылзӥськыса но куд-ог интыоссэ гожъяса пукизы. Туж трос чай юим. Нуналаз ноку но сомында чай юэм ӧй вал на.

Милям кызьы ке мукет сямен. Троссэз удмурт блогеръёс, нырысь, асьсэос кутскизы нуыны блог. Нош собере ини мукет пӧртэм факторъёс вал. Нырысь удмурт кылэз Вотэсын азинтон, выль удыс усьтон, нош берло ини вожвылъяськыса но вожъяськыса бам усьтон.

Соослэн та удыссы буш, тӧл гинэ шуласа ветлэ. Милям школаын дышетскисьёс пӧлын Институт стратегии развития регионов сыӵе школа радъяз. Нош али со выллем поръёс но лэсьтӥзы. Пыкъетсэ конкурсной каре, дэмлай мон Эльвира Куклиналы, озьы пайдаез тросгес коть луоз.

Мыным кызь. Part I

- Мон тон доры туннэ лыкто.

- Я. Удмурт урам, 225-тӥ юрт, 405-тӥ комната.

- Я, вертолётэн вуо. Огъяулоннияд ик.

- Ковёр- самолётэн лыкты.

- Розаосын. Кӧня роза ваём. Кызь арес тырме бере, кызь ваёно вал. Но чётной мында кулэмъёслы гинэ кузьмало ук. Кызь одӥг-а ваём?

- Кызь вай!

- Малы?!

- Ма туннэ мынам улонэлэн кыкетӥ десятокез кулэ ук, нош вордӥське куинетӥез. Со розаос кыкетӥ десятоклэн кулэмезлы сӥземын луозы. 

- Я, Маши.

Уз вордӥськы выль улон, азьланьтӥскоз таиз. Вордӥськем нуналме ортчыто университетын, басма вузанъя базарын, Чипчирганлэн #ӵуказеотчётный концертаз но Йошкар-Олае сюрес вылын. Соос, мон понна, улонлэсь тужгес но дуно кузьымъёс. 

Медиавирус.

Туала егитъёс Вотэсэ йырынызы быдэсак выемын. Дуглас Рашкофлэн "Медиавирус" нимо книгаяз пыр-поч эскеремын, кызьы адямилэсь йырвизьсэ со медиа шуон сисьтыны кутске.

Мар телевизорын возьматӥське, мар Вотэсын популярной луэ - со ваньмыз медиавирус. Со вирус адямилэсь, мерлэсь ляб интыоссэ шедьтэ но мугораз пыре. Собере мугорлэсь клеткаоссэ ас палаз воштыны кутске. Озьы асьмелэн малпанъёсмы, азьланяз улонмы но воштӥське. 

Гуртын улӥсь егитъёс, тодады вае ай, Вотэсэз тодытэк, кыӵе улонэн улӥськоды вал. Шумпотӥсько, пичи дыръям денди выллем шудонъёс мон дорозь ӧз вуэ шуыса. Шонерзэ вераса, я коть мон со шудонъёсын висьыны ӧй кутскы. Кырын мукет пиналъёсын ӵош тупез ӵыжалляй, бызьылӥ, лапта шудылӥ. Табере учке  астэ шоры али. Ӝыны нуналзэ мерлыко вотэсбамын пукиськоды, дыр. Тӥ пушкын медиавирусъёс кемалась пуко ини. 

Та шутэтскон нуналъёсы гуртэ бертылыкум, пайми. Мон огпол но Вотэс сярысь тодам ӧй вайылы. Сомында дыр, эшъёс, ужъёс, сыӵе чебер инкуазь, котыр улэп улон... (Сыӵе символично, тае гожтыкум, Белослудцевлэн кырӟанэз шудыны кутскиз: "улӥськод одӥг пол...")

Кышкыт луыны кулэ, дыр. Ваньмыз луэ озьы, кызьы асьсэ антиутопиосазы гожъязы Рэй Брэдбери, Джордж Оруэлл. 

Гуртын улыкум, Ванягай уж дорысьтыз бертӥз но мынэсьтым юа:

-Телевизор учкид-а? Донецкын референдум ортчиз-а?

- Ӧй, мон уг оскиськы ни со иворъёслы. Тон оскиськод- а мар-а?

- Уг. Озьы ке но тодоно ук, мар луэ.

Уд оскиськы ке но, учкиськод. Тӥни кыӵе со медиавирус. 

Гурт. Егитъёс. Шутэтскон.

Шутэтскон нуналъёсы ваньзы инкуазе потазы, дыр. Бакчаын быдэс нунал ужаса, жадиськод кадь но, акшан вакыт вуэ ке, олокытысь ӟигар потэ.

Умой, ку быдэс гуртысь егитъёс, бадӟымъёсызгес но, покчиосызгес но, одӥг интыын люкасько. Пӧртэм компаниосысь одӥг интые люкасько. Соку ик тодам вайисько армие келян ӝытъёсты. Кызьы вань пиос армие кошкисез дышетыны кутско, кызьы армиын астэ возёно, кинэ кылзӥськоно, кызьы портянка пыдэ биняно. Таӵе шулдыръяськонъёсын пиос нылъёслэсь мыло-кыдогес кырӟало, экто но шудо. Яратоно кадесь.

Тани татын но. Машинаысь крезьгурзэс нырысь лэзизы вал. Но кытысь-марысь "зарни арганчимы" баянзэ поттӥз. Пайми. Пиос чурак султӥзы но, сыӵе мылысь-кыдысь кырӟаса лэзизы... Котькыӵе нылаш соку ик соослы синмаськысал. Эктон гур лэзь, куризы вал нылъёс. Но "зарни арганчи" баянзэ ваем бере, сосектаез кыскаса, солэн киосыз туж жадё.

Вань зэмос арганчиос  погратозязы юо. Эктӥсьёс соосты весь сектало, сектало, таиз понна, соиз понна, арганэн кымалтыса, пол вылэ поныса... Таиз но арганчи соос пӧлы ик пыре. Шузимытозяз сектазы ке но, со шудэмысь но кырӟамысь уз дугды. Пыд вылаз уз сылы ни, но арганзэ уз кельты. Собере мукет нуналаз ветлэ ини, малы меда сыӵе зол киосы висё шуыса.

Со арганчиос матысь дыре раритет луозы ни.

Зэмос гуртысь зэмос суредъёс. Сыӵе ини милям туала улонмы.

Туала

Южной автостанциын учыр. Пуктэ син азяды трос портэм гурт адямиосты но куноысь бертӥсь пересьёсты. Арлыдоослэн эшшо басмалэсь вурем сумкаоссы вань на.

Тӥни одӥг сыӵе пересь кышномурт автобуссэ возьма. Огшоры гуртысь кышноос кадь дӥсяськемын, кияз басма сумка кутэмын. Сылэ. Солы жингырто, кышномурт кисыысьтыз телефонзэ поттэ но...

Тӥ уд оске.

Шунды улын телефон бордысьтыз куртчем яблок чилектэ. Айфон. Кутӥз, вераськиз, кысӥз, блокировкае пуктӥз.

Туала дыр.
___________________________________

Такъянаелэн верамысьтыз.

Кытчы пыриз ӟуч культура?

Россияын кызь ар капитализм ни, нош 1-тӥ маез али но Быдӟым праздникез кадь гажало. Кыӵе парадокс. Коммунизм ноку но Россиысь уз кошкы, дыр.

Арсенал дорын пӧртэм калыклъёслэн ассоциациоссылэн концертсы вал. Удмуртъёс, азербайджанъёс, татаръёс но ... велосипедистъёс.

Кык арлыдо кышномуртъёс сыло. Одӥгез мукетызлы вера:
- Кытчы пыриз ӟуч культура? Тани кӧня татын калыкъёс кырӟазы, эктӥзы. Нош ӟуч лулчеберет ӧвӧл. Одӥг пол школаысь литератураен дышетӥсьлэсь но юай вал ни, ку милям ӟуч культурамы ышиз-быриз?

Зэмзэ но, ӟуч ассоциациос Удмурт  шаерын ӧвӧл. Тӥни озьыгес. ӟуч культура сотэк на ас понназ улэ. Нош кыӵе нюкъёсын со али дыре пуке? Таиз мукет юан ни. Мукет йӧскалыкъёс шаерамы ӧжыт, соос тыршо азьлане кошкыны, асьсэ сярысь вераны. Нош ӟучьёслы со кулэ ӧвӧл, соос сотэк но трос, соослы сотэк но умой. Соос шаляй-валяй костаськыса ветло кадь.

Тани Вовик Вахрушев али малпанзэ вераз вал. Огпол, пе, кар инбаме учки но, куинь кизилиез гинэ адӟи. Нош гуртын вань кизилиос юг-юг пишто. Нош карын куинез гинэ. Кӧня кужым но мылкыд кизилиослы кулэ  ӵындэм кар инбам пыр пиштыны.

Обособленной йӧскалыкъёслэн бадӟым мылкыдзы.

Эшъяськон нунал

Одӥг интыын сомында пӧртэм йӧскалыкъёс вал. Татарча, еврей, азербайджан, удмурт... Туж но туж тунсыко вал, йырмес коть сынам. Тау, Оля Трониналы, кудӥз монэ та ужрадэ чортӥз.

Туннэ ДДН-ын "Что? Где? Когда?" шудон ортчиз. Мон валай, мынам малпаськон ӧре воксё мукет шуыса. Трос пол шудэмын ни ке но, куд-ог юанъёслэсь логиказэ уг валаськы. Нош тани суперкомандаослэсь шуэмзэс учкыны кылим вал. Соос юанъёсты мульыез кадь пильыло. вить секунд - валэктон йырын чилектэмын ни. Пайми. Еврейёс -  визьпогъёс.

Еврейёс котькытын но котькытчы вутто. Удмуртъёс сыӵе луысалзы ке, кемалась нимаз Удмурт кун луысал ни. Ма соос татраъёслэсь но зол асьсэ кылзэс но лулчеберетсэс гажало. Дина Рубиналэн "Их бин нервосо!.." книгаысьтыз ик сое адӟыны луэ. Соослэн чик но уг поты ӟуч кылэз дышетэмзы... Аслэсьтыззэ туж ярато.

Шудон бере, эшшо куинь минутлы Вовик Вахрушевен футбол учкыны вуим на. Висказы Ижкар но Тюмень командаос шудӥзы. 0:0. Эшъяськон, пе, вормиз. Эшъяськон юртысь -  туннэ нуналлы эшъяськонэн пыӵам -"Зенит" стадионэ вуим.

Копак бон,  туннэ  эшъяськон вань пуртыосысь пачыла.

Людмила Улицкаяен пумиськон

Малы меда адямиослы  мурт малпанъёс туж тунсыко пото?

Тани туннэ УдГУэ тодмо гожъяськись Людмила Улицкая вуылӥз . Туж яратоно кадь, огшоры, визьмо, арлыдо кышномурт. Зэмзэ ке вераса, азьло мон чик но ой вал тодмо солэн творчествоеныз. Пумиськонын но аслаз гожъяськемез сярысь трос ӧз вера, юанъёс но та сярысь трос ӧй вал. Тани кык-куинь гинэ.

Кызьы со шедьтэ сюжетъёс, книгаосызлы ним малпа да марда? Уг тодскы шуэ, пуксиськод но озьы ик гожтӥське. Нош сюжетъёс, пе, сое пумтэм-йылтэм сого (бича гинэ, улонын соос туж трос). Куд-огъёссэ бордысьтым пезьдытъясько но, шуэ.

Юаллязы Украина сярысь! Ачиз ик куанер акыльтӥз та тема ласянь вераськыны. Уг яра, шуэ Россиялы Украиналэн ужъёсаз пыриськыны. Мед али тупам учырысь ачиз потоз но ӝутӥськоз. Нош солы весь люкето, выль тылпу кынӝытъяло. 

Оглом кышномуртлэн образ сярысь туж трос юанъёс  вал. Яратӥсько, пе, ӟуч кышноосты. Ортчемзэ тодэ ваид ке, соослы котьку но пиосмурт киос ӧз тырмылэ. Вань секыт уж кышномурт пельпум вылэ усьылӥз, со семьязэ утьыны выриз. Нош туала кышномурт мукет ни. Табере солэн нырысетӥ интыын семья уг сылы ни, туала арын солы дышетскон кулэгес.

Озьы Людмила выжиз семья сярысь вераськон вылэ. Али, пе,  "феминизация мужчин но маскулинизация женщин" луэ. Тӥни озьы.

Ачиз гожъяськись творчествоез сярысь шуэ, "мон ваньзэ улонысь басьтӥсько". Соин ик вераськон но улон сярысь тросгес вал, дыр. Гожъяськыны со эркын дыръяз гинэ гожъяське. Мон, шуэ Улицкая, нырысь ик улӥсь адями. Соин ик улон интыям гожъяськеме уг луы, малы ке шуоно отын - улон. Тани али матысь дыре кунгож сьӧры кошко, отын шыпыт интыын кутско ни ужаны.

Солы, пе, вдохновение кулэ ӧвӧл, яке муза весяк Улицкая бордын улэ. Гожъяськисез огшоры, пе, огназ келтоно, нокин но медаз иса но акыльяськы ни шуыса. Соку ини кутско вордӥськыны выль книгаос. Мынам но озьы луысал ке.

Людмила Улицкая автографъёс сётъя.



Улицкаялэсь автограф басьтыны султэм адямиос.

   

Эль ныл-2014

Туэ Эльныл кыкетӥзэ ортчиз. Арт-пространство "Сахар" сомында калыкен тырмемын вал. Та ужрадэ вуыса, тон аслад гуртад кадь вуиськод. Огшоры пуконъёс интые небыт пуфикъёс вылэ пуксиськод. Подиум интые киын лэсьтэм ковёр. Сыӵе югыт шуныт атмосфера. Зэмзэ ке, Сигмаын озьы ӧз луысал.

Мыным потэ, таӵе ужрадъёс модалиослы гинэ ӧвӧл, асьсэ дизайнеръёслы туж бадӟым пайда ваё. Дэрем вурисьёс мар ке выльзэ басьто, мукет пӧртэм идеяосын тодматско, соослэн выль коллекциос лэсьтылыны мылкыдзы ӝутӥське. Трос вал туннэ дизайнеръёс. Чисто ваньзылэн, учкисьёслэн, но чильтыр-мильтыр луэмзы потӥз, дыр.

Ми ставкаос лэсьтӥм вал, кин вормоз шуыса.

Вице-мисс луиз Юлия Лекомцева.

Нош "Эль ныл"-2014  - Дарина Якимова. Шумпотӥсько, анай-атайёсы вуэмын вал шуыса. Нылъёс понна, та ужрад нырысетӥ интыын сылэ вал, дыр.

Модель тыршись луыны кулэ, котьку но кытчы ке кыстӥськись, муш кадь ужась. Так ке ваньмызлы сыӵе луыны кулэ.

Кылем арен ӵошатыса, Дарали туж бадӟым вамыш лэсьтӥз. Нылашъёс но, визажистъёс но, фотосессиос но, спонсоръёс но устогес вал. Тазьы Парижозь но кыдёкын ӧвӧл ни.

Дарали - суперкышномурт!



Герберын кадь.





Эль ныл-2014. Дарина Якимова! ӟечок.

Кибардина модали луонъя мастер-класс пыр потӥз.

Медиа-персонаос.

Пумозяз вуиды ке, тани соос, вань модалиос. Но шораз соослэн мумызы - Дарали.

Инмар-писпуос

Уг яратскы ӵышкем писпуосты.

Мыным потэ: бӧрдо кадь писпуос.

Тырттэм йырвизьёслы кельшо выллем.

Малы тыршо одӥг кадь карыны

Ульчаосын будӥсь писпуосты?

                              Ф. Васильев.

Али дыре котькуд адямилэн вань аслаз писпуэз. Удмуртъёслэн мифологизыя котькуд Инмарлэн но вань аслаз писпуэз. Кылдысинлэн - кыз, Инмарлэн- пужым, Куазьлэн - кызьпу. Нош ньылпу со тушмон кужымъёслэн писпузы. Ньылпу вылэ одӥг тылобурдо но уг каръяськы, пе. Тӥни кыӵе чакласькисесь вылӥллям милям выжыосмы. Тӥ но юри учке ай. 

Писпу - со вань куинь инмар дуннеостӥ пыр потэ. Выжыосыныз Кылдысинлэн дуннеяз вуэ, мугорыныз Куазь дорын улэ, но котьку Инмар доры кыстӥське. 

Мозмыт учыр, яке туала улонлэн синучконэз

Туала дыре  анай кылзэ котькуд лингвист утьыны турттэ. Удмурт-а, зуч-а, венгр-а со. Тани азинскон ласянь учкид ке, бере кылись кылъёсы мукет калыккуспо кылъёсысь терминъёс пыро. Малпаськоды удмурт кыл гинэ сые висёнэн висе-а мар-а? Зуч кылын но тани коня иностранной кылъёс. Зуч лингвистъёс бордо, англи кылэз вераськонэ пыртылыны уг лэзё.

Тани, вирнуналэ (средае) Йоскалык лыдзиськонниын туала удмурт литературалы сизем жыт ортчиз. Тодосчиос но бадзым адямиос егит гожъяськисьёсты тышкасько: малы кулэ "абсолютно безграмотной" книгаос поттаны. Егитъёс уг лыдзисько, удмурт кылэз умой-умой уг тодо. Кар егитъёсты быдэсак ньылэ, кар, кытын будо чышкем писпуос но куло зэмос удмурт лулъёс. Удмурт кыл зучен зибиське. Озьы адямиос зуч сямен малпаськыны кутско, нош со малпанъёссэс удмурт кылын гожто, шонергес вераса, удмурт кылэ берыкто. Калька порме. Кыл тияське, удмурт кыллэн аутентичностез быре. 

Жаляса верано, ачим но сычегес ик, удмурт литератураез шер лыдзисько, гожъяськонэ но зуч амалъя кошке. Школаын копак мукет сямен вал. Тани та жытын но школаын дышетскисьёс асьсэлэсь "порамъёссэс" лыдзизы. Пияш чылкыт академической удмурт кылын гожтэм Кузебай Герд сярысь малпанъёссэ лыдзиз. Ас поннам малпай, мар меда выли дышетсконниын соин луоз. Адями весь одиг интыяз уг сылы ук, со азинске, малпанъёсыз но воштисько, гожъяськон амалэз но кылыз но мукет луэ. Искусство, литература но туала вакытэз возьмато. Литература но туала улонэн улэ. 

Ослоп

Кин тодэ Борис Гребенщиковлэсь творчествозэ, валалозы, дыр, монэ. Мон понна со туж тунсыко журналист, кудӥз адямиез визьмо но кулэ тодон-валанъёсын пыӵатэ. "АЭРОСТАТ" передачаезлэсь одӥг коть выпусксэ кылзэ ай, трос мар выльзэ тододы. Со передача тунсыко крезьгурен но тодматэ. Лул ик шутэтске.

Туннэ БГ Ижкаре вуиз. Ижкарез азинтонъя огазеяськон, #арго, соин пресс-конференция ортчытӥз. Сыӵе отчы мынэм потэ, со быдӟым адямилэсь шыпыт куаразэ кылэм. шудо синъёссэ адӟем, шараям малпанъёссэ пыӵатэм потэ вал. Сыӵе потэ вал... Но мыным шуизы, АРГОен эшъяськоно, интыос ӧвӧл ни, ӟеч лу. Кема ӧй малпаськы, берытски но Удмурт драмтеатре кошки. Туннэ отын "Ослоп" вал.

"Ослоп"-лэн нырысетӥ люкетэз туж мӧзмыт но кема кыстӥськись потӥз. Пинал актёръёслы вань на кытчы кыстӥськыны, соослы будоно но будоно ай. Малы ке но уг кельшы, нокыӵе но декорациос ӧвӧл шуыса. Крезьгуръёсын но пӧртэм гожтэм куараосын валаськод, кытын действие ортче. Нош мынам потэ вал адӟем быдэс суред. Одӥг со квадрат формаен колесо вылын бергась арберизэс оты-татчы нуллӥзы. Котькуд сценаын со штуказы вал кадь. Акыльтӥ огпӧртэм. Спектакльысь спектакле со бергась арберизы выже. Валасько, со трос мае воштэ, динамика кылдытэ шуыса. Действие Вятка губерниын удмур гуртын ортче шуэмзы бере, мон понна бадӟым контраст кылдӥз. Сыӵе просвещение лулчеберет вакытысь пуштрес дэремъёсын кузёос но удмурт дэремъёсын ляльчиос. Пьесае удмурт кылос пыртэмын вал: калык кырӟанъёс, куно пумитанъёс... Глинтвейнэз, удмурт кылэ берыктыса, пӧсятэм шуизы кадь. Нош пьесалэн кыкетӥ люкетэз зэмзэ ик кельшиз. Шудӥсьёс но золгес шудӥзы. Дыши, лэся. Динамикаез но, мылкыдъёсты но шӧдӥ. Пьеса , малпаськыса, удмурт калыклы тунсыкогес карон сярысь сюлмаськыса, пуктэмын. Тау, пиналлёс! Тау! БГ сярысь ик вунэтӥ.

Трос ӟучъёс лыктэмын вал, ӝыны зал наушникъёсын пукиз. Табере ӟуч драмтеатре ветлоно.

Юисьёс.

Юэм адями кынме ке, мар дауртэмзэ валатэк, кылиськыны, пе, кутске. Таязэ бертылыкум, милям гуртын кулэм адями сярысь кылӥськиз. Со юыса, кинлэн ке бакча бераз усем. Лымы вылын кылльыса, кынмыны кутскем, но копак вылӥ дӥськутсэ куштэм. Сазьзэ ыштэм, кынмись адями пӧсяны кутске, пе. Озьы ик со воргорон кынмем но кулэм.

Автобусысь потыкум, дугдылонниысь кышномуртэз синйылтӥ. Со ӟус вылын изе вал. Я коть юбкаез кузь вал. Валамон ини - юэмын. Со нуналэ ик, со кышномурт вузкаронниын ужась эше доры, пе, пыре. Уксё но аракы юа. Тӥни кытчыозь аракы но ляб сюлэм вуттэ. Гуртын но озьы костаськыса ветлӥд ке... Пукты вал настойка.

Я коть али шунытгес луиз ини. Южной автостанцие васьконъям, сомында кудӟем адямиосты адӟи. Одӥгъёсыз дугдылонни вӧзын асфальт вылын ик изё, мукетъёсыз ульча кузя водка ӟенеликен ветло. Толалтэ юисьёс сомында ӧй вал кадь. Лымы улысь потӥсь жуг-жаген ӵош алкашъёс но син азе пото. Но жуг-жагез утялтозы, нош юэмъёсты - ... ?

Ино.

Туннэ плошадетӥ ортчыкум, дото трос иностранецъёсты адӟи. Отын мукет кылын верасько, татын бӧтьырто, скамья вылын англи кылын вераськисьёс пуко. ӟучъёс мында ик иностранецъёс.

Мыным сыӵе шулдыр луиз. Мон но асме Удмуртиын иностранец кожасько. Нош иностранецъёс табере котырам туж трос. Усто - ТРОС ПӧРТЭМ КУЛЬТУРАОС, КАЛЫКЪЁС, КЫЛЪЁС одӥг карын. Я коть Ижкар бадӟым ӧвӧл. Кыӵе ке но иностранецен тодматскемды потэ ке, лыктэ поръяны ИжГТУ яке УдГУ доры, площаде куддыръя вуылэ. Иностранецъёсын тодматскыны коть ветлоды, всё-равно отын немар карыны.

Немец кыл школаын дышетӥ бере, ӵемысь немецъёсын вераськем туж потэ. И вообще туж умой трос кылъёсын малпаськыны. Валаны, маин соос пӧртэмесь луо. Дина Рубиналэн сборникез вань, "Их бин нервосо!" нимаське. Как раз соя валаны луэ, кызьы билингвизм малпаськыса вераськонэ вуттэ. Угось, удмуртъёслы удмурт кылын капчигес вераськыны, нош ӟуч кылын малпаськысагес вераськоно. Озьы мукет калыкъёслэн но. Языковая рефлексия со, солэсь нокытчы но уд пыры.

Югыт Пасха

Котькуд ар Пасха нуналэ мыняса султӥсько: кырын шунды пиштэ, корка тыр пӧраськем зын лӧсъяське, "Христос Воскресе" шуыса, куноос вуо. Котыр- чылкыт но югыт- ваньмыз улӟе кадь, Мыным потэ, та нуналэ котькуд адями, котькуд арбери пиштэ но котырзэ югдытэ шуыса.

Пичи дыръя одно ик матысь адямиос доры буям курег пуз вошъяны мынӥськом вал. Мыным но сузэрелы та нуналлы анай дэрем вуре вал. Озьы выль дэрем дӥсяса, ми нэнэй доры Починка гуртэ шонтӥськом вал. Отын пасха обед бере карыны кутско ини. Нэнэен юмшаса, берен гуртамы бертӥськом но асьме гуртын юмшаны кошкиськом. Та нунал милемлы шумпотон гинэ вайылӥз.

Яратӥсько вал воргоронъёсын картаен шудыса пукыны. Малы меда та нуналэ соос картаен шудо? Куд-ог гуртъёсын мужикъёслы уйбытэн гинэ уг тырмы, лумбыт но шудо. Изьытэк, эшшо уксё вылэ на. Нош черк шуэ, карта -  со шайтан шудон. Картаосын символъёс Иисусэз Голгофаын киросэ кортӵоген шуккемез возьмато. Кирос - кирос, куака - со Иисусэс кокчась тылобурдоос, кирпич - со кортӵогъёс, нош сюлэм - Иисуслэн чидась сюлмыз. Тае пичи дыръям тодэм бере, залын картаосме поттаны кышкалляй. Залын милям -  Инмар азь. Мыным потэ вал, Инмар мон шоры учке шуыса. Кыӵе зол тӥни монэ шугатӥллям.

ӝӧк сьӧры пуксё азьын, Инмар азьлы пумит султыса, одно ик кырӟано. Мон сюлмысьтым чирдылӥ. Та дырез гинэ возьмасько вал, ку меда кырӟалом ини шуыса. Нош курег пуз ноку но ӧй сиылы, котькуд коркан сиыны косо ке но вал. Ма мар со. Курег пуз  выль улонлэсь вордӥськемзэ возьматэ, шуо. Нош пӧзьтэм курегпузысь кыӵе улон вордӥськоз на? Озьы малпалляй но ӧй сиылы.

Сектаськемзы туж могдос потэ. Удмурт дэремен анайёс пуко но ум, ум юэ шуо  но юо. Собере ини ваньмыз берганы кутске, нылпиос асьсэ понна шудо, верасько, бадӟымъёсызгес, гурт иворъёсты ымысь ыме, пельысь пеле лэзьяса, пуко, воргоронъёс картаен шудо. Аракы кудӟытэ, воргорон кие арган вуэ, кышномуртлэн пыдъёсыз тапыртыны кошко. Бертыкузы но арган улсын кырӟаса, берто. Гуртлэн пӧртэм ульча пумъёсысьтыз кылӥсько ини шулдыр юмшан куараос.

Озьы тӥни.

)

Табере сю миллион адямиослэн трос пӧртэм сюресъёссы одӥг азьын пумисько. Но соос одӥг паськыт сюрестӥ азьлань кошко. Со шоссеэз кылдытэ кун (государство). Школаос, университетъёс, ужан интыос - соос ваньзы одӥг кадь малпаськон доры вутто. Адямиос уло озьы, кызьы кулэ кунлы. Г. А. Сидоров "Сияние мудрости ввысших богов и кромешники" книгаяз со сярысь вера. Вера, кыӵе капчиен адямиос информациялы сётӥсько.

Адямиос пластилин кадесь.

 

"Чияпуэд". Ашальчи

Богдан Анфиногеновлэн инстаграм бамысьтыз адӟи Ашальчилэсь кылбурзэ:

Чияпуэд сяськаяське...

Чигошур ву чиль-чиль бызе...

Сьӧд дуринчи сяська сюпсе,

Чияпуэд сяськаяське...

Чебер ылмурт туж яратэ, 

Чебер пилы туж синмаське -

Тӧдьы бамыз ӵыж ӵыжектэ...

Чияпуэд сяськаяське...

Та Ашальчилэн кылбурез гожтэмын 1925 -тӥ арын, ку солы вал 27 арес. Сыӵе огшоры но яратоно кадь кылбур. Туала кылбурчиос ваньзэ сураны туртто, кылъёсын шудо, валантэм кылбуръёс гожъяло. Тани со - Ашальчи - Быдӟым кылбурчи. Всё простое гениально.

Туннэ, 16 оштолэзе, солы тырмысал 116 арес. Мон паймисько солэн чиданэзлы, визьмызлы, улонэзлы. Испан суредаськисен Фрида Калоен мон сое одӥг радэ пуктысал. Нош Фрида мон понна Инмар интые. Учкелэ со сярысь кино, озьы ик нимаське, "Фрида", соку валалоды, кыӵе со кужмо кышномурт, кӧня солэн чиданэз. Ашальчи но со кадь ик. СОФИН уж пыр потыса но, сюлэмыз ӧз эгырӟы. Тюрьма, творчестволэсь куштӥськон, висись муртъёс, сютэм аръёс... Нош Ашальчи кылиз сыӵе огшоры, ненег, котьку юрттыны дась, матысьёсыз сярысь сюлмаськись. 

Та дунне вылын тросгес сыӵе адямиос мед луозы.

Мон та дырозь "Чияпуэд сяськаяське" кылбурлэсь нырысетӥ чурзэ гинэ тодӥсько вал. Но пичи дырысен йырвиям пыӵамын вал - та кылбур яратон сярысь. Малы ке но Ашальчилэн вань кылбуръёсыз пӧлысь мынам сознаниям таиз нырысетӥ интыын сылэ. Малызэ валэктыны уг быгатӥськы.  

Ваньмыз та дунне вылын яратон сярысь. Ваньмыз яратон вылын возиське. Валасалзы ке сое адямиос, ӧз ышкиськысалзы ке матысьёссы вылэ, котькинлэн чияпуэз котьку сяськаяськысалыз но емышъёс сётъясалыз. Нош тросэз адямиос асьсэ чияпузы сярысь гинэ малпасько. Нош Ашальчи мукет сямен гожтӥз ук. Со "чияпуЭ сяськаяське" ӧз шуы, со вераз "чияпуЭД сяськаяське". Валады?

Лобисько.

Лобӟиськод инбамтӥ. Инбам - улон. Тон- тылобурдо. Тон котырын трос мукет тылобурдоос. Соос тонэн ӵош лобӟо. Огез бурдо мукет уллёе кошке, соиз уллёысь мукетыз вуэ. Озьы ваньмыз сураське. Нош тон лобӟиськод азьлань, воштӥськонъёсты уд валаськы.

Тани пуксиськод шур дуре - шутэтскыны но сиськыны. Чортӥськод бурдоостэ котырад, но адӟиськод: уллёын трос выльёсыз поттӥллям, нош азьлоосыз кытын? Я, татын инты ӧз шедьтэ, дыр, шуыса, вераськод но аслыд, нош ик азьлань лобӟиськод. Тон уд но жаляськы, кин ке кошке шуыса; уд шумпотӥськы, кин ке лыктэ шуыса.

Тылобурдо валаса уг вутты, кызьы ваньмыз воштӥськыса вуттэ. Со огшоры лобӟе но котыр учке но олома кулэтэмзэ синйылтэ. Таиз писпу ӝужытгес будэм, орӟи сиён утча, зарни шеп тулкымъяське, тӧл куасьмем турынэн шудэ... Озьы ик ортче улон: юнме но пуштросо. Но мар та дунне вылын тыныд кулэ? Тодысал ке сое, уллё воштӥськонъёсты но валаны кутскысл, дыр. Нош али пилемтӥ лобӟисько кадь: бус, ваньмыз ватскемын, сураськемын. Соин ик секыт.

Спортсменъёс шузиесь.

Спортсменъёс туж жаль пото. Соосты возё, сюдо, сӥль-вирзэс кыдато, верало, кызьы улыны. Шудыкузы но соос тренерлэн планэзъя шудэ. Улонзы но соослэн асьсэлэн ӧвӧл кадь. Соослы шуизы, озьы-тазьы карод, ваёд милемлы куинетӥ инты. Спортсменлэсь результатсэ гинэ витё. Результат уг возьматы ке, нырысь ик сюре тренерезлы. Нокыӵе но самостоятельность ӧвӧл. Озьы ик со дыше сыӵе капчи улонлы. Но спорт удысын кема уд возиськы. 10 ар мар ортчыса, соосты сэрпалто но кельто. Спортсмен валаса ик вутты, кытчы кариськоно, кытын солэн тренерез? Нош ӧсъёс ворсамын. Быдэ вуыса гинэ, спортсменъёс асьсэ улонзы сярысь пыр-поч малпаськыны кутско. Соин ик соос шузиесь, улонэз адӟымтэ муртъёслы кельшо. Сӥль-вирынызы кужмо ик, дыр, но, нош сюлэмъёсынызы но лулынызы лябесь.

"САКЫР

Арт-пространство Сахар. Даралилэн льӧль малпанэз быдэсмиз. Со понна мон туж зол шумпотӥсько. Даралилэн анаез но лыктӥз, соку мон валай, кыӵе со быдӟым событие. Мон эшшо но зол шумпотӥ, верантэм.

Али отын туж трос интыез. Укноысь тымет адӟиське, драмтеатр, шутэтскон парк. Горький нимо ульча, мон понна - со тужгес но вужез ульча, кытӥ яратылӥзы поръяны аспӧртэмлыко адямиос: театрын шудӥсьёс, гожъяськисьёс, суредаськисьёс. Маиныз ке но та ульча монэ но бордаз кыске. Татын вань театръёс, нош улӥегес васькид ке, "На посошок" кабакез шедьтод но куашкам коркаосты. Азьло татын "уй бубылиос" сыло вылэм, но котьку куштэм мача сьӧд пуныос ветло. Соосты куддыръя сюдо, та ульчаын трос кафеос. 

Нош табере та ульчаын усьтӥськиз арт-инты "Сакыр". Модельной агентстволэн табере коркаез вань. Та интыысь луоз шедьтыны пӧртэм дизайнеръёслэсь дӥсьёссэс но весьёссэс, удмурт книгаосты, журнал-газетъёсты, яра кылзӥськыны "33 оборота" вузкароннилэсь винил пластинкаоссэ. Вуонояз бертыкум, мон но Починкаысь граммофонэз улӟыто, дядяй юрттоз, дыр. 

Гурманъёс.

Тау!

Трусикен Давид

УдГуын азьло худграф факультет вылэм но со 3-тӥ корпусын интыяське вылэм. Али со ИиИД.
Куатетӥ корпусын али но сылэ ай Давид скульптура. Азьло нош со, 3-тӥ корпусэ пырем бере ик, син азе сюре вылэм. Нош Давид вольыт мугоро, тӧдьы, гольык, чебер мугорез вылтӥя - вылӥ искусство.

Нош кыӵе вал моральной дунлыкъёс? Соин ик бадӟым мероприятиос дыръя со вылэ трусик, пе, дӥсяло вылэм. Тӧдьы Давид трусикен. (Ватыны уг луы -а мар-а вал, яке басмаен ватыны :D). Со кызьы толалтэ Ленин шарфикен сылэ вал.

Преподаватель, дото зол серекъяса, милемлы сое вераз. Нырысьсэ адӟи сокем зол горемзэ.  

Висисько

Тани висьыны уси. Ачим кызьы йӧнатскыны уг валаськы бере, мурт кужымъёсын пумиськыны кулэ луиз. Вӧсь луэмелэсь чидатэк, скорой шуонзылы жингыртӥ. Кӧня ке минут ортыса вуоз, шуизы. Час возьмай, кык. Шунды сиос, борддорысьтым вань бубылиосын шудыса, вуизы ни, комнатаям ӝомал лэзиськиз ни. Скорой ӧз вуы.

ӧй чида ни. Симптомъёсыя но справочникъёсъя чаклай, кыӵегес висён монэ курадӟытэ. Солэсь эмъюме но киям вылэм. Юи, кӧня ке улыса, капчияз. Отӥяз собере изьыны но выдӥ. ӧсэ йыгаськись луиз - Скорой вуиз. Бон, шуисько, мон ку тӥледыз ӧти вал ини. Врач но, вить час ортчыса,  ву ай! Кин тодэ, мар татын мынам организме  дауртэ ни. Ярам. Вуэмзылы коть - тау. Со но кык кагаз вылаз марке гожъяськиз, соме-таме эскериз, но юаз, эмъюртэ мынод-а шуыса? Арня кутсконэ вуо, иське, шуко, пятницае ӝыт отчы мыныны толыкез ӧвӧл ини. Я, шуиз но кошкиз. Эмъюм врач, пе, кулэ гожтыны, а не мон. Кошкиз но монэ висёнэным ӵош огнаме кельтӥз.

Мукет нуналаз ӵукна ик поликлиникаысь жингыртӥзы ни. Телефонысь сюлэмтэм куара вазиз:

- Тӥ Удгуысь бере, мынэ Здравпунктады. Милемлы тӥтэк но татын, пенсионеръёсынымы, тырме.

- Ы-Ы, пе.

Умоезлы оскыса, кошки Здравпунктэ. Я коть йыр сокем зол ӧз пӧрмы ни. Аслам факультетэлэн  терапевтэз интыяз ӧй вал. Мукетыз доры пыри. Таизлэсь ужзэ куспетӥ кари шуыса, кесяськиз уг ай шорам. Бӧрдон калэ вуйисько вал ни. Собере гань-ганьгес кариськиз но шуиз:

- Со эмъюмдэ ю ай но, вӧзаз басьты на брусника куаръёслэсь чай. Собере адӟом.

Озьы, табере йӧнатӥськисько брусникалэсь чаен. Кӧш!

____________________________________________________

Мораль сей басни такова шуэм потэ: кызьы куаретӥз Чимали, та дунееын адямилы уг яра висьыны, яке лучше сразу кулыны.

   Тазалык Тӥледлы!

Ну и выйе.

Компьтер адямиез аслаз дуннеяз выйтэ кадь. 

Кылли, кылли ӝыны арня, компьютерме ӧй ӝуатъялля. Лыдӟиськылӥ, вераськылӥ, висёнэн кылдытэм уйвӧтъёстӥ, йырме ыштыса, бызьылӥ. Туннэ малпай усьтыны. Усьтӥ но валай, кызьы соку ик компьютерлэн улоназ усьыны кутски. Планшетэн но телефонэн озьы ӧвӧл ай. Валай но кышкай. Кышкай вань адямиос понна. Кин ке мерлыко вотэсбамъёсысь уг пота, кин ке шудэ но шудэ. Кӧня адями отын выемын ни.

Визьмо адямиос кужмогес ик. 

Шор площадез выльдозы, пе.

Улӥськом Ижкарын, куддыръя ветлӥськом кинокуае, кафее, бадӟым вузкаронни центръёсы, поръяськом Шор площадьтӥ. Мон но поръясько вал, пичи дыръям Городмама (ӵужапай) мылкыдме лощадьтӥ поръянэн лӧпкытэ вал. Пичи дыръям мыным пӧртэм тылъёсын пиштӥсь фонтан кельше вал. Нош али Операя но Балетъя театре мынэм потӥз. Но со ворсамын. Сое, пе, выльдозы, туала карозы. 

Вылӥын пукись агайёслы малы ке потӥз, Шор площаде тросгес адямиос мед ветлозы шуыса. Соин ик чёртӥзы Великобретаниысь архитекторъёсты но косӥзы малпаны план, кызьы яра выльдыны но мукет сяменгес лэсьтыны площадез. Вот туннэ Калыккуспо университетын (МВЕУ) со планлы сӥзем берпуметӥ (куинетӥ) презентация ортчиз. Саймон Кауфман берыктӥсьёс пыр вань ӵектонъёссэ вераз.

Мар гинэ со малпамтэ Шор площаде пуктыны. Шыпыт, вож садо, шутэтскон интыен, фонтанъёсын, вузкаронни центръёсын, памятникъёсын,  офисной юртъёсын валамон. Нош океанариум, пруд вылтӥ фуникулёр, бадӟым обзорной башня? Малпан, озьы ке, умой. Но мар шоры учкод ӝужыт башняысен: кырсь, сыномем липетъёс вылэ (кызьы шуиз одӥг Ижкарчи), нош ваем акулаос уз кулэ меда Иж тымет вуын, нош фуникулёрен меда кин ворттылоз ни, адямиослэн уксёзэс поттэмзы потоз-а, уз-а? Эшшо одъяло трос этажъем парковка пуктыны, музей науки но сю миллион вузкаронни центръёс но кафеос.

Кин меда 600 сюрс адями пӧлысь со вузкаронниостӥзы ветлоз ни.

Так ке туж тунсыко малпанъёссы, но со малпанъёс гинэ ай. 10 ар куспын ваньзэ выльдыса вуом, шуизы радъясьёс. Но кулэ на лэсьтыны пыр-поч проект, собере сомында юртъёсты пуктыны уксё шедьтыны кулэ.Ваньзэ администрация уз радъя, пе, инвестициос кулэ,IMAX кинокуа пуктыны адями шедёз ик, дыр, нош обзорной башня? Туж накладной но дуно планъёссы со иностранецъёслэн. Удмурт яке ӟуч архитекторлы та ужез сётысалзы ке, трослы меда воштӥськысалыз асьмелэн площадьмы.

Шор площадь быдэсак воштӥськонозь, 30 яке 50 ар гинэ медаз ортчы,  Ма тани Театрез выльдыны кутскизы ни. Соин ик оском умоезлы. Пересьмытозям милемлы шутэтскон но туристъёслы тунсыко луись инты каллен  вуттозы дыр.  Но мон 70 арескам тымет ярдурысь  кинокуаос дорозь фуникулёрен тубо. 

ПЫСЫ: Яркыт писпуос, пе, мерттоно. Кылсярысь, со туспуктэмъёсысь одӥгез будос гужем вож, нош толалтэ, куаръёссэ куштэмез бере, горд пиштэ. 

Пуны но алкашъёс.

Бер ӝыт. Но  вузкаронниосын аракы вузало на. Бертӥсько огъяулонние. Одӥг пичи лавкаысь пото кык кышномуртъёс но одӥг пиосмурт. Воргоронлэн кияз сур, одӥг кышномуртлэн -  пакет, нош мукетызлэн кияз гозы.

Гозы пумын лапег мугоро пуны керттэмын.

Ымныръёсазы учкыны малы меда шедьтӥ? Ваньзы тӧрнамын- дугдылытэк юо вылды. Дӥськутсы но кырсь. Син азяды пуктӥськоды, дыр, фуфайка выллем курткаос вылазы дӥсямын но тӥни, шапказы но шарфсы но ӧвӧл. Нош кырын тӧло. Соос сыӵе кырсесь, нош пунызы тӧдьы гоно (юг-тӧдьы гонэз копак юг-тӧдьы ӧвӧл ни ке но, ярам). 

Соос серекъяло, пунызы но шумпотэ. Таосыз лавкае вуылӥзы, нош пунызы коть "чылкыт" омырен шоказ. 

Пунылэн кузёез огназ ӧвӧл. Эшъёсыз со дорысь кошко ке, солэсь сюлэмзэ пуныез буйгатэ. Тӥни кызьы улыны кулэ.

Удмуртъёслэн музъемъёссы.

Трос блогъёсты уд лыдӟиське, дыр. Соин ик Дневники нимо блогысь тае адӟытэм потэ вал:

Украина - со, пе, древнеудмуртская земля.

1. укр. Київ — собственно, ‘Кыев город, город Кыя’. Из славянских языков название не этимологизируется, ПВЛ справделиво указывает на происхождение названия города от личного имени.

< удм. Кый ‘(имя основателя города)’ ~ кый ‘змея’.

2. нем. Lemberg — современное навзание Львов носит явно позднейший характер. Происхождение названия Lemberg/Lemburg, в свою очередь, не имеет удовлетворительного объяснения.

< удм. льӧм ‘черёмуха’; вторая часть — калька с удм. выр ‘холм’ (если исходная форма -berg) или от удм. кар ‘град, крепость’ (если от -burg). Учитывая семантику, вариант с выр считаю более предпочтительным: Льӧмвыр ‘черёмуховый холм’.

Естественно, что территория современной Укрляндии не явлется крайней западной границей древнеудмуртских земель. Обращает на себя внимание скопление в Центральной Европе гидронимов на -va (Vltava, Drava etc) ~ удм. ву (< *va) ‘вода; *река’, коми ва (‘вода; река’).

Та выллем антиутопиеской теориосты кемалась кылылэм вал ини. Удмуртъёс ярато ик асьсэзыс. Ярато ке но, малы ке улон интыосысьтызы пегӟо. Быдэс Европа, Европа гинэ но ӧвӧл, дыр, удмуртъёслэн азьло улон интызы. Али ӧвӧл ни ук, мар веранэз на. Ноку но ӧй вал, ушъяськыса гинэ уло, юнме.

Та выллем теориосты мукет калыкъёс но учкылыны кутскизы ке... Серем. Асьтэос валаськоды, дыр.

Таиз но серемлэсь серем. Луысал ке мукет доказательствоос, оскымонъёсыгес.

ӟучъёс удмуртъёс сярысь.

Берпуметӥ "Пепелац"ын ортчись удмурт позыръяськонэ ветлыкум, трос мар удмуртъёс сярысь тодӥ. Шонерзэ вераса, ӟучъёслэн удмуртъёс сярысь валанзы сярысь. Мыным таосыз но соосыз понна но ӝожмыт луиз. Удмуртъёс асьсэзыс возьыны уг быгато шуыса, нош ӟучьёс сокем шузиесь шуыса.

Барын ужась официанткаос, пе, удмуртъёсты уг ярато. Толэзяз огпол гинэ, пе, сокем срач луэ соослэн залазы. Удмуртъёс, пе, аракы вӧзы сылалтэм огреч куро. Кин, пе, туала дыре, аракыез сылалтэм огречен куртче. Соин но, пе, со удмуртъёсты уг яраты. Тае кылэм бере, мынам копак мукет калыкен герӟаськем стереотип тодам лыктӥз. Мон, кӧня со барын пукылӥ ни, огпол но сылалтэм огреч сиыса пукисьёсты ӧй адӟы на. Как будто удмуртъёс толэзяз огпол гинэ "Пепелац"е ветло. Уг оскы.

Барысь васькыса, сёросэ пыри. Со куспын ӧс усьтӥськиз но закодысь нылэз поттӥзы. Сое кык пиос кунултыса мырдэм-мырдэм гардероб дорозь вуттӥзы. Синъёсыз бушесь, вамышъяны уг ни быгаты, дӥсез котмемын, номыре уг вала. Оло серекъялод, оло бӧрдод. Малы сомында, пе, юод? Оскем бервылзэ пол миськись утялтыны кутскиз. Мон солэсь юаны малпай:

- Трос пол-а Тӥляд татын озьы луэ?
- Тӥляд дискотекаос дыръя гинэ! - йыркуръяськыса беренвазиз со, - лыкто гуртъёсысь, клубъёстӥ ветлыны уг быгато, оскытозь юо, асьсэзыс гуртын кожало-а мар-а! Эн ветлэ вал озьы ке.

Талы мон мар вазьыны ӧй вала ни. Кошки.

Пукиськом табере гардероб дорын. Возьмаськом Гришалэсь Танялэн телефоназ удмурт шрифтъёс пуктэмзэ. Чипчирганъёс прак люкаськизы вал, кырӟаны кутскизы. Мон соосты видеое пуктӥсько. Ми вӧзы султӥз ӟуч пияш. Сылэ но сылэ, уг кошкы. Сырдэм вазиз ни.

- Мар, пе, тӥ татын цирк лэсьтӥськоды. Кин, пе, туала арын удмурт кылын вераське на. Кыӵе гуртысь вуиды, - шуэ. Ми отын негодуэ... Но таиз сярысь берлогес. Со сярысь воксё нимаз гожтоно. Вакчияк вераса, удмурт луыны стрёмно шуиз. ОЗЬЫ ИК ВЕРАЗ.

Эх, куанеръёс, малпай мон, (берпуметӥезлы верай ик), Тӥ сокем востэмесь, визьтэмесь ук. Тӥни Тӥ кадьёслэсь ик общественной мнение но кылдытӥське. Кызьы ваньзы малпало, Тӥ но отчы ик. Адӟысалды ке, со кудӟем массаысь визен чилясь синъёсты. Адӟиды ке но, пал кыл но уд поттэ, малы ке шуоно мерлык тӥ кадь уг малпа, соос понна кемалась малпаськизы ни. Табере со малпанъёс, стереотипъёс ӟуч мерлыклэн вираз пыӵамын ни. Ма удмуртъёс но кыдёке ӧз кошке, уз но кошке.

Сьӧд Ӟуч

Мон сыӵе зарни дуннеын улӥсько вылэм. Нош туннэ, кӧня ке минут талэсь азьло, зарни ӧсам йыгаськись Сьӧд Ӟуч. Мон усьтӥ, мон - умойлы оскись сюлмо.

Со вылэм визьтэм но кык вылӥ образованиен. Мырдэм-мырдэм шедьтӥ сыӵе адямиез, кинлы дышетскон - со корочка гинэ, юнме, так. Шонерзэ вераса, со ачиз лыктӥз мон доры. Удмурт шаерын но дышетскемын ӧвӧл, Тольятиын.

Со Сьӧд Ӟучъёслэсь салам но ӧз вайы, локан ведраен гинэ вуиз. Но малыке но, со локан ведраез ачиз вылэ ик киськиз. Котырысьтыз сыӵе зын потыны кутскиз, нош со шуэ:
-КЫТЫСЬ СОКЕМ ЗЫН ЛЫКТЭ, УГ ВАЛАСЬКЫ.
-МА ТАНИ УКНО УСЬТЭМЫН, РАСИСТ ШАЕР ПАЛАСЬ ТӧЛ ПЕЛЬТЭ КАДЬ, -беренвази мон солы.

Со малпаз, ваем локан ведразэ мынам зарни коркам кисьтӥз но шонер лэсьтӥз шуыса. Ма мон огнам ук, нош Ӟуч шаер бадӟым. Мон гуртын вордӥськи, нош гуртысь адямилы городын инты ӧвӧл.

- Чай юоды-а? - юасько.
- Малы юоды-а? юод-а шу!- беренвазе со.
- Ма мон Тӥледыз гажасько, соин уг быгатӥськы Тӥледлы Тон шуыны.
- Ма мон но тонэ гажасько.
- Иське, малы мон уг быгатӥськы Тон азьын кырӟалляны аслэсьтым удмурт гуръёсме.
- Со стрёмно!
- Малы Тон мон доры лыктӥд?
- Валэктыны, удмуртъёс- сӥтянъёс, нош ӟучъёс - чиньыос шуыса. Иворъёс. Удмуртъёс.
- Тӥ со "иворъёс" но "удмуртъёс" кылъёсын трослы узыргес.
- Мон?
-Тӥ. Ӟеч луэ.
_______________________________________________________

Ӵуказе ваньзэ валэкто. Туннэ со Сьӧд Ӟуч туж зол вожме поттӥз. Уг яра визьтэм адямиослы ӧсъёсты усьтылыны. Ма мон тодско-а мар-а вал. Ӵуказе ваньзэ валэкто.

Огназ. Гожтэттэк.

Малы меда мон весь оген кылем адямиосты синйылтӥсько. Зэмзэ ке, соос ӧвӧл огназы, огшоры соос асьсэсыз озьы пукто, но оломар но йыраз малпало. Висён ке, висён ини адямиослэн.

Одӥгпол барын пукисько вал. Мукет ӝӧк сьӧрын кык нылъёс пуко. Соос доры тодмотэм мужик лыктӥз но шуэ:

-Толэзь ортыса, мон кошкисько. Ожгаре шуыны луэ. ӟучъёсты утьыны, Донецке.

Ачиз золгес ик юэмын ни, но дӥсяськемын чылкыт. Очкиен, одӥг син улаз сӥнякен. Сыӵе противоречие. Озьы вераз но, кышноослы гожтэтсэ мытӥз:

- Потэ ке, лыдӟе, потэ ке, кесялэ. Толэзь, кык ортчыса.

Соосыз мар вазьыны ик паймизы. Воргорон но валаз. Я, азяз гожтэтсэ кесяса уд кушты ук. Одӥгез гожтэтсэ басьтӥз но кисыяз донгиз.

- Лыдӟе. Мон берто но вуо. Жаль, монэ татын нокин но уг возьма шуыса. Жаль.

Воргорон аслаз ӝӧкез сьӧры пуксьыса гинэ вуттӥз но, кышномуртъёс доры туганъёссы вуизы. Тамак кыскыны поталлям, лэся.

Визьлюк.

Валерий Кудиновлэн Фэйсбук бамысьтыз веранзэ адӟи: "подпишусь на всех, кто не постит про Украину". Мыным тазьы ке тунсыко, мар отын али луэ. Но юнме калык гинэ быре.

Одӥгзэ уг валаськы, малы кыӵе ке но ӟуч кунлэн улосвылъёсаз митингъёс лэсьтыны кулэ? Мар отын Россиялэн азьмуртэзлы йыраз шукке, соку ик ивор мерлыко огазеяськонъёсы вуэ. Тросэс со огазеяськонъёс кунлэн бурд улаз кыллё ук. Студенческой отрядъёс, кылсярысь, ваньзэ лэсьто, мар малпа ВВП. Алигес тӥни Украинаысь калыклы морально юрттыны шуыса, студентъёсты Ижкар ульчае поттӥзы (дышетскисьёсты гинэ ӧз). Ну и потӥзы студентъёс, эшшо огпол асьсэзыс адӟизы, ӟыгыръяськизы, косказы но гуртазы бертӥзы. И мар? Украиналы ӵын кадь, кин, кытын, ку соослы морально юрттэ шуыса. Сьӧд куака-а мар-а удмурт но мукет калыкъёслэсь мылкыд ӝутӥсь кылъёссэс украинецъёслы вуттэ.  

Со ваньмыз "ПОКАЗУХА", так сказать. ВВП аслыз каллен Украинатӥ уян пыж лэсьтэ. Визьлюк.

Сектантъёс.

Удмурточкалэсь "Тӧдьы адями" постсэ лыдӟи.

 Малы меда со котьку огназ ветлэ? Кытын солэн эшъёсыз? Со адямиос пӧлы кыӵе ке но оскон, религия пыртыны турттэ ук. Иське, солэн эшъёсыз кулэ луыны. Но малы ке но мон весяк сое оген адӟисько. Со кадь тӧдьы дӥсяськем адямиез ӧй ни пумиталля.

Огпол гуртэ бертыны трамваен "Южкае"  васькисько вал. Со но трамвайын пуке вал. Кӧня ке улыса, со интыысьтыз султӥз но быдэс трамвай тыр яратон сярысь вераны кутскиз. Яратон- со тужгес но чылкыт кулэ чувство; матысьёстэс ӧд яратэ ке, огнады кылёды; яратон адямиосты вылӥе ӝутэ да марда шуыса. Озьы. Мыным со борды немар ни ватсаны.

Тунсыко, малы меда со озьы ветлэ? Мерлыкез умой пала воштэмез потэ?

Тросэз малпало, дыр, со сектант шуыса. Но со выллем огазеяськонъёс уксё вылын возисько ук. Тани гуртъёстӥ туж ярато адямиос ветлыны, книгаоссэс вузало, калыкез асьсэ пала кыско, уксёзэс поныны косо. Нош адямиос, асьсэ осконзылэсь куштӥськыса, мыно ук соос сьӧры. Паймод но бырод куддыръя. Ма урод палыз гинэ ӧвӧл татын.

Тани бӧляк гуртын вань одӥг семья. Анай-атайёсы юо вал. Огпол соос доры вуизы протестантъёс. Пумен соос Ижкаре протестанъёслэн вӧсяськонъёсазы ветлыны кутскизы, аракызэс пыдлогес ватӥзы, осконзы сярысь гурт калыклы вераны, "встали на путь истинный", так сказать. Табере соослэн кузьыли мында нылпиоссы, аракы борды уг кутылӥсько ни.

Тужгес но яратоно интыос сектантъёслы- нылпи юртъёс. Анай-атайтэк кылем гинэ ӧвӧл, ӧлексы нылпиосты но соос, кырныж чипыосты кадь, кырмо но асьсэ пузкаразы нуо. Уг тодӥськы кызьы, йырзэс берыкто но кун уксёзэс кыскыны кутско, куддыръя улон интызэс но басьто но оскись пиналъёсты шур кузя лэзё (кунэн сётэм улон интыоссэс).

Нош кин меда со - Тӧдьы Адями?

Оген. Сакырен.

Туннэ параысь мукет сюрестӥ бертыны малпай. Ноку но отӥ уг ветлӥськы вал, нош туннэ малпай. Пересь кышномуртэз пумитай.

- Ой, марке мыным урод луиз, - йыр бордаз кутскыса, пересь кышномурт корт кенер борды пыкиськиз.

Ма мар мон, вӧзтӥз табере кошком-а мар-а? Дугдӥ.

-Мар Тӥледын луиз? - юасько ни мон.

-Ой, марке мыным урод, йыр пӧрме, ӧскем потэ, - валэктэ. 

Со эшшо сыӵе артистично вера на, шудэ гинэ, нокытӥыз но уг висьы кадь. Ма мыным мар кыле на, верамезлы оскыны кулэ луиз. Скорое жингыртыны ӧм быгатэ. Жингыртысалмы ке но, кема вуысал.

-Кыдёкын-а улӥськоды? Вае коть келяло.

Со сумказэ мыным  шумпотыса сётӥз но, ойдо, шуиз. Сюрес вамен гинэ потоно вал. Со куспын со мынам йӧнаса но , аварие сюремзэ но, сакырлы ветлэмзэ но, огназ улэмзэ но, туннэ мар сиемзэ но вераса вуттӥз. Корка дорозяз но ой келя, ачим мыно ни, шуиз...

______________________________________

 Кышкыт оген улыны, луоз та кышномуртлэн кадь: тулыс куазен сакыред быроз но, вузкаронниысь бертыкуд, йырыд пӧрмоз... 

Я коть.

Я коть нылъёслы сяськаос кузьмало. Пусйымон нуналъёсы яратӥсьёс ог-огзылы кузьымъёс, кузьымъёс, кузьымъёс.

Я коть.

Я коть кинлы ке озьы уг, я коть кин ке но ог-огзылы... Ваньзы огкадесь медаз луэ.
_________________________________________

Туспуктэмъёсты учкыса.

Пересь тулкым.

-Улон пумен секытгес луэ ни, - шуэ дядяй, - Та тулыс марзэ ке вуттоз ни, дыр. Возьма, возьма, ожгар но ваёз.

Куддыръя пуккод дядяй дорын но огшоры вераськемзэ кылзӥськиськод. Телевизор но радио но уг лэзья кадь, но тодэ, мар дуннеын луэ.Паймисько солы.

Кыӵе ке конфликтъёс сярысь тодэ ке, одно ик Совето Союзэс тодаз ваёз. Бирюлёвоын учыр сярысь тодӥз но, шуэ:
- Азьло коть Таджик, коть ӟуч, котькин мед луоз, но ог-огмэс гажаса улӥм,  одӥг тэркыысь сиськылӥм. Нош али, али, вийыло ук ог-огзэс, вийыло. Кызьы со озьы луоз, пе.

Нош тулыслэсь ожгарзэ со Украина ласянь возьма. Тулкымъяське на мылкыдыз, шыпыт коркан ке но улэ. 

Шумпотон.

Сузэрелэн туннэ тужгес но шудогес нуналыз вал, дыр. "Пузкар"-ез учкиз. Мылкыдыз лобӟемын вал. Юа мынэсьтым: "Кыкетӥ Пузкар луоз-а мара?"
Хех. Мон гинэ-а мар-а кыкетӥ люкетсэ уг возьмаськы. Мынам сыӵе юанэ чик но ӧз кылдылы.

Нош "Пузкар" кино азьын, со доры лыктэм пичи нылаш. Шораз учке но мыня, пе. Тямыс мартэн ӟечкыласа, со Такъянэлы ас киыныз суредам открытка кузьмам.

Сыӵе мусо! Открытка самолётлы пӧрме на. Кыӵе фантазиез нылашлэн. Любой Бикузин паймоз. 

Нош эшшо мон сузэрелы удмурт шрифтъёс компьютераз кыскыны юрттӥ на. Табере со сизьметӥ инбамын лоба ни. Тӥляд но котькуд нуналды сыӵе мед луоз. Пичи нылаш кадь ик, ас киыным открыткаос лэсьтом но матысь эшъёсылы кузьмало-а мар-а. Шумпотон ук со. Уг быгатӥськы ке но, зато вань сюлмысьтым, яратыса.

Тау!

Революция.

Туннэ университетын мон кие тунсыко газет шедиз. Огшоры А4 форматэн, ньыль полоса, векчи гинэ. Нош нимыз... Сак кариське: "Революция"!!!!!!!!!!!!! "Пролетарии всех стран, объединяйтесь!", пе. Газета Всесоюзной Молодой Гвардии Большевиков. Толшоре потэмын вылэм ини, Красноярск карын. Красноярскысь но татчыозь ву ай.  Аудиториязэс бадӟыматыны турттыку, тӥни кыӵе ерисесь луо огазеяськонъёс. Уг малпаськы вал, та дыре большевикъёслэн но огазеяськонзы вань на шуыса. Эшшо со кунлэн шоркараз ӧвӧл на уг, со "ляб" Красноярскын. Мускоын та огазеяськон улыны ӧз быгатысалыз, отын единорос-нашистъёс ваньзэсты зӥбыло.  Большевикъёс пӧлы пыремды потэ ке, газетын куриськон но кельтэмын. Сектантъёс, малпай ас поннам.

Ну и потэ со коммунистъёслэн ньыль полосаен газетсы, ну и гожъяло соос отчы СССР СЯРЫСЬ патриотической кылбуръёс, калыклэн автобусъёсын ворттылон понна уксё тыронлы пумит ӝутскемез сярысь, Коммунизм-атайёслэн марлы дышетэмзы сярысь, ну и... Нош азьланяз мар? Кытчы ке со вуттоз-а?

Тае гожъяса пукыкум, Удмуртиын быръёнъёс вуо ни шуыса малпан йырам лыктӥз. Кулэ дыръя, дыр, "Революция" газет вуиз Удмуртие. Луысал ке пичи революция асьме шаерын. Со Волковъёс но Соловьёвъёс интые пуксьысалзы ке ... (уг вера кинъёс), удмуртъёс понна рай луысал, нош ӟучъёс понна визьмогес луон (билингвизм сярысь). 7-тӥ класъёсын дышетскыкум, весь малпаськисько вал Волковез интыысьтыз сэрпалтон сярысь. Историез яратӥсько вал, нош Волковез уг! Эшшо улэпкын вераськемзэ адӟеме бере, пайми, кызьы сыӵе луыны кулэ: безответственной, возьдаськисьтэм, ваньзы вылэ вылӥысен учкись, мар верамзэ валасьтэм...

Ярам, уг поты ни со сярысь вераськем. Ачим но шузи. http://instagram.com/p/lKsxhIsJwL/

Возьмасько тулысэз.

Тулыслэн куинетӥ нуналэз гинэ ай кадь но. Но.

Туннэ ог-час мында юнме кар кузя поръяй. Яратӥсько тулыс куазен шалтай-балтай ветлыны но котырысьтым тунсыко суредъёсты синйылтыны. Туннэ мон ой шӧды на тулыс куазез. Выри, выри шокчыны кот, шуныт омырез, но со кезьытгес вал на. Мон понна, тулыс омыр ой вал на туннэ, соин ик бертӥ.

Мынам вань супергерое - Адями-Чонари (берыктӥд ке мукет кылысь). Мон сое горд Чонари гинэ шуисько. Тани туннэ со мон сьӧры кар кузя лобаса ветлӥз.

Дугдылонниын кык школаын дышетскись нылашъёс сыло вал. Огез ӝужытгес, кыкетӥез соизлэсь быдэс йырлы лапеггес.; ӝужытэз бӧрдэ. Нош лапегез сое буйгатыны турттэ: ас бордаз ӝиптэ, синкылиоссэ ӵушылэ, йырсизэ тупатэ. Пичи нылъёслы Горд Чонарие вань улонлы герӟась сӥньыс сётӥз. 

УдГУ палан вань "Подросток" клуб. Со возтӥ куинь покчи пияшъёс кошко вал. Огез вакчи штанен, мукетыз кузьгес, нош куинетӥез огшоры штаниен. Соос шоры учкыса ик, узыр-кезьыр луи. Штани улазы колготкиоссы но ой вал. Я коть клубе пыризы. Горд Чонарие ымзэ гинэ усьтыса сылӥз, паймеменыз кезьытлэсь но утьыны ӧз вуы.

Площадь инбамтӥ, куакаос сюан дыръя кадь, кыӵе ке но тылобурдоос лобало, векчи кесясько. Яблокпуос вылын пуко, со тол тылобурдоос ай, пуко, небыт комокъёс кадь, пештырскыса. Гон улазы омырез шунто соос. Соос понна но тулыс вуэмын ӧвӧл на.

Возьмасько тулысэз. 

Киноос.

Туннэ кык кино учки. Кыкез но калык сярысь, солэн улон-вылонэз но сям-йылолъёсыз сярысь.

Нырысетӥез - "Небесные жёны луговых мари". Гожъялляй вал ини таиз сярысь. Кыкетӥзэ учкисько ни. Татын 25 нылъёс сярысь новеллаос возьматэмын. Котькуд новеллаын поръёслэн кыӵе ке но традициязы, легендазы возьматӥське. Пор калыклэн мифологиез туж умой адӟытэмын. Кино Денис Осокинлэн книгаезъя лэсьтэмын. Пуктӥсез пор ӧвӧл, соин ик поръёс туж ишкиськыса та кино сярысь тодазы вайыло. ӧз кельшы соослы, киноез лэсьтӥсь пор калыкез озьы возьматӥз шуыса. Кызьы возьматӥз? Учкиды ке, валалоды. Контактын вань со кино.

Кыкетӥез - "Под снегом". Со Япониялэн сям-йылолъёсыз но тодмо мадёсъёсыз сярысь немец кино. Документальной. Яратӥсько сыӵе киноосты, кытысь мон пайдазэ шедьтӥсько. Нош Япониын вылаз эшшо туж трос пӧртэм легендаос на. Кино шӧдтэк шорысь быриз, "Пузкар" кадь. Туж затянутой кадръёс вал ке но, соос мӧзмыны уг сёто кадь. Зарезьлэсь тулкымъяськемзэ возьматыкузы, мон, киноысь аслам дуннеям кошкыса, вуттӥ вал ни, но мон ӧй мӧзмы. Кельшо киноос, кытын ӧжыт верасько.

Нош вуоно вордӥськонэ, 3-тӥ южтолэзе, "Дружба"-ын ик Лев Вахитовлэсь трилогиязэ возьматозы. Асэныз но вераськыны луоз. Мелодрамаос интые мур но аспӧртэмлыко кино учкемды потӥз ке, ветлэ Ижевский киноклубен ортчытэм сеансъёсы. Ижкарын котьма вань, Ижкарын ваньмыз вань. Мыным потэ, Ижкар Парижлы кельше шуыса. Мон ноку но ӧй адӟылы Эйфелева башняез, но мыным потэ, со "Дружбы народов" монументмылы кельше шуыса. Соизлы, кудӥз тымет дорын сылэ.

Пузкар

Кӧня ке час талэсь азьло тросэз витизы "Пузкар" киноез, табере кино ласянь малпанъёсты возьмало. Мон уг вера солэсь урод палъёссэ, актёръёслэн шудэмзы но куд-ог тупасьтэм интыос ласянь. Сойзэ мед мукетъёсыз вералозы.

Кинотеатре вуэме бере ик, мылкыды куашказ. Йырам соку ик юан кылдӥз, кыӵе амалъя ӧтён билетъёс сёткамын вал? Удмурт культурае кыӵе ке но челеп ватсамзы понна? Озьы ке, сэре мон ӧтем адямиос пӧлысь адӟи сооссэ, кудъёсыз удмурт лулчеберет понна номыр но ӧз лэсьтэ на, ватсало на, уг но малпало лэсьтыны. Пинал дыръязы нош копак удмурт кыллэсь куштӥськон мылкыдын ветлылӥзы. Адӟи сыӵеоссэ. Нош Таня Тихонова, кылсярысь, премьера дыре огъяулонниын, дэрем вурыса но удмурт калык кырӟанъёс кырӟаса, пукиз.

Пуксимы залэ. Кутскизы министръёс вераськыны. Мон малы ке но сыӵе со министръёсты уг яратӥськы, адями лулзэс уг тодӥськы, дыр, соин. Мыным потэ, соос номыр но уг каро, улыны гинэ люкето шуыса. Шонертэм, дыр, со; огшоры мынам кылдэм стереотипе. Ма тросэз депутатъёс уженызы ушъяськыны быгато, дыр, но мон ӧжытэзлы гинэ оскисько.

 Я. Тани Лариса Николаевна Буранова шуиз: матысь дыре, кинотеатре лыктыку, мед, пе, быръён луоз, кыӵе удмурт кылын киное мыноно. ЫЫ, малпай ас поннам, Тӥ нырысь удмурт кылэз школаосын одно ик дышетыны косэ вал, катэз мед кутозы шуыса, жугиське вал, соку учкись но, удмурт лулчеберетын вань удысъёс но азьпалтӥськысалзы. Соку адямиос тодысалзы, кин понна ужано, кинлы лэсьтоно. Нош али удмурт "элита" ваньзэ лэсьтэ удмурт "элиталы", кытчы пыре 300 адями? (Уг яратӥськы со "элита" кылэз). Киное 300 адями ӧтемын вал.

Соловьёв Владимир Михайловичлэсь но юаллям, асьме республикаямы удмурт киноос но вань-а мар-а шуыса. Министръёс асьсэос но уг тодо тӥни, кыӵе эшшо отын удмурт кыл на. Кыӵе милям депутатъёсмы, уй-уй-уй.

Уродзэ уг вера шуи но, ӧй чида, лэся. Но со кино ласянь ӧвӧл. Тани кутскиз кино. "Пузкар". Киносуредъёсъя но, шудӥсьёслэн выремзыя но, ваньмызъя "Пузкар" "Узы-борылэсь" сю поллы устогес лэсьтэмын. Соин мон туж шумпотӥсько: вань азьлане вамыш, но со кыкетӥ гинэ вамыш ук ай. Мынам сюлэмы шумпотэ ке, ымныры но пальыша ни, мылкыдме соку ик верам потэ. Вӧзам пукись эше ик уродъяськыны кутскиз вал ни. Тон актёръёс шоры эн учкы, киноез, пе, учкы!

Тодмо ымныръёс шудо бере, нырысь ик со ымныръёсты синйылтӥсько ини, синмаськисько дото зол, малыке шуоно соос талантоесь, талантоесь, соин ик туж мусоесь. Дышем бере гинэ, кутски сюжетсэ да марзэ валаны. Но соку кинолэн пумыз вуэ вылэм ни. Соин ик ӵуказе но ветлысал на, табере ини сюжетсэ учкыны.

Тросэзлэн сыӵе мылкыдыз кылдӥз: кинолэн кыкетӥ люкетэз кулэ луыны. Мыным быронэз кельшиз. Адями малпаськонэ усиз ук, со кинозалысь буш ӧз поты, озьыен кино удалтӥз. Мон понна ваньмыз валамон вал: удмурт адями  гуртын гинэ шудо, соин ик пумаз кык туганъёс, кучапиен шудыса, серекъяса, сюрес кузя гурт пала вамышто. Но малы удмурт адями гуртын то шудо? Малы со карын инты уг шедьты, малы кар сое изъянтэ но урод пала воштэ. Удмурт егитъёс карын но быгато ужаны, удмуртлык Ижкарын гинэ азинске, удмурт гуртъёсын егитъёс таӵе ужпум сярысь уг но тодо, пока каре уг сюро ( гуртшколаосын удмурт кылэз дышето на ке ) .  Ижкарын гинэ кутске нюръяськон.

Туж трос ужпумъёс пусйыны выремын. Как будто ӵуказе дунне быроз, нош "Пузкар" - со берпуметӥ кино. Соин ик татын вань ужпумъёсты ӝутоно. Пусйыны пусйизы, нош пумозяз ӧз вуттэ.

Нош кытчы но сюриллямтэ кино лэсьтӥсьёс: ипподром, аэропорт, курутой коттеджной инты, кафее, галереяе, ын пушкы... Суредъёс туж чебересь вал. Тау! Мон ой возьма вал, сокем серьёзно но чебер луоз шуыса.

Зато вань адямиос кадь, ми Удмурточкаен кизилиослэсь автографъёс басьяны кошким. Табере мынам вань автографъёсы мусо шудӥсьёслэсь но Петрушлэсь. Тау кино понна!

Кошкыкум кассирлэсь юай, ӵуказелы кӧня буш инты кылемын на шуыса. 30-мын пала гинэ на, пайми, отын сэрегъёсын мышказ гинэ на.

Эйфория ай мынам. Киноез выльысь учконо. Тау!

Польшаысь челеп.

Туннэ мыным Юлия Волкова жингыртӥз. Солы но "Пузкар" киное билет вуэм. Ми туннэ мынӥськом КЫКЕТӤ УДМУРТ КИНО учкыны. Лякизы сое Польшаын.

Алигес тодматски туж таланто Польшаысь режиссёрлэн творчествоеныз. Солэн нимыз Роман Полански. Ужаны кутскемын со вакчи видеосуредъёсысен. Солэн ужъёсаз котькуд деталез, буёлэн шудэмез, действиез мур малпан нуэ. Ваньмыз огшоры ӧвӧл. Туж зол ассоциативной гожез адӟиське. Учкелэ, тӥледлы но кельшоз, соос кема ик уг мыно, вакчиесь. Кылсярысь, "Двое мужчин со шкафом", "Когда падают ангелы", "Лампа". Интернетысь шедьтоды.

Пётр Палган но Польшаысь. "Пузкар" - солэн кыкетӥ киноез.

Преподавательлы шуисько:

-27-тӥ тулыспалэ кыкетӥ удмурт кино потоз ини.

-Кин сценарий гожтӥз? Нош ик-а со? Кызьы ай, Дарали Лели?

-ЫЫ.

________________________

-Ойдо асьмеос но кыӵе ке короткометражной фильм лэсьтом. Но Видео-арт выллем.

-Ойдо.

пузкар вуэ.

Пузкар! Чуказе Пузкар ни. Кыче потэ, кыче потэ со суредэз адзем.
Ветлэ, 150 манеттэс эн жалялэ. Эксклюзив, собере уд но шедьты ни. 

Тросаз учыръёсы.

Пуктӥзы ТРК "Столицае" кылписпу. Малпан кылдӥз - улонэ пыӵаз. !Кема ик дыр ӧз ортчы. Малы меда тау уг шуо лэсьтэм уж понна. Умой ук, табере удмурт кылписпу вань. Но со писпуэз "мерттэмзы" бере, та ужрад сярысь ожыт ӟеч кыл кылӥ ай. 

Тани, кылсярысь:

1. " Увидев #кылписпу на фотках, недоархитектор-недомузыкант Анатоль Галиханов подверг его конструктивной критике: - если по дизайну. очень уж громоздкая несоразмерная ножка по отношению ко всей композиции вышла. потом она черная, жесско не гармонирует. ну никак. оранжевые листики по цвету слишком пастельных тонов, можно было ярче - на контрасте сыграть по отношению к кроне. и их, как и в проекте амареевском, нужно в растяжку пустить - от яркому к бледному. ну вопщем это то что я навскидку заметил. еще раз повторюсь, это все перфекционизм мой) " (Юмшан57 огинысь)
2. Писпу буёлогес луысал ке, тунсыкогес но луысал, дыр. А так со мозмытгес ожытак. Ну, конечно, со мынам малпанэ. Мукетъёсызлы, может быть, кельшиз... (Удмурточкалэн малпанэз)

Мынам вераме уг поты, со писпу идеальной но солэсь урод палъёссэ шараяны уг яра шуыса. Мынам верам потэ, нырысь тау шуыны кулэ, дыр, шуыса. Собере ини шиосты лэзьяны. Кин ке но тыршиз ук, со писпуэ кужымзэ но мылкыдзэ понӥз. Тау, сыӵе писпу кылдӥз шуыса. Нош ӧз кылдысалыз ке? Соку нош ик мукет "-" кылъёс луысалзы. 

Мукет идеяос ласянь но таӵе ик суред луэ, тросаз учыръёсы. 

Тау! шуыны эн вунэтылэ, ӝӧк сьӧрысь но султыку "тау" шуоно, ӵукна султыку но, умой ивор кылыку но, котьку но котькинлы. 

Тау.

Иллюзиос яке зэмзэ ик озьы?

Ваньмыз марке воштӥське, но улон быдэсак воштӥське меда? Тани Министръёс креслооссэс бушато, соос интые мукетъёсыз пуксё. Одӥгез егитъёслэн ужзыя министрысь йӧскалыкъя министр луэ, Азьмуртлэн Азьмурт луон дырез быре, школаосын удмурт кылэз одно ик дышетоно шуыса, кӧня ужъёс нуисько. Нош со вамышъёслэсь воштӥське меда оглом улон? Волков кошкоз, яке нош ик Азьмурт луоз-а (марке верало, Мускоын сыӵе кат дасямын ини шуыса, но со лушкем осконтэм вераськонъёс)? Министръёс вошъясько но, марке вылез улонэ пыӵа-а? Тросаз учыръёсын, мон воштӥськонъёсты уг шӧдӥськы.

Удмурт кылъя но собыдӟа ужрад нуиське. Таизлы тау, тросгес вераськон мынӥз ке, та ужез нуонъя группа будоз. Вань сыӵе теория, "спираль молчания" нимаське. Со теориялэн авторез Э. Ноель-Нойман шуэ, кин аслаз кужымезлы но верамезлы оске, со сьӧры тросгес адями мынэ. Кык малпанъёс ваче вуыку, адями соос пӧлысь быръёз тужгес но ненегзэ, сӥтяназ вень медаз бышкалскы но сюлэмыз гань-гань мед кокаськоз шуыса. Нош ненег малпан соиз, кудӥз сьӧрын тросгес адями сылэ.Со нылпи садын кадь: огез нылпи "фу" шуиз ке, со бӧрсьы тросэз пиналъёс"фу" шуыны кутскозы, нош кылемез номыр уз шуэ. Нош кин номыр уг вера, аслэсьтыз малпанзэ уг шарая, со шараям малпанэн автоматически соглаш луэ, малыке шуоно пумит уг султы. Угось, сыӵе мерлэн катъёсыз. Мар карод на. Удмурт кылъя ужын но тани, соглаш луисьёс будо, иворъёс пумен умой пала воштӥсько. Толэзь азьло изданиосын мон пумит луисьёслэсь малпанъёсынызы тросгес пумиськисько ке вал, али удмурт кылэз школаосын одно ик дышетонлэсь кулэлыксэ тросэз адямиос валало ни. Яке со мынам иллюзиосы гинэ-а?

Тау!

*Туспуктэмез Зангариклэн. Та пуктэм писпу сылэ ТРК "Столицаын". Куарлэн огпалаз удмурт кыл, нош мукет палаз ӟуч. Удмурт кыл в массы, так сказать)

)

Совето Союз дыръя адямиос коркаосысьтызы ӧсъёссэс, капкаоссэс уг ӵогало вылэм. Ма гуртъёсын али но куд-огъёсыз уг ворсало на. Кыӵе адямиос вискын кусыпъёс вылӥллям. Городын али дыре сыӵезэ син азе ик пуктыны уг луы ни.

Кулэ, дыр, гуртын ас котырам кыӵе ке но инфраструктура лэсьтыны. Соку мӧзмыт уз луы отын. Ма куное каре вуыло.

Ярам.

Тау!

Психологъёсын.

Туж аспӧртэмлыко эскеронэ сюри. Дышетскем бере, огъяулонние бертыны одъясько вал ини. Кытысь-марысь сюрес азям эше потӥз. Со психологлы дышетске, кутӥз но монэ дышетскон бӧлетэ пыртӥз. Пыри: азям пӧртэм ӝӧкъёс сьӧрын дышетскисьёс пуко. Мыняло. Ярам, малпай ас поннам.

Пукси, нош азям кык коробка пуктӥзы. Одӥгез тӧдьы А4 бумага улысь, нош мукетыз "Фруктовый остров" сок улысь. Юанъёс сётъяны кутскизы.

-Кудзэ тон таос пӧлысь бырйысалыд?

- "Фруктовый остров". Малыке шуоно со "Фруктовый остров", соиз - мӧзмытгес коробкады. Таиз коть чыгыр-лыз буёло.

-Со волшебный коробка, - шуэ ини таре со пияше, - мае тон отысь поттысалыд?

- Номыре но,- шуисько,- мон отчы понысал? Бон, потэ ке тодэмды, мар отысь поттысал, малпасько али. 

Соку йырам лыктӥз Венедикт Ерофеевлэн "Москва-Петушки" поэмаез. Отын Веня "Ю" буква сярысь вералля вал. "Ю"- со быдэс творчество кадь, мае ке но ю но малпанъёстэ гожты. Веня юэ вал но малпаське вал, маке но вылӥ сярысь малпаське вал. "Ю" буква одно ик йырысь потэ вал (одӥг учырын йырысь вир "Ю" буква луыса вияз). Юон солэсь улонзэ но малпанъёссэ бугыръя вал. Тӥни со тодам лыктӥз но верай:

- "Ю" буква отысь поттысал.

- Малы "Ю"? 

- Тӥляд тетрадяды сыӵе юан ӧвӧл! - шуисько, валэктэме ӧз поты но.

- Вань, - мынектӥз пияше.

- Венедикт Ерофеевез лыдӟид-а?

-Ой.

-Иське уг валэкты. Лыдӟы, - шуисько.

-Я,- пе.

Табере азям кыкетӥ коробказэс понӥзы. Таиз но, пе, волшебный.

- Нош татчы тон мар понысалыд? Сое, марлэсь тынад весяклы люкиськемед потэ.

- Ммм. ӧвӧл мынам сыӵе арберие.

Веранэ куспын выж шоры учки но, пыдкутчанме адӟи.

-Пыдкутчанме понысал!, - шумпотыса ик верай.

-Малы? - паймем синъёсын учкыса, юаз пияше.

- Малы, малы! Пыдкутчанме мон синмаськыса басьтӥсько ук. Нош дыр ортчыса, со урод луэ. Жаг куянэ куштӥд ке, со отын мукет жагъёс пӧлын сисьмоз. Нош кӧня со тынэсьтыд пыдъёстэ утиз. Тынад аслад но сое куштэмед уз поты ни, сокем дышод со борды. Нош кӧня ке дыр ортчиз ке, со пыдкутчанэз та коробкаысьтыды поттыны луоз. Соку тынад улон шоры учкемед воштӥськоз ни. Кин тодэ, вуж пыдкутчанэд шоры учкыса, тон тодад ваёд ортчемзэ но серекъялод азьвыл улон шоры учкемед вылын.

Я. Табере мыным мукет коробкаос сётӥзы. Пушказ понӥзы пичи туп, но тодыны косӥзы, кыӵе фигура ватэмын со коробкаос пушкын. Татын мон копак "пукси". Йырам кыӵе фигура лыктӥз, созэ ик верай ни.

- Тон кыӵе факультетын дышетскиськод? - юаз пияшкае.

- А вот тодэ, тӥ монэ со фигураостэс тодыны косӥськоды ук, - серектӥ мон.

Тӥни сыӵе эскеронэ сюри мон. Малпасько кӧня ке но юрттӥ дыр, со психологъёслы. Но соослэн сюлэмъёсазы паймон но мынян гинэ кылиз кадь. Мар йырам лыктӥз, со ик верай. Мон понна, вань веранэ зэм вал.

Пусъёно нуналъёс.

Куинь нунал талэсь азьло зориз. Зор усиз но соку ик кынмиз - сюресъёс вылын, лымы вылын, курткаос вылын йӧ кылдӥз. Кӧня адями гылӟыса, усизы, дыр, но сӥтянъёссэс шуккизы. Та нуналэ ваньзы кытчы ке но дырто вал, дыр, вань шутэтскон интыосын бадӟым черодъёс луылӥзы, соин йырин стресс. Соку вал "басурманский" праздник.

Тӥни котькуд сыӵе нуналъёсы возьмаськод мае ке но. Возьмаськод, возьмаськод, но номыр но уг луы. Мылкыд куашка да марда, собере ӝытпал зорыны кутске.

Нош луысал ке огшоры нунал. Номыр но ӧд возьмасал. Туганэд отын огшоры нуналэ лыктысал ке тон доры, лэсьтысал ке кузьым, сю поллы шумпотымонгес луысал. Малы ке шуоно: тон ӧд возьма со кузьымез, со вал шуак! Нош кыӵе шуак! кыӵе ке праздникъёсы. Та нуналъёсы сӥтян ӝуа ини, возьмаса.

Соин ик огшоры нуналъёсты но яркыт карыны тыршоно. Котыр адямиосты пусъем нуналъёсы гинэ ӧвӧл шумпоттоно. Соосты весяк пальпоттоно, шудо кароно.

Тау!

"Брезентовая цапля"

Туннэ мон "Брезентовая цапля" нимо постмодернистской литературной ӝытын вал. Татын авторъёс асьсэлэсь кылбуръёссэс лыдӟо. Яратоно кадь ӝыт. Но, жаляса верано, туннэ со вал берпуметӥез. Андрей  Гоголев, кин вылын та уж возиське вал, Ижкарысь кошке. Жаль.

Андрей Гоголевлэн творчествоеныз мон кык ар талэсь азьло гинэ тодматски ай. Нырысьсэ мон соин кылбур лыдӟонъёсын тодматски кадь, точно уг тодӥськы ни. Но тусбуйзэ адӟем бере, соку ик синмаськи. Синмаськи солэн котькуд выросэзлы, кылызлы, куараезлы, тыбыраз кылдэм лёгезлы, гожъяськемъёсызлы - солэн образэзлы. Тани татысь шедьтыны быгаткоды солэсь гожтосъёссэ. Яратӥсько посмодернэз. Яратӥсько Андрей Гоголевез.

"Брезентовая цапля - со тужгес но кужмоез, мар мон та карлы лэсьтыны быгатӥ", - шуиз со. Сыӵе ӝытъёс Ижкарын ожыт, яке, шонергес верад ке, воксё ӧвӧл. Куинь ар куспын та ужрад туж тодмо но кылбурчиослы бальзам кадь луиз. Яке шуод Аракы, кудӥз гожъяськыны выль мылкыд, мукет кылбурчиосын тодматскыны но ӵошен узырмыны луонлык сётӥз.

"Цапля" усьтӥз выль пинал усто кылбурчиосты, кылсярысь, Мария Абих. "Цапляын" нырысьсэ кылбуръёссэ лыдӟыкуз, солы 14 арес гинэ вал. Нош кыӵе кужмо вал ини со. Таня Репина, али дырлы солэн "Монография" нимо бичетэз но потэмын ни. Но трос мукет мужикъёс (нимъёссэс уг тодӥськы ни, оломар но эн малпалэ, озьы ке туннэ Мария Абих  гинэ нылъёс пӧлысь вал, кылемъёсыз ваньзы мужикъёс, удмурт кылбурчиос пӧлын мукет суред, нылъёсгес кылбурало, кыӵе пӧртэм тӥни).

Тодматске, тани со:

Вӧсь (святой) кадь Гоголев.

Тани та кофтаен туннэ но вал. Фото 1,5 ар талэсь азьло лэсьтэмын.

"Человечество" нимо кылбур бичет но "Ленин. Самолет. Девушка" прозаез книгаосын потэмын ни. Прозазэ пдф версиен татысь лыдӟыны быгатоды. Лыдӟе, со постмодерн, Тӥледлы кельшоз, со туала. Но со туала Гоголев кошке Ижкарысь. Кылдозы на меда литӝытъёс? Мон шуисько: "Луозы. Одӥгез ке но, "цапля" кадь ик регулярно, подпитанно, стимулирующе, тепло... но мукет адямиослы, мукет кылын, мукет визьмын". Возмалэ литӝытъёсты, кин яратэ литератураез.

Тау!

Водка ворме...

Пукиськод тазьы 3 часын уйин, чай юыса, вераськыса. Со дыре мар гинэ йыре уг лыкты. Нош эшед кошкемез бере, комнатаын шыпыт луэ. Ваньзы сизьыметӥ уйвӧт адӟо ни, дыр, нош тынад кӧтыд гинэ чоръя. Пукиськод ноутбук азьын, нош пеляд тодмотэм крезьгуръёс проводъёс кузя вуо.

Тани, кылсярысь, "Лукошко" вузкаронниысь учыр. Мынам горд йыро юлтоше отын загоратьтэ.

Лыктэ, пе, кассае воргорон. Кияз - чекушка, нош синъёсаз - валантэм мылкыд: басьтоно водкаез яке ӧвӧл. Юанэзлы валэктон утча:
-Басьтӥ ке, нош ик кышноеным йырсиясько ук. Туннэ зарплата басьтӥ вал, ӵапак туннэ ик кышно но командировкаысь бертӥз. "Уг юиськы", - шуи ни вал солы. Басьтом-а?
-Ма асьтэос тодӥськоды, - шуэ солы горд йыро юлтоше. Нош аслыз тросгес барыш поттыны кулэ.
- Я, бен, басьто но. Карточкаен тыри ке, СМС кышнолэн телефоназ вуоз. Кин со СМСъёсты но малпам. Азьло соостэк но капчиен улӥськом вал ук. Нерад каро копак. Кисыям но трос уксёе ӧвӧл. Кӧня сылэ таи мынам? - весь кассирен вераськыны турттэ.
-Чекушкады - 87 манет.
- Ой, мед-а мар-а ни, ыы ведь. Кышнолы "сю манетме ыштӥ" шуо!

Куанерлэн сюлмыз ӧз чида. Кышноезлэсь кышканзэ водка вормиз. Водка ваньзэ ворме: уксёез но, начар улонэз но, семьяез но, йырез но, сюлэмез но, яратонэз но. Водкаез меда мар ворме?